財經拆局

從史上首次批股集資結論，李小加不單止絕非「小家」，反而仲相當慷慨。 近八十億集資，一家便宜三家著，自己有錢、政府低價溝淡、股份上板成交會增加、有幸分貨既基金更肥肉當前。所以李小加，其實係李慷慨。 受惠於小加既慷慨，約翰曾先掃三百幾萬股。七年前以一百五十四個四喺市場購入千多萬股三八八，俾人鬧足咁耐。依家，特區政府帳面成本，已經由一百五十四個四，降至一百四十七蚊左右。 等多幾年，港交所可換股債券百六蚊到價，約翰曾若仍然在位，一定要叫小加做恩公!!! 論受益，莫過於沽空港交所一眾對沖基金西人大鱷。試想，星期四沽空，但同時間一百一十八蚊獲分認購股份，只要星期一，港交所上唔番一二八個八，沽空不構成輸錢。 而單係以配股價獲分貨既成本計，今日高位，數字上每股已經賺左六個八。西人大戶比約翰曾更加叻!!! 中環人話，港交所以折讓百分之四點七至百分之七配股，市場隨即傳來嘩然之聲。無疑，折讓一成之內批股，係慣常造法，可惜，已經係過去式。 如果睇番近期被股東減持，或者配股集資既大型股份記錄，招商局國際，折讓幅度三至六，廿七銀娛，折讓僅僅半成，友邦前阿媽沽貨，更有溢價百分之二。 以港交所排頭，以三八八貨源，更以佢地清白之身既零批股記錄，中環人形容，小加今次，或者係慷自己之慨，當起偉大領導者既示範。SALUTE!! 有關港交所今次處子配股，星期四五點打後發生既一切，故事甚多。聽最多，固然係半個鐘內全數去貨。心水清朋友自會發現，今次三大承銷銀行，同上次三八八可換股債陣容百分百相同。 中環人話，早於CB之後，三大投行一早接獲主動查詢，內容綜合而言就係：有貨預埋我!! 有消息更話，唔少同時累積大量淡倉，但是與否，永遠唔會有答案證實。!!! 據稱，去貨之快撇除大戶早有部署之外，更重要係，承銷團配股期間，已經不斷放風，定價只會在中間!! 咁著數，亦有數得計，如果散戶都可以參與今次配售，有資格用一百一十八蚊攞貨，你話幾好!! 可惜，我地唔係大戶，小加唔識我地，亦唔會向我地慷慨!!! 國開證券成為港交所配股財務顧問，買LME形同代父從軍，已經被行動證實。世上只有阿爺好，能夠為國效力，絕對值得。 好快LME，可能會易名為HKLME，過百六億既代價，全世界話貴，錢已經籌曬，協同效應暫時難以統計，而短線而言，會計上有樣東西叫商譽減值，LME會否...

十二年嚟首次批股集資。 據負責承銷既投資銀行話，接受認購唔夠半個鐘，已經獲得足額。 目前未知邊的機構投資者認購，亦有消息話，大部份由中資接貨。 以配售規模六十多億計，話大話唔大，但相當於港近所已發行股本大約百分之4.8。 雖然比港交所股東大會獲授權增發既最高比例少，但對股東來說，未來三年買入一個無增長的業務，但先吃眼前虧就係盈利被攤薄。 目前無一個單一股東，可以持有多個百分之五股權。 今次配股，係繼之前發行可換股債券後第二次集資，前後加埋涉及過百億， 港交所之前同意用大169億港元，收購倫敦金屬交易所LME。 匯豐之前計過，就算港交所同時配股，以及再進行其他融資，只要配股價係一百蚊樓上，對每股盈利就無太大影響。 港交所亦強調，收購完成後，效益會好大。 承銷團指，唔少對沖基金喺獲悉港交所配售條款後，主動查詢要貨。 巧合係，港交所星期四沽空金額超過三億，按日大增近七成，佔佢成交比例達到四成半。 港交所收購LME已經獲得英國監管當局批準，等埋英國時間，下星期三獲得當地法院通過，就會正式完成。 據了解，港交所會視乎情況，盡快利用LME平台，喺本港做商品交易。 可能連港交所都意想不到的是、今次集資反應太好，居然連累到鄰居金管局。 喺歐洲交易時段，前後不足一個小時，金管局要兩度承接美元沽盤，沽出港元。傍晚先向銀行體系注入三十八億七千幾萬港紙，一個鐘頭後再向市場注入多十九億，令到全日注資金額超過五十八億。 過去一個月以來，因為資金流入同新股集資，金管局已經先後向銀行體系累積注資超過四百億元。 銀行界話，同今個月大量資金流入唔同，今個星期既美元沽盤，好大部分都係同集資潮有關。 先係今年新股王人保集資超過二百億。 到港交所為左融資收購倫敦金屬交易所、破天荒配股集資超過六十億，都增加左港元需求。 由於銀行近日成交較薄弱，預期呢啲美元沽盤，都會繼續由金管局承接。

內地股市表面叫A股，但名不符實，，極其量只係一個U股市場。 論排場，炒傳聞，講就A級天下無敵，要數市場、監管者、以至投資者質素，其實只值U級，UNCLASSIFIED!!!! 曾幾何時，內地股市跌，內地媒體評論矛頭直指外資集體唱空，依家，連外資都幫內地市。 我地統計十間大行對內地股市睇法，間間話好，間間話要買。內地更無得抵懶係、連渾水之星卡臣仔，公開宣佈放棄唱衰中資。 諷刺之極係，水哥仔嫌透明度太低，限制太大，簡單講：我對你無興趣!!! 內地股民輸得太多，個個別得百無聊賴，當日因為市跌，圍罵財政部，圍攻證監會，反而令人懷念。 無所事事，連鬧都慳番，佢地只係寄情於另類創作，將指數低位解碼為「救救我吧」!!「救救我妻兒」等等，亦將郭樹清易名為郭輸清，講得好聽，係最不滿發洩既一種，但骨子裡根本係自暴自棄! 連錢可以輸、鬥志不能輸既投資者基本原則，都配唔上，呢點肯定係香港散戶值得自豪! 輸盡多年，內地股民，投資者好難再西班牙鬥牛上身，但可悲係，內地上至分析師，下至小股民，其實搞唔清點解股市跌。佢地歸咎新股多!! 但最吊詭係、一有新股，佢地又趕快豪炒!!! 佢地埋怨限售股解禁規模大，但自從股改後，無一個月係無限售股解禁，再者，里昂用盡多年數據，結論係限售股解禁多少，同內地股市升跌關連系數，其實低於百分之零點五，換句話，係「攞來講」。 股市有買，有賣，有LONG，亦有SHORT。股民不再LONG，渾水之星拒絕SHORT，家不成家，市不成市。 監管者想咁，又想咁，大計鴻圖，推動什麼長期價值投資，變相下令公司派息，但有無認真想過，內地人對「息」，有幾認真先？ 如果係著緊息既高低，佢地唔會跑去借高利貸，之後又貸上貸。 美林形容，郭樹清係改革者，但改革可以一敗塗地。股息稅徵收辨法，已經等同香港SSD，連市場根本要既短線買賣都被曲線打壓，又係市不成市例證之一。 內地人怕新股，又怕股份供應多，跌市只識「扮死狗」，香港經歷多次跌市，至少依家普通老散對市盈率，折讓，溢價、回報率等等名字，已認識越深。 一個月內跌百分之七，個個嘈，個個怨，但從未聽過內地分析人有提估值水平，市盈率高低呢回事。 或者，佢地深明，中國股市今日所謂估值吸引，係充斥內銀等大價股低殘效應，撇除的話，A股談唔上抵。 張化橋說對，解決內地股市困境之一，反過...

