財經拆局

美國提高債務上限嘅限期迫近，眾議院臨時取消、表決共和黨提出嘅方案，原因係共和黨攞唔夠票，要星期五朝早十點再進行討論。 博納嘅方案，即使通過到，去到民主黨控制嘅參議院，都肯定會被否決，咁點解投唔投到票，仍然係咁重要呢﹖ 因為眾議院一日唔通過方案，民主黨就唔可以出手。 民主黨參議院領袖里德，就係等緊法案交上參議院，即時運用程序凍結，即係Death on Arrival，然後提出修訂，將博納既提高債務上限，由九千億美元提升至二萬四千億美元。 民主黨嘅「如意算盤」係、方案可以喺下星期二限期前表決，到時共和黨一係支持，一係就要負起任由政府違約嘅責任。 而家喺眾議院第一關就「KICK 住」，危機亦都加深! 其實整件事最可笑、係眾議院議長、共和黨嘅博納。 經過一日遊說，仲出言威脅說"Get you ASS in line"，但博納提出既修訂議案，仍然未能得到黨內大部分人支持。 華爾街日報話，仍然有近二十個共和黨眾議員係不滿博納既方案，有黨員更話，如果跟據呢個方案削赤，最少要一百五十年先可以平衡預算。 博納亦明白今次投票對佢喺黨內地位有舉足輕重影響，一旦被否決，佢喺共和黨領袖地位將會不補。 面對談判毫無進展，財長蓋特納亦制定後備方案。佢近日同總統奧巴馬、以及兩位債市專家，秘密討論一旦違約、需要點樣支付利息開支。 消息話，當局而家肯定既係會即時停止進一步發債，但會繼續向美債持有人、特別係外國政府繳付利息，避免直接違約。 由於時間緊逼，白宮幾日內會各公眾公布詳細應變計劃。 美國金融界亦分別公開呼籲，同私底下做應急，由高盛布蘭克費思，同摩根大通戴蒙在內十四間金融機構高層，聯署白宮同國會，要求盡快解決問題。 而多間金融機構交易部門，已經聯手召開電話會議，部份交易員決定，暫時沽出手頭短債，增持現金，令到一個月期債息，罕有比三個月為高。 部份機構投資者同貨幣基金，亦減少拆出資金，部分更臨時限制，只可以拆出隔夜資金。 此情此景，已經隱然有雷曼倒閉前的山雨欲來! 花旗最新估計，美國有六成機會通過債務上限，但評級會被下調。唔降級而又解決債務上限，機會率只有百分之一。 九三年有份令美國三十年嚟，首次收支平衡嘅前財長魯賓，亦形容美國已經進入十字路口，整個財政開支政策處理得唔好，美國可能光景不再! 而家仲有最後一計，就係可能按憲法解決。 目前美國國債上限規定，係一九一七年戰時憲法留底，...

中央銀行作為擔任最後貸款人角色，到底要承擔幾多責任? 央行唔係製造盈利機構，但風險管理為上，你要拆入資金，無問題，我俾你，但唔該放底磚頭。 近日，歐洲銀行業就出現一宗經典個案，足以令銀行界思考。 話說西班牙一間銀行，要向歐洲央行拆入資金，特里謝要求抵押品，結果‧．． 結果呢間西甲球會皇家馬德里往來銀行，二話不說，即時提供抵押品，就係皇馬孖寶Ｃ朗，同巴西球星卡卡。 歐洲央行當時有咩反應就未知，但成件事喺歐洲銀行界最初成為笑話，但之後唔少銀行開始研究，用人、或者球星做抵押借錢，到底得唔得？ 技術上，人同磚頭一樣，都係屬於資產之一，兩者都應該有估值。但磚頭係有形資產，球星係無形資產，值幾多，考起？ 用球星做抵押品，應該計算價值幾多，其實唔難。由球星本身贊助費，轉會費等等，加加埋埋，再因為球星有年齡同退役風險，所以最後扣減一個較大折讓，理論上可以計出，球星未來一段時間嘅折舊現金流。 計數唔難，但咩情況下觸發歐洲央行沒收抵押品，似乎有啲複雜。 試下假設皇馬資不抵押，要宣布清盤，歐洲央行由於係有抵押債權人，屬於一級債權人。經接管人磋商後，C朗，同卡卡就會係歐洲央行嘅人，或者資產。 特里謝可以將兩位球星，列入資產負債表??! 理論上、歐央行可以將佢地即時賣俾其他球會套現，抵消債務。 但如果愈嚟愈多歐洲銀行，有樣學樣，用球星，甚至明星做抵抵品。咁堂堂一間全球第二大央行，唔係我地散戶經常講嘅「成手貨」，而係「成手人」。 央行大不了咪組成歐洲央行職業足球聯賽。又或者用幾個明星抵押品，拍幾部戲還錢。幾星期前，銀行壓力測試，仲話西班牙銀行係名列前矛，難道唔少當地主要銀行，都用球星價值，計入埋資本充足比率? 係咁，香港就大件事。明星一般，球星欠奉。無球星，無國際巨星，唔通到最資金緊拙情況下，香港銀行比歐洲銀行更難攞錢？

