財經拆局

再減息，就算存十五萬到銀行，息口得半厘，即係六十蚊，想點？ 滙豐嘅存款利率，１５萬或以上利息由零點七五厘，減至０．５厘。 小額嘅五千至一萬蚊，減１０點子後，得番０．０５厘息。 利息咁少，擺錢入銀行無乜著數，如果戶口結餘少，就更要留意。 以滙豐恒生嘅一般儲蓄戶口為例，最低結餘少過五千蚊，唔只無息收，仲要俾50蚊月費。 就快無息收，股票又高危，買樓入場費又太多，點部署好？ 有幾個選擇真係值得諗諗。 轉去有高息派的外幣存款，在一些中小型銀行存一千蚊以上，澳元戶口半年收到６厘７５利息，新西蘭元仲高，有８厘樓上。 四叔講計埋升值回報率有一厘四，其實都算保守，只要澳元升到一算(唔好話無可能....)，單係升值都有一成半回報。 就算驚高息貨幣波動，穩陣可以揀人民幣，雖然存半年都唔夠一厘息，但有升值概念撘夠。 單計一月分，人民幣已經升值百分之一點七，係匯改以來最大升幅。如果個個月都有1.7%升幅，複式計上去都幾和味。 真係唔想只係單一投資咁搏，不妨將啲錢分散在農產品同商品期貨基金，預計今年回報可以高達１成半至兩成。 進取派就揀再生能源基金，舊年回報保守有五成，特別留意歐盟上周要求所有電力公司，要在2013年前自行在市場買入emmission trading，唔會再作出豁免，加上澳洲新總理陸克文表明會加入京都協議，看來在全球衰退浪潮中，再生能源仍然會是焦點。

看貨幣戰爭的最大困難，是要思考到底那一些史實是有根有據，那一些是「穿鑿附會」! 全書核心只有一個: 美國銀行家透過擁有貨幣發行權，達到控制金融體系核心目的。 由第七任美國總統「傑克遜」上任以來，美國的民選總統就一直和這批美國銀行家搶奪貨幣發行權。 美元由最初「金本位」，銀行需要將等值黃金換取發行貨幣，到銀行家明白放棄「金本位」，可以透過通脹增加貨幣供應，達到控制金融市場目標，期間就不斷出現美國總統同銀行家之間競爭。 「貨幣戰爭」很巧妙地將三名美國總統行刺事件，同貨幣政策改變連繫: 包括林肯、甘迺迪及列根。 林肯在「南北戰爭」後，由於要支付巨額軍費開支，欠下銀行家巨債，當時索價利率是天價24-36%! 林肯當時一口推卻銀行家要求，但錢又要還怎辦？他想到由政府發行貨幣，即由國會通過法案、印發具法律效力的貨幣，這種貨幣就是今日一直下來叫的「GREENBACK」! 就在林肯推出新政後，德國的鐵血將軍「俾斯麥」已提出，林肯離死期不遠。 而發行「GREENBACK」的法例，就在林肯遇刺後就被廢除。 至於甘迺迪，「貨幣戰爭」提到，他在1963年簽署的一條法例，著令財政部以所擁有嘅白銀作為支持「白銀券」(SILVER CERTIFICATE)，並流入貨幣市場。 在1933年羅斯福廢除金本位並同時禁止擁有黃金後，市場流通的美元就只有「聯儲券」、「白銀券」兩種貨幣。 甘迺迪意圖很明顯，就是以白銀券，重新奪回貨幣發行權。 結果，就在1963年的十一月，甘迺迪被一名猶太人行剌。而事後三年內，十八名目擊證人亦相繼死亡。 到了1981年1月，列根上任無耐，就提出要求國會成立「黃金委員會」，研究恢復「金本位」可行性。 兩個月後，又有一名被認定是瘋子的人，向列根開槍行刺，子彈離心臟只有一毫米! 到了下一年黃金委員會上，就以大比數(15比1)，否決了恢復金本位的建議。 另外書中亦有很大篇幅，形容當天成立聯儲局時候，銀行家到底有什麼陽謀。 不妨問大家一個問題：到底誰擁有聯儲局？ 如果跟據書中的推論，大概可以理據，為什麼伯南克一定要救銀行。請留意星期四晚Moneycafe!

今晚聯儲局到底減幾多息，睇利率期貨話半厘係七成，我地都膽敢做下預測，估計有半厘。 係咪開口中，好快會知，不過斷估伯南克為左向市場證明、自己喺上星期無減錯息，一定要繼續維持減息半厘，佢，根本無得揀。 最近數據雖然反映美國耐用品訂單升幅比預期大，消費信心指數即使回落，仍然好過預期，不過，樓價就仍然錄得按年最大跌幅。 有唔少大報評論都提過，伯南克之前因為唔知「傻珍」事件，因此眼見歐洲股市股災，就連放假日子都急急腳跑番聯儲局，開個視象會議決定減息四分三厘，避免美股出現崩潰。 無論有無法興事件、又無論伯南克事前到底知唔知，今時今日，伯南克已經「BEHIND THE CURVE」，要減息四分一厘已經係萬萬不行，減夠四分三厘？聯邦基金利率一旦跌至２．７５厘又會令自己無咩空間「走棧」。 其實上星期伯南克突然減息四分三厘後，金融市場普遍表現都係回穩，好似標普五百指數喺減息後回升左一成七，而英國富時指數亦升番一成三，可以說，雖然未見黎明，但最差情況已經過去。 金融時報話，美國一個月前的經濟的確係陷入衰退，不過經過一個月來發展，隨著金融市場回穩，對經濟前景可能無之前咁悲觀，不過股市永遠是走在經濟之先，亦因此容易過分反應，到底前景係點，相信很快就會知道。

