2010年8月30日星期一

重藥

新加坡再推穩定樓市措施,係舊年以嚟第三次出招。

新加坡當局上晝突然宣布,由即日起,買第二層樓首期,由目前八成,收緊到七成。

另外當局進一步擴大二月方開始徵收的物業徵稅(SSD),任何物業、同土地,三年內轉手,需要交最多3%徵稅,較目前一年內轉手先要俾稅更嚴。

新加坡總理李顯龍星期日晚發表電視講話,表明當局舊年嚟,兩度調控樓市都唔成功,所以要繼續推措施。

佢話,明年會增加單位供應到二萬二千個,較今年多六千。

亦會收緊外國人到新加坡工作嘅數目,由原定十萬名,調低到八萬名。

新加坡上半年樓價累積升一成一,按升幅計其實與香港幾乎一樣。

其實新加坡與香港的樓價上升問題頗類似,雖然性質不大一樣。

當然人家的熱錢流入情況與我們不同,香港樓市是受惠阿爺政策,大量樓盤係同胞「現兜兜」買入,而且只係「愛擺不愛理」,很多時寧願丟空也懶得放租。

相反,新加坡無中國慨念,熱錢流入是因為很好經濟增長,單計上半年增幅達到17.9%,可能係全球增長最快市場,而全年估計亦會有一成三至一成半增長。

單看一個環球片場同新建賭城的水洩不通景況,大概會明白人家是放了很心機去改造經濟。

另一個推高樓價因素是實質需求,雖然新加坡與香港一樣面對出生率下降、但原來每一年新加坡都引入大量外來移民,去年就增加了十萬人。

鄭汝樺講過,政府的房地產政策並不是鼓勵市民置業,不過李顯龍就表明、新加坡長遠政策是確保市民可以擁有(Own)及有能力供讓(Afford)自己的居所,因為咁樣先可以令市民分享到整個國家增長的成果。

石Sir周末在他的專欄講過,面對樓市斷層,而家先加大供應力度肯定對樓市於事無補,現時急需的是壓抑需求。當然因為出生/ 出身/ 換樓的置業需求無可厚非,但單純的投資/ 投機需求是否要鼓勵? 單單計算一個投資移民計劃可以購買物業,就應該快快取消,因為政策已經不合時宜、甚至可說是與民為敵。

買樓定租樓當然是個人決定,亦要視乎自己財務安排,政府不可以強迫人買樓。但問題係如果有心置業,但就連中產的薪金都苦無能力追上樓價升幅,咁樣變成資產升值的好處,最終只會由一小撮富有階級所壟斷。

在德國,政府是嚴禁炒樓,持有「第二套房」(內地用語,但真的很傳神)的成本是非常之高,轉手亦要徵收巨額的物業增值稅,令投資物業變成無利可圖。可是人家仍然是歐洲第一大國,單是工業一個Sector已經足以支撐整個國家經濟。

當然,要禁止在本港投資物業是非異所思,不過增加炒樓/ 投資物業成本,肯定是民意所歸,到底特首能否在十月時真的做到「民心所向」?

八十大壽

先要祝福肥仔生日快樂!

原來佢同股神巴菲特竟是同月同日生!!

當然,人家是八十大壽,即是說肥仔仲有五十年可以迎頭趕上!

說回巴菲特,原來他的生日願望,係工作到一百歲。(!!!)

股神大壽,唔少傳媒大標題祝賀。CNN仲比高帽,話巴菲特係全球最偉大嘅投資者。

踴躍嘅網上留言,證明呢位股神深受愛戴。

鐘意飲櫻桃可樂、食漢堡飽嘅巴菲特話,自己身體好健康,亦好鍾意分工作,所以無諗過退休喎!

不過股神自己都知人終究是有限期的,佢期望老友蓋茨,一旦發現佢頭腦無咁靈活、就會提點佢,係時候退休啦!

至於近日美國傳媒熱烈談論嘅接任人安排,就暫時無咩新消息,不過大家可以留意下個月底,巴菲特,同蓋茨到訪中國,到時誰人會伴隨左右。

巴菲特此行亦會呼籲內地富豪,加入佢地捐出一半身家嘅計劃。

內地傳媒揣測,同巴菲特老友嘅比亞迪王傳福、成功投過巴菲特午餐嘅趙丹陽、步步高嘅段永平,仲有福布斯富豪、好似係蘇寧集團張近東,娃哈哈宗慶后,都會係巴菲特游說對象。

點都要比下面掛!

但內地傳媒已經大潑冷水,話真正參與股神慈善大計肯捐錢嘅中國豪富唔會多,甚至係零!

點解? 一來文化唔同,二來,中國人對錢睇得緊啲,寧願自己雙腳一伸、由後人打生打死演繹爭產案?

或者益個風水師都係一個選擇啩!!!?

2010年8月27日星期五

貪污之都

呢個星期見到既幕幕片段,都可以話觸動全港市民既心,我地為死難者哀悼之餘,亦希望傷者可以盡快康復。

對於菲律賓警方同政府既處事手法,連日嚟本地都提出左唔少質疑同批評,經濟學人仲形容係菲律賓最「羞恥」既一日。

但有一個更深層次問題都值得分析下:
就係一個質素咁低劣既政府,點解經濟同股市都可以有咁凌厲既增長?

如果睇菲律賓股市,由零八年十月低位計,反彈幅度超過一倍,就算單睇今年,累積既升幅都有兩成,係全球表現最好既市場之一,更係連續六個季度上升,分析估計今年內好大機會會創出新高。

同樣令人費解係GDP表現。當地第二季出乎意外反彈左百分之七點九,係三年嚟最大升幅,同時亦推動左披索今年升值百分之二,主要係政府開支同消費抵銷左農產業萎縮既影響。

諷刺既係、市場對菲律賓市場有咁大信心,就係源於呢個唔肯聽特首電話、態度又輕挑既菲律賓總統「阿奎諾」三世身上。

佢六月上任以嚟,打正旗號話要打擊逃稅同貪污,當時市場都幾Buy呢套。

股市由六月開始升左半成。但點知呢個總統其身不正,唔單止輕視左今次港人挾持危機,仲冷淡對待我地特首,直至中方高調要求介入,態度先一百八十度轉變,事隔兩日就嚟下半旗「致哀」,但就令人好覺係「猫哭老鼠」!

經濟學人話,今次挾持人質事件,對阿奎諾三世銳意推廣旅遊業,係做成致命打擊,因為佢原來打算吸納國內同胞到國內旅遊,而家,哼!

但今次慘在、政府大幅削減開支,全國十二萬名警察既無資源又無人工加,幾乎全國上下都知自己既警察靠唔著,個個都要靠貪污去幫補。

結果所謂特種部隊就算到左現場都唔肯出手,慘令我地港人遭遇毒手!

舊年由柏林一個機構做既貪污指數調查顯示,菲律賓既排名由131再跌至139位,遠差過泰國既84同印尼既111位,貪污之都當之無愧!

睇下接任馬尼拉警察首長嘅警官,只係做咗一日就被撤換,原來當地傳媒揭發,同十幾年前,涉及綁架同殺害三個販毒香港人有關。

你話一個咁既質素國家,熱錢都膽敢流入,係咪本死無大害??!

