文章

顯示從 4月, 2015 起發佈的文章

套現離場

圖片
財技高強不限於超人,武功高強還有鄭家純,新世界一招合營變拆售,變相將酒店分拆,185億作價,令集團即時現金進帳100億,盈利額外增加155億,負債比率由26%降至20%。 一三年原計劃分拆上市,當時盛傳項目估值最多200億美元,集資最多10億美元,事隔兩年,交易作價相當於估值185億,體現於旅遊行可能步入寒冬,但套現所得卻要比兩年前盛傳金額要翻一翻,更重要是保留大股東地位,黃小虎利害,抑或純官高強? 答案不言而喻。 表面上是合營,加大發展的交易,某程度上是套現離場,作為直接出售,買家照例會要市場價扣減一定折讓才願意首肯成交,但今次純官脫殼酒店,估值相當於平均房間值一千萬,同鷹君朗豪一模一樣,並無減價,以市盈率計相當於16倍,更比大酒店14倍為高 一個由盛隨時轉衰的行業,純哥既可以市價或甚至較高價離場,套現更比行業當旺高峰期時更要高,純哥個人之處並不限於財技,而是高位走貨能力,看看周大福、甚至利福!! 呢種由牛市最高點醞釀並且執行,實現後隨時步入熊市的交易,稍欠無個人之處,那能依計行事? 去年底,純官為首變相將利福兩成股權售予卡搭爾投資局,零售市道之後怎麼樣?似乎無用多說。 當日中東金主以每股14.75元入股,以今日收市價計帳面輸錢,跟近半年大牛市,股票百花齊放成為反比。 市場有的是資金,但能成功順利物色金主,或白一點,水魚實屬困難,君不見對我國市場一向義無反顧的新加坡淡馬鍚亦接連出貨嗎! 中東資金缺乏出路,成就了武功高強鄭家統連番高位套現,體現價值,新世界辦到了。 但提升股東回報似乎仍未實現,一筆原先計劃私有化新中的供股資金,一筆賣酒店淨收的一百億現金,從單日升幅僅2%睇,股價表現似乎告之,市場對新世界派高息或特別息,不予厚望,事關他們實在武功太高了!!

A股化

圖片
高開過百,倒跌二百、午後止跌,隨後再插,但收市又死唔去。 大市、指數、以至個股表現,近日,日日如是,美其名是好淡角力,大戶呃貨,白一點,新常態底下,成交越大,震盪波幅越會大。 自問心肺功能、或體質較弱的投資者或散戶,最好做做體檢!!! 互聯互通開通,原意之一是要內地股市港股化,要投資者多一點均真,少一點衝動,惟內地港股化事與願違,港股A股化卻已是鐵一般事實 稱港股A 股化好,內地化好、散戶化好,瘋癲化也好,食得咸魚抵得喝,日日邊炒,邊介懷A股化,某程度上盡顯港人拋不開自我感覺良好優越化,而忘記當今之市況,乃百分百國家恩腸,有收獲亦必然有成本。 十二、三倍市盈率,可以振振有詞認為安全,皆因離恒指過往爆煲估值廿倍以上大有距離,如果用以往廿倍以上港股必死的話計算,恒指莫非不見五萬不見光死? 同樣情況,A股廿倍PE,已超出合理值,但跟零七年六十倍比較,難道有有水位,潛在升幅超一倍? 咪傻,亦咪自欺欺人!!! 牛市有浪漫與現實一面,浪漫在於,當升勢難擋情況下,就算專業投資者、分析員都會用各種方法自圖其說,明明超出合理值,結果用過去遠超出合理值的估值比較現在價值,從而作為安撫,而明明一條數計曬,股價已經見頂,結果分三、五、七條數拆散計認為仍有空間 牛市浪漫,亦現實,現實在於貪婪仍然沒有好結果,原本買三隻股票投資,變買多七隻投機,好日子盡頭的一日,則是家中貼牆紙之時。 第一季中資業績,鋼股不能受惠鐵礦石價下跌,內銀沒有得益新增貸款上升、全線步入「一.時代」。 券商佣金收入跟市況天量成交離奇背馳,政策持續,但政策效力已成泡影!!! PE、 PE、 E重點在於 Earning,而非持續好一段一子的 Expectation,盈利未有上調空間,PE變相被拉高,今日以為平、靚、正,部份可能與事實不符。 香港證監一定不會一如中證監日日有微博真言,皆因證監會鬼子佬為主,點諗到十一句中文警示金句!! 我係歐達禮,一句講曬:Hey guys, watch out!!!