對於法興交易員Jérome Kerviel事件，市場開始有愈嚟愈多質疑。 第一個疑問係，點解一個交易員可以做成咁大虧損？ 英國金融時報引述法興嘅對手話，單係Kerviel在買賣歐洲期指做成交易虧損，於他被揭發時，大約只是累積了十五億歐元。 實際上其餘三十四億歐元虧損，是在法興董事會上周決定平倉時候做成。 而今次法興入帳手法亦引起質疑，指法興交易虧損是於今年出現，無理由將相關虧損撥入去年帳目上。 最大疑問係、既然Kerviel無獲取任何個人利益，到底佢有咩動機？ 華爾街日報形容，Kerviel平日樂於助人，在鄰居眼中係好好先生。而他今次做左咁多虛假交易，原來只是為了證明自己有能力在法興生存，而所賺的，只是三十萬歐元的花紅。 Kerviel的律師開始質疑，法興是有心讓Kerviel背上黑鑊，因為可以透過今次事件做成「煙幕」，令法興可以將次按相關虧損入埋Kerviel數。 令事件更添上陰謀論的是、法興一名董事「戴羅拔」，在今個月九號同十號，即係「法興事件」曝光前大約兩個星期，透過兩個基金，出售總值９５３４萬歐元法興股分。 市場即時關注，當中有無涉及內幕交易﹖又有無人是事先知情？ 牽涉入內幕交易醜聞法興董事「戴羅拔」，來頭不少，在福布斯美國富豪排名榜排２９７位，佢擁有的ＴＣＷ基金管理公司，零一年被法興收購。 而法興對事件的低警覺性，亦到了令人難以置信的地步。 法國檢察官話，在查問Kerviel後，證實去年11月，德國證券交易所屬下期貨交易所EUREX，曾經就Kerviel持倉量，提醒過法興，不過法興當時指，Kerviel提交到文件證明有關交易合法。 在外界不斷提出質疑下，連法國總統都提到法興高層要有人出來承擔責任，最新消息是ＳＧ會在星期三開董事會，看來主席Daniel Bouton，今次都難逃一劫。

全球股市相當脆弱，內地大風雪的確可能對經濟構成壓力，但另一方面經濟會否因此可以硬著陸。 另一方面，滙豐銀行前亞太主席艾爾敦說，關注美國信用卡債券衍生產品會否出現類似次按危機，他表示，部份小業主以信用卡借錢支付樓按，近期已有一些人借爆卡。 信用卡債券衍生產品(securities receivables)造成壓力，真不容忽視，艾爾敦提到，過往美國不少人以信用卡償還按揭貸款，隨著按揭貸款拖欠情況日趨嚴重，若客戶最終不能清還所有欠款，其引發的問題或與次按危機相若。同時已有金融機構將信用卡貸款重新包裝為債券，並相信這些產品的總值高達1萬億美元。 還記得上次美國滙豐撇帳已經看到次按撇帳比預期少，但個人消費信貸撇好多，聲明亦都說，問題已經惡化到消費信貸。 有人會認為，信用卡規模始終比按揭細，影響相對輕微，但還記得昔日渣打銀行可以因為香港破產，引發信用卡大額撇帳，令盈利大受拖累，消費信貸問題可不看少。無抵押貸款引致的問題會更嚴重，美國情況我真不知，但在香港我覺得亂發卡的情況是相當嚴重，年紀輕輕經濟能力不高的，手上信用卡量閒間地都多過我幾倍....

一場五十年大風雪，遇上春運回鄉高峰，就曝露出內地經濟的樽頸問題，情況令人憂慮。 煤電油供應相當嚴峻。 全國煤電供應嘅庫存量，只是得番去年同期唔夠一半。 十七個省市已經實施拉閘限電，部分輸電網絡倒塔，影響到有南北大動脈之稱的「京廣鐵路湖南段」火車受阻，造成大量旅客滯留，單單廣州站號稱就滯留了五十萬人。 公路方面更見嚴峻，內地多達十三條高速公路受到暴雪影響，主要公路包括寧滬高速公路屬下寧連高速、以及312國道都受到影響，要全線封閉。 運輸輸杻中斷，糧食價格當然又急升，菜價就急升兩成，雞蛋亦因為湖南、湖北斷貨，批發價加百分之八，即食面更要賣到二十多塊錢一個。 無論煤電油、交通運輸費用，以至雞蛋價格都是目前內地最受價格管制的重點行業，跟據發改委之前通告，這類收費要全面凍結，不可能透過價格機制進行資源調配。 發改委話，只要物價升幅回穩，就一定會取消之前定出嘅行政指令控制物價措施。 但要受管制的物價回落，又談可容易？ 目前內地宏調已經發展到單以市場措施（加息/ 加存款準備金率/ 降低貨幣供應）已經不能進行調控，需要採取力度更強的行政管理措施。但行政措施的必然後果，就是令樽頸效應進一步放大，資源就算沒被浪費，也必然出現供應與需求沒法配對的情況。 溫總說要動員一切力量，讓民眾可以開開心心、穩穩妥妥回鄉過新年。我們不懷疑官員的動機，但更重要的是儘快透過將人民幣大幅升值，將內地過剩資金流通，雖然會面對開放資本帳帶來的陣痛，但唯有如此才能進行徹底的改革。

上周港股經歷了一個deep Ｖ式反彈，受「魔鬼交易員」的影響，包括歐亞在內４３個主要市場，指數由高位調整多個兩成，佔左全球市場多過一半。環球股市市值蒸發最少左４０萬億港元。 當日個市穿咗250天線，大家都問牛市係咪已經壽終正寢，熊市嚟咗? 以二千年３月為例，恒生指數創出18397點嘅歷史新高，之後半年反覆下試低位，10月穿埋250天牛態分界線。 但事後睇番，牛市當時原來未完，仲可以反彈番上一萬八千點。 技術派中就有一個「死亡交差」，即係話要短期移動平均線，跌穿長期平均線，喺二千年十月尾，恒指嘅五十天線，跌穿咗250天線，就代表熊市好有可能來臨。 事實上，當年恒指見到死亡交差之後走勢真的是一浪低於一浪。 以今天看來，死亡交差未出現，加上負利率效應，本港基本因素其實不什壞，看看身邊人的購買力就知道。 當然，衍生工具的「放大效應」當然不可少觀。 講到上周跌市，有一個新名辭真的要深入認識。 傳聞上個星期跌市中，ACCUMULATOR都出現大斬倉的情況，近兩年不少銀行就專向一些私人客戶推銷這種不受監管的「私人合約」。 看看石SIR的解釋: 「Accumulator是衍生工具的產物。有人有大量X股，怕市急跌，想沽，但又怕沽後股價仍升，於是找出如下方法︰ 　　當X股在100元時，就跟筆者之類的人訂個合約，每日可以90元沽給我200股，為期一年，但如果股價跌至90元下，我是要接400股的（是200股的雙倍），但如股價升至102元，此合約便作廢。」 由於有槓杆效應，這種「一call 兩put」的產品，可想而知風險比起ELI仲要大得多，傳聞有不少廠家都死在這種產品上，希望有機會在節目中再談。

