財經拆局

不出所料，由負累變成盈利動力，歐洲電訊業務表現有驚喜。 和黃經常性盈利升１成９，創２６８億新高。 要注意歐洲３集團急升１倍，貢獻３１億，主要受業務盈利急升兩倍帶動。 截至去年底，３集團客戶人數增長百分之９，有超過２３５０萬。 業績改善，是在智能手機及流動數據市場具領導地位。最重要是市佔率持續增長，亦是今年業務的主要動力。 這同時亦反映到、縱使歐洲面對債務危機，但今天的智能手機幾乎已普及至同開飯同樣重要，投資逾十載、今天的３集團投資終於有回報，相信最鬆一口氣要數霍大班！ 跟據３集團自己所報，英國３及奧地利３各自在國內服務質素均排行第一位，加上上客模式亦逐步轉為非補貼性，顯然有助改善盈利。 李嘉誠指，歐洲業務發展已經成熟，今年表現亦會理想。 不過，這就更難解釋為何派息無增加？有印象會記得，誠哥多年內都一再重申、只要３Ｇ業務有改善，佢就不會令股東失望！ 一個解釋是澳洲電訊續錄得１８億虧損，今年都會虧損，跟據管理層在分析員會議上，更直指預計到２０１５－１６年方有機會回復盈利，可能構成影響。 另一個是歐洲始終仍然有很大風險，跟據財務總裁陸法蘭所評估，和黃對歐元區前景是相當悲觀！ 當然，聽誠哥記者會，和黃業績充其量只佔一半，大家更想知是在業績報告提到，本港樓市走勢。 取決於外圍經濟和本地房屋政策、同時間長實今年賣樓目標大增６成，李嘉誠指不是睇淡樓市、加快賣樓。 他重申目前樓市環境，買樓自住可以、但唔好炒樓。 更多的是，早前分拆酒店，是否和政府對著幹? 李嘉誠話，自己同梁振英在禮賓府食過飯，形容選舉完結，就不要「終生結怨」。 李嘉誠指，早在廿五年前，將投資重點逐步轉移海外，是有人妒忌集團發展，說自己不會勉強在本港投資。 所以，今天和黃本港盈利，只佔總數16%。

無錫尚德由違約，到被申請破產，最新發展係無錫市政府又可能拯救。事情既曲線，而且帶出中資企業一旦違約，要債務重組，複雜異常，情況遠比外界想像為大。 根據最新發展，無鍚市可以牽頭市政府公司為無錫尚德債務重組，單單呢樣，其實唔算突破性發展，事關無鍚市一直想救，惟有否其他因素左右，外界不得而知。而就算最終拯救，債權人點？資產點處置，在在撲溯迷離，而更重要係，重組，以及內地破產法兩者關係!! 說來有趣係，違約通知書由債券債權人美國發出、而為數最少九間內地銀行，攤佔合共廿二億美金貸款，就向內地申請無錫尚德破產。點解內地銀行出此一著？擺明用意係債權人地位排名，要確保高過五億幾美元債券持有人。 但更複雜係，內地破產法零七年正式頒布，今次係首次引用，結局未定，但已經對呢條八年歷史法例首次教驗!!! 熟識內地企業人士指，無錫尚德事件，影響不止違約潮出現與否，而係事件為追索權問題響下警號，事關類似無錫尚德既公司太多，源頭並非在於財務，業務等等，而係架構問題。 以無錫尚德為例，公司開曼群島註冊，但美國上市，而資產則在中國，隨即引申到，公司即使業務如常，資產豐厚，但中資銀行以外既債權人，極有機會通通拒諸門外，莫說第一索償，就連二，三位置在在成疑。 有信貸分析員直指，今次外資其實如夢初醒。因為，無錫尚德以公司名義發債，但公司其實係開曼群島註冊，令到債券持有人一直以為佢地手持屬於在岸市場債券，假設出現極大錯誤，事關中國法之下，佢地通通列作離岸債權人，如此一來，債券即使有擔保，但受制司法地域限制，債券持有人其實得個桔。 由於類似無錫尚德既公司多的是，如果事件被放大，整個中資發債機制或者影響已成。講到尾，今次豈止違約咁簡單!!!

去年十一月已預警核心盈利會大幅倒退， 全年賺６億１千７百萬美元，跌百分之九。 如果計核心經營盈利，更大幅下跌四成二。末期息則下跌五成三。 歸疚零五起收購的美國近二十項業務，管理層直言早想在０５年上一個三年計劃已經想作出整合重組，可惜遇上金融風暴，結果好的時機一再錯失。 到去年問題終於爆發、直接拖累核心盈利大幅倒退，美國ＬＦ　ＵＳＡ重組，包括為中斷部分品牌撥備，就令盈利大幅倒退超過三億美元，令整體分銷業務由盈轉虧，有三千九百萬美元虧損。 管理層已經就美國業務作出架構重組，今年不打算再在當地進行併購，並訂立目標，期望今年內完成架構重組，營運回復２０１１年水平。 至於今次三年計劃只剩一年，利豐說得明白，就是早已放棄達到十五億美元盈利目標，下一個三年計劃亦未有明確目標。 已經不是第一次寫利豐，尤記得去年在策略日仲振振有辭下半年業務有改善，豈料今年初公司要發出歷史性盈警。 更大問題是牽動投資者對管理層的信任，為何在策略日管理層不能掌握美國LF US業績惡化的訊息？是否兩三個月內就出現不可挽回的嚴重問題？ 今年初金融時報ＬＥＸ罕有發出一篇長文，正正分析今次利豐失利，到底問題只是源於一次美國失利、抑或有更深層次的結構問題？ ＬＥＸ由歷史去理解利豐的結構問題，成立於１９０６年，利豐從來就是一間華商買手、賺的是中間人費用。 不同的是、當年買賣的是絲綢、玉石珠寶，今天的貨品就售到Calvin Klein, Coach, DKNY, America EAGLE、Tommy Hilfiger....... 賺的、仍然是中國人採購，再賣到外國人手中的中間費。 曾經由分析員講過、利豐可能是每個美國人都會購買、但幾乎無一個美國人會識得、年銷量逾二百億美元的巨額品牌。 當年，這個說法肯定是讚美! 今天，利豐有過半採購是來自內地，五分三貨品銷到去美國。 不同的是、過去幾年享受的中國低勞工成本投入優勢，今年已經一去不返，過去三年內地工資平均增幅，都有25%。 另一個問題是利豐的增長模式，由07年以來，有三分二銷售都是靠收購帶動。真正本業核心增長，往往只有３％增長。 以往日利豐ＰＥ二十多三十倍進行收購，當然問題不大，但一旦高ＰＥ神話不再，例如現今預測ＰＥ由去年２３倍降至目前１７倍，這種收購模式顯然已經行不通！ 今時今日的利豐，...