國產QE

圖片
易鋼無錯, 人行有的是工具,人民日報日前評論亦對,中國毋需要大規模刺激政策出台。 皆因眾所周知,一個規劃經濟體系,幾個規劃經濟指標,要數字達標,有何難度? 中國既然尚且滿於政策有效性,亦接受到經濟一定程度上增長減慢,中國大搞QE之說,幹什麼會傳得熱烘烘? 技術定義上,中國絕不會進行美式寬鬆,事關美國量寬定義為央行在利率低無可低情況下,直接向商業銀行購資產,套用中國情況: 一,名義利率仍然遠高於零水平、 二,條件上人行不容許在一級市場購債、買資產。 但如果將量寬定義重新界定為央行利用資產負債表以達到某種手段的話,人行老早已經QE好多好多次!! 事出必有因,今次由外國媒體大合奏中國QE,主因並非經濟差,皆因經濟差已一段時間,主因某程度上是央行及商業銀行博效,已達白熱之階段。 當局去槓桿,力推地方債換置,無論中央、內地學派、外國評論一直寄以厚望,你銀行卻二話不說反應冷淡,令幾宗發債泡湯,因而觸發中央變相另起爐灶,不再假手於銀行。 財政部原意上試點批最少一萬億地方債轉置,商業銀行態度傲慢,不聞不問,市場自然會想到需求缺口會由人民銀行出手食曬,QE之說由之而起。 標題雖然起眼,但我國過去五、六年不斷痛批美國QE,現在豈會自打咀巴照書全炒? 敢肯定,地方層面過份槓桿,目前BALANCE SHEET相對較靚的中央層面,勢必幫手協助,尤其主席宏願大圖,以後大把槓桿要做,今日去槓桿,在在為明日加槓桿鋪路。 中國不會美式QE,因為中國喜歡來料加工,二次創作,國產QE制式,背後重點是建基於四個字:代客泊車!! 首先,工、建、中、農之外,我國最少有三大政策銀行,小川爺爺大不了打本俾佢地買地方債,又或者,人行公開市場操作,將新地方債接納為抵押品,或列入唯一抵押品,我問你銀行仲係咪夠膽唔買。 甚至人行或財政部直接向地方政府提供資金,由他們自發債,自行購回。

煙幕

圖片
男方要求復合,女方唔夠兩個鐘就「公告天下」,歡迎你回家,咁樣、係咪開放左啲? 彭博專欄,今日就有篇「游子回頭是岸」的書信往來,發信既署名係「Douglas and Stuart」, 覆信個位就簡單稱自己做HKMA。 信中內容不外乎是痛定思痛,早有悔意,唔走好過走之類,較有誠意係話大家分享過「快樂與利潤」,又話應承左「Regina」、唔會趕走星期日留喺既外佣云云。 HKMA回信亦見精簡,「歡迎回來,唔該洗晒未來22年既碗碟!」 書信雖然虛構,但有中環人提出、匯控在星期五下午,先確認有關檢討計劃,本港金管局居然可以在兩小時內,就發出歡迎聲明,以過去88樓既Track record,顯然係非常罕見,甚至可以話有備而來。 當然,好似大細摩提出,以獅子銀行資產負債表係本港GDP九倍,同樣既歡迎聲明,喺一年前的確難以想像。試諗下,匯控如果出事,唔通叫金管局好似08或09年英美國家咁,將匯控國有化咩? 不過今時今日,以大象全球最強資本,跟本唔會構成系統性風險,全世界銀行死晒,應該都輪唔到佢。何況好似沈大師咁講,本港有阿爺呢個最強後盾,如果小川行長都救唔掂,咁應該都係近世界末日。 不可不提,係歐智華本人。眾所周知,佢太座在中上環開食店,早前更被媒體曝光,如果單純由家庭因素出發,將總部留港,似乎又係理所當然。 今次匯控選擇、在兩星期後英國大選前、引爆遷冊炸彈,固然係對現任保守黨政府有一定殺傷力。但與其話係政府報復、似乎係跳草裙舞機會更大。 金融時報形容、而家既卡梅倫政府,當然唔係匯豐個Friend,但換左工黨上場又如何? 事實上工黨已提出係更高銀行稅,甚至威脅對銀行花紅引入新稅種,所以工黨同樣換來更大惡夢。 以保守黨提出銀行稅,到2017年,會由而家交緊11億英鎊、跳升至2017年18億。但如果跟工黨上台,到時匯控要交既銀行稅,更達到23億,比而家要比多一倍。 雖然本港目前係匯控單一最大盈利貢獻市場,不過匯控業務遍布全球,雖然話本港監管環境成熟,但外國少不免會聯想到、香港背後既北京角色。如果亞洲既監管者,理解成匯控是受內地監管,心態上同英國監管,應該有天淵之別! 更唔好講,而家匯控既股東,有四分三是來自歐美、如果將匯控同其他內銀睇齊,恐怕而家獅子銀行享受緊既監管溢價會收窄。 同樣唔合理,係傳出會分拆英國零售銀行業務。分析員直

財富效應?

