文章

顯示從 1月, 2010 起發佈的文章

同坐一條船?

整個歐洲地區因為一個希臘搞到亂晒籠,而家最驚係成為觸發期待而久的美元強勢大反彈。 政府財赤高達本地生產總值一成三,市場愈嚟愈擔心無外界援助,希臘根本解決唔到財政危機。 法國世界報報道,包括德國同法國在內嘅多個歐元區國家,正制定協助希臘嘅緊急方案。 但德國同法國隨即否認,話並無考慮向希臘提供任何援助。 市場關注希臘財政惡化,違約交易掉期、突破四百點子,再創新高。 呢個水平,已經相當於迪拜舊年違約後既水平。 而希臘既政府息率亦都大升,由舊年十二月既四厘九九,升至超過七厘,係超過十年最高水平,同德國債券息率,亦相差近四厘,認真不平常。 希臘就話唔會違約,國家有信心解決債務危機,佢地從來無要求中國購買希臘債券,對於希臘國家債券大跌價,佢就歸疚係市場投機炒買。 希臘總統帕普利亞斯就話,而家係有人為達到政治、或者投機目的,利用希臘財政問題,去攻擊歐元區。 似乎真係一啲反省意思都無法! 歐盟就表明唔會放棄希臘,話「同坐一條船」,但強調對希臘並無「Plan B」,即係唔會有任何拯救計劃。 近日花了不少時間看歐洲發展的羅家聰,認為而家歐盟係陷入兩難局面,一救就出會出現道德風險,其他「PIIGS」成員肯定有樣學樣,唔需要再執行紀律; 但唔救,一旦希臘退出歐元區,後果會係災難性: 即死! 佢估計歐盟會拖延問題,避免其他國家好似係萄葡牙同西班牙都要求援助。 Pimco董事總經理、"When Market Collide"作者Mohamed El-Erian,對希臘危機似乎相當悲觀,他說債務危機同迪拜事件並唔相同,將會嚴重影響環球市場。 佢認為,而家希臘已經到左唔可以唔救地步,估計未來幾日,希臘同歐盟就會聯手公布穩定措施,避免觸發信心危機,但相信未必收效,佢建議投資者要保持審慎同留意更多呢啲「主權違約」風險。

呢個封面,超正....

圖片
經濟學人叫 Jesus Tablet

與牛為敵

奧巴馬一上台就接過經濟爛攤子,一年過去,佢話最嚴峻嘅風暴已過去,但國民仲有好多焦慮同不滿。 Some are frustrated, some are angry, They don't understand why it seems like bad behavior on Wall Street is rewarded, but hard work on Main Street isn't. 奧巴馬講到明呢啲不滿,佢知道,佢有同感。 I hated it. You hated it! 因此奧巴馬得出一個結論,就是而家大行既然可以發鉅額花紅,就要收金融危機責任費,還俾納稅人。 結果有半分國情諮文,都是以華爾街為敵,文中充滿憤怒、壓惡呢啲字眼。 為普羅大眾消消氣之外,創造就業係實惠,亦最可以爭取中產選票,奧巴話呢項係今年首要工作,小企業係創做職位火車頭,佢建議由大行歸還嘅救市基金中,撥三百億美元,借貸俾小企業。 佢哋同中產家庭,都有得減稅。 為咗降低財赤,2011年起,凍結大部分政府開支三年。 唔知係咪好學唔學,奧巴馬居然話,當前嘅問題,部份根源係政治鬥爭。 佢話會主動同國會兩黨領袖溝通,做實事,挽回國民信心。 We don't quit. I don't quit. Let's seize this moment -to start a new, to carry the dream forward 說得何其動聽。 整分國情咨文,繼續大打民粹主義牌。 上任一年無政績,美國政論對奧巴馬國情咨文大計,已經提唔起興趣。反而將注意力由醫療改革,轉為就業。 一時間,JOBS呢個字成為美國頭板,一方面STEVEN JOBS推iPad。奧巴馬就硬推創造就業。 邊個JOBS受歡迎,似乎無需多講。 就業,取代醫療,成為重點。創造就業又似乎同奧巴馬凍結政府開支三年,同降財赤,兩者互雙違背。 小布殊,同奧巴馬,邊個好。一年前,美國人會選後者。但從近期美國政論界聲音睇,民心思變。 只可以說小布殊一世好運,八年反恐旗熾鮮明。相比,巴馬要做嘅太多,做到嘅太少。 總統痛恨救銀行言論,作為當日主事人之一嘅蓋特納,只有獨坐苦笑。總統增就業,保經濟,金融體系出身嘅蓋特納唔係強項。 似乎有更跡象顯示,蓋特納會成為奧尼爾翻板。 佢尋日上國會,解釋拯救AIG,議員不

蘋果再起義

圖片
Apple搞發布會,內容比起聯儲局開會議息更加吸引,唔止科技界,連財經界都廣受注目。 蘋果喬布斯自從做手術之後、首次著番佢套Classic裝束舉行發布會,淨係睇佢都值回票價。 傳言喬布斯6月回歸公司後,所有精力都放在呢部iPad上。 果然之前傳出iPad外形全部流料,外形似一部加大碼嘅iPhone,機身厚度只有半吋,重一磅半,擁有9點7英吋輕觸式屏幕。 可以喺「iPad」上睇高清影片、打機、上網同閱讀電子書,仲內置咗iTunes軟件,用家可以直接購買音樂同電影,下載到iPad。 分析員形容功能同想像中差不多,但最令人意外是訂價! iPad有16、32同64激內置記憶體版本,WI-FI型號零售價最平只係499美元,比分析員最初估計既幾乎平左一半。 如果加埋3G功能既,售價就高一些,但與iPhone不同之處,是iPad再無合約綁縛,也許他也心知肚明,iPad煞食之處,並非如smartphone一樣要戶外上網。 喬布斯同時宣布,開設蘋果網上電子書店iBooks,運作同現有嘅音樂商店iTune類似,可以俾iPad用家購買下載電子書,喬布斯話,蘋果已經超越諾基亞、成為全球最大嘅「流動裝置」生產商。 分析員對iPad低價競爭策略感到意外,相信係針對亞馬遜大受歡迎既電子書Kindle,幾乎每一樣功能都比佢地最新型號優勝,售價都只係高十美元。 事實上,喬布斯亦明言想超越Kindle,他不容許這個日漸壯大的對手成為威脅。 亞馬遜就回應話佢地係專門針對電子書市場,又話有龐大既書庫,呢點正係蘋果要爭取同更多書商合作。 有測試過iPad技術員話,瀏覽網頁係比想像中流暢,不過iPad只係使用目前iPhone既作業系統,唔能夠支援多功能作業(Multi-tasking),亦都乏缺視象鏡頭。 但這些根本就不是iPad的賣點,喬布斯寧願用更低價錢,目標就是電子書市場。 好在最後關頭忍手、無買Kindle,唔係實後悔死.....

