財經拆局

大致上，內地民間、官方均對外資批評界定為不懷好意，但同樣，外資對內地越無好感。 十幾年前衝著入世，市場開放而來，市場到現在仍未完全開放。幾年前，冒中國高增長之名而加碼投資，結果幾個大品牌，大型連鎖，近幾季，內地銷售數字表現連歐洲都不如。 外資看錯中國，抑或內地對外資有所虧欠？事實，商業協議正正係你情我願，不能怨，也不能罵。 但從近年貴價「來路」貨紛紛被襲，奶粉被指控制價格、汽車被話有問題、蘋果又指侵佔商標，連炸雞都被留難唔衛生，既怨且罵似乎不屬外人。 同樣，外界對中資有保留，似乎確實有訴諸發洩，否則六、七倍市盈率，唔買就走寶!! 而截至今日為止，正正係外資指中國經濟會硬著陸第三周年!! 美林崔魏早前有關外資被內地高調調查一份簡報，可讀性極高；一，年內個案確實大幅增加，二、怕且類似個案會繼續有來、三，背後原因是反貪、是維護市場秩序、是維穩、抑或為扶持內地企業，答案難言，如屬後者的話，卻實屬悲哀!! 葛蘭素事件，目前越鬧越大，因為討論範圍已經不限於外資內地經營，更涉及所謂獨立機構安危，有關講法純粹引述華爾街日報，背景之一，係一直有替葛蘭素提供顧問服務既獨立研究機構CHINAWHYS負責人亨弗萊，盛傳七月十日以來，一直被拘留。 客觀上，作為局外，未知事件底醞，不宜太早作結論。但外國媒體已經將事件無限放大，包括，一，點解？二，獨立研究機構到底是否可以繼續經營？三，中資財務及業務真相豈不是更難尋。 還記得渾水哥卡臣，大半年前左右，已經暗示金盤洗手，轉戰追查美國矽谷企業，明眼人都知，臣哥自知風險極大。正如佢回應葛蘭素事件時就提到，it shows you what kind of poor outcomes are available!!! 好肯定，正如多篇外國媒體報道，獨立機構中國攞料，舊年年底開始越見困難，甚至被諸多阻止。對中國嚟講，外資搞事，甚至涉及盜取機密，但對外資來說，可能只係俾錢尋求事實。 但根本無變係，造就有關獨立研究機構存在誘因：中資，民企等等唔爭氣，中金再生四年來不斷做假數，又一次證明，唔係人地睇死你，係你抵死!!   

一場消失了的記者會，就令星期四長和業績，反高潮地令市場、媒體、甚至全港市民失望。 中環人無左一探誠哥對經濟及樓市把脈機會，「大街人」就變成唯一親近首富機會都無埋!! 撇開甚麼企業管治水平唔講，因為作為傳媒人，大家都心知肚明，業績記招真係問業績時間，恐怕三分一都無，頂多是加句SOUNDBITE 在主席報告書內，大家想聽既、無錯其實都基於八掛心理。 VICTOR．李可能一早知道我地「居心不良」，觀乎今年三月全年業績記者會，已經多番向老豆「搶咪」，打斷父親發言，不知情者以為有人有心搏上位，但查實係VICTOR用心良苦，要大家將焦點放番在公司啫！！ 確實、和黃既價值一向被市場嚴重低估，多既唔講，單睇有Cover 和黃的大行分析員既數目，得16個左右，在MSCI亞太同級數公司中，只是平均數目的一半，結果令股價長期對資產淨值有三分一到四成折讓，遠高於平均25%折讓!! 業績分析求先都睇過，部分令跟和黃分析員數目較少原因，可能同本身業務複雜有關，單睇里昂的Sums of Value，和黃資產淨值組成部分就有66項，估值方法就有四種，難怪FT一直以世上三大不解之迷，來形容和黃盤數!! FT專欄一個月前有一篇特稿、就以「隱藏寶藏」，再次形容和黃隱藏價值。 其中一個觀察相當有趣，就是和黃股價表現理想的時候，通常都需要一個「主題」，由90年代Dealmaker，到之後主打3G，而目前最有效跑贏大市方法，就是靠出售資產而非收購。 觀乎近日放風出售百佳超市，超人果然深明要提高估值秘訣。 去年50間藍籌公司當中，只有七間無舉行中期業績發佈會，而家誠哥旗下長和加入埋呢個行列，令總數增加至九間上市，長和系就佔當中三分一!! 到底香港人信超人多些定CY? 答案不言而喻。 今次誠哥唔見記者，損失的肯定不會是超人本身。 或許由近年記者會安排、都可以睇到一些微妙變化，例如先是匯豐取消每年兩次業績記者會，九哥歐智華變成一個例行電話會議。 而家加埋誠哥唔見人，一切證明上一代人認同的「真心直說」、已經被現代企管人認為，變得不合時宜，甚至是多餘舉動。 咁到底呢種只見分析員、不見媒體的選擇性披露安排，是進步了或是有所退步，恐怕要由各位自行評價。