上市兩日升一成九，話翠華帶動其他連鎖餐飲股，說來牽強。 翠華表現，令有幫襯翠華，而又有抽翠華既人成功對沖，每手累積賺八百六十蚊，其實只係夠食足十二餐翠華晚餐左右。 新股要升，歸根究底理由可以莫須有。行業好景與否，見人見智也。估值較茶餐廳便宜，二大快餐股「快活」及「家樂」，業績盡告，今時今日香港搞飲食，未算最差，但談不上好景。 將樂仔，活仔，再同翠華比，食品味道之外，其實結論一樣。 大家樂，大快活半年盈利繼續有增長，從營業額睇，增幅在在唔算突出，一間升七，一間升百分之八。有幸，成本控制得宜，大快活半年銷售成本僅僅增幅百分之六，大家樂成本，亦只係升百分之七。 成本升幅輕微低過營業額，造就到毛利率上升。但睇樂仔，毛利率升幅得零點九個百分點，活仔毛利率亦僅僅多左零點八個百分點。以二大規模，毛利低雙位數，同我地睇一盤生意，話一碟小菜，毛利五至八成，天淵之別。 無疑，咁既環境經濟似晴實陰，毛利唔跌，偷笑嚟唔切。我地做消費者，怨人加價，呢個係人之常情。大家樂講明，再加價可免則免。管理層咁講，不單止唔係客套說話，其實盡顯快餐股，大眾食肆現今滯脹環境下，其實困難重重。 撇開最低工資，又撇開租金因素。政府十月份消費物價指數詳細報告有數可依：整體食品十月按年升百分之四，米價高近百分之二，家禽按年貴左半成，調味料升幅一樣，更慘係牛肉價錢按年貴左兩成二。 作為營運者，加第一次價係為抵消工資成本，加第二次價係租金上漲，第三次可能因為食材漲幅又要加價。 但食材控制成本極難，加三次價，顧客反感既，走曬。未走既，亦可能另作他想。 目前經濟未差到打擊消費，試想，活仔，或者樂仔，一份普通碟頭飯餐，要用上四十蚊樓上，即時影響，係部份顧客需求彈性有變。 因為加價，佢地覺得，「辛苦搵埋食左佢，一於豪些!!!」，於是倒不如多付十元八塊，索性去中檔餐廳，從而離棄樂仔，活仔。 夾於中間，大眾連鎖食肆，簡而言之，就因為滯漲問題，令價格優勢自動消失。 二大深明此道，但羊毛出自羊身上，價錢不加，份量即減。三幾年前，一份焗豬扒飯有兩件豬扒，依家好彩的話，一件會少些骨。 又三幾年前，飯餐全部跟飯品，依家無左。顧芷筠主播近日就嘗過要一客肉醬意粉，亦不幸出現大縮水事件，幾乎唔飽肚。 價錢唔減，份量被減，固...

地產建設商會就政府樓市降溫政策既四點回應。到底，係姿態，抑或係SHOW HAND？ 不得而知。但肯定，從上星期五，發展商一邊還擊，一邊瘋狂入標嚟睇，證明生意佬係現實，縱使不滿，亦犯不著自斷米路，所以唔存在之前市場擔心放慢手腳之說。 好明顯，我要鬆，你要緊，政府擺明無價講。深入睇，政府同發展商之間既博奕，措施藥力固然係爭辯之處，但內裡關鍵更在於大家對自由市場既解讀。 或者更直接講，雙方都似乎錯解自由市場定義，導致討論離題。 梁特首，曾司長，張局長，輪流發言，背後主線其實係推翻自由市場，積極不干預呢套理念。 梁振英早前立法會發言講得赤裸，振振有詞指積極不干預意義含糊。奈何無論中環人，以及學者都指，特首了解認知在在有限。 任志剛未算係夏鼎基門生，但對呢位前上師了解程度，肯定較之現今財金官員為多。 任總講過，所以積極不干預者，實實在在就係代表有需要時，積極干預既意思。 夏爵爺雖已作古十多年，但只要肯花時間上網，佢早於一九八零年十二月，工業總會一篇演講，已經清楚解晝。 佢當時話：用「積極」去形容「不干預」，其實代表當政府遇到要求作出干預既建議時，唔會即時SAY NO。 相反，會因應期時形勢，權衡正反，從而作出積極決定。呢個解畫，清楚易明，亦同任白頭所指，大致相符。 到底咩叫自由市場，政府同發展商，仍然流於干預，及不干預之分。中環人話，問題搞唔清，以後仲有排拗。 何謂自由市場，發展商似乎定義係什麼都不好管。惟現實根本係，由始至終，無一個市場稱得上百分百自由。 因為，自由唔代表無規則，唔代表零監管。所以，有學者話，純粹係不滿政策而搬出自由市場做盾牌，未能成理之餘，更令整個政策博奕之爭，缺乏重心。 學界同部份業界指，與其再拋出自由市場泛泛其談，發展商應該將討論重點，放在自由市場既應有規則，是否洽當，有證有據，就算擺明賣貴樓，客觀上，外界極可能係幫理不幫親。 張炳良可能說得對，環球央行不斷量寬，無可能繼續自由市場而任人魚肉。但佢搞唔清既係，到底係如果完全唔干預會任人魚肉，抑或現有機制提供到任人魚肉既空間？ 金融海嘯後，無一塊市場係變得更自由，監管及規管只會更多，政府既否定自由市場，但三番四次政策成效，又徹底由市場敗走，簡而言之是不信市場，但又不敵市場。 咁係代表，功力有限，還是所謂有道高一呎，魔高一仗既現象，留待大...

就政府進一步打壓樓市，地產建設商會四點回應，由於早已流傳，新意欠奉，簡而言之就係，錯在你先，放過我吧!!! 樓市升跌，係由最大地主，即係政府、發展商、同買家三個市場群體左右既結果。無政府人為減少供應，無發展商高價開盤，無買家願意追價，樓市唔會搞到今時今日既地步。發展商歸咎政府，于理不合。 但堅叔，梁志堅一段發言，言簡言駭，作為發展商代表，佢批評額外印花稅，兩年之後又三年，大有氣結之感。更甚係，佢一句，政府BUY TIME一語中的。 梁志堅講得好，新加坡樓價升，但星洲有地隨時可推，唔似香港，又公屋，又居屋，又唔知咩屋，講到尾，構思多多，土地欠奉。 堅叔的確係高手，買家印花稅政策反響極大，看官一再強調，新加坡都有啦!!但佢一句到肉，唔可以咩都同新加坡比，背後喻意盡在不言中。 中環人話，說穿了，香港，新加坡雖係競爭對手，但香江小島現在任何政策，都只會搬新加坡作為合理化依據，政府信心有多大，毋須多講。 樓市瘋狂，喪炒既背後其實源於恐慌。建設商會俾政府回覆中，點名聯匯之下既低息環境，係鐵一般事實。 低息鼓勵借貸，目前既低息兼通脹，更加將恐慌、蠶食、蒸發，等幾組字眼同一時間扯上關係。 香港最新通脹維持百分之三點八，偉大祖國比香港低兩個百分點有多。論通脹率，香港只係比印度、印尼、越南低。可惜，人地高通脹但有利率，我地，既有通脹，但零利率。 陳德霖變身安培晉三，香港技術上無限QE。今年，香港負利率大約四厘，對七百萬人幾大影響？ 我地以本港港元總存款三萬九千八百幾億港元計，負利率四厘，數字上，今年港元存款喺無人輸錢，無人唔見錢、無資金外流情況下，已經蒸發一千五百九十幾億港元，為番即係每名港人平均存款蒸發二萬二千七百幾蚊!!! 二萬幾蚊，不明不白，咁就無左。二萬幾蚊，記著，講緊只係今年!!舊年，同樣以負利率四厘率，大家無多二萬幾蚊。為聯匯，香港人單係二零一一至二零一二年，每人其實夾左四萬五千五百幾蚊，合共加埋超過三千億!! 我地覺得攞苦嚟辛，但少數人仍然認為相當值得!! 當然，上述數字係粗略，同埋係為量化香港死守聯匯, 港人撇除資產價格急漲之外既實際現金成本。 以往，我地話人不務正業，只顧投機炒樓，又串人，炒樓賺錢，僅拜LUCK FACTOR所致。 時代變左，依家買磚頭，避開現金，已經係一個BASE FACTOR。好難不同意...

