文章

顯示從 8月, 2011 起發佈的文章

英雄見慣亦常人

古語有云,浪花淘盡英雄。現實投資市場,亦不知淘盡多少英雄。 昨日英雄,今日要為失敗而痛楚,格羅斯把酒垂睙,安東尼波頓因為強勢復出挫敗,去意已決。 約翰保爾森舊年意氣風發,晉身全球最賺錢對沖基金,今年卻徬惶無助,回報大跌四成。 英雄落得如此下場,本著賺錢唔係新聞,輸錢先係新聞,媒體會大寫特寫。但海嘯後三年,有幾多投資者真正睇準市況,會一帆風順? 投資老手,星級操盤人,掌握比人地多?訊息,有散戶無?網絡,有唔少人渴求?資本實力。 八月一役,大輸特輸,證明大戶都係人,從好方面諗,做小投資者,更應該加把勁。 事後孔明,輸錢總有野可以賴。 傳統,大戶係最聰明,最掌握市況。英國金融時報亦問、點解佢地表現咁差? 結論係宏觀經濟環境無人預計到。 以約翰保爾森為例,佢今年賭通脹大升,軍師原來係格林斯潘,而睇錯宏觀經濟,亦唔止佢一個。 ?緊係點,唔少高手都話,唔知。但投資高手失準,唔只係八月發生,過去三年,真係跑贏標普5百既股票基金,原來只得三分之一。 但大戶風格有個好處,就係有錯就認,債券大王做得到。 繼續信自己眼光,不為市況所動,波頓亦有咁既本事。但點解輸成咁,就係人,根本預測唔到經濟。 金融時報亦都提到,八月贏既贏得唔開心、輸亦輸得令人不服氣。 因為經濟呢三年?,可能全部係假。大量印鈔,有假增長,假通脹,總之連聯儲局經濟預測都錯曬,做大戶對客戶,已經有「擋箭牌」。 比幾年前,依家環境更複離。亞洲區通脹千真萬確,歐美通脹、定通縮仍然無定論。 如果大家無記錯,幾次大通脹前,其實都埋下告別英雄觸發點。 事關,通脹可怕,抗通脹勝於一切。任何回報高?投資,都吸引資金無數。 最後,亦因為咁可能把關不足,或錯估形勢,最後輸錢。 債王,賺錢之神,股神故事忠告我地,大戶未必一定贏。星級投資者仍然實力有餘,但用毛主席一句,俱往已,數風流人物,還看今朝。 即係,你今日有本事賺到錢,咪係英雄!!

伯南克對伯南克

圖片
不出意外,伯南克在Jackson Hole既無QE3、亦無OT2。 伯南克在演辭提到,經濟由危機復甦的動力較預期弱,數據亦顯示,拖低經濟的動力較預期大,並不是短暫負面因素,在本土以至海外,金融系統仍然受壓。 聯儲局調低未來幾季的經濟增長預測,期間通脹會維持在百分之二或以下的水平。聯 儲局在九月的議息會議,會延長至兩日,商討推出進一步刺激的貨幣政策。 雖然伯南克未有推出任何巨體的措施,但就開出了一張相當巨額的期票: 聯儲局仍有一系可用的政策工具,相信可以有效刺激經濟。 既然QE大門未關上,市場亦可以鬆一口氣,美股扭轉早段下跌二百點走勢,畢竟有憧憬方是有希望繼續炒,還不記得去年股市是在八月公布有新一輪量鬆之後就炒上、直至11月落實推出措施就開始調整?? 太平洋資產管理董事總經理埃爾阿里安、喺金融時報撰文,話伯南克而家都了解、自己喺政策工具上面對更多制肘,佢應該趁著今日年會既機會、表明整體經濟係面對結構性問題,需要喺房屋、勞工、公共財赤以至信貸市場作出一系列改革,而聯儲局只會喺呢啲改革進行既同期,先至會推行另一輪非常規既寬鬆措施。 紐約大學教授魯賓尼就話,即使今日伯南克無任何公布,但佢估經濟雙底衰退機會高於五成,到時QE3一定會推行。 還是諾貝爾經濟學獎得主斯Stiglitz說得直接:美國再推量化寬鬆措施,都救唔到經濟。聯儲局再推量化寬鬆,都只係希望顯示自己,正參與緊危機處理,實際作用唔大。呢一點,聯儲局自己都應該知道。 要解決問題,斯蒂格利茨話,最根本嘅做法係運用財政政策,雖然會進一步擴大赤字,但呢點可以通過加稅調整。 佢又認為,淨係識得緊縮開支,只會將美國由經濟衰退、推入大蕭條局面。 其實作為大蕭條以及日本經濟衰退專家,伯南克又豈不知道貨幣與財政政策配合的重要性? 彭博今天就有一篇專文,標題就是伯南克對伯南克,說的是2005年之前作為學者的伯南克,會如何向今天作為聯儲局主席的伯南克獻計? 答案原來委簡單,除了要配合財政及貨幣政策外、最重要就是要勇敢行事!