2010年8月25日星期三

離經叛道


聯儲局周年大會,周五會在風景如畫的Jackson Hole舉行。

金融時報Lex話,唔明點解次次呢啲講世界經濟危機的論壇,都要揀一些最美麗的城市,如果要趁番目前的經濟環境,實際應揀一些更殘破的地區,咁樣先可以突出要解決雙底衰退的迫切性。

先看看金融市場最近的怪現象:

*美國、英國同德國既債券息率,都創出歷史新低。
*日圓匯價急升,兌美元創15年新高。

日圓滙價近日一面倒上升,迫得連財務省都可能六年來、首次會考慮採取單方面干預行動,日本央行亦不排除進一步放寬貨幣政策,擴大量化寬鬆至30萬億日圓。

與日圓上升同一理由,債市急升係由於擔心環球經濟持續放緩,投資者將資金放到風險最低既債市,令到英美同德國既短債息率,先後創出新低。

所以無論是日圓抑或債市,出現強勢原因只係市場擔心美國以至環球經濟出現雙底衰退,中央銀行可以做嘅根本唔多,即使央行擴大量化寬鬆政策,亦唔會扭轉日圓/債市嘅升勢。

出現目前局面,係市場共識雖然全球唔會陷入類似日本九十年代既「迷失十年」衰退,但係經濟只會緩慢復蘇、加上潛在通縮威脅,利率係會長期保持偏低水平,甚至直到2012年。

由於經濟前景不明朗,資金不會選擇投資高風險資產,因此股市不會再出現類似09年的報復性反彈。

好像羅傑斯及末日博士麥嘉華一面大聲呼籲盡快避開美債,理據都不外乎係無一種資產會長期牛市,似乎不了解投資者現時根本毫無選擇。

其實低息維持長時間,已經係市場一早共識,但要資金真正到位推動經濟,包括伯南克在內的中央銀行家,應該做的是令市場相信通脹會重臨,令資金可以透過增加借貸、投入實體經濟。

不過問題是,像伯南克這類央行銀行家,他們的血入面一直流著都係抗通脹的細胞,又怎說服他們如此「離經叛道」?

2010年8月24日星期二

獨孤求敗

拜讀過黑天鵝著作,都知道Taleb見解獨到,但又帶點古怪。

Taleb講過,伯南克一旦連任,佢會謝絕一切訪問,以示抗議。當然氣憤過後,繼續重新做人。佢最近又接受傳媒訪問,分享佢對市場睇法。

Taleb堅持,唔相信經濟會持續復蘇,而投資者情緒,會徘徊於擔心通脹,與憂慮通縮之間。

因為有咁睇法,Taleb話,買股票賺唔到錢!

咩先係好投資,Taleb見解同羅傑斯相若,正係「食」,即係農產品有關必需品,所以佢近期獵物,就係買果園。

唔難理解,黑天鵝理講,正係眾人以為天鵝係白色,原來可以走出一隻黑天鵝。亦因為呢個理講,佢同交易神童皮茲納戈爾創立左一個黑天鵝理論為基礎嘅對沖基金,名為Universa。

Universa基金零八年海嘯期間回報百分百,但舊年同今年以嚟,都係負回報,結果俾行家話,呢隻係喺升市搵唔到錢嘅對沖基金!

亦可能係咁、有評論更形容佢係華爾街中嘅「獨孤求敗」。

成績雖然一般,但近期宏觀大環境變化,令中投都對呢隻黑天鵝有興趣,連埋有意投資嘅中東主權基金,黑天鵝基金管理嘅資金有可能由依家六十億美金,增加到一百億美金。

天鵝有價,證明的確好多大戶睇唔通。市場現時的確風平浪靜,但回看歷史,大宗併購活動,同大量企業集資之時,正係大市見頂之日。

講番Universa呢隻黑天鵝基金,運作有別於一般對沖基金。

佢地性質類似保險,假設你有十億身家,但認為其中一億係高風險,咁你只需向黑天鵝基金提供1.5%管理費,即係150萬,你就既可對沖,亦可以有機會享受對沖利潤。

悲慟


心情愈想愈難受。

相信港人心中只有一種感覺,就是對受害人的懷念及致哀。

對經歷災劫的傷者及受害人家庭的深切慰問。

對捨命救人的英雄最祟高的敬意。

對菲律賓警方、政府以至總統的無能感到極度憤怒。

可是除此之外,已經唔能夠再做什麼,可能正是這個原因,令自己心情愈來愈難受......

智商

黃光裕智商高啲定陳曉高啲?

可以肯定的是,即使智商高、都唔一定代表人格好!

連日來,國美股東之間爭拗,都成為內地傳媒焦點報道,注目度肯定高於本港。

可能是黃光裕在內地風頭太高有關?

國美董事會雖然萬分不情願,但最終都同意因應黃光裕要求,喺下個月召開股東特別大會,到時會就住罷免主席陳曉職務,同取消增發兩成新股授權投票。

面對九月二十八日呢個死線,雙方都不敢怠慢。

黃光裕陣營,評擊國美啱啱公布既上半年業績,指同主要競爭對手相比、以零八年同今年既市場份額比較,國美比對手領先既分額,由16個百分點,收窄至兩個百分點,指責陳曉令國美喪失領先優勢。

黃光裕要求、喺下個月既股東會上,提名自己個妹「黃燕虹」同加入董事會出任主席。

而陳曉就打人情牌,喺接受彭博同華爾街日報訪問時話,對於呢位曾經係佢老板、導師、心中既一位朋友﹐而家竟然意圖迫自己下台﹐令佢感到意外。

陳曉話,佢無法按照黃光裕既想法來營運國美。

而家雙方勝負係掌握喺嚟緊一個月股權變化,以目前形勢看,即使貝恩資本行使認股權令持股量倍增,但只可以令黃光裕持股量攤薄至三成,估計好大機會會增發新股。

金融時報提出,黃光裕提出既一既指控當然係毫無理據,特別係話陳曉引入貝恩就係投靠美國、更加係令人可笑,因為正正係六年前黃光裕、將國美介紹比全球既機構投資者認識。

不過國美舊年六月復牌以嚟、市盈率都只係能夠維持喺17、18倍,相反主要競爭對手蘇寧,
市盈率就由12倍一直炒到上24倍,投資者有不滿都係可以理解。

華爾街日報估計兩邊陣營支持率都好接近,對股東嚟講無疑面對兩難,如果唔想公司股權攤薄,就只有支持黃光裕,但由理性出發,投資者應該係投票支持陳曉。

2010年8月23日星期一

世盃後遺症

世界盃期間,南非唔單止盡力做好賽事,同時亦向外宣傳當地係最理想既投資地點,估唔到咁快就有回報!

持有Nedbank五成二股權既主要股東OLD MUTUAL表示,正就出售股權,同匯豐獨家商討,一旦成事,匯豐需要向佢地在內股東,收購最少合共七成股權,外界指,按市值計最少要六十八億幾美金。

其實滙控行政總裁紀勤、一早都開晒聲話睇好南非,佢之前自創既「靈貓六國」(CIVETS),分別就係哥倫比亞(C)、印尼(I)、越南(V)、埃及(E)、土耳其(T)同埋南非(S),原因係當地有大量年輕人口,經濟多元化,加上政治環境穩定,肯定有前途喎!