咩叫一夜成名？ 就係佢令法國興業損５百幾億港元嘅３１歲交易員Jérome Kerviel「謝爾文」。 年薪１０萬歐元，履歷提到２千年加入法興時，是任職後勤部門，０２年轉做交易員，做最簡單的Plain Vanilla期指交易，平時鐘意打柔道。 原來佢０７年中起，一直買入股票期指好倉，累積涉及規模高達５００億歐元，仲多過法興成間銀行市值。 事件揭發後，法興高層在歐洲時間星期日決定，第２日要將呢批期指全數平倉。 豈料當時亞洲股市已經急跌，星期一歐洲開市後，法興將所有好倉平倉。 結果都唔使多講，當日歐洲多個主要市場錄得９１１以來最大跌市，４３個市場由牛轉熊。 。 有交易員形容，當日期指交投數量極多，單係３月分期指就高達２５０萬張。 外國傳媒指，法興當日大手平倉可能係導致當日歐洲大跌市原因。 可以炒輸成５５８億港元咁多，曾經於電腦後勤部門做的「謝爾文」，係透過入侵公司電腦系統，解除咗對交易員坐盤限制。 在買入一藍子期指嘅同時，亦制造假盤沽空盤，來作掩飾。 法興職員話，事後睇嚟，謝爾文係電腦奇才，多過交易奇才。 唔止股市出事，連聯儲局主席伯南克亦可能受騙。 歐亞市場周一暴挫，當日美國雖然是馬丁路德金紀念日，美股休市，避過一劫。但場外道指期貨，就急跌超過五百點。 聯儲局主席伯南克眼見全球股市「腥風血雨」，對市場反應「敏銳」的伯南克聞到「味」，召開緊急視象會議後，向全世界宣布減息四分三厘救市。 在法興事件曝光後，市場先知，歐洲股市星期一急跌，原來係拜法興巨額平倉盤所賜。 英國金融時報報道，法興都係喺平倉後，到星期三、先將事件通知聯儲局。 如果屬實，聯儲局提早減息嘅決定，可以話係間接由「魔鬼交易員」謝爾文一手促成。 不過有英國報章仲幽「伯南克」一默，話美國提早減息，紓緩供樓人士負擔，真係要多謝晒謝爾文﹗

對於今次伯南克減息，市場認為「有好過無、早好過遲」。 如果係上星期仲好。 當然仍然有人不滿，呢個世界唔好有人可以滿足所有需求。好似前聯儲局理事「邁耶」就批評聯儲局進退失據，連一星期都唔等，提早減息。 其中一餉觸發點，除了是全球金融市場恐慌性拋售外，更大問題係，部分債券發行商評級可能被調低。 萬一佢地出事，問題更大。 調查顯示，有超過七成意見預期，下星期議息會議，會再減息半厘。 英美傳媒社論都批評伯南克，英國金融時報社論話，放低通脹，大幅減息可以理解。但呢個時間行動，感覺係聯儲局自我恐慌，同無法控制貨幣政策。 作為經濟體系的醫生，聯儲局能力有待測試，華爾街日報亦指，聯儲局處理今次危機值得商確。伯南克能力有待磨練，原因係伯南克之前公開講話，俾市場印象係提早減息，到頭來會造成市場恐慌。 報道指，伯南克在星期一「馬丁路德金」假期如常返工，當日佢見到金融市場恐慌，心知不妙，隨即諮詢副主席「科恩」、同紐約聯邦儲備銀行行長意見，之後召開視象會議決定減息，不過理事「米什金」就走左滑雪無出席。 要留意今次聯儲局突然減息，對其他央行會做成很大干撓。日本央行唔好講，大摩已經估緊下次利率調整係向下不是向上，加拿大央行即日就要跟著減，而歐洲央行本來要加息，而家都要可能減。 更大影響可能是我國，美國減息後，中美利率首次出現「倒掛」，一年期人仔存款比起美息仲要高64點子，如果人行再加息，勢必引起更多熱錢流入中國，變成進退兩難! 摩根士丹利指估計，中央官員稍後會改口風，強調受外圍不明朗影響，令經濟增長可以軟著陸，但唔會高調宣布放慢宏調。

1984年以來首次減息四分三厘。 911事件以來首次在聯儲局常規會議外減息。 我們早上訪問嘉賓丁世民，他當時「實牙實齒」說今晚聯儲局就會減息半厘，下星期再減息半厘，當時仍半信半疑。到下午股市大跌二千幾點時，當然完全已經拋諸腦後…… 點知真係成真，今個星期風雲人物，非simon莫屬! 說回減息，批評係一致話反應慢，不過減息四分三厘又令人喜出望外，連Jim Cramer都忍不住要讚伯南克。 財長保爾森表示，聯儲局減息係具建設性，能夠回應市場需要，有助重建市場信心。 擔心經濟衰退，市場對前景睇法一日比一日悲觀，信心跌至低點。 有分析指，伯南克係無得揀，原因係２年期國庫券息率走勢，已經跌至零四年最低水平，反映市場預期經濟一定會處於衰退。 亦無得等，下星期公開市場委員會開會前要盡快提早減息穩定市場信心。 華爾街日報亦指，全球股市恐慌性拋售，俾聯儲局好大壓力。 無論如何，聯儲局肯積極減息，對剛開始衰退的消費市道，將是最大強心針。當然，如果肯早兩日減息，港股呢幾日大概都唔使咁驚濤駭浪! ################################# 提多一句: 今日公布通脹率是3.8% 目前匯豐優惠利率係6.75% 明日減息四分三厘後，優惠利率去到六厘。 按揭利率目前是P-3%= 3% 按揭實質利率:3.8%-3%= -0.8% 哇，仲唔買樓????