盈利真相?

三大英美主流媒體包括金融時報、華爾街日報同彭博,都不約而同撰文,聯手狂插內銀,到底所謂何事? 當然、表面睇四大內銀,盈利增長乎合預期,佢地盈利夾埋更超越歐美十四間最大銀行賺到既總和! 不過上半年、各行嘅地方融資平台貸款急升,總數超過二億五千萬人民幣,就不得不令人擔心! 其實相比國壽太衰,衰到無得再衰嘅中期業績。內銀股業績實在太好,好到近乎完美。 單係工,中,農,建,四大銀行,上半年業績拉勻,平均每日賺十八億八千幾萬人民幣,比舊年同期十四億仲要好。 正當西方社會開始認為,銀行係夕陽行業,中國人社會入面,開錢莊證明仲可以發達! 其實,大家都預內銀半年業績好,但無諗到咁好。盈利升,不良貸款比率跌,股本回報升,息差升,只係撥備有所增加。 就憑咁好既數字,正如工行姜建清所講,咁低PE,咁高回報既銀行股,全世界邊度搵?! 不過如果真係好似佢所言,內銀股老早升番上兩倍帳面值!? 如果係,內銀就唔會一方面升,另一方面沽空激增! 西方唔信內銀,係鐵一般事實。中環人話,全世界都知內地壞帳會增加,如果內銀半年不良貸款比率升,都算正路。但唔升不突止,單睇工行回落到百分之一都唔夠,資產質素真係咁好咩? 內銀業績,好多自相矛盾地方。包括不良貸款比率跌,但逾期還款比率升。資本充足比率高左,但風險權重資產增幅亦大左。多次加息,但息差擴闊幅度又唔見得太大改善。 令分析界唔係咁開心,係內地到底有幾多次報細數?以外界關心地方債為例,中行,工行最新公布既地方融資貸款,竟然可以遠比年內公布時多。 大家不其然會問,內銀到底有幾多潛在問題貸款? 不得不承認,內銀其實仍然係服務國家,只要國家好,內銀唔會有事。但唔會有事,唔代表壞帳唔會升,盈利唔會跌。其實,呢兩樣野愈早出現,市場反而更受落! 渣打一份報告就提到,環境變化太大,叫人千其唔好信盈利預測。其實都岩!! 亂市之下,太多唔同估值模式充斥,信既話,一早到左入市指標。 最緊要,都係信自己對眼係最靠得著!!

