文章

顯示從 9月, 2011 起發佈的文章

金融幼兒班

中央決心人民幣繼續升,但敵唔過市場力量,繼早前香港嘅離岸價,連在岸價都失守。 人行開出嘅中間價,定喺6.3623兌一美元,再創05年7月、匯率改革以嚟嘅新高,係三日以嚟第二次。 唔止升穿6.37水平,百分之0.57嘅升值幅度,更加係七個星期以嚟最大。 但係去到交易時間,喺上海嘅中國外匯交易中心,根本做唔返咁高,頂多只係見過6.38水平,差距有成達2百點子。 嚟到香港,離岸價更加就更低,只係造到6.42兌一美元附近,低水幅度由上星期、破紀錄嘅百分之2.5,收窄到唔夠百分之1,但仍然高過歷史平均水平。 市場價忽然急跌,華爾街日報形容,人民幣政策而家只係「幼兒級」,市況突變,係幫積極將人民幣國際化嘅中央政府,睇清咗現實有幾殘酷。 更令人擔心嘅係,人民幣國際化進程會唔會再受阻,甚至好似08年嘅危機咁,停止升值步伐,甚至容許少幅貶值? 市場而家有兩大隱憂: 1.外貿順差減少 2.驚大陸好似08年咁停止升值。 蘇皇就話有可能。貿易逆差收窄、實際匯率升幅加快,同美元大幅上升,人民幣貶值嘅可能性,比3年前大幅增加。 當年為咗抵禦金融海嘯、引發嘅出口大跌而唔再升值,提高出口競爭力,金融時報形容政策成功。 失去咗「必升」嘅光環,就連本港嘅人民幣債券市場都受拖累。 債價急跌,點心債嘅平均回報,由4厘半急跌落1厘2嘅水平,唔少諗住嚟發債嘅,包括馬來西亞投資公司,計劃都推遲咗。 當然亦不排除人行係有意夾大鱷,將憧憬人仔升值的炒家擊退!

上帝出手

話說上星期默克爾同教宗會面,由天上既事慢慢講到凡間。 「我們討論了金融市場表現(教宗都會睇指數??),仲表達左作為政治家,我們制定政策是因為人、而非由市場作主。」 作為第二次連任、任期剛屆滿一半,默克爾的政治前途已經繫於五隻豬的身上。 雖然話唔會被市場繫著鼻子走,不過面對星期一有史以來最大規模的洗倉潮,更有主見的政客相信都難作抗拒。 面對荷蘭芬蘭等成員反對擴大救市基金,將現有既四千四百億歐元「歐洲金融穩定機制」EFSF槓杆化,成為左唯一出路。 消息話,歐盟正考慮推行金融穩定機制槓桿化計劃,由歐盟成員合組成立一間、「特殊目的工具」SPV公司,向佢地作出抵押、發行債券,透過呢個種子基金,最多可以倍大「八倍」槓杆,預計集資最多二萬億歐元,作為購買歐洲主權債券。 SPV債券亦可以被歐洲央行認可為貸款擔保嘅抵押品,向歐洲央行借入資金。 歐債一個大問題,市場表面被一個當局可能將救市基金槓杆化消息,大為受落。 但認同既話,要搞清兩個問題,第一,你真係信歐洲? 第二,有呢樣野,係咪問題完全解決? 的確,歐洲問題已經惡化到唔見棺材唔流眼睙既地步。 但歐洲做事,效率奇低,傾一個方案最快要六星期。歐洲仲有幾多個星期呢? 就算歐盟成員全數通過,但肯定由拍板到執行,少則兩,三個月。除非假設金融市場毫無風浪,否則中間仲有唔少變數。 更大核心問題係,將歐洲救市基金槓桿化,只係顯示歐洲無誠意。槓桿化方案,透過基金發債,集資所得用嚟買問題主權債,一嚟過份假設市場完全運作無問題,其次係根本反映歐洲國家唔肯再出錢、歐豬五國亦無能力作財政改革決定! 救市基金有四千幾億歐元,計埋救希臘,同注資俾有問題二十間銀行,所剩得千幾億歐元。就算將剩餘資金,用八對一槓桿倍大,筆錢只係相等於歐洲主要銀行出年八千幾億債務到期要再融資既金額。 係人都知,以歐債問題規模,救市基金先要加碼,下一步到底用嚟買債,定係救銀行,依家根本唔需要傾著。 歐洲算盤似乎擺明係拖美國,同基金組織落水,實行我出事,你付鈔。 不過好似金融時報話,將EFSF槓杆化係走對左正確既一步,以二萬億歐元既規模係足以拯救歐豬五國,單計經濟規模最大既意大利、未償還債務亦只係有一萬六千億歐元。 事到如今,連同歐洲央行減息半厘,半推歐洲版QE,總好過咩都唔做等死。希望平息到市場恐慌,以免再有歐洲銀行出

歐洲高血壓

當默克爾公開對著電視機話自己有高血壓、要接受治療,有資深中環人已經暗叫不妙!!!   作為政治女強人,又係全球影響力最大既女姓,新一代鐵娘子公開話自己身體有事,表面就係公開想搏同情。   但想想戴卓爾夫人在位十一年內,幾時見佢呻過辛苦?   唯一一次就係喺人民大會堂前跌一跤、就尊定左今時今日香港既命運!   所以金融時報專欄話,從未見過歐洲既政治家、上星期喺華盛頓出席IMF年會時候,個樣係咁恐慌!   計我話,係市場對著佢地個樣感到恐慌先啱!   一場希臘債務危機2.0,就完全暴露佢地手足無措、做事荒失失既表現,好似FT批評,明明已經係系統性風險,但就將EFSF設計成只係針對細少國家,又完全學唔識玩財技、連點做槓杆化都唔識!   佢地一日都黑只係講: 不要歐元債券 不要救市基金 不要歐元區解體 不要拯救銀行, 淨係識係度講NONONO。   當危機己經擴散到下一階段,班「大帝」仲係喺度糾纏到底係要對EFSF作技街性修訂、定係要收抵押品,徹徹底底係Behind the Curve!   其實到今時今日,歐洲既未來、已經完全繫於一個EFSF身上,市場都開始擁現更多有建設性既建議,有經濟學家就建議比EFSF一個銀行牌照,等佢地可以喺歐洲央行身上取得資金進行槓杆化,一旦擴大到四萬億歐元,何止希臘,買起晒五隻豬都不成問題!   難得係有大行居然係叫歐洲學我地曾特首98年入市取經,話當年政府入市買起一成半流通量藍籌,就成功打退大鱷、幾乎令索羅斯輸突,認為歐洲一樣可以照辦煮碗。   擦鞋擦到出晒面,唔通綠藍銀行真係想趁獅子病、取代埋佢地位?   似乎歐央行亦意識事態嚴重,佢地已經考慮重新啟動擔保債券購買計劃,即係歐洲QE~!   既然歐洲可以無限量引錢,聯儲局亦唔應該再手軟,特別係面對通縮威脅可能重臨,華爾街已經唔再係講緊QE3,而係要求QE Infinity,即係無限量QE,如果真有其事,大概先可以解釋到點解歐洲市可以有反彈!

