財經拆局

1.美國:QE2下個月就結束 2.歐洲:歐央行率先加息 3.英國通脹率升至4.5%的三十一個月既新高 4.日本:二十八個月來首次回復通脤 如果市場確信以上現象，那如何解釋債息跌完再跌之謎? 金融時報統計、四月以來美、德、英同日本既十年期債息回報，全部係一致向下，跌幅介乎一成三至一成半。 美國十年債息更跌至今年新低，不日將跌穿三厘，利率期貨更反映，未來一年都無加息機會。 同一時間，呢幾個市場既通脹預期，亦全部向下，反映投資者根本唔相信環球經濟開始復蘇。 其實不用問大行都知，債息既變化已經話左比大家聽，成熟市場既經濟反彈只係投資者一廂情願，就算未來幾年經濟增長都只係好有限。 債券大王格羅斯3月講過，會全數減持美債，不過期後債價反而上升接近兩成，華爾街日報話，信左格羅斯既投資者，肯定會非常坐立不安。 華爾街日報話，雖然有唔少分析好似格羅斯咁、認同喺聯儲局停止買債後、債息就上升，但更多人開始洞悉經濟既黑暗面，相信經濟再次陷入衰退，面對既係通縮、而並非通脹。 目前美債扣除核心通脹率，只係喺一厘七左右既水平，比起71年經濟好景、或者係83年經濟衰退都係偏低。 不錯，聯儲局的確有機會再加印銀紙、通脹同債息係有機會升上雙位數，但喺之前經濟要先經濟再次衰退，債息係有機會跌至新低水平。 講到市況、不論鄧普頓麥樸思、或者末日博士魯賓尼，都開始「嗅」到國際市場出現異變，不約而同提出「轉捩點」的觀點 佢地提出新一輪既金融危機迫近眉捷、理據之一是最近全球衍生工具總市值，再次超越左全球經濟生產總值規模，而大型銀行既規模亦都超越之前，不過監管當局就未有吸取教訓，反映對衍生工具仍然缺乏有效監管。 大家又是否「嗅」到這種不安?

人行之前公布，全國４月分住戶存款，減少４千６百幾億。 呢個數字好明顯，係話俾大家知負利率有幾慘，兼且短期內無解決跡象。 正當香港無晒港紙存款，原來內地都問緊同一個問題，究竟啲錢去晒邊？ 買樓？中央係咁調控，大城市又有限購令，想買多幾間嚟收租，都唔係咁易。 買股票？Ａ股創兩年最長跌浪，似乎又唔係。 仲有咩出路？有報紙列出三大可能性，一齊參詳吓。 第一係買商品，理由係金價強勢，今年內幾次創新高，自然吸引富戶注意。 其次可能係買銀行理財產品，勝在有人幫你管，唔駛頭痕。實質流入金額幾多好難統計，不過今年頭四個月，發行嘅產品有５千４百幾款，按年升近一倍三。 最後，暴發戶嘅通病，都係鍾意晒命。最好辦法就係買藝術品，可以保值之餘，同時擺喺屋企當眼地方，又顯示到自己有品味。 唔少嘢㗎。舊年內地嘅藝術品市場，拍賣總額５７３億，佔全球交易額兩成三。今年睇嚟仲會再升，舊年張大千幅「愛痕湖」，成交價１億零８十萬，破盡現代畫嘅成交價紀錄。 幾時再破紀錄？元代王蒙名画《稚川移居圖》，已經起價1.6億，真係指日可待。有內地嘅拍賣行老行尊仲話，過多三、五年，藝術品成交價過億，會成為常態。 不過要炒呢種另類商品，真係好睇時機，因為同炒股票、商品唔同，價錢資訊一啲都唔流通，無圖睇。基本因素亦只有一個，就係班有錢佬多唔多錢駛。 四千億存款去向之迷，係咪真正走曬去藝術品市場，或者經營民間貸款，真係唔知。當然，班內地豪客可能仲係落緊嚟，日駛過百萬緊掃名牌，但聽聞亦有唔少四出套現!! 中環人話，近日見過有拎住堆名畫、古玩、紅酒既中間人四圍兜售。查問之下，賣家係內地，據說部份紅酒仲係超級難搵。 明眼人一睇就知，而家嘅市況係奇貨可居，但竟然要割價套現。莫非...... 要更留意內地資金，似乎以後更要留意埋澳門賭彩收入，如果高位回落，趨勢持續，即係話正式散水!

IMF總裁鄰選，到左白熱化! 法國財長拉加德率先宣布參選，仲計劃出訪各國，包括中國同巴西，爭取支持。 卡恩因為性侵犯而被捕，而家搵個女總裁的確係有機會淡化事件。 更何況佢已經先後得到整個歐盟、以至美國希拉莉支持，而家仲識爭取新興市場，真係有晒策略! 今年55歲既拉加德，本身係反壟斷法同勞工法律師，曾經出任一間國際律師行主席。 傳媒形容佢性格係有話直說、加上商界既作風，本來就同法國政壇格格不入。 最終因為處理金融危機、令佢喺海外贏得聲望，最終亦令國民對佢改觀。 法國風格及國際主義既混合體，成為拉加德標記。 05年出任貿易部長時候，佢由美國芝加哥起飛到巴黎、呢位前大型國際律師行既總裁，第一個批評就係法國勞工市場欠缺效率同彈性，即刻令整個法國社會為之震盪。 期後、拉加德都要修改自己既用辭，亦令呢個自由市場信徒、上左法國政壇閎第一課。 所以佢擔任財長期間，推出左多項監管措施，包括推出國際銀行稅、以及加強監管對沖基金，都被認為係「反市場」既舉動。 不過拉加德同時亦推出左多項開放市場既動作，包括國內加強反壟斷法，以及改善公營機構效率。 作為一個素食者、拉加德律己以嚴、同一般法國人唔同，從來唔會飲酒，佢熟悉法語同英語，而且能言善辯，甚至可以出"DAILY SHOW"而獲得一致好評! 雖然佢無類似卡恩既學術背景，但唔少評論都讚揚佢有專業精神、亦具備技術官僚既長處，而佢喺今個星期公開參與鄰選既記者會上，亦都刻意淡化歐洲人身分既爭拗。 不過最大障礙反而唔係來自佢本人，而係佢既背景。 今個星期無論係經濟學人定係FT主筆Martin Wolf，都反對拉卡德出任IMF總裁。 經濟學人話，拉卡德雖然有咁既能力，但IMF目前最重要既工作、正係處理歐豬五國既債務問題，卡恩因為想參加法國總統選舉、佢對希臘等國較為"慷慨"既手法已經備受批評，加上好似係以色列同墨西哥央行行長都有同等既資歷，所以IMF唔應再搵歐洲人出任，而家係時候應該改變。 Martin Wolf更直接指用「國王已死；女王萬歲?」來形容今次內定鄰選，形容IMF公開遴選既承諾已經消失，加上拉卡德經濟智識有限，搵佢出任只會係一大錯誤!