圖片
周四商品大王羅傑斯到埋位,對A股及加息看法獨到,觀眾都受益不少! 但估不到反應最大,卻是大師預測,本港樓價有機會調整五成,外界有極大迴響。 好友當然不以為然,淡友卻心急如焚,猛問羅傑斯幾時先係跌市時候。 其實Rogers 絕非對本港樓市有深厚認識,大師看重既係周期,正如他一貫所言,所有資產不會只升不跌,佢個人更不會在新高時候入貨。 近日樓市熱門話題、到底股市新高有無刺激樓市? 往績係有相當高關連繫數。跟據統計、本港有三成人口係有投資股票,大約相當於180萬人,平均投資組合有20萬。里昂計過數,恆指同國指過去一個月升左一成二至兩成,即係全港三分一成年人,帳面就賺左二萬四至四萬蚊,如果計埋今個月,肯定賺得更多。 里昂話,基於政府出手辣招,無可避免人為影響左股市樓市關連繫數,但以最保守估計,只有0.1%股民真係賺到可以出手買樓,講緊都有近二千個單位入市! 里昂因此都要上調本年樓價預測,估計中小型單位及豪宅,分別會有4-7%升幅! 其實金管局陳總裁推出第七輪逆周期措施,講緊都唔夠兩個月,但面對內地資金湧港以及潛在用家需求,樓價今年來、已升近8%,麥格理已經警告,政府已經可能有再出招風險! 不過唔好唔記得、呢啲所謂財富效應,往往只係好短暫! 以過去股市半年內急升三成計,過去15年發生過三次: 二千年科網股泡沬、07年5月港股直通車、以及09年三月美國聯儲局開始量寬。撇除09年係環球央行聯手救市,二千年同07年都係泡沬見頂先兆,恐怕大家都記憶尤新。 況且,股市由舊年底先開始發力,但樓市持續持續幾年都係高位,會唔會有人套股換樓? 反而聽到坊間有人押樓投入股市,可能更加可信。 樓唔同股票,要賣出有相當高交易成本,唔單止講緊係BSD或者佣金,因為買賣賣買單位時間、撞客既過程,其實都係成本,影響到流動性遠不及股票。 大牛市、股市帳面賺錢好似好容易,但真正識得止賺落車又有幾多個? 反而實際薪酬大家呢幾年都心知肚明,人工加幅往往只能跟到、甚至跑輸通脤,何況樓價急升,反而增加供樓負擔。 德銀計左另一條數,值得大家研究: 據統計署就去年底評估,住喺私人數既家庭開支,每月達到36400幾蚊,當中22000係一般開支,另外有萬四蚊就係住屋開支。不過同期著喺私人樓宇既入息中位數,就只有33900蚊,換言之每月係入不敷支,有赤字2500幾蚊。

笑話

圖片
總理發火、非同少可! 更影響埋PMI 數據! 李克強在開會時,批評官場陋習,今次是針對實地考察水利工程。 對一啲早已撥款、批地項目,但遲遲唔開工,當地負責人話比李克強聽,係開工前有幾十項評估,無一兩年時間都批唔到落嚟! 一聽到呢度,李克強就發火,大駡評估環節太多,呢個評、嗰個又評,結果評估都編成笑話,甚至拖慢地方經濟。 值得注意係、過去呢啲來自高層批評,往往只係內部講話,但今次李克強連續多日透過官方媒體發布批評官僚主義,顯然係有目的而來! 呢個正係里昂提出、PMI 同李克強發火之間既關係! 地方政府官員、過去兩年飽受中央打貪、同時又要提高政府工作效益,控制預算,結果變成「少做少錯、唔做唔錯」心態,成為新常態下,政府改革最大絆腳石! 亦總結左點解PMI 再落到一年低位! 「政令不通」,好明顯限制左財政政策作用,李克強亦心知肚明,所以要全靠周小川行長,要大力放水穩定經濟。 好似陶冬博士講法,PMI新出口訂單指數回升、正反映呢一輪經濟下行壓力,並非係來自外圍,而係本地內需放緩。 值得注意係就業指數,雖然由低位輕微反彈至48、但仍低於50盛衰分界,加上工業生產同投資持續疲弱,未來就業指數仍然係難有起色。 對於內地失業率、外界一直掌握數據唔多,由政府公布城鎮失業率第一季度升至5.1%,但講真 意義唔大,因為數據跟本無反映到,內地農民工失業問題。 大摩就對內地同香港既就業市場結構、作出左專題分析,結論係內地既勞工需求供應比率,雖然過去五年一直高於100%水平,似乎反映經濟放緩未有損害到就業市場。 但大摩唔認同呢個結論、因為數據反映過去幾年職位增長既數目,有明顯放緩,但點解無影響到失業率? 答案係正係內地包括亞洲地區遇到最大問題: 人口結構改變,勞動人口增長放緩速度、比起職位增長仲要慢,因此先表面保持到失業率未有惡化。 大摩結論係,中央錯估左目前失業問題,令到政策「唔到位」。實際上、內地面臨就業職位增長放慢,加上實質利率偏高,又有高負債及通縮壓力,一早就需要更大規模既刺激措施。 可笑既係、今時今日大家都了解經濟基本因素疲弱,但就靠著一絲政策憧憬,將A股抄高再抄高。 法巴講得無錯、而家經濟同經濟「分道揚鑣」,正係受惠阿爺刻意托市,但情況可以持續幾耐? 資金市又係咪末完末了? 面對內地股市瘋抄,中央台做左八、九

一定要得?

