文章

顯示從 八月, 2012 起發佈的文章

英十招

圖片
特首梁振英始創嘅 "港人港地",究竟有定冇? 好模糊! 思歪琴日無明確講出時間表,今日,發展局局長陳茂波就講多小小,就話有六幅地皮,有機會成為首批港人港地項目。 呢六幅地、總共提供一千七百六十個單位。兩幅位於將軍澳、其餘就位於九肚、屯門、佐敦同西貢。當中嘅四幅仲會加入限量條款。 其實幾時至有? 要先過三關,首先要完成法律草擬,細節聽聞都幾複雜。 然後,政府選擇性咁揀部份地皮入勾地表,勾唔勾? 由發展商話事! 就算勾得出,都要經過投地、起樓,過程都要好幾年! 不如實際啲、講下今年批地係咪達標好過啦! 政府宣佈,第四季推出六幅地皮同港鐵荃灣西站六區招標,涉及2650個單位,只及今年推出既一半咋! 換言之今年累積批出新單位數目只有萬六個,相比政府二萬個目標,只係達標八成左右。 其實要知英十招有無成效,由業主反價買家追價可見一班! 就喺思歪公布十項措施之後當晚,就有多宗業主反價、買家追價嘅個案。 喺沙田河畔花園,一個385呎嘅迷你單位,業主原先叫價252萬,之後反價 2.5%。 最弊係買家肯追價6萬幾,以258萬承接,每呎造價6700蚊,屬於屋苑新高價成交。 用家趕入市嘅程度,可以睇下細價樓嘅龍頭嘉湖山莊,連續兩個月過百宗大成交量,推高埋價位節節向上。 即使一般貨色,都穿上四字頭至有交易。 以現時普遍放盤叫價都超越四千蚊一呎去衡量,相信嘉湖平均呎價即將破四,重返九七年價位,距離當時癲峰價,都只係相差一成二。 咁數落去,而家剩底「九七遺孤」就只有深井浪翠園,同高位比較差距仲有三成。 不過十招到底有幾大成效? 短期供應市場嘅只係千八個居屋連置安心單位。私樓供應無顯著加大,樓市專家、而家轉Buy side既張一鳴話,對壓抑樓市完全無用,更弊係印證政府技窮! Derek更話措施只係針對長遠增加供應,無正視目前投資需求過剩嘅問題,結果樓價升反而製造「剛需」! 大行亦批評梁十招無用,其中最有趣係里昂、佢地批評,當前樓價已經脫離市民負擔能力,而引證就係報章有關高樓價既報道,由七月時每星期平均兩次,增至上星期平均十次。 結果係當民意一面倒時候,結果政府又會被迫出手控樓市。 所以說,傳媒肯定都要負上一定責任!

樓市第一擊(倒???)

圖片
思歪新政府突然出招穩定樓市,一出係十招添,但睇嚟睇去,無乜力度! 置安心計劃改為只賣唔租,但出年年初,只不過推出嗰區區一千個單位! 最應該係增加供應,但無咁做!勾地權亦繼續卸番由比發展商決定! 發展商最怕嘅港人港地,CY 又話要經法律草擬,即係繼續拖! 雖然撥出 36幅政府用地改為公私營住宅用途,但要逐幅研究同諮詢,有排至落實得晒! 上個月,CY 推出新白表措施之後,已經造成反效果,樓價不跌反升,如果呢十項措施再有咩閃失,政府究竟仲有咩板斧?! 英治王朝被誤以為地產商無間道,結果上任第六十一日,正式宣布「英十招」。 十招雖多,極其量,可以稱之為住宅單位QE。 消息一出,全日忙於接聽客戶查詢既地產分析員,即時口氣一鬆。  因為,英治政府十招全數從供應著手,並無政策措施,打壓需求。 須知,話明供應,英十招內,最快明年先有一招可以落實,單位多少,有數得計? 英十招係放水,抑或解決樓市過熱,有待分曉。但樓價只升不跌預期繼續,樓價假設再升兩成,就算到英十招見效之時回跌兩成,其實,實際樓價仍然有升,還怕甚麼? 中環人話,怕既係,英治官員應對決策。君不見,良波二局,英十招大日子,全程表現不安,神態迷惘,要勞煩首長像揍仔一般。 熟識人士形容,英治房屋決策層,對當今樓市升勢,結論係,不知怎麼辦?拿一個港人港地,修訂條款也要如此左等右等,時間相當。 況且,內地人買樓比例,已見下降。 拜伯南克所,樓市政策熱話持續。特區首次引入SSD,當時樓價指數八十左右,現在是一零七了。太古城每呎未有SSD前,呎價八千四,到依家?最少萬一!!! 爵士年代,不下三度出招,事後回想,所謂冷卻樓市措施,其實係刺激樓市政策!! 過去廿年歷史,樓價要跌,每次不離一個原因,就係市場震盪。無市場震盪,利息唔會抽高,銀行唔會收緊借貸,係咁簡單。如今次計,英治 最高招數,或者係用枝鎗,指著銀行一定要加息。其次係誠邀誠哥,唱淡樓市,因為人地信佢,多個信你!!! 心清者提醒,尾市隻隻地產股跌到四腳朝天,唯獨「天字第一號」詭異式出現反彈,經此一役,相信李氏力場又再能發功!

財經通識: 解構三十年大牛市!!!

