2009年7月31日星期五

思故人

七月三十一日,係一位經濟大師九十七歲冥壽。

回看返過去一年,如果佛利民仍然在世,金融海嘯會唔會不一樣?

好似一個星期前經濟學人嘅Cover Story都有講,經濟學家,特別係講求市場主導嘅芝加哥經濟學派,過去半年都一直被批評唔能夠預測金融海嘯出現,甚至乎係認為佢地需要為呢場災難負上責任。

而作為當中學術「泰斗」,佛利民嘅聲望可以話一瀉如注,反而當年被佢批評得最多嘅凱恩斯學派,就因為政府平預主義抬頭,而受到市場追捧,加上新凱恩斯主義代表克魯明、
獲得諾貝爾經濟學獎,佢一句話「過去三十年宏觀經濟學毫無改進」,就令人對佛利民學派更加無信心!

獅子山學會星期五就都搞左一個佛利民九十七歲冥壽研討會,其中一位講者大家都好熟悉,就係Cafe其中一位主持,科大雷鼎鳴教授。

雷教授擘頭就話,要為佛老大平反,因為伯南克根本唔係師承凱恩斯,而係照抄佛利民一套。

可能大家都太熟悉佛利民嘅貨幣理論,反而唔記得左,佛利民本身係以研究貨幣史而出名,佢亦都深入研究過大蕭條後政府角色,提出大蕭條並唔係市場失效 (Market Failure),而係政府同聯儲局政策錯誤。

佛老話,當年最錯係聯儲局不但沒有放鬆銀根,反而提出聯儲局應該要擔起「最後貸款人」Lender of Last Resort嘅角色,為金融機構提供資金,避免「擠提」出現,影響市民信心。

呢個正係伯南克的做法,喺舊年水深火熱期間,透過唔同機制,向銀行同金融機構大量注資,伯南克自己都講過、自己萬分唔願意咁做,不過實在係無得揀。

反而政府透過退稅呢啲措施,實際成效係有限,根本係改善唔到經濟。

咁雷教授又點睇近日興起嘅新凱恩斯學派?

佢話已經係一鋪清袋!

先講紐約大學教授「魯賓尼」,雷鼎鳴話對呢個人,「No Respect!」

原因係所謂「末日博士」,只係識得一味唱淡,當然講得多、總有一日會中! 但背後根本就無理論基礎。

最慘係近日經濟數據有明顯改善,魯賓尼已經開始唔夠自圓其說,但想改口風又唔知點改,變成而家立場「??玠玠」!

至於另一新凱恩斯主對靈魂人物「克魯明」,雷鼎鳴相當尊重佢作為國際貿易理論嘅權威,諾貝爾經濟學獎亦係表揚佢呢方面成就,不過講到宏觀經濟學,雷教授話,克魯明根本唔識!

其實邊個學派都唔重要,而家面對著歷史上前所有未有嘅扭曲經濟學現象,我地應該撇開門派之見,將貨幣同財政理論結合,避免再出現另一次泡沬大爆破嘅後遺症。

2009年7月30日星期四

硬頸

一年兩度匯豐業績又到,我們照例先找東尼睇下今年有什麼啟示。

東尼話,匯豐股價反彈比想像中快,令佢放下心頭大石(Relief)!

諗番起匯豐跌到33蚊,東尼仍然不忿,話大行分析唔值得理會,簡言之係Rubbish!

「Rubbish...what's the point of reading these things? one man say this and another say that...only want to stimulate their trade..」

東尼說的「垃圾」,係咪指呢分報告?

里昂由零六年起,就對匯豐call sell,三年來從不變。

當日匯豐28蚊供股,里昂就由三月底,一直維持匯豐28蚊目標價不變,直至今天。

因此大可以Daniel Tabbush成為本年度最硬頸分析員。

佢係銀行分析員,牌頭係講句公道話,佢零七年底,零八年中,唔少對匯豐分析都係對,但「市」不與佢,28蚊目標價成為泡影!!

如果當日信佢,咁每股最少無成40蚊即係二萬蚊一手

Daniel Tabbush今日終於將匯豐目標價由28蚊,調高到42蚊。評級繼續係沽出。目標價上調幅度雖然高,但同行比,繼續係全城最低。

Tabbush講明,調高目標價純粹係市場風險承受能力大左,同匯豐無關。

在佢眼中,渣打最好,匯豐最差。

報告中,佢形容匯豐星期一業績日,係夜晚嘅黑暗,第二日渣打業績,就係白晝嘅光明!!!

銀行分析員,做目標價,通常會運用DDM模式,即息率折現模式。英文叫 Dividend Discount Model。

當中關鍵係,假設銀行預測股價對帳面值,同市盈率。

問題就出於呢度,里昂對匯豐股價對帳面值預測仍然停留一倍水平,較佢地俾渣打預測近兩倍,爭一大截。

同行高盛84蚊匯豐目標價就假設匯豐p book有一點七八倍。

新目標價42蚊合唔合理。又從另一個角度睇。由於匯豐屬於金融綜合企業,計算目標價會用埋Sum of the Parts模式,即係將逐個地區,同埋其他資產值加埋。

42蚊,部分大行之前計單係香港匯豐都唔止呢個價。

就算匯豐內地平保,交行投資帳面利潤加埋,都值每股七蚊。

講真有view無問題,特別係里昂,佢地特別對歐美有保留。但如果,離同行太遠,就會被客質疑,到底是眾人皆醉,還是只有你獨醒?

麵粉貴過麵包

延續上篇,睇下內地樓市。

近日新地王在各地陸續出現,而且係顯注超出目前樓價,各界開始關注會否香港九七前後「麵粉貴過麵包」的情況。

因此先出現日前謠傳會加準備金率的謠言。

重藥未落,內地似乎更傾向以「微調」及行政手段調控樓市。

好像在廣州,不少被捧上天嘅地王,唔少仲係「零」開發,國土局決定出手收地。

內地傳媒報道,國土局已經提交咗違約地王處理意見,一旦廣州市政府批准,八間房地產商受罰,包括富力地產。

富力當年以天價1.8億人民幣投得天河區地皮,相當每平方米萬八,令市場嘩然。

更加奇怪的是,塊地目前仲未正式交付。

經過零七年大事擴張,高價投地內地發展商都面對資金壓力,近期多間發展商就要相繼集資,加埋超過百億。

不過令人憂慮的是,發展商資金多番,又係為賣地做準備,結果新地王會不斷誕生。但如果市況承接唔到,最後會造成惡性循環。

羅家聰在最新報告中,已發現大部分房地產開發指數已見底回升,唯獨係商品房空置面積卻持續惡化,令佢懷疑發展商是有動機囤積土地、刻意托高地價。

KC亦認同,內地在「投鼠忌器」的收緊政策心態下,不會戮破目前只在初階的泡沬,因此泡沬仲會再吹大一段時間。問題是,在他眼中,泡沬終歸都係要爆,只是屆時硬著陸肯定少不免。

辟謠

星期三、一個加存款準備金的謠言,碰正巨無霸新股上市的時機,就觸發了一場恐慌的拋售。

影響所及,本來步入升勢的高息貨幣以及商品市場都受到拖累。

為了澄清傳言,人行漏夜發表副行長蘇寧的講話,表明會堅定不移繼續執行適度寬鬆貨幣政策。

今次已是人行六日內、三度重申政策不變,外界指人行今次重點強調,唔會用規模控制方法,已經暗示左唔會出重手調控。

瑞信陶冬提到,資產價格上升的確係問題,但估計人行按情況作出控制,唔會落重藥。

陶冬話據佢了解,總理溫家寶同佢嘅智囊,對通脹有唔同睇法,溫家寶認為,即使「通脹預期」上升,但單係通脹率短期都唔可能會大幅上升。

加上人行一再強調要維持政策穩定性,係暗示寬鬆貨幣政策喺可見將來都唔會改變,存款準備金率年底前都無可能上升。
///////////////////
事實上,過去幾個月,只要肯入市,合埋隻眼亂買都幾乎有錢賺。(連1097都可以在沒有甚麼實質因素下可以大升,你仲有咩好講?)