圖片
環球好友可以話大獲全勝: 恒指見過28000,上證收近4400點,日經指數更突破15年高位,2000年科網泡沫爆破以來、首收收於20000萬點樓上,可喜可賀! 今輪亞洲股市升浪、起因或者你講都唔信,全靠阿爺同香江股市! 瑞信提出一個「輻射論」,正係因為內地放水、唔單止北水南調惠及港股,資金仲可以輻射到區內,首先受惠市場,會係南韓、而其他市場亦可望受惠。 瑞信揀出區內最平四個市場,當中MSCI 中國及MSCI 香港都榜上有名,更指雖然今季以來跑贏大市7%,但仍然值得增持! 撇除估值因素,恒指今日上試過28000點,巧逢同日政府公布政改方案,成套戲劇本寫得天衣無縫,更加深陰謀論認定阿爺要為政治市加添助力: 「一定要得」! 無怪乎四叔都要急Call 媒體,表明政改通過,恒指可見三萬點,不過口痕友話上升空間得二千點,似乎粒糖、唔夠大喎! 講明係陰謀論,我覺得都係聽左就算,最重要係認清當前大勢,再決定下一步係「追、揸、沽」。 內地推動資本帳開放要利用港股通已經係不爭事實、資金南下只會有增無減。同樣要衡量係、A股過去一年上升左一倍,AH溢價擴闊到28%,你係基金經理、會點做? 大家會發現散戶最愛2823同2822,近日有跟唔足A股跡象。有留意資金流朋友提醒,過去一星期流出2823金額,大增至7億美元,為三個月最多。相反流入2828恒生H股ETF,就有8億美金,為2003年推出以來,單周最大淨流入規模。 拉遠啲睇今年以來數據,流出A股ETF已達80億美元,但唔代表資金唔買中資股,皆因佢地揀平既來買,首選當然係H股ETF,今年流入H股ETF 就有40億美元。 唔止本港,其賓外資一向睇好H股,美國掛牌ISHARE  ETF一樣錄得去年八月以來、最大規模淨流入,反映美資一樣將資金重新部署。 追落後中資股,已經成為「新常態」,君不見今日一堆紅籌窗口股今日突然發威,一隻363上實、十年唔發市,今日尾市愈搶愈高,連392都追埋上來,似乎華創一次重組,令市場相信央企改革可以再發「紅籌夢」,反而對國企首次違約,大家就當睇唔到。

國有化?

圖片
星期一「膽粗粗」Buy Call,既然扑中、莫非丁蟹效應咁快玩完? 一日不足以論英雄,但關鍵都係要留意兩大指標,就係官方媒體有無改變支持股市論點、以及港紙有無回落。 當然,升市都要炒啱板塊。以為南北車仲有得去就真係太傻太天真,相反可以買中941、抄即日高低位都差四蚊! 中移動都算升得有理、至少業績「對板」,反而今日隻291阿媽用「怪招」回購番成間公司業務,華潤創業變成華潤啤酒,市場除左莫名其妙外,真係諗唔到更好形容詞。 當日整死華創零售業務,皆因宋林好大喜功要做國際收購,結果「孖左」個Tesco,點知原來係個大氹,根本難以翻生。 新主席傳育寧身經百戰、看見291 股價跑輸大市四分一條街,居然諗到呢條絕橋「斧底抽身」,懶理仲有無得留喺藍籌、中環人都不禁讚果然夠果斷夠狠! 大行似乎都buy 華創呢招,Jefferies 話按收購價反映啤酒業務比起同業有33%溢價,摩通更誇張,用過去5年時間比較,認為華創啤酒「完勝」青島啤,市佔率更穩佔24%全國第一、加上執行能力強,足以支持今次交易28倍PE估值。 大行要做生意、大家都明既,但用咁多歷史數據去證明估值,反而不理會去年啤酒盈利倒退兩成,而全國啤酒銷售更有見頂跡象,前景先叫人擔憂。 交易細節其實全部合規、但叫人唔舒服地方係母公司將所有業務收歸國有,只剩底一枝啤酒留比股東。 簡單比喻就係阿爺唔再信香港、將金融中心地位全數轉讓比上海,然後再派番每人十萬、八萬現金比大家,你會唔會「袋左先」? 到底今次係「削肉還母」、定係阿媽「削肉救子」,相信大家有自己判斷。好似黃師傅一語中的、作為華創股東,最樂觀收到11.5蚊特別息外、比盡你賣到所有股分比華潤集團,都係收多12.7元,加埋24.2,比起今日收市價只係多收五毫,點解唔係呢個價沽出、穩穩陣陣收錢落袋? 反而仲要冒險等華潤決定買唔買自己手上批貨? 有中環人睇完上市公司通告,都大駡寫法誤導,既然唔係全數用12.7元收購股分、實際只係五股買一股,點解要落個參考價話有六成溢價? 唔通阿媽真係擔保他日完成交易、計埋「除息」效應仲收到咁多錢? 當然,有「藝高人膽大」股東,會搏華潤日後繼續注資291、確保唔會成為華潤啤酒,話唔定未來繼續有注資概念,包括「執靚」返零售業務條數,再注入公司。甚至好似267咁、變成整體央企上市,到時就不得了!

