世銀藍圖


華爾街日報爆出,李克強總理要向世界銀行尋求教路,為的正正是改革,建議藍圖簡而言之包括土改核心部份,就係容許農村土地自由轉讓、其二係,將個別國有商業銀行,全面商業化,徹底淡化國家銀行角色。

大家會問:點解李克強要搵外援?點解係世銀,唔係其他國際金融組織?

其實,兩個問題答案相近,事關內地領導近年一直有透過智囊機制,參與長遠發展研究主題,偏偏由世銀出任,一,世銀角色之一,一向屬於協助為新興市場推動改革、二,世銀份屬美國系統,中國要做金融大事,搵美國幫手,變相唔俾佢背後搞搞震,中美合作關係之密,可想而知。

三,世銀早前有個叫林毅夫既副行長。

林毅夫背景,毋須重複,早前政治局經濟坐談會,即爆出「底線論」那次,林氏正為坐上客,影響力之高,可想而知。

影響力同功力,其實兩回事,猶記年初,老林仍然高舉中國搞基建無問題,全年增長可過八,同屬坐上客既勵以寧顯得比佢更清醒,更了解問題所在。

改革事關重大,李克強叫國家發展研究中心,再叫世銀合作,舊年試過一次,背後係反映,李總理經濟大智囊,李偉是也。

李偉係國務院發展研究中心主任,的而且確係智囊中既智囊,佢年初提到,改革不進行,經濟無前途,依家到二零二零年,增長平均可保七,細心比較就係克強經濟學路線完全吻合。

內有李偉,外有林毅夫,李氏研究部水平如何,短時間難定結論。講番重點藍圖之一,固然係銀行全面商業化,理解無錯,係國家連重大持股權都交得出市場,希望令銀行走上商業,從而令經濟更走入市場。

但無論係盛傳中既中行,或交行,甚至未來工、建、農通通商業化,名單其次,做唔做到係最大問題。

一,要央行失去財主,肯咩?二,變相令內地財金部委減少權力,肯咩?三,亦係最大問題,十幾年前注資重組,人行或財政部其實係向內銀用發債形式寄帳,壞帳名義上轉移,實際上仍然反映內地資產儲備,為數呢近萬億未解決,未付鈔,何來商業化??

同樣道理,農地可轉移,說來美好,但共產黨靠農立國,意識形態要掌握得好技巧。

的確,經濟發展到某程度,政治意識形態亦可能要讓路。

但世銀建議會否得到發展研究所批准、以及中央接納,目前言之尚早,因為世銀提出的方案將挑戰中共一直以來的意識形態。

容許內地數億農民,出售自己的農地、增加農民收入,鼓勵農村人口向城市遷移,以及整合農業用地,既可達藏富於民理念,亦對推動消費轉型,一石二鳥。

不過亦變相將本來的國家壟斷土地,成為農民的私有產權,內地學界早已指出、能夠讓農民出售農地,有助克強總理最重視的城鎮化推展,並收窄城市及農村居民的收入差距,但當中牽涉龐大地方利益,推行時同樣會遇到相當大的阻力。

五八七,老毛取消大鑊飯、七十年代末,小平由包產到戶進一步擴大到自耕自足、背後都有重大契機觸發。農地可轉讓被指第三次改革,最少意識形態形成,理論辨證兩方面,似乎尚欠多步。

留言

此網誌的熱門文章

「急於求成」 JPEX 爆煲引證證監會監管不力

三十而立的金管局:思良將

減辣不單徒勞無功 甚至「好心做壞事」