文章

顯示從 四月, 2012 起發佈的文章

拆解內銀

今日,為升市而亢奮,因為有憧憬,相信衰既過去,好既陸續有? 企業仍然係後市最大問題,美股叫做有七成跑贏分析員預期、多於平均十年的62%。 不過好似開市埋位占少所講,美巨企之中,不少盈利都是來自海外。 轉身看看中資股、更唔同美股,人家盈利仍然有,派息無停過,現金流不斷多。 中資唔係,蝕既繼續蝕,賺既只係岩好符合預期。內銀支撐整體盈利,從來未變。 內地業績是好是壞,睇係點衡量。按年計,間間有盈利增長,雙降繼續。 但稍有留意,上市以?內銀股靠貸款製造盈利既方程性,似乎此情不再。 淨利息收入,追唔上整體貸款增長,息差壓力,係內銀面對既問題,有樂觀意見認為係短暫,存款多,可提供貸款量就多,人行如果恢復發票據,息差會擴闊。 審慎派認為樂觀派天真無邪,存款增加,建行按季多近超過百分之六,五大行之中增長第二多。 但存款多,加埋之前大量定存要重訂息率,結果建行首季慘敗。 存款多就一定有利息差貸款業務,從呢個角度睇,正正係謬誤。幾大銀行股,另一個面對既問題,首季業績終於反映出? 一直講既表外理財產品規範化,並且要撥入表內,已經出現。觀乎工,建,中三大行,佢地首季有關同業及其他金融機構存放及拆入款項都出現大幅增加。 工行按季多四成一,中行好的,都多一成七,建行跨張高達七成七。 有人話,理財產品同同業拆借活動係兩回事,但事實係不是兩回事,正如建行首季業績中亦講明,相關同業拆出拆入款項急升,係理財產品上升所致。 出現呢個情況有幾個原因。一,係理材產品上升,兼且撥入負產負債表,銀行會做兩邊對稱,一負就要一正,佢地會同時增加同業存放款項。 二,係理財產品本質上既資產,就係同業相關貸款。三,同業過剩資金,打包做做財產品,銀行可以再透過票據融資拆放。 同業拆借活動大增,風險幾乎係零,問題係,同業拆借息率極低,另外,一旦銀行要控制風險,部份到期既理財產品唔再續期,咁過剩資金就會更多投入同業拆借活動,息差壓力就愈大。 由單邊靠貸款,到目前轉型,內銀道路蔓長。曾經何時,間間銀行都話,要非利息收入業務佔收入貢獻升至四成左右。 不幸,首季顯示仍然沿地踏步,晌叻既中行只佔三成,農行非利息收入業務,比重一成九。農村即係農村,又其實咁諗,內銀內體同農村比,唔算進步得好多。

迷失日本

村上春樹挪威的森林有一句「每個人都有屬於自己的森林,也許我們從未不曾走過,但一直在那,總會在那,迷失的人迷失了」!! 森林,同迷失,正係日本,迷失亦一直在那。北韓兩星期左右前,發射衛星失敗,日本最新亦發射飛彈,不過係銀紙飛彈,今次耐的,大約四十分鐘證實失敗。 日本央行加碼十萬億日圓買債,有兩個錯誤地方。一,無好好管理市場預期,因為政客預先 放風,收唔到貨幣政策突而其來之效。二,係數字上取巧。 一方面加碼,同時間信貸援助規模減鎊,一加一減,實際量鬆規模其實五萬億日圓,屬於預期下限。 明眼人都知,日本政府想寬鬆多過央行。日官員可能覺得,既然二月政策收效,一定要繼續。但可能忽略當時有巧合。包括美國數據好,歐洲低息融資貸款,英國央行出招,全地球都係錢,製造日本寬鬆終於成功既假象。 美銀美林形容得好,認定日本央行已經俾政治、市場同傳媒「騎劫」咗,無咗自主性。相信嚟緊嘅政策,會受住政治壓力、同市場預期左右。 受威逼之下,日本央行做左搖控電子狗。各大投資銀行認定,日本央行會不停印,唔會停。 今次巧合係,按匯豐計算,買債規模加埋之前既數目,其實夠買曬財務省今年到出年既發債目標。呢種左手印完,右手買,學者講,就係最差既QE。 事到如今,央行總裁白川芳明好應該諗下去留,否則佢只會繼續做印鈔電子狗。 央行存在性有幾多,在於有無獨立。國會對白川芳明是否尊重,唔需要佢講,全世界都知。為逼佢印錢,國會除左喺央行委員委任上,阻頭阻勢之外,日本傳媒一度報道,國會一度要求,白川離國要事先申請。 白川唔知有無膽量,脫下印鈔電子狗之身,就算佢無膽,急於求成既日本政府,其實大有好人選,點解唔索性向花旗大佬求援,借用伯南克坐陣日本央行!! 由伯南克暫時坐陣日本央行有兩樣好處。首先佢係鬼佬,日本對鬼佬特別恭敬,國會同內閣未必會對佢太大施壓。 第二,伯老美國搞QE,目的之一係要證明佢用日本QE失敗做個案,研究既貨幣政策係岩。 既然佢以日本為師,不如直接幫日本,對伯南克嚟講,最少喺日本唔會俾克魯明指指點點。

財經通識-- 認識中央銀行家

圖片

伯南克對伯南克 (2012 vs 2000)

圖片
喺琴晚聯儲局既記者會上、有一段少插曲。 事沿諾貝爾經濟學獎得主克魯明,喺時代雜誌撰文,形容而家最反對伯南克貨幣政策既經濟學者、正係二千年喺「普林斯頓」大學做經濟系主任既伯南克。 因為克魯明認為面對經濟衰退,Professor Bernanke 會毫不猶疑推高通脹指標,都會推QE刺激經濟! 今日作為Chairman Bernanke,都有回應記者既提問,話今日美國情況同十五年前佢研究既日本通縮情況有別,兩者唔可以雙提並論! 克魯明都有回應伯南克既講法,認為今日既伯南克已經被佢既同僚「同化左」,令人非常失望。 佢始終相信,只有接受更高既短期通脹目標,加推寬鬆措施,先可以刺激經濟同就業市場。 其實如果有留意伯南克整個記者會,你會發現佢大部分時間都是處於守勢。 FT既主筆Robin Harding、都有出席到伯南克既記者會,佢話感覺上係伯南克咁多記者會以來、最自我防護既一次。 大抵正係由於儲局內部的分歧已達臨界點,令伯南克變成兩面不是人! 一個月前先說過就業市場的改善是短暫情況,今天聯儲局就將失業率預測、大幅調低零點四至零點五個百分點,降到百分之7點8到8。 雖然會後聲明繼續用超低利率會維持到2014年底,不過喺另一分對十七個委員既利率調查就顯示,就出賣左伯南克。 呢個不記名調查、認同應該喺2014年加息嘅委員,由1月時嘅5個,增加到7個。 至於認同聯儲局聲明講法、超低利率會維持到2014年底既委員,就由六個減少至四個,兩成半不到的比例,如何會是主流??? 面對記者質疑、伯南克只是強調,會後聲明已經係取得委員共識,但就話考慮日後既利率預測,會改為記名。 金融時報形容、聯儲局既委員對後年利率既預測,已經表明佢地唔相信利率可以長期維持低企,亦反映伯南克好難再喺局內取得共識,特別係面對佢既任期只係到2014年初,形容局內已經變成一片混亂。 路透喺聯儲局議息之後,訪問嘅13間主要交易商,預計當局最終會推出QE3嘅機會率,只有唔夠三成。 華爾街日報話,雖然所有跡象表明聯儲局今年內、無可能再推寬鬆措施,不過伯南克就好努力喺記者會上、令市場相信QE大門並未關上。 簡言之,就是伯南克只係向市場提供左錯誤訊息。 請問呢個良好信譽日後點維持落去?