當野村、法興、美林的策略師不斷數臭內地的經濟表現及風險時，星期二晚來自北美一個電郵、成為了內地股民的「及時雨」。 已經被內地網民封為「預言帝」、Tom Demark今次發出的電郵，罕有被內地傳媒在開市前已經廣泛報導，唔少都將佢舊年十二月準確睇中１９４９「建國價」既上證低位不斷翻炒又翻炒，仿佛大家都期待緊呢個等左好耐既好消息。 上個月初預言，內地股市回套百分之８，上證指數上日下試２２３２點低位後，隨即有顯著反彈。 德馬克指，內地股市已進入「低風險」入市區域，指數一旦再跌穿這水平，下試２２３０點，即是代表調整完成，升浪亦會重新展開。 按他去年底預言、Ａ股會升４成８計算，即是在９月底前，上證指數會升到２８８０點，相當於比現水平，再升多２成７。 「神一樣既預測」、「預言大師」，內地網民對德馬克一時間捧為神明，不過回想去年十二月佢第一次在建國價叫人買入、甚至今年二月初提醒股市見頂，其實當時大部分傳媒都不識此君，只是今天遇上股市反彈，德馬克就突然為為「真英雄」! Demark 曾經做過索羅斯顧問大家都知，現況係佢出任緊 大型基金SAC 同Passport Capital 既私人顧問，除此之外就是向專業投資者發NewsLetter，據聞你係佢客戶，可能更早會收到風能夠趁低買入A股! 要成為德馬克客戶門檻唔高，不需要下下幾球美金，只要肯比每月五百美金訂閱費，就可以收到佢既報告。 德馬克強項係喺圖表之中發現趨勢拐點，上兩次的確係神來之筆，不過數番舊年佢對標普指數既預測，亦都曾經失準! 睇圖好似沈大師咁講，參考下算啦，你唔見股神巴菲特都笑過，將技術圖表反轉去分析可能更準確! 所以同樣以技術分析見稱，CNBC今日就「爆出」另一個技術專家Ray Barros，佢睇既、係未來兩個月，上證指數應該要跌一成半! 呢度反映既、似乎唔止係大行或者大師之間既爭拗，就算海外傳媒，對我國股市以至經濟都有潛在取態! 其實真正First Call ，應該要比番CREDIT 中金，周一率先勇敢發出見底買入報告，只是當時大家都半信半疑，突然有個塞浦路斯炸彈引發，股市就即時「彈散」。 講到塞浦路斯，我地「國際最前線」同事提醒，原來一切可能似一個早有預謀既局!!! 之前就大鑼大鼓話要徵存款稅、放風講到目標係俄羅斯存喺國內三百幾億歐元既存款。 點知到投票，一...

臨近四月已經前膽五月，去年今日仍然有大行高舉BUY IN MAY、甚至BUY AND DON'T GO AWAY!!! 事別三百六十五日，全球投資者醞釀主題係SELL BEFORE MAY!!! 習近平打造中國夢，但外圍投資者卻以中國造空夢回禮，在美中資股未升過、中資股有走資!! 星期一，由野村發佈既中國美資次按爆煲組圖，據稱國際市場廣泛相傳。 最新調查，環球基金經理對內地前景信心，一個月內急劇逆轉，跌幅歷來最大。我國右邊印度，減息無助刺激股市，執政聯盟面臨解散，經濟之外，再添政治危機，觀乎盧比、印債走勢，終於明白，奧尼爾何解提早引退!! 新興市場資金流向怪異，債市加馬流入，股市轉頭向外，究其背後，正正係投資者不再將經濟，及盈利等同。 經濟好，在投資者眼中，企業盈利未必得!! 無錫尚德違約，內媒港媒報道低調，老外卻來得高調。事關，區區五億美元違約，數目不多，但意義重大。 因為，投資者三個基本假設，中資企業不違約、內地樓市不大跌、銀行不會袖手旁頭，已經逐一瓦解。 基金大戶指，假如沒有塞浦路斯，無錫尚德事件勢必被無限負面煲大。市場眼中，無錫尚德財務問題不屬新聞，但政府及國有銀行破例置身事外，在在令人對中國風險溢價進一步重估，結果會導致上調。 無錫尚德事件，既然打破中資不敗處子之身，後有來者勢必成為關注，尤其係，中資出名債抵債，投資回報亦極低。第二個問題，點解官方忽然取態有異？ 評論一般相信，太陽能行業產能過剩，當局希望執得一間得一間解決。但有關想法解決唔到，不久之前另一面臨破產既LDK，獲得拯救。 有呢宗事件，令問題更加複雜，或者講到尾，就係後台問題。 論當今中資分析界天王，既非陶冬，更非屈宏斌，美林崔魏一出，誰敢爭峰!!! 崔魏就無錫尚德事件發出簡報，認為大事不妙也，因為一，已啟前例，憂慮無窮、二，就係中央地方角力白熱化，北京收水，地方欠水，連帶地方關係背景夠既企業，通通受影響，包括債務不能再百分百確定擔保、債務背後既理財產品亂局如何等？ 崔魏推算，未來幾季，中國可能出現貝爾斯登規模既違約事件，一旦牽涉銀行理財產品，雷曼爆煲引發信貸危機，就會在我國重新上演!!! 將崔魏，同野村既分析拉成一線，兩者睇淡固然明顯，帶出結論在在相同，就係中國貨幣政策一定要收緊，否則危機更大。 美國今日仍然被千夫...

三月至今，一切來得動盪，市場未盡人意。 簡而言之，短短十八日內，標誌幻想破滅、假設錯誤。正因如此，體現金融市場特點，沒有是沒有可能!! 半個月前，市場仍然假設幾件事：兩會有好消息、股市升勢未完、香港不會加息、環球金融市場缺乏風險。 正正一周之內，概念、假設、幻想，一必盡滅。 小小一個塞浦路斯，可以令市場翻天覆地，避險升溫，撇開背後故事含意，似乎證明環球市場原來如此脆弱。 黑天鵝呢三個字已經被濫用，只要出現令環球市況顯著向下單一事件，往往就歸類為黑天鵝。 但其實，有無想過，眼前既白天鵝，通通含人造色素，全部久經人為漂白!!! 到目前為止，市場開始相信市況要調整，僅屬短暫性，但更多市場人士相信，全球利率不會短期向上。 如果你信華爾街日報聯儲局寫手，寬鬆規模係不減反加，利率絕不會提前於二零一五之前向上。 咁，聯儲局來來兩年會議，不是根本毋須理會？咁，伯南克發言完全不以不理？咁，之前趕買通脹掛勾債券，正一係傻仔!!! 華爾街日報聯儲局寫手JON HILSENRATH，有時可以不理，但華爾街日報每次「貼」聯儲局之星，實不能輕視。 兩年前，該報詳盡介紹布拉德，視其明日之星，果日佢鷹鴿逄源，左右政策。 今日，布拉德光環已失，新晉聯儲局之星，史坦是也!!! JEREMY STEIN，被大報標題，「小心此人」。原來，伯南克信佢，耶倫BUY佢。史坦先後多次表達，量寬雖然有用，但亦更擔心代價，據報，深得系出同門，普林斯頓師兄伯南克認同!!! 利息，呢隻似白屬白既天鵝，何幾現型？未知。但環顧全球三級A債息，僅僅澳洲比美國吸引。以德國，香港，新加報為例，債息比美國低三十至七十點子有多，美息可以不升，但資金套息，美國以上市場利率，率先上移，觀乎近日香港率先提高新造按息，似乎非天方夜談!!