圖片

八元

圖片
十二年嚟清白之身,由一份財經大報打破,六蚊變八蚊,加幅三成三,有人話係物超所值,但更多中環人話,勇字當頭!!    賓卡大戶戲言,保持高質素誠意可嘉,如果加入超人專欄,小超日記,推廣李氏力場效應,內容足可匹敵,呢兩蚊,俾抵。   報紙加價,近幾個月時有傳聞,八蚊點嚟?正係當日報販協會建議既售價,但行業馬首是贍既報業公會,就維持由會員自行決定售價。   既然有勇字先峰,大家又會問,報紙加價熱潮會否重臨?   從成本角度,租金之外,記者人工加幅最細,紙價跌至海嘯水平,主觀上並不構成加價壓力。   客觀上,網絡媒體盛行,免費報章充斥,白紙黑字一份報紙,需求彈性已經比從前出現根本變化。   施老闆一份AM,令佢有足夠資格品評報業發展,施公近半年前已經批死,本港報章無能力加價,原因何在?   正係傳統報紙既忠誠老伴一眾買少見少。與其談論加價,施公反建議六蚊份既報紙,倒不如減價六蚊,佢樂於奉倍。   香港可以算係全球媒體行業最獨特既研究案例,七百萬人,電視台數目比外國一個州份高於倍計,報紙數目之多,令人拍案驚喜。   撇開背後,香港同其他城市一樣,報紙新舊媒體之爭,報紙出路如何,一直摸唔通。   華爾街日報由梅鐸接手,成績出奇地好,成為美國第一大報也。紐約時報追落後,網上版縮至每月僅得十次免費閱讀,但收入同市場仍然大不如前,近日要請嚟BBC總裁救亡,但業界仍唔睇好。   人人話舊媒體難有作為,WALLPAPER雜誌前創辦人高價套現後,幾年前重操故業,搞嚟一本MONCLE,財務表現不詳,但外國人眼中有一定口碑。   按呢位堅持舊媒體既老總話,傳媒業無新舊之分,搞得舊媒體,替代性非考慮之列,前題反而有於獨特性。   說回本港,報界獨立性與否,難有客觀界定,但財經媒體局限性大,卻不容置疑,雖然作為國際金融市場,但內地,歐美新聞主導,一份FT,   加兩個內地財經網站,夠料炒一個交易日。   更不能否認,香江今日既財經新聞,轉載成份比之前為多。要睇名家貼士?網上亦有大把。   所以報紙同波籮飽同價,寧選後者!!   維持質素,同改善質素,係兩個截然不同命題。財經新聞內容,有人嫌難發揮,但如果人人唔用腦,只顧搬字過紙,未被淘汰前已經先行自我淘汰。   多思考,多發掘題材,具備分析,觀點認同與否,做得到的話,十蚊都值!!! 但更現實係,地球咁大,叫得響離離去去得華爾街日報,金融時報,另

國家機密

圖片
由高精密復牌,到勒令停牌,繼而發生三年前擱置上市公司既核數師,都被算帳。 背後一條主線涉及四個字,「國家機密」是也!! 係巧合,定巧妙一切盡在不言中。 的確,國家機密一出,證監會,港交所有口難言。 誰不知,周松崗主席不能以機密為理由,拒交資料,簡單一段發言,原來已經為重頭戲埋下伏筆。 以為國金大戰遮打,誤以為放虎歸山。 中環人話,事後回想,可能係國遮合作一場壯觀劇本。 究其背後,正係以防盜高一呎,魔高一仗,俾不良份子利好國家機密檔箭牌,橫行霸道。 先係主動勒令「中國高精密」停牌,之後再搬出兩年前既個案,證監會再質疑上市公司同中介機構、以「國家機密」為理由,拒絕披露上市文件。 證監會指,安永未有應佢地要求,提供出任「標準水務」上市時既申報文件工作底稿,原因係安永指有關既會計文件、係屬於中國法例下可能屬於國家機密。 證監會質疑有關既理據,要求安永同佢地喺內地既合作夥伴「安永華明」交出文件。 今次係上星期證監會主動指令「中國高精密」停牌後,再次挑戰以國家機密為理由、拒絕披露資料,負責既正係啱啱續約三年既法規執行部執行董事施衛民。 熟識監管規則既人士話,證監會既聲明已經表明、佢地係取得中國證監會同意,要求安永提交資料,證監會係有理據展開法律程序。 但獨立評論員David Webb就擔心,由於問題觸及國家層次,對一國兩制做成真正考驗。 據了解,本港真正有涉及國家機密業務既上市公司唔多。 觸發國家機密資料既討論,係上星期被勒令停牌既中國高精密前核數師,曾經要求索取公司從事國家機密業務涉及既合約原文。但被拒。 接近監管機構消息指,鑑於近日外界相當關注中資上市公司會濫用呢個理由,故意唔披露資料,所以澄清當中灰色地帶,包括點先為之「國家機密」,同咩資料有權唔披露。 以美國為例,包括波音,通用電氣,洛歇馬丁等多間大型上市公司,都有承接美國國防部,甚至太空總署被介定為國家機密既訂單,呢的公司,一直按要求,向核數師提交合約局限於財務既資料、包括訂單金額,同銷售表現喺綜合報表內披露。但合約詳情就可以豁免。 美國證交會今年五月,亦向德勤上海公司提出強制訴訟,原因係德勤拒絕將一間喺美國上市既內地企業會計文件,交比證交會。 美國行先,香港跟尾,對象如一,就係核數師。 不同之處係,德勤被落案起訴,安永呢?就只係僅僅