一間藍籌公司，要為一份大行報告，刊發港交所聲明反駁。印象之中，係歷嚟首次，亦證明呢份大行報告幾有影響力。 瑞銀建議繼續沽利豐，早就講過目標價唔係重點，而係內裡分析。有功力既公司分析報告，睇淡一間公司，遇著老練公司管理層，多數係冷淡對待，一於唔理你，但唔好預我下次俾生意你做。 今次，利豐咁緊張，專登開市前反駁，係有的古怪!! 原因好簡單，就係分報告有說服力。基金中人講笑話，撰寫利豐報告既瑞銀分析員史賓沙林，行內出名靚仔。 當女BUYSIDE，遇著靚仔SELL SIDE，說服力更強，原本唔想沽，都不由自主!! 利豐反駁，集中係報告內提及既入帳問題。瑞銀無話利豐做數，只係提出會計準則改變，令利豐可以將無咩表現既收購項目，反而變成入帳盈利，提醒投資者，唔好睇盈利大數! 利豐駁斥入帳之說，但瑞銀對利豐盈利預測模型之中，最核心假設，其實係成本上升，同高市盈率支持收購帶動盈利增長呢條方程式行唔通，利豐駁唔到! 可能點中死穴又或者係見股價跌太多，跌到恐慌。 利豐管理層據聞異常緊張，動員分析員解話，希望買手可以手下留情兼低位吸納，否則唔會見到尾市掃番咁高! 講真，全長30頁嘅瑞銀報告，利豐努力搵出四個錯處澄清，但市場最關注策略，點解要由收購轉為自然增長，盈利係咪放緩，通告就隻字不提。 一間唱淡，即刻有其他行跟風。 麥格理亦講中利豐一間死穴，就是中間人角色。 最近澳洲零售商Myer中止利豐採購協議，B2B網站Global Sources又搶走利豐Sears同JC Penney兩個大客。 這反映出零售商面對成本上升、但又不能提出售價，唯一可想就是要省去中間人角色。 其實利豐唔係一間差公司，比思捷，佢地更有前途。利豐故事，只係說明預期稍有落空，高市盈率股份，會跌得特別多。而瑞銀報告就另外說明，報告內容有力，唔理咩大行，都有能力說服投資者，呢個能力，唔局限於高盛。 近日，來自五湖四海報告，都對後市作出不同程度預測，但結論多數係等多一、兩個月，就會升。而且理據千篇一律，就係通脹見頂，收緊政策放慢。 調番轉問自己，如果報告係有說服力，港股一早就應升左!! 亦即係話，中港市場賣點，投資者其實一早知，想佢地加馬，又想未入市既入市，得過「講」，或者流於空談式既分析，已經唔係當今投資者想要! 除左資金因素外，大行想踢高個市，或者某些股份，投資者要更有力既分析。似乎，分析員除左多做功課外，亦要諗的新觀點，...

開市埋位同事曾經講過，利豐係咪會步思捷後塵。兩者相同之處、係同樣之前都係高增長股，無資產，有品牌，市盈率又高! 唔同係思捷爆左，利豐仲未。利豐係咪做思捷第二，上次無結論，今次亦唔會咁快有。 利豐由業績之後，一直跌。同思捷情況一樣，都係高增長被懷疑。大行發功，令利豐跌得更多。如果利豐正如瑞銀所講，要跌到九蚊，即係落番零九年三月水平。 瑞銀一早睇淡利豐，幾乎係同行最早。瑞銀踩多一腳，除左個勢靠佢地果面外，好大原因，亦配合整體策略報告對中港股市審慎原則。 九蚊呢個目標價準唔準，不得而知，亦無需要理會，因為睇報告從來唔應該睇目標價。佢地沽出評級，可能已經有好多客戶跟。 但瑞銀有關利豐報告，的確係近期投行個股分析中，較有誠意之作。 主流分析利豐報告，大部份著重美國經濟、沃爾瑪、收購......總之因為利豐之前表現好，就算有咩新出現變數，都話好快無事。 利豐之前宣布，更改策略，由集中收購，改為自然增長。明眼人都覺得，兩個月內改口，擺明有野，但部份分析員可以霸王硬上弓，話咁即係管理層對業務有信心，咁既水平，認真一般! 講番瑞銀報告，立論好簡單，佢地無理美國經濟問題，只係集中睇成本。 第二，由於收購唔係首選，所以將整個盈利預測模式調整。 報告最精彩部份，係俾佢地搵到論點，證明利豐過去兩年利用高市盈率，先融資，再收購，對提升盈利作用明顯。仲話，傳統上利豐市盈率愈高，收購愈有著數! 佢地計過，利豐如果本身三十五倍市盈率，買十至十五倍項目，盈利可以多一成。相反，如利豐市盈率只有五倍，盈利可能被拖低一成二，至兩成一。 由於利豐正處於盈利預測下調周期，係咪好似部份大行話，已經反映晒？ 可以肯定的是，利豐合理市盈率會繼續有壓力，亦解釋到，利豐管理層點解突然改變策略，改為集中內部增長。 難道，利豐當日無講既，由瑞銀解話!!唔通連管理層都預期，股價短期無運行!!!

高盛又發功。 三度轉軚，期間一個月唔夠，由睇淡到全面睇淡，到睇好。次次都可以令商品市場上落異常，高盛，真係玩曬! 高盛多次彈弓手，以佢地坐盤規模，確係有利益之嫌。 除此之外，高盛仲有無背後動機!?? 嘉能可上市，高盛同日唱好商品，難免令人有猜想，真係要做過「順水人情」? 想來又不會! 嘉能可上市高盛無份，皆因佢地招股期間，高盛先玩唱淡，依家點會咁好死!! 江湖傳聞話，高盛一定有野，係咩，就講唔出。 但奇係，高盛今日出左極多報告。有商品，有講中國，有講中資股策略，如果將兩者連埋，有無啟示呢又?!! 佢地睇低中資股預測，觸發點係下調內地增長預測，而中國經濟報告觸發點、就係高盛上調油價預測。 由此聯想，難道真正目標，係「玩」中國! 高盛之前，成功唱淡美國經濟，令伯南克加馬QE，高盛會唔會番炒舊橋，逼阿爺調控收手!?? 里昂講得明白，佢地話，市場最大憂慮唔係中國通脹，而係中國衰退。依家連內地智囊都出現不同陣營，對繼續收緊政策有保留。 觸發點之一、係PMI意外放緩，跌至十個月最低，亦令經濟動力放慢成為新既憂慮。 國務院發展研究中心巴曙松亦指，內地要防止調控力度過大、出現「超調」。 「超調」呢個字眼用得好，君不見內地經濟已經放軟手腳? 樓市投資減弱、汽車變得滯銷，連金融投資重鎮溫洲、亦因為過度收水，變成「莫財」，要高息借貸渡過難關。 同一時間任總今天亦有專題講座，今次不再談本港樓市，而是內地通脹。 任總提出、呢兩個月通脹仲會再升，唔排除會「破六」。 但佢話按年數據，主要受「翹尾」因素、即係滯後效應影響，唔一定反映通脹惡化，預計內地通脹下半年會回落，配合人行再加息，高達兩厘嘅負利率，今年內可望扭轉。 結合兩者思路，實在不能排除下半年內地政策有變; 更不能排除是政府大換班前，一次空前人事變動!! 難怪高盛警告國指有機會跌百分之５至十同時，都形容「隧道雖然長左、但仍然會見到光明」!莫非這才是真正意圖??

承蒙各界支持，我們周六舉辦的有線財經資訊台論壇「 拆解金融新秩序 」，獲得各位觀眾熱烈，自問是咁多屆以來最成功一次。(現已有網上重溫) 原因除了今年邀得猛人外，更重要是台上台下互動熱烈，幾個主要嘉賓都認為氣氛很好! 說回當日重點的一個議題，樓市。 任總當日提出了三個樓市論點，姑且歸納如下: 1. 本港樓市不再是700萬人的市場，面對1.3億人的潛在買家，那怕千分之一都不得了，因此政府要有智慧協助本地居民置業; 2. 長盤、平盤、短盤: 市民可以長盤(持有多個一層)、可以平盤(居於自住物業)，但千萬不要短盤(即為「無殼」一族，只租不買); 3. 不同意阻礙外地人來港置業，因此舉有違自由市場原則; 在陳德霖一而再、再而三就樓市和息率示警之際，任總罕有在論壇上開腔，要留意的是第二個講法。 當然，對已上車的應否加碼追揸，平盤變長盤，任總忠告是要慎防政府突出重招打壓樓市，這種政策風險肯定存在，到時會殺投資者一個措手不及。 不過在前提1. 的情況下，其實平盤長盤都是悉隨尊便，只要視乎本身能力，因為長遠計都是買起高於買跌。 當然，反對的一方會另有看法、最突出的一個觀點莫如即是捱貴租也只是兩、三年時間，總好過物業一旦遇上大跌市時、資產眨值來得恐怖。 陳德霖今日又有類似說法，再以九七為警告，而且更提醒目前利率周期同九七年好唔同，預計下半年銀行存貸利率會持續攀升，對買家做成好大負擔。 但任總提出「短盤」可怕之處是、本港樓市出現結構性轉變，除非政府真是出現了前提3. 的情況，否則內地買家比例不斷上升是必然事實，本地樓市早已不限於七百萬人的市場，短盤只會令自己離安居置業目標愈來愈遠。 況且陳德霖還漏提了一個樓市與97很重要的分別，就是目前市民置業的槓杆水平不高，按揭貸款總量是8000億港元，雖然回到去97年水平，但實質經濟規模就有倍數升幅，反映借貸水平不算備高。 何況以還款對收入比率，目前僅五成多的負擔比率，與97年的泡沬水平110%比較，相距仍甚遠。 這證明即使樓價開始下跌，業主普遍仍是有實力持有物業，很難再出現97年斷供情況。 今次樓市升浪由03年開始，雖然08年金磚融風暴有短暫下跌，但維期短於三個月，雖然按「周期論」的說法應會出現調整，但面對樓市結構性轉變，大家應再細味任總所說的「平盤」理論!