沖涼

我想大概各位都會同意,沖涼係可以諗到好多嘢,不過諗到用50億美元救美銀,應該只有佢! 繼三年前金融海嘯之後、出手支持高盛同通用電氣,巴菲特再次出動,斥資50億美金支持近日股價低殘嘅「美國銀行」。 佢旗下嘅巴郡同美銀達成協議,買入5萬股優先股,每股10萬美元,年息6厘。 巴郡同時可以認購多7億股普通股。行使價7點14美元。 對美銀突然投下信心一票、巴菲特話,佢係喺「沖沖吓涼」時突然諗到。 話認同美銀有實力、同喺行內有領導地位,相信長遠一定可以恢復實力,認為買得過。 於是喺星期三朝早,親自打電話、俾美銀行政總裁莫伊尼漢,話要入股, 莫伊尼漢就話雖然無集資壓力,但亦認同獲股神「祝福」可以消取市場緊張情緒,於是喺24小內完成呢宗交易。 值得留意、今次同入股高盛同通用電氣唔同,巴菲特係主動打電話比美銀,情況罕見。 消息刺激美銀股價一度急升近兩成六,以收市價計,優先股同認股權市值62億美元,一日內巴郡帳面賺接近13億,首日投資回報兩成半。 咁係咪得巴菲特贏晒? 美國媒體普遍對今次交易正面,認為係雙贏局面。主要係一直傳美銀要填補按揭虧損,有集資壓力。 有分析員,入股美銀嘅行動再次明巴郡某程度上,已經取代聯儲局、成為美國銀行體系嘅最後資金來源。 不過亦有對沖基金經理批評,美銀每年俾3億美金股息比巴郡,同時亦令盈利攤薄百分之八,係高昂既「廣告費用」。 高盛同花旗08年獲得巴菲特、分別注入50億同30億美金買優先股,年息高達10厘,比美銀仲要高。 巴菲特話,而家唔係金融海嘯,無理由叫價咁高。

那一天,終於到來.....

蘋果公司既股價,喺喬布斯97年重返蘋果既十四年間,升左九十倍,市值由二十億美元跳升至近三千五百億美元,一度係全球市值最大既上市公司。 不過喬布斯好可能無法再喺台上聽到呢啲拍掌聲。 佢喺交比蘋果董事會同蘋果用戶既公開信中,一開始就提到,如果有一日唔能夠再履行、行政總裁嘅職責同期望,就會第一時間通知大家。 好不幸、呢一日,終於來到。 佢話願意留任成為主席、董事同蘋果員工,希望喺新既崗位,繼續作出貢獻。 兩位科技界達人劉民輝及莫乃光都認同,此封信道別意味濃烈,想喬布斯身體已急劇轉壞! 交代左自己去留,喬布斯不忘欽點接班人,極力建議董事會任命首席營運總裁庫克,接任成為新行政總裁。 04年證實患癌,2年前做過肝臟移植手術,今年一月中開始再次放病假。 公司日常營運工作,全部都交晒俾「庫克」,只係過問公司重要決策。 華爾街日報話,放咗七個月病假嘅「喬布斯」,即使係放緊病假,都有積極投入產品開發工作。 預計黎緊都會一直係咁。相信既定嘅產品生產計劃,包括IPHONE 5同IPAD 3嘅推出進度、唔會受阻。 不過,市場仲關注,現年50歲嘅庫克,係咪真係接到棒。 庫克加入蘋果公司13年,喺過去7年,曾經兩次頂替喬布斯,處理日常營運工作。 華爾街日報嘅報道形容,做過IBM同康柏電腦嘅庫克係「營運天才」,喺佢領導下蘋果夥拍富士康喺中國建立一個龐大既生產機地,大大減省營運成本。 但問題係,喬布斯一向係蘋果嘅「大腦」,所有蘋果嘅革命性產品都出自佢,市場擔心庫克好難延續喬布斯嘅神話! 想想,一個人搞MP3機可以令全球唱片公司無錢賺、做電話令經營商個個都買怕佢,做無人吼的平版電腦可以帶動「No PC」年代來臨! 當年創辦人之一嘅沃茲尼亞克都話,喬布斯作為最偉大嘅科技公司掌舵人,今後嘅一百年,都值得大家懷念。 有蘋果公司觀察家話,喬布斯獨特之處係佢從來唔相信市場調查、係依靠自己既直覺,參與產品既軟硬件開發、提供一啲產品係超出消費者想像既範圍,呢一點係現有管理無可取代。 金融時報形容,喬布斯就好似一個開發產品既天材,事事追求「完美」,無左呢分「執著」,會令蘋果好難喺產品上再創新。