人人說2013年要找一個黑天鵝，恐怕無人想過會是塞浦路斯? 華盛頓郵報指，近半年，市場傾向認為歐元危機已經解除，但塞浦路斯這一役，令人反思危機是否從沒離開。 2013年 3月16日，可能是一個今年要記下的日子。 儘管銀行凍結存款和限制轉帳，塞浦路斯民眾仍然爭取機會，在實施徵稅前、提取扣稅後存款。 但避過前一日提款人潮的存戶發現，櫃員機已經再沒有現金。 上任三星期的總統「阿納斯塔夏季斯」星期日晚發表講話，表明國家面臨數十年來最大金融危機，為了避免最壞情況，只能接受援助方案。 消息指、當局和歐元集團正在商討，向存款十萬歐元以下帳戶收取存款百分之３稅款、比原先近百分之７稅率、減少過半。 而存款十萬歐元以上的戶口，稅率則由百分之９點９調高至百分之１２點５。 為了補償存戶、當局將發放銀行股分，並以天然氣收益作擔保，但當地的天然氣項目仍在開發當中。 塞浦路斯經濟規模是十七個成員中規模倒排第三，只佔歐元區整體百分之０點２。 塞浦路斯企業利得稅率，約百分之十，低過大部分歐洲國家，加上監管較寬鬆，容易開戶 客戶有高度私隱。 結果吸引不少外來資金，當地銀行存款，超過三分之一，來自外國人，包括到當地退休的英國人，駐地英軍以及俄羅斯人。 德國總理默克爾公開關注過，不少俄羅斯不法組織，透過塞浦路斯銀行清洗黑錢。 不過令人恐慌是、呢項有條件拯救計劃，會蔓延至其他歐元區二線國家。 或許像評級機構「穆迪」所指，今次令市場震盪原因，是塞浦路斯向銀行存款收稅的舉動，嚴重背離以往歐元區各國支援銀行業的做法，政府為了避免債務違約，不惜導致金融市場波動。 這點才令人恐慌。 或許如金融時報評論版所言，如果只對十萬歐元以上存款徵收稅，充其量只是一個富人稅，殺傷力有限。 如今變成一個全民存款稅，變成人人「削頭」，加上貧富之間稅率差距極細(按原來版本只是9.9及 約7%差別)，結果令之前歐央行提出的全民存款保險(正正是保障十萬歐元以下存款)自我奄割，即使今日透過行政/ 立法不準提款，他日民眾已對銀行及政府失去信心，任何有理性的存款，毫無疑問會想辦法保障自己資產。 最終Bank Run的局面恐怕無法避免。 更諷刺的是、大鑼大鼓要搞存款稅，但向八十萬人徵收的款項、充其量只有５８億歐元，單計一個港股市值，跌五百點已經足以比晒這六十億歐元...

上任僅僅十八個月，郭樹清被調離中國證監會，既成事實。 繼南華早報之後，路透社，及華爾街日報同時引述消息指，郭樹清會被調任山東省省長。 綜合消息指，中央在近日才決定將郭樹清調職，而郭本人對出任省領導亦無異議。 路透社，和華爾街日報指，郭樹清被調職，觸發點為任內多項改革，惹來既得利益者不滿，華爾街日報更指，反對郭樹清掌管證監會聲音之一，包括國有商業銀行。 兩間外國媒體同時指，郭氏任內打擊內幕交易、提動市場質素之外，就連發展債券市場亦被批評。 據稱，郭樹清希望推動債市，便利企業融資，減少依賴銀行貸款，惹來央企及大型銀行不滿，因為他們關注，中小企融資困難解決，有礙本身利益。 華爾街日報評論指，郭氏突然被調職，予人懷疑內地改革誠意有多大。 揭視中國資本市場問題，Red Capitalism「紅色資本主義」一書作者形容，內地為官要推動改革均沒有好結果，郭樹清情況告之，在中國不能擔任改革派。 綜合報道，現任中行董事長肖鋼將改為證監會主席，接替郭樹清，原本，肖鋼預料出任人行黨委書記，但消息指，當局認為，行長及黨書記由不同人選出任，安排並不可行。 肖鋼出席人大會議期間、就未有回應傳聞，目前亦不清楚佢會否執行已定改革計劃。 報道亦指，周小川破格留任，為前領導人江澤民及朱鎔基背後推動之結果，中央台節目期間報道指，多名經濟學者早前曾聯署，要求周小川留任。 勢估唔到，兩會尾聲，上至財金部委、下至銀行高管換班仍未定奪。人行領導遲遲未決，再來一個中證監節外生枝，作為旁觀者，只知背後曲節離奇。 小川留底，兼晉身領導人，樹清黯然結局，雷聲大的來，輕風細雨之去，似有淒涼之感。山東農業城市，著名係青島啤，由堂堂前外管局局長、建行董事長，中證監主席空降，談不上有發揮，平調亦稱不上。 郭樹清任內不算盡善盡美，但幾項推動贏得掌聲，中環人認同，近年半既推動，中國股市走勢未有進步，但質素有所提升，散戶倒可以為郭氏樹立英雄記念碑，以作懷念!! 或者，香港以至老外定義，改革就是質素提升，品牌改造，惟對內地而言，改革就是上升，股市既然不升，郭樹清任內中國股票市場改革，就是不及格，就是失敗。 綜合而言，郭樹清被平調涉及三宗罪，包括打擊內幕交易，嚴限新股定價偏高，以及發展債市，減少銀行貸款依賴。罪出於此，說來諷刺，又或者正正因為自覺諷刺，郭樹清中投不去，寧...

