減半的肉醬意粉

上市兩日升一成九，話翠華帶動其他連鎖餐飲股，說來牽強。

翠華表現，令有幫襯翠華，而又有抽翠華既人成功對沖，每手累積賺八百六十蚊，其實只係夠食足十二餐翠華晚餐左右。

新股要升，歸根究底理由可以莫須有。行業好景與否，見人見智也。估值較茶餐廳便宜，二大快餐股「快活」及「家樂」，業績盡告，今時今日香港搞飲食，未算最差，但談不上好景。

將樂仔，活仔，再同翠華比，食品味道之外，其實結論一樣。

大家樂，大快活半年盈利繼續有增長，從營業額睇，增幅在在唔算突出，一間升七，一間升百分之八。有幸，成本控制得宜，大快活半年銷售成本僅僅增幅百分之六，大家樂成本，亦只係升百分之七。

成本升幅輕微低過營業額，造就到毛利率上升。但睇樂仔，毛利率升幅得零點九個百分點，活仔毛利率亦僅僅多左零點八個百分點。以二大規模，毛利低雙位數，同我地睇一盤生意，話一碟小菜，毛利五至八成，天淵之別。

無疑，咁既環境經濟似晴實陰，毛利唔跌，偷笑嚟唔切。我地做消費者，怨人加價，呢個係人之常情。大家樂講明，再加價可免則免。管理層咁講，不單止唔係客套說話，其實盡顯快餐股，大眾食肆現今滯脹環境下，其實困難重重。

撇開最低工資，又撇開租金因素。政府十月份消費物價指數詳細報告有數可依：整體食品十月按年升百分之四，米價高近百分之二，家禽按年貴左半成，調味料升幅一樣，更慘係牛肉價錢按年貴左兩成二。

作為營運者，加第一次價係為抵消工資成本，加第二次價係租金上漲，第三次可能因為食材漲幅又要加價。

但食材控制成本極難，加三次價，顧客反感既，走曬。未走既，亦可能另作他想。

目前經濟未差到打擊消費，試想，活仔，或者樂仔，一份普通碟頭飯餐，要用上四十蚊樓上，即時影響，係部份顧客需求彈性有變。

因為加價，佢地覺得，「辛苦搵埋食左佢，一於豪些!!!」，於是倒不如多付十元八塊，索性去中檔餐廳，從而離棄樂仔，活仔。

夾於中間，大眾連鎖食肆，簡而言之，就因為滯漲問題，令價格優勢自動消失。

二大深明此道，但羊毛出自羊身上，價錢不加，份量即減。三幾年前，一份焗豬扒飯有兩件豬扒，依家好彩的話，一件會少些骨。

又三幾年前，飯餐全部跟飯品，依家無左。顧芷筠主播近日就嘗過要一客肉醬意粉，亦不幸出現大縮水事件，幾乎唔飽肚。

價錢唔減，份量被減，固然憤怒。但從另一個角度諗，連鎖食肆受既成本影響最立體式，考

慮埋價格競爭力，消費者需求彈性需時有變，條路無得揀，咪當佢地幫我地減肥!!!

同樣情況，茶記一樣。不斷加價，無非趕客。於是，軟性加價例子數不勝數，例如凍飲以往

加兩蚊，依家要三蚊，早餐要多士，又俾多兩蚊。

有午香肉丁既早餐，貴三蚊。所以，做過精明消費者，切忌要肉丁、叫凍飲!!!