生死存亡

上個月李小加發表的萬言書中,己提及作為一間千億市場公司,388每年使在資訊科技的開支,連一億元也不夠。當時李總裁已提出,如果IT部門不趕快急起直追,這會威脅到港交所的生死存亡! 豈料不出一個月,這個威脅竟會成真!!? 說到這處,雖然港交所反應的確有不如應,但仍要讚一下交易所。 港交所旗下網頁中午突然出現故障,導致七間上市公司下午要臨時停牌,包括匯控、港交所及國泰三隻大藍籌,四百多隻衍生工具亦無法買賣。港交所初步調查,相信網頁是受到黑客入侵,已經報警,又找國際頂尖專家跟進,警方指正了解事件。 網頁大故障,七間公司、一隻債券和相關衍生產品下午開市前停牌。受影響包括匯控、港交所及國泰三隻大藍籌外,還有多間公布股價敏感資料公司、相關衍生工具總共416隻亦全部停牌,還未計算期權。 十二時開始,港交所網頁上刊發上市公司通告的「披露易」一欄一直不穩定,一時能登入,一時失敗,直至收市還未修復,時隔六小時多,網頁才恢復正常。 由於目前公司要透過港交所網站發表通告才符合上市規則披露要求。有學者不排除有人看準當中漏洞,入侵網站,令數隻大藍籌停牌,顯然是另有居心,不是單單有Hacker想玩野咁簡單。 目前收購、出業績,這些股價敏感資料在上市規則規定,公司要將有關通告同時於港交所「披露易」網站及公司網頁發布。披露易網站失靈,上市公司不可以上載通告,令他們變相不符合披露要求。有學者指,不排除有人看準這個漏洞狙擊,從中圖利。 有些批評當然可以無限上崗上線、但如果只將資訊放到上市公司內發布,又有幾多人識得搵那些資訊? 結果又變成另一個不對稱資訊,況且亦會正中做事者的意圖及動機,那時我可以肯定,港交所會更被人駡得狗血淋頭。 而且批評者、恐怕大部分都沒有管理網站的經驗,需知今天資訊科技發達,就算強如美國國防部、CIA近年一樣發生網站被入侵事件,港交所的交易系統未有受到破壞,證明最重要的核心系統已受到保護,但披露易仍然難防駭客的破壞,恐怕交易所亦要採取補救措施。 有電腦保安專家指,披露易是一個公開予公眾查閱的網站,較易被黑客入侵;相反,要入侵交易系統就會困難很多,因為通常需要特定權限才可以登入,保安程度高得多。 觀乎出手者既熟悉交易所運作,又有超乎常人的理解,特別是近日人心虛怯,任何傳言都會產生”人踩人”現象,那時豈不是最佳出擊事

