2012年6月29日星期五

反枱


憤怒似乎係629呢一日,最多市場中人共識!

火滾不是領導人來港設下萬里水城、又或者係有古惑公司又出事。

是關歐洲居然一改開明、老實作風,擺下金融市場陷阱,令不少基金中招!

峰會尾聲盛傳意、西反枱,拒絕就刺激方案簽字。萬料不到,數小時內,形勢逆轉,悲觀一掃而空。

默克爾領導既德國,一日內連輸兩仗。先有國家足球隊向意大利稱臣,再到歐債問題出現峰會事變,贏既對手,同樣係意大利。

對默克爾來說,極有可能比死更難受。一,意、西唔單止晉身歐國杯,德國無份,跟住聯手向德國施壓,等同於係騎劫。

二,經此一役,德國主導歐洲,未必再屬於必然假設。

三,蒙蒂係默克爾力捧上台,依家被人背叛了!!

以為峰會結果,代表歐洲光明再現?絕對錯。

首先,向西班牙銀行業注資既大前題,係有銀行聯盟成立。但對唔住,同意唔代表已經落實,依家仍然十劃未有一撇。

二,峰會聲明為意大利尋求拯救埋下伏筆。意、西加埋,即係用盡歐洲既所有彈藥,玩完!

三,既有希臘珠玉在前、又萌生多個西班牙,愛爾蘭已經講明,之前無可能既事,已經變成有可能,所以佢地會爭取相同優惠條款。

所以,西方唔少獨立評論認為,今次結果,其實係最差結局,歐債不止沒有緩和,反而會加劇危機。

默克爾心感亂局加劇,盟友作反,即使作為女中豪傑,既有婦人之仁,但另一極端就係絕情,女人要絕,可以好絕!!

事到如今,正如歐洲資深評論家,CAPITALISM 4.0作者 Anatole Kaletsky 所指,最佳歐債危機結局係德國退出。

因為,有德國退出,依家歐元會更團結,要德國退出,影響比希臘退出細。

其實,百幾年嚟,歐洲以德國馬首是贍,但造成兩次大災難,歐洲對德國可能一直無好感,而日爾曼民族自視甚高,亦睇唔起其他鄰國。

當日,金錢利益意外將大家拉埋一齊,既然利益已去,各走各路,說不定再見亦是朋友!!

唔經唔覺,半年已過,市況日日如是,影響因素一致千篇一律。斷估,半年後今日,到時再倒數一年,可能一切依舊。

Enough is Enough,再唔變,再不突破,六個月後,更多人,會真的會憤怒了!!

2012年6月28日星期四

不蕪之地


新一屆特區主要官員任命一刻,恒指由升轉跌??

里昂發表新任特首上場後特區前景既主題報告,里昂壞孩子形象鮮明,唔會放過機會,報告內直指思歪王朝下,地產以至公用股,通通不能買。
難道,里昂就係借好消息出報告!!
留任既曾俊華,簡單概括三大目標,量入為出、改善民生,同土地房屋。
有言在先,量入為出平息市場來屆政府民粹上身,亂花彈藥既疑慮。
加埋中央大堆大禮,香江前景及成就,豈止今日既水平?
無疑,眾多中央政策之中,前海最引人憧憬。作為資本帳目開放試點,理論上,香港人民幣業務,已經可以擴散至無限大。
以後幾乎所有內地資本帳開放項目,香江彈丸繼續發揮影響之力,威!!
肯定,前海依家係一塊爛地海灣,按時間表未來三年,會全面啟動基建同相關配套工程。
當然阿爺要發功,由爛泥地變成摩天巨樓是輕易而舉,前海試點計劃之下,本港銀行聽聞已經圈地,目標當然是跨境人民幣貸款。
如果以相關貸款列入基建或項目融資計,國際標準成本最少收五至六厘,而港銀人民幣資金成本頂多二厘,息差高達四厘或以上,香港金融業,無走雞!!
甚至比內銀更有利可圖。
但天下怎會有免費午餐?貸款需求增加,銀行唔夠人民幣資金,就要搶,成本就會高。而貸款性質屬於基建房產類別,但現金流無歷史比較,好明顯中央呢個前海大禮,條件係要由本港銀行負擔部份風險。
再者,前海骨子裡係計劃經濟之下既最新計劃,藍圖願景可以天花龍鳳。以經濟效益為例,估計二零一五年前海本地生產總值有五百億人民幣,之後五年,就會達千五億,樂觀與否,各位可自行決定。
另外,前海當局希望打造珠三角服務業中心,預測數字係人口三十萬,但職位有八十萬,同樣數字唔知點計。
以往,中國隨時可以打造好多東西,很多中心,陸家咀金融區係人都識,但有幾多金融交易靠當地進行?
前海工程涉資最少二千幾億,有錢就有希望,但問十個人,有九個答唔出,前海係咪有需要做。
綜合中環人意見,內地力谷前海,理由可能有三,一,係抗衡香港。二,係醉翁之意不在酒,真正目標係借前海試點為名,加快推進人民幣國際化為實。
三,係當局為搞啲野,而搞啲野囉!!
查實口痕友話第三個理由唔係亂吹,如果真心係搞首個資本帳自由開放項目,上海豈有不爭之理?而家放比前海,怕且是連阿爺都信心不足,一旦事敗、都可以賴在香港辦事不力!
不過,從好方面想,先有溫州,又有前海,內地加快金改用意明顯。凡係改革都有利,凡係有利,都屬於好消息。
凡有好消息都會造就趁勢出貨。所以,六二八之日,其實只係典型市場借好消息獲利出貨格局!!!

2012年6月27日星期三

HELLO,思歪!


七一在即,香江踏入倒數,是好是壞,無人能預。

思歪參選前,信誓旦旦話,無需大變,只求小變。點知,佢屋企十年嚟已經大變左!!

車位由露天變有蓋,地下由實心變地庫!

中環人話,先聽其言,再知其行,點會唔擔心。!!

上任前,賣點係改善民生,民望夠高,未上任,唯一資產既民望插水。

思歪就任前一役,最後贏家原來只有一隻HELLO KITTY。

於是,為博HELLO KITTY一笑,新華社提早啟動香江大禮慶回歸,銀行界睇過,形容文字豐富,但內容欠奉,連容許內地旅客遊輪往返香港台灣,再經日韓返內地,咁曲折都可以列入利港措施。

咁終於明白,海運大廈有錢途之餘,亦解釋胡主席點解會視察啟德舊址。

遊輪到日本,岩呀!!日本係HELLO KITTY朝聖地。

但對本港作為人民幣國際化既朝聖地,賓卡話,大禮談不上大禮,例如兌換上限不變,容許內地居民直接在港開戶,查實係追上倫敦,新加坡造法。

基金人話,以前影響港股,主要係三個英文字。包括V,S,C,即係代表價值,氣氛,同中國。

依家要加埋P,並且放最頭,所謂P,正正係政治及政策。

中環人話,依家有倒數FEEL,究其背後係無人知七一之後怎麼辦?

尤其係,未上任,民望插水,咁怕些咩?咁就係驚會造就太多醒目仔,及利益團體,做幕後游說,換句話,我俾你支持,你俾我政策!!

所以領匯回購唔排除,難保遲下,港鐵上蓋建公屋、更難保為換取金融界力撐,兼有「金融發聲局」和應,交易時段要縮短,華資行零股票印花稅。甚至,下回兩電電費勁加,難道要向誠哥、米高嘉道理買下兩電!!

以前有句說話,人之將至,其言也善,套用依家,其實係不在其位,暢所欲言。經過幾星期臨別贈言,市民對大曾部份班底,有臨別依依之感。但無緊要,大曾三大支柱,財政大臣,金融大臣,同香江市場主席,續任官場。

所以,習副主席始終高手一名,指令爵士支持思歪。

投資界老行尊話,只要思歪不思歪,七一之後不用CRY。


HELLO KITTY因被屈而喊,DEAR DANIEL更要發公開信。

HELLO KITTY無咀,無口難言。但我地都幫你唔到。因為,香港人雖有口,但都難言!!!  

第三方?

再加強香港嘅人民幣離岸中心地位,係今年七一慶回歸大禮主題。

當中最有力措施,係首次支持第三方、利用香港辦理人民幣貿易投資結算。

到底何謂第三方,銀行有唔同解讀,不過我們了解是泛指非本地居民及企業,即是既包括內地居民、自由行客、海外人士,甚至泛指非本地註冊企業,實在是一下子,為本港人民幣業1大務大大擴容!