證監會破天荒申請將上市公司清盤，中環人個個都「目定口呆」!! 須知道、與洪良個案不同，當時證監入稟是凍結洪良資產，特別是存放在銀行的上市集資現金，目的確實是保障股東。 但今次是入稟清盤、大家都知在清盤過程中，股東要取回權益排名，遠低於債權銀行、員工甚至供應商。 顯然由挪威央行、以至一眾小股東，今次都凍過水!! 但原來事出有因，被證監會入稟清盤的中金再生，原來早在上市時已經做假。 證監會指，早前調查發現有證據指中金、曾於09年的首次公開招股章程，及09年的年報中誇大公司財務狀況。 點誇大? 證監會指有關附屬公司，07、08及09三個財政年度，連續每年將向三間主要供應商，採購的金額逐步擴大，虛構絕大部分採購金額。 中金再生，由第一日上市開始，其實注定要再生絕不容易。 大家仲記得資深賓卡界王學良？在上市未夠半年就辭任CFO，當時大爆自己無辦法Access 到公司財務資料，呢單料當時已經震撼市場。 公司解釋仲無厘頭，話要upgrade server 先至令王學良睇唔到資料，現在事隔四年回首，其賓早有先兆。 今時今日我地找回王學良，他人已不在港，謙稱自己知悉事件，但事隔久遠，稱不宜再作回應。 雖然遲左四年，今次SFC都算做番輯好戲，為賓卡．王討回一個公道。 只是當年負責上市、由會計師德勤、到保薦人瑞記招商，恐怕都有得震、無得瞓!!! 中環人而家都幾乎斷定、公司年報披露的17億存款、以及高達129億應收帳，都通通存在造假，先至引致當局要咁重手出招。 好彩係央企中國節能環保，今年初不知情下本來會出資34億接左主席秦志威既貨，最終因為停牌避過一劫，否則恐怕又有人要向阿爺交待!! 今次沽空機構Glaucus 一炮成名，值得一提是報告有提及如果中金再生財務狀況、真係講得咁理想，咁無理由過去三年、公司都要向主席秦志威，每年借入二至四億既臨時貸款，除非本身財務資料根本係「造假」!!! 值得一提係Glaucus 仲點名要沽空兩間上市公司，大家有心不妨找一找! 講到呢度，相信大家都可以接近掌握全貌。至於有些所謂股壇名人，周不時推介話自己仲睇好邊間邊間民企，仲要拍心號話信晒對方，呢啲人個名，真係開來都嘥氣，講得多反而會誤導觀眾!!

政府不斷維持有批地，但係吊詭嘅係買到樓嘅人反而大減 ! 一手條例實施後，發展商去貨困難，推高本港潛在供應至 7 萬個單位是近六年新高。 而施工量同步大增，是有紀錄高位，變成有樓、無人買 ! 其實只要減價咪有 ! 分析員相信下半年發展商有出貨壓力，新盤定價有下調空間。 自從 2010 年起，政府主動推地以嚟，無論起樓速度同政府審批賣樓速度統統都跟唔上 ! 要真正增加供應、先要解決當中嘅落差至得，否則就算狂批地，都只係表面數字遊戲 ! 期內受一手條例實施影響，發展商推盤減慢、推高樓花貨尾增至 5 萬個，比第一季多 4000 個，連同 1.6 萬個已批出但未動工，以及 4000 個現樓貨尾，未來三至四年的潛在供應，增加至 7 萬個，比首季多出 3 千個。 政府係 KEEP 住有批地，施工量亦的確多咗，但係唔代表實際上真係多咗供應面市 ! 落成量，嚴重唔達標 ! 頭半年新落成單位，少到未見過咁少 ! 半年時間，都只係得 1500 個新單位起好 ! 係紀錄新低。 市場預計，全年計、落成量大概有 11000 伙，比政府原先預計嘅 13500 伙少咗 19% 。 除非下半年有大型項目加快完工速度，否則落成量都會偏低。 特別留意、落差最大嘅係咩單位 ? 如果按面積劃分，發現單位面積越細，距離落成預測目標越遠。 好似面積最細嘅 A 類單位，即係實用面積 430 呎以下嘅小型單位，喺今年頭五個月落成量竟然係零 ! 一個都無 ! 政府原先預測全年落成量會有 1489 伙，而家完全落空。 換句話講，可以預見細單位將會繼續缺乏供應 ! 其餘中型、大型單位都一樣有嚴重落差 ! 又例如 B 類單位，即係實用 400 幾 -700 幾呎嘅中小型單位，雖然落成量係各個界別之中最多，有 709 個。 但係呢類亦係最大路、市場最有需求嘅一類，政府預測全年要有 7600 伙落成，但時至今日只係達標僅僅 9% 。 各個類別嘅落成量，都只係得幾百伙，達標比率相當之低，整體達標１成１。 淨低嗰 89% 未達標，試問得番半年時間條數 .. 點追 ?! 大把數要追 ! 唔只起樓慢，賣樓更加慢 ! 今年發展商出貨好 " 立 ...