就連被認為最保守的外匯基金,雖然第二季受債市拖累,不過單是港股就賺了二百多億,可以抵銷晒第一季蝕三百多億之餘,仲可以倒賺250億,難怪任總咁高興。

不過,高興還高興,任志剛重申金融市場近期表現可能已經同經濟基本因素脫節,未來幾個
月市況有可能令人失望,因此亦唔能夠保證,下半年外匯基金投資,可以繼續上半年表現。

未來股市點走、當然很視乎企業盈利,現在很難有一個全面的假設。不過連債王格羅斯,都加入巴菲特行列,叫人買高質素、派息穩定的高增長股票,大家又不妨在泡沬真正爆破前,作一個參考。

2009年7月29日星期三

G2完=大市玩完?

內地股市下午急跌,與剛結束的中美戰略與經濟對話有什麼關係?

國務委員戴秉國說,兩日會談,除了上月球沒有討論之外,其他要談的,都談過了。

經過兩日會議,雙方都同意喺經濟、外交、氣候變化等領域,加強合作。

經濟方面,兩國會各自繼續採取措施,促進經濟平衡同可持續增長,直至全球經濟復甦。

美國得到中國承諾,繼續擴大內需政策,推動世界經濟。

對於中國最關注、投資美債嘅安全問題,美方都有回應。

副總理王岐山連續兩日說,希望美方確保中國在美資產安全,又要平等對待中國赴美投資企業。

蓋特納亦當面承諾,美國將於中期內削減財赤,改變為穩定危機作的特殊措施。

美方亦承諾,為出口到中國嘅高技術產品提供便利,並加強合作,盡快承認中國市場經濟地位。

今次雙方嘅對話,氣氛非常友好,美國總統奧巴馬,接見王岐山同戴秉國時,仲送咗個親筆簽名的籃球俾王岐山。

有留意呢兩日對話內容,大家會發現美方可說是極盡「擦鞋」之能事,上至總統奧巴馬開幕致辭時,引用孟子「盡心下」:

「山徑之蹊間,介然用之而成路,為間不用,則茅塞之矣。」
"A trail through the mountains, if used, becomes a path in a short time, but, if unused,becomes blocked by grass in an equally short time."

簡而言之,就是山間嘅小徑,經常有人行,就會成為路,一段時間無人行,就會則被茅草堵塞。

更有趣係希拉莉同財長蓋特納,前者說「人心齊,泰山移」,精通國語的蓋特納更露兩手,說出「風雨同舟」,看官們,幾時見過美國最高層會如斯擦鞋?

當然,王歧山要贏此行,事先必作了大量部署,最近看到的買入美債,中國就放慢了手腳,

好像星期二美國財政部拍賣總值420億美元兩年期債券,中標利率就比市場預期高。

原因是包括外國央行在內嘅間接投標,中標比例唔夠三成三,比六月拍賣時嘅六成八,低好
多,亦比過去平均數四成疲弱。

而家唔忍手,等幾時?

回到最初問題,內地股市急跌,與戰略與經濟對話有什麼關係?

下午大跌市只是被一些傳言所觸發,未見有實質因素改變。

大家知道,內地的私募基金,現在如雨後春筍,但當中不少規模是非常驚人。

有高人提醒各位:私募基金之中,以厚樸基金為主力,大家要留意這隻基金的背景: 高盛+方風雷。

而方風雷與王岐山關係非比尋常,兩人曾多次共事。

當王岐山去華盛頓 : A股最瘋狂之時;

王岐山見完蓋特納 : 自然是A股急跌之時。

不過掉轉頭說,今日的調整似是震倉多於跌市開始,原因今日內地跌市都是以謠言啟動,實際未見有實質因素改變,個人還是相信,大市短期仲會再上,之後先有一次較大調整。

2009年7月28日星期二

還看美匯

靜靜雞話比大家聽,羅家聰又上調恒指目標。

上限由本來21000-24000點,上調至最高26000點。

即係上高睇多二千點。

環球股市連升十二日,係零三年中以嚟最長升市,資金流出美元,美匯指數跌至今年新低,多種主要貨幣兌美元,都突破左近期阻力位。

歐元兌美元一度升穿一點四三,係六月以嚟最高,澳洲儲備銀行話,當地經濟表現、好到足以令經濟更平衡發展,言論又刺激資金追入高息貨幣,澳元兌美元,升穿八十三美仙、係舊年九月金融海嘯爆發以嚟最高水平。

其實股市都唔需要睇太多指標,只係睇美匯指數就可以。

美匯一度跌至78.315,係跌至去年12月中以嚟新低。

環球股市隨著就升,兩者關係之密切,真係唔到你唔信。

似乎高息貨幣仲有空間進一步上升。

至於港股,就係遊資實在太多,風險胃納令資金流入股市。

財資市場人士話,踏入七月分,到港嘅資金,除左對沖基金外,部分係嚟自外國嘅長期投資基金,相信資金短期唔會流走。

資金不斷流入金管局為應付需求,再增發407億港紙外匯基金票據。吸走部分結餘,金管局話銀行體系資金多票據有需求。

流入本港資金再度明顯,單係今個月流入資金有超過488億。

雖然金管局多次增發票據,抽走部分結餘,銀行體系結餘仍然持續喺2千億港紙水平,有財資市場人士話,近日流入資金主要同股市有關。

除左對沖基金外,部分係長線基金。有基金經理話,近日多間外資大行到歐美,向投資者推介,係加快資金流入原因之一。

今年嚟,流入本港資金近2400億。

有分析員計過,呢個只係資金一部分,仲有嚟自本港三萬億存款,同內地資金,三路夾擊下,會進一步推高資產市場 。

到底市場係咪太樂觀? 其實答案唔重要,最重要係自己睇著資金流向,唔好貪婪,邊走邊睇,還是那句老話,最重要是保著自己個本。

高風險活動

直屬國務院屬下政策性金融機構、國家開發銀行發行嘅人民幣債券,到底有幾高風險?