戒心

熊彼德對資本主義有一個好獨特觀察,就係當經濟發展到某一個規模,如果無進步,無創意,就會進入自我破壞時代,最終被淘汰。 所以,市場最好既地方,就係仍然發揮到長江後浪推前浪功能。 賣點不再,剩餘價值下降,就要出局。新興市場通通唔認係市場經濟,同資本主義信徙,但目標根本明顯不過。 當年,高增長概念,七十年代造就亞洲四條小龍,當日小龍,依家是龍是虫,由外界判斷。 小龍之後,有金磚四國。但十二個月之內,四大金磚,有一塊根基不再,隨時倒下。 印度情況,明顯愈搞億糟。標普將印度主權評級展望,降至負面,肯定係為一批新興市場響起警號。 新興市場無疑仲有賣點,今年吸引大量資金再流入,但呢個只係反映佢地相對性有優勢,歐洲唔掂,美國唔肯定係咪咁做,令區內相對安全。 標普唔賣帳,認為印度負債多,係事實,因為佔左國內生產總值七成。 標普話,印度內部改革慢,有喺印度做生意外商,舉腳認同。因為,系統官僚之外,政策混亂,VODAFONE買完和黃印度業務,幾乎被掘要交幾十億美金稅款。 印度經濟問題,其實係滯脹所累。巴西情況如是,巴西大罵西方搞貨幣戰爭,岩。 但環顧多個新興市場,明知外圍貨幣氾濫,但內部仲大搞積極財政政策,似乎係為自己製造額外問題,到依家就出曬事!! 從好方面諗,印度被降評級展望,令中國有更大決心,同戒心。 一,唔會亂作決定,二,係趁形勢配合,盡快改革。 中國帶動作用,可以係話俾新興市場知,追求增長數字,唔係永恒!! 四大金磚無左兩件,造就後浪強勁。 跑出印尼之外,近期講過既緬甸,柬埔寨亦引起注意。 好簡單,由無增長,無人識,無人去,零基數效應,慨念一定有。基金人話,論人口,講資源,非洲有可能成為第二股後浪!! 講番印度,標普出手後,當地財金官員接連解話,反映的咩?騰雞!!!其實,如果射少枝飛彈,印度可以慳好多。

完美

圖片
一分幾近完美的業績報表。 產品繼續熱賣,令所有分析員跌眼鏡。 蘋果公司喺上一季總共售出3510萬部iPhone手機,比舊年同期大幅增長八成八,超出所有分析員預期。 至於另一項主打產品、平板電腦iPad,喺上一季亦賣出咗1180萬部,按年急升1點51倍。 帶動蘋果喺上一季純利急升接近1倍,達到116億美元,毛利率亦急升6個百分點,升至百分之47點4既新高。 睇埋現金,截至三月底,手頭現金110, 000, 000, 000.美元,用作應付每年只有100億美元的派息,都唔知講咩好! 當然,新增長動力不再是歐美,而是中國市場。 Tim Cook話,淨係大中華地區嘅收益就增加至佔營業額嘅兩成,iPhone銷量更翻左五倍。 可能平日見慣Tim Cook 的悶樣,今次罕有加入不少「辣句」。 微軟計劃推出集「平板電腦」同「筆記簿型電腦」一體化嘅產品,合併多個平台既WINDOWS 8,被視為新iPad潛在最大威脅。 不過庫克斷定,唔種產品唔會受市場歡迎、只係落後行家的防守做法。 「將多士爐和雪櫃合併,恐怕無消費者會受落。」 不過庫克亦表達出、同已去世既教主喬布斯有唔同管理風格,庫克話對於多個「侵權」既訴訟,佢係傾向和解多於對抗,近日佢地就同三星就一項訴訟達成和解。 當然,AAPL由二、三百美元升至今天的六百美元水平,當然累積不少市場沽空者,唔少對沖基金亦恐成最後一根稻草。 都是FT 的LEX 說得好, 經濟學上有"增長不可能永續,毛利不可能長期維持"的硬道理,但對於AAPL來說,這種只停留在理論層面的問題,即使是暫時,你除了擁有這間公司,還有甚麼可說?

財經通識-- 何謂人民幣的均衡水平?

圖片

無能力,無時間,無興趣

圖片
夏佳理時代告終,今日起,港交所主席由周松崗擔任. 話自己唔算熟證券。問番證券界,同佢接觸亦唔多,印象大多停留喺、港鐵行政總裁呢個角色。 的確,著住制服扮車站職員,同扮熊貓既盛智文,一齊拍廣告,深入民心之餘,亦夠哂親民。 唔少人俾周松崗既評語,係親切、圓滑。 周主席今日話,會多聆聽,特別本地持分者既意見。有市場人士期望,周主席可以打開隻耳仔,多啲同業界溝通 前主席夏佳理任內六年,促成多間國際巨企來港上市,港交所市值亦差唔多翻左一翻。 不過,同佢接觸既證券界話,佢作風較為強硬,形容佢,「行外人」唔肯聽「行內人」意見,令到部分本地業界人士,有啲唔滿意。 除左本地,港交所仲要發展內地、國際業務,港交所主席一大難題,係平衡各界利益,延長交易時段爭拗就係一個好例子。 考驗唔細,但一手促成兩鐵合併,周松崗協調能力,有一定保證。 但要問,工程師出身,證券相關經驗近乎零,有無問題? 有董事話唔駛擔心,一來主席唔涉及日常營運。 二來,前任主席夏佳理,無金融證券背景,一樣做得好,主持會議仲好有效率添。 要擔心既,應該係港交所點走出目前困局,近日市況淡靜,成交日日得四五百億,收入減少,仲要面對一埋「垃圾」股分的指控。 但另一邊,提升系統,拓展業務,支出將會大幅上升。 其實周松崗一向心思慎密,全早說的都是門面說話,除了今日「最後一句」: 記者: 為何不考慮加入政府? 周: 無能力,無時間,無興趣。

