財經拆局

「避險」成為左五月環球股市既主題。 歐債危機、新興市場增長放緩、呢啲理由都聽到耳熟能詳。 月頭叫買貨，月尾話認錯。股神，劉央，巴頓碧斯，高盛，摩通，全部出事! 一個月前，呼籲五月唔好沽貨既摩根大通，都承認建議係錯誤。 咁展望六月、係咪好似摩通咁講、係反彈「Jump」，定係繼續跌落無底深潭變成「Junk」？ 股市奄奄一息，接近面臨被人道毀滅階段。 呢個月，全球市值蒸發超過四萬億美元，港股跌一成有多，換嚟熊霸稱號。 自有股市以嚟，唔少名家，學者，窮一身精力，就為鑽研一套股市分析理論，但廿一世紀既今日，理論仍在，假設可能錯曬。因為呢幾年多得央行，政府鼎力救市，已經完全扭曲投資者係理性既基本假設。 經濟大師法瑪，將有效市場假設發揚光大。法瑪認為，既然市場有絕對性既信息流通，股價已經反映曬已知消息，技術分析絕對唔可以大派用場，而影響市況唯一因素，就係所謂既RANDOM WALK EFFECT，即係隨機漫步效應。 的確，目前市場符合法瑪既有效市場假說，因為消息完全均等，離離去去都係歐債問題或者增長放慢。 但隨機效應涉及既突如其來因素，由於又係歐洲，兩年拖得太長，市場對呢個突然其來因素，唔覺得突然之餘，更甚係要求愈嚟愈高。 七九年八月，美國商業周刊一期既封面主題係股市已死，近日呢個話題再引起討論。三十三年前，股市已死起因係高通脹，低增長。 三十三年後今日，係低息，債務，甚至乎涉及市場迷失。 過去三十年，八零至九零年，股市累積回報有兩成九，到九零至二千年，回報已經降至兩成四，近十年，就更加低。 當然，市唔會長期下跌，或者大型基金部署都可以參考。 全球最大資產管理基金貝萊德、就揀左喺五月底，向巴克萊用真金白銀十億美元，回購自己股分。 貝萊德總裁芬克話，正係呢股人人恐慌既氣氛，令佢確信，作為長線投資者，而家係買入時間。 股神巴菲特同樣喺五月增持自己系內股分，仲繼續用一貫語調，話睇好美國經濟。 未來影響股市、短線數最快係６月１７日希臘國會重選，不過更關鍵、係喺底前，到底聯儲局同歐央行會點應對疲弱既經濟? 好像惠理謝清海所言，其實只要希臘真係脫離歐元區，美、歐、日、英、甚至人民銀行都會作出更強力既政策應對。 大摩更以「四個離婚、無一個葬禮」，形容希臘即使喺最壞情況下脫離歐元區、央行反而落藥就愈重，最終大家都...

楊琨作為農行第一副行長，技術上排名第三。 四大行之中，最高層人物被帶走，自然又引起市場忐忑，為咩又有內銀高層出事? 從農行股價睇，市場已經認定係一宗負面消息。好簡單，對農行嚟講，一個負責貸款業務既高層出事，以農行近年眾多貸款量計，會唔會愈揭愈多呢？ 而對內銀行業嚟講，農行係咪個別事件咁簡單？ 眾所周知，內銀之中，農行盤數最爛，上市前由財政部協助解決不良資產，幾千億，技術上救左農行，製造賣點，但批不良貸款，同其他十年前獲註銷壞帳既內銀一樣，批數都係留喺資產負債表內，從未正式轉移。 內銀上市，股份制，又引入投資者，增資之餘，目的係一筆勾消，希望外界當幾大行，係全新面目示人，前事不計。 但楊琨此例一開，作為股改後最高層被查事件，投資者記憶又再勾起。 不期然，又會諗番王雪冰，劉金寶，張恩照，甚至金德琴等等。 楊琨點解出事？當然稍後會有更詳細版本，但財新網講得清楚，一位長期處理銀行業務既高層，受到既誘惑一定唔細。 楊琨算係老農行人，八三年加入，紅褲子出身，經佢手，有幾多問題，甚至有幾多貸款上犯罪，除左對佢自己有影響之外，對一直壞帳相對三大行較多既農行嚟講，打擊更大。 蔣超良作為董事長，行內話，佢比前任項俊波，更似一個銀行家，以交行成績絕對係市場受落。 但副手出事，被譽為明日之星既潘功勝亦可能官拜人行，蔣總點拆呢個局，考驗極高。 銀行分析員話，農行事件，肯定再令整體內銀扣分。講真，以往股本回報高，年年盈利高增長，市場可以善忘，但依家好景不再，未有解決過既不良貸款比率等問題，一定同你有計較。 內地改革，又話要打做國際金融機構，搞幾間高盛，大摩，呢的好易，比個名啫！ 但制度本身，改唔到官僚領導銀行，更大問題係佢地有貪既意慾。 舉個例，姜建清等，年薪一百萬左右，大部份要上繳，同國際銀行家拍埋，自己銀行市值全球最大，自己薪酬幾乎全球最低，呢種扭曲既心態，先至最容易出事!!!

市場過去幾年，慣做寄生蟲，有事國家救，有政策就會利好股市。 結果，中國疑似推出刺激經濟政策，又再令炒鬼，同一眾市場人士燃起希望。 上星期初以嚟，經發改委批核既基建機場項目，就達到114個。 以上星期三，涉及既三個鋼鐵項目規模最大，一日內批出既投資額加埋超過一千億。 以為靜俏俏出台，內地官方一直無統計新一輪刺激經濟既規模。 不過瑞信陶冬心水清，算一算整體金額涉及高達最多二萬億。 基建亮綠燈，家電有補貼，汽車又話舊換新。 貨幣政策釋出善意，短期拆借利率已經跌至兩厘半。一切似曾相識，難怪內地媒體將五月刺激運動，包裝成四萬億，２．０版本。 當然，當年四萬，依家就算減半，都係好消息。但經濟學上，其中一個最常用既定律叫CROWDING　OUT EFEECT。 簡單嚟講，任何政策都會受排擠效應影響，令潛在或原本預期應有既效用大減。 所以，呢頭先講完提防重複建設，果頭又一旦批出百幾項基建，中國又再走回頭路，難免令人關注。 百幾個項目，遲唔遲早唔早批，依家一次推晒出來，不其然會問，項目效益之餘，最重要係內地經濟其實係咪已經差到一個難以容忍情況，先至令當局急就章? 二萬億，唔等於當日四萬億。有分析提醒，今次二萬億係純粹時間上巧合，唔同上次係有預謀而來，事關二萬億基建額度，一早已經批出。 內地亦擔心外界既關注，比三年前少一點假大空，為既係唔想俾外界有四萬億．二點零版本錯覺。 但好明顯，每次有經濟擴張政策，對內地地方政府同部委嚟講，係爭取權力，加大話事權既最佳機會。 今日話審慎政策，難保明日個別部委或地方，喺部份刺激項目上去得更盡!! 無疑，有政策就有希望，回歸基本問題，係市況能否重演三年前，幾個月內升三，四成景象？ 其實唔需要解答呢個問題，單睇數據就知。 好似，當日Ｍ２有１６％，依家十四都唔夠。當日出口有近三成增長，依家一成都嫌高估。 當日企業盈利預測有兩成六增長，依家只有百分之十。新增貸款更無復當年勇。 所以，高興還高興，宜短不宜長！