我地問過幾間銀行,中資銀行大部分是低風險,滙豐就話,佢地根據發債機構、同有無涉及衍生工具原則,釐定只係低風險級別。

不過渣打就話,所有涉及匯兌嘅產品,無論係美元定人民幣,佢地都會評為高風險,因此今次國家開發銀行同東亞人民幣債券一樣,都係高風險。

一旦如果評定客戶屬保守型投資者,以及六十五歲以上人士,銀行都唔會建議佢地買高風險產品,若果客戶堅持購買,就會要求簽署免責條款。

如果有買過東亞人債,就知道對一些完全無投資經驗嘅客戶,問券評估時間,一般需要45分鐘,加埋銷售錄音,詳細解釋投資產品條文,再要用多45分鐘,即係前復個半小時,加埋等候時間,兩粒鐘肯定走唔甩。

雷曼迷債事件後,一向視為穩健嘅債券,都要定為高風險。請問對連國家開發銀行都要評為此類評級,是擔心阿爺唔救真係會破產,定係驚人民幣會大幅眨值? 老人家唔買債,難道就走去買唔使做風險評估的窩輪定新股?

有銀行對我們說,基本上都希望比面國家開發銀行,但一旦承諾做分銷銀行,就要分配大量人手、時間、樓面招呼批客,計落完全係得不償失,寧願唔做好過。

大概政府都意識到問題嚴重,為左簡化銷售程序,銀行公會旗下證券事務工作小組,七月中開左首次會議,討論銷售投資產品程序,包括點樣釐訂風險標準,完成收集會員意見後,黎緊星期五將會作出總結,取得共識後、再將意見向金管局同證監會反映。

2009年7月27日星期一

親民

看蔡子強的新書「新君王論V」,書中以「Good cop, Bad cop」去形容保爾森及伯南克、舊年十月在水深火熱之中,是如何應付一班銀行家。

大家都可以估到、先是保爾森向一班銀行家進行威迫,之後由伯南克扮好人,向銀行「利誘」一番,最終令銀行就範。

伯南克由一開始出任聯儲局主席,已經係擔演一個好好先生的形像,他最近更由幕後走到台前,除了早前接受CBS訪問,更同美國公營電視台PBS合作,喺堪薩斯城搞咗個論壇。

伯南克接受現場有190名當地居民提問,表現好「親民」,有問必答。

佢話,唔希望喺自己嘅任期內,出現第二次「大蕭條」,因此要運用非常規措施去應對。而家判斷刺激經濟措施嘅成效,係言之過早,但當局會盡力支持經濟,希望喺出年某個時候,經濟可望重拾升軌。

美國經濟顧問、以至經濟學者,近日都話,需要推出第二套刺激經濟措施,伯南克間接反駁話,貨幣政策受到政治干預,會導致高通脹。

尤其是,當經濟開始復蘇時,唔希望過度刺激經濟,因為咁會引發通脹。

伯南克指,經濟增長要達到百分之2點5,先可以吸收新嘅勞動力,預計,下半年嘅經濟表現,唔足以令失業率回落。

伯南克喺論壇之中,都表現出平時少有嘅風趣一面,好似話同經濟預測比較,天氣報告就更家似一門準確嘅物理科學。

有觀眾問佢有咩好投資建議,伯南克就話,佢一做推介就會犯法,但都可以比個貼士,就係唔好估幾時見頂或見底。

聯儲局嘅觀察家話,伯南克又上電視、又面向群眾,無非都係要為出年一月任期屆滿做勢。

而紐約大學教授魯賓尼、同著名經濟學者Anna Schwartz,為伯南克嘅任期,喺紐約時報,展開筆戰。

魯賓尼支持伯南克繼續連任,認為佢有能力減低重演大蕭條嘅風險,指佢應該留低、執行退出救市嘅措施。

不過今年九十三歲、曾經同佛利民合作寫美國貨幣史嘅Schwartz就話,伯南克要為聯儲局政策失當下台。

觀乎伯南克近日言行,佢似乎愈來愈懂得如何玩一套政治權術、以及如何為自己做勢,看來奧巴馬亦沒有得選擇。

2009年7月25日星期六

種族經濟學

有無諗過會喺屋企比人拘捕?

美國馬薩諸塞州警方,上星期查案時,拘捕一個著名黑人學者,其後證實係誤會,但事件引起種族爭議。

總統奧巴馬更牽連其中,佢批評警方愚蠢,警方堅持冇做錯,要求奧巴馬道歉。

一宗懷疑入屋爆竊案,帶隊既白人警長拘捕黑人疑犯。

之後查清楚,被捕既原來係屋主銷咗案。

當時被捕既、原來係著名種族學權威、哈佛大學教授蓋茨。

蓋茨訪華之旅返到馬薩諸塞州屋企,發現門鎖壞咗,強行推門,途人以為有賊報警。

警長指蓋茨唔肯合作,講粗口鬧警察,又只是出示大學職員證,證明唔到佢係戶主。

蓋茨就指警察態度差,認為因為自己係黑人,警察至亂黎。

時代雜誌選過、25個全國最有影響力人物,蓋茨榜上有名。

佢原來仲係總統奧巴馬個Friend。

奧巴馬就喺黃金時間、全國直播記者會,嚴厲批評警方。

「警方行為愚蠢」(Police acted stupidly)!

奧巴馬話,呢件事反映美國社會仲存在種族問題。

佢又比喻,如果有日唔見左門匙,強行打開白宮大門,可能會被射殺。

拉人既警長,堅持冇做錯,毋須道歉,上司亦支持佢,話當時拉人、合法合理。

警察指奧巴馬的批評,傷害警隊。全國警官協會話奧巴馬應該攪清楚、至好評論,要求奧巴馬道歉。

而奧巴馬之後,為自己解畫,承認自己對案件詳情不甚明瞭,又話非常敬重警察云云。

無論係奧巴馬,定係過往總統,好少咁直接觸及種族議題,大家都知搞種族沖突,對政府來說是沒有好下場。

對於警方內部的種族歧視問題,"More Sex is Safe Sex:The Unconventional Wisdom of Economics"一個有關公路調查都幾有趣。

一條州際95公路,一個警方調查發現,黑人車輛被截查是否有藏毒的次數,比白人高出兩倍半。

那藏毒的比例又有多少? 黑人是百分之0.3,幾乎與白人一樣。那可以證明警方是有針對黑人吧?

且慢,不要記著黑人被攔截的數目是白人的三倍,如果警方不是增加攔截黑人,那藏毒的黑人會增加多少?

經濟學家發現,如果警方只著力攔截黑人車輛,就會變相鼓勵更多白人帶毒品,因為可以瞞得過警方。相反增加攔截白人,黑人帶毒又會增加,現在雙方的藏毒率機會一樣,正是一個動態平衡。

紐約時報話,今次事件可能觸發了一個埋藏在美國社會的深層炸彈,搞得不好,分分鐘比起次按同醫療改革更令奧巴馬難以應令。

說到底,到底是誰stupidly?

2009年7月24日星期五

出入平安

一開預咗見兩萬,可惜,只係曇花一現。

有散戶話,四叔都講到明到兩萬就要減磅,佢地無奈都只有照跟。

我們走訪了四叔,他說今朝掂過二萬唔算數,要企穩先至算數。

四叔唔沽住,但散戶等唔切,獲利盤拖累早段由升過二百幾轉為一度倒跌。

廣告就話,股市反彈魚翅撈飯。

股市見兩萬,大閘蟹甩難。

舊年九月,恒指跌到二萬,四叔話抵,東哥更話合理,形成二萬點係超級蟹貨區。

事別十月,相信唔少投資者未開市已經諗著,係咪出貨,將蟹貨鬆綁了事。

二萬點果然一見即逝。

但原來背後大有故仔。綜合基金,賓卡,老牌經紀賽後檢討,今日市況係,散仔沽,大戶掃!!