其實原因都有些牽強,前兩個原因都仲勉強收貨,但說到政治穩定,就好難令人信服。

或者倒轉說,是現有新興市場已經有過高溢價,要用低P Book買貨,唯有揀些更高風險的市場。

看看NEDBANK,係南非第四大銀行,市值大約九十八億美元,規模也不算大,但就先後吸引到渣打同滙控兩大新興市場王者睇中,先後提出收購,原因不外乎Nedbank無論喺企業同零售銀行業務都有優勢。

本身面對減債壓力,OLD MUTUAL話,揀匯豐係佢地屬國際級銀行,由佢地收購符合南非利益。

對於滙控今次部署打入非州市場,大行普遍都話策點正確。摩根大通計過,若果滙豐嘅收購價有兩成半溢價,收購整間NEDBANK,要動用112億美元,市帳率去到1.96倍,高過滙控嘅1.3倍,但收購就有利連貫非洲同亞洲業務,提升價值的成效。

其實我話最有眼光反而係工行,佢地早喺08年已經入股當地最大銀行Standard Bank兩成股權,當時大家都唔明白點解工行要咁做,而家就終於發現、原來佢地早行左兩年時間!

不過今次匯控收購未必一帆風順,金融時報Lex話,雖然當地表面係歡迎外資入股,但佢地最近就表明,唔希望有過多本地銀行被外資收購,睇下紀勤最終係咪真係可以買到呢隻靈猫!

2010年8月20日星期五

報國

FT今天有篇文章令人莞爾。

話說北海道千歲有一個新樓盤開售,首批十七幢小屋公開發售,每間House賣三千萬Yen,

由於唔係一線城市,雖然設有機場,但講得白的,根本係鄉下,原本不寄厚望。但點知內地資金大隊殺到東洋,二話不說,一口氣買曬,每幢作價圍起大約三十五萬美金。

熟識日本朋友話,十七間屋咁嘅價錢,聽落好抵,但鄉下地方,其實一的唔平。

千歲神話,由國家資金隊蒂造。東瀛本來寄望,廿年來泡沬爆破嘅困局,亦可以由我國同胞協助解困!

根據金融時報報道,國家資金隊對東瀛物業市場食指大動,無他,錢無地方使,令到日本近期多個物業銷售講座,坐滿我國神州子民,買樓地點由北海道直落福崗,今次仲唔係變相資金曲線侵瀛,大報六十年前國仇家恨?

有日本學者戲言,說自己已是"來自三號國家--日本"。顯然佢係悼念一個時代的終結,影射日本第二季度經濟已經被內地超越!

日本經紀話,內地人同佢地講,日本買間屋,就係佢地第二個家。其實,都係一個字: 利字當頭。

論回報,原來日本物業平均有八至十厘回報,比香港上海兩,三厘多的是,條數根本係人都識計!

當然,中國人係聰明。要投資,當然係賺盡。日本買間屋,其實買埋幅地。拆一間起三間,再分租,就即係由一變三,完全係「空間大改造」。

所以近期,唔少由中資買落嘅日本祖屋,通通拆曬,起過較細嘅TOWN HOUSE,對象就係日本留學生,既賺回報又可以幫到同胞,仲唔係一舉兩得?

拆一間,起三間呢招,中國人喺澳洲、加拿大已經連番建功。今次係繼解放後,第二次資金移民潮,全球資產漲價,怪就怪,錢唔見得光,亦都捉唔著。

所以我更信內地人完全唔志在收租,佢地買左樓後,根本唔會放租,因為要收回物業實在過於麻煩,更重要係佢地「唔志在」!

同胞深明,將賺得的錢放在國內,無論如何隱敝,阿爺都有方法充公,只有放到海外時,那些錢才是真正在自己錢包內,因此那怕物業只是納空租,他們也不大介意。

唔信可以去西九睇,要揀夜晚喎,數數有幾多單位有燈火?

2010年8月19日星期四

McBond麥樂債

漢堡包同人仔都可以拉上關係?

作為全球快餐文化代表,麥當勞成為首間外資非金融機構、喺香港發行人民幣企業債。

雖然總金額只有粗粗地2億人民幣,但象徵意義非同小可!

最近公布的麥記全球銷售中,包括中國在內的亞太區,銷售急升一成,比歐美的百分之五高出一倍,顯然是麥記的重要高增長市場。

今次麥記票據票面息率為3厘,年期僅三年,說不上吸引,而且只以機構投資者為主。

要了解為何老麥會在本港發債,先回看麥記在內地的發展: 雖然目前全國分店達到一千間、員工逾五萬人,但其實並非一帆風順。

由九零年在深圳開設首家分店,麥當勞在內地就不斷被批評食品不符合中國人口味,又指薯條可能致癌,到今年七月更爆出國家食品藥品監督管理局,通報麥當奴麥樂雞的檢測情況,對社會關注的麥樂雞中含有「特丁基對苯二酚」和「聚二甲基硅氧烷」事件,進行認真研究。

雖然最終麥記可以過關,不過事件再次突顯外資發展內地的不和諧。

不說不知,原來中國已成了麥當奴在美國以外、最多分店的市場,所以雖然面對諸多批評,但這位麥叔叔仍然選擇了在本港發人債。

老麥話會將集資所得,用喺中國業務營運,目標係2013年將分店數目倍升至2000間。

以老麥今時今日七百多億美元市值,股價更突破70美元創近年新高,區區二億人仔又豈會放在眼內。

但今次可以搶飲頭啖湯,不但贏了聲勢,更重要是一洗我國子民對老麥的老外形像,變成「同洗人仔」,豈不是同聲同氣?

所以有理由相信,如果中國證監而家開綠燈,麥記可能比匯控同中移動更心急回內地上市!

當然,今次麥當奴發債可以如斯順利,與內地希望透過這個國際最名的品牌,宣傳人民幣國際化不無關係,當中亦可見中央真心希望加快人民幣開放的步伐,所以香港企業根本難爭長短。

對香港而言當然是另一里程碑。繼合和後,今次係首次有外資非金融企業在本港發債,結合埋最近內地開放的人民幣回流機制,以及中國決定開放內地債券市場,俾境外嘅中央銀行同貨幣當局投資,一切都為香港這個離岸市場作好準備。

市場亦全面看好相關最新發展,相信隨着投資選擇增加,香港的人民幣累積速度會加快;同時有助香港發展離岸人民幣中心,增加海外機構持有人民幣的意向。

2010年8月17日星期二

短命措施

1. 政府穩定樓市措施推出唔夠四日。
2. 長實四年來,首次動用七十六億幾投地。
3. 145口來回叫價,破左歷來最多叫價紀錄。
4. 有業主原本擔心政府既穩定樓市措施,將單位減價半成,而家見賣地成績遠超預期,將單位反價一成。

這一切說明甚麼?

就是笑你政府無料到!

賣地場上,一地眼鏡,同上次九招十二式唔同,上次用行動表白不滿,今次就用真金白錢,向政府表白樓市降溫措施無料到!

長實自己解話,話兩幅地都特別,所以一早做定規劃,而整個賣地過程,長實亦早有部署。

超人七十六億幾連奪兩地,唔使多化氣力,已經令政府一套措施,變成短命救市招。

誠哥自己叫人量力而為,豈料自己一於去到盡,而長實在分析員會議亦話,依家唔係增加土地儲備適當時間,誰不知,今日成為近四年嚟首次投地,深切體現孫子兵法中兵不厭詐!

發展商肯用萬蚊呎價搶,花旗話,進一步增加政策風險之餘,更顯示市區地渴求!

上星期政府得意洋洋話,三幅地有得賣,誰不知,五百幾個單位,底價盡露。

去到呢刻,我係發展商,仲有咩好驚?