明燈補習社: 開心指數

圖片

難為知己難為敵

圖片
仲記得一年前喬布斯臨終前、將蘋果「托孤」比庫克時,最後一個願望係「毀滅Android」,因為佢係一個由蘋果偷返嚟既產品。 而家,庫克可以同喬布斯講,我做到啦! 反觀對方,就仍然未消化到事件,事隔兩日,南韓報章話三星高層、仍然無法接受美國法院指控佢地侵權既裁決。 三星既高層更表示,今次法院既判決,對佢地來講係最壞既情況。佢地已經決定進行上訴。 庫克就形容,裁決對蘋果、以及全球專注研發既人員,都係一個重要日子,象徵既唔單單係專利或者金錢,而係原創同創新既價值觀取得勝利。 有參與判決既陪審員話,審訊三日就作出決定,係基於三星內部既電郵、一再提出應該將蘋果既產品特徵放到自己既產品上,加上三星管理層迴避問題,令佢地好清析作出決定。 當然十億美元對三星來說,佔今年預測盈利只有二十分一,跟本只傷及皮毛。 但華爾街日報,由判辭嚟判斷,事件做成既深遠影響、肯定高於三星要支付既十億美元罰款。 受惠Google 開發既Android 智能手機系統、三星、HTC、索尼甚至係內地品牌好似中興同華慧,喺第二季搶佔既市佔率達到近七成,遠高過蘋果兩成既佔有率,好大原因係Android做到百花齊放,「機海」策略搶佔晒中高低市場。 有美國既法律同科技界專家,日後Android智能手機既開發商,會大幅修改現有既系統同硬件,避免被蘋果起訴,結果係減慢手機推出既時間,同時係提高左產品成本,最終令消費者要付出更高代價。 其實數蘋果同三星的關係,可以用「糾纏不清」來形容,雙方既是敵人,同時又互相依賴三存。 可能各位都知,蘋果最大供應商,正是三星的晶片。 一旦三星使出大韓民族硬橋硬馬性格,停止向蘋果停止供應部件,豈不是人類科技史上一次重大倒退? 講到底,喬布斯生前認定的敵人,不是三星,是開發Android的Google。 不過由於Google 早就決定Android不收費,他們只是依賴平台帶來的廣告收益,所以蘋果雖然很想告Google,但由於沒有真憑實據對方有商業利益,根本無定埋手! 事件仲有兩個潛在贏家。 一年前諾基亞決定另辟戰場,唔採用Android而投向微軟既Window Phone系統,一度被視為失敗之作。 不過今次裁判就令諾基亞可以趁著空檔搶佔市場,而更多手機生產商預計亦會投向Window Phone陣營。 由諾基亞股價反映,

經濟師演員

個幾月前,溫家寶 總理召集中外人士 經濟座談,德銀馬 駿同匯豐屈宏斌成 為唯一外資代表。 巨牛上身既屈宏斌 無耐,就隨即上調 我國增長預測,估 年底見百分之九。 屈氏力場一度引起 市場憧憬,莫非有 料到!?? 誰不知馬 駿反而低調將 增長預測降至八不 保。個多月後,屈 氏力場隨著一個匯 豐PMI原形畢露 ,低調,終於輪到 佢!! 兩個月不足,高調 調高低調調低,只 有大行報告既股價 目標先會發生,但 匯豐終於打破習慣 ,中國全年增長預 測逼於無奈降至百 分之八,下半年預 測,第三季由八點 五,降至七點七, 第四季由八點九, 降至八點三。 政策係咪等代經濟 改善?唔少分析員 堅持一定,但甚麼 政策,具體詳情? 一,二,三、四, 五,六,七,個個 都話係減準備金。 從數字上計,人行 六月十二日以嚟, 十八次逆回購,涉 及一萬二千三百六 十億人民幣,以平 均每次準備金下調 釋放三千億計,等 於減左四點二八次 。 呢四點二八次另類 下調準備金,作用 如何?七日期回購 利率僅僅四厘樓上 ,跌至三厘半左右 ,資金繼續緊,經 濟師又話,係拉, 應該再減!!! 但銀行 界人士話,錢唔係 無,但銀行唔拆出 資金,而人仔資金 外流,銀行真係減 左息,但減既係外 幣存款利率。所以 減RRR,推低利息 ,係咪會加快資金 外流人民幣,惡性 循環與否,無人提 過! 浪花淘盡英雄,經 濟師市面供應極多 ,幾多稱得上真真 正正經濟師,不知 道!!人人鬧財經演 員,又有無質疑過 市面亦充斥大批經 濟演員,更甚係, 比財演,經濟師演員 對白更加沉悶,更 加黑板。 偶然一兩個經濟大 循環,高下即時立 見。比財演,甚至 財經記者更不成熟 ,經演誤中副車事 件頻頻,好例子之 一係內地大小省市 ,比併經濟刺激計 劃規模,加加埋埋 五至八萬億,基於 錢從何來,疑點重 重,你認真就太天 真。 諷刺係,踩地雷非 你同我,外資個別 大行部份搶閘叫好 ,話省市大計如同 及時雨,有四萬億 當年之感,正因如 此,餘下時間經濟 有救。地雷陣中, 大摩、大和四字, 榜上有名。 近幾個月,對內地 經濟形容推陳出新 ,有見底,快見底 ,見底但不反彈, 反彈後再見底,或 雙底,L底。 講到 底,內地經濟一字 總結,信。一切在 於你信與不信!! 

更待何時?

圖片
正如黃金戰士所言,QE 可能所產生的效應,已經不在股市反應,推高的反而是全球的商品市場、當中尤以農品為主,而資產市場、特別是個別大城市的樓價。 股市成交偏低、已成為結構性問題,資金已出現棄股換樓的情況。 結果是樓市持續熾熱,樓價指數連續兩個星期創出歷史新高,比起九七年高位,仲要高近半成。 地產建設商更直言,樓市未算有泡沬,相信特區政府唔會推特殊措施壓樓價。 換言之即是堅叔相信連政府都無晒符??! 睇番一、二手樓,都有新高價不斷面世。龍頭盤太古城一個頂層單位,千一呎,連六百幾呎天台,以 1780萬轉手,呎價高見萬五蚊,創出屋苑歷史呎價第2高紀錄。 連之前滯銷嘅新盤,信和同南豐合作、喺大埔白石角嘅溋玥.天賦海灣,都有破頂交易,單位三千呎、私人泳池又係三千呎,作價半億有多,呎價 17500蚊,創出項目呎價同銀碼新高。 呢類特殊成交,呢排時有出現,已經唔可以話係單一個別情況。 結果是樓價指數連升兩個星期,再創出歷史新高。對比九七年高位、高出百分之四。 至於大型屋苑同港島分區指數,亦都同時創出歷史紀錄。 今次樓市升浪由七月中、新政府啱啱上台無耐開始,六個星期入面有五個禮拜都係上升。 特別係政府澄清未係時候推港人港地、以及提出居屋五千名額可以免補地價後,進一步推高細價樓成交,帶動新一輪樓市升浪。 有代理指,而家喺新界區、要搵二百萬樓下既放盤,已經幾乎絕跡,只有喺屯門仲有二百幾個放盤,但比年初都減少左近七成。 個別成交大家可能會有疑問,但今次升浪亦有成交配合,截至八月頭三個星期,50大屋苑有1176宗成交,比起上月同期急升咗五成一。 亦幾乎拍得著今年三月、樓市最旺時候相若。 正如上篇「泡沬之城」所講,如果金記同FS只係寄望美國利率有一日可以倒升、就令樓市自然調整,我們的樓市只會愈步向瘋癲。 要增大供應、甚至適時推行「港人港地」,今天看來已是刻不容緩。 思歪要真正擺脫弱勢政府,就是要呢個時候出手,否則更待何時?