市況又告急? 同舊年一樣，歐洲豬欄入面壞豬再壞，引伸好多恐慌!! 幾日前、盛傳嘅世界末日，結果，當然大家只係一笑問候句:「恭喜仲未死得」! 同樣道理，股市未死得，原因係太家驚緊既，離離去去都千篇一律。 呢一刻，好似的確恐怖，但第日諗起，可以又覺得自己係傻仔! 希臘影響係咪咁大，依家講，話係。 因為希臘手頭現金只係夠用到七月十八日。 因為希臘一違約，歐洲銀行體系會出事。 因為歐洲銀行體系一出事，連接納希臘債做抵押品嘅歐洲央行亦會有事!!! 驚之餘，大家諗多樣野。希臘核心問題係唔肯債務重組，其實同當年阿根廷一樣，拖左近十年，最後咪又係要落實債務重組。 即係，大家驚緊同一樣野，而且驚得太耐，未必足以真正構成市況大跌原因。大量資金下，結果信呢個因素，市跌極有普，問題係跌到咩位!!! 瑞信睇得較樂觀，話依家同零四，以及舊年一情況一樣。未來股市反彈催化劑，一係望通脹見頂，二係加馬印錢‧換言之，我地叫緊「兩飛」!! 但同樣道理，大家又會諗到利好後市理由，多數唔會係最終理由。 況且，香港內地以至整個區內市場，原來「水緊」指數上升，唔係市場無錢，而係市場驚有的事會發生，唔肯放錢!! 其實講左咁耐，結論只係四個字: 「後市難料」!?? 係「行貨」，但講到要大手買貨，除非真係真正跌到左自己心目中合理吸引價錢!!

要數上星期全球播出最多既電視晝面，睇怕都係IMF總裁卡恩，因為性侵犯指控遭逮捕既畫面。 本來只係一次個人事件，不過對IMF就起到深遠影響，FT就發表左多篇社論、認為會加速世界權力東移，成為IMF歷史上一個轉折點。 係咪講得有些誇張? FT Lex專欄講到，卡恩上任以來、只為IMF帶來左好有限既全球化改革，一定程度睇，係因為法國政治似乎先至係佢既至愛。 而喺佢帶領下，IMF係過於密切咁左參與左歐盟拯救「歐豬」既行動。 FT認為，無論邊個接掌IMF都好，呢個"去歐洲化"既過程係有必要繼續落去，歐盟而家持有IMF29%投票權，遠高於佢地喺全球GDP兩成既比重。 相反，中國目前分額只有6%投票權，但以我國目前全球第二大經濟體系，佔GDP比重14%，一樣係不成比例! 所以新興市場亦選擇喺呢個時候發聲，不論中國、巴西，都表達左總裁人選可以來自新興市場既構想。 事實上、喺卡恩被捕之前，由歐洲人繼任可能性高達95%，而家有經濟學家估計，機會率下降到三分之二，甚至一半。 當然，內地傳媒有自己民族感情，但坦白講，前人行副行長朱民係未夠經驗，但新興市場好像土耳其、以色列仍然不乏擔任總裁既可信人選。 而MARKETWATCH提出左一個更深層次既問題:IMF真正的醜聞不是卡恩。 佢地形容，對呢個未經選舉產生既機構來講﹐IMF就相當於中世紀既羅馬天主教廷﹐佢地喺任何地方都隱身幕後掌握實權﹐從來不承擔責任。 MARKETWATCH指，IMF幾十年既傲慢自大、自滿自足同政治詭計，係間接導致左幾十年來最嚴重既金融危機。 呢點就連IMF本身既獨立審計機構亦發現，由04年直到07年年中﹐IMF對導至金融危機既市場缺陷同風險幾乎一無所知，亦無發預早提出明確警告。 呢個機構透露﹐IMF既工作人員好少去睇外界既研究同分析，對於好多經濟學家一早提前既信貸危機，IMF一直以來對呢啲觀點根本不屑一顧。 早前我地CAFE都有嘉賓提過"Groupthink"，即係「集體迷思」，令到一啲專業人士既機構，睇唔到近在眼前既危機，呢點都近似IMF之前面對既困境。 所以MARKETWATCH提出、卡恩今次被收押，可能反而係一個機會，褪去左籠罩著IMF既神秘光環，至少喺呢點上，今次事件都有正面意義! 不過唔可以忽視係卡恩仍然有唔少支持者，經濟學人就盛讚喺卡恩領導下、由一個無咩重要性既機構，喺...

美國有龐氏騙局，馬多夫三十年嚟，呃咗幾百億美金。 原來內地都有，規模仲大好多，閒閒哋幾萬億上落。講緊係七大「新興產業」規劃。 寫埋入「十二五」規劃綱要:信息技術、高端裝備、生物，仲有新能源，２０１５年要佔ＧＤＰ百分之８呀嘛，每年大拿拿４萬３千億。 雖則白紙黑字、但弊就弊在，由醞釀到通過，前後大大話話兩年，今年話晒係開局之年，都仲係話修訂緊？究竟呢舊錢係咪真係已經到晒位？無人知。 既然水未到，聰明錢就梗係走咗先，造成喺大市悶局之下，都出現「新興產業」股災。晶片算係信息技術喇，中芯唔見咗一成。 高新材料都係瀉，旭光、東岳，跌幅半成過外。 當然，股市係買預期，炒憧憬，過咗籠就要識得回套。 不過值得深思嘅係，「新興產業」規劃，呢個概念仲有無？ 年初話等兩會有細則出台，先炒一浸，結果，無。政策消息唔配合，換第二招又點？ 借「中投」入股，提醒市場中央仲做緊嘢，嚟到五月，又走多轉。 正所謂希望在明天，喺黑暗嘅隧道、仲有一線曙光。工信部又有消息話，新材料產業規劃，八月就會發布實施。特種、高端金屬，甚至係分子材料，呢啲大家都唔識嘅名詞，睇嚟仲有排玩。 同樣嘅模式，同樣嘅故事，講法都係要汰弱留強、整合概念。之前嘅水泥業見過，嚟到新興產業，又係炒返呢堆理由。不過，投資者其實又樂此不疲。 不過更值得諗嘅，係政策嚟到關鍵嘅十字路口，中央會先扶經濟、定收水防通脹？處於兩個對立面，似乎社會穩定勝過一切。每年果幾萬億，係咪真係會到位？要諗諗先得。