紅磡呢幅背靠海濱南岸,面向將來綜合發展臨海地,夾正中間。點解競投遠比預期激烈?!

即係話,小超一team好叻既同事,睇到嘅野,我地睇唔到。

紅磡地前一塊嘅綜合用地,可起酒店,規劃上,誠哥呢區有經驗,技勝一籌,佢一定志在必得。

測量師預計,計埋發水、建築成本,亞皆老街幅地起好後,要賣到萬四至萬七蚊呎。紅磡灣幅地,更估計要賣到過萬五蚊呎,全部都係豪宅價錢。

最慘係過去兩日信錯政府、以為措施有料到減價放盤的業主,唔知可唔可以上街、叫鬍鬚曾賠番錢?!

Power Lunch

喺中環人都知,而家要喺中環食個似樣既Bussiness lunch,唔預早幾日booking枱,要喺IFC或者港麗中菜廳食飯,幾乎肯定無可能!

恐怕遲啲大家都使咁愁,上任後首項主要政策改動,港交所行政總裁李小加,揀左一個十年嚟都做唔到既「燙手山竽」、延長交易時段!

依家港股十點開市,四點收市,加埋四個鐘交易時間,唔止係區內最短,以全世界最主要既二十個交易所計,香港兩個鐘既Power Lunch時段、係當中最長!

七年前交易所都曾經諮詢過市場,希望延長交易時段、點知遇到空前既反對,結果死腹中!

為左配合內地交易時間、現在的建議是早半個鐘、即係九點半開市,四點收市不以不變,
午飯時間縮短改為12至一。

七年前啲經紀仲可以用延長時段無助增加生意嚟反對,但今時今日我地同祖國既合作又競爭,你一來遲人地半個鐘開市,人地下晝開市你就放食飯,咁點同內地競爭?

望下今年成交額,雖然內地股市係全球表現最差,但人地平均每日成交,仲可以有一千五十億,比香港足足跑贏七成,點可以唔發力追!??

原來而家唔少交易所都無午飯時間,歐美幾乎都欠奉,亞洲就得中國、香港同日本有。

如果一旦落實,香港交易時間比上海多個半鐘,但比日本,同新加坡構思嘅交易時間短。

不過一旦縮短食晏時間,影響都有唔少層面既人,因為經紀之外,其他配套好似係結算、銀行、交易所同監管機構,大家個「胃」都要適應新既生理時鐘!

彈性食飯事少,中環一帶食肆影響先大!

IFC間全城最貴既米芝蓮三星法國餐廳,已經要叫救命,因為食三道菜既法國大餐,就最少要個半鐘,你話第日點趕得切!

反而蘭桂芳之父盛智文就話影響唔大,因為就算點趕,人都係要食晏,最多就係食少幾個Drink,唔好搞到自己醉晒!

不過單係延長時段,唔足以救到生意。而家全世界都興講「高頻交易」,經濟學人就計過,以每宗交易指令執行時間計,香港要九「毫秒」,比全球最快既納斯達克既零點177「毫秒」,人家快我地五十倍!

唔止,而家落後我地既新加坡同巴西,已經引入「高頻交易」,包括喺交易所附近安置呢啲好似足球場咁大既高速電腦同Server,新加坡目標係要成為全球最快交易所,一個指令可以喺百萬分之90秒內完成!

人家就不斷求變,但我地就為左保著交易所壟斷地位,就抗拒引入新交易平台,似乎單係延長時段都唔足夠!

都唔使諗得咁長遠,好似蘭大師話「齋」,大不了咪食快餐或者麥當奴,係時候認真諗下開番檔快餐版的Moneycafe!

2010年8月16日星期一

Party Over

政府推出新措施壓抑樓市,令過去周末屋苑成交急跌近六成。

一手市場同樣降溫,過去周末開左四十三張單,成交量急跌一半。

至於新措施對樓市影響,以里昂睇得最淡,報告用派對完結嚟形容,認為係過去十六年最強力既干預措施,扭曲左供求。

佢地將全年樓價預測,由原本升一成半,下調到只係升百分之六。

與其信大行、為左要為樓市把脈,我們又去請教卓百德。

佢話,政府新推幾招,頂多只會令交投短暫降溫。

佢好肯定,樓價未升完,原因正是息低、地少,係改變唔到樓價升勢原因。

佢批評,政府推三幅地,起得5百幾個單位,係毫無誠意,亦更令市場洞悉政府底牌: 無熟地可推!

過去三十年,見盡本港多個樓市周期,佢話過去一年樓市反彈浪,係佢經歷過最急一次。

目前樓市未有泡沬,但再升3,4成,會有問題。

要令市況盡快降溫,佢建議1. 肯定要大手加印花稅,增加炒樓成本。2. 要從銀行著手,可以要佢地收緊物業估值。

我們很認同加印花稅呢點,政府大可以同按揭睇齊,將1200萬以上印花稅加至6-7%以上,如果短期內轉手,可以加至10%,將炒樓成本進一步增加。

至於估值、呢個亦係多項措施之中,用家最要留意:你岩岩買嘅單位,除時可能估價不足!

以上個月呎價創新高嘅半島豪庭為例,周末以450萬,成左第二座低層一個單位,當時恒生同匯豐已經估唔足價。

星期一再睇估值再跌百分之二,去到417同407萬。

據了解,部分中小企銀行因為上半年達標,暫時唔批按揭,部分亦同我地講,上會最好預鬆的,因為估值無以前咁跟市價。

好似上商呢類資金成本較高銀行,更停批同業拆息按揭。

是禍不是福

看過到日本旅行嘅中國遊客,真係零捨捨得洗錢;連日本人嫌起錶要七百十一日圓太貴嘅東京的士,都照搭,養活唔少做少咗本地客生意嘅的士司機。

不過有的士司機話,雖然自己收入好左,但見到而家中國人享受緊日本過去製造的經濟繁榮,心中不無唏噓。

所以今日公布、日本第二季國內生產總值比中國超越、造就中國成為第二經濟體系既時候,呢單新聞就成為左歐美主流傳媒既頭條新聞!

日本本年度第二季嘅「國內生產總值」,係一萬二千八百億美元;少過中國同期嘅一萬三千三百億。

好多經濟學家都話,中國喺第二季咁早已經爬過日本頭,而日本經濟又呈放緩迹象,預料嚟緊兩季數字都唔會好得去邊,此消彼長之下,中國已經取代日本,成為僅次美國嘅全球第二經濟大國。

有民眾對於國家經濟,俾中國爬頭感到意外,更有人誇張到話要比子女學漢語!

10年前﹐中國是世界第七大經濟體。2007年﹐它超過德國成為全球第三。2010年﹐預計德國將排在第四位﹐法國第五﹐英國第六。除中國以外最靠前的新興經濟體是巴西﹐預計它將排名第八﹐僅次於意大利。

大家要留意,GDP本身只係一個總數,如果計及通脹率、人均值、或者購買力去考慮,排名又唔同。

經濟學人雜誌就提出以巨無霸售價,去計算PPP(相對購買力);中國人平均收入,只要有日本人一半,就享有同等生活水準。

金融時報形容,如果以購買力水平計算,中國早在十年前,已經超越日本!

有誇張的預測更指,如果中國保持呢個增長幅度,咁最快就可以喺二零三零年,就會超過美國,成為第一大經濟強國。

使唔使咁認真?