可以話癲、可以話喪。的士牌由舊年五百幾萬，升到近七百萬。磚頭有價，振英王朝令住宅物業市場冰封，聰明錢幾乎，逄「位」必炒，車位、電單車位，舖位，甚至係龕位!! 市場的確充斥預示爆煲指標，炒樓炒到新界樓、炒位炒到車位神位，甚至某某發展商開盤，市況爆破在即云云。 依家全球有一個男人叫伯南克，有一個女人叫耶倫，有佢地既存在，全球人類只會繼續逃避手持現金，答案最後不言而喻。 車位動輒過百萬，寶翠園車位更要三百萬。車位有價，炒籌重現。一個籌，十幾，廿萬有人收，簡單講，等同賭必勝「白頭片」一樣，將籌轉手，套現所得，大約可一變十，買到十個電單車位，或者一個位置無咁好既龕位，無本生利，又可以以位易位!! 點解發展商明知車位有價，仍然要急於出售，又點解，明知自己無車，都要掃車位？ 後者解答容易，因為唔想做傻仔，依家凡係手持現金，正正係傻仔也。至於發展商情況，當然技術上佢地係配合氣氛營造高峰，但試想，假設發展商將單位租出，所得租金同私人市場一模一樣，無收平過，咁既情況下，既然無蝕底，點解有位唔要，反而想要現金，難道發展商先係最傻？ 發展商醒過你同我!!車位升值與否，最受供應影響，呢方面，發展商掌握唔到。更重要係，車位租金，假設每月穩定有三千蚊，十年後唔代表發展商從該個車位所得合共三十六萬租金收入，因為投資學上，係有折讓現金流呢回事。 任何計算未來現金流收益，都要加個折讓水平，所以數字上既三十六萬，其實將來係實際無三十六萬咁多，加埋銀紙貶值同通脹等等因素，車位套現潮，變相反映大戶對將來貨幣走勢睇法係進一步貶值，通脹進一步上升，佢地已經預先將現金折讓率大幅提高，結果當然係，盡快將未來現金，提早折現，避開折讓呢個因素。 車位喪炒! 咁龕位市場? 賣過關子，請留意我地下星期明燈補習社。 回報同抗貶值，大家可能苦盡腦根。 但凡事從最簡單方向諗的話，或者可以考慮，買一幅出自一位就快死既晝家手筆、又或者趁紅酒跌價買定。更好提議係去街市，買批柑，記著係食個隻!!!至於果皮，千祈唔好掉，十幾廿年後，果皮變陳皮，陳皮值千金!!

交易廣場先殺牛，再殺熊。投資銀行就繼續上演，中環，西九屠場記。 紙箱欠奉，大房燈亮，被叫入大房，同事們唯有送上一句，「阿門」。 升市未明，但升市期間，大行裁員卻停不了。盤房變屠場，探子回報，上星期花仔再度郁手，而西九瑞士邦，近日層宰頻密程度，一眾員工見者流淚，最怕入大房係自己。 以往，鬼子佬磨刀霍霍，揮下屠刀，對象係中低層員工，十個被裁，就保到一個鬼子佬高層花紅。 時而世易，探子話，無論花仔，同西九瑞士邦，不幸被斬，主要係D同MD級，即係高層是也。據講，連投行部門CEO，是次亦難於幸免。 年尾大搞屠場派對，表面上，固然係為來年輕身上路，新年開始，要交數，向市況低迷現實低頭。但今次，有留意既話，瑞士二邦既裁員，亦重組，私人銀行，定息業務，最賺錢，最重災，事情已經令紐約，倫敦，中環同東京各超級高手，摸不著頭腦。 中環資深「賓卡」話，監管要求，巴塞爾三，大行逼於應對之餘，新環境之下，瑞士二邦其實都唔知自己想點，總之簡單講，咩都試下，希望透過架構轉型，有其突破。 心水清既「賓卡」話，大行表面堅持業務不拆細，架構不分拆，其實係睜著眼說謊話，市況加監管，大行一拆二，有可能已經由醞釀變為啟動。 香港繼續話要食金融呢碟飯，但睇番證監會數字，單係持牌代表數字，已經由零八高峰萬八樓上，減至萬五左右，而近幾個季度都持續減少。 公司要保著股價，管理層要為股東交代，君不見，瑞士二邦，一間斬二萬，一間屠一萬，以消息公佈後股價表現計，市場對裁員愈多，就愈係受樂。 投行夢斷，以為讀過MBA，做過I BANKER，就係登上車仔、屋仔、老婆仔、生仔(定狗仔?)既四仔之路，好日子可能俱往矣!!!

港股大陰觸，上證續尋底。中環人形容，市場出現好消息斷層，不利因素醞釀之局。後市固然唔會大，但餘下個幾月，市場中人有可能被弄至慾仙又慾死!! 資深賓卡話，上星期五係中港大好友既轉睙點，皆因當日迷團形成，而且更多證據似乎反映，之前既部份憧憬，可能不盡不實。 依家!!就似有好消息棄我去者，昨日之日不可留之感! 還記得，十月上演一場熱錢流入中港好戲。一時話，加快流入!! 一時指，大量流入，我地老早提過，有錢入不代表好多錢入，再者，數字遊戲陷阱，往往事後才會孔明。 量度流入內地資金，指標之一係外匯佔款、外貿盈餘、再加外來直接投資。三組數字，全數曝光，中環人話，將幾個數字夾埋睇，大有唔啱數之嫌!!! 首先，內地十月外貿盈餘達到三百二十億美元，折算相當於二千零一十六億左右。由於內地對持有外幣意慾大降，新增外幣存款過去幾個月，每月不足四十億，理論上，無論係外貿盈餘構成既新資金，又或者真正有熱錢流入既外匯資金，都會結匯，從而推高新增外匯佔款。 上星期五，第一時間已經發現，新增外匯佔款二百一十六億，同外貿盈餘額偏差極大，當然，數字上，外來直接投資如果大幅減少，條數一加一減自當反映。 奇怪係，十月外來直接投資只係少左一億美金，導致三組數拍埋，正正係中環人所指既數不對板。 問題一，固然係原本熱錢流入之說，可能與實情不符。 問題二，就係十月咁大既外貿盈餘額，去左邊？ 謎，可能永世解不開。迷，亦可以一解就開。出口商賺外匯，既無出現龐大結匯，又照理唔會全數存放內地戶口的話，剩底大概只有兩個可能性。 一，佢地拖債太多，用曬? 還錢。二，當然係錢，另泊碼頭也!!! 第一個可能性，目前無數據證明到。第二個可能性，中環人提點，呢個世界依家有離岸人民幣貿易結算及兌換服務呢回事。 內地巨企，廠商，賺取外匯所得，短暫存放本港，既可享受較優惠兌換匯率，更可拆上拆，到內地賺息差，一舉兩得之下，你唔識，喝求業務既銀行，總會教識你。 如果呢個推斷係成立既話，香港有一條數可以睇到，就係金融機構新增外幣資產。事有巧合係，七月份開始，本港認可機構每月新增外幣資產，少則多百幾億，多則增加近五百億，更巧合係，新增外幣資產大增之後既一個月，內地新增外匯佔款，又會按月多番!! 要強調，上述推論係懷疑，或者係建基於數字既有理由懷疑。熱錢之說，我地無否定，但大量熱錢既...