因為一旦容許內地居民同企業到本港開設人民幣帳戶,肯定可以加快資金池建設,抵銷近日因為人民幣存款下降、而擔心離岸業務會退色的憂慮。

業界指,本港人民幣存款利率較內地低,對加強資金池作用未必即時有效。但對配合「雙幣雙股」、同其他人民離岸產品推出就好有幫助。

所以大禮亦同時包括強化人民幣合格境外投資,即係RQFII機制,便利香港長期資金投資番內地資本市場,完善人民幣回流機制。

不過備受關注,本港居民每日兌換二萬元人民幣既上限安排,據了解最後未獲提高。

原因其實簡單,人行點解需要咁多港元?

但按本港離岸價嚟兌換,就不設上限。

人民幣要國際化必需加強中港兩地資金流通同金融合作,中央將會允許香港金融機構,喺內地設立消費金融公司,進一步推動香港同深圳之間嘅相互投資同金融合作,通過推進珠三角金融改革試驗區建設,提升粵港金融合作水準。

一直有分參與推動本港人民幣業務、中銀國際嘅謝湧海(剛被委任為思歪的金融發展局籌備班子,算佢今次識貨!)都話,相信呢個金融改革試驗區,就係建設緊嘅深圳前海金融區。

離岸資金北上,在岸資金都可以南下。

舊年副總理李克強訪港期間提及嘅滬,深,港三地交易所成立合資公司,以及內地同香港兩地互相掛牌嘅交易所買賣基金ETF,即係「港股小型直通車」預計會正式落實。

換言之、內地散戶都可以投資港股。券商一早做晒準備,內地就盛傳易方達同華夏最快今個星期內,會獲批推出港股ETF產品,估計規模係200億元。

雖然外界不少批評今次大禮規模有限,但其實幾項業務對確立本港人民幣離岸中心的意義重大,基本可以令我們跑贏對手,最重要是營做一個Critical Mass,到時資金就會不斷湧港,到時考慮的、反而就是到底要人仔、抑或繼繼死守聯匯的問題!

2012年6月26日星期二

堆填價


長實「堆填價」賣峻瀅,超人早唔揀遲唔揀,呢個時候先來派貨,真係有趕喺七一前散貨格局。

今次長實擘價有兩點值得留意,第一係峻瀅唔似其他港鐵合作項目,長實賣樓已經係唔需要同港鐵分紅、換言之有更大既定價權,誠哥既然對後市有保留,要擘價自然可以更加狠心。

另外心水清者會留意到、就係長實喺呢一區最近都相當忍手,舊年九月打後幾個同區項目,新地先後攞左66C1同66A地皮,加埋會德豐今年初投得既66B2面粉價都要成四千蚊左右,同今次長實賣價相當貼近,以過去長實喺區內稱王,而家咁克制唔投地,都反映左超人心目中有咩「盤算」!

講真,長實今年作為今年賣樓一哥,頭五個月已經套現150億,今年既盈利有九成都已經保障左,剩底既問題就係、到底今次擘價係地區性,只係限於一個「心曠神怡」既將軍澳,定係一個全港性既樓價向下逆轉?

麥格理既「大衛.吳」再次發揮「淡友」本色,以「拐點」做標題,認定思歪上台後、樓市會全面落施「社會主義」,雖然未至於人人置業,不過房屋政策肯定會向低收入同中產傾斜,甚至會出絕招限制內地人買樓!

近日雖言思歪四面受敵,連建制派都過佢一嘢,不過政治現實係佢要修復同政黨割裂關係已經係不可能,想同「唐唐」為首既地產界修好更係「Mission Impossible」,思歪要為自己加分,唯一方法就係以民生議題入手。

華爾街日報就點出,「民望」係佢最後希望,所以樓價佢一定會出手,到底係限制內地買樓抑或重推八萬五就係時間問題。

後市點睇?石Sir就提出樓市痴呆症,即係樓價極其量只係會「痴痴呆呆」、樓蟹就「坐埋一枱」!

計數就好簡單好易計、以樓市過去十年、平均每年落成量一萬個左右,同過去吸納量兩至三萬個有好大差距,未來思歪好大機會會追番呢三、四十萬間樓,就算真係靠內地客來港掃貨,都未必追得上「開天擘地」既增加供應量!

明燈補習社: 貧富懸殊的疑惑

2012年6月25日星期一

梁粉? 梁營粉碎?

上星期拆局先講過、「梁粉」到底仲有無「剩餘人物」未被利用,估唔到事隔一個周末,形勢逆轉得咁快!!

所以話,「政治真係一日都嫌長」,問過測量界,大家作為業內人士都對「思歪」失手諗極唔明,因為以佢「滴水不漏」性格,無理由咁失策,當日大力插「唐宮」之餘,無理由唔先為自己打定塊「免死金牌」?

到Hello KITTY 幫自己脫身就真係匪夷所思,亦都可能係代表「中正要害」。

測量界話雖然產業測量師的確係唔需要「做圖測、睇結構」,但任何一個Project 都要由產業測量師牽頭、再引入相關既工程、結構同物料測量師,以思歪行內咁多年經驗,豈有不知之理?

「思歪」風險溢價,由三月選舉完後大家唔經唔覺、到而家真係殺到埋身,都唔可以否認有部分大孖沙經過「埋伏」三個月後,決心出來幫一報「吊雞車」之仇,實行「以彼之道,還施彼身」!

有心水清親西環人士話,中央既兩分「方向報」、社論都係「胡主席訪港」,講到思歪,標題就只係繼續用「適度有為施政」、「滿懷希望求變」,成分報紙幾乎無提及到「僭建」二字,同當日大肆評擊「唐宮」,反映阿爺中央思維都仲未要放棄思歪!

不過大行似乎對未來五年既施政有一定擔憂!有留意獅子錢莊今日分亞太策略報告,講到香港部分,只係簡單比左個中性評級,理由就講得隱隱悔悔,只係話地產股實在太不明朗,原因正係「思歪」七一登場!

話樓市有風險大家都知,誠哥就一於喺7.1前、用行動投票、擘價賣「心曠身怡」既將軍澳「峻瑩」,後市點睇可想而知。

不過作為最大銀行,獅子錢莊做咩都無理由唔係諗過度過?

我地唔係政治版,不過逆向思維,胡總賀七一回歸,要港人高高興興,內地政治圈已經盛傳呢分大禮會加馬,第一財經日報更用「藏寶圖」來形容,當中就聚焦喺「前海經濟特區」。

據聞為左發展「前海」,中央已經搵嚟重量級人馬做智囊,既有我地88樓陳總裁,亦搵來前人行副行長、現任全國人大財經委副主任「吳曉靈」出謀獻策,分量相當重手。

對我地觀眾來講,前海太遙遠,唔通真係叫佢地去做開荒牛咩?

不過認真研究過呢半個月既大行報告,會發現2388成為左大行寵兒,美林高盛中金同法巴輪流推介,就係靠著呢個前海概念,目標價由27到29蚊都有,觀眾不妨認真做做功課,「抆車邊」睇下係咪可以攞下大禮!

大驚少怪?


到底是外國傳媒大驚少怪,抑或作為傳媒已經習以為常?

過去內地官員誇大經濟數據時有所聞。

因此基金經理同經濟師都傾向相信、一啲質量較高既數據,包括IP(即工業生產)同每月公布既發電量,普遍認同造假既機會會較細。

不過紐約時報話,報大數既情況,亦已經出現喺發電行業。

紐約時報周末大篇幅報道,引述既發電企業既高層消息話,近幾個月內地為左「保增長」,地方同省級政府向發電企業發出指令,唔可以將實際既發電量向上匯報,甚至要分開兩本「數薄」,要反映實際唔存在既稅務開支。

睇番每個月由國家統計公布既發電量,呢幾個月既發電量雖然增幅係有所放緩,但完全見唔到有倒退跡象,五月分更加快到有百分之三既增幅。

不過同一時間,內地最大煤炭儲存基地秦皇島,最新既庫存數字已經達到九百五十萬噸,超過左四年前金融海嘯既水平、創出歷史新高,反映「發電煤」根本係供過於求。

內地發電企業稱,過去幾個月實際是有一成跌幅,不過為了面子,中央一律禁止向外發布。

紐約時報話,省同市政府喺公布經濟生產總值、企業既收入同盈利、以至稅務收入,都係慣用「報大數」既手法,報道引述涉及既企業同經濟師估計,呢啲誤報既數據,令到經濟增長足足係誇大左一至兩個百分點。

國家統計局強烈否認紐約時報既報道,認為係無事賓跟據。

里昂就話,內地統計數據雖然不時係存在造假既情況,但同十年前相比、數據既質量已經係有好大改善,以四月發電量為例、雖然未至於倒退,但同舊年平均一成二增幅、己經反映經濟係明顯放緩。

令人失望的是,經濟師最後信賴的黃金指標,都失去可信性,要解讀內地經濟,我們還可以相信什麼?