如果比較世界人均GDP,當然係另一個故事。

中國排99位,得3500美元,離世界人均數少過一半,而日本就係中國十倍以上,排十六。

更令人憂慮的是財富不均的趨勢,以「可知」的數據來看,鄉村人口嘅收入,係城市人嘅三分之一左右,貧富差距續年擴大,堅尼系數已經超過左0.5,過左0.4嘅警戒線。(有很大理由相信,內地是刻意淡化貧富距離,現實情況只會更可怕!)

華爾街日報話,而家中國正係重蹈日本八十年代經濟泡沫的危機,借古喻今,呢點真係不可不防!

我地固然要防患未然,不過更大程度似乎係反映外國擔心既中國威脅論,特別是三月韓國天安號巡邏艦在朝鮮附近水域沉沒,更成了此論調的「放大鏡」!

2010年8月13日星期五

打擊炒家? 先死用家!

政府又再出手,推出多項措施,由供應、炒樓成本同收緊按揭三方面、矛頭直指炒家同投資者。

針對新盤炒賣有兩招,禁止一手樓「摸貨」成交。

撻訂嘅話,要沒收訂金增加到一成,增加投機者嘅炒樓成本。

金管局亦同時推出三招收緊按揭。包括即日起,千二萬以上物業、以及所有非自住物業,按揭成數上限劃一改為六成。按揭證券公司同時降低二按上限到九成。

大家需要留意、新措施影響之下,依家一層五百萬樓,七成按揭,原先買家入息只需要三萬,依家要有四萬三人工至供得起。

財爺形容,而家支持樓市上升因素,係息口異常低、兼夾大量資金流入。

所以,有需要盡快防止資產泡沬形成。

政府針對樓花炒賣,禁止摸貨轉手。但重點係,點解有炒風?

財爺自己都講 :供應偏少嘛,只要對症下藥、平衡到供求,樓市自然炒唔起!

最怕係、新措施反而迫使啲炒家轉炒、無受限制嘅中下價樓,咁就好心做壞事!

政府話,供樓佔入息比率已經升至平均百分之41.5水平,跟據金管局壓力測試,息口一旦升,負擔會大幅提高兩成四,實在不可少觀這個負擔。

說到底,黑色星期五,政府決定一鋪將所有籌碼放上檯,為咩?

有陰謀論提出,為,就係為淡化副局長,同政治助理凍薪,而唔係減薪嘅決定。

當然這點可能言過其實,論時機,樓市近日的確有趁伯南克「雙U」論而蠢蠢欲動!

加上下周又要賣地、而家唔先壓一壓、到時點收科?

講措施目的之一,打擊炒風。樓價急升、加上近年新盤多數以低首期、同長成交期吸客,令入伙前嘅摸貨特別活躍。有新盤甚至已經出現摸上摸上摸!

雖然政府禁止入伙前摸貨、但有資深投資者、同發展商都話成效有限,佢地一手無得炒,咪轉去炒無限制既二手市場,橫豎手頭大把資金,只怕無水位、根本不怕你收緊按揭!

另外一招更令人費解:由按揭證券公司出手,修訂按揭保險計劃,買樓上會借盡只有九成,唔係之前嘅九成半。

這點又有商榷,借超過七成,本身已經要額外買保險。

況且,二按目的係幫人置業,新措施係咪背道而馳?!

今次措施、唔單止影響炒家,就連用家、或者係無能力上車既人都影響埋,係咪同最近諮詢協助置業人士買樓既用意又相違背?

醒目嘅炒家話無影響,加埋政府停借九成半按揭,結果炒家轉戰中下價樓,令到啲岩岩夠錢借盡上會嘅市民,好夢成空。

自以為打擊炒家,可能正係打擊用家。

簡單講,政府今日發出兩個簡單訊號。樓價會繼續升,佢地手頭只可以加推三幅土地,但只可以起到五百幾個單位咁大把!!

狠批

重啟量化寬鬆政策,停止縮減資產負債表規模,確保長期利率唔會升。

一直有分「收料」的華爾街日報話,居然夠膽死話明智,真係o咀……

美英大報估計未來幾個月,數據進一步轉差,伯南克無得收手之餘,可能仲要加碼,啟動第二輪量化寬鬆。

KC說,拍賣國債都240億,而家買180億國債,只係反映伯南克扮做嘢,實際無乜效用....

錢印左,加埋近二萬億,但點先收效,特別係救到樓市呢?

局內目前有兩派意見,審慎派嘅認為,市場已經夠錢,依家問題係,貸款需求低,認為應該等美國樓市見底,美國人收支平衡,恢復借錢能力,經濟自然會回復。

換言之就是一味死等、唔做嘢!

主張加馬嘅另一派QE 2.0理論相反,認為當前問題沿於資產大幅委縮,所以印銀紙嘅規模要好大,好多,多到足夠谷高資產價格,借貸市場正常,經濟就好得番。

應否再印銀紙? 前聖路易聯邦儲備銀行行長普爾批評舊指檔伯南克,話事實證明左佢無能力刺激經濟。

加入批評伯南克行列,當然有商品大王羅傑斯。

佢話QE政策,反遺無窮。

羅傑斯警告,通脹嚟緊會好嚴重,銀錢唔值錢,市場盲目買資產,結果泡沬一觸即發。

美金、佢話仲持有少量,日圓,同人民幣就仍然最睇好。

市場係難明,市況近日走勢,正係將上星期假設嘅好消息,演譯為壞消息。

上陣作賽,當然千不可錯行一步,外國評論深信,佢已經俾市場建立加馬救市預期。伯老未來三數月決策,決定權唔係佢手上,而係金融市場。

萬一數據差,市場發難,零八年底,零九年頭,被動出招情景,可能重現眼前。

說句公道話,批評的人除了批評,又有什麼良方?

伯老今時今日只可管貨幣政策,彈藥根本唔多。以佢認為,量化寬鬆用得其所,在於量。

既然資產大跌價,銀紙就要印上加印,印到一過情況,足以谷高樓市,資產負變正。

因此寄望係業主恢復元氣,開心之餘亦恢復借貸,經濟先可以更快復原。

至於之後的美元及國債問題,暫時只有當睇唔到。

2010年8月11日星期三

QE 1.1

真是成也伯南克、敗也伯南克,上星期因為「雙U論」推高左環球股市,點知議息聲明一出,美股大跌、匯市大混亂,美元兌日圓跌至15年低位,債息亦跌至新低,總之一切就是要避險!