冰河時期

斷估唔到伯南克可以絕成咁,居然為利率設定一個凍結期! 細看聯儲局聲明,不加碼救市,更對經濟前景進一步悲觀,形容經濟今年來表現遠低於局內預期,未來數季亦不會好,並指經濟下滑風險正在增加,特別是就業市場在過去數個月已經惡化。 談到經濟差,聯儲局最大突破是效法二零零九年加拿大央行造法,為低息環設下一段長期限。 因此聲明首次表明,現時超低利率會最少維持至二零一三年年中,即是變相把利率凍結兩年。至於是否加碼QE? 聯儲局沒有加碼印鈔,但提到會留意情況準備適當時候加推政策。 今次聯儲局會議,更罕有出現三名委員投反對票,反映局內對推出新一輪刺激措施意見分歧很大。 前聯儲局理事邁耶表示,公開市場委員會決定有三票反對,等同叛變,伯南克上任後首次被三名委員反對,反對他的全部是地區聯邦儲備銀行代表,不是總統委任。三人的理據是維持低息環境一段長時間已經足夠,設定年期會限制日後政策彈性,所以要反對。 達拉斯聯儲銀行行長費希爾和費城行長普洛瑟一向是鷹派,他們多次公開提到要留意通脹。一些反聯儲局的死硬派、例如麥嘉華,就提出認為聯儲局量化寬鬆政策已經證明失敗,所有理事包括伯南克應即時引疚辭職!!!(但永遠不見他們有任何積極建議?) 連一向立場親聯儲局的華爾街日報社論形容伯南克為首公開市場委員會,面對現時情況是一個悲劇。今次會後決定變相是妥協結果,社論亦質疑聯儲局最初希望由量化寬鬆政策,推高資產市場,從而製造財富效應不單止失敗。更因為印鈔令商品價格上升,美國人實質收入反而減少。 El-Erian最近說過、今次環球股災來得突然,固然是由降級引發的經濟衰退憂慮,不過更大原因是QE做成的資產漲價、甚至泡沬與當前的實質經濟環境有太大落差,一旦QE完結後令資產失去溢價功能,自自然就令股市價格回落至經濟衰退的水平。 為左再次重覆QE1及 QE2的錯誤,加上為免再令各國之間引爆”貨幣戰爭”,相信伯南克深明再推QE效用不大,因此先來一招凍結利率、就是要buy Time買時間,再決定下一步。 至於局內有三名理事提出反對,說實話,因為伯南克現階段就是不希望市場有過分憧憬,因此點都要「扯貓尾」找人做下反角,如果你認真看待就是輸了!

不可能任務

圖片
美國史上首次被降評級,歐洲債務問題,兩個火頭已經令市場出現恐慌。 七國財長,同歐洲央行亞洲開市前緊急商討。 針對美國評級被下調,可能引發全球資金緊張問題,七國財長透過電話會議決定、必要時採取聯手行動穩定流動性,未來幾個星期會繼續密切留意,必要時會採取適當嘅聯手行動。 市場理解,係G7會多國聯手救市跡象。 事實係過去一星期、瑞士同日本已經先後再量化寬鬆。 日本央行亦表明,之前干預匯市用既四萬幾億日圓,會全數放曬喺市場,變相加馬印錢。 但英美多份大報話、資金市場已仿如08年雷曼倒閉後、對交易對手完全再無信心,大部份貨幣基金,依家只係肯拆出最長一星期資金,情況遠比想象嚴重。 更大問題係歐洲債務危機愈滾愈大,經過幾日討價還價後、歐洲央行改變態度,暗示會市場購入意大利同西班牙債券。 意大利同西班牙上星期五先後宣布押後賣債計劃。 目前歐洲央行資產負債表超過二萬億歐元,舊年五月以嚟,佢地先後買入750億歐元臘希、愛爾蘭同葡萄牙嘅債券,之後一直跌價。 如果歐洲持續買入意大利同西班牙債券,按每年兩國發債總額最少高達6000億歐元計,法巴話,央行最少要幫手買兩成,即係二千幾億先有能力控制債息唔再大升。 倫敦一個研究機構計過,歐洲央行決定咁做,一旦持有既債價再跌超過百分之四,整個歐洲央行資本水平,就會全數被抵消。 對於目前困局,紐約大學授魯賓尼無論歐洲有行動,或者美國再推QE3、歐美要避免衰退,係無可能既事。 呢個先係歐債,同美國評級下調外,全球面對最大問題。 佢用「Mission Impossible」來形容全球經濟衰退,即係任何政策都無可能改變呢個局面。 魯賓尼話,即使聯儲局再推出QE3,但受制通脹問題,最終規模只會太細同來得太遲,佢建議歐洲央行應該減息至零,同時各國採取短期擴張、中長期收緊既財政政策,經濟先可望在見過衰退後、先有機會再次反彈。

誰之錯?