唔係Facebook，只係因為有社交網站慨念，LinkedIn首日掛牌急升，開市已經比招股價45美元升左七成，之後股價愈搶愈高，最高升到去122美元、升幅超過１點７倍。 收市仍穩守94.25美元，升幅近一點一倍，係美國公司06年以來最大單日上市升幅。 股價急升，LinkedIn市值亦水漲船高，跳升至91億美元，以市值對收入計算，超過三十六倍，以市盈率計更係近六百倍，華爾街日報話LinkedIn已經晉身全美國估值最貴既股票。 有報章頭條形容係瘋狂、喺紐約交易所大堂、作為市場莊家既美銀美林交易櫃枱前，聚集近一百個交易員、呢個情景好幾年都未見過。 LinkedIn股東個個賺到笑，有前員工更以低於1美元獲得股分，帳面淨賺94倍，LinkedIn行政總裁韋納個人身家就多左二億美元。 明知受到注目，韋納自己就刻意低調，強調上市只係第一步。 分析員話，LinkedIn受追捧、原因只係Facebook未上市，後者既估值已經由超升到七百億美元。 但LinkedIn但同Facebook唔同，科技界形容佢更似一啲搵工網站，首季收入有一半，都係嚟自招聘公司廣告，活躍既客戶有一億同戶。 而且用戶的活躍程度亦有很大差異，據統計Facebook三月分平均每名用戶花在臉書時間有300分鐘、相反LinkedIn成個月只花半小時。 可以話Check email都唔止呢個時間。 以現市值計，每名客戶就值一百美元，遠高過微軟以85億美元收購Skype既18美金估值。 風光背後，大報都質疑LinkedIn估值過高，擔心再次爆發2000科網泡沬爆破跡象，例子包括內地社交網站「人人網」首日急升後、已經跌穿招股價。 講到最後，不得不提成件事唯一輸家:高盛! 「高佬盛」都有睇錯市? 其實又不然，三年前投資LinkedIn回報翻左四翻，高盛選擇上市前沽清，不過以首日上市表現計，就少左近四千萬美元。 仲要唔計因為係股東、無得做上市保薦人呢筆。

好少讚陳德霖，但佢有關港元利率文章，實在寫得好。 好在明確，清晰講到、銀行仲會繼續加息，而更大訊息係，佢地加息，係佢地嘅事，錯不在聯繫匯率! 無錯，過千億銀行體系結餘，仲未計之前發票據吸走嘅幾千億，拆息已經長期喺零點二、零點三厘左右。如果單睇拆息，銀行係無條件加息。 陳德霖無亂講，拆息低唔代表銀行唔會加息。因為，存款增長太低，甚至個別月份負增長，同時貸款增長太快，資金成本結構出現變化情況下，銀行的確仲要繼續加息! 銀行界人士私底下話，港美息差已經失去套息誘因，拆息有排唔會升。由於香港息太低，部份大型貸款，例如銀團，仲係用拆息計價，就算按揭貸款市場突然零增長，香港銀行今年唔驚無錢借出去。 陳德霖話，銀行加息，係商業貸款多左。但銀行話，無聯匯令到息咁低，香港貸款需求唔會咁強勁。近月情況最明顯，內地閂水喉，唔少內企不斷轉到香港借錢，有銀行界講笑，話要從其他部門抽調人手，照顧內地貸款查詢!! 貸款多唔係要加息主因，更大問題係我地一直講緊，存款轉移不斷加劇，港元資金成本低嘅優勢，開始減弱。 行開街，有喺銀行門口打個轉嘅朋友，會留意到。按揭利率加，但其實港元定存利率加得仲多，部份三個月期定存，已過一厘。 比六個月定存仲要高，好明顯部份銀行搶緊短錢，應付貸款需求。 銀行係聰明，佢地明知存戶對港紙無興趣。於是，部份諗計，息高之外，仲講明，只要幾十萬大元存三個月，就送金飯碗一隻! 其實更值得留意係，銀行依家加息，只係按揭利率受影響，遲下會唔會發展到，自行上調優惠利率?! 其實趨勢已經形成，只要存款繼續走、貸款繼續嚟，加優惠利率不再是天荒夜談! 銀行界朋友話，要知銀行嚟緊息率部署好易，就係睇兩個指標，第一係人民幣存款每月升跌，第二係貸款增長數字。如果兩個指標都係升，咁大家可能預，銀行又再加息!! 大和資本幾日前一個報告，名為聯匯黑暗面。佢地講得無錯，聯匯令百物騰貴，資產急升，香港失去吸引力，結果第時要跟美國加息，問題會更大! 但大和忘記一樣野，美國聯邦基金利率，只係影響到香港金管局基本利率。其實講左咁耐，聯匯係咪只有製造泡沬功能，無維持低息效用呢!! 睇陳總文章，意會係香港雖然同美元掛勾，但原來香港仍然有自行決定利率功能! 果然係好文章、好文章!

提提已收到門票的各位，有線財經資訊台一年一度既周年論壇「拆解金融新秩序」，將喺今個星期六、下晝兩點半舉行，我地會兩點鐘開始安排入場，坐位先到先得。 到兩點二十分就會停止進場，希望各位準時進場。 再次感謝各位的參與，到時見!

14萬億美元嘅債務上限剛到期，債王格羅斯就出來澄清自己無沽空美債，有無咁巧合? Pimco上月被發現，持有百分之四嘅政府相關票據短倉，市場認定係變相沽空、繼續睇淡， 事隔一個月，格羅斯先出來否認，話只係之前沽空咗部分銀行掉期，有關嘅衍生工具，技術上被計入政府相關票據。 又話相關計法複雜、唔係專業債券投資者會睇唔明! 現賓係債王上月降至「零」後，十年債息由3.6厘急速回落3.15厘，換言之債價升近12%，就算真係沽空左、都要想個藉口話唔係沽空，否則豈不是「英名盡衰」? 面對市場無信心，中國都連續五個月減持美債，格羅斯話，美國政府應該爭取時間，盡快解決龐大財赤、恢復政府誠信、鞏固美元作為全球儲備貨幣嘅地位云云。 言下之意，豈不是為再買美債鋪路? 其實大戶有一個優勢、就係可以先行「持倉」、再靠言論影響市況，自己再趁機獲利。 很難說到底是否有違規，因為市況未必次次一定跟著大戶變化，可以唱淡時候股價/ 債價繼續升。 最根本是大戶有否足夠披露持倉透明度、讓散戶自行掌握。 剛好今日美國SEC 13F 披露左大戶持倉，先睇兩個大戶。 一個鐘情價值投資、另一個就慣以沽空手法賺大錢，但第一季嘅共同睇法，就係睇好國內消費信心會復蘇，不過入嘅股分就有所不同。 股神巴菲特入股萬事達，購入21萬6千股、總值六千萬美元，係巴郡首次持有萬事達股分。 一般外界相信、今次入股係由股神接班人之一、一向鐘情金融股既前對沖基金經理庫娒斯Todd Combs出手。 睇好金融股會反彈嘅賺錢之神約翰保爾森，反而冇喺呢方面入手，而係索性買零售股，JC PENNEY嘅持股量增加至230萬股。 股神沽神都睇好消費市道、到底所謂何事? 美國所有經濟指標幾乎都是向下，新屋動工大跌11%，工業生產又差過預期，連伯南克上月的評估都無之前咁樂觀。 似乎兩個投資之神買重的、不是今天的經濟數據，而是真正相信未來的經濟可以持續復蘇，否則很難相信自己在這個時間買入零售股。 至於黃金，預言金價會升到4千美元嘅約翰保爾森亦增持黃金公司嘅股權，同維持SPDR嘅持有量。 不過視黃金為「終極泡沬」嘅索羅斯就大唱反調，減持或全數出售黃金相關資產 更值得留意是索羅斯如何部署科技股。 思科、谷歌同英特爾都有增持，同時沽蘋果公司同惠普，惠普持股量更加大降至唔夠８萬股。 事有巧合，買左Palm的HP，啱啱警告會陷入艱苦經營、而他們用webOS推出的平版電...