美國遲遲未加、香港率先加息，樓市凍過水! 匯豐、渣打、恒生相繼加息，三大銀行喺現樓按揭市場佔有率，加埋大佔五成六，影響力唔細! 第一步，先加四分一厘，睇下供款佔入息比率有咩變化。 加息之後，最優惠利率P 掛勾嘅平均按揭利率，將會由 2.15厘、調高至2.4厘咁去計，供樓負擔比率會上升到 40.4%，升幅係 1.1個百分點。 至於喺 P+3 嘅壓力測試之下，供樓負擔就會由 48.8%、上升1.3個百分、去到 50.1%，亦即係啱啱觸及銀行規定嘅警戒線。 多個發展商都口徑相同，話加幅好輕微啫，唔會打擊佢地賣樓訂價，真係?! 實情係，主導權喺金管局手上! 性質上，今次唔係真正加息周期來臨，而係金管局提高銀行嘅資金成本，曲線咁推高按息，再加埋壓力測試 P加三上去，等於香港自製兼提早加息! 借助上調風險加權比率、去提高銀行資金成本，迫住銀行要加息轉嫁比買家! 金管局仲會唔會加碼? 如果要配合政府壓市嘅目標，咁加幾多先至夠? 呢個先至係呢一刻樓市、最不明朗嘅風險! 匯豐、渣打一話加息，各區二手屋苑都有業主隨即減價賣樓，幅度由百分之一至十都有，加息對樓市嘅心理威脅有幾大?加一次、已經睇到! 面對樓市成交冰封，施老闆有合理懷疑加息是政府施壓，不是銀行自己的意願。 原因簡單，以發展商為例，無生意就會增加優惠，難道仲提高售價? 而家銀行唔單止唔肯減息，仲反其道而行，加按息，真係想趕客? 有銀行界人士坦言，未來銀行是否再加息，已經不單是資金成本問題，而是要作出風險控制。 大行亦一致預期今次加按息只是開始。 德銀預要加按息多零點七五厘，高盛更加估計、單係匯豐，按息起碼要加到５厘，即係比現水平再加２點１５厘，至可以令按揭業務股本回報達標。 結果係，德銀話未來24個月，樓價會跌一成半至兩成。

晉身國家領導人，是否為留任鋪路 ? 周小川不肯說，只是說不論誰當家作主，貨幣政策的穩定性和連續性都不會變。 除了周小川去留，近半年，郭樹清不斷傳出將會被調任。 由人民銀行，到中投公司，每次均被否認。最新消息指，郭樹清可能掌管山東省。 傳言郭樹清將接替姜大明，擔任出東省省長。 由於證監會主席，及省長均為正部級官員，一旦傳聞屬實，郭樹清職位屬平調。 中證監發言人回應稱，未有接到郭樹清調任通知。 值得留意，證監會今次回應，跟上次直接否認郭樹清調任中投傳聞有明顯分別，當時，證監會指，郭調任中投之說，毫無根據。 雖然平調省長，但消息指，中央視郭樹清為明日之星，稍後會委以重任，而山東發展情況，更有利郭樹清進一步發揮。 郭氏在任證監會主席十八個月，致力提升市場質素，並且多次擴大 QFII 規模，早前就指，郭樹清希望做好工作，拒絕調任。 內地券商承認，一旦中證監會再換領導，對內地市況勢將構成影響。 至於繼任人選，盛傳包括有工行董事長姜建清，及中行的肖鋼。 肖鋼一直被指，會改任人行黨委書記。有內地評論指，相比對上多次，是次換屆多個財金部委領導人選遲遲未定，令人懷疑內地改革進展，及金融問題遠比預期複雜。

之前變相發盈警，國泰全年盈利大倒退，唔意外。 舊年賺９億１千幾萬，大跌８成３，主要係上半年蝕 9 億幾拖累，下半年已經止血，仲賺１８億幾。 下半年業績好轉，主要係聯營公司收益帶動，核心業務亦略有改善，客運收益比上半年回升百分之２。 對國泰既非股東來講，今日業績最好消息，莫過如管理層公布、「粉絲價」會陸續有來 ! 史樂山舊年十月面對航空需求不明朗，逢星期二推出左「 FanFares 」，用每星期賣剩機票，幾百蚊就可以飛去東南亞台灣，甚至有朋友上星期飛東京來回都係千七蚊，當中已經包埋燃油附加費，撞正河津櫻櫻花盛放，真係第一筍價 ! 國泰自己都話，「 FanFares 」推出以來，已經賣出左五萬套套票，平均每個星期賣出既飛，由最初千二張，而家加到二千張飛，仲好相信以自己既競爭力，一啲都唔擔心廉價航空既競爭 ! 聽國泰員工自己講，呢啲「粉絲價」甚至比自己員工優惠更吸引，唔少自己人都會參與，平均每個禮拜都賣到八成飛，連帶自己網站流量，都增加六成。 ! 撞正日圓喺「安倍經濟學」下一瀉如注，眨值近兩成，國泰話前往日本既本港旅客，大幅增加一成八，雖然內地旅客未見復蘇，但來緊復活節，已經計劃加開更多班機。 有航空分析師計過數，一般航空公司既機票，有超過三分之二係通過旅行社出售，每張機票分銷成本平均係機票既一成半。 以目前毛利咁低，減少分銷成本，往往可以左右盈虧 ! 呢個亦係用來應對澳航同東航、即將合辦既廉價航空「 Jet Star 」既手段，不過以國泰既龐大客戶基礎，暫時睇「炒絲客」未必有好大刺激，仲要視乎國泰係咪會擴大規模。 IATA 估計今年全球客運會有百分之四點五增長，略低於舊年百分五點三預測，要搶客就真係要出下手段，至於貨運 IATA 就更唔樂觀，估計只係得百分之一點四升幅。 講到貨運，國泰上年十一月變相發盈警，正正係一至十一月既貨運收益會大跌一成三，分析員當然盡責調低全年盈利預測。 點知今日業績一出，發現有「唔對路」 ! 全年貨運收益最終只係倒退百分之五點五，換言之一個十二月，貨運收益有高雙位數增長 !?? 翻查國泰一月既貨運量，有百分之七既升幅，似乎都係側面反映，全球經濟真係有復蘇跡象 !! 大行對國泰今年業績似乎都相對樂觀，法巴特別睇好國泰今...

