站台

地產股呢兩日表現,證明一樣野。就係義氣唔值錢,轉軚有萬金。

特首選舉結束後,新世界主席鄭家純突然轉軑為梁振英「站台」,呢兩日地產商中,就以新世界表現相當標青!

股價連升兩日,累積升近百分之九,接近返返去三月中跌浪開始前嘅水平。

兩日之間,市值增加48億幾。單計純官家族控股嘅四成二股權,就多左20億。

同期,跑贏支持唐營嘅地產股,論升幅,亦多長實好多!

特首選舉,市民最大得著,係睇到轉軚實錄真實版。地產股要升,好簡單係之前跌得多,但市場喜歡因應唔同情況,將唔同現象代入,再加以演釋,令所有事情都繪形繪聲。

無義氣都唔緊要,最怕有人扭曲事實。從來無話,新特首要推低樓價三成,但講到佢政綱內有關樓市同土地供應政策,其實利好私樓價格,又似乎有所偏離客觀。

上述論據,主要係話,既然新批土地集中公屋、居屋,咁即係私樓供地會少。

既然係咁,私人供應亦會少,樓價反而無大影響。

咦,聽落同當日好多人話,推居屋就不利樓價有咁大落差咩!!!

至於有關金融發展局構思,變相搞個金融版既貿發局,首先,無論從定位同角色上,不單同財經事務及庫務局、港交所,甚至投資推廣署有重疊,箇中細節亦有待釐清。

好遺憾,人總鐘意扮醒目仔,一個一貫支持市場自由發展既人,出口話金融發展局係好野,值得支持,就有令人噴飯之感!

市場發展,由政府牽頭,涉及既應否問題,從來係爭辯不休,唔會有結論。再者,多一個機構,就多幾把口,亦多左人有插旗意欲,有無諗過「混亂」呢兩個字。

無疑,依家係新時代開啟。正如狄更斯講,係最好同最壞,光明同黑暗之間。

大家睇唔通,社會率先進入表態期。金勞講得岩,識時務者為俊傑,義氣同原則,值幾錢斤?!

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將