琴日中環人仲喺度估緊、到底小超人可以喺長和系六大產業之外，可以殺出一條咩血路之際，估唔到咁快已經有左答案! 獲父親李嘉誠全力支持、電盈主席李澤楷有意收購，保險商ＩＮＧ嘅資產同亞洲壽險業務，相信佢係有金融行業低潮、以低價重建本身既金融王國。 ＩＮＧ有意放售亞洲壽險、同資產管理業務，總值達到７０億美元，小超就是喺正呢個時候「失驚無神」現身，很難說是巧合吧? 李澤楷唔係第一次染指保險業，早年就曾經透過盈科拓展，持有盈科保險，０７年以３５億美元賣俾富通。 前年，李澤楷再次涉足金融業，以「世紀筍價」2.7億美元，收購ＡＩＧ旗下嘅資產管理業務Pinebridge柏瑞投資，正正同今次收購ＩＮＧ亞洲壽險，喺區內業務有密切聯繫。 李澤楷既戰場，可能先啱啱再起步，市場更加關注嘅，係市值近萬億嘅李氏家族王國，日後會有咩變化。 上市王國由李澤鉅接掌，分析員話，客戶普遍無咩反應，因為預咗。反而由小超接掌，先係大意外。 金融時報攞番五、六年前兩篇、有關誠哥同小超嘅文章做背景。提到兩兄弟，報道形容精警，對於大哥，報道引述熟識李家嘅人話，VICTOR管數一流，但從來無聽過佢識講笑。 相反，細佬可以飲紅酒、講笑話!! 唔識講笑，即係嚴肅，嚴肅即係有威嚴，但聽到佢會係接掌李氏王國唯一人選，市場唔算受落。 但分析員話，要對大哥公平啲，事關長實同和黃已經建立特有既DNA，尤係其後者，精於一分一毫既交易，正正係大佬強項。 外界對VICTOR口碑唔算好。活在誠哥光環之下，又有邊個可以比超人更突出? 但唔好忘記，大佬九六年長建一手一腳，依家成為長和系併購旗艦，當年見內地基建回報每下愈況，閃身改投英國，如果講開拓基建業務嘅眼光，佢比米高嘉道理更加強。 環顧華資四大財團，彤叔已經隔代俾個孫，四叔銳意培養細仔。路透社一篇分析文章講得最清楚，誠哥選擇變相公開宣布分家安排，係佢比其他華資財團更聰明，因為透過直播，全港七百幾萬人，以至全世界見證。 所以佢話，兩個仔繼續有兄弟做，係真心說話!! 或者誠哥聰明之處、係李澤楷好似一個Dealmaker，可以南征北討、四處開拓新業務。 相反哥哥就只係喺父親嘅影子下經營，就算係分析員會議、八成既問題，都係由和黃董事總經理霍建寧應付，外界好難將佢、聯想成一個獨立個體。 真正嘅挑戰係幾年後，當李嘉誠同現年六十歲嘅霍建...

去年今日，首批通脹掛勾債券iBond認購出乎意外地差。 結果，認購的、人人有分，15萬人最多申購四十手都分足。 事後不少人大喊走寶，話錯失賺快錢機會。 但不要忘記、當日發行iBond時、恆指處２萬２至２萬３，當日隨意找「金手指」、回報都要比iBond吸引，當天主流評論都是指「無肉食」! 誠然，當日有分認購4208，一來是因為預期「通脹來了」，更重要原因是、既然政府只是向香港人出售，加上有回報保證(1厘息)，那作為納稅人沒有不抽之理! 結果，通脹真的來了、而且不像內地，根本無走過，iBond 上次派息就超過6%! 而且計埋債券升咗價，每手賺近７百蚊。渣到而家未夠一年，回報已經有近一成。 今次再發行iBond ，基本細節與上次一樣，唯一分別，係大家最關心嘅派息率。 第二批iBond首個派息日會係十二月廿四號，即係要睇嚟緊六至十一月嘅通脹率。 先睇今年頭四個月通脹率，由百分之6點1高位顯著回落。 政府估全年通脹率係百分之3點5，換言之即係話嚟6至11月通脹率平均係百分之３，比舊年第一批iBond、首次派息6點08厘計，回報少左一半。 但要注意，影響債價其實係通脹預期，預期一升一跌，都可能影響債券價格。 以我們政府的效率，其實都係有傾向低估通脹率，相信係要避免令市民覺得「生活迫人」。 雷教授都預測今年通脹率分分鐘會達4-5%。 雖然經濟前景的確轉差，但我們在此處都多次強調，經濟層面其實係有「滯脹」局面，所以今批IBOND仍然有吸引力，沒有不買的理由。

每次見傳媒都被問幾時退休，今次反而令佢老人家先沉默左半分鐘。 李嘉誠形容，自己唔係一個現代爸爸，個仔有咩唔對，一定會責駡佢地。 講真，又有邊個介意俾佢話？兩個仔，長和由大既話事，細仔李澤楷，爸爸就會全力支持佢發展事業。 點支持? 相信無野好得過一句"俾錢佢囉"!! 誠哥話，兩個仔滿意安排，在旁既李澤鉅，繼續一如既往嚴肅，至於細仔，誠哥代答，佢好滿意。 誠哥首次交待分家安排，同過去多年市場講長實大仔，和黃細仔有分別。 而誠哥早幾年亦提過，本港業務大仔負責，細仔國際業務。依家完全有出入，中環人話，其實只係一個最佳安排。 阿鉅同阿楷，性格大纜扯唔埋，兩個人負責搞集團，一定只有火藥，無火花。 既然，長和系已具基礎，李澤鉅管數出色，幫阿爸守著本業，而四出征討，由財技同創意無限小小超負責，配搭完美。 作為香港首富，外界一直認為李嘉誠同李澤楷既關係麻麻。好似喺０６年電盈賣盤，李澤楷寧願交易告吹，都唔想賣公司俾李嘉誠相關財團。 江湖傳聞，當日誠哥殺上花旗廣場找小小超，佢寧願避而不見! 不過今日誠哥話比大家聽，父子嗌交好平常，大家唔需要諗多左。 咁李嘉誠會分幾多錢俾李澤楷。佢話，"全力幫佢"，呢句已經係一張"Blank Cheque"!! 如果簡單計，大佬有咩？最簡單，長和系資產，已經代表大部份誠哥身家。 目前，誠哥長實攤佔市值有九百二十二億，和黃就有千五億港元。 由於長實持有和黃，將兩間加埋唔得，要將長實攤佔和黃部份既資產扣除、再加埋佢持有和黃既市值。 咁計，李澤鉅最少分到既資產，金額計有千八至二千億港元左右。同福布斯年初計算誠哥有二百二十億美元身家差唔多。 當然，誠哥名下其他資產有咩，無人知詳情。但從上面咁計，誠哥大大話話會以倍數計、俾番小小超而家身家外出玩鋪大。 我地保留啲、以李澤楷身家三百億計、兩倍即係大約六百億，六倍就係已經同大佬相近。 以誠哥話，佢已經傾緊收購，大家又會問，係的咩？ 無人會知。小小超無路捉。大家假設小小超喜歡新經濟或媒體項目既話，幾千億佢可以買部份蘋果股權，甚至入主FACEBOOK。甚至乎買間新聞集團。 雖然誠哥話唔會拈手娛樂媒體，不過呢個世界Never say Never! 何況新聞集團，除左有媒體，仲...

強力推介!