2012年6月22日星期五

梁粉


中環人近期對九倉,讚不絕口。事關,業務策略得宜之外,政治觸覺亦見敏銳。

市況未如理想,九倉近月,逆市接連有好消息,續租海運大廈,入股綠城全部獲分析員肯定,就連委任董事,都技高一籌。

委任李國章出任獨立非執行董事,外界即時話,「叻」。

李國章撐CY,九倉委任李國章,即係再用行動捧CY。中環人話,正確。

而更巧妙係,九倉非執董陳茂波係成員之一,但即將轉投官場,所以,九倉今次係用一個梁粉,代替另一個梁粉,即係確保董事一定有梁粉。

如果講大藍籌,梁粉陣容鼎盛首推新世界,同恒隆。前者轉軚,再加一個紀文鳳,後者一直CY支持者。

四叔亦不裕,提名期間集團選票一分二,一面唐,一面梁,盡收對沖之效。而梁營支持者簡福胎亦同四叔一向熟稔。

中環資深投資者話,商界已經假設,得梁粉,雖未致於得天下,但最少買個保險。背後更大理由係,無人知CY諗咩,搵個梁粉幫手,有條針之餘,更擔起CY腦袋閱讀機器既作用。

一個非執董,酬金每年頂多幾十萬,難怪,老行尊話,物超所值。講咁耐,公司董事會或高層未有梁粉成員,唔使擔心!!!

係,的確有供不應求,但未致於零供應。

當然好似蒲祿祺,蘇兆明,蔡涯棉,甚至劉炳章,經驗豐富,土地樓市政策有見解,亦熟識CY諗法,地產商諗得過。再唔係,雷賢達,李君豪,有金融背景,係非發展商物色梁粉資產好人選。
再退而求其次,Dream Bear 既有政協身分,又打得,強!

商界驚政策改,又唔知點改。其實,大行研究部,唔少客戶亦查詢七一之後,香江政策怎麼辦?

尤其係樓市政策等等。其實,唔單止大孖沙搵梁粉,分析員早個幾月,亦出現尋求梁粉熱。為撰寫香港樓市報告,研究部頭頭相繼邀約梁粉午飯或茶聚,目前又係一個,CY腦袋閱讀器。!!

套料不成,都可以透過不同假設,收窄思考範圍。

八十年代,商界政治保險係遷冊。三十幾年後今日,商界政治保險係梁粉,得梁粉,未必得天下,但管理層或大股東,可能心安理得。公司要發揮梁粉效力,其實羅范梁粉,更值得考慮!!!

論威力,同含粉量,其他人等,難以匹敵。!!

2012年6月21日星期四

打到黎!

民企公司俾獨立研究機構出報告指控,換一個角度,係你在明,人在暗。

既然光明正大,又何懼之有。

還記得早兩個月我們已預告,獨立報告考慮將目標由美利堅轉移到香江,估不到第一擊就燒到內房,仲算係民企內房略有規模既恒大,股價一度插水兩成。

其實揀中恒大亦相當合理,大市橫行之際內房靠著憧憬鬆綁極速反彈,唔沽空你邊對得著自己?

報告形容,恒大主席許家印,喺06年開始,就製造緊呢個龐氏騙局。評擊佢中飽私囊,揮霍股東最少162億人民幣嘅錢,喺佢個人嘅喜好上。

又攪足球隊、又攪排球隊,連動畫製作、電視電影等娛樂事業都攪埋,當成自己嘅迪士尼樂園,但股東對啲錢點用、就毫不知情。

可能反應亦早在Citron 預算之內,中環人話,恒大既明且暗,反應快亦有違規之嫌。

十一點大跌,近十二點公司話,了解緊,好快回應。到十二點四十八分,透過港交所發通告,全數否認指控。

五十幾頁報告,咁快睇曬,全數否認,值得一讚。但處理危機亦要講規舉,新交易時段三月實施,中午發放通告時段係十二至十二時三十分,為何恒大可以四十八分,刊發通告?

恒大一點左右在花旗安排下舉行就召開電話會議,但當時只係分析員可以參與,傳媒同公眾股東就要等到傍晚嘅第二輪。

咁緊張要見分析員,加埋下晝開市前就趕快有回應,明顯,恒大管理層太關心股價。關心股價表現,照顧股東係好事,但正如一的分析員所講,過份關心股價,總會令人覺得,有的野!!!!

恒大話,帳目無問題,所有分析員都唔會有疑問,因為帳目係咪有問題,根本唔會知。

一間公司爆,帳目百分百有問題,一間公司唔爆,又唔代表帳目無問題。

呢種諗法,正正係市場依家對民企帳目指控既不安。

講番今次五十多頁報告指控恒大,睇過既分析員形容,內容立體,雖不能盡信,但信服力亦不可低估。帳目跨大,負債低估,只要有數字指控喺套用民企情況,就會等同有說服力。

因為一間數目從來唔清楚既公司,有人清楚計曬數字出嚟,話你有問題,結果就算無問題,都會引嚟太多問題。

報告叻在,擺埋財政部上台,情況等於「嗱,唔止我話有問題,官方都係咁講!!」,即時提升報告認授性。

更致命係,報告對內房透過合營公司收購項目,繼而產生既表外隱藏帳目問題,可謂一擊即中!!

今次發表報告既CITRON,前身叫STOCKLEMON,唔知係咪有請你食檸檬既意思??

呢間機構主持人ANDREW LEFT,其貌不揚,但美國多個投資網站都有唔少FANS。

因為,ANDREW LEFT,根本上係渾水既祖先,佢出嚟寫獨立報告,渾水卡臣仔可能仲學緊咩係中國。

ANDREW零七年起,撰寫獨立報告,一零年專攻民企,經佢手,命中率極高,著名一役要數東南融通,其他大部份最終因為被踢爆,要美國除牌。稍一失手,只係奇虎三六零。

據聞,恒大插水之時,好多所謂BUY SIDE,根本係未睇過份報告,但ANDREW LEFT呢個名,令佢地不得不先行沽貨。

許家印話,正義必勝。市場對一間公司既信心,繫於股價表現。如果信正義,有咩其實一齊幫手,無問題。但你咁樣,同話「無你地事,行埋一邊啦」有咩分別??

但據聞,許老闆對著地產分析員,講中超,買賣球員賺最多,滔滔不絕。

所以,跑財經既,點幫到手,又?

2012年6月20日星期三

回水

洪良國際肯定創下本港證券史一個記錄。上市三個月被勒令停牌,兩年幾後,被勒令回水。
停牌前既股東,按停牌前價,每股兩蚊零六仙,可以全數賣番曬俾洪良。

被勒令停牌到勒令回水,上市一直持有洪良,每手只係蝕九十蚊,試問呢兩年幾,買股票蝕多贏少,九十蚊,算係咩?

洪良事件,帶出三大啟示,一,證監會確立有牙老虎形象。二,既然立下奇功,更絕不能手軟。三,任何市場質素提升,都要有其他中介人配合。

因為,洪良被揭發,最初唔係證監會醒,而係中介機構之一核數師把關得宜,審核業績期間,發現公司帳目同招股時提交完全截然不同,隨即匯報證監。

所以,無核數師當日機警,亦造就唔到證監會今日領功。

證券大法零三年生效,零六年上任證監會法規執行董事施偉民先夠膽拋出一句,證監會已經是有牙老虎。

佢唔止係警告,仲事在必行,施偉民呢幾年,無論打擊內幕交易,其他違規行為,越戰越勇。

良將不可失,施偉民不賣帳作風,贏得掌聲。任期即將屆滿,證記好應該珍惜眼前人,一定要留著佢吧!!

當然,一宗成功例子,並不代表全部。證監會加強市場質素,今年重頭戲之一,係加強對上市中介團體監管,洪良一戰,台資行敵不過證監,罰款金額創先河。

但如果對著外資大行,證記仲係咪可以保留呢份勇氣?大家可能有疑問。

加強保薦人監管諮詢,外資大行罕有聯手聘用法律顧問力抗,證監會如果一旦讓步,最後只會換嚟三個字!!!「正衰仔」!!!