睇錯市

一個 OT2 害死股市,熊仔橫行,作為依靠佢地既大行,都要面對「落雨收遮」既物理定律 ! 如果今年頭同你講,話高盛會蝕錢,你肯定話係天慌夜談,但今日已經有大行落 Call ,話第三季業績,高盛「蝕硬」 ! 巴克萊計數,估計高盛第三季每股盈利、由之前估計賺2點4美元,修訂為要蝕35美仙,將會係呢間投資銀行09年以來、再次出現虧損,亦係佢地歷來既第二次! 原因其實都不難想像,無論股市、商品大跌、加埋大 deal 買少見少,第三季不論金股匯波幅都咁驚人,算你叻仔安全過到八月,到九月呢一浪恐怕都難以全身而退 ! 另一個反映高盛氣數已盡既證據,係佢地不斷睇錯市 ! 繼早前站錯邊、撐錯伯南克OT2,搞到要出補充報告,之後仲要再連環失手! 佢地既策略員先叫人繼續買商品,仲特別唱好銅價話未來十二個月可以升四成,點知一場環球股災,就令銅價即日跌近一成! 另一個仲經典,高盛既貨幣策略員落下「世紀賭注」,就係買歐元沽美元,仲要定出目標價喺1點55! 結果都唔使多講,高盛要喺歐元跌至1點35後止蝕,話明帳面虧損百分之四。 輸錢事少,但以過去高盛保持過「百日不蝕」既紀錄,廿四小時內三度落錯 CALL ,以「布蘭克費恩」昔日呼風喚雨既 Track record ,真係好難想像,難怪近日不斷有傳聞話佢明年會「起身」 ! 當然、蝕錢既大行,唔止高盛一間,大摩更被傳喺法國既 Exposure 超過390億美元,仲多過佢地本身市值,而包括美銀、摩通、花旗、富國、高盛同大摩呢一季既盈利預測,呢個星期就再被調低百分之七! 而家最驚係作為大行一旦收遮、既會緊縮信貸損害經濟,同時「瘦身減磅」、裁員潮第二波分分鐘成為感恩節禮物! 環球銀行肯定會有下一輪裁員潮,睇番轉頭、匯豐之前喺本港裁員三千,可能只係一個序幕 ! 又話本港失業率得百分之三既 ? 都係算吧啦,有生之年見唔見到, Who care!#

雷曼時刻

作為研究三十年代大蕭條既經濟學家,伯南克「翻用」 1961 年既扭轉操作OT2、雖然成功將十年債息、推到記錄新低,不過就害左股市,加快環球市場步入熊市。 經濟學家 David Rosenberg 總結OT2點解令市場失望,佢話一來扭轉操作原理係沽短債買長債,希望可以將長期利率推低刺激放貸,不過就會損害銀行既邊際利潤,未見其利先見其弊。 同時三十年債息大跌,亦擴大左退休基金既虧損,需要贖回填補資金缺口。 不過更重要係滿足唔到市場期望。OT2時效會到明年六月,「羅森堡」話,市場解讀成為未來九個月,聯儲局只會以靜制動,換言之市場期望既QE3,喺呢段時間都唔會出現。 諾貝爾經濟學獎得主克魯明都同意,美國經濟已經陷入流動性陷阱,「扭轉操作」唔可以改變市場對利率走向既預期。 其實大家又有無想過,要評定 OT 是否成功,股市可能不是唯一指標 ? 要說股市反應, QE1 及 QE2 不是初期表現突出嗎,但結果 ? 大家明白,由於大量印鈔將資金流向資產市場,結果令各類風險資產水漲船高。但結果是資產價格與實體經濟脫節,一旦印鈔完成,股市要回歸基本,近日的大跌市已經說明了一切 ! 所以不以股市、相反以債息來看,十年債息不是已經跌至新低 ? 問題是下一步會否反映在實質放貸上。 話說回來、既然市場不受落,咁伯南克係咪已經技窮 ? 華爾街日報話,聯儲局而家係等待一個更合適既時機。 原本由一日既會議變成兩日,據了解會上除左討論 OT2 既利弊外,公開市場委員會花左大量時間,商討點樣向外界傳達、將利率同通脹就業目標掛勾,以及調低超額存款準備金率,甚至進一步擴大買債既可能。 但要等既、係一個更合適機會。 要明白伯南克一面要面對國內「叛國」指控、甚至共和黨夠膽死冒干預聯儲局獨立地位都要發信警告伯南克,就知這群政客已經輸到失去理性。 就像「黃金戰士」潘國光所說,與其現在加推措施只會令錢如流入大海,倒不如等一個真正「雷曼時刻」來臨,例如希臘違約,可能更收效果 !

眾志成成

真係咁天真以為講幾句就可以救到個市? 歐債危機,火燒連環船,金磚五國同二十國集團,擔心再拖落去,一發不可收拾,準備隨時出手。  二十國集團發表聯合聲明,會用盡一切辦法,提高歐洲穩定機制嘅靈活性,必要時,會向銀行提供流動性,確保銀行有足夠資本,應付危機。  成員之一嘅日本,亦話如果有需要,日本會向基金組織注資。  既然眾志城城,金磚五國亦話出手,會協助歐洲,解決債務問題。 不過聲明無講,佢地會提供幾多資金,同埋點樣救,只係話,會按自己國家情況,量力而為。 市場而家最希望見到嘅係,中國可以繼金融海嘯之後,再做一次白武士。但呢個願望,可能 會落空。  人行副行長易綱話,中國會繼續投資歐洲,但真正解決到債務問題嘅,都係要靠歐洲自己,中國可以做嘅,其實好有限。  既然大家明白,不論豬二十定金仔四國,都是口術多於實際,所以任何反彈又變成短線炒作。 回看過去一個星期全球股市蒸發左三十四萬億美元市值,幾乎等同上次熊市損失。  數一數MSCI 環球指數,更由五月既高位回落更回落兩成,技術上步入熊市,係繼09年後、兩年來第二次步入熊市。  跌得多既、當然就係歐債危機既主角,希臘、意大利累積高位回落四成、就連歐洲最大經濟體德國,一樣跌左三成四。  身在地球另一邊既亞洲一樣唔好過,內地同港股高位回落兩成三同兩成八,恆指高位跌左七千六百幾點。  但喺全球五個主要市場中、仍然有五個可以免跌入熊市,包括八月掀起降級風暴既美國,其他仲有英國、加拿大、新西蘭同新加坡。  花旗話,今次環球股市大跌、完全係因為全球政府政策失誤,缺乏協調,先做成今日局面。  你會問熊市既然來臨,投資者應該減持、定搏一搏趁低吸納? 著名投資者BIGGS就話,經濟衰退危機加劇,佢嘅股票持倉量,已經由半年前最多8成半,大減到得番兩成。  不過借鑑歷史,又往往見到危機同機會係一齊出現。 兩年前熊市來臨,環球股市啱啱跌兩成後、喺零九年三月見底,之後展開左年幾既升市,累積升幅超過一倍。  睇埋數據,整體市盈率跌至十一倍,估值同樣係零九年三月以來最低,同過去十六年平均水平比較、低左四成。 還記得當年邊個最早告訴大家股市已見底,可以趁低買? 知唔係就來無得做的總統囉!

Bold Ben

琴晚有分等FOMC 聲明既、相信都會等到「頸都長」埋! 由原來兩點三公布,最後遲左足足十五分。  無錯,之前有人話轉軚最終又唔轉,不過聯儲局做嘢有規有矩,無理由咁肉酸! 遠在番邦既兆富提出陰謀論,話有留意會發現、聯儲局公布聲明既幾十分鐘、穆迪鬼鬼祟祟調低左一系列左美國銀行嘅信貸評級,仲要係逐間逐間出,初時大家都唔為意,點之連埋分聲明睇、就知大件事,銀行股亦應聲急挫!  點解OT2對銀行殺傷力咁大? 各位都了解銀行賺錢係靠拆入短期資金、再放長貸賺取息差,而家一TWIST就將情況逆轉,即時影響銀行息差,難怪華爾街日報話伯南克比左「曲線火球」比啲銀行,唔燒傷都「燙」手!  唔止投資者被玩、大行一樣全部睇錯市,最樣衰係高盛、先係喺聯儲局發表聲明,「懶」係高興話聯儲局進取,唔怕擦鞋同「Bold Twist」去形容今次措施,點之之後見過市愈跌愈多,死死地氣出多分補充報告,話雖然係Big Twist,「But Not everyone Dance!」,即係唔係個個有分,「補飛」意圖非常明顯!  作為大行之中既大行,高盛昔日既光環似乎盡失,唔通反映氣數已盡? 講番成效,有評論話今次伯南克既OT2規模大、仲要額外送多一分「Twist of the Twist」既MBS 賀禮,金融時報話係「勇敢」嘗試,華爾街日報形容伯南克部署進取。  匯豐計過,雖然OT2比QE2少左二千億美元,不過年期就拖長左兩年,拉勻其實效果相當,美林更索性將佢等同QE3,話效應一啲都唔弱!  雖然伯南克心知樓市先係目前最大隱憂,但奈何就算再減到息,對一眾有樓一族都係幫唔到,因為美國叫呢批人係Underwater,本港就叫「負資產」,相信全世界以香港人最熟悉呢個名辭!  更令人擔憂係唔少企業實際係都以借短錢續命,而家伯南克反而沽短債買長債,分分令到短期資金緊縮、企業無左流動性就加快玩完,豈不是拿石頭砸自己隻腳?  而扭轉操作亦對聯儲局構成風險,因為長債價格一向比短債波動,一旦通脹繼續升溫,聯儲局好大機會會錄得虧損。  話到最後,都要講下呢個OT2 中文譯名,有行家用「扭曲操作」來翻譯,但到底TWIST 何來扭曲? 而且扭曲頗有負面之意,正如雷鼎鳴教授說不大合適吧? 喺整體二萬八千億美元既負債表不變前提下、頂多只係扭轉左組合既內容,用「扭曲」來翻譯、似乎真係有啲「扭曲