由期待變成失望。 三日跌一成八，FACEBOOK上市連續劇，似乎有排拖。 更多人問，佢地係咪一宗成功上市呢？ 從集資額，承銷團，以及協助股東套現三大方面衡量，絕對仲係。但成功既IPO唔代表公司本身夠砰。 備受指責已經由納斯達克，保薦人大摩，再擴大到FACEBOOK財務總監埃伯斯曼。 納達克達衰，係衰在首日系統出事，但只要證明首日受影響，按機制可以要求索償，加上系統問題賴故障，故障係意外，納斯達克其實問題最細。 至於大摩，定價過高，臨時加馬，再爆出招股截止前，修改推介報告，將盈利預測下調。 當然佢地只係向自己嘅機構投資者、同零售客戶通報，其他街外投資者並唔知情，呢點最終一定會被SEC 譴責下。 不過技術上，亦係容許，而且佢地係FACEBOOK更新資料，預期流動收益可能較預期少之後先咁做。 所以，美國媒體開始還大摩一個公道，無論紐約時報，華爾街日報，甚至BUSINESSINSIDER，已經將視線轉向FACEBOOK本身，負責上市既埃伯斯曼。 綜合報道，保薦人突然下調盈利預測呢一著，正正係佢指令。 埃伯斯曼現年四十一歲，有十幾年財務經驗，但係咪夠砰，做一間千億估值公司既CFO，不得而知。 話說，佢處理上市期間，最照顧係一班原有股東。定價方面，亦單憑散戶反應好，會議期間一度有人要求四十美元定價，最後發現機構投資者大部份意向價其實得三十二美元。 FACEBOOK已經由科技股盛事，變成科技股駭人事件。無限溢價，變為無限折讓。 事到如今，點心科？ 股價，一定仲有壓力，好簡單，期望過高，失望太大，加上未可以沽空，令到正股一定成為發洩對象。 同時亦會牽連行家，同FACEBOOK類似既股份，亦一同有機會被發洩。 FACEBOOK未夠砰。盈利前景已經被質疑，管理層質素，唔敢講。危機管理亦太差。 華爾街日報報道，上市至今，公司內部只係通知員工一件事，唔好對媒體報道太認真，同有太大反應，亦唔可以提IPO三個字。 FACEBOOK對好多人嚟講，根本唔係一間公司，而係朱克柏格既童話故事。依家，對呢班人嚟講，童話幻滅。 朱仔新婚風活快活之餘，好應該本著童話故事原創者既責任，出嚟解解晝。一方面強調增長潛力仍在，更重要係發揮真正企業人頭落地精神，炒走CFO，同向保薦人扣起部份佣金，最少搞場公關戲睇下!!

全球熱捧嘅Facebook，可能變成歷來最反高潮嘅IPO。 第二日一開市就穿招股價，低見過３３美元，收市都跌近一成一。 牽頭承銷商「摩根士丹利」無再喺上市價水平護盤，第二日就無影，只係喺較低水平入市買facebook。 股價喺上市第二日就「潛水」，投資者都好不滿，矛頭直指大摩，同掛牌場地納斯達克交易所。 FACEBOOK調高招股價，股東又賣多咗舊股套現，大摩被指安排失當搞到股分供應太多、又太貴。 最終IPO嘅散戶比例去到兩成半，比一般嘅兩成散戶比例為多。 大摩有客戶，原本估計只會分到５００股，結果變成５０００股。 唔只散戶，連對沖基金都話，分到嘅股數，比預期多５０萬股。 而納斯達克交易所，處理唔切咁多盤，導致交易延遲兼混亂，更「不幸」係唔少投資者跟本唔知之前的指示盤是否有效。有人就要隔六個鐘先人知自己摸頂入貨!! 雖然交易所已經預備，賠償１３００萬美元，預計分析同界定賠償嘅過程，需要一至三個星期完成。有券商更計過，因為取消唔到買盤，造成嘅損失接近１億美元。 講真，Facebook一役，各大報章，各大投資者，清一色鬧大摩同納斯達克，唔計輸打贏要，佢地係咪犯上不能原諒既錯誤？ 納斯達克系統出事，其實俾著邊間交易所，遇上FACEBOOK上市，都好難全身而退。 一來、規模太大，一時間又有太多買賣輸入指示，仲要美國可以一股股咁買，想到此，買賣指令幾乎係天文數字。 基本上死既機會極高。除非首日牌係要硬性人手輸入交易，或預先再擴大容量。 至於大摩、大部份批評之前暫時加價，並且誤導投資者認購反應。後者不得而知，但暫時加價，同增加發售規模，無股東同公司管理層首肯，大摩斷估唔會亂嚟。 再者，作為首席協調人，大摩最終要效忠既對象，係要沽售股分既股東，以及 FACEBOOK本身。 最少佢地喺呢點、分別做到高價集資，同高位散貨，職責上，並無構成失職。 Pimco 董事總經理埃爾阿利安講得好，FACEBOOK呢個係典型吸引投資者做非理性決定既例子。 不幸，到呢一刻，佢地仍然傾向不理性怪罪一方，但連一句FACEBOOK大咬，都無埋恕過! 世界既事，往往有早知!!如果有早知，可能FACEBOOK根本唔應該上市，因為佢地吸引之處，除左朱克伯格既神奇力量外，最緊要就係夠神秘。 但一上市，FACEBOOK溢價，就咁無...

自封為華山劍宗風清揚，一身獨孤九劍獨步天下。可惜當日風清揚被情所騙、失約於劍宗對決，從此消失江湖。 今天的馬雲雖是網絡狂人，但論老謀心算一旦面對「雅虎」這個岳不群，財技上完全是陷於下風。 做交易先決條件：時間、策略同部署，佢似乎通通欠奉。 雅虎持有阿里巴巴集團四成股權，係馬雲一條刺。可惜，佢做得太著跡，一開始已經蝕左個勢。 今次，佢用七十一億美金，要回購其中兩成股分，價錢比八年前雅虎購入價高足足十三倍。 阿里巴巴集團憑咩，八年嚟估值可以高十三倍，無人知。但靠呢宗交易，雅虎即時體現價值，收番既現金，相當於每股三點六美元，加埋持有兩成阿里巴巴股份，馬雲對雅虎每股估值，進貢左足足近一半！ 八年嚟，大家可能無咩合作。但馬雲肯定對得住雅虎。佢太想解決雅虎呢個問題，或者唔想再同對方沾上關係，結果事事處於下風。 話馬雲財技屬小子級數，原因係佢太有透明度。你明明將回購雅虎股分列入首要議程，舊年就無謂節外生技，向包括淡馬鍚在內機資者發售股份，令當日作價，成為今日回購價既參考指標。 更甚，馬雲根本唔應該太早露底牌，俾人睇到阿里巴巴要整體上市。點知佢相反，將香港子公司私有化，講明有意整體上市。 咁做即時令自己陷於兩難。一，回購價太低，會影響估值。二，為推高上市估值，甘於俾雅虎一個高價。 路透既Breakingviews 評論話，今次交易最好既一步係時間、因為撞正facebook 上市，阿里巴巴馬雲較容易取得融資，好似俄羅斯既「數碼天空」，就因為沽左facebook，可以有錢協助馬雲融資。 不過估值偏高都係問題，今次作價相當於阿里巴巴市盈率超過１３０倍，仲高過當年１６８８上市時既估值，要搵投資者其實唔容易！ 講到底、馬雲都係別無選擇，因為形勢比人弱。 解決雅虎，今天馬雲終於做到。但代價係周身債，單係回購兩成股份，就要再向淡馬錫敲門。 踢走一個雅虎，送嚟一個魚尾獅。馬雲未致於財困，但如果資金壓力大，阿里巴巴最終可能硬上市，估值上一定不利。 馬雲犯左急進毛病，同風清揚半年一樣因感情用事斷送劍宗稱號。其實要送走雅虎，根本咩都唔使做。 將來上市，變相俾對方高價賣舊股機會已經情義己盡，無需要搞到依家咁，為趕走他人而借上借!