大象與馬分手事件，未致於震憾股壇，但總令人稀虛萬分。 大象者，匯豐是也，而馬，當然係馬明哲管理既平保。 八年多前，因憧憬而結合，結果男既另有他想，女既，亦嫌對方俾唔到自己安全感。 匯豐盡沽平保，未曾成事，但肯定十劃有八撇。匯豐火速回應傳聞之快，未曾試過，訊息固然明確，係要話俾市場知，我去意已決。 在情在理，有商言商，匯豐今次沽平保，義氣有餘，匯豐無欠平保，相反，只有平保欠盡匯豐。 合作欠奉，協同缺乏，更甚係，匯豐當年先入股一成，再履行承諾，接收高盛為首原始股東股份。 平保其後卻二話不說，先來一次發A股，繼而向新橋增發股份，之後更以超靚價配股俾周大福。 三宗事件加埋，匯豐持股量，完全未有沽貨情況下，已經被攤薄四個百分點。 可以算係，攤薄到無朋友做!! 義氣換來攤薄!!!攤薄結果係無朋友做，匯豐可能當日錯信平保會利用自己平台銷售產品，結果事與願違。 從現價計，匯豐盡沽，獲利最少廿六億美金左右，一級資本比率再升十七點子。但匯豐其實唔係今時今日先同平保同床異夢，試想，平保高峰期股價百二樓上，比今日高出超過六十蚊，單係呢個差價，已經令匯豐少套現八百多億。 為情，為義，匯豐少收八百多億，就算唔認同匯豐，我地亦好應該向歐智華致敬。 義氣唔值錢，當日入平保，入交行，入上海銀行，主帥龐約翰，艾爾敦，鄭海泉，均俱往矣。匯豐以利取代義掛帥行頭，不再愚笨了。佢手持交行，上海銀行，甚至透過恆生持有既興業股權，去向在在值得關注。 事總有巧合，興業今年再集資，恒生決定不參與，入帳方式亦索性更改，小心眼既中環人認為，匯豐集團對旗下中資金融股投資持股，取態有變。 無錯，匯豐當日既義，係建基於將來自身利益。可惜，一年復一年，持股四成上限距離甚遠，交行合作只限信用卡，其餘一切空中樓閣。但以匯豐目前品牌，人民幣業務既網絡，與其假手於人，倒不如求己力併，內地江山自己打!! 匯豐手持平保值七百六十五億港紙，交行值七百二十，加埋興業同上海銀行，粗略估計，隨時可套千六億。 只要歐智華吹雞，呢筆額外套現既義氣錢，幾乎肯定會令大象銀行，成為全球最高資本比率既銀行。 喺依家既環境，你要義氣，同幻想，抑或實力，同資本安全？ 值得一提，平保潛在接貨人，非歐美資金，亦非淡馬錫，跑出既係泰國首富謝國民。此君愛國商人也，一早投資內地。 以匯豐行事小心...

由我地自己把口講英超播影權，尷尬？ 對不起，無野係值得尷尬，因為無咗就無咗。無咗，固然不值得慶祝，但亦唔代表世界已經末日。 瑞信證券幫我地算帳，零七年有線喪失英超播影權既三年，合共虧損三億。 而重奪英超到依家，單係兩個財政年度，有線無因為英超賺錢，反而兩年再蝕多四億。 用一個比喻，明知洗好多錢，同完全唔洗死都要死，兩揀一，選擇容易。!! 從另一個角度，有線今次其實係對本港球迷有貢獻。假設你既喜歡英超，又愛西甲，連日職聯同港甲都喜愛，以後，一個機頂盒，幫襯一間就搞掂。 成本上，我地幫你慳番!! 如果閣下係NOW既用戶，瑞信亦幫你計過數。佢地既資料係，NOW現有一百一十七萬訂戶之中，有三十五萬係有訂購體育頻道。 好，假設有線因為失英超，失二十萬用戶，換句說話，NOW體育頻道合共用戶就增加至五十五萬。 瑞信用市傳既中標價二億美金計，NOW來年英超頻道，每月收費七十八蚊，足夠回本，月費上比CABLE便宜兩蚊。 數字上，就算你唔CUT我地，有線都幫廣大球迷最少一年節省廿四蚊。 瑞信劉紹文喺報告提到，由於NOW有互聯網，同手機平台，理論上幫佢地拉低英超上客成本，所以新英超頻道月費，極有機會低過七十八蚊。 佢教路，純英超FANS，效益上，訂一條英超頻道就足夠有餘，千其唔好俾SALES說服，訂購整條體育頻道。 缺乏競爭，消費者反而受益，聽落其實相當諷刺!!! 我地變相造福廣大球迷之餘，咁我地又會點？ 自由市場，我地會點，其實由閣下決定。劉紹文話，佢暫時仲未決定係咪CUT CABLE，原因，正正係有線財經節目好睇，夠可觀! 雖有賣花讚花之嫌，不過要重申，劉老師佢真係白紙黑字，喺每周報告「巨人與哥利亞」中寫下!!! 對於一批懷舊觀眾，佢更認為，CABLE既電影，娛樂台既內容，足夠有餘值得呢批懷舊觀眾繼續留底。 其實，我地一早都知，劉紹文愛懷舊，舊時仲讀緊書，偶象之一，原來就係王祖賢!! 所以咪日日播你睇!!!

選擇喺供股權屆滿最後一刻現身，邢李㷧回朝思捷，留低既問題比答案多。 劇情典折，引人入勝，思捷單係呢半年，人事、股價、鋪排，既可拍成電影，亦可有一部比MICHAEL LEWIS寫得更精彩既財經小說。 思捷故事，更代表民間智慧，正式戰勝大行分析。君不見，當思捷話供股，大行間間話不利股價，個個分析員幾乎建議沽出，唯獨民間智慧，即時想起六個字，「唔簡單」，「實有野」!! 總之就係陰謀論輩出，驚死大家諗唔到咁! 於是專欄寫手，股評大師，甚至小小股民，直覺係有得炒。事到如今，證明我地智慧有時真係比大行叻!! 邢李㷧閒閒地有幾百億身家，但要量化佢值幾錢，MICHAEL YING名字，權益表一露，首日值四十五億。 因為，佢代表著思捷最光輝時代，因為佢代表最熟識思捷既人物，更因為佢，思捷呢部小說，故事安排與結構，幾乎肯定會出人意表。 人人將思捷同炒股拉上關係，反而思捷，同點解兩個字更有關連，因為每提思捷，就要問點解。 點解思捷之前咁多高層調職，點解無端端要搞個一百八十億品牌更新、點解話明話夠錢，突然又要供股、到依家又會問題，思捷係咪以一百八十億大計，加供股為名，易手為實？ 總之就太多點解？ 柯清輝、供股，邢李㷧、一連串名字揣測可以無窮無盡。 邢李㷧係咪重奪大股東地位，佢係咪對思捷忍無可忍決定復出，抑或好似柯大俠咁講，係「愛之心、護之切」? 又抑或邢兄背後另有金主? 用番柯清輝既說話，無人係邢李㷧肚入面條虫，點知!!! 坦白講，依家個個諗到出神入化，自以為拆局專家，但對著思捷呢班小說作家，篇劇高手，對佢地嚟講，我地點想，可能佢地眼中，新聞界先係傻仔。 高手過招或者另有高人!! 思捷充滿神秘，買思捷回報可以甚豐，虧損又足以清袋，就算唔介意冒險，事前最好先來一次體檢。 三幾年間，潘祖明、高漢思、周福安、范德施相繼去也，作為曾經局內人，佢地未算清楚，但點都略知一二，咁耐以嚟，佢地對外無講過一句半句關於思捷既事，這才是神奇!!