中國茶

圖片
今日中環早上九時前、出現了一陣哄動。 過百名匯豐員工,陸續聚集在總部樓下,一早列陣,夾道歡迎。 就是紀勤首日喺本港上班。 例牌式又摸下獅子,之後正式踏入皇后大道中一號總行。 呢位大班,仲同員工遂一握手。 紀勤今次帶同倫敦總部多名職員來港,周二下晝先落機,唔夠一日就番工,紀勤話行政總裁一職,以後有新角色,就是主管整個集團環球業務。 紀勤以前喺香港返過工,又唔係第一次嚟香港,但今次意義重大。 走出歐美,敗北離場,事隔十載有多,匯豐總部一拆二,為免令外界覺得回頭是岸,倒不如製造一個強勢回歸,歌舞昇平氣氛。 從公關策略上,匯豐今次應該贏左。 過百員工列隊,紀勤行入總行,的確有領導人閱軍嘅感覺。 既然西向東移,匯豐早有安排。 一早電郵總行員工,要求各部門派代表出席歡迎紀勤,出席呢個振軍心大會。匯豐新聞稿亦以香港員工歡迎集團行政總裁 駐港為標題。 下星期起,紀勤兼任亞太區主席。王冬勝亦升為亞太區行政總裁。 以兩人性格,匯豐嚟緊無論人士,以至策略,可能有好唔同,甚至意想不到改變。 葛霖,同鄭海泉,無估計錯,似乎成為今次西向東移既輸家。鄭海泉輸得明顯,但葛霖亦大勢而去。 從紀勤言論,以至葛霖接受傳媒訪問提及,佢似乎已經暗降為非執行主席。既無管理權,業務策略制定影響力亦大不如前。 如果睇番匯豐整個布局,執行董事倫敦,同駐港人數各半。負責最高管理決策嘅管理委員會,葛霖亦不在名單中,委員會只係程序上向佢匯報。 葛霖退休之日,就象征匯豐整個高層架構,正式完成重組。 匯豐能力,無需懷疑。紀勤現年五十五,最少有五年時間,落實西向東移。歐智華亦足夠時間做好接班準備。 但今次高層調動,能夠發言嘅華人高層,似乎比未西向東移少,而從紀勤發言,似乎匯豐對啟動區內收購,早有準備。 可能正如紀勤自己,飲English Tea已是昨天的事,今天要喝的是中國茶。 呢隻港人熱愛嘅獅子,祝佢地榮歸之外,亦希望佢地僅記Household教訓。

729

有留意昨日市況,會見有隻異動股嘉盛。 收市升六成二,呢隻股分,上個月起至今,累積升超過九倍。由仙士,變毫子股,再成為蚊型股。奇跡之下,當然有高人相助! 高人正係超人,嘉盛似乎注定要同嘉誠拉上關係。 嘉盛向李嘉誠配售四億股,令佢成為嘉盛主要股東之一,佔公司擴大股本一成半。 比亞迪有股神,點石成金。無獨有隅,嘉盛亦轉型做環保車電池,嘉盛有嘉誠,會唔會成為比亞迪翻身,做一隻小比亞迪? 憧憬可以兌現唔出奇,但中環界對誠哥動手指,染指一間三四線股,仍然莫明其妙。就算誠哥睇好環保電業務,以佢財力,多多選擇都有。 嘉盛原本業務同環保毫無相關。截至上個月,以蛇吞象天價,收購做鋰電池嘅公司,叫中聚雷天。但呢間公司業績係點,唔知。 產品詳情亦欠捧,更奇係,上月嘉盛呢宗被指為星級轉型嘅交易,全數用股分,同可換股債 支付。 中聚雷天呢間公司怪,公司背後人身鍾馨稼更係奇人! 佢自稱發明家,但又話自己係讀中醫出身。亦因為熱愛戲劇,導演過「聊齋」。 由把脈,變身成鋰電大王,佢認真叻! 鍾馨稼潛出水面,主要係十月分,佢旗下雷天能源,打破比亞迪獨大局面,喺內地取得三百 億人民幣合約訂單。旗下項目更聲稱獲五百億融資!! 一時間,聲明大響。 呢位鍾高人,強調自己唔係「吹」,因為佢自行研發稀土鋰電池技術,已經領先世界廿年。 呢種稀土鋰電池,認真神奇,標准達700安時,號稱比起目前技術優勝,因為普通的磷酸鐵鋰電池,一般充電不能超過200安時,否則肯定爆炸。 其實早在97年,鐘馨稼已自稱研制出90安時鋰離子電池,曾經將產品帶到香港博覽會上,引起過一陣轟動,更有美國公司找上門來,表示願意投資。 豈料翌年試制的電池汽車,在測試中發生了大爆炸,大火把整駕車都燒壞了,之後鐘馨稼亦消失了一段時間。 今天他重出江湖,到底技術有突破發展還是另有所圖? 雖然嘉盛收購中聚雷天有盈利保證,但真實產品未如比亞迪的「e6」有真身可見,到底是否要跟超人投資將來?(不要忘記,超人入股價是0.73元) 自己計算好了!

面紗

圖片
揭開真正面紗前夕,市場愈來愈多傳聞。 有二手(三手?)消息引述話,喬布斯對新產品是非常興奮、仲話係佢一生人最重要的發明。 "will be the most important thing I've ever done." 上次咁講已經係07年 iPhone面世。 新的傳聞是平板電腦除可以配合iPhone 的Apps外,仲有視象鏡頭,可以進行Video Conference。 不過跟據過去經驗,蘋果的新產品與傳聞的外貌通常有很大差距,今次又睇下點?

iPad

圖片
今個星期四凌晏非常之熱鬧,先有聯儲局議息,之後又有奧巴馬發表國情咨文,但講到觸目,都唔夠一間公司! 蘋果公司會喺凌晨兩點發表一個新產品,用喬布斯自己講法,係非常令人興奮產品,市場估計就係傳聞中既平板電腦「iPad」。 據macrumors.com報道,會場已經布置好,有小道消息話德國零售商網上唔為意出左一個宣傳廣告,證實左「iPad」呢個名,之後呢段消息已經喺網上刪除。 總之傳聞多多,一時話呢部平板電腦可以3G上網,合約價係五至六百美元,淨機價就「一千大洋」。又話部機可以睇片睇相,功能超越目前一般市面ebook,包括Amazon 的Kindle。 仲令人期待是這部可以應用目前iPhone已有超過12萬個 Apps,除了3G亦可以Wifi上網,總之功能多多。 對於呢部傳聞大機真是相當令人期待。其實過去一段時間都有看過市面上不少ebook,不少功能雖然更為強勁,但說到有真正有書庫支持的,仍然只有Kindle一部。 要知道,Kindle勝出是方便下載,現時更有免費Download 第一個Chapter的服務,是相當貼心的高招! 蘋果自然明白呢點,因此已經與新聞集團、McGraw-Hill等出版社取得連繫,據聞更會以iTunes作為主要銷售渠道。 而蘋果公司啱啱公布既上一季業績,都比預期強勁,iPhone銷售更仲創記錄新高,當中喺內地推出唔夠三個月,已經賣出20萬部。 蘋果公司喺上一季總共賣出咗870萬部「iPhone」手機,按年增長一倍,銷售創記錄新高。 其中公司客戶明顯增長,喺美國一百大企業之中,有七成都開始使用iPhone。 蘋果公司亦首次透露iPhone喺內地銷售,佢地同聯通合作,由十一月開始銷售iPhone,到今個月初已經賣出二十萬部手機,而喺第一季大中華銷售按年係增加左三倍。 至於iPod銷量雖然下跌8%,但仍然佔左七成市場佔有率。 Mac機更賣咗336萬部,增長三成三。 帶動蘋果喺第一季度,純利增長接近五成,達到33.8億美元,比市場預期強勁好多。 喬布斯提到,以第一季度嘅營業額計算,蘋果已經晉身為每年營業額超過500億美元嘅公司。 難怪個個都想學喬布斯。