前大摩策略員巴頓碧斯星期三說過股市已見底,應作出強力買入呼籲後,周四就出現五百點大跌股災,即時現眼報! 難得是老人家未有如一些「財演」死雞撐飯蓋,擘頭一句就說: 「是我錯了」! 與一些死不認錯的大人物相比,其實我覺Biggs更是可愛! 今次股災禍源又是歐洲,仲要係尾二倒數最後一次主持歐央行會議的特里謝。 原以為ECB在歐債危機重新出現下,歐央行至少會發出支持意大利及西班牙的言論,豈料特里謝非但沒有,僅說會增加透明度。 更令人失望,特里謝根本沒有心解決問題,他不單警告可能繼續加息,對於買債,只是重申會購入希臘、愛爾蘭的債券,但並不包括現陷水深火熱的西班牙及意大利?? 天呀,到底他的腦中在想甚麼? FT 對歐央行的角色毫不掩飾去批評,認為央行應充當金融市場的醫生,但特里謝已經放棄了這個任務,華爾街日報就指,歐美大國已不能如08年後聯手推行QE,皆因債務問題令各國綁手綁腳! 高盛亦出招,稱央行不夠堅定。 佢地認為,金融市場現時問題是央行不夠果斷。為阻止危機蔓延,歐洲央行有需要市場購入包括意大利和西班牙國債,以穩定信心。 但由高盛口中說出這個道理,卻又反而令人更覺不安? 所以與其要信,我寧可相信任總的說法,他稱恐慌其實是由市場自行引發,其實市場情況未必太差! 任總認為,ECB非照顧單一國家,所以最終的解決方法、還應是一個政治決定。 所以意大利一宣布與歐盟取得共識進行財政改革,周五一度大跌的美股終可以回穩! 所以巴頓碧斯未必錯晒,只是說話早了一日說出來罷。 對不?

落飛

圖片
誠哥老了? 何解? 一向從無失言的李嘉誠,居然今日多番說錯話! 1. 赫斯基「零售」! 2. 你同我都有一票(選特首)!! 你會說任何人都有失言時候? 對不起,對李嘉誠來說,這是過去絕不會發生的失誤,可以說,從未有試過! 而且,當一個開始緬懷過去種種…..十八歲做經理、十九歲總經理、二十一歲有自己生意……你想這代表了甚麼? 但數對後市,同經濟掌握得最好嘅人,李嘉誠仍然是無出其右。 往績證明亦李嘉誠比巴菲特更準確。 所以抵佢話,如果搞個收費午餐會演講,多多錢都有人去,係岩。超人對經濟前景,簡單講比三月時來得審慎文字上,佢三月份主席報告,形容前景秀麗,深具信心。但今次,剔除前景秀麗四隻字,只係維持仍深具信心。 雖然有的似聯儲局會後聲明咬文爵字,但誠哥答問環節,亦講得好清楚,歐美唔得,亞洲收緊政策,亦難望有快增長,全球只寄若一個字--「慢」。 通脹仍然係憂慮,佢五個月前講過,派息增長高跑贏通脹就對股東有交代。和黃最令人意外係中期都加派息,加幅百分之七點八。如果咁計,超人係咪預言,通脹會破七呢?! 集中看看和黃,核心盈利勁升,但市場最期待嘅系內重組,憧憬落空。 李嘉誠話,稅制改革對集團架構無影響,加上赫斯基夠錢駛,零售業務亦唔會分拆。 半年賺左463億,增加六點三倍。扣除特殊項目,核心盈利就升五成九,其實都係好過預期。 3G業務成功止血,賺左七億六千萬,不過港口要做70幾億撥備,財務表現大幅倒退,拆港口、拆匯賢,李嘉誠話負債少咗,嚟緊做投資都會進取啲,「有力、有勁」。 即使大家可以預計今年和黃會重新回復增長模式,大概一個肯四周西討北伐的人,又願意買重唐唐落飛,其實都唔多需要擔心他真的老了吧!