實情係今次聯儲局嘅會後聲明,異常睇淡經濟前景,為咗支持經濟穩步增長,會將資產負債表中到期嘅按揭抵押證券、同兩房債券「回籠」嘅本金,購買美國國債。

市場估計今年內會有1320億美元回籠,可以再投資喺國債。

聯儲局話,希望維持資產規模喺大約20500萬美元水平。

幾個月前,當局仲討論緊點樣退市、逐步將資產負債表嘅規模縮細,

金融時報話,今次措施係量化鬆寬政策嘅「1.1」修訂版,標誌住聯儲局改變政策取向,由傾向收緊改為「寬鬆」,並形容呢份係向「鴿派」靠攏嘅會後聲明。

金融時報話,一旦經濟情況進一步惡化,聯儲局隨時準備大規模買入國債同按揭抵押證券。

華爾街日報話,失業率高企,部分聯儲局委員擔心再唔採取行動,美國會出現「日本式嘅通縮」,早喺議息會議前一個星期,伯南克已經召集其他委員,商討點應對。

但今次只係對量化鬆寬政策作出微調,未有大量買入MBS,係由於部分聯儲局委員,對當局大規模持有按揭資產有戒心,擔心咁做未必可以引導市場利率進一步降低。

觀乎今次股市真是出現了拆倉潮,而聯儲局聲明亦證實了雙底的憂慮,到底今次坐直昇機的伯南克能否重施固技? 如果只有1.1版本,今次就真的有點難度了。

黑名單

因為查詢地產建設商會既註冊背景,警方一句「要考慮啲咩,就係要而家我地要考慮既嘢」,成為左最新「潮語」。

而家政府終於都考慮完啦,其實講緊係足足三個月前既事,之後政府都承諾過向立法會、公開地產建設商會全體七百幾個會員嘅名單,但我地最後跟進,最終只係提供到執委會成員嘅資料。

兩個幾月前,梁國雄喺立法會房屋委員會會議,要求攞哂商會七百個會員嘅名單。

事隔個幾月,有咗回覆,但係上面只係有十九個名。

原來政府提供到嘅,只係地產建設商會執委會嘅名單。

本台嘅努力,同樣失敗。

三個月前、我地所知嘅、只係得中英文名同地址

報道播出後個幾星期、負責社團註冊嘅警察牌照課提供多四頁資料、係地產建設商會成立目的。

當中包括推廣地產商利益、代表業界同政府談判等。

但幹事名單,始終無俾到。

我地以公開資料守則再攞。

警方回覆話涉及私隱,建議直接向商會攞。

但原來喺社團註冊申請表中列明,幹事嘅個人資料一經要求可以公開,無須當事人同意。

我地以呢個理由、13/7再要求公開幹事名單。

到上個月廿二號,終於攞到...

只有四個人既名,
會長係何鴻燊、主席係簡基富.......

政府一再話,佢地其實係有「地產建設商會」既全體名單,亦問過商會、可唔可以轉交立法會,但商會「唔同意」、所以政府冇權向第三者披露!

作為行業自我監管代表,地產建設商會係有分執行監管會員賣樓有無違規,但公眾居然完全無辦法掌握內部情況,又點樣叫我地安心呢種自我監管模式?

政府就一再強調唔排除立法監管,希望唔係得過「講」字!

2010年8月10日星期二

行長之爭

各界期待伯南克係咪再開印鈔機之際,市場其實早有默契,難理你消息好壞,一個中國入口數據,就提早造淡!

港股跌,歐洲跌,澳元跌,商品價格又跌,都係賴內地入口數字差,反映經濟唔對板。似乎一切關鍵,要睇埋通脹,同工業生產數字,睇官方點平衡。

出口增長三個月嚟首次少過四成,但數字仍然好過預期。

但反而進口增幅唔夠兩成三,遠比預期低,按月更加跌近百分之六、情況令外界關注。

進口增幅低過預期,正顯示內部需求,同投資可能減慢。

由於進口低過預期,七月外貿順差有287億美金,較預期多,外界相信人民幣仍然有升值壓力。

外界對巨龍經濟有否轉弱,理據不同。

有行話,一定差左。不過瑞銀汪濤就相信,由於出口數字好,房產開支亦多,外界對中央放寬調控政策期望,應該落空!

傳說中,周小川最討厭嘅人,正係伯南克。小川要抗通脹,但偏偏伯南克印銀紙輸出通脹,遲遲唔收手之餘,仲可能要小川行長跟埋一分!

從近日內地兩大部委,人行,同發改委近日言論,似乎顯示,中央再次對係咪放寬政策,又出現一次派系分歧。正如人行高調話,要加強對通脹預期。

發改委毫無原因之下,出一段新聞稿,話全年通脹3%無問題。

發改委工作正係經濟規劃發展,發改委想放鬆政策,毫無意外。而中央似乎亦傾向呢邊,多過控通脹!

心水清留意到,中共中央政治局發言,表明任何經濟結構調整,同解決任何經濟矛盾,都只可以喺唔影響經濟平穩較快增長情況下進行!

高盛就話,政策已經暗中調整左,佢地認為嚟緊政策會愈嚟愈鬆。而從各渠道得知,多個投資項目已經重新放水。令
七月新增貸款,可能超過五千億目標水平。

放鬆政策一派主導,但通脹超標又豈能坐視不理。正如瑞信陶冬所講,政策兩難之下,有可能係既加息,又放水。

中國特色貨幣政策,可能係伯南克要學返轉頭!

2010年8月9日星期一

無聲的海嘯 2.0

在兩年前金融海嘯爆發前,經濟學人以「無聲的海嘯」形容可能出現的糧食恐慨。

豈料之後出現了真正的金融海嘯,全球需求大為收縮下,「無聲」變成「無聲無息」消失。

兩年多後的今天,這場「無聲的海嘯」又有風雨欲來之勢,觸發點卻是遠東的俄羅斯。

俄羅斯一向係全球第三大、小麥出口國,但百幾年嚟最嚴重嘅旱災,令小麥產量少咗兩成,山火令失收更嚴重。

俄羅斯為咗保護國內供應,一改口風,總理普京簽署禁令,今個月中起、到年底,禁止小麥、大麥、粟米、麥粉等穀物同產品出口。

而喺上個月、已經實施新小麥出口管制嘅烏克蘭,亦有意效法。

俄羅斯嘅決定,即時令周五美國芝加哥期貨交易所嘅小麥期貨價格再飇升,創廿三個月新高,小麥期貨今個夏天已經急升超過七成。

金融時報已經即時指,任何禁令根本唔會增加供應,普京的做法不單令國際小麥價格飊升,就算國內炒家一樣會囤積居奇,俄羅斯國內一樣要面對價格上升的苦果。

但奇在小麥期貨,喺上星期一度突然升至每「蒲式耳」八美元後,價格突然單日轉向,收市急跌8%!

原來吊詭的是,作為美國作為全球最大嘅小麥出口國,未來幾個星期就係播種期。

眼見歐洲小麥失收,價格上到兩年新高,有美國嘅農夫有意種植多一成嘅小麥,增加收入。

不過有分析員已經指出,全球小麥供應、實際未見緊張,近排價格嘅升勢,只係同股市一樣,單純受資金推動。

作為全球主要嘅糧食入口國沙特阿拉伯都認為,美加、以及中國同印度,農作物種稙仍然良好,今年嘅小麥收成,預計亦會比舊年多一成六,存量亦足以應付到出年四月,相信全球唔會出現類似07年時嘅糧食危機。

所以一旦俄羅斯降雨量增加番、提早撤消出口禁令,美國農夫又增產嘅話,恐怕出年小麥會嚴重供應過剩,再推低價格,到時不單炒家損手,農夫更會是得不償失!

2010年8月6日星期五

淡友啟示錄

今時今日重看Michael Lewis既"The Big Short",似乎別有意義。

書入面以四個早喺零五年已經睇到次按泡沬既金融人物做主角,講既係佢地點樣率先睇到次按泡沬同沽空既經過。

第一個出場人物、係估中花旗會爆煲既分析員Meredith Whitney既師傳、Steven Eisman,佢可以話係第一個華爾街分析員估中、美國CDO市場會爆煲。

Steven 以Spiderman自居,認為自己「疾惡如仇」,而佢最睇唔上眼,就係02年滙控以152億美元購入既Household International,喺佢眼中、呢啲次按機構、加埋投行同評級機構,根本就係一部信資既「洗錢機器」,目標就係欺騙低收入家庭,亦都為日後樓市泡沬埋下禍根。

於是Steven就逐間大行要求沽空CDO,當時連高盛同大摩,都唔知解有人要沽空呢啲CDO!