洪良回水,過程曲折。法院原本駁回證監會提出由司法機制下令洪良要向投資者賠償既申請。但幸好,上訴庭之後一宗有關對沖基金TIGER ASIA裁決,就被成功引用為可參考案例,改變左戰局!!

值得高興有兩點。香港始終有法治,就算證監會點惡,牙有幾多?司法機關都變相有制衡。

第二,洪良就算最初立心不良,但事情演變落去,呢間公司負責人,總算有少許「品」。公司所剩資金,根本唔夠賠,但大股東蕭登波肯填尾數,都算負責任。

換轉其他中資民企,四,五線股,晨早就走左佬!!!仲講賠錢!!!

遇著一間動機不良,但尚算有品既公司,加埋證監勇字當頭,洪良國際小投資者,算係近幾十年本港證券市場,出事事件中最幸運既一班。

不過咁,證監會夠勇,值得一讚之餘,但同時擔心有勇無謀,過份製造股壇烏托邦事件。

證監會目的,旨在執法,同維持市場秩序,但無義務要逼公司回水。我地讚成要回水,但程序上,唔應該由證記出手,但今日此例一開,證監會自添包袱之餘,亦可能開出壞先例,俾小投資者錯覺,香港監會機構,係「回水親善大使」。

中環人話,既然洪良有錯,證監會證據充份,餘下關鍵既賠償事項,應該由一個獨立訟裁,或申訴組織負責集體訴訟。

有呢個檮制存在,監管當局最唔受政治因素左右決定,問題係,香港始終無膽推行!!!!

2012年6月19日星期二

歷史的選擇: 聯匯‏

一星前今日,聯匯去留牽連大波。任鴻文動機雖未明,但真理辯論精神勢難阻。

因為咁,我地做左一個網上調查,近二百人參加,數目不多,但感激萬分。今日,簡單講講五條問題既結果。

對於聯匯應否檢討,或者脫勾?百分之九十六讚成,百分之四反對。被問到聯匯係咪已經構成弊多於利?七成九同意,兩成一反對。

我地又問,如果要改,點改?或者有無其他建議?結果,四成八答,要改為一籃子掛勾。

百分之九建議自由浮動,同樣亦有百分之九選擇其他。認為要擴大現有兌換保證上下限波幅,有三成二,係繼一籃子之外,第二多人選擇。

只得百分之二相信,維持七點八現狀最好。

有關財金官員問題有兩條。覺得特區現有財金官員質素點係?優良,只係佔百分之四,普通既,就佔三成四。有六成二認為,官員質素下降。

咁邊位係最熟本港匯率政策呢?曾俊華,陳德霖,梁振英,祈連活,同任志剛五人之間選擇,結果,曾司長同陳總裁零分,梁振英得一分。

祈連活有四。任志剛,最多,有九成四票數。

聯匯改唔改,事到如今,拆局無用再表態。

要留意係調查內,支持檢討或脫勾,佔絕大比數,但一問到點改,分歧卻極大。

是否反映一個唔算太理想既情況,就係第一,多數意見係想改,但唔知點改。

二,係經過三十年統一思想,壓制討論,香江今時今日,對匯率政策有思考,有背景認識既人,委實唔多?

呢個問題,並反映喺第五個問題既答案上。最熟識匯率金融政策運作,竟然由退役任總超高票當選,健康與否,固中有無涉及印象或同情分,唔知!!

但現任曾,陳二人,把關之手,左右財金政策最高決策人,攞其零雞旦,能力之外,更係香港悲歌!!

林行止形容,佢同任志剛從南轅北轍到如今不謀而合,意想不到。撇開任總登高疾呼背後,林先生認為,絕不應對真心關心港元及香港經濟前途等等意見,視為來意不善,此為精要所在!!

任鴻文「頭七」,遺憾七日以嚟辯論繼續,但新意欠奉,無論支持改,或死撐不改,大部份意見都老調重彈,流於虛浮,實屬不幸。

張五常幾年前透露,八三年某日,制定聯匯背後有核心五人組。彭勵治,夏鼎基,郭伯偉,前戴卓爾夫人經濟顧問ALAN WALTERS,皆已作古矣。祈連活根本未有入流。

脫勾繫於掛勾人?但掛勾人已走得七七八八。郭伯偉八四年中,即係聯匯實施九個月後,曾經私下提過,當日不脫勾,一世永難脫。

佢的確可能開口已中。唔想俾佢批死,無論金融異見份子,或者保勾黨,好應先從修身做起,強化個人對匯率機制既認識,呢個先係尋求最佳答案既先決條件!!

2012年6月18日星期一

明燈補習社: 茶餐廳經濟學

點解就嚟上市間茶餐廳無左午餐肉或豆豉鯪魚通粉?

刀在鋒上

六個星期既震盪,由新民主黨以些微票數勝出,暫時保著左十七個歐元成員國既完整。

支持繼續緊縮政策嘅新民主黨,以微弱優勢獲勝,保住國會第一大黨地位。

預料新民主黨同、前財長維尼澤洛斯領導嘅泛希臘社運黨,加埋可以喺國會取得過半數優勢。

當然不論G20,歐洲領袖甚至新興市場都鬆一口氣,認為獲勝係一個好的結果。

事前對今日希臘政局分析,不外乎三個結果:1.新民主黨勝;2.齊普拉斯嬴;3.延續五月初結果、無政黨勝出。

一般分析都3.是最壞結果;1.就是最好的情況。

不過如果由市場反應分析,這個「最佳結果」,連半日效用都無,歐元同歐股都由高位回落。

更大鑊係西班牙債息,反而愈升愈有,仲突破埋七厘的歷史新高! 

一個解讀可能「長路漫漫」,要市場慢慢等希臘新政府重新談判,與國際「三頭馬車」,包括歐盟、歐洲央行,仲有國際貨幣基金組織嘅代表團談判,跟本就係夜長夢多!

更不要忘記,係極左政黨領袖齊普拉斯,雖然承認失敗、但唔好唔記國家有四分一人口,係支持佢拒絕接納歐盟嚴苛既緊縮方案。

由這個角度出發、或許讓希臘有秩序退出歐元區,令問題一了百了,未嘗不是解決方法。

今天的希臘要重新談判,其賓都無咩籌碼,既要追回之前承諾進一步削減115億歐元既赤字,同時諗方法應付八月向歐央行償還39億歐元既利息開支。

由於擔心會刺激極左政黨既民望,過去幾個星期代表團,都無高調評論拯救計劃既細節,但私底下已經預備要求,新政府再次承諾遵守協議。

部分條件好似減息同延長還款期可望放寬,但政府削減赤字既步伐,就唔會改變。

金融時報話,雖然希臘表面係脫離左「刀在鋒上」既日子,但往後仍然係困難重重,危機可能只係變成一刀「切得更慢、但傷害更深」既痛楚。

但最大危機肯定喺希臘,因為政治內鬥,國家財政幾乎秏盡,政府既現金儲備、只係足以捱到七月中。

希臘央行數據顯示,過去幾個星期,民眾每日喺銀行提走既錢,就有一至七億歐元,過去三年幾來,銀行存款就減少左三成。

連帶整個歐洲都有資金撤走,截至6月13日一周,歐洲債券基金就經歷左舊年12月以來最大一次淨贖回,連被視為最穩陣嘅德國都受波及,債王格羅斯旗下嘅太平洋投資管理,已逐步撤離當地債市。

歐元....唔,都係算了吧!

戰利品

物有所值夢未完,但收購負累已經代價高。近百七億港元收購,成效未現,港交所市值即時縮水左五十幾億。

呢個亦都符合國際準則,事關邊間交易所,過往提出收購案例,交易未完,股價先死。

大摩未有呢單交易之前,已經睇388七十八蚊,極有可能一次中目標。因為,效益未計到,但價錢實太高。

更大問題係,港交所幾乎百分之一百,肯定會股本融資,比例未定,但已經足夠理由令對沖基金不斷累積淡倉。

高溢價,高增長,以至零負債,兩高一零賣點不再。港交所短期市盈率,肯定要同其他國際交易所睇齊,甚至因為唔明朗因素,而出現折讓。

至於不明朗因素,或者所謂DE RATING維持幾耐,就要睇小加功力。

如果簡單將成功與否,等同於係咪買得成LME,小加已經立下奇功。

阿爺推動,小加執行,再加香港兩個字,前宗主國對呢個養個百幾年既養子,尚算俾面。換轉由中國兩個字出馬,價錢再高,把握反而唔大。證明,香江今時今日,仍然有朵!!