高人

講起沃爾克,真係說極都未完。 知唔知佢老人家二十年前離開聯儲局後、最鐘意做咩? 釣魚! 熟悉沃爾克身邊的人說,這位老人家只有在垂釣時,先至是真正的快樂。 他可以一等就是數小時而絲毫不動搖,正是這超人的能耐,令沃爾克的聲望再次推向高峰。 沃爾克在支持奧巴馬選舉工程上可說是不遺餘力,為這個當時毫無經驗的新扎小子出謀獻計。 結果佢提出的限制金融業方案、被財長蓋特納及薩默斯長期打冷宮,可是沃老沒有灰心,繼續等待上釣的日子。 據聞奧巴馬在去年底一次經濟高層會議上,對於各人你一言我一語感到非常不耐煩,最後大喝一聲:「你們是否可以聽我說幾句?」 然後他拋出「Volcker's Rules」出來。 可想而知,蓋特納登時面如死色。 據講沃爾克一生極為節儉,來往華府與紐約之間從不乘頭等飛機,只吸最平的香煙,而且與巴菲特一樣,從不使用電郵,令到想對佢進行遊說的銀行家,也不知如何入手。 對於金融界的風險,沃爾克很早就提出應該實施更嚴厲監管。去年中佢曾經講過,現代銀行業唯一的真正發明,就只有ATM機。對於其他的所謂「金融創新」,他是全看不上眼。 一個月沃爾克先與長期擔任助手的秘書共諧連理,踏上人生的第二春,想不到人生另一個高潮,原來要到「花甲」之齡先至迎上。 不少銀行家以至財政部官員(蓋特納?)都認為沃爾克針對坐盤交易是「誤中副車」,認為根本不了解銀行業運作。 不過有經濟學家亦支持沃老,至少認為佢比華爾街「乳臭未乾」的金融小子,更清楚什麼是系統風險。 連最近著書「End of Fed」作者,共和黨人Ron Paul,都作出表揚,認為如果過去二十年聯儲局有佢坐鎮,肯定不會發生金融海嘯云云。 連克魯明都搞笑話,收到風建議由沃爾克取代伯南克出任聯儲局主席,又批死蓋特納職位不保。 所以說,今次奧巴馬是揀對了「武器」,以目前沃爾克的聲望及他的節儉風格,無論共和民主兩黨都表態支持,華爾街人要攻擊佢都有很高難度。 華府中人已經笑言:6呎7吋的高度,沃老才是"Too Big to Fail"!

老驥伏櫪

出任經濟復蘇顧問委員會主席超過一年、沃爾克一直話自己被「投閒置散」,甚至到白宮既機會都無幾多次。 不過到左星期四,沃爾克就企喺總統奧巴馬隔離,陪佢一齊公布整頓金融改革方案。 相反、一直負責拯救銀行業既財長蓋特納,就只係企埋一邊。 華爾街日報形容、呢位二十年前離開聯儲局既前主席,突然再企到政治舞台最前線。 金融時報話,奧巴馬同蓋特納過去一年、都抗拒沃爾克提出整頓金融行業既想法,直至今個星期民主黨輸左「馬薩諸塞州」參議員補選,情況先至有變。 代表華爾街大行既遊說組織「金融服務圓桌會」,對政府新既構思係感到震驚同意外,又話愈接近「選舉年」、咩事都可能發生。 紐約時報形容,華盛頓既政治氣氛今個星期出現一百八十度轉變。 離開左聯儲局二十年,舊年再擔任奧巴馬新既智囊,一年嚟被人「投閒置散」,點知華府突然轉吹一陣「民意風」,結果令佢重申踏上政治舞台最前排。 呢位八十二歲「老人家」,出任經濟復蘇顧問委員會主席超過一年、沃爾克講過到白宮見總統既機會,都無幾多次,而家就因為奧巴馬輸左一個參議員補選,令佢呢套既「Volcker Rule」震驚市場。 其實沃爾克過去一年都不斷遊說奧巴馬,不過佢既建議就被財長蓋特納、以及另一位經濟顧問薩默斯認為係過分保守,亦間接將佢排擠出權力核心。 不過到上個月情況開始有變化,奧巴馬親自要求薩默斯同蓋特納,同呢位老人家更緊密合作,所以大家先見到今日呢個局面。 沃爾克就係靠著一股不屈不撓性格,開始有更多支持者,包括英倫銀行行長默文金、花旗前總裁John Reed,以至副總統「拜登」,都成為左佢支持者! 而家反而替蓋特納擔心,蓋特納領導既財政部,曾經向國會表示沃爾克既構思係過分煩複。據聞民主同共和兩黨,都認為蓋特納喺改革金融機構問題上,係軟弱無力,而最近亦多次傳出財長人選可能有變,包括摩通行政總裁「迪蒙」都曾經傳出係候任人選。 華盛頓郵報話,喺星期四記者會上,沃爾完克同蓋特納就好似掉轉左企位。 所謂「老驥伏櫪、志在千里」,好似華爾街日報咁講,呢一刻,沃爾克成為左全球金融市場最有權力既一個人,就好似佢二十年前一樣。