競投倫敦金屬交易所進入最後階段，到底花落誰家? 睇出價、港交所、芝加哥期貨交易所、同洲際交易所旗鼓相當。 不過看看港交所股價倒水，一星期內，跌超過一成。市況問題之外，最重要係LME三個字。 倫敦金屬交易所董事會即將會傾收購建議，以三大買家傳出作價計，十至十二億英鎊，大家會問，係咪買貴貨? 當十二億英鎊上限價計，按二零一零年LME盈利，收購涉及市盈率一百廿六倍。 當然，數字上唔可以咁計，事關LME今年上調左交易費，另外兩年後會有本身結算所，每年慳過千萬英鎊結算費。 高盛計過，考慮埋上調交易費，節省結算費，以及營運模式改變，買方俾LME估值，仍然有四十倍市盈率。 如果一星期前，四十倍PE，對港交所仍然唔算太貴。因為港交所市盈率亦有三十一倍，但股價倒水之後，PE依家大約廿倍頭。 廿倍買一樣四十倍既野，一樣都係貴!! LME係咪最終落入港交所之手，好快知。港交所仍然享有天時，地利，人和三大優勢。 一張中國牌，兼可以加快LME內地建存貨倉，監管層面上，英國金融監管局有份審批既，此人正是韋奕禮，前SFC 行政總裁。 難怪，華爾街日報兩日前已經預言，港交所「買硬」。 無論策略，及發展上，港交所有理由買。但對股價問題影響，不能不考慮。最簡單一個問題，假設港交所全數發行新股支付既話，股價愈跌，佢地要發行新股數目，就會愈多。 十二億英鎊，大約百五億港紙。現水平股價計，再加批股折讓，港交所要出售大約一成半新股，比一星期前，其實額外要賣多大約百分之二新股。 加埋倫敦金屬交易所本身淨現金只有二千幾萬鎊，之後會做結算所，港交所係咪投入多過百七億，值得研究!! 當然，十二億英鎊唔係最終價錢，港交所憑中國牌三個字，未必出到最高。但既然市況差，有條件反價，港交所倒不如搏一鋪，遲下叫平的!!否則，股價愈跌，發股就愈多。對沖基金就有大把空間搞事!

臨危受命，一年多已過，舊年策略日，歐智華處子之身，定出目標。今年？ 大行批評無新意，無驚喜，似乎不盡公平。 簡單諗，舊年裁員三萬目標，唔通今年話要裁夠六萬咩？ 第二年策略日，骨子裡，係領功日。 股本回報目標、成本收入比率目標、資本充足率目標，通通可以維持不變。 要記著，中間已經過左兩次歐債危機，仲有大陸硬著陸風險。 傳媒可論唔多留意，金融時報Lex專欄就特別提出，歐智華可以喺一年內減去左５５０億美元既風險資產，證明佢絕對係一個好頑強既人。 歐智華領導既匯控、就好似一個「肥佬」瘦身一樣，最初幾磅肉係好易減磅，但要持之以衡先係最困難部分。 而喺歐債危機再爆發前、就做好「瘦身」工作，亦證明佢有遠見。 因此唔可以怪老調重彈，因為目標再進取，會變得不切實際，相反下調目標，又會變成膽小鬼。 從匯豐第一季業績睇，其實歐智華目標，幾近達到。 奈何，匯豐既目標仍然建基於賣業務、斬人頭之上。股本回報係咩？根本係一個玩弄基數效應既遊戲，分子盈利唔得，咪從分母成本以及負債著手。 明智既股東，有機會對著歐智華，不妨問一句，「點解你唔學渣打、定出一個經營溢利增長目標？」 由成本著手，製造基數效應，帶動盈利，唔代表金融機構無用，無能。 係現實環境使然，匯豐好，摩通股東好，要鬧，就鬧央行主事人。 金融機構靠炒賣為生，係貪，定無得揀，絕對唔係一個善與惡既問題!! 數字上，歐智華係有沾沾自喜理由。但佢提到，股價反映投資者受落，亦有羽翼未豐之感。 你同歐洲同業比，不如同西班牙，同希臘銀行比？？！！ 大象今日股價對帳面值仍然達到０點９７倍，只係介乎歐洲銀行０點６同亞洲銀行１點３倍中間，匯豐歐洲享有溢價，係背後有區內新興市場概念，唔該你拍落區內銀行，你仲輸緊!!! 始終，佢係一個聰明人。人工高，福利高，華哥舊年同今年，刻意將投資者策略日，定喺最接近股東大會之日，為咩？ 舊年話俾人聽，我有部署，今年同人講，我有成績。「股東之春」運動，唔應該波及匯豐!

估市災難。股市災難。因為估計市況出現災難，令到整體市況亦都災難性下跌。 幾年嚟，市場總係未學識管理預期! 信大行分析師既話，大摩報告，瑞信報告，可以做陪葬品，或者攞去鵝頸橋打小人。 呢頭話寬鬆政策是神仙，果頭連穿七個關口，仲要係一日內。 呢一幕，令市場，包括專業果隻，迷惘無助，信咩？唯有賴秋官效應!! 街外有秋官效應，但認真的講，係提款機效應先真。 區內市，跌最多，貨幣呢？印度盧布跌至新低。同中國有關，跌更多。 澳洲，已經被封為MOTHER OF HARD LANDING。 從基本因素而言，大中華概念上星期五，已經出現分水嶺。內地數據差，內部問題，有機構大戶將中國風險溢價提升! 呢個係事實。風險溢價加分，就即係合理估值要有較之前多既折讓! 希臘呢個國家，作為市場毒藥本性未變，更變本加厲。人人話希臘爆預左，話希臘早日脫離歐元區。通通都對! 但近幾日，各大報章，各大投行，就希臘脫離歐元區，作出唔同可能性探討，最大件事係咩？係發現，死局! 希臘走唔走都死，國家由賴債，演變為銀行擠提，同亡國無咩分別，咁既國家，仲有咩存在價值? 默克爾唔係愛子之深，但佢受唔起無左希臘，既系統性風險。 所以，歐洲市場人士有一條方程式，就係GREXIT=SR既N次方。 前者係希臘退出，後者代表系統性危機既簡稱! 市場已經討厭BUY TIME。即係話，希臘走唔走，佢地都唔高興！ 大家都知有事，又唔知想點既情況下，市場策略有二。包括大舉買最安全既債券，依家連外匯基金票據都多左落飛! 二，係減持股票，加馬現金。提款機效應係咪一日完成，無人敢講。但出面已經有人話想買一萬點既牛證!!