小加先向中央送大禮,佢同羅力合拍既收購二人組,盡顯投行本色,既快,且狠,但未知係咪準?

無疑,州際交易所志在必得,對方出價亦勇於常人,但唔排除,一,係故意托價。二.州際就算買到LME,但極可能構成市場支配,監管機構呢關,未必過到。

所以,從交易博奕論分析,小加,羅力二人組,唔算熟練。部份原因,可能係為博爸爸一笑。

代父從軍,明眼人都睇到,意外係英國媒體,除左每日電訊報之外,對HK STOCK EXCHANGE,呢幾個字,總算筆下留情。

金融時報Lex 也算中肯,只是形容今次交易並非單純商業Deal,更大程度是一分比阿爺的戰利品! 不過呢分戰利品會以甚麼形態送比阿爺,恐怕小加自己最終都唔知道!

下回合,股東之外,監管機構呢關,更會再遇故人,小加遇上韋奕禮!!

除非,馬丁.韋仍然將雷曼迷債放上心頭,否則綠燈已亮。

香港今次最高明既地方,係將LME監管權繼續維持番俾英國金融監管局。呢樣野,值得一讚,一, 咁會淡化「失交易所,就先主權」既心理影響。

二,商品呢家野,香港無人熟,除非證監會搵丁SIR幫手,否則由香港監管,災難性影響比用多一倍價錢收購更大。

人民幣國際化呢枝歌,如果繼續岩拍子,收購長遠的確有利,但如果國際唔賣人民幣帳,咁就大件事。成宗收購,光榮與否,睇大家點衡量,始終有的野,係用錢買番嚟。

值得一提係,小加,羅力二人組,明示暗示,股票現貨市場無前途,配合新發展,大家應齊齊學商品!!!

丁SIR,此時此刻,全港投資者求你復出,我地好掛著你!! 

2012年6月16日星期六

大禮


七一快到,過去若干年,逄七一,十一,中央為博港人一笑,都會有利好香港政策。即係依家香港市場字典內既「送大禮」三個字!!

所以,咁多年,我地有安安,佳佳,盈盈,樂樂,仲有大堆點心,同人民幣業務。

除左四隻熊貓,一大堆自由行救番沙士後經濟,我地點量化中央俾香港既經濟政策效益呢?

國際金融中心?中國曼克頓?全球融資中心,排名第一,係咪個個受惠?

又調轉想想,中資上市潮,換來係大批假數企業,內銀申手集資,香港股東幫手籌錢,點心債好賣,賣到企業其實係利用香港相對超低既人民幣融資成本。

所以,與其話送大禮,好多政策都係互相利用,無香港,青島啤當年未必集到資!

無香港,人民幣國際化步伐未必順利。香港有得益,但內地既然同時有著數,呢個係雙向性問題,定義上談唔上係送大禮。

無錯,中央利好金融措施,理論上可以送俾另一個仔,澳門,但不可行。因為無得揀!

小直通車,另類直通車,甚至港股交易所買賣基金等等,正式宣布之前,,會有無限憧憬,一經拍板,係咪真係會令市況低位有承接,高位有需求?

股票既野,無人買,就係無人買。

十五年了,香港人想要咩大禮,中央如果親自問港人,有人會話,要多兩隻熊貓。

有人話,禁止雙非來港產子。其實大禮要送,送得有誠意既話,點解唔可以要求中央,進口本港食品全部八折。

又或者,更實際,持三粒星身份證港人,以後可以一兌一,港紙兌換人民幣。港人開心,人仔流通量又加大,幾好!!!!

以上可能都是痴人說夢話,不過有無想過,更多人的心聲應是、直接會要求,是減少對香港干預!!!

2012年6月15日星期五

物有所值?



135年歷史既倫敦金屬交易所,今次揀只有12年歷史既港交所,
 
近14億英鎊,投得倫敦金屬交易所LME,港交所自己評估、當然係話,物有所值。
 
總裁李小加話,預計三年後會有盈利貢獻。更重要係戰略上,避免邊緣化,港交所可以進一步融合計劃內地設立金屬倉儲同發展新產品,配合LME轉型。

仲記得當日小加總裁提出既「萬言書」,一早交代左三八八要走既路,就係人民幣計價產品、同埋進軍商品市場,以LME全球最大金屬交易市場地位,加埋計劃推出人民幣計價產品,可以話一次過滿足兩個願望!
要了解LME是否物有所值,先要知道它的歷史架構。
舊年LME盈利跌至770萬英鎊,但實際交易量其實達到破紀錄1億4千7百萬張,相當於35億噸金屬。按年升兩成二。
咁大交易量都帶動唔到盈利,因為LME係全球少數仍然沿用會員制結構交易所,並維持非牟利方式經營。

LME舊年盈利雖然倒退一成九,但並無動搖作為全球最大金屬交易所地位,依然穩佔全球八成金屬期貨合約交易量。
目前全世界七成銅產量都係透過LME定價擁有定價權,好大程求係LME全球14個國家總共有七百個倉庫,但偏偏最大金屬需求量的中國、就無倉庫。
所以亦解釋左、點解作價相近,LME最終都捨棄交易系統更先進既州際交易所,而係揀貼近內地市場,又可以進行人民幣交收既港交所。

金融時報話,今次交易象徵過去百幾年西方商品市場既交易同定價權,已經出現「西向東移」。
當然,今次是LME「揀夫婿」,自不然吊高來買,港交所既要承諾會保留LME公開喊價既交易模式,同現有會員制架構。



更大鑊係要保證未來三年收費可以上調!!!



現時LME部分合約收費,只係相當於對手十分之一。
不過港交所要日後加費並唔容易,因為目前股東包括摩通同高盛、都同時係交易所會員,佢地未必輕易贊成提高收費。

我地唔係要潑冷水,不過都想提醒小加總裁,一來作價高、用PE計、要成180倍,加上未來三年都唔可以加費,以市場目前如此短視眼光,到底未來日子股價會如何反應,相信都不言而喻!
更大問題係眼前交易所就要配股集資,到底係咪真係「心裡有數」,相信只有小加自己知!

2012年6月14日星期四

富.事.通: U2 主音 Bono -- 比誠哥更早入股FB 的投資奇才


聯匯大檢閱


  • 我們猜不透任總點解會揀呢個時候突然轉軚,又或者佢係咪想贖罪。
    但聯匯檢討,不等於要就此即時定存廢,但現實係現制度涉及既機會與成本,愈嚟愈唔符合效益,亦係市場共識之一。
    我們作為傳媒一分子,希望呢個話題可以尋求更大討論空間。期望你的一票!(請進入下面連結)
    有線電視財經資訊台財經組
    http://www.facebook.com/moneycafe

大俠出山

唔止失去靈魂,連驅殼都無埋。

柯大俠接手、出來派定心丸,指思捷管治無問題。
大俠果然係有一番大俠風範,縱使比被質疑唔識零售,柯清輝話,自己對思捷有感情、亦有十幾年了解,更重要係公司唔可以群龍無首。
柯生潛台辭是否: 1. 無人肯做所以做 (即是局中無人) 2. 對思捷有感情 (僅是感情牌、過渡性質?) 3. 仲要有一定認識 (環看整個董事會, 無人有零售經驗?), 真係捱義氣!!??
金融時報評論版Lex 專欄、更以「More Transparency Please」做標題,指思捷正經歷一次前所未有既「身分」危機,對投資者信心損害既程度,已經遠超出過去走錯時裝路線、又或者係營運錯誤既問題。
講真一間藍籌公司,五年嚟最少換左三個主席,三個行政總裁,三個財務總監。
雖說三三不盡,但外界完全唔知發生咩事。講真,分析員話,投資界未試過咁無助。
無奈係,呢間公司仍然算上藍籌,自稱有品牌價值。
你見過分析報告向客戶講一間公司時,話唔知發生咩事未?又或幾時見過,分析員報告變相係發出最後通牒未?
思捷每股值幾錢?呢個已經唔再係估值上既問題,所以大行用最低殘既有形資產值方法,量度底位,無謂信!!
你問思捷管理層?幾年嚟,佢地在意唔係思捷值幾錢,而且自已搵到幾錢,范德施人工?
將佢減薪一半,已經令公司全年盈利升五成。無錯,佢離隊,但難保繼任人唔係又是薪酬高,貢獻少,用唐唐既講法,講就天下無敵,做就有心無力!
大不了,絕招一出,劈炮去也!!
咁柯清輝又值幾錢?過去最少值十幾億!!
今次宣布大俠出掌主席,思捷不單無止跌、反而再跌超過一成。
但好似「中指黃」話齋,有些事神仙難變,因為開始無人信呢間公司。
外界認為,柯清輝係臨危受命。但換轉另一個角度,佢已經係中策主席,國際資源副主席,加埋思捷,大俠賣人頭,有機會破上市公司記錄。
佢接受訪問時講法,暗示三個字,就係急就章!!
中環人話,對柯生有憧憬前亦要諗下佢剩餘價值有幾大。無錯,佢係邢李源時代已經係思捷非執董,亦係彤系人馬,可以令大家諗到好多野,但又可以最終咩事都唔會發生!!
如果係思捷股東,最佳選擇係,一,公司業務改善。二,係被收購。三,其他品牌執曬笠,得思捷做獨市生意!
未算去到天荒夜談,但再等一的知其不可為而為知既事情發生,值唔值?分手,其實先係最佳選擇!!!