三個英文字，三個中文字，令港股今日跌近三百點，收市倒升。 三個英文字就係AAA，原來美國可能無AAA，香港絕對短線受惠。 基金人話，有AAA主權評級嘅市場唔多，資金要尋找AAA藏身居所。坡紙，澳紙不斷升，已經證明呢點。 有幸，香港舊年榮升三個A，港幣雖然無前途，債市亦無深度，但港紙跟美金跌，即係香港夠「平」，有埋相對上亞洲較安全因素，唔通升市有排玩??!! 三個英文字效應，同三個中文字力場，今日配合得天衣無逢。三個中文字係咩，恐怕呢一刻都不用晝出腸? ! 李氏力場效應，電能新高，長建新高，連和黃休息一排，亦都發力。誠哥系之中，數最差正係年初拆到新加坡嘅和記港口，唔經唔覺，又見新低。 證明的咩，李嘉誠夠叻! 電能改名後，真係發揮能量，連同長建，兩間業績得。 再睇埋赫斯基最新業績，和黃中期業績，基本上肯定超出預期。市場之前估，和黃撇除一次過收益，核心盈利會升六至八成，由於已經知嘅三大範業務都比預期好，有數得計，唔追和黃，可以揀咩?! 和黃每股資產值大約百一、至百二蚊左右。現價當然有折讓，但如果市場由審慎，轉為樂觀。和黃有條件較資產值做溢價，過去亦出現咁情況。 唔係叫大家買和黃，但和黃有的嘢，暫時係好多股份無。 第一，業務得。 第二，就係俾你有幻想。 對李嘉誠嚟講，長實作為系內排頭最高，但股價有八成係反映和黃價值，即係和黃股價一日唔進一步體現價值，長實都難有翻身。 所以，和黃踏入今年不斷有動作，無論咩重組，分拆，估左多年都未出現，令市場幻想愈大。有業務，再加幻想，無辦法，都係李氏力場勝出!

政府首次發行既通脹掛勾債券iBond，周五喺港交所掛牌，呢個同通脹掛勾既產品，喺認購期間，唔少投資專家都有保留，結果認購反應真係差過預期，只係有十五萬人入飛，超額零點三倍! 不過少左人入飛，令每手抽中機會大增，結果認購44手以下都會全數分貨，反而令大戶得益! 通脹掛勾債券iBond，長揸到尾要等三年。 唔想等咁耐，分到嘅15萬5千幾名投資者，周五就可以喺港交所沽貨， 睇iBond暗盤價又真係幾吸引，一度比定價升近百分之七，每手賺超過六百蚊。 到底應該長揸定短炒? 比較下，iBond發行年期三年、每半年派息一次，息率就同半年前既通脹率掛勾，我地簡單假設未來三年通脹率，都係政府預測既百分之五左右，即係三年合共回報有千五蚊。(這個前提是假設不會出現超級通脤/滯脤，或者經濟出現蕭條/ 通縮，目前我們看機會其實是均等!) 相反如果掛牌即沽，當賺６５０蚊，雖然就賺唔盡整個債券既回報，但就可以免左持有三年既「機會成本」! 想當初推出iBond時，社會各界只是著眼於iBond的回報高低，但忽略了由於iBond息率、大幅高過同期外匯基金票據，喺發行評級相同既前提下、造成的價格差異，其實是一個很好的套利機會。 加上iBond只係比本港居民認購，因此賣唔到貨既機構投資者，面對目前的金融市場風高浪急，其實對這類穩陣產品有好大需求，所以首日上市如果價格表現好，應即時沽貨獲利。 但說到尾，咁大型、咁有代表性既iBOND 發行，上至特區政府、財爺、財經事務局以至安排發行既金融管理局，下至兩大發鈔銀行同一眾既分銷機構，都無喺港交所推行掛牌儀式，同當日「五隊一橋」以至國債發行既大陣象比較、有咁大分別，到底係政府認為iBond無咩重要性、定係反應唔理想，所以「靜雞雞」上左市就算? 大家諗諗。

