自食其果

經常講一句「你都有今日」!呢短短五個字，明顯係負面。背後，其實又帶出「自食其果」四個字。

對英美傳媒嚟講，傳媒大亨梅鐸可能真係屬於「你都有今日」嘅類別。眼見對手，仲要多年嘅打唔抵既對手，為求做新聞，甘於犯規。

各大英美傳媒一致行動，就係力插梅鐸!!

作為梅鐸旗下英國一份小報，世界新聞報由於發行量十年嚟大減三成，為求賣紙。佢地連聘用私家偵探呢招都出埋。

令英國社會震驚，係原來世界新聞報犯規左九年，入侵零二年被謀殺少女嘅手機留言信箱；再傳出佢地為咗爭取獨家消息，連兩名零二年被殺害女童父母嘅手機；以及零五年、倫敦連環爆炸恐襲死者家屬嘅手機都唔放過。

事件揭發令英國社會公憤，因為反映「世界新聞報」已經將偷拍、偷聽嘅對象，由名人、球星、王室成員、陣亡英軍家人擴到大到「遭逢大難」嘅普通人同佢地嘅家屬身上。

英國金融時報專欄將世界新聞報玩偷聽，不法揭私隱一事，同舊年英國石油漏油事件相題並論。並形容，前者比後者更嚴重，梅鐸未致於江山不保，但整個新聞集團公信力，大打折扣!

兩大集團都係危機處理兩大反面教材!

問題係，新聞集團仍然選擇力撐新聞報負責人「布魯克斯」。其實部份英國評論一早獻計，話如果肯人頭落地，事件唔會搞到英國政府要撤查，廣告商要抽廣告咁大件事!依家要平息風波，關鍵係一個人，就係梅鐸!~

傳媒大亨當年接手父親新聞集團，果時資產只有一份澳洲小報The Advertise，幾十年嚟，愈大搞大。

移民做美國之後，再將新聞集團變為美國公司，華爾街日報俾佢買到，

雷士頻道一度最高收視。紐約時報直指，梅鐸成功，自負，亦令佢有的霸道。

梅鐸美國，早已經四處樹敵，奧巴馬亦因為佢地惡意批評，半封殺佢地。

而英國，依家無信譽，無廣告之餘，連收購BSkyB大計，亦可能受影響。

事到如今，老梅放下大亨身段，夠膽講句高度關注，深表遺憾八個字，可能最少救到股價!

但世界新聞報，以及梅鐸呢一役，證明靠玩獨家新聞賣紙，或吸觀眾，可以係玩火既遊戲!著左火，仲要卸膊，仲衰!!