代表新一屆領導人既政治局常委，即將揭曉。 習李配已成定局。胡溫十年，數字上中國經濟力匹強國，但內地唔少意見，包括中央智囊都認為，內地經濟三十年發展至今，增長有餘，但效率不足，在在談不上中國模式。 數字以外既經濟表現，正如內地近年強調既要重質，而不再重量，未來十年，外界，特別係外國媒體都對習李配奇予厚望。 論經濟成就，習近平即時令人聯想浙江模式，浙江入面一個溫州，民企主導，好既時期被譽為中國猶太城，壞既日子，就被批評信貸頻臨爆破。 至於李克強，外國媒體以至內地學者形容，李總會更勝溫總，因為李克強過人之處係步驟分明，先後有序，溫總就同一時間想做太多野。 外界常將李克強同數據真偽混為一談。的確，有經濟學博士既李總，重數據之餘，原來更要視民企 。 據講，世銀早前同國務院發展研究中心合作發表既報告，結論係建議限制央企權力過大，原來李克強喺報告落筆到作結，一直支持。 換句說話，習李配之下，央企壟斷局面會進一步受制。 當前全球主流意識形態係政府主導之下既收入再分配，我國七年前已經倡議盡快落實，就算花旗黑人總統，連任勝利演說，收入再分配味道亦濃。 由此可推，內地要推，要落實收入再分配計劃，無論資源佔用，行業主導，以至利潤上繳，通通可能先向央行銀包開刀。 如果推斷無錯，新領導係有序改革經濟結構，呢方面其實一如所料，相反金融政策方面，或者更令市場關注，尤其係人民幣國際化步伐引擎已開，更尤其係，人民幣政策兩人猛張，王歧山易位，周小川中央委會榜上無名，似乎篤定退休。 王歧山幾乎鐵定掌管中紀委，加上一個小川行長亦隨時退休。中環人話，金融政策新一屆係出現李張配，李克強為先，但具體執行就由另一常委兼常務副總理大熱張高麗負責。 熟識內地金融相關人士話，王歧山好處係熟金融，唔好處就係太熟金融，所以政策已定，到佢手再無修改空間，簡單講，佢話左一，無人可以話二。 所以由佢執掌中紀委，恐怕貪官污利恐怕有得震無得瞓，分分被王沙皇抄家。 反觀，李克強，張高麗肯聽意見，更重要，李總並非唔熟，本港人民幣業務，以至滬深港三大交易所合營公司，據講係佢極力催建，加埋有張高麗呢個深圳幫，上海，香港之爭，從領導人背景睇，香港繼續有得砌!!! 金融政策一言九鼎時代終結，無論整體發展以至香港獲益，固然有待定奪，口痕友話，王歧山香港最賞識有一個人，陳德霖是也，難...

九七年以嚟首次抽水，思捷供股，對沖基金大股東同歐洲開國功臣，都選擇減持供股權。 不過前主席邢李㷧就力撐，選擇在供股權屆滿最後一日，披露入市增持思捷。 邢李㷧喺上星期三，供股權上市當日，以每股十一個六毫幾，增持二千三百萬股思捷，涉及資金二億七千萬。 持股量提高到百分之五點九九。 之後同日又透過場內衍生工具，增加持股到百分之十點三三，持股量同剛減持的Lone Capital 已非常接近。 邢李㷧係喺零六年底退任思捷主席，轉任非執行董事，主席由高漢思接任。 到零八年邢李源決定淡出思捷，離開董事會，思捷股價亦由零七年歷史高位111蚊樓上，跌到得番10蚊水平，市值縮到205億。 邢李㷧對上一次披露有關思捷嘅股權變動，已經係一零年二月，以每股五十四個兩毫半減持，零三年至一零年嘅減持行動當中，佢合共套現超過二百億。 換言之今次只是動用百分之一、二既現金，已經充以成為主要股東。 思捷現任主席柯清輝，同邢李㷧一直相熟，柯清輝早喺邢李㷧出任主席期間，已經受對方邀請擔任非執行董事。 柯清輝自己就講過，願意「臨危受命」做主席，正係同邢李㷧分屬老友，對思捷亦有多年感情。 今次增持時間亦令人佩服，因為供股權已到最後一日交易，之前減持拋售供股權的股東，包括Lone，肯定非常後悔。 到底今次重新入主是否早有部署？　觀乎去年接連發生的人事變動，包括總裁范德施及主席無故離任，似乎事件沒有這麼巧合吧。 我們早在「大俠出山」一文時，已提到柯清輝是受邢李㷧所托，今次邢李㷧再奪美人，只是一切依照劇本進行，可惜的是知者甚少吧！

得來不易既升市，話咁快要「炒粉」。 家聰博士明言，美元、美債，及幾項指數，避險升溫幾大訊號，早就爆燈。 後市難料，而近日區內市場幾宗活動，在在充斥走得快好世界既味道。原來，星期二，嚟自萊寶Noble Group副主席減持，牛奶國際沽出手頭印尼一間超市部份股權，兼再有瑞銀減磅泰國CP FOOD，同日發生之餘，涉及金額加埋十億美金，以單日大宗套售金額規模計，近期最多。 市場胃口亦變得揀擇。人人話債市有市場，有債必定搶，結果又跟事實不符。 遠東發展五年期五厘半債券，撻Q收場，奧園地產十四厘高息債，對不起，到依家定價欠奉，中環人直言，情況罕見，摸不著頭腦之餘，對「奶油豬」廿倍PE上市，更百思不得其解。 市場搵借口升，時辰已到，亦要搵理由跌。財政懸崖四隻字，佢話驚，你話怕，總之，你越認為係NON EVENT，市場既震盪，都逼到你相信，這是BIG EVENT。 奧巴馬成功連任，克仔夫人，仲有個華爾街「無間道」，相繼會掛冠，還有一個寫自傳寫出禍既中情局頭頭，開始明總統喊既真正原國。 對市場，特別係華爾街嚟講，估領袖從來有趣。奧巴馬財金新班子，近日成為熱門話題。 彭博親商界，彭博資訊「貼」一批商界領導，有通用電氣，有HONEYWELL CEO，認為係大熱財長。 但「高盛領導世界」既作者WILLIAM COHEN另有見解，佢話財長換人之餘，美國證監會主席亦要易帥。 佢老兄認為，論背景，講獨立性，克仔前幕僚鮑威斯係財長極佳人選，有佢，奧巴馬可以證明不與商界為伍，決心滅赤。 另外，由於證監會主席夏皮羅極不稱職，WILLIAM COHEN認為，必需撤換，頂替人選，佢揀打大鱷之星「斯皮察」。 呢個被佢譽為夢幻組合人選成事與否，幾個月內自有分曉。華爾街中人講笑，以奧巴馬滅赤兼搞另類收入再分配，兩大目標任重道遠，財長之選倒不如求助巴菲特掌管，皆因股神優點太多，凝聚力強之餘，商界巨頭身份，加稅等等，萬事有得傾!!! 財長是誰，按過往記錄，除財政政策之後，對美金其實影響不大。環看過去三十年，原來列根時代兩名財長，美元期間變動最大。其中，托馬斯八一至八五年出任財長期間，美金升幅五成，之後列根派出貝克接任，美金八五至八八年，跌足三成半。 但唔好忘記，中間夾左一個沃爾克，一個格老!! 奈何，近代貨幣史將會記載係伯老，有佢，攞命陳可以繼續赤裸無限...

瑞信劉老師提出，政府BSD 只會制造「無謂捐失」，最終只有買家受害!