思故人

一個死左65年既人,今時今日無論係學界、報章、電視、甚至係Blogger都仲係廣為引用,可想而知影響係幾咁人! 上網search 下凱恩斯個名,喺今時今日呢啲風雨飄搖日子,絕對仲係熱門上榜! 有人歸疚今時今日既世界混亂、凱恩斯係罪灰禍首,不過亦有評論認為呢位七十年前帶領全球經濟走出大蕭條既經濟學家,到今時今日仲係一位救市英雄! 對於過去兩年失業率都超過百分之九既美國人來講,如果凱恩斯未死,佢可能預言比大家聽,黑暗既日子仲未來臨,隧道既盡頭仲係無盡黑暗! 套用今次金融危機喺三十年代,07至09年既危機、凱恩斯會話比大家聽、呢個只係Chapter 1! 到Chapter 5先至係大蕭條既真正開始,到時既失業率會比而家高近三倍,而惡性通脹更家會令所有人既實質收入,到時只會得番而家既五分之一,而全國更有三分一人口,會跌至貧窮線下! 愈講愈恐怖,雖然前景黑暗,不過凱恩斯絕對唔係悲觀望主意者。 曾經為諾貝爾經學獎得主John Nash、寫自傳「有你終身美麗」既紐約時報專欄作家納澤,就用A Sunny Economist 來形容凱恩斯,話佢即使喺最黑暗既年代、對前途仍然可以保持樂觀! 凱恩斯除左講過"In the long run we all dead"外、仲有一句名言,就係"惡夢會喺天亮既時候過去"、相信人係有能力應付任何既危機! 其實現今既量化寬鬆、正係當年由凱恩斯率先提出,就係佢提倡央行要不斷增加貨幣供應,直至通脹來臨。 而當呢個貨幣政策都唔能夠達到目標,凱恩斯就寫左佢既不朽名作"The General Theory of Employment、Interest and Money",提出"大政府"政策,增加財政開支刺激經濟! 呢個正係當今環球經濟面對既局面,納澤話,如果想像凱恩斯今時今日出席CNBC節目,佢最可能會同大家講既說話,會係叫大家出外Shopping! 因為佢知道、只有正面既思維,先可以令經濟走出蕭條! 環顧今時今日既政客、中央銀行家、以至各大少評論員,都沒一個有凱恩斯呢種樂觀主義,所謂「亂世思故人」,我地都真係要諗諗多報道一啲正能量先得!

路線圖

希臘同歐盟、歐洲央行以及IMF 呢三頭馬車、開完二日電話會議,希臘財政部發聲明指,會議取得良好進展。 表面話係有信心,不過金融時報話,方案仍然有唔少暗湧。 最明顯係整個談判、重點已經由加稅建議,變成要求希臘盡快削減開支,其中希臘政府被迫同意、裁減2萬至2萬5千個喺舊年僱用嘅公務員,另外幾千名公營機構嘅僱員,亦可能要「六折」出糧。 金融時報話,咁正係反映債權人已經對希臘採取加稅既建議,失去耐性,認為裁員先至係最快解決問題既方案, 不過呢個建議就觸怒大量民眾,喺雅典、有大批希臘公務員上街示威,反對緊縮措施令佢地失業。 金融時報亦質疑、裁員方法係呼可行,因為現任執政黨其中一個最大支持者、正係來自工會。 歐盟、歐洲央行同基金組織嘅代表,下星期初會重返雅典,評估新緊縮開支方案嘅細節,不過基金經織表明、除非希臘接受一切條款、否則首席代表湯娒森唔會重返談判桌。 其實到目前呢個階段,要撤底解決歐債問題,可行既路線圖得三個。 市場原本最大期望,放左喺歐盟提出既歐元債券慨念,不過德法由於擔心會失去三個A主權評級,喺佢地反對下、歐盟主席巴羅佐立場都有變,佢話要長遠考慮成立歐元債券機制既可行性,不過都承認,既然德國強烈反對,短期內要推出係唔可能。 咁擴大現有既四千四百億歐元金融穩定基金係咪可行? 最大變數係十七個成員國係咪可以團結。芬蘭同丹麥都先後表達左有保留,而作為最細少既一個成員,斯洛文尼亞政府正面臨倒台,分分鐘可以令整個拯救計劃失敗。 更何況要擴大基金,就要先搵到新錢。 巴西雖然考慮充作白武士、為歐元區提供嘅資金援助,建議金磚五國,直接向基金組織注資100億美元。 不過,其他四國有保留,因為印度、中國同俄羅斯早前已經承諾向基金組織,合共提供700億美元嘅援助,要再加碼並唔容易。 事實係、前人行貨幣政策委員余永定已經表明,中國唔應該再買歐洲債券。 既然現有方法唔可行,剩底既、就係希臘違約、以及退出歐元區。 金融時報主筆馬丁沃夫話,要接受希臘違約唔難,問題係幾時發生。 但要希臘退出歐元區,馬丁沃夫話任何建議後果都係災難性,退出國家第一年就要承受經濟百分之五十既損失,其他歐元國亦要面對貨幣以及銀行體系風險。 佢認為最有效方法,係歐洲央行即時採取量化寬鬆措施,同時為南歐國家作出削債,先

悲劇英雄

希臘同最大兩個債主舉行電話會議,表面對人講就話"Productive",但了解實情既人都知,係"Destructive"先真! 一面債主認為希臘既削債措施做得唔夠,但已經採取左既緊縮計劃,就令政府估計今年經濟增長、會衰退百分之五點五,失業率就由兩年前百分之八,跳升至而家一成六,即係經濟陷入左嚴重萎縮! 不過作為債主好少會理債仔感受,IMF、 歐盟同歐央行呢個「三頭馬車」,已經要求希臘2015年前、削減十萬個公務職員,要求部分公務員六折支薪、同時舊年開始招聘既二十五萬個公務員職位,要全部撤回! 呢張名單仲未完,三頭馬車要求希臘加煙稅、加酒稅、加奢侈品稅、仲要加物業稅,加加埋埋,就算救到財赤,經濟都幾肯定出現大衰退! 果然夠絕! 簡直拍得著九七金融風暴後、IMF對南韓同一眾國家既手段! 呢啲措施當年喺亞洲可能仲有效,不過去到歐洲呢個民族性咁強既國家,係咪可以收效? 你睇每日數以萬計既上街,就知反對勢力有幾大,但更令當地人擔心,係另一批人既另類反應。 希臘人既自殺率、喺歐債危機中直線飊升,今年頭五個月,就增加左四成。 幾乎每十萬個人中、就有六個自殺,數字比起危機前多左一倍! 睇數字你可能覺得唔多,美國同樣平均比例係十個,不過呢個數字相信係低估左,原因係意大利人對自殺係相當「羞恥」,教堂甚至唔准自殺既人舉行葬禮,所有唔少人寧願話家屬係意外身亡,都唔想話比人聽係自殺! 呢類高危人仕年齡介乎三十五歲至六十歲男性,通常都係家庭經濟支柱,因為面對失業令自己睇唔開! 華爾街日報就詳細講左一個食物供應商既小商人、點樣比銀行拖數,到挺而走險掉轉頭想呃番銀行,結果走上絕路! 情況就好似應驗左希臘悲劇英雄伊底帕斯王Oedipus既神話,為左社會同家庭衰失左自己既男性英雄型像,變成一無所有。 故事中既伊底帕斯王、最後係自殘雙眼,索性無眼睇,計我話,呢個係全世界投資者既反應先真!