停頓32分鐘

星期四美股大跌,今日開市前散戶都做足準備,開頭見指數開遲兩分鐘都覺得奇,點知到開市後,等下一分、又一分,直頭成半個鐘恆指都唔郁,大家就知大件事! 指數就係停喺呢個20514點,足足32分鐘,成個股市都變成一片混亂!散戶唔夠膽入貨、買左窩輪又唔知會唔會被收回,連發行商都唔知點開價! 最令人激氣,係負責編制恒生指數嘅恒指公司、遲遲無向市場發布資訊,最終要喺足足七個鐘頭之後、先話相信同系統喺接收股價方面唔正常有關! 其實港交所啱啱上星期先upgrade交易系統,將交易量倍增到每秒3000個買賣盤,以我們的報價系統為例,亦要自己加大個SERVER 先可以接受咁多資訊。 可能正係咁,先令恆指公司死機。 依家股市交易期間,港交所有三條專線,不斷向恒指公司提供成分股嘅股價資料,正常情況恒指公司系統,最多每15秒就更新指數。 事後,港交所下令,所有喺10點30點30秒之後,20500點收回價嘅牛證做嘅全部買賣都要取消。 咁成件前後半個鐘,到底損失左幾多錢? 初時都有唔同版本,有發行商甚至估計損失達到幾千萬元! 不過最後揭曉..... 五萬蚊唔夠! 涉及金額雖然細,但交易所聲譽事大,加上遇上大跌市,散戶頭半個鐘都係無所適從,咁有咩好啲辦法? 用最簡單比喻,股分停牌,相關既衍生工具自然會暫停! 所以出事期間,港交所應該考慮,暫停指數相關產品嘅交易,咁做可以較為公平。 話說回來,指數停頓,不過股分繼續有得炒。 仲唔係配合今年投資主題: 炒股唔炒市!!! 雖然話,唔少大行,機構投資者,內部已經有系統另計指數,無需要依賴恒指公司。 但今次指數停頓事件,引起各界不滿。恒指呢個歷史遺留產品,仲有無需要保留,又引起爭議。 六十年代,何伯引入恒指,令恒生品牌發揚光大。 恒指四十幾年前,由一百五十點,升到最高三萬點樓上。但其實近年背後,恒指地位已經有暗湧。 有無需要再用恒指,其實早幾年前,已經到左決定階段,話說當年恒指公司堅持唔俾國企納入藍籌,事件仲鬧上特首辦。 當年背景係,國企做唔到成分股,當局擔心影響港股成交之餘,亦被外界質疑恒指代表性。不少基金改為幫親其他指數,所以當日政府的碓諗緊,由交易所另制指數。 由於鄭海泉,同柯清輝最終願意就範,港交所指數暫時無需要面世。 但中環界話,大戶一直唔用恒指,亦批評恒指改革後,大部分時間有入無出,變為「俾面指數」,經過今次事件,交易所大可以把心一橫。 所以話有一

系統故障

今朝恒生指數報價懷疑發生故障,上晝出現長時間無跳動情況,歷時半個鐘。 好彩期指正常變動,大戶基金窩輪發行商以期指参考,但一般散戶習慣睇恒指作參考..更重大問題係負責編制恒生指數嘅恒指公司遲遲未有交代,反而是要傳媒發現無跳動,不斷查詢...這是何等回事!!!!

咬著唔放

最近兩個星期,美國總統奧巴馬對啲銀行高層,可以話「咬著唔放」! 先喺上星期向銀行收取過千億美元既金融危機責任費。 跟著就向銀行核心業務埋手,加強監管高風險業務。 奧巴馬接納經濟復蘇顧問委員會主席「沃爾克」既想法、加強監管銀行,包括對銀行「坐盤交易」加強限制,同時亦會建議提金融機構資本金要求,以及加強對衍生工具監管。 所謂坐盤交易,係銀行除左替客戶進行交易賺取佣金外,直接成立自己既「炒房」,用銀行資金坐盤進行買賣。 新措施會限制銀行參與既資金比例、以及投資範圍,包括唔可以參與按揭抵押證券。 華爾街日報話,除左傳統銀行好似係美銀同摩通受到限制,喺金融海嘯期間、轉型做商業銀行既高盛同摩根士丹利亦受影響。 政府既想法係、唔希望金融機構大到會危害整體經濟,因此大型銀行要將傳統受監管既存貸業務,同高風險既投資銀行業務分隔。 奧巴馬話目前監管制度,不足以監控全球金融機構承擔過大風險,以及不負責任行為,因此係需要作出改革。 呢個被稱為1933年Glass-Steagall Act「格拉斯-斯蒂格爾法案」翻版既措施,係前聯儲局主席沃爾克一直鼓吹,當年銀行要分開傳統同投資銀行業務,直至1999年法案先取消。 因此今次不少評論都話,奧巴馬終於第一次重視沃爾克意見。 其實難聽啲講,都係形勢所迫! 自從高盛布蘭克費恩之流,上到國會聽證會仲要「串串貢」,「犯眾憎」之餘仲話要大派花紅,相反奧巴馬就陷入民望低谷,仲要輸埋個「馬薩諸塞州」參議員補選,仲唔快啲攞啲銀行「祭旗」、提高返自己民望! 所以出完一招又一招,最新就拍埋前聯儲局主席沃爾克,要求加強監管銀行既「坐盤交易」,避免再重複金融海嘯期間、銀行大到不能倒閉既風險。 最大鑊係高盛,佢地有九成盈利都係嚟自呢啲坐盤交易,一旦新例實施,都咪話唔傷。 有趣(可悲?)的是,Glass-Steagall Act是1929年大蕭條後的產品,今天我們就有奧巴馬的「變種復活」,原來歷史真係會重複又重複發生.....

無中生有

琴日我地都再提醒大家,呢啲「半通車」傳聞、全部細節欠奉,叫大家唔好未聽就先興奮,估唔到咁快又要付出慘痛既教訓! 較令人意想不到係、今次否認時間,比07年直通車傳聞要快得多! 上海市金融辦公室發表聲明話,否認內地財經網引述主任方星海話、批准內地居民海外投資,並指有關報道係「無中生有」。 一句「無中生有」,就令到琴日一批追貨股民重傷。 喺消息澄清後,港股大幅回落,一度跌過五百點,完全抵銷星期二既升幅。 港股未開市,上海市金融辦公室已經喺網上發聲明,話《財經網》喺星期二發表、關於「上海將嘗試個人海外投資」報道,純屬無中生有。 上海市金融服務辦公室主任方星海、從未就此問題接受採訪。上海市政府對《財經網》不負責任行為表示遺憾。 事件引發港股大波動,財經雜誌網站喺星期二下晝大約三點,發載方星海訪問內容,話上海研究俾居民投資海外。 外電轉載,即時令跌緊嘅恒指,由低位反彈三百幾點。 但唔夠一日、上海市政府否認,港股朝早一開市就跌,抵消星期二嘅升幅之餘,受消息帶起嘅內銀股大幅回吐,拖累港股晏晝進一步急挫過五百點。 至於事件主角財經雜誌網頁,星期二晚,已經不動聲色,將方星海講話報道抽起,編輯部亦唔肯回應有關問題。 一下子,財經雜誌食曬。但疑問歸疑問,財經雜誌到底係咪夠膽作新聞? 第二,觀乎尋日屠光紹接受傳媒追訪時發言,上海資金自由行,唔似係作出嚟? 屠副市長仍然喺香港,但係佢隻馬,亦係事件主角方星海,踪影未明。 方星海上海交易所出身,喺佢眼中香港只係阿二。 有同方星海交過手嘅傳媒同財經界人士,都話此人甚串,但同時又熱愛亮相。 除非財經作新聞,否則,方星海係咪無講過,值得懷疑! 大約十年前,方星海因為熱捧上海言論,引嚟同場羅嘉瑞不滿,幾乎大打出手。佢係咪對財經雜誌講大左,有理由相信,答案係有!! 事實內地資金投資海外,屬於國策,聽者要小心,換句話講,呢類國策問題,一日未拍板,一日都唔好亂講!! 由此推斷,昨日方星海言論下晝三點通天,佢地下晝四點九齊集政府總府,近兩個鐘時間,方星海可能已知唔對路,想補飛!! 而財經,可能係食左隻最大死貓! 98年創辦以嚟,財經雜誌深入揭發多宗內地金融黑幕,開始建立地位。 2000年佢地刊發基金黑幕嘅報導,01年,揭發上市公司銀廣夏黑幕導,直接導致銀廣夏被證監會除牌。 中行違規事件, 追擊周正毅、陳良守案件,亦贏得口碑。 多宗報道,令前總編輯胡舒立,被封為最