今次銀行加息，簡單講，係金管局陳總裁迫出來! 滙豐表明，加按息係考慮到現時按揭市場情況、和營運環境變化，認為有需要調整新造按揭息率，加強銀行風險管理。 大銀行率先出手加息，之前傳咗成個星期，而家第一步，新造按揭息口，加四分之一厘。 計下數，假設每一百萬嘅按揭貸款，供二十年期，最高三厘四咁計，每個月供款５７４８蚊，比之前供多１２７蚊，供多２％，表面睇好似唔係大數目。 不過要知道，可能唔只加一次咁簡單，因為自從金管局上調風險加權比率之後，銀行嘅資本成本提高咗，加息係勢在必行，有按揭代理都預期，按揭息口有趨勢仲會再調高，亦開始有銀行收緊咗按揭審批。 代理指，加息、直接加重市民買樓成本，而家最唔明朗嘅、係一旦各大銀行一連串咁加上去，係會令市況冷上加冷。 因為之前政府連環出招壓抑樓市以嚟，成交已經大減，過去一個星期為例，全港35個大型屋苑，只係得30宗成交，仲少過 03年沙士爆發之後嘅低位，証明而家個市相當淡靜。 至於樓價係咪終於要跌? 有發展商預期，今次加按息幅度輕微，加上利率仍屬偏低水平，預期不會對樓市及發展商推盤做成影響。 確實喎，何文田豪宅地、同東涌商業地開標，雖然銀行早就事先張揚會加息，加上政府再出辣招似乎無影響發展商部署，其中何文田地皮由嘉里以１１６億幾中標，樓面地價過萬元。 出價進取，除咗係市區罕有大型地皮，可建樓面有百一萬方呎，無限呎或限量要求，亦造就發展豪宅。 發展商對商業地需求一樣大，遠至東涌的商業地，上星期收到９分標書，有啲打算發展酒店、有啲就打算做商場，最終由同區商場東薈城的五大發展商，即係太古、新地、恒地、新世界同恒隆組成的財團中標地價２３億幾，遠高過市場預期上限４成，每呎樓面地價４千３百幾元。 似乎商業地有價，呢個現況暫時無變，又沽且看政府幾時會出手!

以九成八得票率獲選政協副主席。今年六十五歲的周小川，晉身國家領導層，為留任人行行長鋪路。 但留意的話，首次傳出周小川續任人行前一日，即係二月十九日，內地首次進行正回購，至今合共連續五次，涉及八百六十億。 更有趣係，周小川盛傳破格以領導人身份掌管央行之後，內地股市至今合共累積跌一百一十一點，跌幅近半成。 在在證明，有關小川續任行長，我地既想法，同內地人所諗既，出入似乎極大。 歐美媒體對周小川評價極高，經濟學人早前一篇評論，歌功頌德之餘，留下一句伏線，按原文就係，應退不退，反過來以領導人身份領導貨幣政策最高執行部委，看來殊不簡單。 背後原因可能有二：包括領導人對由誰領央行，以至改革步伐其實爭論不休，共識未達，第二就係，周小川對被盛傳既接班人肖鋼，亦有保留，唔願意即時交捧。 美林陸挺早前兩頁紙簡評，認為小川有功亦有過，功者人所共知，但過者亦為數不少：由製造貨幣氾濫，到錯估通脹形勢，導致政策與實際情況相違，而舊年對人民幣國際化後既資金流向缺乏掌握，通通記過。但肯定，周小川仍然功大於過!! 周小川留任，代表內地履行改革？呢個問題，其實內地持相反意見。觀乎被盛傳接班既肖鋼，有關金融改革，利率市場化，以至控制貨幣供應，聽其言，觀其行，其實比周小川更加進取，更傾向市場。 作為銀行領導，形容理財產品係「龐氏騙局」予人另眼相看。 周、肖二人意見不盡相同已經係內地公認。與會者講周小川係改革派，佢可能只係屬於小改革派，肖鋼或者先應歸類為大改革派成員。 再者，比起周小川，肖鋼更熟金融，空降中行之前，比周小川更早打滾人行，所以內地對周小川續任，方便肖鋼熟手工作呢套講法，其實唔BUY。 更複雜問題係，人行如無意外係小川行長，肖鋼係黨委書記，類似既一部兩管模式，發改委亦會出現，蔣潔敏任黨書記，國土部部長改當發改委主任。 好明顯，人行，發改委屬於國務院系統，行長、主任一定最大，但中國亦係黨大於一切，咁即係邊個係老細？又係咪意味權力分配角力蔓延至財金部委？ 權力分配背後，按中國專家觀察，又涉及增長，改革之鬥，大改革，小改革派之爭。發改委大戰人行，唔係新聞，發改委前身係計委，計劃經濟，當然要確保經濟計劃達標。 但目前兩派角力，已經由保增長，控通脹之爭，擴大到，保增長，重維穩，同抗通脹，減債務陣營對碰。 或者，正如內地專家講，以政府工作報告今年...

英女皇對經濟師一直毫不客氣，當日面對一眾經濟學家暗串至今令人津津樂觀。 的確，人非萬能，經濟師亦然，結論歸結論，分析背後理據，其實盡見斤兩。 以近期中，港市場同數據情況，云云分析，屢見經濟師高下立現。香港資金流向為例，股市呆滯，高位止步，資金外流絕對係合理懷疑。 某投行研究部，近日就接連指資金有外流，證據唯一係銀行體系結餘減少，中環人部份嘖嘖稱奇。 首先，結餘升跌，只係反映資金流向其中一個指標。其次，近日結餘之跌，係金管局增發票據以及外匯基金票據付息所致，而技術上，港匯未跌至兌換保證下限，結餘不會降。 銀行界話，由於概念上錯得很，有需要以正視聽！！ 花旗一份報告問道，唔明區內股市持續跑輸美股。的確，區內市估值既抵，增長潛力亦大，但估值建基於經濟，盈利預測，預期一變，估值概念即時走樣。說到底，區內增長預測雖然，形勢大好，但市場現今女王上身，就係對預測有懷疑，對增長有保留。 二月一過，美林、野村話明，首季增長預測有下調風險。 每年，中國經濟預測都係一場鬥爭，分析員有分析員鬥爭，更大問題係自我鬥爭。經濟師指，中國既然增長預測一定達標，就算客觀環境不符，內地鬥爭之爭，唯有係就範。 一，二月，內地經濟數據全數揭曉，通脹升溫或者係重點，但更實際睇，工業生產，零售銷售通通遜預期，出口數字疑似造假，數字與預期貨不對辦，先係重心。 而今次，更有可能係，中國近年嚟，增長概念爆破歷時最短一次！！ 有趣係，經濟師可能比較HEA，又有可能判斷結論需時，大和，瑞銀等一一讚中國經濟好，問題不大。對於零售出現零四年初以嚟最低一次增長，分析員亦表現包容，反貪成為最大擋箭牌。 但既然反貪係必需，反貪效應令消費增速回落，咁即係，之前無反貪因素，零售市道既增長在在不正常，中國轉型消費經濟路更漫長？ 工業生產同外貿數字兩組不盡不同，個別分析員直指，後者跨大。最令人失望係，一，二月份投資推動經濟舊路沿用，但首先建造業固定投資增長原來係零五年嚟最低，其次係資金到位既投資大增，即係，中國首季經濟，大部份繼續係錢作怪帶動。 無人敢講餘下內地經濟點，貨幣政策走向如何。但中環人話，既然領導人定調要防止系統性風險，一旦當局對影子銀行，債務急升等等列為系統性風險一部份，咁收緊政策並非天方夜談。 經濟師目前重點，仍然圍撓達與不達，緊與不緊之間。但內地分析似乎睇到...