一連串巧合，不得不令人亂諗。 近期市場動盪，先有幾份報告發起，跟著大人物相繼被擺上台，有拉登、再有卡恩。中間夾著美金弱，歐債危機擴大。 再係咁玩，即係嚟緊更多好戲睇! 以卡恩「風流」記錄，今次涉嫌事件，未必令人質疑。但華爾街日報評論文章就話，完全唔可以排除卡恩係被人設局整古可能。 卡恩敵人太多，薩爾科齊當日推舉佢做IMF總裁，就係要去除卡恩呢個潛在政敵威脅。 況且依家卡恩法國民望高企，講到呢度，太容易下結論!! 事實是件案仲未審，但有執政聯盟國會議員話，卡恩嘅政治生涯，就此完結。 視卡恩為勁敵嘅極右國民陣線亦都話，卡恩嘅總統夢幻滅。 外界之前估卡恩，最快幾個星期後，會宣布競逐社會黨內總統候選人提名，呢個時候，捲入官司，當然掀起陰謀論。 前總統密特朗嘅顧問話，卡恩可能係無辜嘅，話卡恩入住嘅，係法國酒店，唔排除係一場政治陰謀。 連基督教民主黨亦都話，卡恩可能係被人陷害，設局嘅人，可能嚟自基金組織，亦都可能嚟自法國右派，或者左派。 社會黨原本諗住出年，有望重奪執政權，卡恩被捕，對黨造成好大打擊，黨魁承認，呢個消息晴天霹靂。 今天「死」無對證，只可以講，呢個世界太多聰明人。色字頭上一把刀，亦係真理。 說回IMF，卡恩評論讚佢能幹，但個人名譽受損，而為保基金組織聲譽，可以預計，佢好快會請辭。 英國金融報亦同意呢個判斷，更呼籲基金組織可以趁機會大換班。佢地社論更指，全球金融環境，經濟實力變化情況下，下任基金組織阿頭，好應該由亞洲人出任。 無錯，依家無論美國好，歐洲好，問題重重。作為叫做中立機構，話事人無可能表現出任何偏差。 再者，金融混戰之下。基金組織反而更加吃重。除左拯救財政問題國家之下，亦醞釀基金組織分擔最後貸款人角色。而討論一排特別提款權SDR，亦被視為替代儲備貨幣一種。 世衛有陳太，聯合國有潘基文，基金組織由亞洲人執掌，未必係天荒夜譚。呢個位，其實中國應該「爭」! 無疑，中國好想，卡恩之前亦做左個順水人情，請朱民過檔，出任特別顧問。朱民比卡恩可能更能幹，至少少一份衝動。但無既係國際知明度，同關係網籌碼。 亦礙於票數，中國就算要去馬，都無包握。但政治係現實，講求背後交易。如果中國講聲有興趣，派一個更有知明度、又即將退休既周小川或劉明康，亦壓得著場!!

與美國今天經濟「半紅不黑」相比，矽谷就像天堂一般。 獵頭公司四處尋找CEO人選，薪酬已超越華爾街，並同HOLLYWOOD睇齊。 租金飊升、著名品牌食肆全數落戶。 這全賴一些科網併購，令企業估值水漲船高，好像FACEBOOK未上市，估值已逾760億美元，甚至超越波音及福特這些巨企。 最新另一例子，是微軟以85億美元收購Skype，成為左科技界一件大事，亦係Steve Ballmer 喺蓋茨09年離開主席職位之後、最進取既一次收購。 唔少外界都揣測，巴爾默好希望可以透過收購Skype，可以令微軟喺smartphone市場，追番上蘋果同Google。 難怪佢咁心急，因為喺上一個季度，微軟唔單止市值、連盈利都首次跑輸比蘋果，又點會唔令Ballmer 唔著急! 85億美元當然睇來唔少，不過即使交易以全現金方式完成，都唔會令微軟現金儲備減少幾多。 截至3月底，微軟擁有現金一共有502億美元! 經營左八年，Skype既優勢係提供語音、視頻如Sharing服務，表面係利補足微軟Windows Phone作業系統既短處。 05年10月，eBay斥資26億美元收購Skype，當時已被市場認為係天價。eBay後來放棄對Skype業務整合，09年將70%股權賣給私人公司SilverLake，售價20億美元。 到今日按微軟85億美元成交價計，eBay小賺，SilverLake就係大賺三倍，而且收購價亦遠高於之前市場對Skype IPO估值既定價，因為係相當於EBITDA既32倍! 如果由企業角度分析，更大意義在於收購Skype有助微軟喺廣泛睇好既移動互聯網市場、恢復活力。 之前，微軟被譏諷好似係上世紀末既IBM翻版，全因Smartphone同 Tablet既興起，令Skype比以前更有價值，唔單止成為桌面電腦一部分，更係移動設備中必裝。 而作為大趨勢，未來電信運營商點配合亦係關鍵，相信佢地更有可能、要徹底轉向網絡電話服務，Wi-Fi同3G網絡既視頻通話將更常見，並開始喺企業層面被廣泛應用。 仲有一個賣點、係Skype擁有六億活躍用戶，舊年增幅超過兩成，正係Social Networking一大賣點，呢個都係微軟一直想打入既重點市場! 大家目前關心、到底微軟係咪可以翻身? 如果喺搶得灘頭後、微軟可以搶攻，係仍然有機會同蘋果以及Google三足鼎立，但如果仲係死氣沉沉，創新乏力既話，當然難免走上...

只係相隔兩個月，政府就上調全年經濟增長預測，由原來百分之４至５調高到百分之５至６。 只因第一季經濟增長遠好過預期，增長達百分之7.2，係連續五季保持增長。 做得好，全靠出口升近17%，服務輸出喺金融業帶動亦增加百分之9，加上就業同收入改善帶動私人消費增長超過百分之7。 不過經濟好嘅同時樓價同步上升百分之9，超越97年高位百分之3，因此視之為樓市警號。 政府話計過數息口每上升1%，供樓負擔就會增加9%，呼籲要市民要留意云云。 其實在此都不止說過一次，我總是不明白，為何樓價高過九七就是泡沬? 1997年8月恆指升至16673點，之後幾年大市一直無法重上高位。 今天? 恆指見23000點，雖然比起三點高位有距離，不過已是比97年升左38%。請問政府幾時出來警告過? 當然股市上升有市值擴大因素支持、但同樣理由，當市民實質收入比起97年有改善，GDP又高於97年水平時候，為何樓價不可以高於97? 當然、我明白官員將警告放在口邊，不論是政府經濟顧問、抑或金管局總裁，甚至行政長官，他們的薪水都有部分是計算在內，而且今天警告了不中、難保周期在明年、後年、大後年總有整調，那時豈不是有大條道理說:「我不是一早警告了你嗎?」 我們想聽的、是更客觀的準確分析，不是一些人云亦云的八古說法! 說回今次經濟報告，其實重點不在GDP向上傷訂幾多，反而是三個月前預準的通脤率、居然整整調高了一個百分點??? 可笑的是、政府居然賴到因為5月實施的最低工資有一次性影響，加上本地經濟趨向全民就業、失業率跌至97年來最低，預計工資壓力喺未來幾個月會更為明顯，因此增加左通脹壓力，因此將全年整體通脹預測，由今年二月財政預算案時估計既4.5%，上調至5.4%。 難道最低工資要到今天立法先知有? 三個月前財爺唔通真係咁無信心最低工資可以成功立法? 雖然近日商品價格由高位有所回落，不過全球濫發貨幣是必然會推高通脹，問題只是時間! 似乎政府真的要好好面對現實!