央媽鬥丁蟹

圖片
當財爺都要湊熱鬧,在網誌講下「丁蟹效應」,中環人已大叫不妙! 結果「周行長」大戰「丁蟹」,阿爺只係贏左半日,中外大戰真正戲肉,要到下晝先至爆發,結果外資淡倉下午反敗為勝,中資輸錢之餘,口痕友話連上交所交易顯示板都被「打爆」,成交到左一萬億人民幣,就已經唔曉跳! 坦白講、既然係「大鬥大」,要深究下午點解大跌市,其實都無咩必要,「賴」落丁蟹效應都無可厚非。 上周五外資在夜期做淡、只要把持得著唔平倉,其實先係最後贏家,可憐係一批散戶,如果企錯邊,真係摑完左邊再被摑右邊。 美林最佳策略師崔魏發布既「大勢」報告,雖然認同人行降準會令市場相信,阿爺係有決心托市,但作為「淡友」既基因、就令佢都不忘加句,寬鬆政策唔可能改變企業盈利,如果資金無以為繼,近日A股反而可能係見頂先兆,所以崔魏都提出左,到底今次係開端? 定係結束? 但都唔係所有外資睇淡、大摩都提出「半牛論」,認為A股牛市目前正處於牛市第一與第二階段之間,即是暫時都未見頂。 唔怪得內地股民仍然信心十足、形容「身處牛市,急跌就是黃金雨」,無懼今日跌市調整。 中環人話、值得慶幸係港股雖然經歷大時代,跌市成交再度突破2000億,不過留意港匯其實除朝早落過去7.752之外,下午一路跌市、港元反而一路轉強,尾市仲迫近強方兌換保證水平,迫著88樓要出來接錢,反映未見大規模資金流出。 美資行富瑞有個觀察,都不謀而合。 Jefferies提出港股正係經歷一個歷史性時刻,重要性不下於當年歐元推出、以及98年金融風暴。 簡單講、就係內地持續放水,跡象顯示,內地遊資正透過港股通南下香港市場,取代聯儲局退市帶來既資金,過程等同當年歐元一體化,造就緊一個大時代來臨。 以目前內地外匯儲備3.7萬億美元、雖然連續3季減少,但都幾乎等同港股總市值,一旦內地資金在國際化下持續流入,會令本港資產價格會高於過去幾個經濟周期,單係兩個金融系統之間做套戥、已經徹底改變遊戲規則,最終A股同H股將會匯合。 難怪,即使作為外媒、華爾街日報都買CALL,認為當政府都唔擔心泡沬時,投资者都唔需要担心去邊,即使道理上應該如此。

平衡時空

星期三,當金記陳總裁公開承認今輪資金流入、是因應股票市場利好,仲預期資金會持續流入股市樓市。 到下午、已經有內地同胞響應總裁呼籲,攬錢過百萬走私要來香港炒股。 話響應可能有些誇張、但不爭事實是,今個星期最熱門話題、係中港兩地股市輪流熱炒,全城陷入瘋狂狀態。 當然,升市都可以「滿倉踏空」、特別係買錯隔離個隻,莫過於世間上最痛苦既事。 不過好似里昂所言、幾乎大部分香港投資者都分唔清MSCI 中國同香港,如果買左MSCI 香港,除非你係中隻388,否則都要跑輸大市。 里昂既「貪婪與恐懼」報告、今個星期就用「平衡時空」來形容香港現況,正正就係指,香港一方面受惠內地改革、令中資股表現亮麗。 但傳統本地股分、特別係地產股,其賓係面臨極大危機。 有留意「每日樓市」同「樓盤傳真」觀眾,都好清楚物業市場「反地心吸力」威力有幾大,樓價今年以來已經累升7.5%,同去年低位比較更升左21%,顯然呢個絕對係外圍量寬唯一結果。 不過面對資產價格不斷爆升、睇睇樓價對收入比率,已經由97年高峰 14.8倍升至目前17.6倍、迫使更多置業人士,只可以買更小型單位,而上車樓定義,已經由過去百幾二百萬、變成四、五百萬。 金融時報亦以香港景況發表評論,形容係「可憐的香港」,既要面對內地經濟放緩既困境,同時美國量寬就在香港樓市、催生左泡沬。 不可不提係零售業面對困境、即使扣除一簽一行既影響,內地人減少來港購物已係不爭事實,三月來港遊客大跌8.7%,當中內地客更跌一成。 背後原因、正正係我地行之有效既聯匯制度所影響,相信絕非花左八千萬既「開心著數」,可以有任何幫助。 唔需要問經濟學家、都算街邊大媽都可以答你,今時今日香港同美國貿易比重,遠遠低於內地中港貿易比重,由廿幾年前20%,跌至不足5%。相反中港貿易已經超越兩成半、唯一因素就係政治原因。 當然官員會話無可能、甚至係「諗都唔使諗」,不過既然當日瑞朗都可以脫勾,點解聯匯就唔會出現黑天鵝? 唯一一個理由係、中國境外跟本無足夠離岸人民幣,可以取代本港等值3300億美元既外匯儲備,要取代聯匯、講易過做好多。 講到底、資金流向可以快入快出,但一旦因匯率問題嚴重損害旅遊以至零售業,本港而家低企既失業率、絕非無可能唔會飊升,所以大家都係要認清當前形勢,否則轉身也太遲。

