減辣?


三個月前耶媽口口聲聲話,因為全球經濟及金融市場發展,而決定不加息。三個月後,金融市場環境到底係好左定差左?

唔見得有太平過! 商品價格繼續下跌,油價仲跌到去08年新低,鐵礦石價格更創新低;美元指數繼續轉強,高息債幾近爆煲;連人民幣匯價都創4年新低,到底邊個金融市場好左?

當日決定唔加息理由仍在,只係美國經濟真係強到無咩好講。失業率降至貼近5%全民就業水平,通脹率撇除油價,核心指數連升三個月,按年升2%,已是聯儲局目標水平。

其實簡單講,耶媽一開始就唔應該用金融市場做檔箭牌,只需要就是關注著兩大目標:通脹同就業,就已經可以做好「分工」!

耶媽今次一個鐘頭對答,應該受過特訓,不單衣著靚左,對答都流暢左,仲擺明要留有一手,話數據一旦不及預期,可以暫停加息云云。

說話可以有技巧避重就輕,但委員意見就要紀錄在案,觀乎「點陣圖」委員對未來兩年預測,其實共識已經形成,就是每年加息四次,每次加四分一厘,KC博士今次贏喎!

香港呢邊,對息口預測都仲係審慎,財爺話市場估計明年只加二至三次,陳總就話低息仲會維持長時間,到底是否安撫市場,大家心中有數。

加息周期開始,市民最關心都係樓市會否加速轉勢?我地都搵左施老闆同關灼照把脈,預測係咪準確,跌一成半定三成,可能要明年先知,但施老闆一針見血提出,宜家係心理影響大過實際,就指出左樓市轉勢關鍵所在!

至於幾時先係減辣時機,有分析員提出一套看法,值得參考:第一輪逆周期,是在2010年11月提出,當時引入SSD,樓價連97位都未穿,如果要返去當時水平,樓價要跌足足45%!

至於之後BSD及DSD,就分別在2012年及13年推出,按目前樓價,就分別要跌26%及20%先夠,咁係咪即係跌兩成先係合適時機?

要減樓市印花稅,其實當局考慮既因素相當之大,特別是要冒上鼓吹炒風呢個天大罪名,肯定會相當有保留。反而由金記出手,逐步放寬對用家按揭限制,既簡單又易贏掌聲,陳總肯定歡迎!

計落最後一輪逆周期措施,是今年二月,淨計樓價其實只要跌多半成,都差唔多到位。不過政府由於想確定今次係真跌而非假跌市,比夠一成先水位先減辣,似乎是合理預測。

不過中環人話,睇幾個最高層財金官員發言,近日對減辣言論似未有共識,今日財爺更攞埋CY出來做擋箭牌,邊個主導樓市政策已經呼之欲出,亦可能成為樓市最大風險。

有大行一早指出,官僚反應慢,當周期展開仍然不自覺,到崩盤時候先知要減辣、就係樓市最大不明朗。8萬5消失事件,相信大家仲記憶猶新吧!

留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將