憤怒「票」

圖片
荷蘭首相呂特提出內閣總辭。 事件震撼程撼程度之大,不要會錯意、絕不在於荷蘭是否有債務風險。 身為歐洲第五大經濟體系、荷蘭的經濟表現其實遠好過歐洲南邊的鄰居。 今年財政赤字預計只係佔國內生產總值百分之4.6,呂特早前提出,希望將出年財赤、減少至百分之3,以達到歐盟定下標準。 荷蘭正係其中一個,強烈支持歐盟、訂立百分之3財赤上限嘅國家。 事件說穿了的、其實是歐洲政客當前的困局: 迫在眉捷既、唔單止再係纏繞左兩年既債務,或者係貪婪既投機者,更難應付係憤怒既選民。 法國總統選舉、左派既奧朗德領先,令市場擔心民綷主義抬頭。 連一向嚴守財政紀律既荷蘭,因為削赤談判破裂、政府要集體總辭。 黃金戰士潘國光早話過歐債危機唔單止係一場經濟問題,當政治角力已經滲入時、就已經主導整個歐洲大陸,問題亦已經遠非經濟學家能夠用圖表或數學模型可以分析。 數一數、歐債危機爆發以來、歐豬五國包括希臘、萄葡牙、愛爾蘭、西班牙、甚至意大利政府,都因為處理危機不力而倒台。 金融時報話,令金融市場擔心係呢啲國家既一啲細少政黨、只要打著反對削減開支既旗號,都能夠獲得民眾既支持,令人質疑舊年歐盟內部達成既財政協議,日後係咪仲會有效。 最新既採購經理指數跌近三年新低,經濟不振亦可能打破歐洲央行行長德拉吉既復蘇算盤。 近萬億歐元既LTRO、本來係想買時間穩定銀行體系,同時令經濟穩步復蘇,等各個歐洲國家盡快採取措施控制財赤。 不過歐央行既資產負債表已經超越聯儲局,限制左再有新一輪LTRO,計埋上個星期,歐央行已經連續6個星期,無入市買債。 有歐央行委員形容,買債計劃已經進入「休眠」狀態。 經濟師話,佢地計過各國削減開支、會令整個歐元區經濟、今年收縮一個百分點。 要喺平衡財赤同保持經濟增長之間取得平衡,已經變成不可能既任務。

明燈補習社

圖片
明燈補習社--兩成公司業績都係唔清唔楚? 小心福建幫?

放生

圖片
保羅. 沃爾克,公認係聯儲局既傳奇,現年八十五歲,原本七月,即係生日前兩個月,就可以見證到出自佢手筆既沃爾克法則,正式強制性執行。 但依家要等多兩年,即係佢要等到八十七歲。 既然係咁,我地願祝沃爾克長命百歲。因為拖得兩年,亦可以再延兩年,兩年又兩年,好快係一個年。打擊大鱷法則,幾時執行,係咪照單全收,依家無人敢百分百講,會。 黃金戰士講出重點,加強金融機構監管,要佢地做好風險管理,唔好靠炒賣為生,要由一個八十幾歲老人家去推動,去粗心,根本係醜。 包括禁止銀行坐盤交易嘅「沃爾克規則」,一共收到一萬八千分反對意見,除左銀行界反對,甚至有國家話擔心新法規會損害自己既主權國債成交。 延期兩年先實施沃爾克法規,美國傳媒並無高調報道,理由可能有二。 1.明知金融機構十拿九穩,已經唔係新聞。二,避免反對華爾街人士不滿升溫,製造另一次佔據運動。 2.聯儲局為首幾大監管機構作出宣布時,完全無用延期字眼,反而巧妙地講明,金融機構由七月起,有兩年既執行期限。英文叫 COMLIANCE PERIOD,之後先正式硬性執行。咁擺到明,就係放生!! 聯儲局叫金融機構為分拆坐盤交易等等,七月要做野,但根本無野好做!! 因為,具體條文係點,執行上細節,聯儲局一直無跟進。 推動多德法規既眾議員多德,一早叫聯儲局就沃爾克條文,提供執行上具體指示,因為時間無多。聯儲局一直行動欠奉,依家事後諗,似乎係故意擺出一副事不關己態度,為延期推行留下伏線! 投資銀行同金融機構,凡有監管就反對,唔會令人意外,當日公開話法規混亂,影響內部對沖部署,俾沃爾克直斥,係將問題複雜化。 其實,美國反華爾街運動,令沃爾克方案,有天時,地利,人和,完全可以推行。 當日,奧巴馬為民望,拉籠沃爾克,令法規意外起死回生,但得失左薩默斯,依家為連任,或政治捐款,又一百八十度取悅華爾街。奧馬巴表現出,佢用完即棄作風。 八十幾歲老人,推動監管,暫時未有成果。人未去,但正義又何在? 美國華爾街大勝一回合,士氣大增之下,分分鐘,英國有關金融銀行稅,將零售同投資銀行分開經營等規管構思,亦極有可能步上後塵。 所以話,大鱷,就永遠都係大鱷!!!

財經通識-- QE 血淚史

圖片

有牙老虎?

圖片
呢輪好多公司上市後問題千奇百怪,有賣乳豬既股價創新高後、傳出大股東財政狀況有變股價大跌,有賣「按摩椅」既上市三個月就出盈警! 更有企業上市啱啱一年、居然連核數師都擘炮,股分要一直停牌! 所以證監會月底會就加強新股保薦人監管,諮詢市場。其中要求保薦人就招股書內容承擔責任。 唔講唔知,其實呢個諮詢只係重提七年前既建議,如果當時可以落實、恐怕唔會有今日咁多問題! 證監會成為有牙老虎後,一直話要加強保薦人監管,其實呢個問題講足十年。但一次又一次放生佢地!! 證監會依家又計劃就加強呢方面監管再做諮詢。其中,要保薦人承擔埋招股書內容既責任,其實番炒七年前建議。 用番當年諮詢文件第廿八頁內容,當時證監會講明,保薦人係繼公司高管後,最了解公司資料嘅人,要將佢地納入埋承擔責任嘅範圍,唔單止有理據支持,仲會驅駛保薦人喺眾多有意上市嘅公司之中,揀出最安份既公司,帶入市場。 七年前講既問題,依家新股到底安全與否,有家心知肚明。可惜七年前,因為反對聲音大,放生左投行。 只係將招股書承擔負責,局限於上市公司管理層,由證券期貨條例賦予權力,而唔係公司法。 但好簡單,公司高管成為唯一追索對象,萬一佢地走佬,投資者連唯一對象都無埋,係咪公平先!! 七年後今日,依家先舊事重提,其實由韋奕禮,到依家歐達禮,都批評過保薦人質素,中間仲搞出金管局另外做審查,力撐保薦人。 好明顯,如果有得揀,監管機構當然想一拖再拖,以免激嬲投行。依家火速行動,證明證監會對新股質素忍無可忍。 再者,環顧歐美,打擊投行、加強監管係大趨勢,今次把握大好多。 但講往往天下無敵,做就有心無力。 先從監管對口單位為例,部份投行係金管局持牌機構,對口單位係國金二期八十八樓,證監會未必話得事。 再者,招股書有無開題,係咪保薦人唔小心,失職等等?係好主觀判斷,你鬧佢,佢唔認,你可能無符! 事關,懷疑容易,舉證困難。 由於英國,美國,新加坡,同澳洲都行緊保薦人為招股書負責制,證明今次一定無借口,再放生佢地多一次。 外國人投行,當然口口聲聲反對到底,但實際佢地可能鬆一口氣,事關絕招未出,預計亦唔會出!! 投行最驚唔係俾人告,因為告要有證據之餘,仲要錢!普通小股民,邊有咁多財力,對抗投行成批律師團,買錯新股最多輸錢,告輸投資銀行,棺材本都無埋! 無錯,投行唔係驚俾人

仲BRICS? LVMC!!!