富.事.通:美國股壇夏蕙姨,美國CEO 殺手! -- Evelyn Davis

圖片
<iframe width="420" height="315" src="http://www.youtube.com/embed/aZ4aDQVud5M" frameborder="0" allowfullscreen></iframe>

泡沫之城

承上篇「有前無後」,本地又如何消化? 花旗國印鈔局十紙會議記錄一出,市場歡喜若狂。   但中環人十五分鐘時間,看畢整份會議記錄,即時反應就係,弊,大事不妙了!   花旗國大搞無限期超級量化寬鬆,香港亦變相會啟動印鈔機。零九年前後至今,香港貨幣基礎數字證明,美國貨幣政策對影港傳導性之高,難以抵檔。   香港行聯匯,錢繼續氾濫。中環人大膽假設,無事無幹,恒指三萬,樓價指數二百,毫無難度可言。   作為香江苦人,警報已響,對策不外乎二,包括盡快買樓,有幾多買幾多。二,手頭港紙,一張不留!!   歐,美印錢預期升溫,等運到三年幾,財金官員,以至特區之首,可以不斷重複外圍不明朗,小心風險,但經驗告之,每次有官府評論,資產價格愈升就愈有。   但同三年前唔同,當日中原城市指數曾經見過五十樓下,依家係一百零六以上,資金效應,樓價不跌,爵士曾當日解決唔到既問題,依家偉大特首,又有何絕招!!   話明絕招,當然要最絕。   行資金管制?基本法唔俾。退而求其,用外匯儲備將全港五萬個貨尾收歸政府旗下,轉為公屋,同居屋,但出現呢個情況,賭率係一倍一萬!!   近日天氣起伏不定,天空烏雲密布,八十八層高既景色,就係雲疊雲,總之就一舊雲。   七一之後,有人幾乎完全失縱! !歐美好戲連場,此時之刻,白頭人令人倍加掛念。如果人還在,你估會點呢!!!   BUBBLE CITY或有待拯救!!!!

有前無後

圖片
歐美主流財經傳媒都形容,聯儲局嘅議息會議記錄,發出左最強烈訊號,表明將會加推QE。 會議記錄提到,好多委員都認為,除非經濟復甦加強而且持續,否則好快就要採取進一步寬鬆措施。 而喺6月嘅會議記錄,只係話「好少」委員認為要進一步寬鬆。 關鍵係要留意聯儲局既措辭,由過去提出QE要有咩門檻、變成而家唔執行QE要咩門檻! 此措辭一改威力強大,被外界視為聯儲局「喉舌」嘅華爾街日報話,咁已經顯示QE逐漸成為局內共識,亦反映主席伯南克要推動經濟強勁復蘇既決心。 至於會推出咩措施,會議記錄亦都透露左「端倪」,話「好多」委員都預期,新嘅買債計劃,會通過壓低長期息率,同更大範圍咁放寬融資環境,為經濟復甦提供更多支持 金融時報更解讀記錄係暗示左、今次QE規模可能會「無上限」,因為同樣有好多委員認為,新買債計劃要有靈活性,可以因為經濟轉變而調整。 FT形容,議息記錄罕有咁表明未來取態,而且似乎無預留「轉軚」唔推QE嘅後路。 華爾街日報就話,佢地掃除哂成個市場,對究竟係咪再QE嘅疑慮。 其實唔使大報解讀,中環人都知伯南克擺明打矛波,印鈔目的由防止經濟向下,提升為要確保經濟繼續強勁復蘇。 正因如此,除非經濟持續同明顯復蘇,否則錢可以繼續印,美國已經為無限次數QE,打下基礎。 伯老今次出招同德拉吉如出一撤,就係出口術製造預期,果然係精人出口,而且仲成功扭轉市場預期,所以唔即使九月不印都無有怕,市場預期永不落空。

那麼多......這麼少.......

圖片
百麗管理層在記者會上講了一個大家都知道、但一直唔願意面對的現實: 「我也不知道為什麼中國體育用品出現那麼多品牌! 全世界也沒有這麼多!」 結果當然是盈利變得這麼少.......... 一年前仲被形容係基金愛股,今天已成人人棄之的垃圾股。 體育用品減價戰打咗成年, 邊間公司跑贏呢? 睇大數, 上半年盈利、得特步保持到、 其餘兩間都倒退, 361度跌兩成3, 匹克更加跌4成3。 但論跌幅,通通不及一間李寧。 一個月前將集團重組,李寧親自再披甲上彈, 市場早就預料盈利唔會理想。 半年只係賺左四千四百萬, 大幅倒退八成半, 收入就減少近一成。 期內為應收帳減值撥備六千一百萬。 存貨撥備就增加一成八, 達到二億二千萬。 半年業績唔理想, 更意料不到係全年會見紅。 李寧表示, 由於估計全年訂貨銷售收入會錄得負增長, 預計全年收入會進一步下降, 全年會錄得虧損, 將會係04年上市以來首次。 單單比較盈利已不足夠,正如幾間體育用品公司都有講,今天最重要的、不再是毛利率,而是鬥快去存貨。 那存貨幾耐賣晒呢? 361度大幅拋離對手, 只係要45日, 多咗5日。 匹克就要用近成倍時間, 足足86日至去到貨, 急升37日。 但都不及李寧,存貨周轉日數達到95日, 增加左23日。 換言之幾乎要三個月先去貨? 點做生意? 細看李寧分類業務,以服裝跌幅最大, 重挫一成九, 鞋類就跌百分之三。 收入仲錄得增長就只有我們拆局提過旗下「紅雙喜牌」,打兵乓真係有市場! 為左控制成本, 李寧期內關閉近一 千間分店,李寧品 牌零售店數目減少 至7300間。 為左釜底抽薪,李寧固然再次賭上自己,提出 三階段改革計劃, 包括已率先清理存貨、 改善成本結構, 出年開始就集中改善管理鏈管理 同改造業務模式。 但誠如百麗一開始說,歐美市場只有數目大型品牌是Winner take All! Nike, Adidas, Puma已經雄霸整個市場。 面對品牌老化(連人也一樣?),中國體育運動品牌要再一次跑出,恐怕已不是在奧運場館上空中跑個轉、就可以俘虜炒絲的心!!