綜合各方高見。恒指未升完,以估值上,依家恒指PE係十七點六倍,輕微高於平均十五至十六倍水平。

嫌盈利唔準,要睇P BOOK,依家係一點九六倍,亦較平均一點九倍高的多。

結論係,股市唔「平」,但未升夠,原因之一係,無大戶敢沽貨。

FUND 佬埋怨,佢嘅股票組合已經超重,現金水平幾乎零。

但收市計算,居然發現組合竟然落後大市。

細心會發現,原來愈高BETA ,愈無基本因素嘅股分,包括航運,出口股,都係大幅跑出,而呢的股分,唔單係佢,大部分基金持貨唔多。

資金苦無出路,而家完全唔敢沽!!

中環友講,下晝金管局接左兩舊錢,美金沽盤,買港紙,據講,正係對沖基金到港。似乎PARTY NOT OVER!

有老行尊話,細心睇過港交所今日嘅經紀買盤,部分係似曾相識嘅對沖基金御用牌仔。

再者,388成個星期走勢凌勵。按以過往比股市行先半步嘅狀態,升就升先、跌亦跌先,似乎後市的確會一番炒作。

睇埋黃金比率分析,恒指穿左18893點之後,下一步係21327點。

大行之中,目前最樂觀係22047,由大摩發出。

但依家資金市帶動,升穿二萬三都唔出奇。但記著一句,當市場最不理性嘅時侯,股市都去得...七七八八。

幾時爆煲,眾說紛紜。

財經演員話,睇美股,睇業績。

有人提到,按往績計,大型新股上市之日,就係股市爆煲之時。

換句話講,星期三金隅同中國建築A股一出,股市即縮?

總之睇好,定睇淡,由各位分析。可以送俾大家都係一句,出入平安!!

似曾相識

經德保時捷家兩族最老終肯車首,保時捷同福士將在2011年完成合併。

保時捷的命運,再唔係操縱喺自己手上。

收購合併戰,源於四年前,當時保時捷行政總裁魏德金打算蛇吞象,透過財技收購歐洲最大車廠福士,想增持股權至七成半。

當日呢招曾經令福士股價急升,一躍成為全球市值最大公司。

點知遇上金融海嘯,即時陷入財困,負債100億歐元。

收購不成、另一邊廂,福士反客為主,提出購入保時捷核心業務,令保時捷成為福士旗下、第十個汽車品牌。

呢場角力,最終福士贏左。

福士引入卡塔爾資金、入股一成七後,會逐步買入保時捷核心汽車業務,最終同保時捷母公司合併,合併後的公司,會由福士牽頭。

保時捷初步會獲得50億歐元資金,暫時紓緩財政危機。

魏德金嘅蛇吞象夢想破滅,自己亦黯淡落台。

年薪超過七千萬歐元、係德國最高薪行政總裁嘅魏德金,領導保時捷16個年頭。

90年代初、佢成功挽救保時捷,避免破產,並巧妙運用財技,增持福士股權成為大股東,保持捷喺佢領導下,成為全球毛利最高車廠,財政大幅改善。

但人心不足,佢想進一步、以蛇吞象併購福士,更不惜刻意隱暪自己持有福士35%認購權,最終不單被福士反收購,自己亦因為成為兩間車廠未來合作阻力,喺公司壓力下落台。

最慘係整個部署賠上了德國的監管名聲,變成魏德金自己財困時,四處求助都無人理睬、甚至被總理默克爾刻意阻撓。

當然魏德金也不是一無所有,最少獲得了巨額五千萬歐元賠償。

過去保時捷同福士、兩間車廠之間,有千絲萬縷關係,呢段關係,同納粹希特勒有淵源。

話說30年代初,啱啱創辦車廠嘅Mr. 保時捷,希望生產、人人都買得起嘅汽車。

希特勒知道呢個意念後,大力支持。

保時捷先生,按希特勒意思,設計出甲蟲車雛型,最高時速100公里,但價錢只係同一部電單車差唔多。希特勒於是下令創辦福士車廠,Volkswagen,德文即係人民汽車,所以內地譯作「萬眾」亦不無道理。

另一方面,保時捷車廠,同福士車廠緊密合作,1938年第一部保時捷自行設計、生產既跑車,就係採用福士既引擎。

福士車廠依家的掌舵人「皮耶奇」就係保時捷的外孫,相信佢都希望,一旦合併,可以將保時捷業務,進一步發揚光大。
//////////////////////////
魏德金嘅故事是否似曾相識?

我們二千年時,不是有盈科數碼動力以高借貸收購百年老號香港電訊?

可能唯一不同時,擁有七十八年歷史的保時捷今天失去獨立地位,至少有人仲會感到惋惜。

2009年7月23日星期四

低手

一度齊名,舊年十月齊齊轉型做銀行控股。

摩根士丹利同高盛、第二季業績只可以用天同地嚟形容。對手盈利創出新高,大摩就連續第三個季度虧損,蝕左1億5千9百萬美元。

華爾街日報講過,高盛嘅成功、係建築喺對手嘅痛苦身上。

金融時報話,如果要搵一個唔鐘意冒高風險嘅投行,一定就係摩根士丹利。

單計兩間銀行交易及投資收入,高盛賺多一倍,有破錄嘅107億美元,反而大摩就蝕左三億美元。

原因睇風險資產都可以了解到,高盛第二季VAR(Value at Risk)增加至二億四千萬美元,即係銀行評估一日內、最多可以承受虧損,而大摩就反而下跌至一億一千萬美元。

債券收入、即使撇取一次性項目,收入都只係高盛三分之一。

行政總裁默克對呢個部門係最唔滿意,今個星期就撇換左利率、信貸同貨幣交易部門主管。

此消彼長,高盛以11億美元、向政府購回認股權,係首間完全擺脫政府影響力銀行,埋單計數,政府回報有兩成三。

默克想追番同業表現唔係無道理,不過資產市場由低位反彈四、五成之後,先至增加風險投資,反而令市場擔心。

睇番大摩嘅槓桿比率,由第一季嘅十一點二,增加至百分之十三點七,似乎係有所行動,反而同期高盛係調低左槓杆比率七個百分點。

可能唯一令大摩員工滿意嘅、係盈利倒退下,花紅同薪酬都係無手軟,摩根士丹利分左近六十億美元,增長左一成四。

雖然計番每個員工只係「袋」到九萬五千美元,遠比高盛員工分到嘅三十八萬美元少,不過已經係佔左總收入七成二,遠比平均分派四成八比例高。

唔怪得分析員話,作為大摩員工都算係豐收嘅一個季度,但股東就肯定唔係咁諗。

拒絕和解

我決定轉軚,建議雷曼迷債苦主,唔好接受和解方案。

百分之六十、七十賠償太少,理應爭取百分之二百。

苦主們,爭取你們應有的權益,相信香港的法治精神,以你們認為啱的態度,入稟法院追討損失,向欺騙你們的銀行拿出證據,證明你們是被騙、證明銀行無比過銷售章程你地、證明銀行刻意隱暪風險,無解釋迷債細節、證明銀行話迷債係無風險、證明香港銀行業是刻意擺出一個開埠以來、欺騙無知投資者的最大騙局。

我們要相信香港的法治精神,確信法院可以保障無宰受騙人的利益,比左「一」就要取回」「一」、更家要銀行拿多「一」出來,賠償他們的不公義行為。
///////////////////////////////
一看到那些什麼社論說苦主應由社會和諧角度,要接納和解方案就令人無名火起,說什麼迷債苦主應拆解「影響和諧穩定的計時炸彈」,「各方理應通力合作,玉成其事。」根本就是以社會壓力去壓抑苦主爭取應有權利。

雖然個人對一些政客沒有多大好感,但大家明白在遊戲之中,只是各取所需,他們在在雷曼事件爆發之初,的確為一苦主、特別是年紀較大的爭取公義及賠償,在他們最無助之際伸出援手。雖然在立法會引用特權法下是犯下大錯,但現在說什麼「情有可原」、「為了一己私利,煽動苦主抗爭」,也不是一個公平的說法吧!

