捉錯用神


琴日伯南克上國會半年聽證會,市場一聽到有議員伯南克答唔排除有QE3,已經未講先興奮,個市抽升過百點,不過冷靜之後.....先發覺唔對路!

"The recent economic weakness may prove more persistent than expected and that deflationary risks might reemerge, implying a need for additional policy support"

整個伯南克半年貨幣政策報告,就係呢一句,令所有焦點都放喺佢為第三輪量化寬鬆「開綠燈」。

其實有跟進金融時報既LIVE BLOG報道,佢地喺伯南克未講完之前,一早都提醒左市場係解讀錯誤,簡單講就係「捉錯用神」!

金融時報主筆戴維思話,睇完伯南克整個演說,最大重點係經濟的確疲弱,但通脹亦都高企到一個水平、係聯儲局已經無計可思。

換言之、即係現有貨幣政策唔會有變。

睇番伯南克既演說,喺講到經濟如果再次面對通縮時,佢第一個首選方案,根本唔係QE3。

伯南克話佢首選係改善同公眾溝通策略,包括會確保利率會維持一段長時間低企、以及保持資產負債表喺現有規模。

第二步先係增加買債。

另一個可以考慮方案就係減低比銀行儲備金既利率,令短期利率下降。

細睇伯南克今次演說內容,有九成都同六月個次記者會一樣,只係講到一旦面對經濟放緩,先透露有需要、將會再推寬鬆政策支持經濟。

華爾街日報就話,伯南克既貨幣政策雖然係有轉變,但QE3只係佢既次選。

更重要係、佢喺回答議員提問時,講到下半年經濟回復增長既機會、係同再次衰退均等,證明佢根本唔急於再印銀紙,目前只係喺一個觀察期。

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將