美國互聯網界近日四出點火頭，矛頭直指科網泡沬重生，先有微軟購Skype，之後的內地網及FACEBOOK估值亦飽受質疑。 既然如此，一於分兩日談談這股科網熱。 內地網令唔少美國原創人眼紅，近日不斷批評內地網股估值驚人，仲話，納斯達克無論升跌停板，同神秘買賣盤名單，其實全部係內地為主。 而最新一宗質疑，就是阿里巴巴同雅虎糾紛。雅虎死咬唔放，話早於舊年八月，馬雲已經私底下將支付寶轉歸名下，但無通知董事會。令到問題更複雜之餘，更觸發企業管治問題。 事實係、阿里巴巴，同持有佢地四成股權嘅雅虎，一直貌合神離。近日，更由無合作，變為不和，甚至翻檯「打交」。 事緣係，阿里巴巴旗下最值錢資產，係「支付寶」。但阿里巴巴集團內部突然將「支付寶」，轉讓俾比創辦人馬雲。阿里巴巴一直無公開件事，最後要由雅虎，透過向美國證監會披露踢爆。 美國傳媒追問之下，阿里巴巴母公司終於話，將「支付寶」轉移到馬雲控制既公司手中，係要符合內地相關法規。 由於懷疑利益受損，兼且內地發展唔明朗，雅虎股價大跌。 美國投資者不滿、有理，中美戰略經濟期間，中方仲高調話，確保外資在華利益，但言猶在耳，雅虎隨即做左受害人。 雅虎係喺05年入股阿里巴巴，不過近年雙方關係轉趨緊張，阿里巴巴多次想向雅虎回購股分。但對雅虎嚟講，阿里巴巴佔佢地每股十二美金，要賣除非好價。 而且當年，雅虎為打入中國，入股阿里巴巴，讓步太多，多年嚟無話事權，甘願做二奶，已經一早令股東不滿!! 月初先大手買入雅虎股份既一間美國對沖基金GREENLIGHT。對於佢地竟然睇中呢間沿地踏步，遠遠被GOOGLE超前既前搜尋器一哥，原因都是淨係阿里巴巴價值，已經高過曬一隻雅虎!! 部份激進雅虎股東話要訴訟。心水清既人就話，馬雲正正係借支付寶呢件事，逼雅虎妥協，接受佢地回購建議。 雅虎，同阿里巴巴糾紛，除左個人恩怒，更深層次係帶出外資要進入內地互聯網市場，到底要受幾大限制。 支付寶重組，由馬雲全資持有，如果信真正理由係要配合內地發牌，亦即係話，內地互聯網政策，正正係排除外資，連中外合營項目都唔容許。 亦即，GOOGLE當日唔讓步、係正確一步。FACEBOOK亦無需要再幻想，打入中國。 我地講過，內地封閉政策，令內地翻版土炮、勝者為王，估值貴過原創人。可能出於眼紅，或抗議，美國主流媒體已經出現一股「倒土炮網」運動，不斷對內地互聯網收入模式、同估值質疑，率先受影響，係人人...

各位有志創業年青人留意，施 老闆承諾拿二千萬元搞創業基金，條件如下： 1.需在行業三年以上； 2.要有詳細計劃書； 3.需接受施老闆的無為而冶思想； 創業基金規模數十至二百萬元，有錢袋又有嘢學，此機會何處尋？

曾幾何時，一句:"The World's Local Bank"是滙豐最響亮的宣傳口號。 對不起，今天歐智華告訴大家，這句口號害苦了匯豐以及她的股東多年! 上任四個月，歐智華在倫敦金絲雀碼頭總部，宣布新匯豐成立。 新匯豐首要目標，就是不再需要全球的零售銀行網絡、認為只要集中有潛力的地區就已經足夠。 對於股東有期望、但員工就已經率先恐慌! 大班要三年內，慳最多三十五億美金，有評論話唔夠多。但點都好，匯豐呢份投資者推介材料，先證明原來呢隻大象，之前係幾咁浪費。 匯豐好有誠意，希望以慳，達到推高回報目標。結果佢地好詳盡，講點可以慳到錢。 不得了!原來減少文書傳遞，三年內每年都可以慳到一億美金，更大節流包括簡化地區架構，每年又慳到三億美金。 以去年三百多億美元的開支計，有傳媒計過、慳35億美元即是要節省十分一人手及減少十分一分行! 當然數唔可以咁樣直接計、不過做過參考也是可以。 現實係、匯豐太多主管，佢地驚，係有理由。 其實，歐智華好應該喺今日開場白，就先講一句：員工們，係前朝既錯，令你地受苦，對唔著，你地在座各位，部份未必有得留底!! 期望匯豐回勇，做一間有實力新興市場銀行，可能不容易。因為大班講明，匯豐仍然希望做全球最大。但佢淡出零售銀行決定，可能未見其利，先見其弊! 弊一，係短線重組開支會大幅增加。更大問題係，匯豐一直憑龐大零售網，吸盡低成本資金，從而再投放增加回報，但依家決定唔行呢套，係咪好呢?大家期待佢地可以有成績。 匯豐堅持要做有實力國際銀行，其實理由好簡單。就係無論股東，同管理層都太懷緬浦偉士時代光輝。 浦偉士被匯豐封為神，各人亦自應承師於佢，又點會有人夠膽為體現價值，走回前浦偉士時代路線。 有留意匯豐策略目標，其實佢地有啲似學渣打。就係想將企業銀行同投資銀行兩項業務，達到協同效應，呢個渣打模式照炒。於是，匯豐一直無出現過「批發銀行」呢個字眼，首次出現。 匯豐學渣打，只要成功、其實好橋唔怕抄。但人地由九十年代失敗，同二千年打後翻生，用足十年。匯豐三年得唔得呢!! 歐智華亦可能知投資者無耐性。所以除左用佢一慣唱高開低(即係先公布利淡季度業績、再在策略日公布利好消息)，亦用有技巧方法，將自己定位為繼工行後，派息最高銀行股。又提出三大原因，話投資者有理由持有匯豐。 三大原因就係: 有策略、會行動、同有好管理層! 信不信?

都說歐智華是一個心思精密的人，至少在很多的策劃上，他都比前任更為細心。 有沒有想過、為何匯控要將首季業績和策略日要分開舉行? 不錯、策略日是歐智華最大翻身機會，當然不可有絲毫錯漏。面對這種壓力，歐智華一於先將負面的消息全放在第一季度業績上，同時將投資者最大的憧憬投放到周三的策略日上。 這亦解釋了，為何一向反對過度的監管要求、歐智華仍然樂於執行季度形式公布業績。 細看業績分怖，第一季賺四十一億五千萬美元，增加五成七。期間減值撥備２３億美元，減少三成七，係近五年嚟最少。 講過自己首要任務係控制成本，不過成本效益比率、由舊年底既百分之五十八點九，升至六十點九，比舊年初更急升十一個百分點。 主要係為英國法院裁定、當地銀行要為PPI還款保障保險，撥備四億四千萬美元，撇除減值、成本效益就同舊年底相近。 歐智華話，四月既業務表現符合預期，未來會集中控制成本，預計周三的策略日將會手起刀落，預計最快要兩、三年，先會將收入對成本效益降至五成右。。 我們看到今次首季業績有三個重點，很值得大家深思大笨象的未來: 1. 滙控北美業務按年明顯倒退，跌幅近６成，最主要落差是市場原來預期美國樓市應有起色，豈料歐智華反而要額外增加撥備4億美元，增幅等同英國PPI的減值，這反映了美國的樓市不但毫無改善，反而有進一步衰退的可能。這由樓價指數連跌八月，重新跌至08年低位可見一斑。 2. 歐洲業務雖然盈利跌近６成半，但同舊年第四季比，按季增長番超過７成，集團相信，歐洲業務會改善。而英國作出的PPI減值雖然逾4億美元，不過同巴克萊同大行要減值逾十億英鎊，其實匯豐的減值已經算是輕微。 歐智華亦承認，早在07年前HSBC已暫停有問題保障保險產品，不過對手直至去年仍然有出售有關PPI。 歐智華同時亦趁今次接任，將為要應付英國的銀行稅、預先撥備六億美元，這反映他一貫的策略:趁壞消息就說到最壞吧! 3. 要留意的是香港的業務、與亞太區整體有兩成多盈利增長比較，香港區業務卻受員工成本大升引致成本急升19%影響，稅前盈利按年只係微升百分之３。 今年事事講求成本效益的歐智華來說，他卻表明對香港業務表現滿意，仲率先派定心丸、承諾喺香港唔會裁員。 似乎香港這個人民幣離岸中心、的確有一些我們看不到的優勢是更得到外界更大的肯定!

所謂君子報仇，十年未晚! 奧巴馬可以話做左最好示範，拉登今次被殺、經濟學心形容係"KILL HIS DREAM"，即係破碎左恐怖分子既幻想，而金融時報更形容係分水嶺，代表一個時代轉變! 對總統奧巴馬來講，雖然有傳媒批評佢唔肯公開照片，不過主流傳媒都肯定、奧巴馬喺事後表現既堅定、但唔偏激既立場，係有機會向中東世界伸出和解之手、化解仇恨!。 但更值我地思考既問題係、拉登既死、對金融市場有咩影響? 最初各界評估係無、甚至係好低，不過之後由商品市場暴跳既現象睇到，有交易員就開始歸疚係拉登死左，令世界變得安全、因此減低風險溢價喎! 點睇都好似有些牽強? 反而如果奧巴馬真係可以好似經濟學人所講、掌握到今次機會喺中東撤軍，對而家債台高築既美國、未必唔係好事! 根據唔同既機構估計，美國喺追捕拉丹上既直接支出、高達一億二千億至2萬億美元，其中國會計算既一億二千八百億美元開支中、63%用喺伊拉克；阿富汗戰爭就花左35%資金，仲未幾百億加強世界各地美軍基地保安! 由01年到而家，美國國防開支一早翻一翻，舊年達到7000億美元，佔整個聯邦預算20%。 睇番美國國債、總額已達14萬億美元既新高，佔GDP比重接近100%，如果今次奧巴馬真係可以把握機會改善財赤，對美元、美債、以至環球股市，可能真係一個轉捩點都唔定!