政局既不明朗，開始反映喺民眾對銀行存款既信心。 單計星期一、希臘銀行就有七億歐元存款被提取，而過去十日、累積流走既存款更多達５０億歐元。 過去兩年希臘平均每個月只係有２０至３０億歐元被提走，即使喺一月分債務危機最惡劣時候，當月都只係被提走左５０億歐元，目前銀行體系存款已經減至１６００億歐元。 雖然目前情況、未致於大規模擠提，不過識計數的人都很容易了解，銀行體系已經到崩潰邊沿。 當然，理論上歐洲央行可以無限量向銀行提供流動性，今年一月希臘銀行就透過長期再融資操作、向歐央行借入７３０億歐元資金，另外再以緊急貸款形式，借入５４０億歐元。 不過問題係、一旦希臘唔願意遵守緊縮措施，最壞情況下，歐央行有機會會暫停提供流動性，希臘政府可能要凍結存戶，最終導至銀行體系崩潰。 作為歐盟一分子，瑞典財長已經警告，希臘喺歐元區既時間、已經接近盡頭，形容情況係非常嚴峻。 華爾街日報話，一旦希臘唔履行緊縮措施，銀行會因為持有大量既希臘國債而出現巨額虧損，喺無法取得新資金情況下、最終會迫使希臘重新恢復使用「德拉克馬」，正式為希臘脫離歐元區掀開序幕。 好啦，既然已經掀起序幕，那劇本應如何寫下去? 原來歐元區成立十三年，無預計過有成員國要退出，所以並無退出機制。 得零七年嘅「里斯本條約」第50條，提到歐盟同有關國家，通過談判訂立退出條件，內容包括雙方將來嘅關係，協議要得到委員會過半數通過。 如果希臘最終選擇唔留低，最大嘅改變，係無得再用歐元，要發行新貨幣、即係新嘅「德拉克馬」。 由於經濟狀況咁差，就算最初兌歐元匯率係一對一，但新貨幣好快會大幅貶值，隨之而嚟嘅係嚴重通賬。 而國內銀行業，面對存款撤出本地，政府可能要實施貨幣管制。 另外希臘企業無法籌集資金、面臨倒閉。 國內外嘅債務都要重組，國內債務可能會以新貨幣計算。 希臘退出歐元區代價有幾大? 國際金融研究所估計高達一萬億歐元。 至於新德拉克馬要眨值多少? 有學界估計一般係三至五成，不過要眨值七成以上亦唔係未發生過。 以2002年阿根廷債務危機為例，失業率超逾18%，國家最終不能償還債務，結果要貨幣披索大幅眨值 75%!!!

喺香港做上市公司CEO，算係有福。 幾百萬，至過億年薪，有幾個表現會同業績，以及股價掛勾，大家心中有數。人工未必全球最高，但比歐美，壓力最少最低。 外國為例，喺雅虎做行政總裁，一定唔會有好結果。剛剛辭請既湯普森，只係四個月既短命總裁。 回顧雅虎過去五年，一共就有五個CEO，個個係黯然離開。 雅虎問題，固然係業績同業績唔掂。 湯普森事件回想，可能終於發現自己根本係隻小棋子，最大貢獻，係幫股東踢出楊致遠。 點解講雅虎，唔係因為呢間公司，而係對沖基金股東，同由下而上監管上市公司活動，近期歐美相當普及。 湯普森之死，華爾街日報企圖幫佢，話據了解原來佢身患癌症，但全加州都知，導火線擺明係對沖基金股東布局，拆穿佢偽造學歷。 美國上市公司管理層，近期被對沖基金股東踢走事件，不止一宗。至於英國，唔同股東團體近期喺管理層薪酬問題上，成功發圍。 無論巴克萊，蘇格蘭皇家高層花紅方案，都獲得股東團體，大比數反對。 所以匯豐驚，但比同行，歐智華值唔值搵呢個價，相信會有人替佢講好話。歐美股東，對公司業務不滿，對高層肥仔，可以發洩，但香港？無LOR 的確，無論業績幾差，公司一年又一年話，出年會好。 無論管理層幾不濟，薪酬動議年年過。以人工，扣除工作量，同面對股東壓力既實際回報，香港CEO唔錯架!! 佢地既福份，亦反映喺香港小股東人微言薄。到底，DAVID WEBB去左邊？？

07年8月20日，外管局公布推行港股直通車。 恒指由二萬多點邊沿、一直炒上迫近三萬二千點。 同年11月4日，溫總外訪期間，說「直通車不來了」! 到今天，又傳出中央會再送大禮。 包括開動醞釀多時嘅港股直通車。 巧合的是，恒指與當年的水平相距並不遠。 前後只是五年時間，原來我們已經經歷了雷曼倒閉，金融海嘯、兩次歐債危機。 阿爺由四萬億刺激方案、到調控樓市，再收水，直至最近又三次減RRR!! 好像這五年，就過了一輩子一樣。 今天有中資券商話已經向中證監建議，推出「專項ＱＤＩＩ」，即是用現有ＱＤＩＩ額度，允許內地專業投資者，直接投資港股。 仲傳言中證監主席「郭樹清」反應正面。 當然，呢條橋巧妙在，既合法將資金投資海外，又無違反QDII規則! 呢個被形容為富豪專列嘅港股直通車、規模會有幾大? 睇番外管局已批出但未用嘅ＱＤＩＩ額度，就有５百億美元，即係近４千億港元。 有人穿鑿附會，想像呢份大禮，會喺７月，由國家領導人來港，主持新特首就職典禮時送到。 按原則，SQDII看似有助藏富於民，特別是國內投資產品少，措施可以讓高端客戶到海外投資。 不過如單要說遷就富豪，似乎與中央與民藏富想法有出入，直覺上除咗呢班「富豪專列」嘅港股直通車，阿爺更關注係一般投資者都可以平價入場買賣港股。 因此內地兩隻基金、今年２月上報嘅港股ＥＴＦ，審批工作已經完成，相關技術系統亦準備就緒，最快會喺１個月內推出，喺內地Ａ股市場買賣。 為要與民同富，呢個港股ETF入場門檻認真低，只係需要１００元人民幣，似乎這個才是真正符合阿爺心意的產品。

上星期公佈嘅一系列經濟數據、出乎市場預期咁差，我地當時已經形容呢個係「完美組合」，即係通脹回落，同經濟放緩，比到當局更大寬鬆空間，結果星期六人行就出手! 或者用農行一分研究報告可以表達市場睇法，佢地認為經濟增速下滑既情況，已經迫近中央決策層既底線，所以先迫著令人行周末先減存款準備金率! 不過今次減RRR，但對股市明顯無刺激作用，港股結果連跌八日，不幸再跌多一日既話，走勢會相當難睇。 用一場球賽比喻，人行減存款準備金率，牛市人或好友，心情正如費格遜臨完場前兩分鐘一樣，以為坐定粒六，殊不知拱手相讓。 世事無絕對，市場可以左右央行政策，都可以用同時沽盤，否決減準備金對市況既效用。 減唔係好咩？好似一分早已預先張揚的生日禮物，一早知係咩嚟，但拖左六個月先收到手，到時已經唔再吸引，唔會有驚喜。 分析員，經濟師，由異常樂觀，到體面轉軚，但骨子裡，大行分析員仍然無百分百認輸，大部份都話，寬鬆政策確認，股市會返嚟。但市場上大家諗到既野，正式出現率有幾高？ 當然大行報告要有賣點，高盛，同摩根士丹利已經「膽粗粗」，估今年內會減息。 這個不難理解，如果只係Sell 人行落後形勢，對大客已經再無賣點。 既然係估，點解唔估大些? 好似匯豐股市策略員話，準備金已減，市場會重視番盈利，今個月市況升勢未改。市場當然重視盈利啦，但既然牛市經濟師已經下調內地增長預測，變相引證牛市分析員對盈利預測亦都過於樂觀。 要估寬鬆政策力度，幾時再減息，倒不如現實的，準備定新一輪盈利下調周期!! 投資者過去一年，應付左多次疑似升市。十二個月後，事後回想，佢地對分析員態度，正正係還是覺得你最好。 點解咁講呢，原來睇番華爾街日報最新發表既亞洲及中港最佳分析員調查，上榜既全部係建議沽貨。包括里昂分析員，舊年一年三百六十五日，不斷建議沽比亞迪。 正如華爾街日報講，呢批分析員勝出，係成功說服客戶沽貨，而唔係買貨。更有趣係，整個評分調查涉及超過四十間證券商，排名最低，你估邊間? 係大摩。以得分計，大和，星展，現代，元大、甚至本地薑黃師傅寶號「輝立」都比大摩高。證明，大行唔一定好!!!