對亞洲市場嚟講,四月十八日係大日子。 因為,又多一個新興市場,正式成立股市,就係柬埔寨! 柬埔寨股市,講左話要成立係五年前既事,兩度延期,終於搞得成。 股市兩個字,聽到好犀利,代表好多錢,好多股份,但柬埔寨股市,暫時只有一隻股份買賣,就係金邊水務。 根據交易所資料,金邊水全日有八十幾萬股成交,至於表現嘛,!聽著,首日升幅四成四。 亦即係,技術上,柬埔寨首日頭炮打得響,成為區內,甚至全球表現最好既股市!! 柬埔寨估計,今年內會有十隻股份上市,下一隻如無意外係柬埔寨電訊。 當地銳意改革,希望引入外資,據講,柬埔寨之前因為政治問題,唔少人出國,大部份學歷極高,依家唔少回流國家,令當地財金員官員系統,原來有一定質素。 隨著中國轉型,印度停滯不前,全球近年不斷發掘可做之材,亞洲區就有LVMC。 即係遼國,越南,緬甸,同柬埔寨。 被睇中原因好簡單,由零開始,增長一定高,再者係勞工成本低,會引誘更多勞動密集行業,到當地設廠。 睇好一件事,但肯定路途艱巨。以柬埔寨為例,國內生產總值只有百二億美金,同泰國,印尼三千一百,同七千億之比,係細路同大人分別。而且,政治,同市場唔成熟,法規等等,都構成一定發展限制。 但有機會,豈能浪廢。越南股市二千年成立,當時靠兩家上市公司起家,依家就有三百間。 遼國股市舊年亦誕生。至於緬甸,同柬埔寨,股市成為區內交易所商機。 因為無經驗,柬埔寨股市之所以搞得成,原來係靠南韓交易所做合作伙伴協助。所以,南韓交易所,就等於柬埔寨股市既代言人。 至於緬甸,目前未有股市,不過隨著政治改革、外國投資者興趣日濃,四月份佢地原來已經同東京證券交易所,以及大和證券簽署備忘錄,籌備成立股市。 既然係咁,港交所可以諗諗佢!!!

富.事.通-- 對沖基金之王 Bridge Water Ray Dalio

圖片
今日幾個場合都聽到Bridge Water 的 Ray Dalio名字,係時候好好認識呢位有點瘋狂、但又不斷鼓吹去槓杆化的對沖基金之王!

打落凡間

業績叫做好過預期,又有得增加派息。 不過市場對高盛整體評估係失望居多。 叫得最賺錢既投資銀行,高盛最大既固定收益交易部門,第一季表現明顯跑輸對手,呢個包括債券、外匯同大宗商品交易既部門,高盛第一季收入大幅減少左兩成,唔單止差過摩根大通,比起扭轉劣勢既花旗,總收入更係少過對方。 最大原因係高盛減低承受風險既進取程度,高盛話,客戶對承受風險既能力降低左、對盈利有負面影響。 以首季Value at Risk衡量,即係每日銀行可以承受風險既能力,第一季高盛跌至九千五百萬美元,唔單止比起舊年第四季少左兩成七,仲係金融海嘯前、即係零六年以來最低水平。 返到去06年既唔止風險,金融時報統計過、無論收入、盈利、甚至開支,都返到去六年前一樣,只係中間經歷左一場金融海嘯。 布蘭克費恩六年前接替保爾森出任行政總裁,業績打回原形之餘,股價更返到去05年既水平,股本回報更由當時既三成六、跌至一成二。 過去一個月,高盛飽受「扯線公仔」事件打擊誠信,CFO 在電話會議中,不斷強調如何以客戶為先,聽落都有點令人骨聳。 其實做得高盛客戶,都唔會係你同我,基金個個投資都是Other People Money,佢地最重要係有錢齊齊搵,講真對人家背後點唱自己,我大部分基金都唔會好介意! 反而投資者更關注係 ROE無無得提升,開始對呢位話自己做「神既工作」總裁、已經開始失去耐性,唔少大型基金、已經要求改組董事會,包括要布蘭克費恩下台。

財經通識-- 壞蘋果對企業盈利的啟示

圖片

Kiss me Goodbye, Argentina

圖片
DON'T CRY FOR ME ARGENTINA。 阿根廷曾經何時係全球最有錢國家,搞成咁,唔多唔少係過去幾十年,一宗又一宗政權易轉,政治動盪有關。 南美新興市場之前熱炒,阿根廷偏偏落後。佢地女總統克里斯蒂娜最新一個決定,將全國最大油公司 YPF國有化,變相係一場經濟自殺運動。 整件事根本就係「明刀明槍」將全國最大石油企業YPF國有化,阿根廷呢位女總統、用「極左派」形容都不為過,佢即時撤換左YPF行政總裁同派員進駐公司,手法相當狼死! 以營運效益差,生產少為理由,踢走現有大股東西班牙Repsol,表面上係為國民福祉,但實際行民粹路線,國營化講得太客氣,今次阿根廷政府咁做,其實係強行接管。 西方媒體唔認為今次係單一個別事件,事關新興市場近年不滿西方社會聲音的確大增。 委內瑞拉之外,巴西兩年前,率先發炮,攻擊西方大搞貨幣戰。 近至中國,亦多次毫無客氣,大數都指西方貨幣政策不負責任。 本質上,大量印鈔,推高通脹,有國家面對大量熱錢,好似阿根廷咁,就受高油價影響。 幸好,國家補貼,價格受制,阿根廷油價唔算貴,但國民仍然唔滿足,無計!! 克里斯蒂娜賴YPF西班牙股東管理不善,似乎只係逃避責任講法,無阿根廷限制價格政策,油價機制唔市場化,市場打賭,YPF量產一定多過依家。 亦調轉頭諗,阿根廷根本一早要學中國,油公司國家持有,咁就會相安無事。 但事到如今,阿根廷基本上自殺,十年前佢地國家技術上破產,錢仲未還曬,更一直未能透過國際債券市場集資。 如果債權人同你玩大,「克里斯蒂娜」好可能無力還招!! 可以咁講,無西方寬鬆政策,唔會造就新興市場民粹主義抬頭。阿根廷牛扒靚,紅酒得,資源豐富,足球又有美斯,邊個夠膽睇少呢個新興市場? 不過 FT的 Lex 告訴大家,其賓今時今日再唱"DON'T CRY FOR ME ARGENTINA"已經不合時宜,而家要唱係Kiss me Goodbye, Argentina! 社論話,YPF未來幾年投資額仲要倍增,其實Repsol分手未必係壞事,而對國際投資者來說,亦應該考慮、係咪仲要投資喺呢個監管咁不明朗既市場? 雖然今次事件喺阿根廷國內贏得人民掌聲,但可能最終麘令阿根廷受到孤立,負上沉重代價!

