唱衰中國
唱淡中國，證明多數會錯。
因為，內地數據，總會有啲數字係你估唔到。
第二季經濟按年升9.5%，形勢大好!
按季升百分之二點二，比第一季更好。
如果用完美形容，係合理，唔係向祖國送高帽。
但一份穆迪報告，教曉我地眼睛要雪亮，呢個原則，分析中國數據同樣適用。
首先經濟數據好，最簡單諗，係造空者理據不足。但從另一個角度諗，咁好嘅數據，仲期望阿爺政策鬆綁，亦係理據唔充份。
分析內地數據，同分析業績一樣，睇要睇全套。
第二季經濟，講真並無放緩，如果西方學界做分析，依賴環比證據，經濟反而加快左。
問題係，問題出喺邊度?
最直覺令人懷疑，唔係固定投資，唔係零售，而係近年較弱嘅工業生產。
話外圍需求弱，啱！六月出口增長放緩左。話內地廠商因為信貸，同各種問題減產，都啱！
瑞信劉紹文話，訂單真係少左。香港空氣好左，亦係最佳證據！但偏偏，六月工業生產按年升幅係十三個月嚟最高，按月計亦比五月好。
六月工業生產之好，同六月，甚至五月官方採購經理指數比較，完全唔吻合。五月PMI得五十二，六月五十點九。
正路，PMI數字好大程度反映工業生產表現，但點解兩者啱啱相反!!
發改委學者亦質疑，六月工業生產，同採購經理指數兩組數字，係矛盾。
但佢無解釋原因，原因如果我地搵，最簡單話係電荒解決，同埋工業生產數據內，水泥部份升得多(19%)，反映要應付保障房!
疑問始終係疑問，工業生產反映製造業表現，製造業採購經理指數，無論官方，定匯豐編制，涵蓋企業數以百間計，代表性始終較大。
但數字同工業生產完全背馳，其實唔係好事。澄清，唔係話統計局造數，而係兩組數據矛盾，正如瑞信陶冬所言，帶出可能出現嘅非自願性存貨問題。
所謂非自願性存貨，就係做起製成品，遲遲賣唔出。即係李寧，特步依家面對問題，而呢的問題，唔會咁快反映。
如果睇六月官方採購經理指數，新訂單部份跌到五十點八，至於製成品存貨，就升到五十一。
我地既疑問，似乎有答案!
工業出現非自願存貨，有兩種情況，一，係自己計算潛在需求時出錯。二，係買家因應環境突然轉軚，依家兩個情況都有可能發生！
但話雖如此，工業數字，既唔代表工業好景，亦唔可以結論內地經濟過熱降溫，或將會轉差！
睇番第二季固定投資，對整體經濟增長貢獻超過五個百分點，仍然係火車頭。近月數字無大幅回落，嚟緊指標似會再升。
因為內地短期仲有十萬個基建項目上馬，保障房要下令達標，最少八千五百億人民幣要花，相當於固定投資額超過三成。
簡單講，保障房政策硬執行，基本上係為下半年經濟打底，而且有升溫風險，多過可能會降溫，除非....除非外圍突然好差!!!
總之，佢地結論都係，有生之年，內地總有一日會硬著陸掛!
留言