又係事先張揚，外匯基金再次見紅，無論債券、外匯、港股都蝕錢 ! 其實美國十年債息，由伯南克五月表明退市，息率已經由一厘八一路飊升，最高上到兩厘七，佔七成投資比重的債券，自然首當其沖。 加上港股亦表現疲弱，反而意外係連外匯都有咁大虧損 ! 結果第二季，錄得超過二百五十億元虧損，是近兩年以來最多。 聯儲局退市令債息抽升，打擊債市表現，佔外匯基金七成資產的債券投資蝕最多，半年虧損 168 億元，而外匯和港股投資都要蝕錢，只得其他股票有盈利 311 億元。 羅家聰相信，美國退市影響對債券市場最壞的情況已經過去，債息頂多升至三厘左右，若下半年股市好轉，金管局班專家可以捕捉到轉角市，外匯基金投資有機會回穩。 展望下半年，其實都唔可以太過樂觀，一來美國退市只是剛開始，債息有機會升上三厘，到時債券同港股回報都未必有改善。 況且外匯基金持有關債券高達二萬億元，簡單講就如一隻航母要在水池轉身，跟本任何增持減持動作也是吋步難移，組合可動空間不多。 話說回來，伯南克主宰全球，亦因為本港聯匯關，係，伯南克，及陳德霖，某程度上建立一個主從關係。 我有決策，你照單全收。 因為美債債息升，聯儲局幾乎肯定，部份債券組合輸錢，主從關係之下，主子當災，侍從豈可不從，結果外匯基金亦因而受影響。 淡馬錫繼續尋求高回報，中投每年慣性投資回報一成，奈何呢三十幾年主從關係，事到如今，顯然我地跟錯老細 !! 一個叫 BEN ，一個叫 NORMAN 。主從關係算係舉世無雙。一，侍從搵錢多個主人。二，一個負責刺激資產價格，一個不停控制資產價格。 三，最重要還是，主人奉行透明，溝通，呢一位分反其道而行。雖則話透明，實則少溝通。 兩宗例子令中環人失望，包括扮隱形人吹風，大話貸款氾濫，外匯基金投資表現欠佳，醜婦不願見家翁。 美國倒薩運動升溫，伯南克及陳德霖曲線主從關係緣盡倒數。到底，往後由耶倫，抑或薩默斯主導陳德霖，未來數月好戲連場。 繼美國評論力撐耶大姐之後，國會議員極度罕有大玩聯署，暗反薩爺，明撐耶姐。 以往，聯儲局主事人是誰，政界不太關心，現是明顯，聯儲局政策擺動，美國國會山莊已經劃公仔劃出腸，係大有政治利益。 老伯最後關頭被市場叫倒，他是市場英雄，抑或唯命事從一條可憐...