逆戰

星期五內地先啱啱公布第一季GDP遠差過預期、大家觀望緊到底中央會用邊招「保經濟」時候,星期六早上,居然比人行突襲! 五年來再一次進行匯改,人行仲相當進取、將擴大人民幣波幅達到百分之一,超過晒市場預期幅度! 結果都證明中央真係掌握得相當「準繩」,首日人民幣中間價高開後,但到現貨開市、跌幅就持續擴大,兌美元一度跌至6點325,比起中間價跌左百分之零點四六。錄得三個月最大跌幅。 大行共識係人民幣兌美元今年升值幅度會減半,美林料年底只會見六點二,同花旗一齊調低年底升值預測最多得百分之2,德銀就將未來幾年平均半成升值幅度,下調至百分之二至三。 講真、人民幣擴大波幅,影響有幾大?一兩日既市場反應,唔會睇到。 但肯定,人仔從此可升亦可跌,唔會再有買單邊情況出現。 增加彈性,國際化邁進多一步,係好事。更重要,引申波幅大左,未來相關產品潛在回報,理論上高左。 當然,對香港人嚟講,擴大波幅,等於習慣要改。無單邊升值,存人民幣為咩? 如果信人民幣終有一日成為主流貨幣,當然要繼續存,否則可以預期,人民幣存款,短期內會處於下降趨勢。 內地對香港人算係公平,零三零四年起,俾你每日存兩萬,零五年到依家叫做升值三成,有人民幣在手,過去十二至廿四個月,至少對沖部份貨幣升值既影響。 相比之下,香港政府,對香港人,公平與否,值得商確。 的確,面對貨幣貶值,政府嚟嚟去去都只係話穩定勝於一切,聯匯有貢獻云云。 但以往有貢獻,不代表依家有。隨著單邊買人民幣升值降溫,資金重流港元,即係銀行資金成本仲有下降空間,按揭利率豈不是要繼續減?! 舊年,本港全年通脹百分之五點四,相當於本港負利率大約四厘,一定係區內之冠。四厘負利率,用港元總存款率,除番七百萬人,亦即係人均存款因為負利率,舊年蒸發兩萬幾蚊!! 股市高風險,人仔無升值,資金出路怎麼辦?政府話,樓市有泡沬,但瑞信劉老師都話,借錢買樓收租,兩三厘回報,唔借錢既話更有六、七厘回報,有回報,又點算泡沬。 美林講得直接,聯匯改唔改一件事,但會有更多聲音質疑制度僵化。好簡單,人民幣開價單日高低位容許有百分之二,港匯強弱兌換保證,只係相當於百分之一點二九。 內地咁保守,幅度都要比港紙高,單係呢點,已經講唔過去? 逼在眼前既問題係,如果單邊賭人民幣升值既錢,轉做港元,因為零匯兌風險。除左令銀行資金成本下降

任重道遠

圖片
不得不佩服中央對掌握人民幣匯率改革時機之準繩。   零五年匯改以嚟,另一次改動。人民銀行決定由星期一起,將人民幣兌美元單日「上下限」波幅,由依家百分之0.5,擴大到百分之一。   即係單日升值、同貶值幅度,大左。   今次係07年5月,人行另一次擴大人民幣兌美元波幅,即是一等、其實中央是等了五年時間方進行另一次匯改。   人行解釋,市場發展同定價能力已經成熟,係時候增加匯率雙向彈性。   有內地學者話,由於近期單邊賭人民幣升值情況已經收歛,係進一步強化匯率彈性時機,但唔代表,人民幣會加「快」升值。   無論總理溫家寶,同人行行長周小川近期已經先後提到,人民幣處於均衡水平,可以再增加彈性。   內地官方話,近5年嚟,人民幣兌美元實際升值三成。   睇番今年,人行雖然幾次大幅高開開市中間價,但人民幣兌美元一直徘徊喺6.3附近,今年幾乎無變動過。   由於外貿表現疲弱,內地最新公布首季經濟增長只有百分之8.1,一般相信今年貿易順差會繼續收窄,因此目前環境,正是當局利用貨幣政策,進一步調控經濟,同資本流入適當時機。   如果各位記性好,大概會記得去年第四季多次出現人民幣眨值預期,當時不少機構甚至估計人民幣會持續眨值。   巧合的是、美國財政部剛在一日前表示,會推遲發佈半年度匯率政策報告﹐即是在即將進行的美中戰略與經濟對話和國際貨幣基金組織下週會議後先發佈。   有大行形容、今次是正式代表人民幣單邊升值預期年代的終結。   不過要說推動人民幣國際化,今次舉動只是為資本帳項目自由兌換揭開了一個序幕,擴大波幅終究只是一個量變、而非質變的改革,所謂路漫漫而修遠兮,匯改仍然是任重道遠。

勇氣

圖片
區內出現三個信息,一,內地經濟增長差過預期。二,新加坡狀態大勇,貨幣政策鷹派抬頭。 三,印尼,南韓完全唔知點反應。 某程度上,亦反映兩件事。一,內地同新加坡好勇敢。 二,係區內貨幣政策有可以由一致,轉為背馳。 先講點解勇敢,內地為例,首季增長預測之前有官員漏口風話有八點四,市場之後預測,介乎八點一,至八點六不等。 結果,唱高開低。 唱高開低,唔似內地風格,尤其係今時今日形勢,怎不能不稱讚夠勇敢。 從好方面諗,三月份數字有改善,零售成為推動增長動力,正正切合中央之意。問題在於,零售對經濟比重大增,只係投資同出口唔得。 市場解讀,由情緒同氣氛主導,數據差,即係提升政策寬鬆預期。繼減準備金之後,官方智囊機構鴿派抬頭,大派乳鴿餐,建議人行盡快減息。 阿爺想點,無人知。如果短期有行動,未來七日機會最高!! 未來七日,點解?因為總理二十號會外訪。係咁簡單。 內地寬鬆機會大過維持不變,相反新加坡大搞收緊政策,坡元匯率政策改動,嚇市場一驚!! 新加坡無利率,只有匯率政策。匯率政策有三,透過調整中間價,調整波幅,同調整匯率斜度,從而達到寬鬆及收緊之效。 結果,三樣工具,新加坡金管局郁夠兩樣。 當局決定,輕微容許新加坡元、加快升值。利用強貨幣嚟壓抑入口通脹。 但同時收窄番匯率嘅上下波幅區隔,以防坡元過度升值。 上調斜度,收窄波幅,幾間大行結論係夠勇。新加坡咁做,結果有兩,一係確認坡元升勢喺更合理水平。 二,係幾乎令坡元末來六個月無機會貶值。 當然,如果從首季增長睇,九點九,新加坡擊敗中國,通脹亦比預期高,收緊大有理由。但佢地又同時預計,全年增長一至三,通脹下半年回落,咁,即係想點? 陰謀論諗,新加坡既想提升貨幣吸引力,吸引資金。同時進一步曲線突顯,死對頭既香港,無貨幣政策,只會邁向資產泡沬死路一條!! 又的確,香港情況,有比下去之感,從呢個角度諗,人地夠勇,突顯我地怯弱! 未來一段時間,美國白鴿雌雄影響之下,區內有本事,會預築防線收緊。靠增長既,會寬綁刺激。如果咁,資金流情況,會相當混亂!!