「Democracy is absurd, but all other systems are worse.」 Winston Churchill 看到施老闆一連兩日說到Karl Popper民主的貧困，不妨談談民主的悖論。 民主到底是否由大多數人的統治？假如選出來的人，變成了「多數人的暴政」，以犧牲少數人利益來達到統制目的，像二次大戰的德國、今天的非洲國家好勞旺達、肯尼亞，以至拉丁美洲的局面，又是否構成民主悖論？ 跟據Karl Popper講法，選舉制度只是民主精神一小部分。民主的定義應是一種「由被統治者」，能有效地制衡「在位者」的政治制度。以他的「偽證法」(falsifiability) 作為引伸，就是民主制度並非最理想/ 完美的政制，但就證實是一個可以避免以暴力方式、就能令權力和平轉移的體制。 Karl Popper的科學理論與他對政治的觀點是一致: 「烏托邦」式的政治制度，純綷是靠良好願望，最終目標是無法介定成為具體的政策、而只能是以形而上的字眼:平等、自由、公平，最終目標是打著的這類幌子，壟斷整個社會的資源。 應該由誰來統治，這個問題在Karl Popper就已經是個錯誤的提法，因為它不可避免的走向極權主義。 解決這個問題的根本在於探討權利制衡的方式，應該以合理溫和的手段來達到普遍的目的。開放社會應該是一項基於民主制度的漸進社會工程。 所以Karl Popper主張漸進式的政制改革，並以兩個原則為前提：一是以排除人民痛苦優先，而不是增加快樂。在所有的政治理想中，試圖讓人們快樂是最危險的一種。二是溫和的改良，而不是暴力的革命。這就要求社會改良政策需要具體的，有針對性的目標，而不是空談理想。 我們香港的民主派可能一直習慣了充當反對派的角色，以至很多議題上都演變成為反對而反對，對當權者的政策只一味批評，而給市民的印象就正好是「空談理想」。 在2012普選的問題上，人大的決定雖然會令「大部分」的香港人失望，不過今天我們都要學懂政治現實: 到底是花更多時間在難以推翻的2017雙普選問題上、抑或在未來的數年間，更努力在現有空間上去改善/ 爭取我們的選舉制度？好像蔡子強所說，2012年的立法會選舉雖然有繼續規定有功能組別存在，但這個功能組別能不能擴大基礎、做到更多人可以參與？畢竟比例代表制也是現在選舉的一種方式。 泛民實現在急需的，是真真正正形成一套自己的管治方案：由公...

星期一有無睇金球獎頒獎禮？ 金球獎1964年以來，第一次取消紅地毯同頒獎禮，連攞到最佳男主角獎Johnny DepP都無到。 公布結果個刻，台上數埋亦唔夠十個人。 搞成咁，全因為荷埋活演員工會，聲援罷工編劇。 成件事要數番七年前，０１年編劇同製作人協會、訂定左當時新興DVD收入分帳方法，合約去年屆滿，編劇要同電視台製作人談判，決定收入分配。 不過談判最終決裂，電影電視編劇工會DGA由十一月五日開始罷工，參與人數估計達一萬二千人。 研究機構已經估計，經過三個月長罷工後，整個行業已經損失左十四億美元。 DGA要求提高DVD分紅比例，原因係今時今日觀眾肯入戲院比例非常少，估計今年美國票房只有９６億美元，相對於成個ＤＶＤ市場，銷售就高達２３４億美元，DGA因此要求分紅比例由０點３６％大幅提高至２點５％。 不過電影電視製作人聯盟就反對編劇公會「加人工」建議，藉口係票房無保證，舊年十套上映電影，就有四套蝕錢喎！ 喬布斯 其實成個談判核心唔單止在DVD，DGA同蘋果喬布斯一樣，睇到未來電影市場已經由DVD轉投到新媒體，包括互聯網同手機上。 DGA主席阿普特已經講到明啦:「THE INTERNET IS NOT FREE!」 以蘋果最新推出嘅網上租片服務，減價到每輯三美元唔使，呢個市場肯定係金蛋。 而經過近三個月DGA罷工後，已經開始改變觀眾同廣告商嘅行為，由傳統大螢幕、轉到去新媒體。 有媒體公司估計，如果今次罷工延至三月，咁三大電視網絡收視率會跌至百分之八，如果延遲到五月，更會大跌一成三，而流失廣告、當然係流失去網上廣告市場。 而家關心係一個月後舉行嘅奧斯卡頒獎禮，到底會唔會受影響？ 講緊是總值八千萬美元的廣告市場，每三十秒廣告就要一百七十萬，無左點算？

航運股日日跌，原因係反映航運業周期的「波羅的海乾散貨指數」未見底。 以為星期三單日跌百分之五點七、已經創紀錄最大跌幅，點知星期四再跌多百分之六點四，創多一個跌幅紀錄。 由舊年十一月高位11000點跌落嚟、兩個月唔見左四千五百點，跌幅四成一。 指數連跌八日，已經引起全球關注，不過拆開睇，並非所有指數都跌，今年以來跌得最多，是一個叫BCI海岬型指數，今年就已經跌左近三成，十一月高位計、兩個月更暴跌五成四。 到底咩叫做海岬型指數？其實就係指運載十七萬噸以上、主要運載「鐵礦石」嘅巨型貨船，十條航線之中，就以來往澳洲同中國嘅「澳洲寶山」航線跌幅最驚人。 對於呢個發現，其實一啲唔意外，原因係鐵礦石廠同鋼廠、特別係內地「寶鋼」新年度合約價格談判破裂。 澳洲最大鐵礦石公司「BHP」為左向中國施壓，舊年十二月已經開始減少付運，希望推高鐵礦價格，可以在「談判桌」上爭取更有利籌碼。 仲會跌幾多？目前關鍵是鐵礦石廠同「寶鋼」幾時重新進行談判。 由好處睇，海岬型貨船嘅供應已經大減，而另一個不明朗因素係，BHP 同第二大鐵礦公司RIO TINTO股權爭奪戰，亦可能影響談判結果。

星期三股市單日跌左近一千四百點。 歷來第三大指數跌幅。 滙豐當日收市跌至１１５蚊水平，離孫柏文目標只差兩個半，呢鋪可算是「終極平反」! 當日我們訪問了一個買了三十年滙豐的投資者勞先生。 他當日買的時候，仲係叫香港上海匯豐銀行。 勞先生話當年以持有匯豐為榮，但過去三年，睇著揸左幾十年嘅愛股一日差過一日，幾乎變成唔敢話比人聽自己買過滙豐。 昨日的低位，變成今日高位。日日如是，但對呢隻獅子仍有情意結。 連續跑輸三年，不過單看派息，點都夠穩陣。 美國問題係大，評估最差情況，分析員傾向將匯豐同花旗比。 同樣面對撇帳問題，但以高盛預測數字比較，匯豐市盈率仍然較花旗低，最重要係資本充足比率超過百分之９。 睇番花旗，兩度獲注資、幾乎搵過晒所有人，先得８倍。 有分析計過，就算匯豐將旗下３５０億美金結構投資工具全數撇帳，資本充足比率都有百分之７多的。 即使美國業務真係「零」，歐洲業務唔計，單係香港同亞太業務每股仍然值近９５港元。 做成滙豐大跌、除左係外圍唔就，高盛羅慕斯更成為「黑手」! 報告分三日出，先估要撇帳百三億美元，確認沽出名單，同日間行仲叫人買三個期PUT輪。 當日股價跌超過兩蚊。 星期３，就以研究揣測係咪減派息為題發表報告，適逄全球股災，匯豐再跌超過５元。 兩分報告令匯豐跌，左８個４。 羅慕斯話，滙豐最好為審慎起見，暫時停止近年每年有１成１每股派息增長政策，「忠告」匯豐將派息水平回復到０６年水平。 回想一年前里昂首次出報告，當時「單邊」獨沽滙豐，看１１５元，當時成個市場完全無知音，個個當佢傻。 豈料一年後預測成真，分析員自己都無「自吹自擂」，這樣才更叫人尊重。