翻生

上星期外管局一分過期名單,靜悄悄咁提醒大家「港股直通車」已死,不過唔夠一個星期,大家又有新既憧憬! 文件都講明過左期,點解仲有得「翻生」? 咪就係靠著上海市金融服務辦公室主任「方星海」,佢話內地計劃批准上海居民到境外作個人投資,仲推高埋下晝港股表現。 方星海接受內地財經雜誌訪問時話,上海正嘗試允許居民,個人投資海外。 整件事最令人唔明,係呢位落力打做上海成為國際金融中心既官員,多次提過香港根本無條件做人民幣金融中心,點解佢又突然咁「益」我地? 真係要搞清楚,佢話呢個境外作個人投資,同港股直通車有分別,因為上海依家諗緊嘅試點形式投資海外,將不限於香港。 說到底,咁急要向海外走出去,是中央排洪實在有逼切性。 資排去邊,當然係香港,所以突然間上海話,俾居民投資海外。一下子,內地市場透過股指,融資融券擴容,好快內地又會推香港ETF。 曾特首之前亦露口風,內地研究俾人民幣直接喺香港投資,其實與其再話阿爺益香港,心水清少少,都知其實佢地係幫緊自己。 呢啲「半通車」、「資金自由行」,過去兩年間唔中都會聽到一兩次,但全部細節欠奉,大家都係小心啲,唔好未聽就先興奮,忘記左直通車既寶貴教訓!

暗湧

近兩個星期港元匯價進一步轉弱,情況開始值得令人關注。 現貨美電一度現過7點7622,反映資金外流情況加劇。 查實由上星期開始,現貨美電就連日攀升,七點七六水平亦升穿,係十五個月以來高位。 08年金融海嘯以來,資金大舉流入,令港匯長期貼近7.75強方兌換保證水平,但自舊年年底開始,美元買盤開始增加。 資金近日外流,除左係有入口商大手買入美元外,部分股票托管基金,亦喺股市套利,將少量資金調離本港。 其實入口商匯入美元,都唔係近期既事,點解資金要走得咁急? 簡單講就係大家都覺得位高勢危,向上無咩Upside,向下唔知有幾多Downside! 多間大行好似係高盛同法巴、近日更一改舊年睇好後市既觀點,話本港資產泡沬問題,需要關注! 高盛胡祖六話,本港資產價格,特別係樓價升幅過急,需要正視,佢話,好懷疑升勢係咪可以保持。 而法巴亦指,香港目前雖然未有資產泡沬,但潛在泡沬形成問題,要正視。 主要是現行聯匯機制下,金管局無能力阻止熱錢流入,擔心會造成泡沬爆球風險。 解決方法呢? 更改聯匯機制現時當然唔可行,當局只可能透過行政手段,令市場有一個顯著調整。 大家執生啦!

預左要還

首間公布09年業績的摩通,似乎有了一個不太好的開頭。 第四季盈利升了3.7倍,賺33億美元,好過預期。盈利大幅增加,主要是投資銀行收入上升,第四季投資銀行收入有49億美元,不過摩根大通要為消費信貸虧損撥備增加19億美元至42億美元,加上信用卡及零售業務均出現虧損,令市場失望。 面對營業額下跌,摩通出乎意外將今年花紅大幅調低,由08年36億美元降至23億美元,佔盈利比重亦由62%降至33%。 摩通此舉可以說是「斧底抽薪」,因為前一日,奧巴馬先趕著推出徵收「金融危機責任稅」。 奧馬巴一句話「要收回納稅人一分一毫」,已經解釋了背後原因。 喺美國嘅頭50大銀行、保險機構,預計通通難逃。 按銀行總資產,扣除存款、及股東資本計算,原來包括滙豐在內嘅英資銀行都受影響。 滙豐未來十年,可能要繳交三十八億美元稅款,巴克萊銀行,更加要被罰56億美元。 滙豐主席葛霖更話,政府唔應該被政客憤怒所煸動,以為採取懲罰措施,就可以快速解決問題。 講到重傷仍然係美國金融機構,佢地平均每年要額外支付10億美金。 受惠救市基金最多嘅美銀、摩根大通、花旗同高盛,所交嘅稅亦係最多,彭博估計,單係美銀同摩根大通,每年就分別要交十五億幾美元稅款,高盛更要比11億美元,按市值比重多過其他大行。 今次奧巴馬徵費決定相當倉卒,而市場亦普遍反對徵費做法,認為咁做會大大削弱未來銀行盈利,而稅款最終亦會轉嫁俾客戶。 當然,大家明白這個微費的決定是政治考慮,要趕在多間金融機構派花紅前先開刀。 外界預計,單係高盛,摩根士丹利等大行,加埋會合共派276億美金花紅,較舊年多四成。 公眾不滿,加上第四季盈利可能按季放緩,彭博預計,大行花紅佔盈利比重可能減少。 其中,高盛預計第四季花紅佔盈利比重只有兩成半,與現在摩通比例相若。全年計,佢地只會用43%賺嘅錢派花紅,比例係99年最少。 為派花紅早有部署,但行政總裁布蘭克費恩國會表現,又引起公憤。 連CNN亦專題探討高盛公關問題,呢間1869年,由馬庫爾高盛創辦嘅大行。 雖然好壞參半,但高盛呢兩個字,仍然大學生最想加入嘅華爾街大行。 對布蘭克費恩嚟講,派花紅預左公眾不滿,目前已經有投資者入稟反對花紅計劃。 在The Partnership: the making of Goldman Sachs中,布蘭克費恩自言是一個有焦躁性格的人、這是源於他的缺乏安全感,不過這種性格倒轉又推動他要追求