財經通識: 電視的詛咒

<iframe width="420" height="315" src="http://www.youtube.com/embed/_g6Trb80D_g" frameborder="0" allowfullscreen></iframe>

「天使」逃亡?

圖片
兩個科網公司的消息,已經觸動整個大市氣氛。 要數熾熱當然是蘋果,以665點15美元嘅全日最高位收市,令到蘋果公司嘅市值升至6235點1億美元,成為人類有股票以來、全球市值最大嘅公司。 比起微軟喺九九年科網泡沫創下嘅6206億美元嘅最大市值、仲要高一點。 時移勢易,以星期一收市價計,微軟市值只有大約2577億美元,只係蘋果市值嘅四成左右。 當然分析員就一改之前悲觀立場,有分析員樂觀認為蘋果股價有機會升至1千美元1股,成為全球首間市值突破1萬億美元嘅公司。 事到如今,不少科網分析員已提出,一切成敗繫於一部iPhone 5,答案在下個月十二日揭曉。 不是要標奇立異,不過仍依我們看,作為教主最後兩件遺作,iPhone 5其實點到會大賣,問題係再下一代產品能否承繼、以及推出時間能否加快。 一天堂一地獄,反觀FB 似乎更陷入深淵之中。 PAYPAL創辦人Peter Thiel,熟悉我們的觀眾應一點也不默生,因早在「富.事.通」環節已亮相! 早對FB 有先見之明的Thiel,喺「04年」已投資50萬美元,當時公司市值唔夠5百萬美金。 係公司最早期嘅外部投資者,投資咗八年,帝爾喺fb嘅投資,大賺超過10億美元。 佢先喺FACEBOOK五月上市時,沽出1680萬股,套現6億3千幾萬美元,雖然上市後股價不振,市場蒸發一半,但對於早期投資者Thiel嚟講,仍有豐厚嘅利潤。 Thiel喺上星期四同五,以大約19至20美元嘅價錢,再出售2010萬股限售股,估計套現大約4億美元。 目前只係持有560萬股,市值1億1千2百萬美元。 華爾街日報話,Thiel大手減持fb並非唔尋常嘅舉動,特別係好似FACEBOOK呢類之前一直係私人公司,早期投資者沽貨套現係好常見。 不過作為科網界傳奇人物,Thiel咁多年來喺facebook 地位舉足輕重,身為首批FB天使投資者,此時棄船,市場無論如何都不會視而不見吧? 值得一提係Thiel作為董事會成員,佢雖少有干預公司日常運作,但喺需要時(特別是「缺水」時,即係要融資)、都會向創辦人朱克伯格提供建議。 Zuckerberg 亦在07年公開多謝過 Thiel 的支持,兩人算是亦師亦友關係。 而更雪上加霜係、facebook喺10至12月仲有三批限售股解禁,涉及超過14億股

老吾老

對沖基金被譽為係市場入面,叻人之中既叻人。 勢估不到,一年又一年,實力功架一一現形,截至八月三日為止,全球對沖基金平均回報百分之四點六,跑輸股市之王既標著五百指數同期一成二升幅。 能夠跑羸大市既叻中之叻,只有一成一對沖基金,換句說話,全球有百分之八十九既叻中之叻,原來係唔叻! 原因何在,足夠一篇論文,但歸根結尾,投資唔得,就係運不與我。 可能因為戰績差,或受干預之手左右,叻中叻既對沖基金,投資策略變得進據失退,好聽些,係無路可捉。 索羅斯為例,三十年拉勻,佢表現仍然冠絕全球,但三十日平均,佢表現可能全球榜末。 正當市場中人忙於預測市況之際,個別大鱷開始問一個問題,就係WHAT'S HE THINKING OF?? 到底索羅斯諗緊咩? 有此疑問,正正因為索羅斯買FACEBOOK吃市場一驚之後,更入股曼聯成為第二大股東,完全爆冷。 大鱷之王染指臉書,有可能喜歡其全球社交平台,推動自己哲學思想,叫做講得通!!! 但對紅魔鬼動心,市場覺得理由只有三。 一,係曼聯隱藏價值係出面睇唔到。二,佢,或者佢新婚妻子係曼聯迷,於是為博紅顏一笑。 三,最直接,索羅斯傻左!!! 盈利大跌,上市集資縮水,集資額不足還債,兼且以廿倍市盈率計,以估值衡量,唔應該係索羅斯杯茶。 既然唔符合第一項假設,除非佢或者太太係曼聯迷,否則,索羅斯真係傻!! 有觀察家話,信索羅斯傻,先係最傻,佢愈叫黃金終極泡沬,就愈買金,證明佢愈老愈精明。 再者,大鱷對球會有興趣,其實早有前例,零八年索羅斯就曾經向負債累累既意大利羅馬球會,一度考慮敵意收購,但最後關頭先至放棄。 所以,從正路諗,曼聯商譽較羅馬更值錢,曼聯可能太貴買錯雲佩斯,但只要解決曼聯四億四千幾萬英鎊負債,英國球圈認為,呢隻紅魔,價值釋放潛力最大。 美國格雷澤家族控制曼聯呢幾年,球會私有化,透明度大減,無論球迷同其他小股東對內部財務一知半解,有口難言。依家上市了,就正如巴菲特名言,潮退後就知邊個有著褲。 評論唔排除,索羅斯睇準曼聯上市,反而令格雷澤管治進一步受批評,再來一招半招財技,將真正惡鬼逼退,令紅魔鬼價值提升,到時索羅斯就會願望達成。 具具幾億,佢賭得起!!說到底,曼聯上市係錯,抑還索羅斯愈老愈精靈,我們肯定買重後者!!