雙險

美國以為搞「掂」,點知又到歐洲爆煲!~ 外國傳媒形容,全球正面對Twin Risks,即係經濟衰退、同債務危機雙重風險。 雙重風險之下,帶嚟分別嚟自美國同歐洲雙重打擊。問題係美國最少知咩事,仲有些少跡象判斷到。 歐洲,喺無新重大不利消息,或者講無更「衰野」情況下,出現遠比估計為嚴重局面,就有的恐怖。 克魯明喺個人網誌上講得啱,全球過去兩星期聚焦美國,完全忽略歐洲問題由始至終未解決。 意大利,同西班牙,佢形容破壞力太大,根本唔可以任由情況延續,同惡化。 觸發最新一輪歐洲危機,係救完希臘無耐,歐豬無喘息情況下,發布一系列遠比預期差嘅經濟數據。 無論製造業,同非製造業指數,大都跌到五十樓下。經濟轉差,希臘私人參與拯救機制又未傾掂。於是大家又借財赤問題,無限放大!!! 於是不論意大利,西班牙,甚至法國,債息相對德國息差,都出現新高。 驚咩呢?就係咁可能觸發當地結算交易所,會大幅調高相關債券嘅押抵利率,上次希臘,愛爾蘭亦因為咁,就係爭啲無命。 最致命係一旦債息升穿七厘呢個「死亡水平」,好大機會會令西意兩國步希臘、愛爾蘭同西班牙後塵,需要歐盟出手援助。 同時間,英,法,意大利,幾間銀行出嚟業績「極差」! 而且要為大量希臘債撥備,愈諗愈唔對路之下,驚撥備遲下井噴式上升。 結果,債市同金融股雙劍合壁,係咁就搞掂左。成功製造一個異常驚慌局面。 依家問題火速燒到意大利,英國金融時報引述當地唔少銀行界高層都話,唔對路。 一嚟,意大利底子厚,二來惠譽計過數,意大利債息就算升至七厘,當地利息佔債務問支負擔升至百分之六,但仍然比高峰期低。 市場要講陰謀論,又或者睇下有無人出古惑。歐洲有交易員就質疑,係咪有「叻仔」,趁暑假當地交投例淡期間,攻其不備、做其世界! 的確,德國股市期指星期一臨收市例靜一刻,原來出現過恐慌跳水。有人懷疑,呢批歐洲出奇嘅亂,會唔會同唔少政要放假拉上關係! 歐洲人暑假好緊要,好似西班牙無論首相,同財長,都安排同一時間放假。歐洲最大嘅阿太,默克爾更放足三星期,依家正喺阿爾卑斯山。 衰仔樂園要開派對,一時間群龍無首,兼交投淡靜配合下,事半功倍啦。 咁其實,講到尾,無野好怪。只怪歐洲人太懶!! 亦怪歐洲央行技窮,當全球都旨意將希望放在歐央行身上,但表現就令人一再失望。 否則瑞士央行都唔會十五個月嚟,都要出重手干預瑞郎升勢,仲減息變相幫歐央行穩定歐元。 講到QE,一年前既今日,聯儲