Don't be Evil

圖片
Don't be Evil 從此有了新的詮釋。 搜尋網站GOOGLE高調宣布,唔排除撤出內地,消息震驚全球。 歐美各大報,全部大篇幅報道,讚GOOGE夠膽色! GOOGLE為保言論自由,同私隱,敢於豪賭一鋪,其實亦帶出,內地市場雖可貴,但自由價更高。 一旦觸及底線,唔會因為內地商機,而毫無保留付出!! GOOGLE內地網站谷歌雖然去向未明,可能成為歷史,不過,今日可以話先贏一仗,外國掌聲之餘,內地人亦唔少為谷歌,而鞠躬。 可能撤出中國消息傳出後,不斷有人去到北京清華科技園google大樓獻花,讚揚google保留到佢地私隱。 又話百度雖然佔有率高,但只重娛樂,唔夠專業。 GOOGLE辦事處,員工已經唔駛返工,內地官方媒體低調報告事件,但就引述四方八面專家話,Google真係撤出中國市場,將會係最蠢的決定。 GOOGLE就爆料,話內地黑客有組織入侵,連GMAIL都搞埋。 正當中國經濟坐大之際,GOOGLE事件,隨即提升至外交層次,連「克太」都要發聲明要求中方解釋。 對美國嚟講,全球數億GOOGLE用戶正係佢地籌碼,可以咬著唔放,可以預計,呢件事,已經成為政治事件。 評論話,GOOGLE將資料公開,形同將籌碼一次過押上賭台,到底係背城借一,還是痛定思痛,準備割愛,仲要睇嚟緊發展。 紐約時報就勸佢地三思,認為內地市場佢地輸唔起。 相反,CNBC,WSJ等傳媒就鼓勵GOOGLE玩鋪大,因為失中國,影響微!! 據講今次「撤出」在管理層內都有激烈辯論。Eric Schmidt擔心玩得過大,不過GOOGLE創辦人之一Sergey Brin 早就對06年為入中國而封口,相當不滿,所以支持玩鋪大。 對於內地市場策略,華爾街日報話,其實GOOGLE近年內部高層一直有分歧。 如果大膽假設嘅話,GOOGLE最終決定撤出中國,亦一的唔出奇。 堂堂全球大型搜尋網站,華爾街日報數據話,佢地內地市場佔有率只有三成多的,較百度近七成低一大截。 加上廣告收益亦唔多,估計,內地業務每年只係貢獻兩億美金收入,佔整間公司頂多2%,絕對係食之無味! 內地市場大,但做媒體就難上難。就算梅鐸亦多次埋怨,內地業務搞極都搞唔到。如果GOOGLE夠膽去馬,似乎起到示範作用。對於當日出賣客戶嘅雅虎嚟講,更係當頭棒! 就算以當日楊致遠肯向當局提供資料,導致當代商報記者「師濤」判監十年,今日雅虎喺內地咪又係一事無成

打到嚟

08年10月,面對金融海嘯第一波,包括人民銀行在內七大央行聯手減息。 一年多啲,未等其他央行,中國就率先出手應對資產泡沫,真的係估阿爺唔到。 下星期一起,內地銀行存款準備金率上調半個百分點。 調整後,存款準備金率去到百分之十六,今次係人行年半以嚟首次加存款準備金率。 調整後,銀行可以借出貸款少左,資金凍結銀行體系。 人行行動,正式意味內地啟動收緊銀根,人行無解釋原因。 學者估計觸發人行突然調整政策,係一月分新增貸款急升。 內地雖然維持適度寬鬆貨幣政策,但強調,會加強政策針對性。 人行行長周小川就多次表示,存款準備金率係調控政策好工具。 少數可以測得準有瑞信,認為一月分頭一個星期,新增貸款超過六千億,令當局震驚,亦反映銀行唔自律,要當局出手。 由於內地資金過剩問題嚴重,可能引發資產泡沬,人行今年起,已經加大市場操作力度,近兩星期喺市場抽走超過3千億流動資金,並且調高票據息率。 繼上星期上調三個月票據利率後,人行亦上調一年期票據利率,市場近期對內地加息預期升溫。 KC對今次人行舉動,認為是幾有「誠意」,事緣早上問佢都係覺得人行係出口術多,怎知傍晚已經打到來,因此是覺得有誠意對抗泡沫,但佢相信人民銀行今次只是趁泡沫初期就作出調控,係起到預先防範風險嘅作用,但相信中央短期未必夠膽咁快加息。 羅家聰話,今次人行調高存款準備金,只會對鄰近地區金融體系做成影響,至於歐美仍然要視乎本身就業同經濟狀況,目前未有退市條件。

日航與高鐵

圖片
今日跳出美國,去日本搭下日本航空(JAL)。 眾所周知,負債嚴重嘅日本航空,近年年年虧蝕,更可能短期內申請破產保護,成為日本有史以來第六大破產個案。 對於日本航空,新一屆政府早已表明無力援助,首相鳩山由紀夫表示,日航既股東應該對自己既投資負責,但唔肯評論日航係咪會除牌。 新任財務大臣菅直人更指,日航經歷過五屆內閣政府支持,表現都毫無起色,令人質疑到底要幾多援助先足夠。 受到有關消息影響,日航股價一開市已經大跌四成半,係東京交易所容許最大跌幅,之後只有沽家無買家,變成再無交易,股價於是跌至新低。 日航目前總負債高達一萬五千億日圓,早前有報道指,日航會向法庭申請破產保護,由國有企業重組機構出手,借出三千億日元俾日航繼續運作,同時要求債權人豁免欠下嘅三千五百億日元債務。 日航未來三年就要裁員一萬三千人,約佔員工總數三成,同削減國內外五十條航線。 說到日航之死,當然大家會覺得是日本航空體制過分龐大、機構又過於官僚,於是經不起全日空同新晉的廉價航空SKYmark競爭而死亡。 不過,真正令日航幾乎倒閉,是Shinkansen! 當然新幹線不是新鮮事物,日本早在1964年已有首架Tōkaidō Shinkansen,不過當時時速只有210km/h,直至03年先提速至最高破紀錄的581 km/h。 日本有研究發現,如果兩個城市之間同樣有新幹線同航機,日本人會選擇三小時以下行程搭新幹線。如果行程要四小時以上,就寧願選擇搭飛機。 以東京至名古屋為例,過去JAL亦有提供航線,不過自從新幹線將行程縮短至兩個小時後,航空公司已經被迫放棄呢類短途航線。 因此03年後新幹線大幅提速後,就正是做成日航搭乘人數由高峰期逐步下降、每條航線都幾乎蝕錢的理由。 看埋票價: 1. 東京至大阪 新幹線12,000日圓 JAL/ANA 10,000 - 12,000日圓 Skymarkt(廉價航空) 5,000 - 7,000 Yen 2. 東京至福崗 新幹線21,210日圓 (需時4小時55分) ANA/JAL 33,800日圓 SKYmark 18,800日圓 (需時3小時30分) 不過由於航空公司經常有提供折扣,減價時段分分鐘減至12,100日圓,所以長程是有更多人揀搭飛機。事實上,JAL國內最重要航線正是東京飛福崗,每周有130航班。 另一條熱門國內航線當然是東京飛札幌,不過隨著北海道新幹線2015年落