今日公佈左一大堆經濟數據，幾乎可以用一個字來形容，差。 仲係出乎意料咁差。 推動內地經濟嘅三頭馬車，第二季似乎仲係跑唔郁。有分析甚至指，今季經濟增長可能破８。 最令市場意外，係ＩＰ工業增長疲弱。 四月工業增加值，比三月回落２點６個百分點，增速係０９年５月以嚟最慢，近三年嚟首次回落至單位數，遠差過市場預期嘅１成２。 當中被認為係經濟前贍指標既發電量、更幾乎冇增長。 反映生產價格嘅工業品出廠價格指數就連續兩個月負增長，跌至零九年十一月以來最低水平。 至於內需同投資都令市場失望，上個月消費品零售總額升幅，係舊年二月以嚟最少，一至四月固定資產投資就只係升20.2%，比頭三個月回落0.7個百分點，表現係近十年來最差。 至於新增貸款，得６千８百幾億，比市場估計下限７千億仲要少。 唯一符合預期嘅，係通脹放緩至百分之３點４。 從各方面睇，可以話，一個俾阿爺減準備金同推刺激措施嘅完美組合，已經形成。 不過想深一層，只係減存款準備金率，係咪代表內地經濟得救？ 工廠訂單重臨？消費再度旺盛？ 更重要，減準備金率，釋放三千幾億流動性，之後既全國發電量係咪會回升番，從而釋放更多電力？ 講完呢一連串問題，感覺到全世界嘅經濟處境灰灰地! 不過埋身再睇香港嘅數據，更令人灰心! 第一季經濟增長，只係百分之零點四，超過兩年嚟最低。低到無增長咁滯! 面對低增長、同高通脹，擺明已經係初步「滯脹」局面，即使政府幾唔想承認，都難以擺脫呢個現實。 對照一下阿爺數據，你駡佢過分干預都好，至少通脹回落到3.4%，同香港比較，我地又係跑輸幾條街。

King of Wall Street，戴蒙領導既摩根大通，避過金融海嘯屹立不倒，不過今次都敗在自己人手上。 摩通披露佢地過去六個星期，一共錄得大約２０億美元交易虧損，估計市況波動，今季仲可能再蝕多１０億。 一向串咀的戴蒙罕有表示歉意，承認執行同監察對沖都做得好差，不斷罪自己「Poor, Poor」! 其實今次事件早就有跡可尋，上個月已經有多間傳媒報道一個綽號「倫敦巨鯨(London Whale) 交易員」，甚至有人叫佢做佛地魔嘅摩通倫敦衍生工具交易員「艾克兆爾」，由於睇好經濟會改善企業盈利，舊年開始就大手沽出１２１間公司嘅CDS，有啲盤大到過千億美元。 艾克兆爾既部門，係摩通內部一個叫做「首席投資辦公室」CIO，原意係為左銀行做對沖減少風險，不過隨著回報愈滾愈大，已經變成一個坐擁巨資既「坐盤交易」部門。 好似艾克兆爾自己、喺年底就揸著總額３５００億美元既投資，佔左摩通總資產嘅一成半。 本來艾克兆爾今年初手風都唔錯，個個月都因為股市上升賺大錢，不過到左三月既時候，情況開始逆轉。 因為CDS價格係咁升，即使佢已經停止再沽，但由於平唔到倉，最終做成巨大損失。 上個月仲形容呢件事係「茶杯裡的風波」嘅戴蒙，而家亦都承認低估左事件，話會作出善後。 查實事件令人震驚之處、係摩通一直係美國實力最強既金融機構，唔單止順利渡過左０８年金融海嘯，仲趁機會以每股十蚊美金嘅價錢、吞併左貝爾斯登。 連地上最強銀行都出現此掛一萬漏情況，實在令人稱奇! 所以有分析都質疑、今次事件未必單單係一個違規交易員做成，更大可能係制度出左問題。 消息就指戴蒙經常有親自過問、呢個神秘既「投資部門」，即係話難以置身事外。 事件諷刺的是、包括戴蒙自己為首華爾街大行強烈反對，成功遊說當局，令到禁止坐盤交易的Volcker's Rule 法案要押後兩年先實行。 沃爾克兩日前先喺國會銀行委員會埋怨，正係呢啲大銀行不斷遊說行動，令到本來簡單既法案，變得過分複雜，仲同記者講，如果想聽，佢有好多故事可以分享。 戴蒙自己都承認，今次事件令當局，有好好嘅理由，推動限制坐盤交易，但佢仍然覺得反對沃爾克規則係正確，摩通嘅問題係出喺執行對沖策略上。 相信今次事件其中一個最高興既人、應該就係八十幾歲既沃爾克，佢兩日前先喺國會埋怨、因為銀行做左大量遊說，先至令自己...

對區內新興市場嚟講，五月十日算係恐佈既一日。 亮點已盡，換來係中國外貿數字遠比預期差，同時間更令人心驚，係印度央行為穩定匯價而突然出招。 印度貨幣今年計，輕微跌5%，但由舊年高位比，其實跌逾兩成。 印度央行忽發奇想，決定向出口商下令，要佢地將手持外匯頭寸既一半，硬性兌換番印度貨幣。而日後，兌換外匯，必須要用完目前頭寸先可以進行。 簡單講，印度怕資金外流，貨幣貶值已經怕得要死。奈何今次造法，係托市假手於人。 大家記唔記得，十幾年前金融風暴，金管局一度建議企業將海外頭寸，調返本港，結果作用有限。 印度發出最大警號，似乎係本身接近一窮二白。以往，或現在，區內央行托市，干預本身貨幣匯價，手法都離不開用自己儲備。 印度依家咁做，證明些什麼？咪自己可能已經彈藥有限，為保評級落至垃圾級別，儲備先有得留底。 不過有交易商話，印度近日已經多次推出行政干預措施，包括加重向外商徵稅，今次變相進行外匯管制，唔排除會觸發更多外商撤資。 兩年內連續加息十三次、到上個月印度央行先至三年嚟首次減息，唔少評論都指央行係落後形勢，加上市場唔開放、以及經濟結構改革遲遲未有推行，呢個可能先係象國經濟發展既死結。 印度告急，中國外貿數據再令市場失望。估出口有百分之八點五，結果五唔夠。預期進口一成一增長，最後接近零。 商務部最大既功勞，係向一批盲目樂觀經濟師，左右掌摑，醒下啦! 由舊年十一月起，逄月頭經濟數據，某某大行都話，見底了。 結果，近半年，都仲係話重複見底了! 內地經濟點，總理話七點五，就係七點五，信唔信一件事，從呢個角度，見唔見底，其實唔係重點所在。 四月外貿差，睇下原材料進口。上個月，內地平均每日進口十三萬桶油，三月係五百五十萬。 上個月內地進口鐵礦石，按月跌百分之八，六個月嚟進口最少。上個月，內地進口銅，按月跌近一成九，八個月最少。 所以，之前部份分析員指，經濟係靠去存貨推動，其餘別無動力，證明係對既!! 經濟師，有時俾人印象係評論員級數。魯賓尼，克魯明，名氣大，但同一套重複十年，唔會有人怪，只會有人讚想法獨特! 萬一有次講中、就變成真英雄!! 內地分析師呢? 經濟數字稍為好，就話見底。經濟數據唔好，又話會加快寬鬆力度，前景樂觀。 即係，咩數據出嚟都唔使驚，要繼續樂觀。 外貿情況差，嚟緊點無人知。牛派經濟師睇...