DRAGHI PUT

暑假結束,歐洲主帥再要為歐債問題繼續戰鬥。德拉吉一句BELIEVE ME藥力仍在,歐洲股市已經連升十周,八七年以嚟僅僅試過五次。   歐洲人比美國可能忠厚,而金融市場更反映,佢地原來更天性樂觀!!   DRAGHI PUT,有效期可能即將屆滿,因為九月大限明顯不過。   德國媒體先刊載財長訪問,又再引述歐央行委員說話,底線盡在不言中,就係意,西可救,希臘難留。   無疑,市場情緒傾向憧憬意西獲救屬於利好,但希臘出局?三個月前形容係世界末日,何解九十日後,就全無反應?   最新版本係救市大計,係為意西歐豬之首債息設定上限,市場部份解讀為無限量買債,如果咁諗未免難得很!!   撇除救市基金規模,所謂債息上限,實際係意西國債之限,同德債債息差距設限。既然如此,亦代表將來救市基金可以買意西債,但同樣可以透過沽德債,去維持息差。   債差上限行得通嗎?學術上可以,伯南克亦研究過,但認為執行有困難,歐洲如果破天荒息率設限,首先要解決錢既問題?   無論五千,定七千億好,規模低於美國一次QE。其次,市場睇淡歐債,究其原因唔係債息高,而係債務太多,債息上設解決唔到根本問題,會唔會觸發更多資金買德國國債,曲線拉高息差,從而圖利,值得思考。   無可否認,用德債做指標,歐洲今次所謂認認真真,受益仍然係德國。明顯,只要市場睇淡意大利,西班牙前景不變,德國,奧地利,甚至法國國債,仍然受惠。   荷蘭鹿特丹大學學者早日提出更創新既解決辦法,就係息率補貼概念。   息率概念背景有二,一係歐洲無錢買債,二,係德國為首安全國家,債息唔正常既低,係歐債危機既得利益既結果,簡而言之係有發死人財之嫌。   經濟學上,呢種就係界外效應。學者認為,與其令德國為首座享其成,倒不如計算出,德國國債合理值,扣減佢地因為受益歐豬無用、額外得益節省既利益開支出嚟,作為債息補貼既資金。   簡單講,沒有歐債既話,德國十年債息可能係兩厘,但依家因為市場避險令債息只有一厘,咁德國就應該將慳到既一厘利息開支部份或全部攞出嚟做補貼,學者計算有關計劃涉及真正資金遠遠低於市場估計,但好處係歐洲唔怕無錢,德國亦無需要驚印錢。   毫無疑問,德國取態關鍵,但從機會與成本角度,相比冒其他風險,加碼救市基金等等,德國經濟同政治成本最低,亦用不著真金百銀打救歐豬。   其實如果默克爾肯起示範榜樣,下回全球金融危機,大家亦大有理由可以「劍指

恐慌

美國財赤懸崖 歐債危機 企業盈利倒退 一年前同樣既負面因素,今日仍然存在。 不過美股就曾經觸及07年12月以來新高。 令交易商大惑不解既、係有「恐慌指數」稱號既VIX 期權波幅指數,同樣創出五年新低,跌穿左14點水平,過去一年累積跌左六成。 巴克萊交易員,直言咁既現象根本係解唔通。 股市升至現水平,投資者理論上都需要透過期權對沖風險,但無論係VIX或者標普期權反映,市場既對沖活動只係持續減少。 更大風險係一旦有咩「風吹草動」,喺缺乏對沖既情況下,市場既拋售可能會引發大型股災。 一個解釋係由於大型投資者已經離場,所以大市成交少之餘更只係乾升,根本唔需要對沖。 亦有基金指VIX 指數只係對沖未來三十個交易日,以目前市況超賣程度,單是三十日對沖並不足夠。 所以由12月VIX 期貨來看,已經達到25,比起現貨月足足高出八成。 同太平洋另一邊相比、似乎投資者要擔心既問題仲要多一啲。 反映本港上市既中資企業期權 Alpha 波幅指數,舊年以嚟就一直高企喺VIX指數樓上,到上周五兩者差距達到四成一,係今年三月以來最高水平,同一年前比較、VIX指數當時係比Alpha 波幅指數高出一成。 富達基金經理表示,市場愈來愈多共識,係擔心中國經濟硬著陸會變成現實,四成既溢價已經係唔單止係恐慌可以解釋到。 睇番經濟增速已經係連續六個月放緩,上個月外商直接投資大跌百分之八,係兩年來最低水平。出口亦只係錄得百分之一既升幅。 不過瑞銀經濟師汪濤話,除非歐元區真係解體、又或者內地樓市有嚴重問題,否則再出現08年硬著陸既機會並唔大

財經通識: 內地最可信的經濟指標?