舊年十二月The Long Tails作者 CHRIS ANDERSON由Amsterdam飛去以色列，之後再飛去內地，他用緊的iphone就在中國途中，突然被AT&T CUT斷服務。點解？因為佢收到一張２１００美元的帳單！ 當然唔係因為唔記得比錢，原來iphone內置有一個軟件，當電話變成漫遊時，會每十五分鐘就會自動更新一次email! AT&T當然有提出過警告，但最不幸係CHRIS ANDERSON看到這個「你的用量過高，請聯絡我們的客戶服務」的短訊時，根本對所謂「高用量」一些慨念也沒有，亦沒有想過說的是二千多美元的收費! 「長尾」ANDERSON的例子肯定不是個別(佢就話自己就是地球上最後一個知道的人!)，亦反映蘋果點解咁堅持要將iphone結合網絡商，因為一個高用量的電訊收費先係真正「霸業」!(也解釋了寧願拉倒、也不賣中國移動帳。) 星期二的Macworld，Steve Jobs雖無帶來新的iphone，不過就提出左幾個相關有趣的數字：平均每日售出二萬部iphone/ iphone佔左美國第三季smartphone近兩成市佔率，雖然仲係低過ＲＩＭ一半，不過加加埋埋已經多過Palm, Motorola 同 Nokia的市場分額，看來iphone仍有很大增長空間。 至於新星Macbook Air，雖然外界有讚有彈，不過同以往產品一樣，都有一個革命性安排。 至少看Steve Jobs由一個紙製公文袋中、取出Macbook Air時，就令我讚嘆不已! 看看SPEC: 重量只有三磅，四分三吋厚，號稱最球最薄LAPTOP，支援 Multi-touch pad ，也就是說像iphone一樣，可以用手指在面板放大縮少，同時亦支援無線WIFI-802.11n。 Macbook Air不內置光碟機，內置硬碟亦只有８０Ｇ，反而選上了６４Ｇ的flash hard disk。可能是Steve Jobs預視了未來notebook的新趨勢: 與七年前mac book 放棄floppy 時一樣，他看見中的是流動/ 網上硬碟。 Google及微軟最近都不約而同，積極研發網上硬碟市場(GMail Drive/ Hotmail Roam Drive)，反映隨著網絡傳送速度提高，大家都習慣將檔案放到網絡上，令傳統硬碟需求下降。 今次Macbook Air響起最大警鐘的、可能不是其他...

到底一個中央銀行家退休後，仲有幾大誠信？ 退任兩年的格林斯潘，傳將出任對沖基金公司PAULSON & CO.的顧問，是退休後的第三分顧問合約。 格林斯潘話，每個行業、佢只會出任一間公司顧問，而佢揀的公司，都可以在市況波動中賺到錢。 PAULSON & CO.屬下一個對沖基金，去年就因為準確預測樓市大跌，沽出次按相關資產、令資產增加近六倍。 至於前兩間，就包括德意志(銀行)同債券大王「格羅斯」PIMCO(資產管理公司)，其中格羅斯亦因為舊年睇中美國企業債券將大跌，轉而持有國庫券而大賺個「滿堂紅」。 格林斯潘一方面不斷唱淡，指近期數據可以反映美國正步向、甚至已經陷入經濟衰退，同時又加入睇淡的大行，難免令人有「瓜田之嫌」。到底是格老的言論還有影響力，還是利之所在......很難令人釋懷。 轉睇伯南克又點？事隔第一次減息已經近半年，伯南克近日亦一改有關評論息口走勢「言之無物」作風，原來是聯儲局內部研究後，決定更改公關策略所致，原因是聯儲局雖然唔同意外界批評佢地「唔貼市」，但承認，當市場處於波動之際，有責任將政策取向講得清楚。 以近日利率期貨同股市表現，金融市場似大有逼聯儲局就範傾向，甚至傳出減息四分三厘機會率高達五成。（歷史上其實聯儲局甚少以四分三厘作為調整基準，而對上一次加減息去到一厘，已經是八十年代的事。） 睇埋大行表現就更令人疑惑：美林，高盛，以至摩根士丹利齊齊唱淡，表明美國經濟步入衰退，有經濟師更話，不排除聯邦基金利率會由現時４厘２５，到年底減到得１厘半！而今日高盛一分叫人買滙豐三個月認沽證的報告，更觸發港股大跌市。到底邊個迫邊個，真係「司馬昭之心」！

印度Tata以超低價推出5座位汽車，引發其他車廠效法，掀起生產廉價車熱潮。 德國Volkswagen、日本Toyota、Honda以及意大利Fiat汽車都表示，會製造廉價車，Tata競爭對手Bajaj還指，計劃同日產及雷諾合作，推出售價3000美元的汽車。 我們看看Tata Nano，是4門5座位汽車，車身輕盈，以特製塑膠及現代黏貼物料製成。外型設計新穎。車的624cc引擎裝在尾部，沒有自動波、沒有冷氣和沒有收音機，車窗只能用人手攪動，車頭擋風玻璃僅設一個水撥，乘客座位旁只有一塊倒後鏡。當然我們相信車廠開發平價車是針對第三世界國家，當地人只視汽車為代步工具。 另一方面，從環保概念來看，去年諾貝爾和平獎得主、聯合國氣候變化委員會主席帕喬里（Rajendra Pachauri）表示，對Tata Nano的出產，感覺像「發噩夢」。 雖然Tata Nano已通過印度及歐洲的排放標準，公司說，平均每走20公里需1公升汽油，所產生的污染不比電單車多，是帶來最少污染的汽車。 不過，大家都會知道，無論如何，越多汽車行走在街上， 一定造成交通更擠塞，造成環境及噪音污染，以及增加燃油消費。汽車多了，廢氣排放自然增加，加速全球暖化 。 在印度新德里科學及環境中心工作人員就說過﹕汽車成本如此大幅下降，怎能達至安全及排放標準？不論從環保還是交通擠塞角度來看，我們都不支持生產低成本汽車。 說說Tata家族，在印度赫赫有名，被譽為富可抵國，印度第一商業家族，家族十九世紀開業，到現今已有二百年曆史，截至2006年底，Tata家族旗下有96家公司，分布電信，航空，鋼鐵等能源，汽車，建築工程务、化工等七大行業，總員工逾25萬人，當地就曾有人指：Tata家族興衰，直接影響印度失業率高低。 印度Tata，留意明晚MONEY CAFE!