喺本書出街之後,Steven一舉成名,而佢喺金融海嘯之後,發現泡沬已經由樓市、轉移至高等教育,原因係佢認為政府決心要收緊教育貸款,佢估計呢類Education Stock起碼要跌一半,所以已經開始部署沽空!

另一位一定要介紹既主角,係醫科出身、之後做左對沖基金經理既Michael Burry。

Michael 天生單眼,但透過一隻玻璃眼,反而令佢更清楚看透世界。

當年喺醫院擔任夜更既實習生,佢就趁住空閒時研究股票,仲透過Internet吸引到一班FANS,結果佢未畢業就成立左自己既基金,有基金甚至話一早等佢離開醫科,仲即刻投資左一百萬美元喺佢個基金到。

Michael Burry作為一個獨立分析、唔鐘意人云亦云,所以佢喺04年已經睇到樓市泡沬形成,但就苦無對沖工具可以賺錢。

直至零五年三月,佢終於諗到向一批次按購買違約交易掉期,認為呢種工具本少利大,最重要係可以一擊即中。

而當佢最早搵既兩間發行機構,正正係貝爾斯登同雷曼,而呢一批出現既違約交易掉期,亦係全球融史上、第一批面世既Subprime CDS。

作為沽空次按既投機者,大家可能會想像佢地係好似索羅斯、或者約翰保爾森呢類大鱷咁「窮兇極惡」,不過呢本書話比我地聽,呢啲最早洞悉樓市泡沬既人,喺08年之前一直受盡市場冷笑,好似Michael Burry咁更面對基金一個一個要求贖回。

到次按爆煲、金融海嘯發生後,投資佢既基金股東需要賺左錢,但無一個人會多謝佢、或者為佢平反,結果佢自己喺08年亦都將基金摺埋,聽落都幾可悲!

次按風暴只是發生予兩年,但一切彷如又回到海嘯前,不知今時今日這些淡友心中又有何部署?

Showtime

投資十年,秏資三千億。

和黃半年賺六十四億多元,增長一成二,焦點當然是3G業務方面,虧損大幅收窄。半年蝕九億九千多萬元,主要是上客成本減少和英國牌照攤銷因素。

誠哥用「前景秀麗」形容前景,信心明顯前所未有,佢指假如沒有不利影響,全年3G會對集團有正面貢獻,仲有信心增加派息。

腦中一直有一個問題,是誠哥太早投入了3G嗎?

和黃在 6個國家經營 3G服務,看看澳洲、瑞典及丹麥、奧地利均已錄得 EBIT,但最多客戶的英國、意大利及愛爾蘭則仍處於虧損。

十年前相信大家對3G也沒有多大需求,當時最大噱頭是可以用手機作視像會議,但試問有幾多人不介意經常被身邊人Check到底身在何方?

更令人氣結係當時用手機上網的經驗,根本是攞苦嚟辛! 上網龜速不特止,手機更經常出現hang 機情況,叫人點有動機用3G?

當然06年iPhone出場,之後的故事已經變成後話。

當年3G最大賭注放了在意大利及英國,結果這兩個國家回報最慢,反而澳洲及香港,回報明顯更快,似乎亦反映了當日豪賭是押錯了注。

投資3G不是錯誤,不過錯在Timing,誠哥證明給我們看的是他很有遠見,但走得太前、結果是時代追不上他的腳步。

好了,今天3G止蝕,誠哥顯然有更大信心作出投資,佢話如果下半年並沒有任何大型收購,預期借貸淨額會進一步減少,之後會把握擴展業務機會。

其實上星期誠哥已經公布用700億元投資英國EDF,還是英國金融時報細心,一數之下,發現這位全球最有錢華人,原來才是對殖民地最有感情的人!

近年無論和黃定長建,海外投資的地方,最熱門的是澳洲、英國、加拿大及新西蘭,無巧不成話,全數是昔日大英聯邦的殖民地。

可以理解為何誠哥如此「迷戀」英聯邦,他自己也說過,首要投資條件是要安全穩定、以及有健全法制,以這些跟據英國法制的市場,跟香港的環境就最相似,所以變成李生是最放不低97「情意結」的人!

2010年8月5日星期四

最後一個淡友

人會變,月會圓,作為大行,亦總有投降一日。

正當渣打主席話,邊個夠膽沽渣打,買匯豐之際,RBS二話不說,即時降級渣打!

匯豐「大淡友」里昂證券,終於改觀,大幅調高評級到跑贏大市,成為市場最後一間加入睇好匯豐行列嘅大行。

其他大行睇好匯豐唔係新聞,但里昂睇好,就肯定係。

佢地形容匯豐中期業績係轉睙點。

里昂一口氣將匯豐評級由跑輸,調高到跑贏,目標價上調廿六蚊、到95蚊。

里昂理由係匯豐信貸改善速度遠比預期快,息差雖然有壓力,但非利息收入增長會抵消。

翻查記錄,今次係里昂差差唔多六年幾嚟,首次俾匯豐正面評級。

對上一次建議買入係03年底,當年分析員已經離任。

建議係咪次次準,唔敢講、但舊年3月俾匯豐25個9毫三目標價,就幾乎喺供股一役中「中」曬。

里昂話,匯豐由於質素好,有機會好似九十年代咁、跑贏港股。

不過睇淡多年,佢地補充一句,比相他區內銀行股,匯豐都會跑輸。

話說回來,匯豐,渣打同樣派出主席級人馬到港。一個離別秋波,另一個初到貴境。

論公關部署打和,論業績,到底,渣打,係咪贏匯豐呢?

股東回報,繼續係渣打勝。但超過兩倍帳面值,已經抵銷曬。

由於撥備減少因素匯豐最受惠,純利增長計,匯豐當然好得多。

如果唔計撥備嘅經營收益,渣打跌九%,匯豐跌一成一,兩者都唔見突出!

既然大家係打區內市場牌,集中呢個市場盈利增長比較。

渣打升兩成四,匯豐升兩成九,當然,匯豐贏香港,亦贏在內地有交行,平保,上海銀行股分升值。

另一個剛入股農行,只可以炒前景,但同時一張印度牌,就贏晒!

最令市場意外,係大中華據點嘅香港業務,匯豐反敗為勝,但渣打香港稅前盈利反而要跌11%。

特別係,以貸款增長計,渣打香港半年多24%,較匯豐多七個百分點。單係息差,唔似影響咁大?

有分析員話,匯豐舊年喺香港進取異常,其中一個策略係廣泛招徠卓越理財客戶。

紀勤講過,平均一個客戶,每年為匯豐提供最少三千美金增值收入,呢點可能正正係獅子策略成功!

路透社評論就講到,渣打定位佳,管理層好。問題係,海嘯過後,投資者善忘,更重要,大打新興市場牌銀行不止一間,渣打就算贏,都無以前贏咁多。

2010年8月4日星期三

自亂陣腳

市況突然變得牛氣沖天,怪就怪在伯南克。

幾個月前仲話經濟復甦步伐可持續。但近日連番變臉,先話經濟異常不明朗,繼而最新提到,復甦道路漫長。

第一,真係經濟遠比預期差。第二,為總統打氣,應付十一月中期選舉。

第三,作為公關策略,嚇左你先,萬一經濟真係變差,市場預期亦控制之內。

評論話,伯南克講得「咁白」,實屬罕見!