呢兩日商品市場，真係睇到人目定口呆! 要勉強找理由，可以說是美國呢兩晚出嘅經濟數據比預期差、加埋歐央行下個月加息預期減低，避險情緒升溫，推高日圓、同美金，而商品市場即時拆倉。 反映十九種商品嘅CRB指數跌過近半成，歷嚟第五大單日跌幅。 白銀泡沬爆破、之後蔓延至期油被人大手掟貨! 尋日單日跌十蚊、穿一百美元都見未止瀉，今日番來，歐洲市又繼續急跌、甚至跌穿９５美元，呢個星期以來，跌一成六! 升得快，洗得亦急，白銀被人掟貨，掟足一個星期尋晚，跌至３４水平之後都見唔到有反彈動力。全個星期跌幅兩成八，係１９７５年以來最大單月跌幅。 雖然之後公布的美國就業職位增幅是近一年來最多，四月非農業就業職位增加二十四萬四千份，較預期多近六萬份，是去年五月以來最多。 由於市場之前擔心日本311事件會影響勞工市場，而家見實體經濟未有影響，股市同部分商品都炒上。 不過新增職位增加同時，四月份失業率上升零點二個百分點，達至百分之九，是去年11月以來首次上升。 這反映了、當部分失業人士見到勞工市場有改善時，有意重新尋找工作，總勞動人口增加高於新增職位，結果推高了失業率。 部分商品如期銅同石油因為勞工數據改善而有反彈，但全星期計商品指數仍然跌左一成。 你會問，到底應否撈底? 我們先要了解、過去兩年刺激大宗商品價格急升、除左係來自中國在內既新興市場實質需求外，更大原因是由於聯儲局兩輪量化寬鬆製造既龐大流動性，以及將實質利率推低，都係直接推高左商品價格。 而家面對六月第二輪量化寬鬆結束、加上商品價格顯注回落，將會進一步降低聯儲局加息既可能性，唔少經濟師都將加息時間預測、押後到2012年後，似乎大宗商品未有咁快出現出殺牛記局面。 債王旗下Pimco都話，今次用「鬱金香式」速度回落，殺傷力其實已經弱咗。通脹威脅減退，央行唔駛做嘢住，遊戲無咁快玩完!

由資金拆倉引起既資金避險，似乎有進一步蔓延，各類型既資產、好似商品、匯市、股市都有大規模沽壓。 資金流入日圓避險，美元兌日圓喺G7三月聯手干預以來、首次跌穿80。 至於商品繼續大跌，金價跌穿1500美元、銀價連跌四日，穿埋39美元。 期錫跌6%。就算一直最「硬淨」既銅價，都跌2%，穿過8900美元，兩個月低位。 當然，一眾市場由年初開始，白銀累積升左五成七，同期金價只係升左一成，不過過去四日白銀累積跌幅就近兩成。 銀價下跌，基金亦大手減持，最大嘅交易所上市交易基金ISHARE SILVER TRUST持有嘅白銀，少咗百分之４點７。 觸發銀價大跌、係芝加哥商品交易所宣布，一次過加兩次期銀合約按金，由一年前既四千二百美元，喺星期四同下星期一、分兩階段提高至二萬一千六百美元。 今次已經係兩個星期內，第四同五次上調期銀按金。 金融時報話，上調按金係有充分理由，原因係銀價有大量投機成分，以ISHARE SILVER TRUST為例，4月以來交易量高達二十億安士白銀，係一年產量既整整三倍。 銀價泡沬亦可以由所謂金銀比例睇到，即係一安士黃金到底值幾多白銀，上星期呢個比例降至三十二水平，比起整個二十世紀平均既五十水平低好多，反映唔少錯失左金價升幅既投資者，轉炒落後既白銀。 以罕有度計、金銀比例應該係1:16，不過由於白銀喺電子產品同汽車都有工業用途，令實質需求增加，因此近年有說比例應調整至1:10。 那以金價今日1500美元左右，一安士銀豈不是要150美元? 不過面對銀價飊升，唔少生產商都尋找替代金屬。 好似柯達為例，佢地生產既菲林片就減少左用白銀，結果亦減少左需求。 華爾街日報亦分析，真正令白銀跌價，係由於六月聯儲局量化寬鬆結束後，市場開始預期實質利率上升，令持有貴金屬成本增加。 銀價大幅回套，但對金價影響輕微，原因係黃金具有儲備貨幣功能。 好似墨西哥中央銀行，喺二月同三月分買入九十三噸黃金，令持有量由唔夠七噸跳升左十四倍，總值係四十五億美元，係央行四十年來買入最大規模既一次。 以近日俄羅斯、印度以至斯里蘭卡央行都有增持金，全球央行持金水平已經回到70年代 Brettonwood協議時的水平。 與白銀戰隊隊長看法一樣，商品大王羅傑斯話，銀價調整仲未完，但認為反而製 入市機會。 羅傑斯形容，之前銀價升勢過急，短期有需要再調整，但認為咁反而更健康，即使跌到３３美元，都唔需要過分擔心，...

人人網上市，上限定價。論股價表現，唔算太突出。升過七成，收市只係升兩成八。(翌日再跌一成!)比優酷、奇虎為之遜色。 問題係，以人人網依家估值，相當於舊年市盈率一百倍，今年市盈率七十倍。比佢祖先，FACEBOOK高出一倍。 話FACEBOOK係人人祖先，因為大家都知，人人係抄對方，正如優酷抄YOUTUBE一樣。 翻版可以貴過原創版，本應係一大笑話，但在祖國就成行成市。 係咪代表，忠於原創、不作抄襲，就係錯呢？ 人人，優酷等一堆例子，係咪證明要發達，就要抄襲？炒襲呢個大學期間會逐出校既大罪，多謝內地網股，已經被平反，被合理化。 呢個只係再次證實，中國互聯網市場，係一個怪嬰。市場可見將來，只有封閉不會開放。造就抄襲山寨版，可以永無止境，寄生喺政策封閉之下。 亦變相令內地科網股，具備獨一無異，原創人永遠攞唔到嘅賣點，就係十三億人口市場。 所以，無論你話人人網貴，甚或內地科網股泡沬。基於佢地獨家佔據內地市場，所以除非中國市場賣點不再存在，否則呢批土炮翻版作品，根本係「無價」。 亦因為咁，內地愈加強監管網絡媒體，知情識趣、了解國情嘅寄生土炮，股價其實要愈升。 用人人網嘅估值計，FACEBOOK會由依家大約值六百五十億美金，暴升到值二千億美金。 當然，FACEBOOK雖然係原創，但係無中國市場。所以朱克伯格呢條路點鋪，好多人想知。 雖然佢有華藉女友，又學緊國語。但畢竟，中國太驚FACEBOOK。況且GOOGLE之前中國路，亦行唔通。所以佢地最有可能，係同中資合營，打入內地市場，但呢個未必係朱克伯格願意見到。 睇著抄襲自己嘅人人網、估值天價，朱克伯格當然不是味兒。至於股東高盛，甚至李嘉誠，可能更心急。 佢地會問，唔好再拖，趁估值高，上市吧!! FACEBOOK遲遲唔上市，上星期就傳出，有股東醞釀透過另類平台沽貨，集體套現。 「人人」上市，FACEBOOK面對上市逼切性，亦正如金融時報所講，亦都係為佢地響下警號。 只能夠講，聰明人自有辦法，我地無需急他人之急。 內地科網股帶出嘅係，香港人應該諗下，點解少有內地網股揀香港上市。 十二年前原本為科網股而設既創業板，係咪已經到左正式要廢除地步呢??!!