上午十點，當爆出內地二月出口井噴上升，進口插水下跌。 中環人形容，電話響過不停，聲浪之大有如行雷!!! 話說，數字一出，股票交易員即時問經濟師點解？經濟師又請教港口分析員既意見。 而港口分析員答案，同經濟師心目中又有出入，經濟師於是向銷售部概括，話係季節性因素同低基數效應，加埋出貨價貴左....。 但基金經理對經濟師既分析判斷又唔收貨，結果成朝就咁吵過不停!! 正如法興所講，二月份內地外貿數據既有理由懷疑，亦勢必引起偽數據疑雲。 出口急升百分之廿一點八，但台灣，南韓同月份出口分別跌近一成六，同百分之八點六。須知，兩個市場都有農曆年假期，難道我國出口商份外勤力，以及人地舊年基數太高？？ 經濟師其中一個解釋係出貨價貴左，但呢個見解被圍攻最多，因為價錢十二個月嚟變化不大，原材料價格部份更錄得跌幅，無理由我國廠商忽然質素取勝，提價能力冠絕全球!! 就算假設二月官方外貿數字準確，咁，既然出口大增，無理由進口大跌，唯一解釋係，工廠一，二月太多單，只顧出口，無時間填補需求。 無疑，農曆年前後，進口偏弱係事實，經濟師通常會指，廠家之前一個月，會提早進口補充生產材料。但我地搵番一月份，深圳港口數字為例，一月進口貨櫃三十七萬多個，比舊年十二月多出唔夠萬五個，談唔上出現左過節前提早添置存貨!! 野村，同法興認為，由於方便結匯，有廠家出口報大數，進口報細數，簡單講，佢地曲線表明，數字係「流」!!! 支持佢地理據，我地搵到有二，包括二月份PMI出口訂單，同新訂單部份相當不滯，其次係內地碼頭吞吐量，同實際出口數字有出入，甚至坦白講，係極大偏差。 如果根據我地從行業了解既資料，一，二月份合計，全國港口兩個月內合共，處理左二千七百幾萬個標準箱，按年其實只係升幅百分之九點五，同一，二月出口合共升兩成三，絕不成比例。 細分睇，頭兩個月，中國沿海港口處理量升百分之八點七，上海升百分之一點五，深圳升百分七點四，天津升百分之七點一。全部，係全部都低過曬出口數字!! 既然二月數字太受爭議，我地又將貨櫃碼頭處理量既一，二月份數字拆散。 以深圳港口為例，頭兩個月處理量係三百五十八萬箱，但二月僅僅佔百五萬，即係二月係跌!! 同樣情況上海更明顯，一月處理既標準箱數目係二百九十一萬個，到二月得番一百九十六萬個，環比大跌三成三。呢批數字，又初步有理由...

厲以寧、林毅夫，內地兩個大名鼎鼎學者，論國際排頭一定係後者稍高。 今日呢位前世銀副行長一番東南亞模式論，論盡內地未來廿年，百分之八增長無問題。聽落，當然係為中國打打氣，但明眼人都知，東南亞模式，靠勞動密集，低成本，高投資，好日子不再，適逢美國再工業化概，林毅夫還可信嗎？ 如果今後廿年，中國增長保持百分之八，繼續由信貸加投資推動，中環人話，你信林毅夫就應該沽中資股。 相反，北大教授厲以寧就提出新一屆政府最大挑戰。 當然，中央只要有決心，厲以寧相信７點５或３點５都不是問題。 但最重要是結構：既要加快城鎮化，優化產業結構，又要避免政府主導投資，帶嚟信貸濫發，同償還債務等問題，所以老問題是：錢從何來？ 佢肯定嘅係，如果繼續行舊路，靠投資推動增長，會再度引發地方債問題，最終波及金融體系穩定，呢個亦係目前、內地經濟最大嘅風險。 兩會期間，口水花四起，官員對外，一定報喜多於報憂，但有留意，幾名前及現任部委，分組閉門會議幾段講話，或者係內地真實一面。 譬如工行行長楊凱生，日前閉門分組會議透露，據佢了解零九年，個別銀行一年內批出既信貸，已經超越近六十年累積既餘額。 又好似前工信部長李毅中，另一場分組會議間接解釋，零八，零九年信貸抽升，背後原因就係財政部無錢。 當時身為財政部長謝旭人，直接向李毅中表明，根本無錢可作救市:「毅中，你別再出主意了，我兜里沒錢了。」(李毅中講話值得細讀, 道出08年四萬億救市前因後果!」 所以，高西慶大罵日本印鈔，拖累別國、劉明康痛批美國量寬不負責任既同時，中國似乎對自己亦製造過信貸氾濫，悔意欠奉。 高增長概念背後，結構嚴重，老外對中國評分，似乎係你增長越高，態度越懷疑。 壞帳一定會浮，問題係點浮，同幾時願意浮。如果內地銀行將拖欠貸款日數，由一百八十日，改為三百六十日先視為違約，又如果，新債抵舊債遊戲繼續，內地銀行體系壞帳，可能永世不浮。 內銀唔信，且信香港銀行。全年業績已經公布既本港銀行，對內地壞帳撥備幾乎全線上升，仲要係急升。恒生升一倍，東亞下半年比上半年對中國撥備多八成六，匯豐多左。而永亨對中國業務壞帳撥備，更係大幅上升十一倍。 中環人話，永亨規模較細，壞帳披露反而較清晰，再者佢地貿易融資做最多，永亨就等如中國信貸市場質素一面...