  掛香港品牌之名，兼打埋傳統茶餐廳旗號，香港加集體回憶，就算唔屬於真真正正傳統茶記，翠華上市已經號召力有餘。   上市集資額大減一半，翠華要上，首場推介會現場已經打造概念鮮明，講明我係港式餐廳。   翠華集七億幾，兩名基金作為基礎投資者，名不經傳既同時，禁售期就比一般新股半年加倍，講明十二個月內不能沽貨。   兩大訊號，係咪反映翠華抽唔過？   是與否，難有絕對答案。競爭、成本在在係左右大局。   以市盈率計，翠華最高廿一倍樓上，比大家樂，快活仔唔算吸引。但有留意的話，翠華刻意提到佢地平均每張單價高達七十四蚊，係兩「大」非能比併，更甚係佢地將自己同本港多個對手比併，以平均單價計，結論全港第一，曲線講明唔好將我同快餐股比!!   每均每張單七十四蚊，不其然既疑問係有無咁多？早餐三十，午餐五十、難道翠華側重晚餐價？如果講貴，照常理，食客印象係，澳門茶餐廳，同太興還來得要貴，但兩者平均單價分別三十五同六十六蚊。   難道，去翠華，胃口特別好？   統粹盈利能力計，翠華截至六月底半年，盈利近二千四百萬，按年增長兩成半，贏本港上市飲食股。   的確，毛利高係翠華賣點，唔係一般荼記可以匹敵，以佢地提供初步資料睇，EBITDA毛利維持兩成。呢度，翠華過到關，問題係成本呢關，未來日子點樣過？   翠華承認，租金及人工，風險因素所在。人工難料，租金因素值得一提，眾所周知，翠華大老闆熱愛自置物業，但對不起，上市資產不包括鋪。   但比起米蘭站，翠華大股東對收回公司租金，在在慷慨得多。   市場最關注，係翠華德輔道中鋪王既租金決定。   公司資料顯示，中環大鋪大股東舊年同今年每月租金同樣八十萬，一三，一四年亦保證不加租，要到二零一五年，翠華德輔道分店年租金先會加至一千一百六十萬一年，即係月租九十七萬，換句話，三年後先加租兩成。   以翠華呢個旗艦鋪月租計，即係未來兩年，每日租金成本維持二萬六一日，簡單計，用番佢地每日平均單價計，每日賣三百五十一個餐就回本。   盈利能力好壞，閣下決定，但明顯地，上市前，...

一個秋交會，一個出口數據，居然引來兩個大行各自暗中較勁! 瑞信陶冬，同美林陸挺，兩位同為星級內地經濟師，說真的，兩位寫的經濟報告在行內均有地位，有VIEW之餘，立論亦清昕，絕非騎牆之類。 十月出口好過預期是不爭事實，只是兩位對前景預測有很大分歧。 原因都係一個廣州秋交會。 陶博士話，秋交會訂單唔掂，出口好快收縮。 陶冬主要理據係、話多得聖誕訂單由九月押後到十月，至帶動到上個月出口好過預期。 但睇番廣東秋交會，新增出口訂單顯著回落近一成，反映前景仲係唔明朗。 陸挺就話，十月佢地睇過內地出口情況，發現落單好勁，加上秋交會影響力已經唔及以前，指標不大 佢仲話上個月入口鐵礦石同原油嘅增幅、都比九月顯著反彈，反映企業重新積累存貨，需求回暖，係出口正面指標。 大摩就指，係慣常節日訂單推遲咗，加上低基數效應推高十月出口增長，估計今年最後兩個月出口增長會放慢番到百分之7至8。 確實，如果睇最新數據細分，鋼，泥，同發電量持續OK。即係的外圍鬼子佬最重視問數字。其中電量係三月以來最高。 另外，截至十一月十二日為止，鋼價係三月份以來，首次按月升。泥價就連升三周。 最重要係撇除價單因素，數量的確是有所回升，部分升幅更逾一成。 大摩的形容詞更非常Eye catching，認為由綠芽變復蘇，政策無望了。 至於美林就話頂多減一次準備金。匯豐繼續堅持，一定要繼續鬆，成為市面上唯一仲憧憬有政策推出大行。 以昨日小川行長在記者會所言，已經暗示政策工具繼續用回購操作做主導，再加上新增貸款遜預期，在在暗示經濟已經觸底，相信再有大動作機會不大，大家無謂再炒錯市!

話說喺選舉票數拉得難分難解之際，奧巴馬有一日到選舉中心拉票，本來預定劇本係由奧巴馬親自打電話比兩個選民、親自游說佢地投票。 面對眾多鏡頭，助選人員隨隨遞上一部iPhone比奧巴馬，點知總統大人攞著部iPhone，搞左好耐都打唔到電話，先比發現在場記者發現佢唔識用! 最後要改用番一個傳統既 Feature Phone，奧巴馬先打到電話，佢自己就解窘話，自己仲有部Blackberry! 當人人以為蘋果股價由七百美元樓下跌落嚟、轉捩點係iPhone 5推出之時，其實真正既「燈神」，原來係奧巴馬先真! 仲記得當日教主喬布斯「彌留」前夕，身體幾唔舒服，都答應出席奧巴馬一場商界集思會，估唔到教主咁比面，但總統原來對呢個「Made in State」最出名既品牌、一啲睇唔上眼，教主在天之靈，可能都心有不甘!!! 而家蘋果股價股價由七百蚊美元樓下，跌左超過兩成，技術上步入熊市，市場亦好緊張咁係咪代表美股都見頂？ 兆富今日做左「併圖」，不看猶之可，一看真係嚇死人，今年以來標普五百既走勢、拍埋１９８７年股災走勢圖一比、趨勢無九成都有八成九相似，好果信圖表派，真係死得！ ＦＴ計過，蘋果公司損失既市值、已經達到近千五億美元，幾乎係成個「財政懸崖」四分一，更弊係對沖基金一直揸重貨，而家有２３０個對沖基金持有蘋果，持倉量係眾多股分之中，個市有咩「咿郁」，唔拋售蘋果都唔知可以減持啲咩！ 不幸係壞消息一個接一個，好似iPhone 5被批評無新意，生產進度又追唔上，內部人事更出現教主過身之後最大糾紛，最新Ｑ３出貨仲輸埋比三星Ｓ３，好難翻身喎！ 或者我地又逆向思維，試下人棄我取！ MacDailynews 報道，有分析員指過去一個月困撓iPhone既生產問題、終於有解決跡象。 前兩日鴻海郭台銘都公開承認自己廠房組裝iPhone 進度唔理想，市場估計庫克會分散更多生產基地，生產問題估計有改善跡象! 而翻身之作可能要靠呢部iPad Mini、用過既人都大讚貼心，硬件雖然唔係最強，不過配合蘋果IOS 同剛剛好既呎吋，好多用家都一試傾心，原來秘密武器唔係iPhone 5，而係呢部iPad 小兄弟! 有大行計過，以２０１４年蘋果預測市盈率只有９點２倍，遠低於歷史平均十二點一倍水平，雖然未來盈利增長未必再有過去兩年六至八成升幅，但穩中求勝，未必無可能。...