於內地，無論是去到北京上海廣州、西安哈爾濱鐵路車站，都是一兩層大樓加鐘樓。 建築模式幾乎一式一樣，作用僅僅是候車室，完全未有充分利用上蓋空間。 究其原因，是過去車站標止商業運作，令交通樞紐用地白白浪費!! 為了盤活鐵路用地，以鐵路基建投資推動經濟，國務院首次容許鐵路用地，可以進行商業開發。 令車站由過去只有一、兩層，變成發展上蓋物業，甚至有地下商場。 做法類似過去幾十年香港鐵路發展模式，以物業收益支持鐵路發展，更令港鐵幾乎成了全港最大發展商。 其實在日本、近年推行的鐵路改革，亦以鐵路周邊物業收益，成功填補鐵路龐大負債。 今年重新落成的東京車站，正是在重現古貌同時，大大增加了商業樓面面積。 發展上蓋項目可以說是一箭雙雕，既有效解決地方政府資金不足，同時又可以紓緩鐵路負債較高問題。 要推動鐵路投資，國務院同時提出，力爭在十二五規劃期間、鐵路固定投資達33000億人民幣，較在溫州動車事故前的28000億元，再增加5000億元，其中今年就要完成6900億元投資。 但在溫州動車事故後，鐵路融資幾乎全面叫停，因此國務院建議，要以多種渠道籌集鐵路資金，目標兩年內引入社會資本2000億元。 引入社會資本，在內地幾近變成口號式宣傳，由銀行IT電信信息消費，通通打著要引入民間資本，希望可以減少中央及地方政府財政壓力。 不過鐵路總公司仍然有賣點，就是可以將盈利較好線路研究打包上市，有效利用現有資產籌集資金，包括京滬鐵路、滬杭鐵路都研究過上市計劃。 國家發改委研究員就提出，引入社會資本其實已經有近十年歷史，但之前鐵道部一家獨大，引入資金跟本無話語權。 今次改革，承諾向投資者提供穩定收益，變成類似信托產品，將有助解決鐵路融資問題。 連同鐵路投資，綜觀今次李克強三招，最吸引眼球莫過於拯救小微企。 面對成本上升、需求疲弱、融資難、稅費負擔重四大挑戰，減稅的確為內地中小企帶來一場「及時雨」。 好像瑞信陶冬所言，今次救市力度的確不足，估計今年稅收只減少120億，雖令超過600萬戶小微企業可以受惠，且豁免範圍不夠廣泛。 目前內地企業超過九成都是中小企，GDP貢獻超過六成，一半以上的政府稅收、八成的城鎮就業，亦是來自中小企。 不過今次措施象徵了經過幾個月觀察後，政策終於開始啟動，相信十月三中全會前，有更多政策出台。

時七，時七點五，總之因為七，中港股市以至環球商品，呢兩日都舞到頭暈。 新京報引述總理李克強、指經濟下限是GDP增長7.5%，而底線就是7%。 要為經濟尋底線，七月的PMI指數，正反映經濟遠未見底 滙豐編制的中國製造業採購經理指數，跌至十一個月低位，七月初值得47.7，表現遠遜預期。 細項以新訂單指數最突出，跌至十一個月低位，產出指數亦跌至九個月新低，原因是新訂單疲弱及去庫存加快，令製造業持續放緩。 結果又加劇勞動市場壓力，七月就業指數跌至47.3，是超過四年來最低水平，反映勞工市場惡化。 德銀馬駿就相信，領導人已一再表明低於7%是不容許，估計政府會低調推出一系列財政刺激措施，同時降低小型銀行存準金率，甚至放寬發展商融資規定，令第四季經濟復蘇機會增加。 當一眾大行包括馬駿陶冬都估計、中央表明底線後，小規模的刺激措施可望出台。 不過他們忽略，是堅持不推出刺激政策原因之一，是內地就業情況仍然穩定。 匯豐PMI最令人震驚，是最新就業指數，回復到海嘯後水平。 今年又堪稱，建國以來最困難的就業年。 勞動市場是否真的那麼令人安心呢? 不像西方國家，每個月公布就業數據，官方失業率、只會出現於年度的統計匯報。 諷刺的是，翻查過去十年，無論經濟急速增長、還是經歷低潮，失業率一直維持4%水平，上下不超過0.3個百分點。 值得注意的是，官方失業率只計及城鎮登記失業人口，數量多達兩億6千多萬的農民工，就業情況如何，並不計算在內。 既然官方失業率難以掌握，有經濟師嘗試從中央每年新增職位目標及農民工就業調查，了解內地情況。 瑞銀經濟師汪濤指，今年以來服務業增長仍然穩定，令城鎮新增職位都輕微增加。 至於農民工就業情況，雖然工資由三年前有25%增幅，放緩至最近只有十多個百分點增長，不過無論就業職位減少或工資放緩趨勢、於近兩、三季都穩定下來，未見有大規模職位流失。 就業情況看不清，偏偏卻是中央出手救市的參考指標。 更令人費解的是，前總理溫家寶當年要「保八」，目的是「保就業」； 今天總理李克強要「保七」，底線亦是要「保就業」，中間有甚麼分別? 分析指，當年的「保八」，是靠大型投資創造職位。 但今時今日中央提出的是，扶助小微企業增加就業，雖然對推動經濟增長力度可能有限，但相信更能改善就業情況，更重要是調整經濟結構。 ...