2012年6月13日星期三

金融異見份子

三十四頁紙,任志剛由香港金融沙皇,被打成香港金融異見份子。

官員之後,政客,社論群起攻之。部份政界人士,就要求佢解釋文章動機,同立場逆轉理由,一下唔為意、幾乎以為任志剛已經變相「雙規」?

市場發展,經濟貨幣政策,意見可以有,並且可以好唔同,就算內地時有發生。

君不見,唔少內地評論對中央經濟政策力數不是,窮追猛打,更大鬧人民幣國際化係錯誤決定。

如果以過去內地呎度,呢班人一早被打壓,但無!! 相比之下,金融異見份子任志剛呢幾十小時獲得既對待,在在反映從政人,同財金系統膽怯異常!!

任志剛呢位持不同意見人士,突然衝擊聯匯,動機的確成疑。但動機成疑,唔代表理據不足。

如果因為懷疑動機,就推翻立論,鬧佢既好一批人,先係異見份子。

呢批異常份子,企圖製造既定事實,背後理據,令人想起國皇的新衣既故事。

政府可以唔加入討論聯匯,呢點當然清析,但唔應該唔俾外界有討論同批評既空間。

更弊,係過去三十幾小時,社會明顯形成一套主流意見,就係巔倒邏輯,包括將檢討聯匯,等同於脫勾。

更甚係,製造脫勾,就等於香港玩完、世界末日既事實。

呢個其實係將一個討論,帶到一個極端既辯論議題上,最粗劣同低裝既招數!!

力撐聯匯既理據,離唔開一句,就係過去三十年制度行之有效,協助香港經歷風風雨雨。

但如果用主流人士既邏輯思維去反駁,我地又可以問,自己過去三十年無病無痛,身壯力健,係咪代表嚟緊既歲月,會繼續精力充沛,保證唔會有事?

陳德霖駁斥任志剛,話聯匯不是通脹同資產價格暴升既主因,佢低估市場智慧之前,亦顯示自己功力有限,因為佢錯用新加坡做例子做檔箭牌。

無錯,新加坡通脹亦高,但唔好搞錯係,新加坡都行緊有管理匯率機制。但斷估,佢又解釋唔到,內地通脹得百分之三,香港超過百分之五既理由,無他,佢忘記港紙比人民幣貶值兩成有多!!

批評任志剛呢個金融異常份子,理由可以好多。的確,聯匯佢有份搞,九八、零三,兩個黃金機會都錯失。

到零五年將機制強化,雙方兌換保證,更令香港綁手綁腳。

我地猜不透點解會突然轉軚,又或者佢係咪想贖罪。

但聯匯檢討,不等於要就此即時定存廢,但現制度涉及既機會與成本,愈嚟愈唔符合效益,亦係市場共識之一。

敝台或許可能予人挺任之感。但事實我地只係尋求更大討論空間。

至於撐唔撐聯匯,觀眾稍後可以登入MONEY CAFE既FACEBOOK Page,投下一票。

2012年6月12日星期二

解勾人

今日的我打倒昨日的我,聯匯無構成通脹,為本港帶嚟穩定,呢啲睇法,在退休近三年後改變左。

由管理層變成學者、任志剛發表長達34頁嘅論文,標題係「香港貨幣體制的末來」。

提出本港有必要檢討貨幣體制、包括係咪將港元繼續同美元掛勾。

徹底改變之前諗法,大前提假設係因為美元同當年唔同,變咗弱勢貨幣。擔心本港再承受唔到、輸入外來量化寬鬆同時間人民幣升值,影響用港元嘅香港人同透過港紙作為集資單位嘅投資者。

08,09年,大量資金流入本港,加埋六千四百億港元。呢批錢,一直無走。

確實、由於貨幣基礎同結餘愈多,就令港息愈低,港匯弱勢。

本港可能面對呢批錢,一直唔走帶嚟既問題。

任志剛透露,仲喺金管局期間,已經擔心會造成通脹同資產泡沬。

佢話要一個七百萬人既貨幣體系、同時擔任一個為十三億人國家進行金融中介服務,兼且要維持貨幣穩定,呢種期望係不切實際。

所以點樣令結餘下降,成為任志剛主線。

佢指,金管局一直可以行使酌情權,透過市場操作,影響結餘同港息。可惜,一直無用過。

沿用多年既7點8兌一美元既聯匯,亦需要考慮係咪要變。

任志剛提出,可以將目前7.75至7.85兌換保證上下限波幅,擴闊,甚至乎取消。

又或者,學新加坡既「貨幣走廊」,將貨幣同一藍子掛勾,令匯率可以反映經濟狀況。

任志剛話,退休後,番過內地多次,又多左同市民接觸。

人不再高高在上,令佢明白人民幣升值憧憬造成嘅心理影響有幾大,甚至影響到內地人同港人之間嘅和諧關係。

所以要諗本港外匯基金條例賦予嘅政策目標,甚至要加入埋維持物價穩定。

到最後任總不忘「串咀」本色,佢話睇到現政府、未必有勇氣承擔改革嘅風險,特別係喺現有政治環境下,估計佢地「多一事不如少一事」喺聯匯問題唔會主動。

亦指自己太坦白,可能會令人唔高興。

任志剛強調,只係趁自己仲有記憶,分享對聯匯嘅睇法,無政治考慮。

仲話自己『人微言簿』,唔係想俾建議任何人、更加唔係『解勾還需掛勾人』。

據聞整個政府架構事前真係毫不知情,有高層財金官員既形容辭、我地都唔方便透露!

簡言之、而家定性係「無新意」,不過似乎金融市場唔係咁諗!

平心而論,喺政府即將換屆時候,任總出呢招的確係相當難接。

不過又咁講,我們一貫立場,都已經唔止一次重申聯匯既禍根一定要正視,或者我地「人言微輕」,但如果唔係任總出聲,聯匯制度呢個話題、又點會引起各方關注!

今次任總出聲、聽聞最大動力係因為比佢知道放喺88樓個夾萬個幾個備用方案,三年來都封塵,為免自己心血化為烏有,所以選擇不再沈默!

2012年6月11日星期一

榜樣

大半個月前G7開會,醞釀救市,同時正在上演係歐聯冠軍戰,拜仁對車路士。

今次,歐元集團出手拯救西班牙銀行業,就係四年一度歐洲國家杯。

西班牙尋求歐元集團一千億歐元貸款,拯救銀行業,首相拉霍伊喺差唔多一日後,啟程去波蘭睇歐洲國家盃比賽先至開腔解畫。

為睇波先出面,俾人印象係草草交待向歐洲救援詳情。

佢緊張,係西班牙對意大利,結果打和!!

如果夠迷信,今年歐洲國家杯盟主,萬萬要留意。前一屆希臘,上屆西班牙,通通成為一級歐豬國,名符其實係歐豬國家杯!

西班牙唔認救援,只係申請信貸額度,講法明顯低估市場智慧。申手攞錢,亦係搵人幫手,搵人幫手,即係救助,纙輯係咁,無人否認。

國基會話當地銀行業四百億歐元資金缺口,而家爆出歐洲相助最多一千億歐元,震盪療法、市場歡喜過後,慢慢又可能搵利淡理由,再製造市場恐慌。

無他,歐盟呢張期票,開得太爽快,太慷慨,無疑,西班牙借錢要還,但無需要加馬緊縮,令同樣接受拯救既愛爾蘭率先眼紅,要求重定條款。

稍後,「爛仔」希臘又肯定有樣學樣、甚至變本加勵!!