如果有留意,今次香港作出的和解方案,受到多個外國傳媒廣泛報道,顯然今次香港做法是一個很壞的先例。大摩一分報告已經預言,台灣的銀行會受到很大的壓力,要跟從香港的做法,可能會被迫增加撥備。

還是今天明報的社論寫得好,要賠的就賠了,要告的亦會繼續下去,但左雷曼迷債事件後,各方收緊措施似乎「矯枉過正」,就像東亞發行人民幣債券手續,就被指太過嚴苛。「呢啲類似鐘擺咁,過猶不及嘅舉措,阻礙左金融活動嘅活力同生機」,當局一定要比金融活動順利進行,「一放就亂、一收就死嘅怪現象,一定要打破。」

觀乎任總今天在觀點的言論,說銀行業不受限制嘅競爭同創新好有可能會造成破壞,仲認同需要規管銀行業務,原因係好多公眾人士、並無能力評估銀行信貸風險。似乎連任總都因為不堪壓力有轉軚之嫌,銀行業未來日子未必太好過。

2009年7月22日星期三

一個政治家的誕生

潮流興新版面,連Yahoo!用左三年都改,我地都試下改改版面,希望唔使咁悶。
///////////////////
一場金融海嘯,將一個書生學者變成一個真正政治家。

伯南克到國會前提早公開,學懂喺華爾街日報撰文,表明自己立場。

呢招就係先減低震蕩,降低預期。

佢指經濟有明顯回穩跡象,但仍然疲弱,相信量化寬鬆貨幣政策要維持一段長時間。

一旦經濟持續復蘇,聯儲局隨時準備撤出量化寬鬆政策。而關鍵就在於,聯儲局點處於目前龐大嘅資產負債表

金融危機爆發以嚟,聯儲局透過回購債務工具,以及拆出短期資金。

大量印銀紙之下,單係金融機構存放喺聯儲局嘅剩餘儲備,就有超過8千億美金,伯南克話,避免通脹,一定要從呢筆錢著手。

佢話如果無任何措施,筆錢要幾年時間,先會減少至正常水平。

金融機構依家將錢存放聯儲局有四分一厘利息收到,伯南克話聯儲局可以透過加息、向金融機構提供較市場為高嘅利率,佢地自然會將錢繼續泊喺聯儲局收息,唔會借出去,咁係避免信貸氾濫嘅其中一個方法。

另外,聯儲局亦可以用逆向回購方式,發行票據,吸走部分資金。

又或者係向金融機構發行存款票據,令剩餘資金,唔會流出市場。

仲有一招係財政部透過聯儲局發票據,甚至以公開市場運作方式,都可以有助撤出量化寬鬆政策。

伯南克提到五招「撒出市場」策略,目的都係要縮減聯儲局資產負債表規模,喺市場上抽資,既避免直接加息打死剛出現的綠芽,亦可以向外界表明,自己有「貨」喺手,調控工具可以隨時出招。

至於幾時落實撤出策略,就要視乎經濟復甦嘅步伐。

言外之音係話,唔係由佢作主。

分析指,掌握撒出策略嘅時機,難度好高,目前市場最信得過人選,除咗伯南克別無他人。

因此,令到伯南克喺出年一月任期屆滿後,獲連任聯儲局主席嘅呼聲,大大提高。

網上博彩公司預測,伯南克成功連任嘅機會率,由今個月初嘅大約五成七,回升到七成。

彭博資訊嘅調查亦顯示,喺全球投資者嘅心目中,有七成半意見認為,伯南克係對抗金融危機第一人,並支持佢繼續連任聯儲局主席。

調查又顯示,喺全球傑出央行行長排行榜中,伯南克高據榜首。人民銀行行長周小川,亦榜上有名,僅次於英倫銀行行長「默文金」,排喺第四位。

2009年7月21日星期二

解脫

撓釀多時,雷曼迷債終於有個解脫。

我不是說投資者,是銀行。

有無見過銀行家不斷講粗口? 肯定有二十多間銀行日日爆粗駡證監。

不過佢地都願意選擇和解,就係唔希望每日分行門前都有人攪事攪棍! 可以盡快令事件告一段落。

至於投資者可以攞番幾多錢,主要視乎迷債抵押品而定。

整個回購方案,可以分兩部分睇。

首先,雷曼迷債分銷銀行承諾,先用本金六成回購迷債、65歲或以上長者多些,有7成。

雷曼迷債投資者之後仲有無錢落袋,就要睇迷債抵押品價值。

銀行同意抵押品頭百分之十剩餘價值,會全數俾番投資者,之後有多嘅,先俾銀行扣除本金回購嘅部分。

假設原先本金一百蚊,抵押品剩餘價值有80蚊。

根據方案,投資者先攞番本金一成剩餘價值,扣除番60蚊回購成本,差額再還俾投資者,換言之投資者可以收足80蚊。

假設抵押品無咁值錢,已經跌價9成,只係剩底十蚊,投資者可以收番本金六成後,仲可以攞番抵押品剩底嘅一成價值,即係合共收番7成本金。

簡言之,只要抵押品價值不跌多過九成,投資者可以最少取回七成本金。

除左專業投資者外,全數雷曼迷債投資者,都可以根據方案獲回購,而銀行就完全無錢賺。

銀行界話,按現時方案,業界最少承擔75億虧損。

有關方面對專業投資者定義未有最後未有共識,初步傾向,如果一名投資者,專係投資結構產品,就會被界定專業投資者,唔獲賠償。

等咗十個月,終於有具體嘅回購方案,但班雷曼迷債苦主話,都係唔接受。

他們的理據是,銀行做錯事,一方面可以取回抵押品,同時又只係需要賠七成,是便宜了銀行。

以新鴻基、凱基賠足百分百先例,銀行錯仲多,無理由賠償額相差咁大,認為應公布市值,可以等透明度大啲,自己容易計數。

好,買左雷曼迷債要蝕錢,如果同期買左匯豐又點?