迎接奧巴馬第一日連任既、係美股大跌三百點。 不過奧巴馬唔應該覺得默生，因為四年前既同一日，美股都係大跌百分之五，係二次大戰後總統誕生日最差既一次跌市！ 末日博士麥嘉華大叫跌得唔夠，理應跌市一半先至合理，嚇得Anchor 主持都大叫５０％喎，你講真架！ 麥嘉華既想法Ｐｉｍｃｏ既埃爾阿里安一致，認為財政懸崖已經唔止係威脅，而係已經幾乎「車毀人亡」，麥嘉華仲警告，要自保、唔該買架坦克車！ 悲觀一派當然係將財政懸崖無限放大，夾啱時間，仲有個格林斯潘出來抽水，講到有咁末日得咁末日，幾乎好似唔使得十二月二十一日！ 佢地揸著論點不外乎係華府會重覆一年前既錯誤，但呢個立論未必一定成立，ＦＴ評論就話，奧巴馬已經唔再有重選既包袱，立場可能會稍為軟化，而共和黨亦釋出善意，舊年個場"俄羅斯輪盤"式既玩命游戲，未必會再出現! 美國前景故然係充滿變數，不過放眼內地，今日十八大開幕禮，一樣睇得令人膽戰心驚! 驚既唔係胡總發言，講真、新意唔多，反而係見到老中青三代領導齊齊亮相、江澤民跟隨胡總身後，個樣精神煥發到呢.....真係分分鐘仲以為佢先係新一屆領導層! 今次十八大人事變動充滿變數，一個薄熙來已經考起整個中南海應變，好似紐約時報形容，到下星期四閉幕之前，無一個人能夠肯定，到底邊個會企喺習近平同李克強身邊，反映競爭異常激烈! 里昂喺報告入面都提左一個意識形態問題，就係十八大會唔會「去毛化」? 而胡總上任初時提出嘅「科學發展觀」會唔會升格？ 睇胡總呢分最後報告，就有多次提及「科學發展觀」，反映已經係同「馬、列、毛」既黨嘅思想相提並論。 唔好睇少呢套「科學發展觀」，日後習總係咪可以推行更大力度既政治同經濟改革，呢套會係佢既最後武器! 現實就好似ＦＴ　ＬＥＸ咁講，習近平已經別無選擇，政治改革必須針對既、係對付黨內各級普遍存在既腐敗，因為除左令到民眾不滿外，亦束縛著經濟進步。 所以唔改革既風險其實比改革仲要大得多，無論對中國本身、香港、甚至係全世界，都係有好大影響！ 夾喺中美之間既香港，一面有「飛機南」ＱＥ既熱錢狂熱，另外又要面對著內地翻天覆地既改革、而迫在眉捷會係下星期公布既第三季ＧＤＰ，而家市場開始有共識，就係第三季按季都會收縮，換言之，香港技術上正式陷入衰退！ 美國經濟復蘇可以話係「咸淡水交界」，奧巴馬仲可以唱句：T...

奧巴馬擁抱Michelle 既圖畫，成為了他勝出大選後、首個發布的訊息。 唔單止成為各大電視、報章號外既封面，甚至喺Twitter 如 Facebook 更係瘋傳，簡單得來、亦令人對未來四年抱有一定期望! 大家都知，羅姆尼遲遲都唔肯認輸，喺傳媒廣泛報道之後，佢仲要拖多九十分鐘，先肯致電奧巴馬祝賀，而且佢個落選宣言，前後都唔夠五分鐘，可以列入最「Hea」既宣言之一! 羅姆尼唔服輸其實都可以理解，你諗下之前一晚道指一度升過一百八十點，「羅系」股分好似國防．工業．石油．金融．全掃急升．難免令人想像係咪有人收到風？ 老套啲講，今次奧巴馬可以贏盡天時地利人和，雖然輸左第一場辯論令人大跌眼鏡，不過先有克林頓突然奮不顧身為佢站台，之後又有羅姆尼「秘密失言錄音」外泄，最後幾日連個天都幫埋佢，Sandy 成為左羅姆尼陣營最後一根稻草! 黃金戰士形容、今次奧羅之爭，就仿如一場資本主義之下兩個門派之爭：一個係福利主義形式、另一個就行番商界為首既資本主義形態。 不過我地認為用Main Street 對Wall Street，更貼合兩個人既作風，而結果似乎亦都證明，大部分選民係傾向選擇「大街」! 既然支持者落敗，高盛都要唱衰一下，形容喺兩黨仲係維持現狀、分別掌控參眾兩院情況下，年底前美國有五成半機會出現「財政懸崖」，最壞情況係兩黨一直唔能夠取得共識，將會拖低經濟三點五個百分點，令經濟陷入衰退。 當各界將一眾矛頭指向奧巴馬改善唔到經濟，其實有無考慮過，佢上任接落既、正係一盤爛無可爛既攤子，失業率升至９點１既戰後最高，而家回落到近７點８既水平，其實唔可以話無成績。 更重要係過去四年美股既升幅，累積達到六成七，係過去十年來表現最好 . 有統計顯示由民主黨執政期間，股市表現都係向居多，相反股災就往往出現喺共和黨執政期間。 而且更多共識相信，今次既升市至少可以延續到明年： 一係估值仍然偏低、市盈率１４點４倍比平均有１２％折讓； 其二就當然係靠佢，伯南克！ 所以話除左奧巴馬之外，要開香檳慶祝一定係伯老，雖然之前佢放風話就算奧巴馬連任都唔會「再坐一會」，不過華爾街已經開盤口，相信佢會再連任，而一級交易商亦已經共識，係年底聯儲局就會進一步擴大ＱＥ３買債既規模同範圍，由ＭＢＳ伸延至政府債！ 其實羅姆尼犯最大錯誤，可能就係太早太揚話要炒伯南克，結...

第三季香港匯豐員工再次為自己贏得掌聲，２萬８千個員工，合力為獅子錢莊賺到近十八億美元盈利，拉勻計每人就為股東一季賺５０萬港紙，成為按年計唯一有增長地區。 連九哥今次都要比番個「忠心牌坊」比員工，盛讚香港係全球最好表現既地區。 只係獅子錢莊中人話，呢番說話其實更應該比過去年半、被裁走既千幾二千個員工聽，認為九哥係欠佢地一個交待!! 有分參與琴晚匯豐分析員會議既人亦形容，歐智華強調自己係香港人、香港心，話自己三十二年來都係喺香港做慣生意，有二十三年更係常駐香港，似乎都係向員工另有暗示，自己非常重視呢個市場! 事緣係有美銀既分析員問歐智華，到底點睇「英政府」近日出手既壓抑樓市措施，會唔會對匯豐業務有影響。 歐智華一顯大班本色，擘頭就話「無」! 仲認同政府所講，而家喺經濟只係得番一個百分點增長，樓市係明顯有泡沬，所以政府出招其實適時移除左泡沬風險。 九哥雖然而家瞓飛機多過瞓床，不過佢地掌握本港形勢都仲係相當了解、佢就明白而家社會要求「平等」既聲音都相當之大。 而對於香港前景歐智華就相當有信心，叫大家睇著十八大，就會有大量財政刺激措施出台，到出年本港經濟就可望反彈到百分之五!! 九哥對自己盤數樂觀，大行亦比面讚多過彈，金融時報社論就形容匯豐、喺面對一眾歐美監管機構「如狼似虎」既罰款要求，好在業務夠全球化，加上分「數薄」跑贏全球銀行，喺「人縮我進」對比下，先守得著一點二倍P BOOK! 面對著瑞銀今時今日先話要裁員一萬人，九哥兩年話要裁員三萬，其實更有先見之明，只係揀錯地方先裁香江先引起「反彈」。 好似華爾街日報形容，今次業績其實就係九哥「清理門戶」既成績表，無錯而家息差係低左，但九哥更重視係本「數薄」乾淨左，由信用卡呢啲無抵押貸款、變成房貸呢啲有抵押貸款，「質變」明顯比「量變」重要! 你會問咁現價仲值唔值搏？ 好似沈大師所言，大象現價唔係貴，短線可能仲有得彈、但問題其實係要問自己、點解一定要買？ 外面處處風光，點解要為一隻大象，放棄成個森林？ 今年以來匯豐個價升左三成，已經係全面跑贏恆指，就算以大行目標價計，「斬頭斬尾」唔要最樂觀個間巴克萊成９０蚊，其實較進取既大摩同高盛，都係睇得８３蚊，有幾多水位其實自己好易計！