不是夢

圖片
網上瘋傳一張離職申請表,四月十一日一位名為寧海內地人要求辭職,在離職原因一欄內填上「回家炒股」,部門主管提出意見只有十個字: 股市有風險,入市需謹慎。 撇除呢張離職申請表熟真熟假,是否惡搞!? 寧海代表內地每周數以百萬計新開戶股民想法,而佢上司則等同肖鋼,且管勸,但已不能阻!! 「史洪生賺三成、陸輝賺三成。」全數出自內地財經網每日炒股大賽戰績,「李老師,我是新人,目前可推薦幾隻股票嗎?」「老師,給我點意見,我想短線?」 全部問題亦出來內地財經網,排得滿瀉!! A股的確瘋了! 內地股民戰意及意志堅定,老早講左,四月見四千二,係常識!! 由二千變四千二,不足一年時間。 內地股市泡沬論,實難有一個客觀標準,皆因內地眾多股票指數,市盈率有二十、至一百倍以上樣樣俱備,即任你點講都得!! 以花旗統計,無論市盈率及股價對帳面值比較,內地股市較海嘯前均低六成,相反盈利累積比當年多五成八,單以盈利計,比印度好十倍,比印尼高兩倍,點解要食咖哩、而唔食中餐!? 綜合外界分析,好明顯,中資盈利即使計算埋已真金百銀派息因素,鬼佬死都唔信。 而另一個問題在於,股市資金仍然唔夠多! 用股票市值對GDP比較的話,中國股市仍然低於標準,但存款規模卻相當於股票市值兩倍半,遠高於香港三成八,美國四成,印度七成四,換言之,如果存款進一步轉移至股市,4200點x2的指標目標,絕非天方夜談、更不是夢! 假設盈利增長不改善,經濟不見起色的話,現水平再翻一翻,幾乎肯定泡沬重臨。 呢個或者解釋到,點解內地當局,唔肯大規模降準。

互聯網夢

圖片
總理要大搞互聯網+、大叫大嚷要中國製造2025,固然事出有原,一句講曬,經濟太差,而傳統刺激政策成效及成本不成正比。 話增長有七、就真係有七,但留意,計算物價因素在內的名義增長,第一季只有5.8%,以目前內地利息成本之重,名義增長其實要有10%以上,才可以帶動投資、生產,5.8%呢個名義數字,反映經濟遠遠比想像中惡劣。 市場同時發掘好些反映經濟的好指標,但與其糾纏於發電量,唔該睇睇農村外出勞動力總量,頭兩個月減少六百多萬,官方有備而來,話農曆年、話季節影響。 但數字按年跌幅為史上首次! 點解去年農曆年無、前年農曆年無、大前年亦無,到今年才下跌!? 又一句講曬,經濟急速放緩 刺激政策不能再刺激經濟,寬鬆政策亦不能令經濟鬆一鬆。終於明,要為經濟注入新希望、新動力,或者白一點,中國新常態下的新溢價,互聯網啦!! 例子之一、要數今日阿里健康,收購天貓網上醫藥業務,估值近二百億,全數發「公仔紙」交易,股價單日可以升八成! 停牌前六個七毫八,因為一個網,復牌可以收在十二元樓上 一百九十多億作價的業務,剛剛一年盈利只得七千多萬,市盈率有幾高? 老實,唔識計!! 而近二百億作價,交易額其實只有47.4億,47億多收金額,只能製造一億多收入,或八千一百多萬稅前盈利。 套用傳統股份,估值殊不便宜之外,項目毛利微乎其微,但鬼叫佢係互聯網,亦鬼叫佢老細係馬雲咩。 撇除另一賣方,今次阿里巴巴會先收29.6億股,每股代價5.28元,以今日收市價計,批股份帳面升值206.6億,再計埋40.9億股可換股債的話,一項蚊型業務,經過左手交右手後,帳面大賺近470億! 有人批評,李克強唔識經濟,但總理只要識互聯網,令原來絕望、化成幻想、再變成希望,內地經濟「七」的官方數字背後,的確可以有好多個Plus!!!