和而不同

預左會議會再加碼救經濟,包括啟動沽短債買長債嘅政策工具OT2,購買七至十二年期債券,預計涉及最多四千億美元左右,有經濟師樂觀估計可以令經濟提升零點四個百分點,同時創造三十五萬個就業職位。 不過伯南克明白單係一個OT2、成效唔會超越得過QE2,佢需要既、係一個可以管理公眾以及市場預期既政策工具。 為左咁,伯南克搵左費城行長Plosser普洛瑟,以及芝加哥聯儲銀行行長Evans埃文斯,協助副主席耶倫Yellen,制定政策、點樣向外更好解釋聯儲局既立場。 華爾街日報話,埃文斯同普洛瑟兩個都係局內數一數二既經濟學家,仲周不時會拍檔打高爾夫球,但兩個人對世界既睇法,根本就係「南轅北轍」。 一個係鴿派,埃文斯講過失業率唔回落到低於百分之七點五,聯儲局就唔應該調高利率。 至於普洛瑟就係傳統鷹派,八月會議既三人「叛變小組」,佢係有分投票反對凍結利率兩年。 不過普洛瑟既反對立場未必好似市場估計咁強硬,佢喺八月會議後幾日,就打電話比伯南克,話自己一向支持佢既領導。 呢個工作小組目前最大任務、就係將聯儲局維持低息對通脹以及就業市場既影響,制定具體指標向公眾解釋。 更多主流媒體提出,伯南克已經採取左英倫銀行既相同策略,就係容忍通脹、以低息推高經濟增長,不過紐約時報就話,聯儲局內部未必好似市場預期咁、太早公布刺激措施,市場可能係太過寄予厚望。 雖則FOMC開會,大家係度金晴光眼望著OT2時候,原來伯南克更強調係點樣令聯儲局既政策可以更有透明度! 雖然表面上唔同聯儲局理事,往往會發表一啲「飛禽類」既言論、即係唔係鷹就係鴿,不過呢個正係伯南克心中最想達到既局面: 「和而不同」! 就算表面更唔啱都好,聯儲局理事對伯南克都係心中尊重,好似成日有意唔同既費希爾、都讚伯南克願意聽意見,覆電話既時間,仲快過自己「老婆」! 佢有個貼士比大家,雖然伯南克成日拋好多意見出來比大家選擇,但通常中間個一、兩個Option,先至係佢既心水,咁來緊點解讀FOMC 聲明,大家識點啦!

丟架

有時做人真係要有自知之明,如果唔係擺明被人「丟架」就無謂! 美國財長蓋特納一心諗著以強人姿態到波蘭、向一班歐盟財長面授救市「錦囊」,點知人家唔領情不特止,仲話要講點樣解決債務問題?美國你留返比你自己啦! 比利時財長話、蓋特納你應該聽多過講,奧地利財長更直接,話美國基本因素仲差過歐洲,蓋特納有咩資格向我地比Advise? 容粗俗講句,就係「慳返啦」! 仲記得九十年代金融風暴之後,美國被稱為「拯救世界委員會」,今時今日一個美國財長遠遠飛到歐洲,成個周末被一班咁既人奚落,都係個句,面係人地比、架就自己丟啦! 好似兆富咁講,到底蓋特納真係唔知世界變左? 定係佢真係咁高明、識一招釜底抽薪,比位班歐洲財長自己出事? 金融時報Lex話,成個會中令人頹喪,正係被蓋特納講中,就係顯示歐盟內部既不團結。 或者三年前美國比歐洲幸運,係當年雖然民主共和兩黨不和,但都未發展到今日你有你講、我有我講既混亂局面! 特里謝何嘗唔係用心良苦,一再強調而家係時候動手唔係動口、但又有邊個會聽得落佢講既野? 作為「救世委員會」成員之一、美國前財長薩默斯都代蓋特納發言,炮轟歐盟的不團結。 薩默斯形容過去兩年歐債危機、爆發既時間愈來愈涉密,最終會損害到歐洲當局既公信力。 更令佢不可思議係、既然作為歐洲代言人,前法國財長、國際貨幣基金組織總裁拉卡德,既然提出左多個可行建議,但為何不獲歐洲接納? 拉卡德提出、包括歐洲各國應採取擴張性財政政策、以及要求銀行增加資本,但呢啲建議都得唔到歐盟內部正面既回應。 像金融時報所講,其實呢啲建議已經過左最佳時機,不論歐元債券或ECB 無限印錢,而家一切都已經太遲。 其實各大傳媒都已經為希臘破產作定最壞作算,一旦違約會引發何種經濟政治事故,只可以講句,後果無法衡量,沖擊亦一定比08年更大。

成魔之路

過去幾年,市場、政府博奕.敢講.政府輸幾條街。 淨係講金融業監管。究竟雷曼事件過後.政府口口聲聲加強監管,佢管倒啲咩? 四年前,法興魔鬼交易員違規,累銀行勁蝕四十幾億美元.四年後,歷史又重演! 瑞銀前交易員「阿多布里」正式被英國警方拘捕左啦,揭發出,原來佢就係沿用四年前、法興另一個違規交易員相同既交易模式。 識佢既人,鄰居,同事,通通讚佢為人友善,有品格,諗唔到佢係新晉魔童。 「阿多布里」上星期三facebook留言,話要奇跡出現。 到星期四,終於知點解。 佢,同四年前法興交易員凱維埃爾一樣令公司蝕大錢,金額唔同,但同樣輸喺一項交易模式。 就係Delta one。 Delta One在統計或財務學上簡單解釋係、用相等衍生產品,去追蹤核心資產既回報,仲要得出相同表現。 簡單舉例,睇好商品前景,按Delta One模式就係購買相關衍生產品,一嚟成本低,但回報會一樣。 阿多布里令公司輸大錢,係佢買入大批ETF即係交易所買賣基金。 隨著市況波動,正股,匯市,同商品價格劇變,ETF由於涉及衍生產品,輸得仲傷。 瑞銀今次要遲到星期三先發現,反映本身內部問題外,亦帶出ETF對金融業有系統性影響。 英美評論指,禁坐盤交易後,靠ETF做Delta One 自行交易模式,為投資銀行製造盈利唯一途徑。 結果令到ETF大量充斥,近年每年增長兩成。 估計投資銀行從Delta one獲取盈利,今年就有百一億美金,高盛佔最多,有十二億,出事既瑞銀預計都有五億。 唔通真係出得來行、預左要還? 一直支持金融業改革,加強監管既英國金融時報就話,瑞銀事件都有正面影響。 佢地主筆馬丁沃夫撰文一開始就多謝瑞銀,話原本現市況,外界對係咪要金融改革有保留,但瑞銀事件,令市場無借口抗拒監管改革。   咁樣對世界來說,這類魔童至少還有存在價值,對不?

自由去「死」?

克魯明專欄中,將佛利民FREE TO CHOOSE,改為FREE TO DIE。 佢唔係唔尊重大師,只係暗串政客水平。 事緣係一個電視節目中,主持問議員一個人成世唔買保險,突然發現身患重病,咁應該點?! 議員答,咁每個人有自由選擇權利,但克魯明就演釋為,每個人有自由選擇死亡權力。 其實,克魯明心目中想撐、係美國醫療改革,骨子裡係大政府主義既新凱恩斯主義信徒。 唔係批評克魯明,而係望政府打救,希望出現強而有力救世主,係依家西方主流憧憬。CNBC一篇文章,就提到依家經濟環境,金融市場混亂,令人懷念八十年代列根,同戴卓爾夫人。 人行政策委員李稻葵更直接,據佢所分析,依家國際複雜,千蒼百孔,比八十年代更差,所以要有一個比列根、戴卓爾更強既領袖出現。 的確,人生命將至,大禍臨頭通常都係訴諸神佛。其實同依家情況一樣,無論CNBC,定李稻葵都係錯。 因為,希望有「新列根」出現,係希望政府咩都唔做。相反,依家市場共識仍然係想出事時,有政府無限介入。更何況,有認識都知,列根任內八年,只理大政策,大原則,其餘佢咩都唔理。所以,佢任內寫俾夫人南茜既信,有增無減。 列根代表自由市場。金融海嘯三年,央行聯手干預有違自由市場,當然,危機出現政府不能坐視不理。但要問係,呢三年嚟,政府係咪做多左,又或者做衰左呢!! 呢個問題,可能永世無答案。而現實係,政府之前行為,已經建立左市場對政府會不斷出手不斷干預既預期。 而市場依家部份預期,亦已經去到政府無法承擔地步。 除非市場投降,或者政府突然強勢、果斷,否則呢場博奕會不斷繼續。金融市場會出現無間道式,三年、又三年,用太多三年都解決唔到,恐怕最終都不能回復原狀!