如果琴晚處身紐交所交易大堂，恐怕無人會感受到、美股創新高既興奮。 同０７年出市代表高漲情緒唔同，可能大家都明白，呢個新高只係「曇花一現」，唔會持久！ 要留意，今次只有道指創新高，理論上大戶好少會追踪道瓊斯指數，相關既指數基金規模只有２７５億美元，大部分都係散戶為主。 相反以專業投資者睇重既Ｓ＆Ｐ指數，追踪既指數基金規模就達到５萬５千億美元，今次真係「盲拳打死老師傅」！ 當然好友會話，股市而家估值平、股息率高，的確以ＰＥ計，而家市場共識美股大約係１３－１４倍，同０７年１７倍比較，固然吸引，股息率有２點５厘左右，更跑贏十年債息１點９厘水平，好友自然不斷煲大利好消息！ 不過唔好忘記，今時今日既十年債息、同０７年既４厘６４比較，跌左一半都唔止，都係托賴個位「普林斯頓」大學教授，而家聯儲局既資產負債表、由０７年唔夠９千億美元，急升到而家３萬億美元水平，估計到年底更會攀升到４萬億！ 但睇下實體經濟數據，無一個可以比得上０７年，ＧＤＰ當年有百分之２點５增長，而家最樂觀都只係１點６！ 而整個美國負債，由當年９萬億美元，升到１６萬４千億美元，國債鐘都就嚟唔夠位顯示！ 睇埋失業人口，當年６７０萬，今時今日？ １千３百萬人，失業既露宿者個個大城市都有，隨時又再上演另一次「佔領華爾街運動」！ 數左咁多唔同數據，唔係嚇大家，但無限ＱＥ既後遺症的確遠比你我想像嚴重。 曾經係索羅斯左右手，協助佢打敗英倫銀行、對沖基金傳奇人物Druckenmiller話，「鴿南克」已經徹底令所有市場訊號失效，無論投資股市、債市、房地產市場，聯儲局都變相幫閣下免費補貼，唯一Suffer，就係無本錢入市既低下階層! 正係由於所有市場訊號失效，Druckenmiller話市場既資源錯配問題已經無可挽救，最後結局只係「Very Very Badly」，大家都會承受苦果! 呢個講法同我地開市埋位占少所講既「摧毀回報」，異曲同功! 咁到底伯南克幾時先會收手?有人計過，如果用聯儲局要升至四萬億美元先救到經濟，以過去三個月聯儲局每月買債同標普五百既關連繫數來計，伯南克心目中既股市目標，係標普要升到二千點！！！ 無論如何，即使大家心目中認定今次股市只係泡沬，一味睇淡都唔係辦法，與其做末日博士，不如好似Druckenmiller咁講，雖然知道最後結果會好悲慘，但而家有錢...

匯豐，渣打。一間盈利差過預期，一間盈利「叫做」創新高。 兩間相同係，各自被環球監管機構打劫，匯豐被搶高達四十三億美金，渣打被掠近七億美金。 所以歐智華，比冼博德，兩者外型各異，賣相不一，但同樣可以歸咎錯不在我。 匯豐盈利跌，可以抵賴被罰錢太多，集團規模過大。 同樣，渣打稅前盈利憑僅僅百分之一增長就創新高，有條件話佢取巧，更可以話佢地成本削減根本唔及匯豐，因為睇番渣打，全年收入增長低於成本漲幅，即係兩年嚟，再次出現NEGATIVE JAWS!!! 從審慎撥備角度睇，渣打比匯豐謹慎，因為撥備按年及半年計，同樣要升。但比較業務增長動力的話，冼博德輸俾九哥，觀乎匯豐香港，盈利升幅三成，渣打香港僅僅百分之七，半年比較跌幅百分之九。 更令人失望係，渣打印度盈利再次倒退，新加坡亦意外走樣，半年跌幅高達兩成三。 中環人話，「靚佬」冼博德，同性格派既歐智華，嚟緊殊途同歸，兩者同樣靠香港單天保至尊。有趣係，兩位備受推祟既「賓卡」，異口同聲強調既係股東回報。 事實一，撇除歐美，匯豐ROE不遜於渣打，事實二，從董事會俾歐智華既評分，減成本易，帳面製造盈利易，但銀行品牌，股東回報，實屬難上加難。 FT用匯控業績考核歐智華舊年表現，金融時報話呢位考生喺合格邊緣危危乎。 資本水平幾乎攞滿分，派息增加一成亦令人滿意，但期內成本效益惡化、股本回報又下跌，兩項都係捧蛋。 有人認為，匯豐，渣打不盡相同，難以比較。但我地唔同意，因為兩者都係依靠區內業務，兩者先後都衰過，問題係時間相差十幾年，更大問題係，兩者同樣面對資金過剩問題。 九哥銳意標榜投放過多資金既概念，因為觀乎年報，匯豐過剩資金高達千五億美金，一年增加超過二百億，歐智華管理既匯豐，資金滿瀉，佢單係俾陳德霖幫手睇著既錢，已經高達二百多億美元。 供股前後只是五年景況，誰也料不到歐智華會有如此Happy Problem! 渣打情況一樣，資產負債表顯示，佢地停泊央行資金規模高達六百一十億美元，相當於八點九年既渣打稅前利潤，過去十二個月，佢地停留央行既過剩資金，大幅增加百四億美金，增幅兩成九，幅度比匯豐還要大。 分析員話，以渣打模式，出現資金寄存央行大增情況罕見，於是無論歐智華，冼博德，雖則各為其主，實則任務相同，就係點解決資金過剩問題。 亦因為咁，中環分析界話，銀行股買與否，業務已是其次，賭派高息，賭用過剩資金，人為提升...

最後一次發表政府工作報告，溫家寶用咗一半篇幅，總結佢過去十年的政績。 由新建成的航空母艦，到載人航天工程，當中講得最多的，係佢帶領政府應對金融風暴。 似乎溫總是特別介懷，當年四萬億救市，一再強調當年決定是完全正確。 當然，作為市場、對溫家寶既政府工作報告，最重要是如何為今年經濟定調。 面數: 增長目標、維持喺百分之７點５，通脹預測，就稍為下調至百分之三點五。 經濟增長目標不變，係咪反映經濟形勢無咩大改變？ 大數可能一樣，不過中間細節就有變化，特別係要留意Ｍ２，即係廣義貨幣供應。 今年目標係增長一成三，低過舊年嘅一成四，亦係十三年嚟最低增幅。 顯然，目的相信係避免信貸濫發、同埋刺激已經過熱既樓市。 雖然貨幣政策可能從緊，有經濟師亦提醒，係溫總將今年政府財政赤字預測，提高左四千億人民幣，總數達到一萬二千億人民幣，佔ＧＤＰ比重百分之二。 經濟師相信咁係要靠擴張性既財政政策支持經濟，抵銷部分收緊貨幣政策既影響。 確實、由通脹、M2、出口、財赤等五個主要目標，三個調低，兩個上調。 經濟師認為，內地政策已經有微妙變化。 通脹，同廣義貨幣增長目標同時下調，反映貨幣政師唔再寬鬆。德銀更形容，係偏緊象徵。 瑞信陶冬留意到，報告入面首次提到要處理銀行既「表外業務」，陶冬認為係中央終於正視影子銀行問題，加上通脹有上行風險，佢認同人行既寬鬆大門已經關上。 值得留意係，今年形容目標係百分之7.5「左右」。 花旗形容，咁係變相下調增長目標，估計係通脹威脅有關，就算財政政策都唔會一面倒擴張性。 總括呢一份，係溫家寶咁多年嚟字數最少的工作報告，唔夠兩個鐘頭就讀完，字數亦比往屆少。 同樣係卸任前最後一份政府工作報告，人大代表對溫家寶嘅反應，似乎無上任朱鎔基咁熱烈。 朱鎔基喺03年宣讀完報告之後，代表掌聲持續不斷，甚至打斷大會主持吳邦國的講話。 而溫家寶讀完報告，代表鼓掌約30秒停下，喺佢向主席台及台下三鞠躬後，再有15秒嘅掌聲。 顯然，掌聲已經反映咗代表對兩代總理嘅評分。 不過亦有評論指，過去十年溫總在眼下的體制下，可能是共和國歷史下，權力最小的一位總理。 內地歷史學者章立凡說得中肯: 「在上任時有很多抱負，但是在離任的時候，他帶走的是無限的遺憾。」 按規定，領導人退休後要公開發表言論，事先必需得到...