喺雷曼兄弟倒閉前,投資者將資金投放入滙豐,當時股價仲係高企喺一百蚊樓上。

但今日,經過供股,雖然大市已經回升到金融海嘯前水平,但滙豐股價只係企喺70蚊邊,每手要蝕3成4。

雷曼苦主們,唔好當海嘯無發生過,你蝕錢要人填氹,賺息時又會唔會同人分享? 不要忘記,銀行只是收你百分之二手續費,而家要拿數十億出來,都是那句話,得些好意需回手。

2009年7月20日星期一

殺熊無悔

有人形容,當市場連最後一個淡友都轉埋軚,股市就會陷入瘋狂,話口未完,呢個現象似乎出現左!

其實又唔使想得咁恐怖,因為都係一個資金市!

港股連升第五日,恒指最多升過七百點,衝破萬九大關!

指數升至近十個以嚟嘅高位。升市成交配合,係五個星期以嚟最多。五日累積升幅高達一成三,一共升咗二千二百幾點。

講到資金市,連上星期調高港股目標到兩萬兩千點嘅摩根士丹利認為,港股會繈續受惠內地資金過剩。

而最得益嘅會係喺兩地上市、而AH股折讓大嘅股分,同埋一啲內地投資者之前投資唔到嘅藍籌股。

大市升勢瘋狂,所以熊仔咪出現殺戮戰場!

全日有一百一十隻熊證因為觸及收回價,而即時死亡,係歷嚟最多。

要收番嘅恒指熊證有七十二隻,收回價一萬七千三百點,至一萬九千五百點。

國指熊證有五隻暫停買賣,收回價一萬一千二百點至一萬一千六百點。股分熊證有三十三隻暫停買賣。

大家記唔記得上周有兩日尾市期指有異動,當日大家都唔信是「昆」人入四局,今日終於證明是大挾淡倉,見熊殺熊。

應該為此招記名「殺熊無悔」!

轉睇返內地股市,股民形容股市陷入瘋狂期!

內地股市重上十三個月來新高,成交突破三千五百億,係兩年以來最多。

上證指數差唔多回補晒六月十號下跌裂口。

信心來自成交,係廿六個月以黎最多。

專家話已有過萬億貸款流入股市,擔心政策收緊,不過市場資金滿瀉,對壞消息通通免疫。

不過我地都係要清醒啲,市場其實係隱藏左唔少暗湧!

好似開市前銀監會就要求銀行、將撥備覆蓋率提高至一倍半,呢個講法同之前只係建議,有好大出入,仲要係喺年底前硬性執行!

收市後內地亦正式公布喺下星期日、就啟動創業板,接受公司上市申請,都係會增加股票供應。

似乎而家股民眼中,只係睇到利好消息,壞消息就全部睇唔到,唔怪得有人形容,仲有幾多咁恐怖嘅日子會來臨,正係反映又驚又喜嘅心態!

萬九點....你死機???

恒指破位,直逼二萬。好似大摩所言,內地資金一日未停,香港呢個資產泡沬會繼續養得肥肥白白!!!

但泡沬未爆,升市之日,報價機就先發「老皮」!

全港主要電視台(好在不包本台,Touch wood!),同個別報價資訊商,上晝開市前,已經心知不妙。結果一開市,恒指唔「郁」,國指唔「著」。唔少個別股分報價原來仲係上星期五收市價!

全港各大股民,唔少「媽媽」聲。恒指報價停頓事件,歷時個半鐘,出事之迷,原來係...

唔係供應商,唔係交易所。原來係路透社,話說佢地靜雞雞「霖」左機,唔少靠佢地攞報價feed嘅資訊商,當堂叫天不應,叫地不聞。

依家屬於港交所實時行情發布資訊供應商,有121個,即係vendor,包括敝台在內,可以向外提供港交所即時報價。

俾大家清楚了解報價情況拉,121個即時報價機構中,唔少係透過路透社攞港交所數據,所以路透一出事,報價機構即時「企」左喺度。

幸好,我地屬於直接接駁供應商,簡單講,我地有專線從交易所攞data,唔需要經路透社。所以今日影響,算係謝天謝地,減至最低。

現時,屬於直接接駁港交所vendor嘅資訊商,除左各大外資行之外,經濟通,彭博,都係直駁港交所。

其實,如果今日其他行家有backup,就唔使搞到個幾鐘無報價。

行家話,搞到咁大件事,係開市後,都無人知出左事。

路透系統有問題,佢地當時無高調通知,反而只係喺上晝十點,即係岩岩開市,出左段提示。內文入面要好細心先搵到、報價系統有誤。

路社出事唔係第一次,連的經紀行老細都話,無報價即係趕客。今時今日,資訊供應商收咁多錢,服務要均真的好啲!

2009年7月18日星期六

大掌柜

有報章形容,委任新金管局總裁的記者會就仿如一個「街市」。

一個對香港未來有咁重要的角色,只是求其開著幾把大風扇,讓主角面對近百個記者,又要喊至聲嘶力竭,使唔使咁低手?

或者低調進行,就係唔想再比人踢爆自己曾經講大話。

政府由兩年前起主動放料要換任總,想透過一場政治把戲逼宮,老早就已經注定今天的局面。

論能力、論資歷,其實「攞命」都有足夠資格,奈何曾蔭權只懂玩拿權術,以一個大話遮掩另一個大話,仲說最終鄰選出八人名單,不過當事人就毫不知情。

真係笑死人。

身為前上司,任志剛話,陳德霖係金管局老朋友,由佢接捧,勝任有餘。

相反,罕有咁公開見傳媒、歷時八分十二秒,陳德霖只係多謝一個人。

即日起,外界可以正式稱呼陳德霖做侯任金管局總裁

仲有唔夠三個月,陳德霖就進駐國金二期頂樓辦公室。

金管局總裁職位減薪後,由陳德霖接掌,人工仍然係全球央行行長之冠。

比聯儲局主席伯南克高出四倍,同歐洲央行行長特里謝比,亦搵多佢四成半。

講到任期,過往我哋香港無限制,任志剛一做就16年,僅次於美國聯儲局前主席格林斯潘。

其實聯儲局有限四年一任嘅,不過可以連任,令格林斯潘做咗19年,成為全球最長任期行長。

由沉默寡言,搖身一變,成為新晉陳四萬。NORMAN CHAN面部笑容,已經話左俾大家聽,我終於得左啦!

金管局管理一萬七千幾億港元外匯基金,積金局負責睇著超過二千億強積金,呢的都係香港人多年嚟儲落嘅錢。

以後,全港七百萬同胞,就要拜托陳氏夫婦!

任重道遠,中環人講笑咁話,第時,是旦一個有流感,我地二萬幾億都凍過水。

成為全港最重要嘅兩個陳總,陳德霖講明,自己與太太各司其職,完全無問題!!

政壇中人話,任總今日評陳總勝任有餘,架輕就熟,稱呼佢係金管局老朋友 。相比下,陳總只係一句榮幸獲財政司司長委任。高下立見,似乎有欠大將之風!

香港人期望,減薪同任期,佢做到。銀行家希望,亦係陳總發揮功力時候。迷債一役,損傷左銀行家同國金二期關係,希望可以搞搞佢。

銀行家話,希望陳總拆牆鬆綁,唔好再犞枉過正,否則產品賣唔出,銀行無錢賺,到頭來大家都唔好過。

中環人話,陳總,本來同任總好夾,但兩個在聯匯兌換保證範圍上有出入,據講陳總一直唔BUY強方兌換保證,認為可以任由港紙有UPSIDE,鎖定DOWNSIDE就夠。

他日回朝,一旦市場有咩變化,對港元對聯匯有何影響,這才是先真是真正的考驗。

2009年7月17日星期五

經濟學末路?