魔童轉生

歐債危機、巴塞爾資本協定,對銀行既破壤力、原來都唔及一個違規交易員。 瑞銀披露一個投資銀行交易員,因為進行未授權交易,令銀行出現二十億美元既虧損。 英國警方已經拘捕瑞銀倫敦一個三十一歲職員,外國傳媒就廣泛報道,話佢就係倫敦ETF交易部門既董事Abodoli「阿多布里」,懷疑同事件有關。 仲誇張到起埋佢Facebook/ Linkedin底線,原來而家要人肉起底真係好容易!英國警方就話,事件涉及瑞銀倫敦分部一個三十一歲既交易員,佢已經被捕。瑞銀表示,今次既違規交易,會令佢地第三季蝕錢,同時強調,客戶無受到事件影響。 事件令市場震驚,分析員原本預計今季瑞銀盈利可以超過十五億美元,點知一次過、就被一個交易員輸晒。 數著名「魔鬼」交易員,四年前同樣喺歐洲出現過,零七至零八年期間,前法興交易員「凱維埃爾」、就係因為進行未授權交易,令銀行錄得49億歐元虧損,係歷嚟最嚴重嘅詐欺案。 再數前,95年前霸菱交易員利森,因為炒輸日經期指,令銀行損失13億美元,最終令到有233年歷史既霸菱倒閉。 有分析員話,二十億美元既虧損對瑞銀嚟講係可以承受,但喺經歷過咁多既違規交易後,瑞銀今時今日仲會發生呢類違規交易,係令人難以置信。 事件反映瑞銀內部風險管理有問題,並破壞今年先啱啱重建嘅市場信心。瑞銀零八年因為金融海嘯虧損左近4百億美元,最終要瑞士政府注資拯救,近年業務先至重上軌道。 有國會議員表示,發生今次事件後,佢地會強制要求瑞銀分拆投資銀行業務。其實呢類「魔童」「魔鬼交易員」每隔幾年就會出現一次,但無論銀行同監管機構、始終都無辨法吸收事件教訓,每隔幾年就爆煲大! 更令人奇怪係、幾次重大違規交易,都係出現係歐資銀行,到底係佢地既交易員特別鐘意「穿櫃桶底」,定係歐資銀行既監管出左問題? 既然講到「交易員」生涯,其實每日都係喺炒賣之中渡過,每一刻都係諗緊方法賺更多既錢,舊年就有本書描寫呢啲著名交易員同對沖基金,書名叫「More Money than God」,真係非常貼切形容左呢類規模龐大既基金。 既然神都唔放在眼內、何況係一個少少特區政府! 美國對沖基金經理Arkman就對賭,港元會大幅升值三成,話現價吸引會大手買入。 受消息影響港元輕微升值,由尋日7點802一度升至7點795水平,唔通真係反映市場信心有變? 其實阿曼都以少搏大,佢只係買入港元期權,擺明唔需要真正等脫勾或者一次升值, 只要港元升

失去靈魂的思捷

承認品牌失去左「靈魂」,業績番到十八年前水平。   思捷全年只係賺7千9百萬元,主要受旗下店舖網絡嘅一次性重組成本影響,扣除特殊項目,盈利仍然差過市場預期。   為左進行策略重組,思捷策略性撤出左西班牙、丹麥同瑞典零售市場,包括關閉六十五間分店,集團同時決定剝離北美洲業務,關閉九十三間直接經營店鋪,兩項重組就需要作出廿四億重組開支。   思捷話,過去幾年忽略左以前優良既承傳、流失客戶凝聚力。為左挽回客戶信心,會展開一項四年嘅轉型計劃,總投資超過一百八十億元。   計劃包括未來四年、投放六十八億喺品牌傳訊,同增設新採購辦事處,目標係四年後可以節省每年十億開支。   結果業績一出,思捷股價大跌,尾市仲愈跌愈多,令成個交易大堂經紀都起哄! 收市都跌近18%,跌到03年6月以嚟低位,單日市值蒸發41億。   形容自己過去無左靈魂,管理層話佢地要重奪你地女士既芳心,末來四年會投資一百八十億元,重建品牌,但未來兩年盈利無可避免會受影響。   現實係思捷唔係匯豐,香港人對思捷唔會有感情,所以股價已經反映,股東老早跳船。   跳船仲有當日一眾管理層,到依家跳船原因仲係一個迷。亦搞唔清,係思捷無左舊管理層,先搞成咁,還是係根本思捷一早有問題?   如果從前大股東邢李源之前舉動,一早有答案。佢零二年首次減持思捷,加加埋埋套現二百億有多,股價降到權益披露亦無需要公布,怕而佢已經一股不留。   如果邢先生係唯一理解思捷既人,即係思捷可能仲要跌,因為佢零二年首度減持思捷,係每股十三個一毫半,即係呢個價,佢已經覺得超出基本因素。   思捷全年業績,就算扣除重組開支,亦遠比預期差。撇開歐美,本港同內地零售增長,完全唔及格。有理由相信,根本思捷現任管理層都係後知後覺,好遲先發現出左問題。   思捷二月時中期業績展望,對前景唔算樂觀,亦唔見悲觀,最少出現過復蘇呈現幾個字。但到今天,思捷竟然可以形容自己品牌幾年嚟失去靈魂!!!   思捷荷蘭主帥最初上任仲滿肚大計,但只要有巡鋪,睇人流,思捷無左靈魂唔係呢幾個月發生。似乎只有兩個情況,第一,佢之前完係唔了解公司運作,第二係,思捷一眾管理層,全部發緊夢。   思捷算老實,又或者紙包唔著火,所以暗示,重推品牌呢廿四個月期間,業績或受影響,即係呢兩年內,大家唔需要對思捷有希望。   但思捷現金流大減,再用一百八十億強化品牌,要問係,錢從可處來?   思捷品牌定

天真?

歐洲到底咩事。其實到依家都無人搞得清楚。   歐洲人整體仍然有錢,搞到咁大件事,講到底都係政府窮,大洗慣之錯。   所以今日歐洲,明日美國一定無錯,但市場唔睇得咁長遠。相對性效應下,美國成為最安全,美債成為歐債問題大贏家。   歐美評論太多有關歐債分析。金融時報主筆馬丁沃夫Martin Wolf,算寫得非常到題。   佢明確提到,令佢擔心歐債,唔係降級,違約,而係意大利都有官員私底下話想退出歐元區。   歐洲可以點收科? 強而有力應對,但整個歐元區政府都唔係強勢。反而馬丁建議夠新鮮,就係德國,甚至荷蘭,奧地利都齊齊退出歐元,咁問題先有曙光。   而目前既選擇只有兩個,一個係歐洲央行向頻臨破產既政府同金融機構,提供無限量既流動性,另一個選擇都係要提供無限量流動性,但德國就會脫離歐元區,最終令匯率波動、出口大跌,並撤底摧毀過去兩代人重建歐洲既努力。   馬丁沃夫話,無一個領導人願意面臨呢一種選擇,但默克爾而家喺時候需要作出勇敢決擇。   馬丁見解唔係天馬行空,而係暗串默克爾大勢而去。默克爾撐希臘言論,表面係正面信息,但根根本本,就係講俾部下聽,警告佢地唔好再亂發言。   由此可見,根本整個德國政府,嚴重分歧已經到左白熱化。   再將馬丁嘅分析引伸,事到如今,不論係默克爾落台,定係德國退出,總之無一個龍頭阻頭所勢,歐元區先可以去得更加放。   遺憾係,少至德國內部,大至歐元區各首腦,都有諗法,似乎任何歐洲官員言論都不能盡信。   好似歐盟巴羅佐,公開話研究歐元債券方案,市場信佢就會係太天真。   因為巴羅佐一直主張無止境拯救,同德國立場唔一樣。   巴羅佐言論唔應該認真,但歐洲希望中國做救世主亦太過天真,反映歐洲已經去到望天打掛情況。如果不斷拖,全球市場會活喺傳聞,同憧憬之下。咁既不如早啲任由股市大跌算!