三十蚊杯咖啡係咪好貴？ 單計一杯咖啡就梗係貴，不過計埋環境，大梳化、又有WIFI可以上下網，我話STARBUCKS呢其實三十蚊抵比。 不過美國人似乎都開始唔受落呢套，STARBUCKS舊年股價累積跌左四成二，係納斯達克最差嘅一隻股分，搞到退左休八年嘅創辦人「SCHULTZ」舒爾茨，都要重新出山，做番CEO。 舒爾茨其實就唔係真正創辦星巴克嘅人，不過佢喺87年時候買左星巴克，之後佢一手令星巴克由接手時候嘅十五間分店，發展成全球萬三間分店，有統計計算過，而家星巴克仲係以每日開多五間分店速度，進一步擴大規模。 不過呢個都係正正犯左市場學入面、過分擴張嘅老毛病，唔少星巴克分店，都變成難以控制質素，過去星巴克打正旗號的「CUSTOMER EXPERIENCE」，到今日都難以維持。 其實有部分問題都係「非戰之罪」，因為過去一年食品成本急升，令到星巴克經營成本大漲，過去幾個月喺美國已經兩度加價。 如果喺經濟好嘅時候都無咩問題，但而家美國經濟已經出現衰退，咖啡呢啲非必需品，自然成為首先CUT BUDGET對象。 就算真係要飲、佢地都寧願到DONUT連鎖店好像係DUNKIN DONUTS飲、至少平四分之一。 講到競爭，唔可以唔提麥當奴。 舒爾茨曾經講過、如果有人將星巴克同麥當奴，係會令佢相當「痛苦」，因為佢認為星巴克賣嘅係「浪漫同埋新奇」，言下之意，係睇唔起麥當奴快餐店沖出來的咖啡。 但實情係、麥當奴令「舒爾茨」認真「痛苦」先真! 今期經濟學人就講到，麥當奴已經計劃今年內、在全美一萬三千間分店，推出「coffee bar」多種意大利式咖啡，無論LATTE、cappuccinos、以至FLAT WHITE，都會加入到MENU入面，是麥當奴有史以來最大一次換「菜單」行動。 有美國消費調查已經指，麥當奴咖啡口味，評分已經同星巴克睇齊! 其實舒爾茨都唔係無睇到問題，早在去年二月，他已經講過擔心星巴克擴張過快，令到星巴克咖啡過分「商品化」。 好似過去星巴克會用意大利名牌EXPRESSO咖啡機沖咖啡，但最近就換左由磨豆、到打泡、以至換粉都是全自動咖啡機。 如果識得飲咖啡嘅人都知，呢啲咖啡邊好飲! 股價論英雄，其實過去一年，星巴克愈跌愈有，相反麥當奴就升左三成一。 今次舒爾茨重新掌管公司，初步睇市場反應正面、因為消息傳出後、STARBUCKS單日曾經升過百分之八，至於最終係咪可以重收拾殘局，就真係...

上星期看完一份報告，說內地石油需求，好想跟大家分享，就是滙豐證券認為，即使奧運年完結，中國石油需求仍然強勁。 報告說，隨著零八年奧運，內地進入石油需求高峰期，根據其他城市紀錄，承辦當年石油需求增加百分之六至八，同時一般估計只會造成一次性影響。不過，滙豐證券認為，內地經濟結構改變，工業活動同城市化，會令需求持續，情況就好似六四年日本，八八年南韓，這兩個地方，在奧運後六年，石油需求累積增幅高達一倍，並提到當時石油消費增長平相等經濟增長的一點五至二倍。 這些統計相當驚人，亦令我起溫總經曾說過要解決內地油荒和價格要跟國際接軌的問題，若需求真的持續強勁，又要避免經濟過熱，這兩問題真的解決得來。 油價跟國際接軌，可減低不必要的浪費及需求，但中央又要面對通脹壓力。 「有錢買不到油」是經常在內地朋友們聽到的，不過近期聽到有點改善的跡象，由於大量進口柴油，增加庫存，聽說二月開始，中國可能暫停進口柴油，但實際油荒問題，仍然未完全解決。 有學者說過，要解決油價對經濟嘅拖累，中央需理順價格機制以及打破壟斷。 但我想當務之急，其中一問題是內地沒有基礎數據統計及發布，權威的詳細統計，月度公布，了解供求變化，才有解決的共同基準。

在今個星期舉行的CES展上，焦點除了放在「蓋茨」的退休生活外，仲引人關注的是SONY 的 BLU-RAY及東芝的HD DVD，終於分出高下。 一直支持HD DVD陣營的華納，突然宣布支持新力嘅BLU-RAY陣營。而東芝原本在CES預備舉行的HD DVD連串電子展推廣活動，亦全數除消。 計埋華納，BLU-RAY喺高清光碟嘅市場佔有率，已經擴大到七成。有分析員用「執包袱」嚟形容HD DVD陣營嘅前途。 其實今次BLU-RAY及HD DVD之爭、頗有數十年前BETA及 VHS之爭的縮影。 七十年代，SONY 斥巨資開發了BETA錄影帶制式、無論質素及循環再用都有超水準表現，不過價錢一直高企，最終輸給了遲開發的VHS: 雖然質素相差很遠，但對方一開始就平價招徠，結果BETA 今時今日只能留給電視台用。 相同情況在今天一樣發生，HD DVD一開始就技術性領先，無論是容量、以至縮放至手提裝置上，都比BLU RAY優勝。 以最近發行的「戰狼三百」為例，HD DVD在內容上有更多額外功能及其他內容。不過由於新力早將BLU RAY放在PS3上，因此亦贏了東芝的先機，從股價上亦絕對可以反映。 而家焦點就放在旗下遊戲機X-BOX、一直採用HD DVD制式嘅微軟，到底會唔會改投 BLU-RAY陣營。 其實微軟喺舊年底推出X-BOX高清版本時，已經將HD-DVD採納為外置式設計，可能微軟亦早作兩手準備，避免將所有蛋放在一個籃上。 #################### 說到高清，近日排山倒海的宣傳攻勢，有點令人感到唔換高清就非常out。 不過傳聞今日的不少數碼電視解碼器，質素仍然不穩定，有很多雪花，消費者真的要多作比較，不要單信一兩個廣告效應。 對於收費電視來說，老實說我們自己亦感受到不少壓力，特別是全世界幾季首創出一個免費收費電視台，稍一不慎就會對兩間收費電視台做成好大打擊，唯有繼續努力。 說到有線幾時有高清，路邊社透露，已經物色了新型的機頂盒，既可放盜，又配合技術需要，唔知年底有無機會.....