所以,西班牙避開用BAIL OUT,係劇本所需。而今次劇本,幕前掛名導演似乎係美國,原作編劇默克爾反而異常低調,歐洲係咪被迫就範,不言而喻。

當然樹立榜樣亦係劇本所需,希臘支持緊縮方案既新民主黨同泛希社運已經即時撲出,顯示左比民眾睇、願意走上承擔責任之路既好處。

市場發展至今,已經唔係救市,定唔救市既問題,因為無得揀。依家係發展到,點樣有技巧救市,去控制市場無止境期望。

撇開背後原因,上星期內地,澳洲,同歐洲已經變相開出三張認沽期權,呢一刻市場認為係好消息,但已經同一時間要求美國QE,否則大市升勢,只係短暫補空倉盤效應。

從呢個角度,祖國,歐洲,以至美國,唔似有協調,而係各自為政。更慘分析報告日日建議呢樣,果樣,令市場預期升溫,要求日多。避免央行俾市場綁架,下回合係咪要下令分析報告,禁止再有政策建議呢,又!!?

2012年6月8日星期五

棋局

記憶所及,中國三年幾嚟首次減息,論震憾力,今次最強。但論破壞力,亦可能係今次最強。

撇開數據好與壞,經濟有幾差問題。

金融時報形容得好,周小川依家等於捉緊國際象棋,陷入ZugZwang「呎步難移」既棋局,無論步棋點行,都好容易滿盤皆落索。擔心下錯一步,成個局最後會輸曬!

無疑,國際市場夾雜央行博奕之中,政策左右市況,貝萊德老總,半年前話百分百資金買股,依家話預測市況難,並唔係不負責任言論。

的確、零八年雷曼倒閉後、人行連同七國央行聯手減息,啟動第一輪寬鬆措施,印象記憶尤新。

四年後面對另一輪相同困局,有行動既、集中喺新興市場例如巴西、印度、或者係過早加息既澳洲,發達國家未見行動。

小川行長做先頭部隊,無疑俾人背城借一之感。但更直接影響係,利率市場化步伐行得比預期快,因為之前內地專家無估過第一步會俾埋存款利率上浮。

內銀步入夕陽,中環分析員指,未來一段時間走勢係有波幅,無升幅。簡單一個算術,上調存款浮動波幅後,大銀行存貸息差由三厘一五,降至兩厘九,降幅超過二十點子。

存款高息左,資金流入,咁流動性陷阱不單止無解決,而且更嚴重左。

所以這個被市場視為邁向利率市場化重要嘅第一步,但代價就是銀行會成為犧牲品!

今年係咪比零八零九年差,基本係。G20國經濟同一時間放緩,未見有改善,上次唔係咁。

經濟學人封面社論用一艘沉輪,形容依家全球經濟,隻沉輪則邊,加左一句句子,係叫默克爾唔該妳開動引擎。

經濟學人話,全球經濟即將步入危機,前景繫於默克爾一人。聽落去,合理,但客觀分析,依家全球問題,唔係默克爾全部一手造成,就算佢肯放水,肯放底通脹包袱,願意出錢出力救每一隻豬,難道全球有救??!

黃金戰士潘國光半年前已預言,金融市場已經成為政治角力場,各國各有盤算。有歐債問題一日,美國繼續受惠,所以美國會唔會出力救市,好成疑問。

歐洲固然亂局一片,部份就歸咎美國為首金融機構製造恐慌。而中國,由信歐洲,到近期任何歐洲資產都敬而遠之,結果率先被夾,走上減息之路。

行得一步,市場預你行更多步,做更多野,有幾弊,計唔到。

講番經濟學人,默克爾成為唯一全球救星,抬舉佢之餘,亦淡化過去三年央行錯得太多,錯得太深。

歐洲係後知後覺,但美國過份先知先覺,一輪寬鬆唔夠,做足兩輪半,製造通脹之後,經濟再被通脹蠶食,至於祖國,當日充大頭鬼,爛局未完。

全球金融同經濟問題,要全球合作解決,呢句係廢話,因為經濟同金融市場係戰爭既一種。
打仗,點會有合作呢?又係黃金戰士,講過一做QE,就一世QE。

經濟及市場止痛劑,份量只會愈開愈多。香港高舉背靠祖國,面向世界,當日係賣點,依家係前景既疑點。財金官員夢醒過後,似乎要為未來會發生既事,做做周詳!!

2012年6月7日星期四

奇招

都說今個六月不會平凡。

未等星期六公布既通脹同工業數據,人行再次出奇不意。
星期五起減息,一年期存貸利率都減四分一厘,存款利率減至三厘二五,貸款就減至六點三一厘。

對上一次人行減息已係零八年十二月,之後就進入加息周期。

至於長年期既存貸利率就不對稱減息,貸款劃一減四分一厘,存款利率減幅就較大,最多係減零點四厘。

這在過去幾年高通脹年代可以說是匪夷所思,因為以目前3.4%通脹,減息後仍然是負利率,何況長年期利率減幅更大,原因就只有一個。

物價回落幅度更大!

對於今次減息、經濟師表明時間係意料之外,因為市場一直預期人行會透過調低存款準備金率、增加信貸。舊年開始、人行已經減左三次存款準備金率,降低至百分之二十水平。

減息之餘,更大動作是啟動利率自由化    

星期五起、將金融機構既存款利率浮動區間,上限調整為基準利率既一點一倍,貸款下限就調整為零點八倍。

過去內地從未試過容許存款利率有浮動範圍。

值得留意係年初、周小川先話唔係推行利率自由化?好時機。

只係短短半年、態度一百八十度轉變、仲坐言起行。

今次明顯係內地利率自由化第一步,調整利率浮動區間將會加強銀行之間既競爭,未來銀行盈利可能受壓。

其實人行推動利率自由化之前都有跡可尋。三月多個中央官員都表明,話建立利率市場化既條件已經基本具備,要加快推進市場化建設。

之後中美戰略經濟對話前夕、蓋特納首次放棄匯率戰場,要求人行加快利率自由化,希望可以透過增加居民收入,令中國買更多美國貨。

顯然,今次上調存款利率區間,就是希望刺瀲內需,以消費再次推動經濟。

代價再次表明,是內銀股,相信熟悉我們觀點的,都一早知我們是睇淡這個板塊!

之後問題又再次落到伯南克身上,一旦月中希臘選舉真係有「三長兩短」,全球QE之日、恐怕都不遠已!

2012年6月6日星期三

祭旗

唔係出報告,實在都唔記得有雷曼迷債調查專責小組。

用近四年時間,二千八百萬,平均每次會議用上廿萬,最後由任志剛一人孭飛,成為唯一被予以譴責既人。

到底係代表任志剛值二千幾萬?罪大惡極?還是調查報告水平有問題?

這些都係為譴責而做調查之前,值得思考!

專責小姐如果要人頭落地,與其搵任志剛一人,倒不如譴責埋雷曼前行政總裁Fuld,唔係佢監管不力,公司唔會執笠,雷曼唔倒閉,就唔會有迷債事件。

又或者甚至譴責格林斯潘同伯南克,疏於監管兼奉行低息,呢個先係令全球金融追逐收費業務,賣產品搵收入既主因。

前證監會產品審批高級經理高秉忠一語道破,專責小組有幾多人識金融?

任志剛一句問心無愧,其實都君子坦盪盪,一句公道自在人心,已經勝過其他連回應不敢的財金官員。

先入為主,亦容易左右判斷。任志剛監管銀行不力或許是事實,咁證監會審批產品疏忽,無被譴責就更於理不合。

因為講到尾,無呢批產品批出,銀行唔會賣,咁亦唔會出事。

中環人話,專責小組工作努力,不能否認。但努力同能力,係兩回事。成份報告,兩大中心,包括係產品盡職審查,同埋點解出現違規銷售。

呢兩個問題上,其實金管局同證監會,都有按本子辦事。只不過,前者有公司條例嘅「安全港」部份做擋箭牌而無事,但金管局就因為無及早偵察問題而出事。

報告突顯,小組喺違規銷售,同受影響投資者兩者有傾斜。但專責小組結論帶出一個問題,就係加強巡查銀行,係咪會避免違規銷售?