如果有睇開美股,會發現最近如果有單日轉向,特別係「炒上個款」,往往就會解釋係,有重量級人物轉軚睇好經濟!

星期四就有最新鮮例子,末日博士「魯賓尼」,被傳媒引述話,金融危機最壞嘅情況、已經逐步遠離,相信經濟會喺年底時走出衰退,呢番言論就刺激美股琴晚上升。

呢個情況係魯賓尼身上,至少出現過兩次。

另一次,就出現喺諾貝爾經濟學獎得主克魯明身上,當時佢話衰退上半年就會結束,結果又係推高全球股市。

似乎當今之世,全球就只係得番呢兩個經濟學家。

不過奇怪嘅係,「魯賓尼」喺琴日美股收市後澄清話,佢並無預測經濟喺年底前會回復增長,只係傳媒「斷章取義」,重申年底前,經濟有機會出現「雙底衰退」。

呢個「美麗嘅誤會」咪一樣出現喺克魯明身上,好似個次喺倫敦經濟學院嘅演說上,雖然第一日講左衰退可能年中就結束,但之後兩日嘅演講,都有提到復甦係無可能短期內出現,但市場似乎只係一面倒只係識聽好消息。

佢地兩個有咁大影響力,原因都係佢地都能夠準確預測金融海嘯嘅來臨,之前被大部分經濟學家孤立,而家時而勢易,成為左人民英雄!

不過傳統經濟學係咪就此「式微」?

經濟學人今期用呢個題目做封面專題,標題就係「經濟學出了什麼問題?」

其實早幾年前,經濟學家真係好似威盡社會科學界,幾乎好似可以解釋全世界嘅現象,由吸毒、到塞車、到汽水用鋁罐唔用紙盒,講到好似天下無敵。

但一場金融海嘯,就令呢啲經濟面目無光!

經濟學人話,對經濟學嘅指控有三個,第一係助長金融海嘯形成,第二係經濟學家全部都唔能夠預測,第三當然係無一個識得點樣去復修呢個「爛攤子」。

第一個指控,其實有啲道理,呢幾十年宏觀經濟學一咪只係識得對抗通脹,對資產泡沬嘅形成,係「隻眼開、隻眼閉」。

當中表表肯定係格老。

而有關財務經濟學嘅理論,近幾年都發展成高深嘅數學模型,美其名以「金融創新」為名,不斷出CDO、CDS、MBS呢啲「打包」慨念,過渡槓杆化結果,當然就係泡沬爆破。

但經濟學人話,呢啲理論只係數學模型,無人叫你假設樓價只升不跌?

何況近十幾年經濟學已經對所謂、「Efficient Market Hypothesis」不斷作出修訂,好似係學術界排名第一、01年諾獎得主Joseph Stiglitz,就不斷以資訊不對稱,嚟彌補傳統經濟學嘅不足,絕對唔係好似克魯明咁講,過去三十年理論都係「垃圾」。

未來經濟學會點? 其實面對左一場金融海嘯,多國央行已經將利率降至零,但都難以推動經濟,所以傳統嘅貨幣理論已經無咩作用。

而過去我地熟悉嘅「全球化」、「槓杆化」嘅金融世界,已經徹底改變,喺去全球化下,世界已經唔再係平,而係一個「彎」嘅世界。

經濟學講到底都係一門社會科學,需要了解真實世界,而呢場金融海嘯係已經改變左世界嘅面貌。

2009年7月16日星期四

同枱食飯,各自修行

似乎沒有太多人留意美國聯儲局的議息紀錄,但實際上反映的訊息卻非常嚇人。

FOMC上月開會,決定調高經濟預測,相信今年經濟下滑嘅情況,會比之前估計嘅溫和。

但與此同時,對失業率的預測卻看得相當灰,有機會升穿百分之10。

聯儲局公開市場委員會、上月嘅會議紀錄附載嘅經濟預測顯示,聯儲局上調對經濟前景嘅評估,預測美國經濟今年會收縮百分之 1至1點5,原先估計會收縮百分之1點3至2。

並調高對出年嘅經濟預測,估計會增長百分之2.1至3.3,原先預測嘅上限,只係百分之3。

不過要留意上下限的波幅之非常之大,有最「熊」的委員估計出年經濟只會有百分之零點八增長,最「牛」的估計達到百分之四。

即使上下限的差距高達3.2%

同樣,對失業的預測亦有嚴重分歧,上下限預測介乎8.5%至10.6%。

當局同時調高埋通脹預測,今年嘅核心個人消費開支物價預測,由原先估計計上升百分之1至1點5,調高到上升百分之1.3至1.6。

會議紀錄顯示,聯儲局委員之間的分歧是前所未有,正是同枱食飯,各自修行。這個全球擁有最大權力的金融俱樂部,入面最頂尖的人都對經濟看法有如斯大偏差,一般人又如何評估?

有聯儲局觀察家話,從來未見過聯儲局嘅委員,內部對經濟前景有咁大分歧,相信會增加主席伯南克制定政策
嘅難度。

公開市場委員會,喺上一次會議,最終並無擴大購買資產計劃嘅規模,主要係憂慮一旦擴大計劃規模,市場可能會有負面反應,擔心會弊多於利。

看看美國最新樓市數據,亦不容許人好像官方如斯樂觀。

上半年美國有超過150萬間房屋被銀行收回,係歷嚟最多。

上半年因為斷供被收回嘅房屋比舊年同期多一成半,相當於每84個家庭就有一宗。

而第二季嘅個案有接近89萬宗,係歷嚟第三多。

房屋斷供、被收回比率最高嘅、仍然係內華達州,每十六個家庭就有一宗,亞里桑那同佛羅里達就排第二同第三。

負責統計嘅按揭機構指,美國樓市無好轉跡象,隨住失業率持續上升,按揭拖欠同斷供率亦會上升。

現時美國而家每八個家庭,就有一個拖欠供款,負資產宗數超過830萬宗,如果樓價再跌百分之5,會再多220萬宗。

預計全年,斷供被收樓宗數,會達到320萬。

驚嚇一分鐘

先有周一開市初段期指一分鐘內急插四百點。

周二中午一開市又見三千張期指抽高現貨指數一分鐘裂口上升二百點。

周三本以為無風無浪,原來收市又見一隻標智滬深三百,在幾個買盤推動下急升五成。

大家都知A股當日肯定無升五成。

到今天,又有隻316,有人用三百多萬元,尾市一分鐘不斷輸入低價沽盤,結果董生檔家族生意單日急跌三成多,股價幾乎回落到舊年十月低位。

問過東方海外,佢地自己都非常驚奇,重新公司基本因素未變,還稱是否錯盤。

是否錯盤當然容易核實,查過聯交所,盤過個經紀,都認唔係錯盤,但偏離如斯多價位實在令人費解。

過去有「勁假時段」時候,這種現象遇有發生,但今天要拿真金白銀出來造市,又有點匪夷所思。

一個可能解釋是撞岩要斬倉,不過要揀到尾市最後一分鐘先來斬,又要低如斯多價位,講出來都無咩說服力。

至於是否作場外對沖,也有這個可能,但碰巧幾日都要部署作如斯觸目對沖,又好像太過明目張膽。

據聞交易所近日有意將場外交易納入埋現有交易平台,但似乎中間有點難度,就算你可以將交易費用降低,但人家是否願意接受你監管?