圖片

無招

圖片
磚頭誠可貴,居屋價更高,當思歪特首小型施政報告,急市民所急,居屋免補地價後,我地當日已經批死,居屋爆價,樓市升溫,結果「不幸言中」!! 樓價指數屢創新高,據報買家怕業主反悔,要臨約列明必賣必買,搶樓情況可想而知。 思歪夾民望上台,西環效應之外,仲有一班人憧憬呢位擬似八五萬規劃師,會有辦法理順樓市。 所以正如佢勇字當頭,踩外交鋼線傳召日本駐港領事之際,更有更多人想佢傳召陳德霖,曾俊華落藥調控樓價。 有分析員統計,大曾爵士時代,太古城呎價每升一成,特區就會政策出台,至今,太古城呎價破位,既然「冰火曾」多次撰文表達樓市風險關注...... 亦既然陳德霖講明要留意過度借貸風險,無理由陳曾二兄弟,對思歪大放慢板不加以提點。 又如果,思歪所托另有其人,並非冰火曾,同八十八樓,而係運房局掌門安東尼張,咁就弊。 看官仍然要時間做功課同學習,所以大行就算近日相繼短評,擔心政策風險有增,但實際上睇,中環人話,新班子上任個半月,有幾多次真真正正有政策制定經驗? 特首競選前多次表達房屋問題關注,又港人港地,又加建公屋,分析員最跌眼鏡係,面對高樓價,個幾月嚟佢比爵士曾更加放水,背後諗咩,無人知。 但麥格理大淡友「大衛吳」之前有個可圈可點分析,既然供應繼續多,官商博奕協調之下,政府決定將「私樓市場商品化」也。 所謂「私樓商品化」,係指樓宇買賣只容許高收入人仕進行,其他大部分中產以及基層,全數效法新加坡、或租或買政府興建的「組屋」。 的確,新加坡愛抄香港,香港亦愛抄新加坡,人地樓市商品化,社會融洽,我地樓市商品化,怕而未來五年,不滿升溫,最簡單由批地,供地,打椿到落成,前後五年,莫非係明醒發展商? 從另一方面諗,思歪要再出招,還有什麼法寶?離離去去就係限制按揭,較有效方法,禁二套房,或加重交易成本。 不過斷估咁重藥,佢未必敢,亦未必行得通。 樓市升因,十個理由未能盡錄,要降溫,試夠十種方法未必收效。 缺貨係當前問題之一,難怪連施老闆亦高呼樓價唱得太高。 我地相信政府「無呃人」,現屆政府的確已經密切監察著樓價升幅,而家最理想情況,係下半年供應穩步增加,估計新推出單位有一萬個,如果定價可以貼近二手市場,將有利樓價喺現水平穩定落嚟。 但如果下半年樓價升勢繼續失控,政策既風險就會顯注增加。 其實,用九二九三經驗,愈多政策樓價愈

富.事.通:偵查報道教父: GAY TALESE

圖片

幾多借口?

圖片
如果說中移動的業績令人大跌眼鏡,那中信泰富就更如殞星一般 幾年前一個晚上,中信泰富傍晚召集傳媒,宣布巨額投資澳洲鐵礦石項目,打從當日開始,正式為呢間老牌紅籌,揭開惡夢序幕。 五年過後,當日主持發布會管理層人不再但惡夢未完。 當日信逝旦旦潛力無限既項目,概念依舊,但超支多次,最少四度延期,一個由鐵礦石未到牛市高峰期買入既項目,經歷鐵礦石大牛市,大調整,再復蘇,到另一次需求帶動既熊市,幾個循環已過,但投產之日還遙遙無期。 原定八月,再拖到十一月,從股價表現睇係穩定,唔係代表市場有信心,而係市場信心盡失,再無任何期望。 十一月為否如期投產?如果博彩公司開賭,賠率怕且不足一倍。 常挀明被譽為拆彈專家,斷估呢個考驗係佢職場生涯最大。常總誠懇,業績報告之外,最少用十分鐘解釋遲又再遲既理由,詳盡有餘,可惜內容空洞,實際訊息只有一個,就係時不與我。 管理層綜合項目延遲不斷四大死因,包括澳洲要求多,單係文件要用上幾千萬字,工人需求大過供應等等,甚至簽證及語文能力都可以作為借口。 常總根本浪廢時間,好一句不可預期既事太多,同搵上中冶做承建商,問題已經大致解答。 中冶係咪開發鐵礦石項目專家,不得而知,但如果中信泰富當日換上另一個承建商,結果可能不同,又或者用當日收購項目資金,真接買鐵礦石炒賣,回報肯定翻一翻。 常總有誠意,但俾出太多客觀環境因素解釋,策略百分百錯誤,因為中信泰富唔係曾經講過,一再延期就要向中冶追討咩? 你今日製造太多難以預測既理由,可以預期,中冶已經被放出一條生路。 中信泰富每股值近十九蚊,如果剔除鐵礦石項目每股六個七既虧損,資產值已經每股廿五蚊有多,令佢地成為最抵買既綜合企業股,可想而言,澳洲項目價值破壞力之大。 從數字睇,未投產項目已經帳面虧損,以資產計,項目總資產七百六十多億,已經幾乎同投入資金相若,扣除負債,項目資產淨值只得三百多億。 有分析員關注,項目不斷令集團舉債,全部計算,既然債務未見頂,難道項目會資不抵債。 熟識中信泰富人士指,事到依今,呢個一度係中國希望既項目,已淪為豬頭頭骨一件,買家唔會有,兼已經千金散盡。中信泰富係時間面對現實,一,全面放棄項目。 二,棄用所謂中國專家,請幾個袋鼠人負責執手尾。由零七年底至今,澳洲呢兩個字,令集團炒燶外匯,高層巨變,但當日負責項目既華東博士,繼續

沒有合作令人遺憾

圖片
想不到今次唱高開低的情況,居然出現在近日股價一直創高位的中移動身上。 或許市場本來對業績無咩預期,估計都係平平穩穩,豈料一次失望將股價打到去無底深淵。 雖然ARPU按季回穩,但EBITDA利潤率急跌,拖低盈利錄得三年來最慢既增長。 結果下晝股價急挫百分之五,係一年來最大跌幅,以金額計跌幅更係09年以來最大,單日市值無左超過九百億。 要拆解中移動盤數不難,來來去去都係加大手機補貼拖累。 半年僅賺622億,只係升百分之1.5,撇除蒲發銀行盈利因素,核心盈利近乎係零增長。 單睇上半年手機補貼120億,已經接近舊年全年既7成。令EBITDA率跌幅比市場預期大,按年跌左3.4個百分點,至百分之46.2。 中移動話,為加快3G上客,同分流2G網壓力,全年補貼金額比年初指引調高3成,至260億人民幣。比舊年大增5成1。 上半年3G上客升近1成1,有1587萬戶,但第二季按季跌1成,中移動解釋,係轉攻中高端客所致,維持全年新增用戶3千萬目標。 單睇ARPU也不太差,期內通話資費跌左6%令ARPU按年跌2.4元,至67元人民幣,已經比三個月前改善,當中3G ARPU係76元。 其實要數增加手機補貼,也不是甚麼新鮮事,對手聯通同中電信,早在去年已經出招,呢個遊戲基本都係「焗玩」。 反而令人注目係部署進據失據,中移動既要打3G/4G市場,但去年以來重心一直放在低端客戶,結果肯付費的、都流到對手身上。 目前中移動的智能手機用戶比例、雖然由去年18%增至27%,但同對手比較明顯放慢,有調查就統計,中移動的3G用戶比例在全國,由去年的44%跌至38%。 或許其實中移動也沒有甚麼選擇,因為TD網始終是新事物,要一開始打高端亦不是辦法,所以問題最後都係結構性。 記者會上,管理層周不時強調T網手機已克服「三同」,即是「同質、同價、同時」,今天要發力搞4G,手機配合已經變成關鍵,由此來看形勢未必太差。 反而令人想不通的、是中移動仍然未有iPhone,似亦表現出滿不在乎。 「雙方沒有合作令人遺撼。」 問題是當iPhone 5面世後,形勢會否再次逆轉? 又會否再次落後於人?  