希臘一次，又一次做其金融市場「爛仔」。 有工唔做，有錢唔還，有事就扮可憐，以為喊下就得。結果，兩年嚟，希臘問題成為近年困擾市場最耐既單一問題。 其實，最佳結局，係踢走希臘。但最困難決定，亦係踢走希臘。 因為，歐洲人傾向保守，保守即係無膽。德國作為龍頭，受夠一次又一次勒索，政府唔急，但傳媒急。 華爾街日報再次以歷史視野看今次危機，當中包括訪問左前希臘總理「帕潘德里歐」。 既然人不在位就可以海闊天空，帕潘德里歐爆料話早喺2010年同德國總理默克爾談判時，對方已經明確表示「救援計劃」一定會帶嚟傷害。 即使基金組織同意希臘可以優先經濟改革然後再削債，默克厭已經表明反對，指嚴格既緊縮措施要同時進行。 帕潘德里歐形容要挽救希臘、早已經係「不可能任務」。 德國明鏡一不做，二不休，向德國政府索取九四至九八年內部文件，決定踢爆歐元面世之前，原來有幾多巧合，幾多視而不見，甚至幾多造數例子!! 根據來自德國政府百幾頁文件，當年總理科恩，對歐元始創成員財政狀況，一早感到不妙。 其中意大利情況令人懷疑。德國官方白紙黑字記錄，意大利忽然削債成功，令德國官員覺得唔對路，更形容意大利嘅財政數字，形同基金粉飾行動。 奈何，德國心雄，始創成員都踢走，即係歐元未面世，等於提早玩完。同時，法國堅持，意大利唔玩，佢地亦退出。 結果，呢個錯，十幾年後今日，火山終須爆。 德國牽頭既歐元俱樂部，入會條件似緊實鬆。有意大利在先，新加入者個個做數。呢個結一定解唔開，更何況拖得太耐、越滾越大，已形成不歸路。 魯賓尼話，歐元會逐步瓦解。呢的評論，中學生城市論壇都識講。 歐元係咩？無疑，好一段時間，係強勢貨幣，依家為止，仍然係美元之外，地上最強。 但諗深一層，歐元，講到尾係利益關係既標誌。 德國無歐元，繼續用馬克，佢地享受唔到較低兌換優勢，繼續保持出口。 至於爛仔成員，加入歐元，就係一種地位確認既身份，等於質檢總局既品質認證，問題係你信定唔信!!! 所以，歐元區成員，大好，細好，個個都係享盡搭順風車既利益，個個都係FREE RIDER。 但世上無免費午餐，食飯亦要俾錢，十幾年利益累積，出得來行，就係預左要還!!!

連馬雲都佩服的順豐物流公司老闆王衛-- 情願每年使千幾二千萬補錢炒人，都要請最好人材做物流的中國民企神話!

講到匯豐業績，可以話為香港近三萬個員工爭一口氣! 先講大數，滙控首季業績好過預期，成本同資本水平都有改善。 較為關鍵係行政總裁歐智華既強項、「炒房」GBM有好表現，而美國業務經過重組後見底，撥備減少都係好消息! 單計核心嘅基準盈利，升兩成半，賺６８億美元，不過計埋近廿六億美元既「債務公允值」變化影響，首季整體盈利跌左四成。 貸款減值撥備就按季減少兩成，至２３億美元。 股本回報都受債務公允值拖累，雖然比舊年第四季百分之５點８有改善，但仍然遠低過集團目標。 不過「識計數」既歐智華話比大家聽，扣除公允值變化，其實ROE有 11%，有信心股本回報可以如期達標。 令人注目係亞太區表現最突出，當中香港稅前盈利按年升超過兩成，更突出係成本收入比率由第四季超過４成半，大幅回落到３成９既低水平，係所有地區中最低，直迫個仔恒生! 相反總部歐洲再惡化比率急升到百分之１１６，原因不難理解，正係當地工會抗拒裁員! 要重整架構，滙豐喺過去一年，全球裁員萬四人，同上一季比亦少左三千五個員工。 回顧舊年話香港三年要裁員三千，當時真係人心惶惶，而家本港員工表現咁突出，連歐智華都話，本港裁員人數會係集團系內最少，估計全年整體員工數目維持2.9萬人不變。 到底係之前有人大口裁多左、定係大象員工發奮圖強令自己競爭力提高? 現在當然無從考究。 不過以39% CIR 來看，真係冠絕全球，證明呢三萬名員工真係全部值得表揚!

明燈補習社: 散戶習性-- 贏粒糖、輸間廠的理由!

法國同希臘大選結果，加深歐洲債務危機嘅不明因素，觸發另一次環球股災。 兩國嘅左翼勢力檯頭，法國選出十七年來，第一位社會黨嘅總統。 希臘嘅左翼政黨亦成為大贏家，好可能左右大局，兩處地方嘅結果，勢將影響歐盟，希望透過緊縮政策解決債務問題嘅努力。 奧朗德一直係票房毒藥，缺乏星味。能夠跑出，係薩爾科齊太差，同卡恩意外出事既結果。 近十幾年，未試過金融市場因為西方發達國家，某某執政而大震盪。將情況全數歸功於奧朗德，未免太高估佢。 奧朗德，講真，未選已經知贏。市場反應負面，係希臘國會選舉，結局太差。 法國總統大選，同希臘國會選舉，根本係歐洲另一次對緊縮政策既終極公投。法國仲有本錢，新政權同德國默克爾大纜扯唔埋，但政治係講妥協，繼續為立場死撐，德法兩國最終玩唔起。 相反，希臘結局，可能係歐債發展上一個硬著陸。支持緊縮政策兩黨加埋，票數只得三成二。 不客氣講句，呢個出名「懶」既國家，繼續由支持緊縮政策一派話事，機會近乎零。 因應選票，希臘剩番既選擇有二，包括玩大佢!! 放棄緊縮，或者修改時間表。 二，係被默克爾踢走!! 無論是旦一個情況出現，對歐洲央行會係災難。因為佢地仲有太多希臘債券上身，限制左德拉吉政策空間。 對歐洲金融機構嚟講，希臘債之前大幅削債，半年未夠，可能再嚟一次。 MERKOZY皇朝代表緊縮。一個輸左，一個唔知縮去邊。邱吉爾早喺二次大戰結束後，提出UNITED STATE OF EUROPE慨念，由德法牽頭。 但英國最醒，亦對政治觸覺最敏銳，建議還建議，但從未無認真過!! 依家所謂歐洲一體化，唯一係靠歐元呢個單一貨幣維繫關係。德國人講機動性，法國人要浪漫，意大利，西班牙鐘意午睡。 歐洲有幾多共通點，大家都心中有數。 不過，只要歐元區存在為德國提供到著數，歐元唔會瓦解。歐洲依家，最大考驗，係要先過政治意識形態呢關。 法國，希臘，甚至英國左派勢力抬頭。要搞清楚，左唔係問題，而係歐洲依家已經出現非左、即右，非黑即白既極端情況。 亦因為咁，較中間路線既薩爾科齊輸左，荷蘭內閣總辭，走民粹路線溝淡保守形象既卡倫梅，隨時聯盟瓦解。 如果左派勢力佔上風，歐洲結局好易諗，就係美國翻版。奧巴馬左傾，民粹，於是以債抵債，無紙不斷印。 但歐洲，左右勢力未知勝負，呢個先係最難搞，所以市場不為左派大印銀紙所吸...