秋官效應

大時代重播,劉紹文2004年3月30日,用「秋官效應」主題撰寫的一份報告,十一年後今日網上瘋傳。 豹隱幕前多時,劉老師今早透過開市埋位讀出一段聲明: 「余於股壇數十載,未嘗見一真正贏者,智者應知,此乃一處永無贏家之戰場,取勝唯一法--------及早離去!」 查實,呢句是出自大時代劇中人物葉天,其中一段對白,上文為: 「股市原意:乃讓集資搜資有其地,社會向榮,人皆有賺,惜人性貪婪,耗盡心思,巧取豪奪,樂土成煉獄」 連續八日升市,當中最少一半屬於大升市、大成交,股市要調整本應正常不過,當然,一跌四、五百,成交再過二千億,亦可以理解為跌市多成交,預視不妙。 從另個角度,股市是變幻無常,與其埋怨秋官邪,倒不如當今日屬於一個將來Unknown 日子的預演,皆因智者應知,此乃一處永無贏家之戰場也!! 林行止專欄說得好,將近日股市升勢合理化的話,固然是內地放行公募基金入市,互聯互通路路暢通,但亦可以理解為中央製造財富效應,維穩大於一切。 既然如此,小賭怡情,小嘗甜頭,然後及早離去,才最為可取!! 無疑,有錢唔搵係笨、股票喪升唔買係傻。但任何升市總有彈藥用盡的一日,作為市場參與者,賭得越怡情、玩得越均真,反而有助延長升市,未致勢頭火速用盡。 借用內地官媒近日常用一句,港股升市其實有其必然性及合理性,估值因素、背靠內地因素等等,再者,無論用大小二摩、高盛、瑞銀、美林一眾策略師量度,港股現水平談不上泡沫,甚至稱得上抵買,跟以往廿倍PE,股市即死,大有距離。 但市場亦不應忽略一點,有別於以往,今次港股牛氣忽然沖天,幾乎百分百由內地股市、內地主導的單一因素炮製而成,用西方一套PE、 P. BOOK,單憑估值去判斷市況走勢,是否再絕對適用,值得思考!! 香港飲得A股呢杯茶,就應該預料到有權利必有義務,有得益亦必有成本,大跌是建基於不理性上升,或者相反,作為小投資者,牛市樂見其成,惟過份牛氣充天絕非可取,雞犬皆升、禾雀亂飛,香港慣。 但有別於過往小股炒上,背後都會附加一個賣點故事,今次個別個股確實任性地升,任性地炒,來來去去單單靠6999牌,作為權衡指標,足夠嗎!?

爆升

圖片
上星期提及,港匯呈現,結餘「隊」爆,功臣來自內地將人民幣資金兌換,「唱爆」港紙,外資絕非如外界所指、瘋湧入市,反而是依然故我,輕身上路。 結果說時遲,那時快,中國資金力量,對外資構成打擊,有如突襲珍珠港,兩點左右,鬼子佬幾乎全數成份股左掃一堆、右買一批,旁觀者一包花生在手,日日對著報價機,好睇過英超!! 向現實低頭,部份外資知情識趣,紛紛上調恒指目標,觀乎瑞信二萬八、大摩三萬,等同之前外資預言A股見四千,僅流於常識,談不上預測,顯而易見,是預留一手。 再者,一日有大象、加賭彩股,恒指爆極有限!! 估指數難,估成交更難。連續四日過二千億成交,以特區政府手持六千多萬股港交所計,武功曾及八十八層高管理的外匯基金,今日一度單日帳面進帳31億幾,當然憑手持五十多萬股的李小加,隨時可以改名做「李笑啦」!!! 一隻股份,單日升過五十蚊,印象中絕無僅有,口痕友形容,高盛今日明顯有組織、有預謀將港交所推上,令市場大失預算。 首先,高盛上星期三才上調港交所目標至220元,不足一星期,將目標價累積調升八成二,呢種留前鬥後目標價方式,以往部份大行經常運用。 高記更絕一著是,今早每日綜合報告中,完全無提及港交所,到中午十二點左右,才忽然上載,更在更高現價才納入股份在確信買入名單,擺明要用高盛力量,製造小志強衝力射球,令交易所原本上半晝升勢,得以維持之餘,更加進一步爆SEED。 高盛最新給予港交所基本目標價355元,最樂觀見463元,兩者均全城最牛。 比上星期220蚊目標,高盛做左兩件事: 一,將預測市盈率提升至36倍, 二,將今年每均每日成交預測,由950增至1220億。 而有別於分析員用普通市盈率,或折讓現金流計算合理值,高盛谷盡,用DDM 「DIVIDEND DISCOUNT MODEL」,簡而言之,計算埋未來股息,作為合理值釐定,明顯避免港交所高PE包袱。 單單今日報告目標價,較四月八日目標價高六成一,但分別在於成交預測只調升兩成八,及再加多三倍應有市盈率,點解一加加到355?甚至最樂觀463元假設?? 港交所到底值幾錢?老行尊話,唔知。 因為388從來是建基於可計算估值另外一個「夢」,而當中,跟內地融合,資金互聯互通刺激下,成交多少,存在極大變數!! 目前,即使用高盛最牛463元目標,每日成交假設是1890億,但一日唔信,

錢從何來?