朋友

歐債危機終於有一個終極解決方案!   China Buy!   意大利官員日前都放風,話中投公司會做白武士,即時令環球股市倒升,可見威力有多大!   到訪問中國既法國外長朱佩,就顯露出歐洲希望中國再做救世主既心願。   佢除左明確提到,希望中國支持歐債外,更將依家歐洲問題,提升至全球層次。仲話,歐洲唔得,全世界都有事。   英國傳媒話,危機升溫,依家市場一聽到中國兩個字,就非常雀躍。   彭博,同華爾街日報更形容,中國成為左全球最後借貸人,比國際貨幣基金組織,同聯儲局更緊要。   的確,作為全球最多外匯儲備既國家,中國三萬幾億美金,夠買曬意大利債務。難怪,意大利要主動搵中投幫手。   但凡事都有代價! 總理溫家寶喺大連達沃斯論壇發言時話,願意向歐洲伸出援手,但條件係要歐洲提早幾年,承認中國「完全市場經濟」地位,以顯示出對方「朋友間」既誠意!   溫總講得咁白,係由於歐盟、美國等國家,一直未承認中國完全市場經濟地位,令到中國企業喺反傾銷訴訟上,處於不利位置,所以溫總先咁緊張,向歐盟開出救市條件。   但正如華爾街日報所講,歐洲方面唔可以太天真,因為中投管理緊只有四千億美金,只係少部份係買債券。   英國金融時報亦指,中國舊年救過希臘,救過萄葡牙,同出手買過西班牙債券,到頭來,中國帳面虧損之餘,亦證明「中國」呢個名,唔足止令歐債問題止跌。   佢地評論更指,與其逼中國再買歐債,不如叫瑞士央行出手,咁更符合對方利益  。   國際有保留之外,樊綱,同余永定兩名前人行貨幣政策委員,亦提醒內地要三思,因為歐債風險比之前大好多,這方面都反映內地都有反對聲音,對用國家錢救經濟有一定保留。

宿命

匯豐星期三公布有史以來最大規模既裁員行動,估唔到事隔兩日,滙豐香港出現高層人事變動! 出任香港匯豐總裁只有一年時間,馬凱博對唔少香港人仲係一個陌生名字 匯豐公布,馬凱博會離任,下星期一生效,佢既職位就會由集團總經理馮婉媚接任。 信入面、馬凱博既上司,匯豐亞太區行政總裁王冬勝、只係提到馮婉媚係理想接任人選,但對馬凱博、就隻字不提。 馬凱博離開匯豐後、會出任貝萊德資產管理亞太區主管,佢係喺87年加入匯豐,先後擔任過資產管理同私人銀行業務主管,被認為係集團明日之星。 舊年最高層人事變動,歐智華接替紀勤出任集團行政總裁,當時馬凱博受命由歐洲調返本港。 四十四歲既馬凱博、而家負責匯豐香港日常營運,銀行喺星期三先公布裁員計劃,未來三年會裁減三千個職位、主要係後勤部門員工,亦係匯豐喺本港一百五十年來,最大規模既裁員行動。 金融時報話,馬凱博今次離職,對歐智華構成另一個挑戰,因為貝萊德作為全球最大基金公司,近年銳意轉型,希望將客戶層面由主權基金擴闊到私人銀行,特別係中國既市場,呢方面正係馬凱博既專長。 真係「反正豬肚就係X」? 更複雜既係,貝萊德正係匯豐最大單一股東。年初歐智華仲要專盛搵Blackrock 取經及交代策略日安排! 涉及咁高層既變動,加上時間上咁巧合,難免令人有所聯想,有學者都話,唔排除集團高層因為對裁員有爭拗,所以導致人事變動。 呢件事令我諗起當日馬凱博上司、現任亞太總裁王冬勝,當日身處渣打總裁、一樣係因為集團本港要裁員,結果當日又係憤而離職,但估唔事隔多年,同樣既事又再發生,只不過係身分逆轉! 不過高盛一樣派定心丸,話對匯豐有信心,原因係信歐智華會帶領匯豐回復浦偉士時代策略。包括定位清晰,審慎控制資本。 高盛相信,匯豐股本回報有機會上番一成半,而現水平股價已經反映業務無增長,估值太吸引喎!

2015

華爾街日報形容今次係奧巴馬明年大選前、最後一次機會。 紐約時報社論話,面對著全國一千四百萬搵緊工既人來講,奧巴馬終於行出左重要既一步。 有研究機構估計,所有措施落實,可以每個月帶來多達五萬個新增職位,有助推低失業率。 不過方案係咪有效,最重要係佔左整個開支過半數既稅務優惠,係咪能夠獲得國會通過。 奧巴馬計劃今個月十九號、再交代一個龐大既削減赤字措施,同時會交代埋今次剌激措施既資金來源。 雖然共和黨內多個重量級人物、對減稅方案唔滿意,甚至部分拒絕出席,不過華爾街日報話,共和黨亦急於希望有措施可以刺激就業,因此對奧巴馬表示左有限度既支持。 好似共和黨眾議院領袖博納,雖然在奧巴馬演說期間全程黑面,仲死唔肯企起身拍掌,不過之後都要比面,話奧巴馬嘅方案值得考慮,仲提希望兩黨攜手。 至於搞到奧巴馬發老脾拍枱的共和黨二號人物坎托,都要話稅務減免對市民的確係提供到一定援助。 現實係奧巴馬,伯南克,同特里謝,未致於空頭支票,但結論係叫大家繼續等。 遺憾係,全球仍然迷失,零利率之下貨幣政策仲有無效,無須多講,但連經合,同基金組織都似乎別無見地,叫央行繼續寬鬆! 具體係點,又講唔出。總之只係識指三道四,話要做啲嘢! 奧巴馬由三千,變四千四百幾億美金,目標只係連任,只係凱恩斯主義,同左傾民主黨最後爭扎。 佢不斷叫共和黨支持,但邏輯上講唔通。因為按佢思路,只要反對其中一項建議,就會被列入黑五類,負上反對增加就業嘅死罪。 講俗啲,係「明屈」,正正反映總統先生,已經去到強弩之末! 克魯明貴為諾貝爾經濟學獎得主,但立場同街坊評論無異。由於奧巴馬多加一千億,佢即時變臉讚好。 四千幾億話唔多,亦唔少。主攻一兩項目標,可能有成績。 但奧巴馬偏偏鍾意萬事俱備。其實,最終四千幾億亦可能會浪費晒! 美國出招,救唔到全球。下一回G7點出牌,可能有一場好戲。正如李兆富同高盛論點,央行搞亂救市,曲線提高其他資產市場,令資金不再避險,亦大有理據。 明知區內央行不斷增持,西方咁聰明,亦唔會益你買「平貨」。 信貨幣戰爭呢套,瑞士變相聯匯之後,會唔會日本央行嚟緊都有類似行動? 可憐資金第時要去股票避險呢? 留意2015呢四個數字。內地已經半正式公布,二零一五會人民幣自由兌換。嚟緊四年中美大戰,香港主場。從近期舉動,似乎當局已經有共識,但俾貨幣升值配合國際化之餘,銀根唔會鬆。炒政策,似乎打定輸數!