京城人對十一月飛霜襲京，都感到莫名其妙「驚稟」! 五十二年來最早來既飛霜、唔單止令交通受阻或者上班上學有困難，對啱啱復蘇既經濟仲係一場早來既「無情雪」。 隨著雨雪降臨，北部地區既菜價全掃上漲兩成，部分漲價更達到五成。 京城風雪遇上十八大前夕，我地駐京同事固然採訪就難上加難，而且佢地都發現、呢場「蕭殺」既風雪，隱隱然有一陣極不尋常既氣味! 有熟悉國情人士形容，睇星期日晚中共「十七屆七中全會公報」，雖然大部分都係跟程序做既「例行工事」，不過有兩件小事就睇得人「觸目驚心」。 其一係一向由黨總書記、即係胡總負責既政治報告，今年居然罕有出現係由「習總」向七中全會、就報告既討論稿進行解畫，似乎同過去「慣例」有極大差距。 其二就係極罕有提先公布左中央軍委兩個副主席人選，其中一位前空軍司令許其星，就被形容同胡總關係密切。 大家要知，到底胡錦濤係咪會好似江澤民咁接替軍委主席兩年，無論對胡總習總以至整個內地政權都有深遠影響。 熟知國情既人都知，中共所有內部事務都係「有板有眼」，任何非常規既做法背後都大有學問。 加埋習總上次消失既兩個星期，呢啲都令人有太多聯想! 我地再講落下可能變成觸及國家機密啦，不過要習總未來兩年鎮得著場，「胡溫」以外既現有領導班子就「舉足輕重」。 FT上星期就為副總理王歧山做左一個特寫，形容佢就係中央政府一個救火隊隊長，半年前仲一度盛傳６４歲既佢，本來先係總理熱門人選！ ９９年同王歧山接手處理「廣東國際信托」破產事件時，有外國債權人去搵王歧山出面，點知反而被教訓左一堂經濟學「一零一」，就係比贏家贏、比輸家輸！ 最新人事安排係、王歧山會更上層樓，擴大佢現有權力，由分管既經濟領域，擴大至負責政治改革！ 觀乎近日王歧山既發言，多次提及法治既重要性，似乎係露出左端倪。 不過亦有一個講法，話王歧山為人太「專橫」，佢可能會安排成為全國人大主席，雖然排名第三、但就變成有名無實既虛位。 坦白講，十八大前夕傳媒對相關既分析資訊都非常渴求，撞啱匯豐「老屈」發表既「宇宙大爆炸」報告，當然大家都會攞來使。 不過有細心 睇報告既人話，點睇都有「老屈」之嫌，立論都係基於一廂情願，最大問題係太簡化而家內地既政治形勢，認為一過十八大一切就會塵埃落定，管理層就可以集中精力搞金改，仲預言人民幣五年內變自由兌換! 有心水清都就...

由話少規模，到加快，繼而近日高速，兩星期嚟，外界對熱錢流入既形容不斷升級。 因為，陳德霖真係每日接錢，又的確，曾俊華話資金流入有限，實際同現實並不符合。 暫時為止，銀行體系結餘恢復增長，即係陳德霖復出接錢以嚟，睇到流入既錢有三百多億。 但睇唔到既錢，無人知？ 按照大摩用埋銀行淨外匯資產變動呢個數，單係八，同九月，其實流入既已經係有七百七十億港元，當時結餘都未郁!!! QE3，流入既錢，係咪好似政府所講，少過QE1？答案係。由於QE3不設限期，QE1就係08年底到一零年三月初，所以我地用同一基數，由今年九月十三日宣布QE3到依家涉及既五十二日作為基準，比番上次QE1之後既五十二日。 結果發現，宣布QE1之後頭五十二日，經銀行結餘流入既錢，有七百九十一億七千六百萬港元，相反今次QE3頭五十二日，流入只有三百廿二億。 但以上比較，未必係事實既全部。好簡單，QE1規模係一萬五千億美金，QE3只得六千億美金。換句話，扣除呢個因素，正如中環人提醒，流入香港熱錢比例上，未必百分百一定少過上次。 熱錢問題再引起重視，雷鼎鳴教授上星期話，金管局可以增發票據抽走資金呢個概念，未必全對! 流入既錢，如果唔走，現行機制係無辦法沖銷。所以純粹結餘比結餘，依家當然遠比四年前少，但事實上，呢幾年貨幣基礎經已累積增加近六千九百億，係無跌過!!! 因為QE同各種因素，香港既錢呢四年內，係咪僅僅多六千九百億？又唔係!!!貨幣基礎唔係廣義貨幣，我地搵番零八年九月，同最新九月份既M3廣義貨幣供應兩條數，依家比當年既規模，原來足足多二萬五千零八十九億港元!! 資金流入引發既興趣，除左股市升幾多，樓價升幾多之外，亦要問自己，我地對現行本港既貨幣市場運作認識有幾多？ 用零八，零九年既熱錢方程式，錢來香港，就係炒內地!!! 的確，當年聽來順理成章，亦百分之九十九點九有咁既可能，但調轉又問，A股四年內大跌，內地經濟四年間接近硬著陸，點解呢的經香港入既錢，並無反映喺本港資金池變動，毫無流走跡象？ 難道，外資熱戀中國，四年未變心？？ 呢幾日，內地媒體煲大資金襲港，令人聯想當日既中央台熱錢特輯，引述專家云云，話經港流入內地熱錢千，萬億計，當日受訪者之一，黎友煥榜上有名。 佢咪就係，被冠為俱輯地下熱錢流入既內地專家!! 近日廣東省社科院就有個「境外資...

投資者既可以左右市場，但亦敵唔過市場。 縱然講野夠大聲，枝筆得，市場力量總可以改變你。 由唔相信市況向好，到半信半疑，然後改為信，轉軚唔係罪，要既係一股勇氣。 勇氣背後係面子，由於大行從來無，轉軚唔會有包袱，對大好友嚟講，大行轉軚只係錦上添花。 對舉棋不定之人來說，連續幾間金融機構呼籲入市，豈非不是秋日熱風，有助加快決定? 股市一個月嚟升近二千點，連牛角頭順嫂、同黃大仙奇姐都識呼籲入市，大行要營造賣點，的確費盡思良。 大摩、美林、匯豐夾都無咁準，劃出一幅立體構圖，擺明一句：「唔買係罪」!!! 美林既盈利調整指數頗具心思，佢地每個月計算市場對企業盈利預測，結果發現，美歐盈利處於下調周期，反而我們中港股市，論預測改善幅度，幾近全球最高。 九月份，中資股盈利調整比率係零點三九，即係十間被降預測既公司，先會有三點九間公司獲上調預測，事別三十日，形勢變化明顯，最新中資股既盈利調整比率係零點六八，即係十間下調評級或預測，就有六點八間獲得調高預測。 港股更利害，比率升至零點八七，即係調高及調低公司盈利比重，接近一對一。 中國因素無疑起關鍵影響，數據一個又一個比預期好，現市況下再質疑，情同自欺欺人。 的確，國家經濟唔係極好，但我地強調既重新添置存貨效應已經啟動。唔信？ 請看匯豐指數入面既購進數量指標，九月只得四十七點四，十月抽到上五十點一。 添置存貨效應一定製造經濟活動回升，即使短暫，總好過無!! 所以唔會話財經拆局經常唱淡個市!!!一早響左啦!!! 好在開市埋位「占少」轉軚較快，唔係出街恐怕不止被人指指點點........ 依家，有興趣反而係觀望陶冬既下台階。 佢已經調整預測，由年內咩都要減，改為存備金及利率，通通不減。 敢打賭，下回陶博士一定會上調中國增長預測。 匯豐報告提到，機構大戶未敢去盡，無計!!!市面既有太多十八大後、事事通既人肉錄音分析員，更有唔少類似博士冬既死硬派。 對唔著鬼子佬大戶，香港投資者比你地醒目，資金入，氣氛好，中環已經無「阻人發達」呢四個字。 銀行中人直言，本周資金流入遠勝上次，香港市期間，美電七七五零一，承價次數多的是，無幾十億美金，結餘係唔會爆。 結餘升，股市又升，數據又好，今次仲唔係散戶發功倒挾大戶入市!!! 當然，陰謀論隨時大派用場，對與否都係一個自得警惕既...