以為計劃退休，將「量子基金」關閉，但金融時報話，索羅斯仍然會係全球最有影響力既投資者。 索羅斯基金既公開信話，喺出年生效嘅金融改革法規中，唔再容許基金豁免註冊，所以決定將基金結束，改以家族形式營運。 跟據新條例，日後對沖基金要向當局披露基金既股東、持倉甚至係對沖策略，因此更多既對沖基金都決定改變、以家族基金形式經營，以取得轄免地位。 舊年以來，曾經幫索羅斯擊倒英倫銀行既Druckenmiller德魯肯米勒，就結束本身既對沖基金改為家族形式經營，而曾經迫雅虎董事會改組既伊坎，亦都改變成家族基金經營。 華爾街日報話，更多大戶已經開始透過家族基金呢個灰色地帶進行投資，好似戴爾電腦主席米高戴爾，就係透過旗下MSD資本管理一百億美元既資金，仲將新客當成家族成員、以避開監管要求。 睇番索羅斯旗下管理既255億美元基金，其實絕大部分資產都係索羅斯家族擁有，年底前要退還俾投資者嘅，只得１０億， 07年復出之後索羅斯未有言退，今年更以SFM HK Management名義坐鎮本港，喺國金中心開辦事處。 華爾街日報話，索羅斯其實係不滿零八年聘用既基金經理Keith Anderson安德森既投資表現，今以嚟蝕咗百分之６，跑輸大市百分之七點五回報，亦遠不及索羅斯零九年復出，可以賺到兩成八既回報率。 安德森今年唔止睇錯左商品價格走勢，仲因為避險將「現金水平」罕有咁升到七成半，呢點令到索羅斯不滿1 曾經同索羅斯同事既基金經理話，佢天生就有敏銳既投資觸覺，提出「反射理論」進行投資，善長尋找市場失效同監管漏洞進行對沖。 德魯肯米勒喺零七年協助索羅斯對賭英倫銀行，本來向索羅斯提議將沽空英鎊既金額逐步加倉，不過索羅斯就話既然已經睇到市場漏洞，點解唔係一次過將手上資金百五億英鎊一次過沽空? 結果英倫銀行最終就範，要退出馬城條約。 不過索羅斯為人亦有好大猜忌之心，對於每個屬下基金經理投資決定，佢都會再三質疑背後理由，結果Druckenmiller因為二千年表現回報大跌25%，與索羅斯分手收場。 金融時報話，下個月就滿81歲既索羅斯，深信佢會復出，掌管一個只對自己負責既基金。 但就質疑，當索羅斯一面以哲學家身分，要求政府同企業加強透明度，但就唔肯接受監管，證明佢只係自相矛盾。