未來銀行

下星期三就係雷曼兄弟倒閉三周年,作為金融海嘯源頭,到底銀行界呢三年做左啲咩改革?   金融時報組織左一系列專題,探討銀行業前景同發展模式。   佢地發現,三年嚟,銀行模式同風險、唔單止無改善,反而矛盾愈來愈深。   一方面,商界同政客投訴,銀行信貸愈收愈緊,根本難以取得貸款。   銀行就話,監管要求愈來愈高,需要持有既資本比過去增加三倍,資金壓力就令利潤收窄,股本回報只係得番三年既一半,結果令股東離棄佢地。   監管機構作為中間人,面對既兩難係到底繼續收緊準則、減少系統風險,定係喺經濟再次陷入衰退既時候,放寬規則要求銀行業支持經濟?   令情況更壤既係、作為三年前拯救銀行既政府,而家反而成為銀行既負累。   政府債台高築、主權評級被調低,結果係持有呢啲主權國債既銀行,資產負債表反而被市場質疑。   作為全球銀行業界組織、國際金融機構IIF預測,一旦新既巴塞爾資本協定生效、令全球銀行需要額外增加13000億美元,而集資咁龐大既金額,將會令環球利率未來五年推高三點六厘,以及全世界經濟倒退三點二個百分點,同時會令銀行界削減七百五十萬個職位。   現實係唔使等2015年,今年以來,全球金融業已經裁員八萬人,其中六萬五千人都係來自歐洲銀行。   單計一間匯豐,上半年已經喺英美、法國同拉丁美洲,裁員五千人,夾埋合共已經佔左總數一成。   有銀行話,佢地傳統經營模式已經備受考驗。   諷刺既係、由於監管成本增加,銀行既資金成本比起大企業仲要高,根本唔可能再靠貸款增長,但對中小企亦因為擔心信貸風險、而唔願意借貸,令銀行持有既流動資金、比正常時間高左六倍。   要爭取「藍海市場」,「西向東移」成為左銀行界既共識,不過金融時報話,就算中國市場增長再快,都無可能容納全世界所有銀行家,何況、中國亦唔希望被迫變成資產泡沫。   爭論不休、但事實係永遠唔會有結論,無論係銀行界、監管機構、以至政府同銀行既客戶,都要思考邊一種既銀行模式,先至真正符合大部分人既利益。

生豬肉

繼續跟進下滙豐裁減三千名員工既消息。   琴日我地計過裁員人數佔總數一成,原來匯豐刻意「報細數」,當中計埋恆生在內,如果單計匯豐自己,其實係七個員工入面、有一個已經要被裁!   何止,工會估計,當中有一半後勤員工會失業!   咁大事件,管理層選擇唔出來回應,最慘係兩隻招牌獅子Stephen 同 Stitt,成為左出氣工具,又要食「生豬肉」、又要見錢開眼,連打爛飯碗呢個死猫都要食埋,長為匯豐擁躉真係難過。   見唔見人其實都係公司選擇,不過作為本地最大僱主、以及擁有發鈔銀行獨特地位,匯豐有幾點係需要向員工、股東、以至客戶市民回應。   1. 點解匯豐要向成本收入比率只有43%既香港首先開刀? 如果計目標水平,其實香港早已達到歐智華定出既48-52%目標! 是否有人因想向管理層繳功入董事會,而刻意犧牲員工向老闆擦鞋?   2. 之前管理層兩次講過香港唔會大幅裁員,今次出爾反爾、似乎唔係簡單講兩句話自己會繼續請人、就可以胡混過去喎!   3. 客戶服務點樣保證? 過去匯豐都有幾次嚴重既系統故障,好似今年一月銀行服務癱瘓,五月又發生過網上銀行故障,幾次事故都係後勤服務有關。   有工會計過數,滙豐嘅後勤員工,大約有7千名,佔人手比例大約三成,按滙豐裁員三千嘅計劃,差唔多一半後勤會被裁走,到底點樣保證服務唔受影響?   而作為監管者既88樓,係咪又只係當「事不關己」就算數?

惜日罪孽

一個月前匯豐公布中期業績,當日管理層同時公布全球裁減三萬人,當時大家都第一時間問歐智華,香港會唔會裁員? 當時行政總裁歐智華仲實牙實牙齒,話本港唔裁員,相反仲要增聘人手,點知事隔一個月...... 亞太區總裁王冬勝,向全體員工發信,表示集團展開既業務策略重組,香港亦必須減低成本。 佢話,匯豐唔需要複雜既架構同官僚作風,因此有空間提升效益,佢地有責任令香港成為集團更強既一部分。 王冬勝話,佢地決定將重點集中喺銀行後勤部門架構,減少管理層提升效率,目前由於仲係喺初步階段,因此好難確定有幾多職位會被裁減,佢地而家只能評估,未來三年會約有三千個現有職位被削減。 以員工總數二萬八,後勤人員一般都只佔兩成,而家一次過裁三千,即係無左一半後勤,日後點樣營運? 其實成件事,最令人關注有兩點: 匯豐早前公布全球會裁減二萬五千個職位、當時提到首先會撤戍一些欠缺成本效益的市場,例如俄羅斯、美國及部分拉丁美洲。 但今次作為首五個要進行架構優化地區,除美國巴西墨西哥外,居然係仲有賺緊錢的香港同加拿大? 這是否反映呢三個市場重要性已經下降? 還是有人因為心急交數、要表現自己而犧牲下屬? 固然,環球金融業喺今次危機中可以話首當其衝,今年以來銀行業全破就裁減左七萬人,單係匯豐就裁左五千人。 金融時報Lex曾經過用Sin of the Past來形容歐智華上任後、在策略日提出重組同裁員,正是反映佢當日有分一手做成的殘局。 這進入了第二個部分,就係08年金融海嘯,匯豐即使三度裁員,總數都只係650人。 點知今次反而裁減三千人咁多,作為本港龍頭企業、私人市場最大僱主之一,採取咁保守行動,所謂「一葉知秋」,大家對未來經濟前景點睇,裁員行動會否陸續有來? 相信大家都應心里有數!

明日職場王

債王格羅斯金融時報揮筆,估唔到佢文筆有一手之餘,整篇文章,睇完令人有唔少啟發。 債王鴻文,表面係力數伯南克不是,話佢印鈔,話佢凍結利率,鬧佢可能OT2。其實,要鬧一早就有鬧過,為數亦唔少。債王犯不著浪廢時間,講一的大家都知嘅事。 債王真正帶出信息,係金融業已死,就算有幸生存,亦光輝日子不在。呢個,亦係不能否認事實。最簡單,金融機構從來係利用息差,大玩槓杆,但無論長息,短息都咁低。毫無槓杆可言,就連基本存貸業務亦好難做。 無槓杆,市場好難「發」大。長,短債息全數質低,做資金管理,資產調配,亦絕對大廢武功。槓杆,存貸,以至投資,三大環節通通唔掂,格羅 斯其實係想話俾全球央行行長,特別係伯南克聽,唔該俾條生路我行! 以前,金融係碗好飯。但既然,呢行業少則衰多幾年,大則要進行第三次革命。帶出問題,準備入大學嘅準社會棟樑,基於前途,唔讀金融,財經,可以揀邊科!! 千其唔好揀新聞系,因為唔符合新一代短視特性。亦切記唔好讀經濟,事關經濟學家經常被批評,只係識研究,或運用理論,用大堆博物館搵出嚟既圖表,去分析已經過去嘅除年舊年,再用除年舊年引證今時今日。但講到前贍性,從來係後知後覺。 既然唔想只係識吹水,扮代表。又無資格做醫生,大狀。金融業已死,但會計仍然都有可為。經濟差,多公司執笠,經濟好,多公司上市,會計點都有生意。有埋專業會計資格,完來行去銀行借錢,息都低的。 你又會問,會計太悶,想有前途,又唔想咁多人爭,仲有咩揀!其實有,真係有,全人類都要食,食品荒,環保污染影響食品供應鏈仍然持續,從呢方面諗,答案呼之欲出。 讀農業啦!十幾廿年嚟,呢方面人才斷層。只要研究到一、兩招,大搞有機菜、養健康豬,實發!故事講到尾,金融海嘯之後,唔好對行業再幻想,新一代準備做農夫啦!