言猶在耳,伯南克又出一招放風,華爾街日報話聯儲局下星期二議息會議,會因應經濟轉弱,貨幣政策可能會有微妙嘅變化,再推行量化寬鬆政策。

重頭戲會係停咗四個月嘅回購按揭證券計劃,將重新啟動。

構思係今年內,將手持到期嘅債券,套現後再買入新嘅按揭債券,規模約2千億美元。

當然相比起二萬三千億美元資產、二千億只是小巫。

不過先放風,後表態的做法,市場已經認定,息口繼續低,結果再次製造美金走低,造就市場由牛皮,變為牛氣!

不過國債太低息,優質企業債成為明星,最新發行嘅IBM十五億美金企業債券,票面息率跌至一厘,破IBM發債以嚟最低記錄!

三年期債,都只係得一厘息,證明市場「求息若渴」!

雖然外界對經濟半信半疑,但對有實力企業嘅盈利能力,似乎信心百分百。

資金湧入債市,羅家聰話係市場對經濟有保留。此話不錯,但難明係,檔次較低企業,仍然
大有市場。

人所共知福特,屬於垃圾投資級別,但近日佢地債券,成交大旺!

更厲害,係一度申請破產保護嘅貸款機構Cit。30億美元貸款,以佢地背景,可以有能力完成籌組前一刻,要求銀行減收利息,而且成功﹗

種種跡象顯示,伯南克印銀紙,印得瘋狂,任何有回報投資工具,都大有市場。連小麥價格
一個月都可以升五成。

如果再印,咪後患必定無窮!

英國金融時報已關注,再開印鈔機只會進一步擾亂金融市場。佢地話,自從伯南克連番發
表對經濟前景保留言論後,利差交易似乎再度活躍,債市,同商品市場都有異動。

佢地指,有關停止收購按揭證券嘅憂慮,其實並無根據。

華爾街日報評論亦指,伯南克七月廿一日先提到,會遂步縮減資產負債表規模,依家突然轉軚,俾外界印象係聯儲局自我恐慌。

2010年8月3日星期二

97價

過去半年有邊個估中樓市走勢? 無!

樓市升溫,反價,照買。

上個月送交土地註冊處樓宇買賣合約宗數,有萬四宗,按月升左三成四,係舊年六月來高位。

有代理形容7月交投,係九七最旺。部分九龍屋苑經過13年的折舊,居然仍然可以超越97價,多不可思議!

磚頭有價,連居屋亦當炒,中原統計數據顯示,七月二手居屋買賣合約,錄得一千零六十一宗成交,總值係十八億五千萬,按月升三成半,以金額計、係97年7月以嚟最高。

政府未正式活化市場,居屋已經大炒特炒。

七月分沙田穗禾苑成交最多、錄得四十七宗買賣成交。

之後就到兩個屯門居屋屋苑,兆禧,同兆康苑都有最少30宗成交。

代理話,市場擔心樓價只升不跌,相信居屋嚟緊會價量齊升。

那邊平有平炒,轉去港島傳統豪宅區,山頂地皮賣出後、亦刺激現貨價再創新高。

恒地南區一幢獨立屋、以超過六億成交,創單一物業成交紀錄,呎價亦創出南區洋房新高。

喺恒基地產旗下位於赫蘭道十一號嘅一間獨立屋、成交價六億六千萬,係本港單一物業最高成交價。

不過可能受了天匯教訓,今次恆地對創新高價異常低調,雖然物業呎價高達五萬零六百四十蚊,創出南區洋房歷史新高,但未見恆地再自吹自擂。

想了很久、很努力想到底樓市有沒有負面因素? 對不起,呢一刻真的很不到。

有說樓價已升到供款能力無法負擔的水平,因為近年工資幾乎在08年後也沒有多大升過,不過以今天低息的水平,其實大家也不覺得供樓很困難,至少供仍然平過租! (原因是租金升幅更大於樓價)

最重要是,未來兩年幾乎肯定美國不會加息,即係仲有一段好日子過!

而與九七不同,現時樓市槓桿仍遠低於97年,今天根本不會再有人同時借入按揭持有多層物業,有的就是以淨現金置業的內地人。

在政策層面、過去幾個月政府一度宣稱以高度介入,結果? 示範單位可以度呎,僅此已而!

政府認為多推幾塊豪宅地皮可以增加供應,結果? 每次賣地反而成為發展商推高樓價借口。

即使政府痛下決心增加中小型地皮、更硬性規定要定期招標/拍賣。還記得上次拍賣東涌地皮南豐要自己托價? 柯士甸站要流標的結果嗎? 顯然,發展商對無法打做成豪宅的地皮,根本些微興趣也沒有,既然沒有人承價,地皮又如何變成中小型住宅? 供應又如何可以大幅提高?

雖然不想承認,但這個泡沬似乎遠未見爆破!

2010年8月2日星期一

兩個主席

今天滙控業績,唔見左兩個主席、同時卻多左個接班人!

主席者,其一當然是葛霖,雖然佢繼續來港主持記者會,但找勻全分業績,都唔見左分Chairman Statement,退出之意不言而喻!

另一主席者,是滙控中國主席鄭海泉,佢既是中國業務話事人,同時亦身兼滙控執董,但居然連記者會場也不見一面,難免令人慨嘆!

說回業績,受惠撥備大減,同北美業務止蝕,滙豐半年盈利翻咗一翻。

雖然第二次中期息無加,不過集團罕有在話未來有能力增加派息,以一向保守的匯豐而言,已經是一大突破,可以預期年底派息肯定會有驚喜。

當然,業績咁好,是因為期內貸款減值撥備大減四成六,係金融危機爆發以來最低水平,而北美業務三年來首次轉虧為盈,賺4億9千萬美元。

英國金融時報直指,匯豐業績令整個歐洲銀行業充滿憧憬,相信銀行股會處於反彈期。

滙豐業務增長嘅火車頭,嚟自環球及資本市場GBM,賺56億幾美元,佔咗集團超過一半盈利,但按年比跌咗一成三。

明日之星歐智華舊年GBM成為集團賺大錢機器,今年上半年稍為失色,老練嘅佢否認旗下業務停滯,行內人話,匯豐作為債市大莊家之一,下半年似乎可以幹一番大事業。

正如花旗講,雖然業務半年倒退,但仍然比預期好兩成,華爾街日報更指,匯豐炒房跑贏晒歐美所有投資銀行,咁咪即係威過大摩高盛?

作為英國匯豐主席,歐智華今日一句更可圈可點,就係英國唔會有歐洲或債務危機,因為英倫銀行比歐洲央行更有能力,所以接班人地位早已確立。

不過對於靠股本回報買銀行股嘅投資者,可能有的失望。

經過連續兩年極差回報後,匯豐上半年股本回報只得九點三%,較區內銀股股低。

當然,匯豐話係受監管多要求影響,但心水清亦知,匯豐近兩年,靠撥備沖銷,同公充值入帳帶動盈利,表示內在盈利能力,唔算太強!

今日嘅匯豐,正式走出海嘯谷底,內地業務盈利,更首次突破十億美金,按年升七成。

功臣非海泉奠屬,今日佢嘅缺席,令人更懷念呢位中國功臣。