迴施空間

圖片
第一季季度數據一出,令市場震驚之餘,更不解係市場點會咁反應? 預咗增速回落,但結果內地第一季經濟增長遠差過預期,首季經濟增長只係得百分之八點一,比舊年第四季、低零點八個百分點,係近三年最差。 不過無論中港股市都未有壞消息影響,港股下晝更愈升愈有。 大路解讀係經濟數據滯後,相反周四公布的逾萬億新增貸款先係領先指標。 況且經濟表現愈差,就愈有理由相信內地會加快微調。 仔細解讀數據,出口差之外、房地產投資疲弱都值得關注。 扣除價格因素,第一季房地產投資增速同比回落10點6個百分點。 早前世銀就警告過、房地產市場修正過度正係內地經濟最大下行風險之一。 不過情況唔係太悲觀,雖然首季固定資產投資佔GDP比重,由5成4降至3成3。 值得留意係同時消費就由舊年嘅5成急升至7成6,按比例,中國既消費規模甚至迫近最大經濟體美國! 華爾街日報話,咁正係反映結構轉型開始見成效,相信黎緊內需增長,可以抵銷投資同出口下跌嘅影響。 大行都認同,首季經濟增長見咗底,預期中央會放寬政策支持經濟。 最重要係總理溫家寶,亦首次用回旋空間,形容目前宏觀調控政策。 既然講到,要預留政策空間、把握經濟工作主動權,相信整體氣氛未來幾個星期會有顯注變化! 話說回來,阿爺安排數據出街時間原來都可以好高明: 試想下、如果今日先出GDP,之後下午先公布新增貸款,個市仲係咪可以咁樣?

一世

上季成績好,Google以股代息回饋股東,但方法惹起極大爭議。 雖然坐擁490億美元現金,但董事局選擇唔派發現金,反而史無前例將股分「一拆二」,成立新類別「C股」,再以呢批無投票權嘅新股,以一送一嘅比例,派發俾股東。 重新出任行政總裁一年嘅創辦人之一佩奇解釋,已經諗左呢個做法超過一年,認為咁對公司同股東都最好,既可以保持企業管治架構,維持管理層專注長線發展嘅自由。 到底有甚麼自由令Page 覺得咁重要? 原來係例如令世界更加美好??? 佢地認為咁做先可以避免受外界壓力,為短線利益放棄長遠機會。 佩奇又話,投資者買Google,本來就已經唔正常咁長期押注落,佢同另一個創辦人「布林」領導嘅團隊,而家只係要求押注更加長。 不過外界對呢個做法就好大保留。 分析員普遍相信,已經持有近五成八投票權嘅佩奇同布林,只係想保住操控公司嘅地位。 「金融時報」更批評,創辦人只係想一世都對Google有絕對控制權,係企業管治嘅嚴重倒退。 有啲發展策略其實都受人質疑,好似發展手機廣告業務,雖然幫助Google上季賺多六成,去到近29億美元,收費點擊量更加上升近四成,比一年前增幅更幾近一倍。 但廣告商就每個點擊,畀Google嘅錢就跌左一成二,幅度大過舊年第四季。 有分析員擔心,Google仲要收購手機製造商「摩托羅拉」,進入毛利更加低、但唔熟行嘅硬件業務,擔心會影響盈利前景。

財經通識-- 解構印尼神話

圖片
回報達35%,冠絕亞洲新興市場

發圍

圖片
倫敦金屬交易所LME賣盤,下個月截止第二輪競投前,盛傳入圍既港交所、傳出向銀行籌組最多三十億美元貸款。 現時分析員俾倫敦金屬交易所既估值,介乎7億幾至24億美元。 一間叫倫敦金屬交易所,一百五十六年歷史,一間叫全球市值最大既香港交易所,合併後得十二年歷史。如果成親,就會係後生仔,娶個老女人!! 如果純粹係男女關係,兩者幾乎無可能成親。但商業利益所及,未去到一個願打,一個願捱咁惡劣,至於,港交所同倫敦金屬交易所走埋一齊,會以各有所需。 跟據小加總裁之前定下「萬言書」路線圖,香港明顯不過,係要幫商品,要搞人民幣業務,要搞大市場地位。百幾,二百億,俾得起。對倫敦金屬交易所嚟講,港交所有既野,就係佢地無既野,兩個字,商機。 你諗下,第時有機會搞人民幣計價商品產品!!流口水啦!! 倫敦金屬交易所,係歐洲僅存行緊會員制交易所,九十三個會員,個個係大鱷,摩通持股一成一,高盛百分之九點五。過到佢地呢關,雖然小加出身摩通,但一定要錢先搭得夠。 倫敦金屬交易所保守聲音好多,近期佢地擔心傳統不保,唔少商層呼籲過停止賣盤。問題係,不賣盤,佢地無前途。 一,會員嚟自五湖水四,各有利益,唔會有長期策略。二,係倫敦金屬交易所,並無本身結算所,佢地曾經好積極諗過要搞,但一諗起要錢,於是決定賣。 港交所能否收購成功,第一關,係要過摩通,高盛,嘉能可為首,大鱷股東一關。 第二,當然係睇對手。芝加哥,紐約,同泛歐都有競投,計埋交易所,總共四個潛在買家。 原本十五個交易所話買,最後最得五個係認真,證明件野未必好易吞。 從對手實力衡量,港交所贏,係商機多,錢多,但輸就係唔係鬼子佬同聲同氣。 講到錢從何處來,貸款之外,港交所發新股會係主要來源。 港交所月底股東會,就會表決,一成新股,加不多於一成折讓動議,舊年只係五,五。如果通過,一成股份都有百幾億,唔借錢都夠。 問題係,DAVID WEBB已經公開要求反對,因為批股不如供股。的確,批股一旦做,政府半成持股量,無得再多,只有攤薄。 話說回來,政府剛剛委任CK 周松崗入主,388 就來個大動作,是否有先斬後奏之嫌?

國寶沒落

圖片
「數字」市場發展果然如「幾何式」跳躍,省一不留神,就已經會消失於歷史之中。 先有摩記沒落,RIM目前只是垂死爭扎。 連芬蘭國寶諾基亞,亦已步入黃昏之時。 星期日先喺美國推出,配備四點三吋螢幕,採用微軟最新手機Window Phone7.5系統、諾基亞首部支持4G網絡,被認為係翻身之作。 但Lumia 900一推出劣評如潮。 諾基亞承認,部分新機有軟件問題,唔能夠連接上網,難道智能手機只能打出打入? 壞消息緊接而來,諾基亞之後發出盈警,指手機業務第一季經營虧損,會達到收入嘅百分之3,預測第二季虧損甚至更多。 更令市場震撼係諾基亞喺廉價手機市場既領導地位、可能受到動搖。 公司指廉價手機銷售按年下跌一成半,銷售額就減少三成二。 諾基亞指,新興市主要由於競爭激烈,特別喺中國、印度等市場,廉價手機亦受到亞洲同業(中興華為?)嘅威脅,都打擊手機銷量。 舊年諗著靠Window Phone翻身,行政總裁「埃普」投入大量資源發展,Lumia 800 雖然表現尚算流暢,但電池只能捱到半日,已經令人失望。 結果一如預期、上季智能手機銷售量只有1千2百萬部。 更致命係決定遂步淡出既Symbian系統、既然擺明唔會再support,就令低檔市場佔有率都失去埋。 為左救亡,總裁Elop埃普宣布四月二十一日前購入Lumia 900,會獲得一百美元既補貼,變相用戶只要簽約就可以零機價出機,拉闊同蘋iPhone 4S既機價差距。 不過有科技網站拆開過Lumia 900,居然發現成本原來仲高過iPhone 4S,換言之補貼會進一步蠶食盈利。 上下都不能兼顧,其實都唔使多大分析,諾基亞今天已沒有出路,埃普已經別無選擇、除左擴大已經推出裁員一萬人既規模外,諾基亞仲要業務拆骨出售。 又為為哈佛 Business School 的研究個案!