大象血淚史

圖片
史上最慘淡一日,宣布業績嘅同時,大刀闊斧裁員三萬人。 上半年已經裁咗五千,歐智華話目標係喺2013年,再裁減多兩萬五千人,即係合共減少一成人手。 重災區係資訊科技等嘅後勤部門,成為即劏對象。 集團同時開始喺拉丁美洲、英、美、法國同中東進行營運架構重組。 唔計已經宣布嘅俄羅斯同波蘭,未來會再退出廿幾個國家嘅零售市場。 最新係以近80億元,沽咗195間美國分行,其餘13間紐約州嘅就會關閉,又為資產值三百億美元嘅、美國信用卡業務搵緊買家。 集團整體要節流,但香港員工可以放心,歐智華話為咗對抗挖角潮,人工嚟緊仲有得加。 裁員等多項節流措施收效,令匯豐既成本對收入比率,由舊年底近六成,改善至百分之57。 其實一間銀行業績好,旗下員工反而人人自危,想來都很諷刺! 匯豐半年盈利,ROE股本回報係好,但未致於全球之冠,但炒房出身嘅歐智華,識大鬥大,全球裁員三萬呢張牌,匯豐注定全球金融血淚史上,會自有記載。 據講,本港員工聽到大老細有此一著,檯頭隨即響上無數問好電話。朋友,始終比老闆有情有義。 大象業績好,不過如果單睇經營溢利,即係純業務產生嘅盈利,按年只係升百分之一,比舊年下半年亦只係升百分之四。 所以簡單講,匯豐盈利仍然係由撥備,同稅項減少帶動。歐智華今日嘅手起刀落,表面上係繼三個月前策略日後,俾各界一個交代,實際係,大班心知肚明,以目前全球銀行業環境,唔靠大舉裁員,三年計劃,其實無法達標。 歐智華投資銀行家背景,兼無耐性嘅特質。員工與其依家發怒、更應該後悔當日明知係由佢做話事人仲太多天真太多幻想,無另行他想,到依家市況逆轉,要跳船,或者已經太遲。 從好方面諗,匯豐大裁員,香港唔係首選,管理層不斷強調之餘,如果睇本港成本效益率,只有四成三,係匯豐全球最低之一,又無需要怕! 但亦不能否認,匯豐理財,同私人銀行業務,請太多人,香港單係今年已經增聘過千。一旦無貢獻。佢然有被郁可能。 匯豐係一隻巨輪,從股東角度,管理層係負責,當然裁員係不近人情。調轉諗,匯豐炒歐美員工為主,其實係想將慳到成本,補貼區內發展,特別係亞洲同新興市場通脹咁利害。 今日無疑係匯豐血淚史最重要一頁,但到底代表歐智華同廿幾,三十年前擴張策略,撥亂反正,定係劃一界線呢? 似乎更多人都未搞清! 只能夠講,時移世移,金融機構太大,已經唔代表最好,整個金融業模式亦由創造價值,轉為體現價值。 歐智華當浦偉士係師傅,浦偉士仍然被

雨過天晴?

圖片
奧巴馬: This process has been messy! 博納: Now listen, this isn't greatest deal in the world. 佩洛茜: See what of support we can provide. 其實都唔多需要討論,大家都明白呢分最後關頭先達成的協議,根本講唔上甚麼共識,只是你退一步、我進一分的政治妥協。 Pimco 埃爾亞里安話,今次協議只係短暫紓緩市場情緒,因為跟據之前評級機構標普既準則,美國仍然會失去三條A既主權評級,亦都無助改善市民同企業信心,失業率仲會進一步攀升。 華爾街日報就話,以往被視為「常規程序」既議案,而家成為左反對黨威脅總統作出讓步既有力武器,白宮擔心先例一開會令日後施政更家困難。 諾貝爾經濟學得主克魯明更批評,奧巴馬為達成協議而投降。 克魯明回顧整個國債上限協議,完全唔提點樣增加收入,反而話會研究改革稅制,令佢完全費解。 克魯明話,奧巴馬今次讓步,只會令財赤問題進一步惡化,而目前經濟環境下,仲要減開支,對經濟嚟講係大災難。 佢預言美國經濟依家到二零一三年,都會陷入衰退,整個結果,奧巴馬,民主黨,同共和黨都無贏家。 但真係無贏家嗎? 華盛頓郵報嘅政治專欄作家認為,各黨派就調高債務上限,討價還價,採取保守經濟政策嘅「茶黨」,先係大贏家。 共和黨眾議院議長「博納」,都要修改削減財赤嘅幅度,爭取「茶黨」支持,至攞到218票,僅僅夠通過,佢嘅債務上限新方案。 但茶黨內部認為,喺國會嚟緊嘅表決,要見好就收,以免變成債務違約嘅「罪人」。 而參議院共和黨領袖「麥康奈爾」,喺債務危機最後關頭,透露兩黨就快有共識,外界對「麥康奈爾」即時加分。 事至到此,下一回合要看評級機構如何反應。 我們又沒有Pimco 那麼悲觀(當然,亦不排除Pimco是出於陰謀論),三大評級機構很大機會只會按兵不動(國家利益?),僅將長期評展置於負面觀察。 那到十八個月後、就唯有寄望「雨過天晴」,經濟既然好轉,就不用再擔心財赤?! 都係要賭呢一鋪。