一年一度既資本主義胡士托，周六舉行。 此胡士托，正係巴郡股東會是也。大約三萬五千人，有表演，有食品，有購物之餘，晌重要係「巴菲特」三個字。 六十年代反戰既胡士托搖滾，主題係愛，和平，同反戰。依家既資本主義胡士托，主題當然截然不同，愛與和平仍在，剩番最大主題，當然係錢，錢，同錢!!! 講到錢，計埋今屆，資本主義胡士托已經連續三屆同主題不符。因為巴郡過去一年，累積係跌，同標普五百升近百分之三比，係跑輸。 三年累積，巴郡升幅三成二，同標普五百六成升幅比，同樣係跑輸。 當年胡士托，有一批搖滾結他手日而繼夜撐場。但資本主義胡士托之中，一個巴菲特，夠頂十個JIMI HENDRIX。就算彈CHORD，玩SCALE遜色，有巴菲特企喺度，就算佢咩都唔做，憑佢慈祥面孔，已經足夠令股東開心一年!! 但好日子俱往矣，今年既資本主義胡士托前，就連對巴菲特極之擁載既媒體評論，都預先提出忠告，勸股神好好為投資表現，同接班問題等等質詢做好準備，唔好求求其其。 三年幾嚟，巴菲特每次出手，已經打破之前必屬佳品既迷思。入股高盛，依家變相被剔走，北方鐵路，LUBRIZOL，甚至用一百億收集IBM股份。每次都係「嘩」完之後，討論或質疑既人多，讚既人少!! 呢個世界，無早知!!!如果三幾年前佢買蘋果，佢會成為永遠股神。IBM唔差，但無人知佢平均買入價。華爾街分析員直言，巴菲特呢三年，從投資組合而言，犯左唔少高手同一個錯誤，就係賭經濟徹底復蘇，但結果唔係!! 比起往年，更多「巴迷」關心佢健康，同佢接班問題。 以巴菲特性格，一定會強調自己健康快樂，精力旺盛。況且，以佢日日漢堡包，加可樂既飲食習慣，佢健康的確係好!! 如果講祝佢長命百歲，十八年後就唔可以再講，因為到時佢一百歲!!! 巴菲特對接班問題，已往多數支吾以對，擺出一副，「信我啦」既態度。 其實調轉，細心些諗，巴郡從來無接班問題，因為巴郡就等於巴菲特，幾十年嚟都係咁。蘋果教主緊要，但巴菲特喺巴郡地位，比教主喺蘋果地位更重要。 因為投資，都講關係，面子，同獲廣泛認同既能力，巴菲特通通有齊。 況且，話得係股神，除非信佛，否則神只得一位。「股神接班」呢四個字，已經邏輯上有問題!! 所以，沒有巴菲特，一定唔係依家既巴郡，股神應該好清楚。如果想巴菲特效應溢價長存，佢無需要憂心接班，索性將巴郡，改名做巴菲...

美國學者IAN BREMMER提出G ZERO呢個名詞，最近仲出埋書。所謂G  ZERO，其實係相對於經常講既G20，G7，G4等等。 既然係零即係全球依家係群龍無首。 正如IAN 自問自答嘅書題，WHO'S IN CHARGE OF THE WORLD？ NO ONE!! 老布殊十二年前提出建立世界新秩序，但由美國牽頭時代，似乎告終。真空要填補，但無論政治，經濟，全球五大洲各有各亂。 內地情況尤為令人關注，西方歐美亦明顯左派抬頭。 環顧目前全球問題，簡單分為三個，包括意識形態、還債、同增長。呢三大課題，比複雜更加複雜。 無錯，往往亂世就出英雄，但過程之中，英雄未出現，個個都會爭出位，以求達到英雄之路。 有經濟就有選票，歐洲已經體現呢個情況。令人遺憾係，愈嚟愈多人打倒昨日的我，甚至搬出似是而非理據。 好似歐洲，左派抬頭，民心思變，多左聲音，包括當年積極推動美國滅赤既薩默斯都加入倡議，增長比一切來得更重要。 更多類似既意見，就製造更多錢唔使還既理由。!! 美國亦跑出克魯明，乘住諾貝爾經濟學獎之名，公然向老師、以及十二年前、聘請佢嘅伯南克發炮，真教授定係偽學者? 美國學界開始分辯背後嘅真面目。 克魯明向伯南克提議，或者命令，不外乎係叫佢印鈔唔停手。有趣係，克魯明以新凱恩斯學派自居，但係依家暗投奧國學派，一味鼓吹貨幣政策。 反而，真正係奧國學派信徒既RON PAUL，比佢清醒好多。 所以，美國有網站依家只係稱呼佢為專欄作家，而唔係教授。再入肉啲，直情會叫佢做影子聯儲局主席。 但克魯明積極推銷貨幣政策既同時，一個美國 ISM數據，再加三位有投票權理事既言論，已經變咗向佢掌摑。 如果克魯明，薩默斯係代表著抽水。默克爾，薩爾科齊，同德拉吉，就係失敗既標誌。過萬億歐元，換嚟係經濟更差，反對聲音更大，甚至地位不保。 意大利，西班牙，法國等等，PMI數據同恐怖兩個字掛勾。但從鐘擺效應分析，愈恐怖，豈不是愈有轉機!

放完一日勞動節假期，就到左傳統所謂「Sell in May」既五月分，不過同往年唔同，大行對「MAY」似乎重新演繹! 由Sell，由大行變成STAY IN MAY，部分進取啲既，更加話要Long in May，唔通又係另一次「逆向思維」? 摩通同花旗都呼籲，今個月千祈唔好沽貨。 摩通話，傳統五月沽貨，命中率其實唔高，今年更加唔好試。 美國經濟特別係消費市道仍然強勁、歐洲可能改變緊縮政策、內地政策又開始啟動、加上估值因素都利好市況。 唔單止唔好沽貨，策略仲要進取。 花旗呼籲，投資者要五月買貨，佢地睇好中資股表現，話中證監下調交易費用相當利好股市，完善新股發行機制亦加強市場質素，由於整體宏觀政策仍然傾向寬鬆，相信股市已經見底。 不過瑞信認為股市喺三季先會出現「拐點」、面對上半年經濟持續放緩，會令企業盈利預測持續被下調，要靠基數效應同政策支持，股市先可以回復升勢 始終股市經過過去一個月、都累積左唔少調整，加上內地近日推出多項措施支持股市，港股假期前都已經偷步跑上，今日再跟隨內地股市造好，最多升近３百點，再上到去「個半月」高位。 不過好似瑞信劉紹文劉老師所講，而家企業盈利先至係剛剛開始向下調整既周期，咁快就相信大市見底，可能係太早，真係要撈底要幾時，劉紹文話「大約在秋季」喎!