打大鱷

成日話高盛「點石成金」,但總有走漏眼嘅時候。 早喺舊年,以面值80美仙買咗批企業貸款,點知越渣越跌,年底前以斬倉價65美仙止蝕沽出,跌幅有成1成9輸咗千三萬美元。 益咗邊個?可以打倒「神的工作」的人,當然係名正言順既股神。 人哋當垃圾賣,巴菲特旗下嘅巴郡就乘機執平貨。 坐貨半年,批貸款已經升返上82美仙,賺幅2成6,當然亦上返高盛買入價。 點解急住要賣? 除咗驚越蝕越多,原來同內部重組有關。 擔心收緊監管、唔俾投行再渣呢類「破產企業債券」,高盛由舊年初開始,決定要縮減呢項、總值40億美元嘅交易業務。 唔問價咁沽貨,拖累呢個部門單喺第三季,就蝕咗9億美元,兼且關門大吉,併入債券交易部門。 發言人話咁做,可以提供更一體化嘅槓桿融資業務。 但要注意,同時會少咗一個、攞到客戶貸款資訊嘅重要渠道,喪失做「坐盤交易」嘅優勢。 睇錯市嘅唔止咁少。今年嚟叫大家渣股票、沽債券,但美股早兩日、先錄得今年嚟最大跌幅。 難怪有分析形容,呢個係高盛有史以嚟最差嘅投資建議。 同時令人質疑,內部嘅坐盤交易部門,有無美其名做對沖、反手睇淡,大賺一筆? 結果客戶又成為「扯線公仔」?

富.事.通

圖片
今集富.事.通結合財經與美食,Yummy! 荷李活食神+富翁WOLFGANG PUCK

殺價大享

圖片
「電訊魔童」要做「傳媒大亨」,講過100億先肯賣嘅電訊業務,而家半價成交。 為咗專注發展多媒體業務,城電以合共超過50億,出售香港、加拿大等固網同長途電話服務,比私募基金「CVC」。 電訊過去十幾年一直城市電訊核心業務,92年由加拿大回流香港,王維基先以「殺價超人」形象,透過割喉式減價、打破壟斷嘅IDD市場。 之後再投固網牌、由零開始、一手一腳喺全港舖設光纖網絡,令「香港寬頻」成為第二大寬頻服務供應商,客戶人數124萬。 今次放棄本業,王維基話,係電訊業務市場已經成熟、而且大部分業務只限喺香港進行。 相反發展多媒體業務,無論喺香港、內地同東南亞,增長前景都比較理想。 08年入主亞視既十二日,自稱上左人生寶貴一課,仲燃起王維基對多媒體業務既興趣。 王維基係公認既電訊魔童,佢當年殺價超人,仍然令人津津樂道。分析員話,不能懷疑,魔童雖然在商言商,但對電訊市場有一定貢獻。 魔童當日,許下全港鋪網宣言,要覆蓋全港二百萬個家庭。用左三十五億,十一年時間,舊年剛好差唔多達標,一百八十萬家庭蓋幅,極速光纖寬頻,獲討論區極力推介。 今日電訊魔童要變身做電視魔童。五十億,同電訊業務分手。五十億,只係比當年三十幾億投資額多四成,但五十幾億,原來已經高過曬城電市值。 如果用市盈率計,交易相當於舊年市盈率十七倍,同行業睇齊,唔算係極靚價。 如果用五十億呢個現金額,同之前分析員認為城電既企業價值相若,即係今次魔童變身,其實令到城市電訊體現真正價值,係每股值七個一毫四。 賣曬公司唯一值錢,兼唯一有現金流業務。 城電俾現有股東既分手費,或者補償,係每股兩個半。魔童袋八億八千七百幾萬,小股東? 當然視乎佢地持股。但簡單一條算術,用交易總額相當於每股值七個一毫四計,即係股東分錢之餘,其實更重要係要夾番每股四個六毫四,幫王維基完成電視魔童美夢。 講到呢度,今次變身美夢,對魔童,同股東,代價係大過得益。瑞信之前計過,電視媒體業務,由於位短期一定係無盈利貢獻,預計每年會損害城電價值六億,相當於每股六毫子。 所以,兩個半呢個補償股息,只係夠現股東有四點一六六年做緩衝,抵銷電視業務燒錢。 憑魔童既創意,內容媒體行業,一定有番新現象,期待呢個發展之餘,亦證明一樣野,就係外資對有高現金流既項目,係情有獨鐘。 作為傳媒一分子,我反而關注魔童決

造假學院

圖片
過去一個月本港唔少民企都先後出現問題,好似係博士蛙被核數師德勤質疑,同供應商一筆近四億人民幣既預付金額、係咪存在。 結果德勤辭任會計師,而博士蛙之後一直停牌。 其他好似係寶姿、澳優、大慶乳業同歲寶百貨都被揭露有類似問題。 三月到依家,話要延遲公布業績既上市公司,最少24間,多間更因為有核數師對對帳目「有保留意見」,唔少係一直停牌。 由舊年「渾水」觸發的民企爆煲潮,來到今年、似有一個新的演繹。 而多次揭穿內地民企造假帳,渾水創辦人Carson Block今次亦以影象話俾大家知,呢啲去咗海外上市嘅民企係點做數。 佢因應內地一篇報道、講內地正調查一間被形容為金融詐騙學校嘅小型投行,教企業做假數兼上市。 渾水派出一隊員工、偵查涉及嘅美國納斯達克上市公司『傅氏科普威』。 調查員去到大連,發現公司廠房係好大,但就空無一人,好似鬼工廠。 Block 形容調查員埋伏三日,只係見到呢兩架大貨車運出生產的卡車,以及四架細車出廠,同公司對外稱每日有多批貨車出廠有很大出入。 生產規模成疑,帳目同交易文件亦有好多問題。 好似公司聲稱、鬼工廠前年營業額有3千萬美元,但實際只係得4百萬。 公司又多次話有收購、但其中一次係用超過一千萬美元,收購主席傅利間接控制嘅公司。 另一次就用近4百萬美元委派主席去買,質疑呢啲收購,都只係將公司錢轉入主席袋。 渾水仲列舉其他幾間有類似帳目問題既內地企業,部分都係搵同一間機構搞上市同核數。 一口氣講左咁多問題,布洛克話,知道唔少交易員、部署未來幾個月,進一步發表指控報告、並沽空本港上市既中資股分。 金融時報「巧合」地有相關報道,指近期多咗對沖基金,由沽空美國上市既中資股、轉為沽空本港上市既內地企業股分,「借貨沽空」比例不斷提高。 隨著美國愈來愈多中資股除牌,香港會係下一個沽空戰場。