又來聯匯

瑞士經濟差,兼有通縮,瑞士央行作為一個非正式央行,決心盡地一鋪,同歐元掛勾。 站喺瑞士立場,無可厚非,對整個國際金融市場,影響卻可謂深遠。 有人認為,瑞士係全球央行聯手行動第一步。但似乎過於低估全球市場複雜性。瑞士變相再行聯匯,其實正正顯示,全球出現「亂匯」現象,就係匯市基本上立立亂。 瑞士靠出口術,就算干預後,匯價仍然偏高,唔會一,兩次干預令我地買到隻「平」勞力士。 瑞士央行干預,個案太多。最經典一次,莫過於一九七八年。 七八年,瑞郎亦係持續上升。瑞士央行當年單方面干預,三星期內全世界都信瑞士係認真,事關瑞郎兌當日馬克,期間跌左兩成。 但當日,匯市簡單得多。瑞士對象只係當日一個國家,一種貨幣,就係馬克。但依家,單一貨幣,多個國家,仲要無限大熱錢,瑞士有無當日咁好彩? 唯有祝佢好運 高盛資產管理主席Jim O'Neill,就支持瑞士央行既做法,話干預雖然唔能夠解決所有問題,但最少係為邁向更平衡既金融市場,行出重要一步!  不過背後唔係無代價㗎! 舊年瑞士央行因為干預瑞郎升勢,而錄得210億美元既虧損,有分析話瑞士央行已經動用佢地既終極武器,接著落嚟就要睇央行同市場之間既博奕! 瑞士,同香港本來無大關係。但瑞士今日同香港一樣,都選擇同一隻無前途,或者問題多多貨幣,作為掛勾對象。背後,前者別無選擇,後者可能係不敢決擇。 瑞士情況,反映金融市場無真理可言。純粹學院派、滿肚理論之士,會話歐元有問題,同歐元掛勾更絕對有問題。但呢個只可以作為完美假設理論。揀呢條路,唔代表瑞士一定錯。 金融市場唔會有真理,係每個市場參與者本身信奉真理就賺錢,你賺錢就係要對手蝕錢,呢種利益行先,轉嫁風險模式既遊戲,抵消真理誕生。  市場人士飽經閱歷,當然可以十秒內,講出十個瑞士央行同歐元掛勾理由。亦可以三分鐘內,井井有條咁講到咩叫聯匯,咩叫貨幣發行局。  如果以為貨幣發行局,就係固定匯率,而呼籲要匯率浮動,未免未認真研究發行局機制! 瑞士進一步落閘,由今日起金融市場再添亂局。全球市場遊戲規則劇變,再靠以往一套半生熟以自為真理,未免太睇少食慣金融飯嘅香港人。 多做事,少說話,尼日利亞聰明得多,作為油組主要成員,全球主要產油國,尼日利亞有大把錢之餘,夠膽買單邊,公開外匯儲備部份用嚟買人民幣資產。理由係信人民幣會成為儲備貨幣。 尼日利亞可以話俾我地知,市場可以有信念、但非真理!

真理?

講要自由浮動就容易,有沒有想過如何落實? 人家對沖基金一旦做你世界,一邊散布撤資消息一面做雙邊套戥沽空港元期指,又或者反手大手吸納港元期指,炒高之後再散貨,你又如何應付? 仲有,居然敢說脫勾後形勢有變又再掛勾? 你當市場傻既? 邊有人信你? 無公信力的貨幣發行局有何公信力? 不錯,講得大聲唔代表你無禮貌、只係代表一個人心虛!! 辭窮則氣現,不能心平氣和討論,只懂聲大夾惡就是專家??其實牛頭角順嫂都明白市場不可能完美,市場都有失效時候,君不見三年前的金磚海嘯? 我們不是贊成永遠實行聯匯,因為任何制度都有代價,自由浮動一樣有它的壞處: 過去香港是一個出口港,沒有實質天然資源,聯匯容許我們與貿易夥伴定價時可以減少匯兌風險。 今天的香港、匯聚的不再是貿易,而是人材資金及資本流動,對一個如斯開放的市場應實施何種貨幣制度,當然可以討論,但永遠將自由市場掛在口邊,只懂將經濟理論當成真理,恐怕那不是太天真、是太傻了吧!?

三面埋伏

「歐、美、中」,已經成為當前最大計時炸彈。 先說美國,上星期五一個就業數據,真係嚇死唔少人,政府職位都預左無,但私人市場只係增長得萬幾分職位。 仲巧合係全數被減少既政府職位抵銷晒,令新增職位變成零、有無咁「蹺」? 所以諾貝爾獎得主克魯明話,呢個「零」字,加埋一個「二」字,正係反映市場已經discount左衰退來臨! 所謂「二」字,係指十年債息跌穿二厘,面對如此狀況,奧巴馬已變成克不容緩! 周末先後呼籲增加鐵路高速公路呢類基建投資,希望保著數以萬計既職位,之後又向商界讓步,要求環保部門撤回一項、被指阻礙創造職位既環保條例,原因係問題已經克不容緩。 所以克魯明話,奧巴馬唔應該再理會政治同國債問題,應推出一套規模龐大既基建計劃,咁先可望挽救就業市場。 相比美國,歐洲係死症,再任由歐債問題無止境繼續,美國嚟多十次QE,對全球作用都係於事無補! 歐元區由十幾年前未實行,已經被批先天不足。當日歐元區成立初期,成員國總算係半斤百兩,實力相若。 但之後,唔少次級歐洲國家,已經當左歐元區係一個有實力嘅俱樂部,紛紛入會。 結果,先天不足最後搞到問題惡化。靠歐洲減息,唔會救到問題,期望歐央行不斷買債,唔好忘記,歐央行無印鈔功能。 全球最有權力的女士,看來已技窮,今年輸左五個地方選舉。佢既前任施羅德、無官一身輕,為歐元區獻計,建議係盡快成立UNITED STATE OF EUROPE。 簡單講,係連馬城條約入面提及歐洲國家主權地位,都被中央化。正正式式歐盟技術上會成為各成員既主權國,既有貨幣、亦有財政管理權。 施羅德理據係,共同貨幣大前題、或先決條件,係要有共同財政,經濟,同社會政策。 有人話,呢個顯示大歐洲主義復興,甚至話係德國趁火打劫。點都好,施羅德構思,引起即時反對。 歐債問題,正如荷蘭所講,係要先搞出一個退出機制先得!! 貨幣基金已經連續兩個月減少向歐洲金融機構斥出資金,對沖基金亦大幅減少對歐洲銀行業融資。如果無錯,或者不幸言中,希臘即將違約,歐洲會有金融機構出事,到時問題可能更惡劣! 不過要數真正令人憂慮,仍然是「第三隻腳」! 有留意內地政經局勢,其實近日不難嗅出混亂局面。 人行到底是收緊定擴大貨幣政策,市場莫衷一是。 好似傳要擴大銀行存款保證金繳存範圍,包含埋

森巴啟示

巴西突然減息,表面小事一宗。但再次顯示,全球中央銀行呢三年?一直進退失據。 投資者最驚,唔係經濟衰退,而係全球決策根本被市場牽動,財金官員能力備受質疑。 但有伯南克行先,更多央行做盡傻事,都係出師有名。 巴西五兌二票通過加息,會後聲明更出呼意外?長。顯示,連央行本身都知有欠說服力,要自圖其說。但壞先例一開,巴西之外,整個南美洲負面影響極大。 巴西8月通脹率升至百分之7點1,巴西總統羅塞夫?今個星期宣布進一步控制開支,將今年政府財政盈餘目標調高100億雷亞爾,遏抑通脹升溫。 自從美國聯儲局實施第二輪量化寬鬆後,資金大量流入拉丁美洲最大經濟體巴西,刺激貨幣雷亞爾匯價急升,推高當地?通脹。 巴西央行今年除?先後五次加息遏抑通脹外,又實施資本管制,最先啟動對抗美金貶值?「貨幣戰爭」! 巴西央行一方面繼續承認有通脹壓力,但另一方面話全球經濟下滑風險增加,權衡輕重認為加息係合理。根本,巴西就係將全球經濟擺上檯,作為減息合理化理據。 的確,金磚五國之中,巴西經濟轉弱速度最快。最新估計,當地經濟只有百分之三至四增長,但通脹超過百分之七,仍然較過往平均高。全球有跟巴西經濟既分析員都話,央行應該睇定的,否則通脹唔回落,息口一減一加,整個巴西貨幣政策可信性,玩完! 有人話,巴西減息根本係政治決定,羅塞夫總統上台,未能享受前總統羅拉成果,貨幣不斷升值,俾企業不斷施壓。 最後關頭,巴西新任央行行長一月上任後,一方面堅持漸進政策,背後就承認,要同財政部多加協調。 金融時報話,巴西央行獨立性斷送。呢個?緊下屆世界杯主辦國,貨幣如果下跌,最受惠係出國搵食球星。或者原本因為匯兌因素,放棄出國搵食既球員。 巴西做傻事,令外界憧憬新興市場貨幣政策會大反轉,加埋歐美經濟數據確定衰退,九月一日已經為央行連番傻事,正式揭幕。