怒炒行長

喺瑞士今個星期舉行既巴塞爾結算銀行年會上,包括伯南克在內既中央銀行家,傾既議題將唔再局限喺退市、利率呢啲話題上。 似乎他們更要傾的、是怎樣保持全球中央銀行家既獨立性。 叫人吃驚的是阿根廷總統克里斯蒂娜,面對外債高企時,在想無可想之下,居然想動用66億美元外匯儲備,償還部分喺今年稍後到期嘅外債。 好在仲有個央行行長雷德拉多撐著,不願意就範,結果卻觸怒了政府。 克里斯蒂娜上周簽署緊急法令,解除雷德拉多嘅職務,指佢違抗政府政策,行為不當、同疏忽職守。 不過聯邦法院星期五,就將克里斯蒂娜嘅決定全盤推翻,裁定恢復雷德拉多嘅職務,法院又禁止克里斯蒂娜動用央行外匯儲備。 阿根廷之外,普遍估計會首個加息既亞洲國家南韓,近日政府派出官員出席央行既例行會議,呢個情況過去十年嚟都未發生過。 即使係歐洲央行,目前除左要面對成員國好似係希臘既負債問題外,歐元不斷升值亦惹起政治不滿,法國總統薩爾科齊上星期就公開表示不滿央行表現,指歐元過高會削弱競爭力。 同樣面對政治壓力,有日本同英國央行。 啱啱舊年十一月,就有內閣批評日本央行好似「訓著覺」,期後央行突然推出十萬億日圓定息操作,就係視為受到政府壓力。 而上星期英倫銀行延長量化寬鬆時間,亦被為為首相白高敦六月選舉做勢。 喺近代最著名既中央銀行對抗政治壓力,要數喺79年至87年任聯儲局主席既沃爾克,當年佢為左對抗通脹,一下子將利率推高至二十厘,惹嚟當時總統列根不滿,甚至要將佢撤職。

多看無益

美國就業數據較再次一次令人失望,就業職位出乎預期減少。 勞工部公布,十二月非農業職位減少八萬五千個,市場原先估計職位會是沒有升跌,十一月的職位數字則由減少一萬一千 個,向上修訂為增加四千個,是二零零七年十二月以來首次增加。 可喜的是去年第四季失業人數有所減少,平均每月失去69,000個職位,比起去年初每月減少691,000已經有很大改善。 不過今次真的要檢討過去一些看法及分析:傳統智慧是臨時職位增加,最終將可轉化為正式職位,不過今次連埋12月再增加47,000臨時工,已經是連續四個月改善,但都無法轉為長工,反映企業已經改變過去做法: 面對經濟過分起復,企業寧願以短工兼任,亦不願意投放資源去增加長工職位,可以反映企業對前景實在有好大保留。 也許好像WSJ所說,勞工部每次修訂就業人數,波幅都非常之巨大,數字似乎反而變成無咩參考價值,更是多看無益??? 就業市場不理想,即係可以減慢退市? 啱啱喺公開市場委員會、有投票權既洪尼格都話,聯儲局唔應該太遲落實退市,都認為合適既利率水平係介乎三厘半至四厘半。 啱啱喺今年先獲得公開市場委員會投票權,堪薩斯聯邦儲備銀行行長洪尼格、已經急不及待展示「鷹派」本色。 佢話聯儲局唔應該太遲落實退市計劃,否則會為下一次金融危機埋下種子。 洪尼格認為,維持利率喺異常低水平,可能會產生嘅資源錯配嘅問題,中長期會引發通脹升溫,並令失業情況惡化。 佢認為合適既聯邦基金利率水平,應該加至三點五至四點五厘。 佢又反駁主席伯南克既觀點,認為過分低息係會引致樓市同信貸泡沫。 除左洪尼格,今年加入公開市場委員會、仲有自稱係鷹派既布拉德,以及會取代舊年耶倫「鴿派」角色既羅森葛籣。 當聯儲局內部對退市部署仍有分歧時,由聯儲局及聯邦存款保險機構組成嘅美國聯邦金融機構檢查委員會,已經向美國金融機構發信,提醒佢地利率有潛在上升風險。 巧合的是,他們亦建議銀行以聯邦基金利率升到上四厘做基礎,進行加息嘅壓力測試。 如果加息加到四厘......好似好難想像..... 新一年一期的經濟學人,發表評論,提醒資產泡沬風險,認為高資產價格、低利率同財政赤字係難以維持。 佢地肯定政府最終紜撤出量化寬鬆,由近日迪拜、冰島、以至希臘既危機嚟睇,泡沫將會由最弱既國家率先爆破,投資者要好自為之。

收購合併101課

巴菲特突然介入卡夫收購吉百利,外國傳媒形容對卡夫係投下一個巨型炸彈。 卡夫原本打算先出售旗下薄餅業務比雀巢,套現37億美元,作為提高收購吉百利嘅每股現金部分,但收購總代價就維持喺106億英鎊。 點知呢一個舉動觸動左最大股東、股神巴菲特既神經,佢罕有發出措辭嚴厲聲明,反對呢宗交易。 聲明話,基於卡夫目前27美元既股價,今次以換股加現金形式收購吉百利,佢形容係付出非常昂貴既「貨幣」(Currency)。 巴菲特認為,如果增發新股計劃實施,只會令卡夫開出一張'空頭支票',即係話如果有股東今日投票贊成,根本佢就唔知道交易代價有幾大。 巴菲特話,佢特別對卡夫最新建議感到憂慮,因此呼籲其他股東都反對收購建議。 不過如果管理層最終可以證明、唔會損害股東利益,佢係會考慮支持。 有基金表明,巴菲特提出反對立場後,佢地肯定會跟隨。 曾經為巴菲特撰寫自傳「SnowBall」既作者施羅德話,今次巴菲德罕有發表聲明,好明顯佢係對卡夫做法非常失望,因此先作出最後努力,提醒卡夫要嚴守投資紀律,避免提出過高溢價。 華爾街日報就話,熟悉糖果業既巴菲特、係對卡夫管理層上一堂「收購合併」課,希望佢地調低出價。 消息就話,卡夫喺收購過程中,一直有同巴菲特進行溝通,但直至幾日前,巴菲特先話計劃發表聲明。 巴菲特介入收購並唔係無先例,股神十年前,就曾經反對持有既可口可樂收購另一間飲品公司,最終就落入對手百事手上。 事到如今,卡夫已經陷入兩難,是進是退也是死路一條,Irene Rosenfeld似乎離下台日子應該不遠。