施老闆分享了對民主的觀點，想不到與我們的看法也有不少不謀而合(很老實說，最初以為施老闆會較保守)，因此即使再冒被指摘的風險，也要再談一談(是，係談多幾談)。 施生有一個很有啟發性的睇法，認為民主制度的發展，與個人經濟自由及私有產權興起，有不可劃分的關係。 唔好提原始社會，由士族制度(貴族制度)興起，個人的利益一直歸於整個士族內，族長(貴族)的利益，必然高於個人利益，個人是整體的一部分，為左令個人可以放下利益，因此長期鼓吹所謂利他主義，將個人「壓縮」至最細少。 當工業革命在西方興起後，個人的生產力開始提升，個人不用再依賴組織生存，可以擺脫團體，而私有產權的慨念開始出現: 「要想辦法保障自己賺回來的一切!」 為了反對領袖有權再分配/ 充公自己的資產，個體開始要求分享權力，當愈來愈多人有這個優勢時，民主選舉制度就孕育出來。 因此，美國最先擁有投票權的人，不單單是白人，而是「Man with property」。 當然，民主的制度在很多地方也失效: 拉丁美洲、非洲、甚至台灣；而本港雖然無民主選舉，卻像西方國家一樣充分保障私有產權、甚至號稱是全球最自由的資本主義經濟體系，到底當中有幾多玄機？讓我們再分開多兩個星期探討。

近日看了後多報告談地產市道，好想同大家分享一下。 最新美林預計，樓價會持續上升到零九年，原因是房屋出現結構性短缺，加上周期性需求增加，美林預計，由去年十一月到零九年，樓價累積升幅將有五成，其他大行報告都普遍看好今年樓市。 我們分析下，實情看來，樓市確要升溫，因負利率年代，根據花旗統計，置業負擔能力亦創下二十二年新高。 另一方面，施永青都看好樓市，並提出不應將經濟增長數字同樓價升幅掛勾，我也是認同的。 但另一邊箱，近期聽聞有某代理老闆級人馬，向員工說，要努力就努力多數月，數月後必跌，他的理據是外圍經濟差，次按解決時間無期，內地經濟在奧運後會逆轉，還說道其實零三年到現在，樓市已慢慢復蘇，叫做已經升了多年。

近日寫得多喬治布殊，先發現真的有不少人對他心存反感。 本地的不說，就連一向持平的經濟學人，也不忘在新一期零八年號中，揶揄布殊一番。 其實而家離布殊離開白宮時間唔夠一年，到底佢仲會有咩貢獻。經濟學人就話，應該就無。 呢位被認為係一九二一年、「威爾森」總統之後最唔受歡迎的美國總統(有睇「貨幣戰爭」應該知，就係個位被諷刺為銀行家操控、成立聯儲局個位)，而最新調查就顯示，美國選民而家最關注的、已經不再是反恐或者係伊拉克問題，而是美國經濟。 分析員已經估計，美國經濟在去年第四季、會由之前百分之四點九，回落至只有百分之一。 亦正因為今年是大選年、無論民主定共和黨都唔希望經濟會出現衰退，而喬治布殊亦講到明、正研究用財政政策刺激經濟，預計方案幾星期在UNION OF STATE後公布。 正是這種對現狀不滿的心態、渴望求變的心態，就造了選民選出民主黨總統參選人「奧巴馬」。 看他在「艾奧瓦州」「黨團會議」中，就贏得精彩。 「希拉里」原本被視為民主黨必然總統侯選人，佢同「奧馬巴」正代表「懷念過去光輝」，同「為未來而戰」兩派之爭。 「克林頓」無疑係「希拉里」最大本錢，但經過呢８年，經濟可能進入衰退，出兵伊拉克。亦令一向「念舊」的美國人改變想法。 可以說喬治布殊做左民主黨首席助選團團長，「奧巴馬」到目前為止，成功利用佢在政壇新手，可以帶俾美國人全新轉變策略，暫時令民主黨帶頭。 有選民形容，「奧巴馬」眼中見到誠懇，反而「希拉里」成個機器咁，好似「老馬」。 作為新仔「奧馬巴」話，要制造神話，策略係增值，唔搞分裂。 奧巴馬１９６２年夏威夷出世。細個父母分開，跟「媽咪」去過印尼，又經常逃學，大麻，可卡因佢通通試過，反而令後生一代更有親切感，至少不是高高在上。 之後讀法律，成為「哈佛法律評論」首位黑人社長。９６年開始做「伊利諾伊州」參議員，新聞周刊０５年選佢做美國最值得重視政治家。 至於他政綱表明立即撤兵伊拉克，同放寬移民政策。對於最棘手次按問題，佢建議立法，規管濫批按揭。 至於中國問題，奧巴馬亦較共和黨「哈克比」指中國操控貨幣立場靈活得多，強調會用貿易談判，解決兩國商貿問題，同繼續向中國施壓將人民幣升值。 預言家「韋恩」今年已批出，奧巴馬會入主白宮，我們在歡送布殊之餘，都要對這位新紅人多多認識先得!