問題等同於,多左警察巡街,係咪唔會有人犯法?監管能否導致違規,屬於學術上問題,有問題發生,可能真係監管職能分配同規範上出左毛病,但小組似乎只顧搵人頭,核心問題反而著墨唔多。

八七年股災,有戴維森報告,亞洲金融風暴之後,有九招十三式,同兩所合併。今次,二千幾萬,只係向一個退休高官斬頭。

有無諗過,用二千幾萬請好幾位獨立國際專家,為沿用廿幾年監管模式把脈兼建議,其實先真正造福市場。

學者指,成份報告最有建議性,係再次提出一業兩管問題。正如建議部份講證券行業監管,金管局,證監分工複雜,處罰機制處處設防。

但銀行證券業務改由證監負責,到時又會出現重複監管既反對聲音。

無辦法,本港監管由此至終有缺陷,係基於本身問題,金管局係央行,但無貨幣政策,削權就無辦法維持現行編制。

人人話,單一超級監管機構模式最好,但英國避唔到北岩事件。反而,韋奕禮同簡達恒提過既「雙峰模式」,將系統性風險監管,同涉及投資者保障既產品風險劃分,似乎係最好出路。

2012年6月4日星期一

明燈補習社-- 破解大迷信?

劉老師如何用科學化解釋秋官-- 仲有,話比大家聽幾時效應會停用!!!

劇本

如果無估計錯,六月份會係今年最精彩既一個月之一。

如果無估計錯,一個月後今日,全球幾大央行,至少有一半,會忍唔著手!!


劇情發展往往係按需要編排,扭轉操作完結在即,美國數據全線轉差,六萬九呢個數字,即將會啟動聯儲局官員轉軚事件。


轉看另一邊大陸、歐洲央行會議在即,個勢亦既定,德拉吉今年內第二次放水。澳洲之外,最大風險係祖國把持不定,真係做一個四萬億.二點零計劃。


事態嚴重、唔止歐美嚴陣以待,中國亦預定應變方案。包括發改委、人行、銀監會同外管局等中央部門,已經開始研究,一旦希臘退出歐元區嘅應對方案,當中唔少得、當然係推出進一步穩定經濟措施。


央行未做傻事之前,輿論界率先造勢。估QE3 比例,即時增加到五成,大摩更牛到估八成機會。


薩默斯貴為前財長兼經濟學家,公然呼籲歐美各國趁低息,有咁多借咁多。


的確,美國十年債息跌至1厘43既歷史新低,德國債息更罕有出現負回報,薩默斯話任何私人企業既CFO而家會做、就係趁低息借錢同延長債務限期,佢認為政府無理由唔係做相同既事。


但佢無講,條數點還呢?


有趣係,被指為泡沬之父既格林斯潘,反而提出七九年理論,話市場為保增長蓋過美國龐大赤字問題嚴重性,一旦財政懸崖呢個因素又成為造淡理由,市場利率就隨時好似七九年咁,升至九厘或以上水平。


格老擔心既事情,肯定唔會短期發生,但說明一件事,就係央行一有行動,稍為控制市場負面情緒,好快,市場又會發掘新既問題,因為太多問題,拖得實在太耐,連茶餐龐既大叔都識講,專業既投資者點會唔知?


零九年之後,股票無長期持有呢回事,作為投資者,只能盡快揣測央行既舉動同決定,然後FRONT RUN。


情況就等於玩傳遞不斷膨脹既氣球遊戲,盡快趁個波爆之前,傳俾下一位。


央行政策係咪有用?呢個問題,已經唔係重要。兩輪量化寬鬆,對市況支持長久性,一次比一次短。但唔緊要,市場要,央行一定會做。


不過毫無疑問,依家比零九年問題更大。當年,區內經濟撐得著,依家?歐美,新興市場經濟同一時間向下,借新還舊日日如常。


我地要對沖央行風險,但千其唔好長情,咁既環境,無估值吸引呢回事!

2012年6月1日星期五

血色六月

六月伊始,諸事不順?

壞消息像是預早夾定,一浪接一浪,先是內地PMI 走樣、繼而是歐洲PMI 落至三年低位,最後以新增非農業職位只增長6.9萬分作為完美結局。

結果歐美股市大跌、油價更出現恐慌性拋售。

世事豈有巧合如此?

更值得恐慌其實仲債市。

先係美國十年債息跌穿一厘六,創歷史新低。

德國債息更罕有出現負回報,投資者寧願罰息,都要將資金泊入。

早喺今年初已經預測利率會跌穿呢個水平,格羅斯形容,美債回報雖然唔吸引,但就好似喺污漕衫入面揀一件最乾淨既、同德國債券一樣成為避險既天堂,投資者就算係負回報、都要將資金泊入。

佢相信呢次大型既「去槓杆化」過程會係歷史少見,歷時會係數年時間。

格羅斯預測,希臘最終都要脫離歐元區,相信股市可以有反彈既投資者注定失望,要穩陣、佢建議考慮買入「抗通脹債券」。

那不就是本港推出的iBond??

其實好像黃金戰士潘國光所言,2012年會否就是2008翻版? 而家已經嗅到血腥味?

先說希臘,其實如琴日大摩「四個離婚、一個葬禮」的講法,幾乎大家都認定希臘一旦脫離歐元區,其實股市係升機會多過跌。

反而令人苦惱是西班牙,到今天都看不到有何出路?

其實如經濟學人就指,西班牙問題唔同希臘、現屆政府已經採取措施削赤,甚至將債務上限寫入憲法。

目前西班牙政府債務只係佔GDP七成,更低於德國。

問題係目前西班牙銀行體系疲弱、要解決問題就要動用公帑注資,可能要動用一千億歐元、佔GDP超過一成,結果又變成財赤惡化。

經濟學人話,歐盟領袖而家喺時候盡快取得共識,透過救市基金向當地銀行注資,咁先有機會拯救西班牙。

市場而家顯然係同央行博奕,到底是那一邊先失去耐性,向對方投降? 那將是主導下半年投資市場的方向。

中國,別了?

全球五月份採購經理指數倒水,無人意外。

實話實說,西方PMI,前膽性同對經濟前景反映準繩度,遠比新興市場為高。

我地唔係話新興市場有造數之嫌,但採購經理指數,始終係一份問卷,當中牽涉係企業管理層功力,同判斷力。

印度為例,經濟實際增長百分之六不保,九年最低,但最新PMI仍然有五十三點八,比四月只係低零點一。

如果係信印度PMI,咁印度經濟從來無事,因為最少十二個月內,數字未見過低於五十。

同樣,內地官方PMI亦有一定問題。六個月嚟持續高於五十,問題不大。要留意,三,同四月份PMI,都超過五十三水平,四月數字更係十二個月嚟高位。

同期,兩個月份無論產出,新訂單,同新出口訂單都係上升。

如果三月PMI係反映四月實際數據,事實錯曬。又如果四月數據,會反映五月工業生產數字會理想,一定又錯!!

官方PMI,同官方工業生產等數字背馳,似乎前者顯得毫無前膽性可言,而官方PMI,同匯豐PMI同樣背馳,又可能引證,央企判斷能力,比中小企更加差。

新興市場PMI前膽性打折扣,係民企為主既中小企未夠班,央企為主既大型企業長期受保護,市場觸覺低。所以,無論經濟好與壞,公司一向對前景樂觀,未必係睜大眼講大話,而係佢地真係未見過世面!!

四月一批數據公布後,外界有兩種睇法,分別係「中國,別了」,相反睇法係中國唔會硬著陸。

但結構問題浮現,外界如果繼續存有不合理預期,以為有政策就等於有增長,呢種過份UPBEAT 睇法一日喺度,就會有機會拖累經濟應有既正常調節。

如果再睇番兩個PMI數據,共通點係訂單大減,製成品存貨急升。即是,中國過去一段時間,原材料去庫存行動,證明失敗。因為製成品賣唔出,依家全部喺貨倉!!

陶冬改口話要減息,刺激經濟有二萬億,相信會有辦法避硬著陸。

阿爺有辦法,市場講左好耐。如果真係有辦法,就唔需要有個疑似2.0版本出場!

祖國仍然靠出口推高工業,但區內何嘗唔係。區內貨幣,今年嚟少則跌百分之二,多則累積跌超過一成,人仔跌幅百分之一都無,萬一歐美需求返嚟,匯兌成本上,人地有優勢,但中國就無!!

五月到依家,學左好多野。包括,避險可以係不理智,唔講回報,負利率照買。包括,內地高消費,本港零售市道神話不再。亦包括人民幣國際化,可能回歸本土化。

我地係咪要學特首,為呢一切,低頭飲泣呢?