指數高與低是其次,對港股來說,最重要莫過於個場夠旺! 由過往好幾個月時間,每日平均成交僅七、八百億左右,短短三日,每日平均過二千億,資金入市毋容置疑,但問題在於,錢從何處來!? 對李小加來說,只要有資金,那管資金何處來但對市場人而言,入市資金類別、或者主導後市能否再升、或要跌! 近日而言,市場共識是,內地公募基金入市、外資基金大舉追貨,令李小加邊笑、陳德霖邊接。但中環人提出兩點! 首先有關公募基金已經入市之說,中環人引述熟識內地人士指,「not yet!」 據悉,尤其本星期內地資金入市,其實主要圍繞內地股民、及私募基金,尤其是後者,呢點從近日個股表現,長年不振中小股忽然小陽春可見一班 正如交銀洪灝指,內地公募基金改章程大約要用一星期,理論上本周可以透過港股通買港股,但不能忽略是公募基金內地股票持倉全爆,要先從A股減磅! 內地人繼來港炒樓團、奶粉團之後,最新加入是港股團,直接在港開戶、直接在港操盤,正當市場以為因為港股破位,觸發大量外資被逼大舉掃貨,從而令銀行體系結餘逼爆之除,中環banker提出,要留意港匯、離岸人民幣CNH及在離人民幣CNY三者關係。 以往,港元越強,無論CNH、CNY都同時強勢,三者構成正面關係,但打從近個多星期,關係轉得微妙,簡而言之,港元越強,CNH卻越弱,CNH較CNY差價越折讓。 將上述關係再引申一步的話,港紙強,港股強不是新聞,最大發現其實是CNH越弱、港股反而越強! 點解? 中環人話,港元與離岸人民幣,由以往正面關係,變為負面關係,第一個原因,當然是港股通效應,資金北水南移,凡經港股通買賣,兌換價只限於CNH,近日港元強勢,大部份原因正正是港股通「唱爆」港紙。 同樣,內地股民直接到港,經地下錢莊、或者牛記兌換,亦導致離岸人民幣與官價差距擴闊。 最後,長期以來,大部外資流入,部泊離岸人民幣市場,捕捉升值機會,到近期,隨人民幣升值預期降溫,但股票上升預期升溫,出現唔少資金沽人仔、買港紙,從而買股票。 最新數字顯示,環球基金層面,中資股仍然錄得淨外流,既然外資未大舉進場,又既然公募基金仍未進城,既然港股仲有上升空間,套用小加一句:不要急、不用慌吧!!!

港股大時代

有如時光倒流07年,忽然聯想起丁蟹、方展博,難道港股大時代,已經來臨!? 市值新高、成交新新、指數七年最高、港股通額度用曬、南向使用量首次超越北向!! 中環口痕友戲言,股份今日要報跌收市,實在醜死鬼,要自我檢討。若無一成升幅股票,亦不入流!! 風水輪流轉,有別於大字標題大論A股,內地財經網踏入下午,即時將港股爆升放在網頁頂部,大談港股攻略,呼籲資金盡快南下,呢股南下尋金熱,將半夢半醒歐美大戶嚇得目瞪口呆,結果尾市大舉香江shopping,連帶美電同一時間亦被扯低,旅發局怕咩訪港消費轉弱? 長假期前,我們引述過中環人指,要買貨hedge升市,結果,佢地Bingo!!! 要簡單解釋港股突然大時代之迷,綜合而言有幾個因素: 一,市場意識到中資股升勢確認,環顧全球,在港中資股正正最便宜; 二,內地資金掃平貨,及外資大戶被夾倉,令升勢加劇; 三,港股今日某程度上觸發程式自動買盤。 出人意表股市,當然造就出人意表的交易所,高盛上調目標至220蚊,點估到、可以一日內達標! 整份報告,論點不新,理據似曾相識,反而令人留意為,有別於用傳統PE,及成交計算合理值,高盛首次提及港交所可用sum of the part計每股合理值: 互聯互通因素以外的股市值百五蚊、LME值每股13蚊、跟內地融合因素每股值32蚊,....等等。 內地賜給港股力量,港股賜給市場希望,早已指出,期望升市,就不應介意港股A股化,無論形容雞犬皆升、禾雀亂飛、滿倉踏空... 點都好,鐘擺效應過後,總會回復至一個合理值,為求提升說服力,個別券商將本港中小股估值、升幅硬跟內地比較,繼而結論相當便宜及落後,不同市場、不同結論,熱鬧過後,總會見真章。

轉軚實錄

有別長假期前好多時都買賣兩閒,香江股市成交持續過一千億,難怪有中環人話,既然內地氣勢如虹,別無選擇之下,一定要坐貨,hedge港股放假期間A股潛在升勢,及任何利好政策。 A股上證三千八百點連續兩日收穩,用摩通、里昂技術量度,四千點指日可待,正當各大券商為第二季把脈,估算短期見4200至4500之際,中環人戲言,上證短期見四千,已經歸類為常識,無資格叫預測! 國策當前,利用升勢馴服固執外資大戶,破三千、唔信! 見三千四唔信!到三千八都衝破,轉軚實錄又再上演。 野村最牛,估由現在至2017年底再升六成!! 瑞信用估值計算,用股價對帳面值比股本比報計,中資仍然較區內使宜三成。 花旗最騎牆,揚言中資股只會有兩種可能性: 一,短線破四千五,之後震盪、 二,短期波動,之後繼續受惠改革及寬鬆政策。 即係講到尾,點都係升。 證劵業人士預期港股假期後可以進一步造好,已經唔係新聞,最叫市場意外,反而是一度被指 壽終正寢的互聯互通,終於有成交、有運用。 以本星期四個交易日計,經港股通買賣最少一日,為星期三,但都有33.6億,而全星期平均計,日均買賣額有51.62億,按周升幅2.08倍! 較二月亦升5.6倍。 證券界人士形容,本星期標誌著港股通之春運動,觸發點眾所周知是內地公募基金獲准放行,變相啟動港股通2.0。 阿爺目的,當然唔係要恒指見二萬八、三萬七一切一切,為的是準備五月及九月, 摩指、富時檢討是否納入A股,作為中國會否被認同的標誌之一,淡友或者暫時要向市況面對現實。