力挽狂瀾

圖片
冼博德,一個近年環球金融界評價極高既銀行大班,一個顧芷筠公開表達傾慕既人。 一星期嚟,佢的確大顯身手,功架十足。 如果八日前,顧芷筠將對冼博德傾慕之情付以行動,佢一定回報甚豐。 因為以低位一百九十九蚊計,每手五十股渣打,最少賺過千蚊。 冼博德八日嚟,為備受施壓既環球金融機構提供尚佳教材。 臨危不亂,據理力爭之餘,再施以外剛內柔技倆,聽落複雜,但結論簡單不過,萬大事,錢可以解決,就俾錢解決,總之大前題係能力許可,同聲譽不能損。 最後沖刺十一個小時談判,最終妁三億四千萬美金和解了事,是多是少,係一個相對性問題,如果認同之前盛傳既七億罰款額,咪少!! 但同意渣打實情被屈,僅僅一千四百萬問題交易比較,罰款額比例就相當於廿四倍,破盡記錄,固然係貴! 觀察家形容,相比多宗同類指控,渣打備受各界同情實屬罕見,更難得係英國政府力撐,美國內哄。 策略上,渣打十分攞足九點九分,原本有條件令佢地賠得更少,但既然聲譽重大,況且股東先係米飯班主,用三億四掃走強收買路錢流氓,市值即日回升三百億,抵!! 既然如此,渣打股東要對冼博德講聲THANK YOU,環球金融界,特別係歐智華更要讚對手WELL DONE。 無渣打死撐,英國當局大敵當前未必會如夢初醒。 由洗黑錢引發既買路錢事件,提升至監管機構交手層面,匯豐難道唔係大贏家,他日七億美金回撥,九哥要親吻彼德,兼敬禮致謝。 渣打股價對帳面值,一倍一左右,遠比平均兩倍為低。業績未走樣,管理層溢價令投資界必定加分。 以近十年渣打人事變動,更令習慣高薪挖既金融界好好反思。 以主席為例,前前前任桑德森,現任莊貝思,非銀行家出身,一樣有聲有色。 至於冼博德,更係經典代表。年僅五十,亞洲長大,太太係作家,大學主修公用行政,八八至零二年係麥肯錫顧問,及至零二年加入渣打,論年資,冼博德僅僅十年經驗,印證叻人隨處有。 銀行業係咪再要具泥於匯豐既內部升遷制,或者美資行既同業挖角潮呢? 八日風暴,冼博德化身神奇小子,CFO麥定思,更當上背後的男人。被指講粗口,鬧下屬,對伊朗交易視而不見,麥定思選擇隱形,但奇在一眾媒體無加入圍攻,反而處處維護,兼讚能力出眾。更譽為巴克萊行政總裁最佳後選人之一。 冼麥渣打二寶,表明機構品牌有價,有錯無錯,失分唔易。話說如此,渣打點解堅持要喺紐約當局解釋限期前,

文藝復興

日日嫌悶,其實日日精彩。事關金融市場不按劇本辦事,既然無路可捕,每日都可以係一個驚喜。   正如沈大師把脈所言,論基本因素,股票早早賣掉。但市場從來係一個炒賣平台,升要理由,跌要借口,咁岩,個市升就要升。   跌浪之中小升浪,可以令人陶醉,君不見舊年十月萬六彈上二萬一,人人以為牛市重臨。按沈氏理論,五千一浪重演,難道二萬三可期?   市場氣氛好,什麼事情都係一句「It's possible!!!」。   法蘭西零增長,德國增長放緩,係事實但奈何亦係好消息。基本因素欠奉,技術難玩,預期更難揣摸。   歐央行大統帥空炮盡發,市場未有落空之餘更憧憬升溫。歐洲謊言效力之久,年底財經大事回顧,定會記載。   人人話,美國強項戲弄市場,但做預期玩感覺,拍馬追唔上歐洲。文藝復興,歐洲印象派抬頭,名家個個玩感覺玩得出神入化,   承師印象派,再秉承歐洲人浪漫,感覺預期,我地自問唔係對手。   歐洲淡倉拆倉潮,規模計三年幾嚟最多,連CDS好倉盤,都係史上最多。憑超級馬里奧一句相信我,市場竟然信以為真?   首席末日博士麥嘉華形容自己獻出處子之身,公然要買歐洲股,唔通佢越老越糊塗,迷戀了國王的新衣?   話明撈底博彈,低殘概念非歐洲莫屬。大戶直言,睇好同睇淡,係相對性問題,由過去十二至十八個月淡倉不斷累積,到稍一拆倉平盤,效力之大正合炒家之意。   你信歐洲改善?你信債務問題解決? 呢刻好難令人信服!!!   淡友永不言敗,舊腳本作廢,全新編劇,故事情節大致係八月狂想之後,九月眼睙盈眶,因為鬥牛勇士西班牙病情未癒,救勇士先要踢走希臘宙斯。   當然,劇本著名subject to change,萬事要開局揭曉,你信以為真,就唔應該繼續靠金融糊口。   肯定係,以市盈率計,歐美水平超越三月高位,估值提升,但盈利預測卻跌,市場到一個地步,浪漫不再,又會再問值唔值。   今日華爾街日報有長文,形容列根年代以來的大牛市,已經到三十年頭,雖然中間有起有跌,但整體趨勢都係向上!   但奈何「憤怒牛」經年月洗禮,早已變成老牛,要再發力、恐怕也是強弩之末!