見真身

圖片
由舊年底交由全球Google員工秘密測試。 「Nexus One」真身終於喺Google總部現身。 手機作業系統係「Android 2.1」,主打係上網、結合GOOGLE搜尋網提供嘅功能,具有3.7吋嘅輕觸式AMOLED顯示屏,採用「高通」嘅「1Gigahertz」處理器,備有「500萬象數」鏡頭,機身厚度11點5毫米,重130克。 新賣點係手機內所有文字,都可啟動語音功能。 另一個令人意想不到的「特點」,居然是在機背有一個類似『腰帶』的部分可以讓用戶在上面「刻字」......天呀,咪玩啦..... GOOGLE方面形容,NEXUS ONE係一部「超級手機」(Superphone)喎..... 雖然號稱係GOOGLE首部「自家品牌」手機,不過硬件其實係由台灣「HTC」代工,金融時報話,規格其實同主流既智能手機相近,甚至比近日摩記「回歸」的Milestone不見出色,因此見到真機反而令人失望, 同iPhone比較,唔單止軟件數量少好多,Nexus電池用量比唔上iPhone,亦無多點觸控功能。 數到比iPHONE優勝,應該係GOOGLE會以網上直銷方式銷售,訂價係529美元,相當於大約4100港元,買家可以唔使簽合約綁死,首批亦會喺英國、新加坡同香港同時出售,連埋運費220元,總代價是4320元,即日 有售 。 對於呢部「Superphone」,可能事前有太多放料,業界話,爭在無突破。基本功能叫做乜都有,但就係無 iPhone每年都有新嘢出嗰份驚喜。 Mobile Review網站已經率先公布,蘋果已經為iphone第四代做好準備,除左有新一代既晶片,仲有更快速既WIFI同更靚鏡頭。 都話啦,Steve Jobs始終先係最強CEO.....

報喜?

踏入2010年,好消息一個接一個,華爾街日報更形容係全球工業報喜! 為認為係各國嘅重要經濟指標、十二月既製造業指數PMI,都顯示各國經濟擴張情況理想,唔止中國同美國、連歐元區、英國以至日本嘅製造業擴張速度都好過預期。消息推動環球股市同商品價格急升。 不過唔知點解,當市場氣氛愈牛,一些知名學者反而愈悲觀。 諾貝爾經濟學獎得主克魯明話,強勁嘅經濟數據只係一次性,並唔反映經濟真正復蘇。美國經濟喺下半年,甚至有三分一嘅機會,再度陷入衰退。 克魯明就話,聯儲局將停止向市場購買債券,可能會引發按揭利率上升,導致樓價同交投下跌。而總統奧巴馬推行嘅七千幾億美元刺激經濟計劃,措施亦相繼結束,仲有企業逐步減少增加存貨,都令美國經濟喺下半年有三至四成嘅機會,再陷入衰退。 不過佢認為,經濟放慢增長,以及失業率進一步上升嘅機會較大。預計今年全年經濟,可能會增長百分之2,但喺年尾時有下滑嘅風險,失業率會比目前輕微上升。 而以編制標普樓價指數而出名既、耶魯大學學者席勒Robert Shiller,亦對樓市前景發出悲觀睇法,相信斷供情況會繼續惡化,好可能令美國經濟再次陷入袞退! 事實上基金經理手持現金水平,已經跌至金融海嘯後新低,較二千年歷史低位,只係爭二百點子。減持現金,增持股票,但問過的基金經理,原本佢地對今年雙位數回報,無咩信心! 有大FUND話,舊年兩成回報已經跑輸幾條街。但如果今年有兩成回報,分分鐘成為區內表現最住基金,可想而知,牛市背後,原來大戶認為今年搵食艱難。

重建2010

真有趣,上星期我們先回顧過伯南克02年時點睇資產泡沫,今日WSJ已經用回同一篇文章、去解讀伯南克點點樣睇資產泡沫。 真巧合。 ////////////////// 華爾街日報話,如果零九年係因為政府拯救左金融市場,咁二零一零年最重要、就係要投資者重建對市場信心。(Rebuilt Market) 不過債券大王格羅斯旗下既太平洋資產管理話,呢個工作一啲都唔容易。 Pimco喺發表2010年展望時,建議要減持美國國債,原因係聯儲局會改變維持低利率既承諾,一旦喺議息聲明中,有任何用語既改變,對金融市場都唔會係一個愉快既經歷。 事實上退市跡象係愈嚟愈明顯,近日聯儲局除左安排「逆向回購」同向銀行發行存款證,更提出左限制拍賣債券既規模,而聯儲局主席伯南克,喺周日出席「美國經濟學會」嘅會議,亦提出喺必要時會用加息等貨幣政策、應付經濟泡沫。 退市對舊年由低位反彈近六成既華爾街股市,亦係一個「計時炸彈」。 摩根士丹利話,今年股市仍然會維持強勁反彈,但到年底好大機會會出現先高後低情況。 有「熊」亦有「牛」,對股市長期睇好既對沖基金經理「巴頓碧斯」,就建議投資一啲高質素既消費同藥品股,認為市盈率仍然偏低,相反,商品價格就被指過分偏高,佢近日就一直沽空商品。 回顧零九年,股市商品都有兩成以上升幅,不過華爾街日報話,如果拉長啲睇十年股市表現,連同派息,九九年以嚟,每年平均回報只有0.32%,係1820年以嚟、表現最差既十年。 而唔少投資者對前景亦都係維持審慎,過去九個月就有130億美元資金流出股票基金,同期流入債券基金就有近二千四百億美元,證明並非所有人一面倒睇好股市。

2010

時間倒數返年初,相信無幾多人可以準確預測到、09年金融市場有咁戲劇性變化。 經濟學人提出,如果三十年代係稱為「大蕭條」,咁2009年就應該稱為「大穩定」年代,就係靠住政府出手刺激經濟,令恐懼變成樂觀。 咁2010年? 華爾街日報提出,美國經濟會有百分之三增長,係兩年來最好,已經足以推動失業率回落至金融海嘯前水平。 其中最好環節會係資本開支,至於樓市銷售雖然有改善,但斷供惡化,過期還款既按揭升至百分之九點六。 退市仍然係最大不明朗,高盛就預測美國救市措施會持續,可以推動上半年經濟增長兩個百分點。 經濟學人就話,二零一零年先至係真正危機既一年,原因係經濟復蘇基礎仍然脆弱,經濟不平衡、資產泡沫,以至主權債務違約風險都被市場忽視。 要真正復蘇,經濟學人提出兩個條件,一個係發達國家要提出真正可行、同具誠信既削減財赤計劃,以減少市場對「主權債務」既風險,同避免長期利率飊升。 另一個就係中國要願意付出代價,下定決心加快人民幣升值,咁先可以應對新興市場資產泡沫問題。 問題係,點解又要中國犧牲? 要數悲觀可以睇下、金融時報專欄LEX既預言,佢地唔係預測2010年,而係估十年後,美股只係會「打過和」,相反日本股市就有本事可以翻身一倍。 而包括中國在內既新興市場,十年後會大跌一半。 你信唔信?