七十年代之初，銀價只係每安士兩美元，到左1980年，銀價炒上歷史最高既50.35美元，即係相當於升值24倍，當時銀價可以用瘋狂形容! 特別係1980年，當年銀價就升左8倍，原因係有一對「亨特兄弟」囤積數以億安士計既白銀，仲連同沙特阿拉伯同交易商壟斷市場，結果最終做成泡沬爆破，銀價大跌近八成、喺低位徘徊左二十多年! 借古知今，三十年過去，銀價上星期再次迫緊五十美元，會唔會歷史重演，又跌落十美元架!!! 雖然七月白銀周三期貨跌過一成，到今日再跌至40美元邊、不過主要係以索羅斯為首既大戶，原來過去一個月已經開始部署減持白銀同黃金，但亦有著名對沖基金經理堅持睇好貴金屬，仲預測幾年後金價會突破四千美元。 話貴金屬可以避險，原來係高風險先真。 白銀上星期迫近50美元一安士，係三十一年高位。 原來當時泡沬已經形成，再次重覆三十年前既故事。 期銀三日嚟累積下跌一成半，跌幅同樣係三十年嚟最大。 觸發銀價大跌，原因之一係芝加哥商品期貨交易所、三度上調期銀按金，由一年前每張合約既4250美元，加到超過萬六美元，投資者槓杆成本大漲，唔少補唔切倉都被斬倉離場。 上月商品大王羅傑斯先警告，擔心白銀泡沬正在形成，原來佢舊拍檔索羅斯已經身體力行、大手減持黃金同白銀。 華爾街日報話，總值二百八十億美元既索羅斯對沖基金、過去兩年一直購入黃金同白銀，甚至令佢地成為最大黃金ETF SPDR既第七大投資者。 不過原來過去一個月索羅斯開始減持貴金屬，原因係佢旗下基金唔再擔心美國會出現通縮，甚至預計到左明年初，聯儲局就會加息對抗通漲、因此唔需要再持有黃金同白銀。 除左索羅斯、仲有幾個對沖基金亦都趁白銀高位獲利回套，加速呢幾日跌勢。 不過都有人堅持睇好貴金融市場，有賺錢之神稱號既對沖基金經理約翰保爾森，星期二先表明，金價喺三至五年內可以升至四千美元水平。 白銀泡沬爆破，過去唔係未試過，1980年由於有大戶壟斷銀市，雖然推高銀價過突破50美元，但最終四個月內、銀價足足跌左七成八。 近年炒高銀價一個原因，係銀有工業用途、大家用個啲咩PHONE、咩PAD，都話要用到銀、甚至講到比金更有價值! 好似商品大王羅傑斯咁講，如果美元真係崩潰、佢對銀價沖上150美元一啲都唔意外，不過現賓並非呢個情況，因此銀價泡沬爆破只係遲早既事! 如果跟據佢既想法、銀價經過今次調整後、可以穩步升番五、六、七年就最穩陣!

歷史係咪重演，股市再重覆舊年五月摸盡全年低位情況呢。 似嘅係，利淡消息，多左，由唔信，到似曾曾；唔似嘅係，依家宏觀經濟環境，比去年來得複雜。 單靠資金，盈利，概念，未必保證到你喺股市中可以搵啖食。 更何況，商品市場連續３日，踏正朝早６點半大跌，你就知，夾埋人為因素，幾 複雜。 陰謀論太複雜，太難解構。基本因素有人話，唔係想象中嚟得順風順水。本港係錢多，但銀行界話，入嚟嘅錢，買野買得七七八八，部份基金港股持倉水平上無可再上。 亦即係話，套用目前情況，錢多、係假象，港股五行欠「錢」，先係問題。 無新催化因素出現，基金經理部份亦投降，話上落市，會係今年重演既情況。 除非有好心人，再製造多一班直通車!!! 大好友睇好個市，你可以處之泰然，但大好友一次又一次下調恒指預測，你未必可以唔理。 陸東提到，業績呢兩個字，唔係毫無理由。宏觀層面，香港價格向上，高中低下層叫苦連天。 靠麵粉再焗出天價麵包，今年未必行得通。更何況，內地點搞，不少中環人亦話睇唔通。 內地收緊政策，通脹，成本上升，首季企業叫做升，但原來滬深三百指數邊際毛利已經回落左。再引申出問題係，內地係咪會重履舊年忽然驚雙底情況，無端端伸出市場善意之手!! 熟讀宏觀經濟一派話，市場共識係內地通脹離見頂不遠。甚至指，菜價對通脹指標作用極大。依家真正要驚，係經濟，或宏觀情況，出奇不意比預期差。 美林道出呢個問題，話到時係分析員造淡利好時間。如果要睇淡，有好多理由!!盈利繼續增長放緩，中小企會因為銀根緊，部份頂唔順，等等。 內地評論一語道破當前問題，話內地股市近排咁，正正係唔少內地分析都擔心、通脹無明顯升溫之下，收緊持續。 匯豐最近一班分析員到訪內地，見過唔少智囊，央行顧問，同學者。佢地異口同聲都話，通脹已經唔係問題，但關鍵在於領導人太驚通脹，並已經列入中央政策，期望放鬆唔係太易。 原因係、北非動亂，觸動領導人神經，加上換屆在即。所以，有基金話，市，今年內未必有運行。

拉登被殺，到底今次美國成功消滅佢，可以帶來幾多經濟效益? 750億美元! 唔係我計，係金融時報計，佢地由道期本來要跌，到開市倒升，單計市值進帳就有700億美元，加埋期油跌左1.75美元，全球消費者一個月就可以慳番50億美元，條數就係咁計! 但美股沖高回落，收市仲要倒跌，咁又點解? FT都有解釋、話今次市場反應，幾乎同03年捉到候賽因一樣，證明交易員都睇係新聞做交易、之後先至認真提出疑問。(這非常有效說明，市場其實並非大家想像般有效，就算大戶亦有嚴重delay.....) 當然如果同911時做成數以千億美元既經濟損失同股市蒸發過萬億既市值，可能最初美國政府能夠出750億美元既懸賞、而唔係二千五百萬美元，拉登可能晨早就被身邊人出賣! 拉登俾美軍殺死，佔據左呢兩日所有傳媒既焦點。 我地探討下經濟同金融市場反應。 先講股市，表現就令人失望! 美股沖高回落，市場關注拉登被殺，可能觸發更多報復性恐佈襲擊，資金避險，流入日圓，升至一個月高位。 美元指數經過琴日一來一回後、最新已經重上星期一既高位，即是連升二日。 至於商品貨幣就要跌，澳洲維持利率不變，澳元同新西蘭元都跌過百分之零點五。 商品市場方面同樣精采!金價創新高後回落、白銀就錄得七個星期最大跌幅，七月期銀最低跌到４２點２美元，跌幅超過一成三，今日再跌百分之三。 亞太區股市錄得三個星期最大跌幅，加上一個印度加息半厘，股市即時大跌百分之二點四。 但我傾向相信，拉登之死對阿爾蓋達是有實質影響，至少證明他真的可以無影無跡。 Pimco艾爾阿里安話，拉登被殺一方面會觸發一啲中東同亞洲國家局勢不穩、但長遠考慮仍然係有助減退恐怖主義既威脅，市場整體應視為減低風險溢價。 英國金融時報社論亦有類似觀點，就著眼喺解決地緣政治沖突既契機上。 佢地認同拉登之死，比到奧巴馬一個黃金機會，重新推動同伊斯蘭世界和解，特別係面對舊年十二月、喺中東同北非牽起既「茉莉花革命」，已經喺突尼斯、埃及、利比亞、敘利亞、巴林以至也門擴散，令社會矛頭由西方世界，轉至本地既政治迫害同官員貪污腐敗。 如果美國真可以借此加快分階段撤軍，說不定真的可以締造一個更美好、更安全既世界......