無論你是否支持他的立論，一個CEO先花上大量時間與業界及媒體講述自己的路線圖，再寫下長長萬言書，那分決心實在令人佩服。 有幸有機會親身聽過李小加總裁對日後港交所的路線圖，更令人對他心中的藍圖予以肯定。 面對延長交易時段等多項改革，反對聲音大，李小加再寫萬言書，話改革係配合內地資金來港長遠發展。 李小加喺文中表示，過去二十年香港受惠內地證券市場改革，多間企業要「走出去」，結果令港股市值、由二萬億增長到二十一萬億。 但面對新上市活動愈縮愈少，再靠「食老本」依賴更多國企來港上市，已經只能是「錦上添花」。 李小加提出，而家面對著既第二階段改革，香港應成為內地資本既首要海外投資中心，要引進更多內地資金到港、同時引進更多來港上市既主流國際企業，令兩者配合做到三方共贏。 而第三階段就要發展一個全方位國際金融中心，包括由人民幣商機引發的結算貨幣產品同商品交易中心地位。 值得深入探討是李小加提到的第二階段既轉型、這點其實可為香港帶來巨大商機。 「因為最終無論以咩形式既"直通車"來港，內地資金將會促進香港市場擴容，成為重要財富管理中心。」 過去幾年，”直通車”一辭幾成了內地及本港官場的禁忌，好像再提出”直通車”就是觸發了國家機密，犯了天下之大不諱。 難得的是李小加勇於再提”直通車”一詞，其實亦說中了當今中央最想做的一件事情: 排洪! 之前曾經提及，人民幣國際化及跨境貿易結算，目標就是希望將流入內地多餘美元可以投到海外，但結果由於各界預期人民幣有升無跌，外國入口商唔肯支付人民幣而出口商就只肯收人民幣，結果一加一減反而令外匯儲備突破3.2萬億美元的新高。 所以容許內地資金「走出去」，一定是中央未來必需走的一步，關鍵是我們能否給予國家「金融安全」的保證，以及我們的金融基建措施能否配合。 好似李小加所言，其實我們應慶幸07年直通車開通不成，否則香港早已被打成破壞國家金融安全的反動基地! 明白到要內地投資者首選香港，香港一定要同內地喺時間同系統上「互聯互通」。 先有延長交易時段配合內地開市時間，再推行「人證港幣交易通」、下一階段部署「雙幣雙股」呢類人民幣證券，所有做的措施思路、為的就是要配合這個資金開通，這亦是李小加口中的"生死存亡"。 但面對一個接一個既改革，李小加話明白中小經紀同前線員工，係延長交易時段中最大承擔，但益處有限。 面對著原定出年三月會將中...

討價還價，但市場確信最後一刻一定可以達成協議。 但三個A既信貸評級呢? 市場開始有保留。 雖然政壇各有爭拗，但華爾街大行亦都一於少理，各自為評級機構可能下調美國三個Ａ主權評級作出準備。 華爾街既大行喺星期一、都幾乎都全面投入評估失去三個A主權評級既後果。花旗既利率策略部門主管話，如果上星期五無左三個A既機會係一半一半，而家機會率就更高。 日前警告美國可能失去、三個Ａ主權評級既太平洋資產管理話，如果美國政府只能夠喺國債上限問題、只係取得小規模既協議，仍然會令評級機構下調美國主權評級，到時債券反而有機會成為資金避難所。 令Pimco最擔心既、係評級機構標準普爾既取態。 佢地講過、唔會接受少於削減財赤四萬億美元既方案，仲唔排除最快下個月就出調低評級。 被認為係三大評級機構之中最進取、標普既主權評級委員會主席錢伯，近日不斷約見Pimco在內既全球最大債券基金，討論一旦調低主權評級既後果。 有參與討論既人士透露，佢地得到既印象，係標普有高於五成機會會調低美國三個A評級。 目前大量既互惠基金、退休基金，以至監管機構都係以評級作為投資指引甚至監管工具，三個A既美國國債，更係喺一個世紀以來，被認為係最安全既投資工具。 作為美債最大投資者，中國、澳洲、南韓甚至係日本都先後提出警告，要求美國政府要對債券持有人負責任。 要淡化美金不斷跌嘅影響，美債上限，愈觀察多日，愈開始懷疑奧巴馬一邊話要盡快搞掂，一邊正正係呢場鬧戲嘅導演。 結果佢係同意事態危急，無理由最新嘅民主，共和兩黨方案咁近磅，但都完全無進展。 七九年美國試過違約，當時債息升過六十點子。但目前環境完全相反，資金氾濫之下，錢仍然別無選擇。 全球過萬億貨幣基金資金，首先有一部份流向其他資產，股票對部份人嚟講，可能仲安全過美債。但絕大部份錢，走唔走到，無人知! 美國不違約，仍然係合理假設。但全球已經假設歷史性會無三個Ａ評級。 因為美債佔國內生產總值上限已經相當高，再提高負債上限，就會觸發評級機構下調評級。 但要搞清楚，無三個A，唔係世界末日。美國無三個A，要玩金融戰爭呢場遊戲，仲方便自己發揮「爛仔」本色。 對投資者嚟講，無三個A再顧慮，回報至尚嘅投資決定，可能更果斷。 三個A，日本十年前已經無左。日本經驗告之，無三個A，繼續可以發債，而且日本無三個A後，債息成本反而更加低。 呢點，亦拜佢地當年印鈔所賜。 三個A唔應該係觸發下一回金融市場...