到底全球有無能源危機？ 在１９５３年，美國地質學家哈伯特King Hubbert預言，美國石油出產將於７０年代初達到頂峰，之後產量會一直下降。當時哈伯特幾乎被視為瘋子，但是在１７年後，真的爆發了能源危機，哈伯特預見的情況真的發生了。從此以後，石油專家將這種情形叫做哈伯特頂點Hubbert's peak或Hubbert's curve。 跟據Hubbert's curve預測，石油在二千年達到每日生產三千四百萬桶後就會見頂。當然，今時今日的產量比起這個數字仲要多一倍，而且仲係每日上升中。 其實如果單計美國及鄰近海域的產量，哈伯特可能是對的。但是在中東、中國以至俄羅斯等國家進行大量勘探後，很多油田仍然有很大儲量，而新技術例如發挖油沙(OIL SAND)，更是五十年前想也未想過! 事實上由八十年以來，儲油量對產量的比率、多年都未有顯注變化。 如果能源危機不成立(至少短期內)，到底係咩因素推高油價，在08年第一個交易日，就一口氣突破一百美元大關？ 「尼日利亞」發生暴力事件、抑或美國原油庫存量，都唔係新鮮事。 事實上，期油承到歷史高位，全靠來自同一間小型機構兩個交易員一手促成。 當油價仲處於99.53美元一桶水平，一間名為ABS的小型期貨交易商嘅交易員，以最低一手合約成本(即一千桶石油)，就開出一百美元叫價，結果由佢同事，承番! 好快油價落番99.4美元水平，ABS交易員即時蝕６百美金。 換言之，呢600美金就創造到歷史。（真係抵到爛！） １００美元油價終於成為現實，對真實生活有咩影響？ 傳統經濟理論話，油價升，自然導致經濟疲弱，石油需求亦會減少，油價最終又會自然調節回落番。 不過，即使歐美經濟好大機會陷入衰退，但來自印度同中國嘅需求仍然強勁，足以支持油價長升長有。 不過高油價都有代價，就係增加企業開支，剛公布的１２月製造業指數、跌穿五十點水平，就是反映製造業收縮。 華爾街日報做嘅調查顯示，有三分之二嘅美國人、已經認為目前、或者係今年內，美國經濟就會衰退。 睇下商品大王羅傑斯點講。 佢話，無需要因為油價升到一百美元大關，就急於套現。 因為無論石油，定其他商品價格，未來十至十五年仲係大牛市！ 信不信由你！

新年伊始，講下非洲肯利亞。 非州係今年另一個黑馬市場，有基金已經提出會係零八年新星。 事實上，肯利亞一直被認為是非洲最安全的旅遊點、每年有過百萬歐美旅客到訪，是滑浪及狩獵者的天堂。 殊不知，同一個國家，其實都是一個地獄。 在星期二(一月一日)的早上，在肯利亞一間教堂，有大約二千人在避難，大清晨就有二千個暴徒去到教堂放火，結果有幾十人被燒死，大部分都是同新當選總統齊貝吉，同屬基庫尤族人。 呢次涉及兩個種族衝突，分別是總統齊貝吉同反對派總統候選人奧廷加支持者，連日暴力事件，起因是總統選舉中勝出的齊貝吉、被指舞弊，而佢所屬全國最大基庫尤族，亦被指利用政治同商業上優勢，損害其他族裔利益。 有目擊者，將當地暴力事件，與九四年盧旺達種族大屠殺比較，當年就導致五十萬人死亡。 同樣的是，兩個國家均是有多個族裔共處。肯尼亞有三千七百萬人口，是全非洲增長最大經濟體系之一，總統齊貝吉所屬基庫尤族，無論政治或商業上，一直處於領導地位。 至於反對派領袖奧廷加的盧奧族，亦佔全國一成三人口。 雖然基庫尤族一直願意同其他族裔分享經濟成果，但政府的腐敗貪污，早就引起其他種族不滿。 對於今次肯利亞爆發動亂、已經有矛頭指向IMF同世界銀行，指三年他們都無視政府貪污問題，不斷進行援助，結果未有改善貧窮，十七年前有四成八人口活在貧窮線下；今天，仍然有五成半人口每日生活費是一美元。 最近看過一篇文章，就是指雖然歐美多國近年不斷對非州國家進行援助，但歷年下來，影響都不及油價去年屢創新高，加重當地人生活負擔。 我們曾寫過，量子基金創辦人索羅斯在「Escaping the Resource Curse」中，提出「 能源咀咒 」，其實與今天肯利亞局面一樣，都是基於:「asymmetric information」以及「asymmetric agency」。 不對稱代理其實就是指代理國家權力的政府官員、他們以及壟斷龐大援助利益，而引發出貪污、行賄、出賣國家利益等問題，這對非洲這些缺乏效率的政府尤其重要。世銀等援助，最終只是落入官員袋中。 為何國際組織願意付出咁大代價進行救援，說穿了又是同巴基斯坦一樣，美國及英國與肯利亞有軍事協議，對喬治布殊國際反恐，有舉足輕重地位。 肯利亞雖然不像剛果或蘇丹有龐大石油資源，但它本身就是全球最大BLACK TEA及咖啡出口國，同樣咀咒，一樣在人民身上發生。

回顧零七，次按、宏調、直通車統統都對我地金融市場有關鍵影響。 踏入零八年，美國經濟係咪會衰退，似乎係最多人關心的話題。 經濟學人分析，銀行將會是次按發展最大的關鍵。一旦銀行因為驚資金出現周轉問題而減少貸款，環球經濟分分鐘會走上九十年代日本經濟泡沬爆破的舊路． 不過當全世界都聚焦在環球股市出現調整時，除非真的有銀行破產或倒閉，否則資金仍然需要找出路:債券息率太低、企業債券風險比股票更大、商品市場又已經升至高位。 由八月中開始減息開始，對經濟的影響要十二至十八個月先會先全面浮現，即是說經濟明年中，應該開始有所反映，而本地方面，減息及高通脹下推動更多資金擁入樓市，亦會是零八年一大課題． 零七年我們學識了咩叫CDO、SIV，到左零八年，經濟學人提出我們要學多一個名稱「CDS」credit default swaps，即係「信用違約交易」，由銀行一方將企業可能違約風險轉嫁給買家，最近連巴菲特亦投身債券保險，肯定呢行將會是今年新的市場焦點。 另一個重要日子將是十一月四日，當日喬治布殊將會下台。 而今次美國總統、亦將會是１９５２年以來，首次無在任總統或者副總統參與的選舉。 如果歷史可以重覆，２００８年美股就不需要令人憂慮，因為由１９２６年以來美國總統大選年，股市平均都有百分之８點８的增長． 不過當中都然有例外，最近一次要數二千年科網熱潮爆破，當年是誰人當選總統，都唔使多提，正係喬治布殊本人． 目前美國企業市盈率是四十年最高水平，當然樓市崩潰可能會令市盈率回復至平均水平．但連續減息的效應將會浮現，套用巴菲特的名言，在潮退之時，大家先會知道是誰無著衣服在祼泳。