插旗

圖片
三名港交所政府委任董事,名單提前揭曉。中環人議論紛紛,疑問重重。 首先,點解一改過去十年做法,唔等埋股東大會當日,反而要選擇提早公布呢? 其次,夏佳理由非執行主席,變做非執行董事,港交所佢算第一人。 第三,原本大熱,下馬! 無錯,之前被問係咪做港交所主席,公開講過話,「我無話唔做」既史美倫,委任名單榜上無名。 唔少證券界老行尊,都大感不惑,問到底咩事? 事關,查太技術上可以連任董事。依家,明飛佢! 時間,同人物的確引嚟揣測。現任特首新西蘭去也,候任特首,人在北京。 中環人話,周松崗、同夏佳理,屬於現有陣營,難道煲呔即使離任在即,亦要喺港交所插旗? 技術上,現屆政府絕對有權行使委任權,但港交所董事人選,有策略意義,面對同內地交易所謀融合,到底曾、梁有無預先協調,不得不而。 但心水清既人就話,煲呔做財爺期間,主要作品之一就係交易所合併,好明顯,佢當港交所正正係THIS IS MY BABY! 更何況,交易所影響力,比任何一個財金機構,還要大! 程序上,周松崗要港交所四月廿四日董事會表決後,先正式係主席。周松崗,外界對佢稱讚有嘉,有國際經驗、處事靈活,但講到做交易所主席,又有人會問,他會比史美倫好咩? 老行尊話,以前聯交所、依家港交所,做主席唔一定要熟市場。夏佳理當日接替李業廣,雖然同為營運「賭場」,亦無人睇好。 況且,CK能力強,人脈廣,算係尚佳人選。 另一個有趣問題係,史美倫當日,係遴選委員會成員,力主請李小加。而小加既強項,亦正係史美倫長處。由兩個賣點相同既高層,打雙箭頭,未必有協同效應,更可能有副作用! 點都好,港交所董事人選,大局已定。熟識政情人士話,明顯今次變成梁營支持者落敗,唐營全勝,莫非係阿爺有意「補飛」? 周松崗,夏佳理,均有份支持唐唐,亦即係話新一屆港交所董事會內繼續充斥曾班子。 精於權術,善於插旗,唔放過任何一個機會!好野!當日用政治家職銜,果然係無花假!

財經通識-- 巴西緣何要發起「貨幣戰爭」?

圖片

浮士德交易

圖片
溫總出巡,言論字裡行間,外界解讀為釋出寬鬆訊號。 加埋中證監加批QFII額度,內地即時等同於兩個字,就係托市。 當然,如果單睇QFII額度加碼,無疑代表市場有新資金。 但兩個疑問,一,有額度,係咪代表外資一定用先?尤其係內地市場短線賣點有限。 二,係為什麼會大加額度? 瑞信陶冬解釋無錯,與其當刺激市況,倒不如理解為反映內地資金面不足既根本問題。 中證監加推QFII,極其量係扮演沖銷型功能,因為過去幾個月,外匯佔款明顯下降,依家當局只係想抵消部份影響。 總理話,關心中小企營運,要盡快適時微調,好明顯,再次顯示內地經濟活動減慢情況未改。 所以外資行個別認為,下星期五,四月十三日,正正係市場一個D DAY,因為當日內地數據,可能印證市場憂慮,未致於硬著陸,但軟著陸得好難睇。 人民日報一篇評論文章,標題直接了當,佢地話,改革的骨頭,必定越來越難啃。 無錯,無論溫總講銀行賺錢賺得太易,發改委近日有關利率市場化既講話,說明既唔係銀行賺好多錢,而係改革真係嚟,唔係講笑。 溫總無話銀行暴利,但內銀賺錢太易,大家都知。千幾間內地公司,舊年合共盈利過萬億,但扣除十二間內銀八千幾億盈利,內地企業盈利,舊年實際係跌。 從理性角度諗,事關重大,影響甚廣,中央唔會好似當日郁中移動,向油公司收暴利稅咁,對付內銀。 內地傳媒的形容辭五花八門,有說打破銀行業壟斷局面已經係「箭在弦上」。 廿一世紀經濟報道就以「銀行暴利背後既浮士德交易」,形容銀行既暴利、正係源於監管機構對存貸款利率不對等管制、以及銀行嚴格准入呢類政府保障。 確實、內銀盈利高,與其說內銀有錯,實際根本係建制促成,內銀咁多年,根本活在政策保護網之下,令佢地有高達八成既利潤、都係源於國家以管制利率形成既存貸利差。 毫無疑問,內銀盈利短線可能見頂,領導人批評內銀,但點講,都諗唔到佢地有咩方法郁內銀。 內地經濟要靠銀行,大幅開放金融業俾外資經營,又驚影響金融安全,總理用意,會唔會只係想講些大快人心既說話? 講到尾,改革一定有,亦會正如人民日報講,係會難啃。唔少內地學者都同意,過去幾十年模式,製造太多既得利益者,如果明白呢個情況,再環顧內地形勢,似乎唔應該有太大政策憧憬!

壓場

豈能事事如意,遇上逆境,危機處理呢一環節,往往係最考功力。 新地到目前為止,中環人同唔少基金經理直言,處理今次危機,誠意有餘,但功力不足,簡單講,未致於唔合格,但肯定水平僅屬一般。 有分析員話,以兩日前郭氏兄弟見傳媒安排,已經略有疏忽之嫌。事關,兩點前預告傳媒,兩點左右正式發通知邀請,時間定明三點半開始。同一時間,新地股價兩點打後,調頭回升,一度升三蚊。 問題就係呢度。有中環人話,新地雖然內部可能只係想透過一段簡單表述,穩定市場。 但問題在於,郭氏兄弟事件後,其實兩人任何舉動,都可能構成股價敏感資料,所以新地根本唔應該喺開市期間公布,郭氏兄弟計劃開市期間會見傳媒。 分析員話,技術上,市場會以為郭氏兄弟有潛在重大公布,構成股價敏感資料,所以新地其實最好等收市後,或中午休市期間,先至見傳媒。綜合而言,新地犯左個小錯誤。 亦可能因為咁,三點半,變為差唔多四點三,期指收市後,兩位郭生先至正式出嚟。有睇曬全程直播既分析員指,簡短發言,新意欠奉。 因為,大家都知新地短期業務同運作不變,但解決唔到新地管理層折讓既問題。 其實,兩位郭生發言,比財務董事陳國威向投資者電話會議既講話重點更簡短。唯一意外,係郭炳聯番轉頭講既一句,深信調查會還佢清白。 呢句無疑可以加分,多名高層盡出,連涉及調查另一名高層陳鉅源,以及長輩級鄺準,亦有撐場。但投資者要既,唔係團結姿態,而係實際行動。 依家,新地股價,就係市場信心指標。如果股價再無承接,學者認為,郭氏兄弟有需要諗,暫時讓位,由獨立董事暫代主席,新地溢價未必即時回復,但有機會加分!