三年策略日定下計劃進入第二年，但多個指標都令市場失望。   股東應佔盈利跌一成六。而稅前盈利就有２０６億美元，下跌百分之六。 單計第四季賺左四十四億美元，兩個數都增過預預期。 撥備叫做有所減少，達８３億美元，減少三成一。但按季仍多七千二百萬，升 4% 。 唯一驚喜係派息，第四次中期息增加，每股派十八美仙，多左 29% 。 集團仲預告，今年度頭三季既每季派息，會增加至零點一美元，增幅一成一。 業績已經叫左差過預期，更叫市場驚心係兩年前策略日提出既三項指標，大部分都「肥佬」 ! 期內，滙控核心資本充足率，由１０．１改善到百分之１２點３，係唯一達到策略日定下既基準目標。 至於股本回報就因為英美罰款而大跌，由百分之十點九，降至百分之八點四，完全遠離目標１２－１５％水平。 至於「成本效益比率」，同樣令人失望，由百分之５７點５，惡化到６２點８，如果按實際基準，更只有百分之６６，遠低於目標四十八至五十二水平。 歐智華話，三年計劃定下既目標，已經達到大部分。又話目前已經具備條件、符合巴塞爾三資本協定要求，令集團可以增加派息。 不過集團為英美違規指控、合共要罰款４３億美元，其中為英國客戶既賠償，第四季就要額外使多六億四千萬美元。 滙豐話，喺美國業務涉及洗黑錢事件後，向部分管理層追回花紅，但無透露金額同追回對象，市場一般相信係舊年中退休既執行董事霍嘉治。 至於行政總裁歐智華舊年嘅花紅連薪酬，按年減少百分之７，得７４３萬英鎊，其中年度花紅佔１９５萬。 九哥顯然要將市場注意力，由 ROE 轉到去派息，期望少少甜頭可以令股東收貨。 不過那完全走樣的股本回報，加上成本失控急升 11% ，令成本收入比率急升，九哥呢方面恐怕不能如英美違規洗錢般，將自己置身外 ?!   救左匯控舊年盈利表現，再次係本港同亞太業務，香港全年稅前升盈利創新高增長三成，加埋亞太業務因為出售平保股權，升近四成，按季升 1.18 倍。 在此要再次為本港二萬多個員工喝采 ! 兩項業務佔左整體盈利比重，由一年前六成，增加至八成六。 不過歐美業務表現仍然令人關注，特別係歐洲，因為第四季錄得２５億美元虧損，令全年蝕左３４億美元，而北美單計第四季，仍...

中銀香港近乎破天荒，調升清算行存款利率，被中環賓卡認為，著數不多，但就埋下危機。 香港人民幣業務，大好獨家優勢，俱往矣，星，台夾擊，再加倫敦，人仔離岸市場從此多事。 首先，咩係清算行存款息率？簡單講，係經營本港人民幣業務既銀行，過剩頭寸，可以存在中銀收息，呢個利率，正正係清算行存款利率。 觀乎今次加幅，僅僅零點零一九厘，即係行內人講，一滴多啲，數字上同台灣睇齊，但由於當地清算行中行台北分行同時提供既清算行存款年期，比香港多三種，息率比較，中銀香港新加入既一，二，三個月清算行存款，利息僅僅兩厘二，至兩厘四，寶島單係七日期已經去到兩厘七。 結論係，中銀無損失，本地銀行亦無著數!! 中環人話，中銀就算再大幅提升清算行利率，對銀行停泊資金吸引力有限，事關內地息率高，可以套息，反而金管局舊年老早就放寬人民幣業務銀行現金頭寸規定，再肯放落中銀，或者深圳人行，除非果間銀行係「傻」。 但點解小小加息一滴，帶出香港人仔業務危機疑云云？皆因獅城愈戰愈勇，監管無金記攞命咁嚴，外匯交投亦多，更重要係最近正式加入工行作為當地清算行，中環十個賓卡，十一個都話係最大殺傷力一次。 原因好簡單，工比中，工行規模贏，工比中，工行客戶亦多。數字上，截至舊年年中，中行LOAN BOOK係四萬七千九百幾億人民幣，當中三萬二千億係公司類貸款。 相比，工行LOAN BOOK八萬多億，公司類貸款五萬三千億，呢類公司貸款，正正係人民幣貿易結算既潛在客戶!!! 資深賓卡直言，中行知道工行勇奪星州，眾人騰雞異常，貸款量佢地一定輸，貿易相關LC，工行拋離中行，但呢個表面係中工分爭既問題，其實係港，星競爭加劇起端，因為工行以後有客戶做人仔結算，一，一定自己納曬，二，就係索性獅城進行，唔用香港。 聽完，大家明點解大好形勢不再!!! 有銀行話，中銀香港今次象徵式上調清算行存款利率，意義大於實際。因為本港人仔，同台灣人仔報價，即係CNH，同CNT，價差唔夠七十點子，銀行犯不著港，台資金互調套息。和廣北希望係加你一滴顯出誠意。 中銀既如意算盤係，保著香港既人民幣資金池，中行台行再壯大當地人民幣業務，屆時港台人仔資金互通，一切盡在中行掌握中!! 業界觀察，台灣人民幣業務比香港更有前途，佢地早前首日接受人民幣存款，已經盡爆寶島，而最近，當地個別人仔債，債息成本比香港低一厘，吸引極...