其實近日市況淡靜,有心人要興風作浪,揀一些未平倉合約偏低的時候,以期指試一試個市況高低位,到底是否後市另有部署,大家可要留心。

當然作為監管機構,對於這些異動不容少觀,應盡快翻查交易紀錄,對任何偏離的交易應作出調查,盡快恢復市場信心。

公開的秘密

被稱為超級星期四,一連串影響全球股市、匯市、債市、商品市場的數據,全部舉足輕重。

記者會喺朝早十點至開始,但多分內地報章,早喺記者會前幾個鐘頭、已經大肆報道,內地第二季經濟會增長達百分之7點9。

當然,消息全數準確。

報道仲不諱言公開消息來源,話係嚟自星期三一個研討會,一位權威人士援引引國家統計局相關人士嘅資料,路透社亦喺朝早轉載呢段消息。

之後路透社嘅記者,就喺記者會質疑,係咪有人違反中國法律,洩露國家機密。

內地喺重要經濟數據發表前,有傳媒事先報道,其實已經唔係第一次。

舊年七月,同樣嘅數據,路透社早喺記者會前一個星期,已經引述官方消息、率先透露通脹同經濟增長率。

當時國家統計局回應指,絕對唔可能提前泄露,但無提過係咪有人要受罰,當然事件最終亦不了了之。

唔止經濟數據,證券市場提前泄露更係屢見不鮮。

最經典要數零七年「港股直通車」,喺外管局公布前一個交易日,恆指單日戲劇性出現V型反彈,傳聞就有唔少內地資金預先入市。

而喺前年5月,提高印花稅嘅傳聞亦廣為流傳,當時財政部同國家稅務總局都公開否認,刺激A股創出歷史新高。

但到五月底晚上公佈嘅印花稅調整,就同傳聞完全一樣,觸發股市下跌,事後有人甚至發起到財政部抗議。

有唔少網友都話,喺中國,根本係無機密可言。

又點到你唔信?

2009年7月15日星期三

高手

顯示第五大銀行實力,高盛第二季盈利創新高之餘仲超出晒預期。

有能力還錢俾政府,回饋俾員工力度、仲令市場意外!

咁好成績,高盛一d唔手軟,分紅一百一十四億美元比員工,一加加三成三,都係破紀錄。

二萬九千個員工,如果平均分配,每名就可以得三十八萬六千美元。

連金融時報都話,呢個水平亦可能冠絕全行,甚至超越金融海嘯前水平。

你會問,點解高盛可以咁利害?

華爾街日報形容,高盛的快樂,實際上是建基於對手痛苦身上。

六大投行,一年內無左兩間,勝者為王嘅現實社會中,高盛市場佔有率因而提高。

更重要係,高盛善於對賭,高盛賺錢亦即係佢地交易對手行家,戰敗沙場!

高盛賺大錢,功勞確實係歸於佢地識生金蛋的盤房。

但美國學術界亦引嚟唔少回響。唔少著名學者話,高盛今日成功,可以係華爾街明日嘅失敗,因為大家會誤解、以為靠炒,都可以令業績創新高。

學者直言,高盛係MORAL HARZARD重要一課。

不過大家都係靠炒,點解高盛又特別出色呢!!

金融圈話,高盛一直奉行利字當頭政策,員工幫公司搵得多,自已就愈袋得多。

佢地亦係少數金融機構,實行PARTNER制度,員工搵錢嘅動機相當強!

制度以外,高盛坐盤規模亦係最大,股票之外,商品更係最大莊家。

而佢地坐盤策略,可以同建議客戶投資策略完全相反,呢招先叫人嘆為觀止。

高盛模式,就係風險高,回報好。

如果細分佢地業績,高盛VAR,即係風險資產「VALUE AT RISK」嘅資產,就較舊年同期多33%,有2億4千5百萬美金,亦即係高盛評估、一日之內,可以最多蝕二億幾美金。

但與此同時,佢地亦將槓杆比率,大幅調低七個百分點,比一年前低左十三個百分點。

到底呢個時刻降低槓杆,會唔會好似管理層咁講、對經濟前景,係「feel not so great」!

事實上,一場海嘯,令高槓杆模式行唔通。

高槓杆代表派別、麥格理,之前亦爭啲出事。

金融機構要賺錢,但基本因素唔容許,高盛呢個例子,亦正好講解,今時今日,坐盤炒,係金融機構主要盈利來源,絕對唔係高盛獨有!

強者高盛之外,能夠拍得著,可能係摩通,因為佢地FIX INCOME一直係強項。

歐資行中,法巴亦可能有驚喜,佢地外匯交易,全球數一數二。

題外話,呢行坐盤交易,每間行,都會有自已一套程式負責,呢條程式,就係間BANK高度機密。

所以,早排高盛唔見左部分程式,分分鐘係好大件事!

有錢人的煩惱

以前聽好多國企老總講,佢地目標唔淨係賺錢,最重要係幫國家「出口創匯」,原因就係中國改革開放以嚟,外匯儲備增長都好緩慢。

直至九六外匯儲備先至第一次突破一千億美元,五年後再翻一翻,到零六年外匯儲備先首次超越日本,而家更比日本高出一倍。

作為全球擁有最多外匯嘅國家,中國嘅外匯儲備突破二萬億美元,過去兩年嚟更係翻一翻,

單係第二季,就多左一千七百八十億美元,係歷嚟最大季度增幅,以目前規模,已經佔左全球外匯儲備總額嘅三成。

外匯儲備急升,原因同非美元資產急升有關,而內地救市措施發揮成效、股市反彈九成,更係吸引大量熱錢流入。

咁嚟緊外匯儲備仲會唔會保持快速增長?

其指好視乎美元走勢,估計而家外匯儲備之中,有六成半至七成係美元資產,由於美元仲有眨值危機,內地有需要盡快分散投資。

不過要分散又談何容易? 美元而家仍然係主宰國際儲備貨幣地位,難道一下子將幾千億美元轉去歐元、英鎊定黃金?

有人計過數,如果人行要將百分之五儲備轉投黃金,買入嘅量,已經係足足一年全球黃金嘅總產量,你叫人行點轉身?

因此無論係溫總好、周小川,都要不斷表達對美元為主要國際儲備貨幣嘅關注,更首次喺八國集團同發展國家峰會上,當著奧巴馬面,公開提出要求改革儲備貨幣制度。

而大量熱錢流入,亦增加左人民幣升值壓力,反映一年後人民幣匯價嘅不交收合約、單日就升左二百個點子。

不過有分析指,由於出口仍然疲弱,內地唔會揀呢個時候將人民幣升值。

外匯儲備多,除左反映國力強之外,亦增加抵御金融危機嘅能力。但錢多都唔係無煩惱,第二季增加嘅儲備之中,過半數係熱錢,將會令內地資產泡沬、愈滾愈大。

幾間外資行計過數,估計第二季外匯儲備增幅,過半數嚟自熱錢,規模500至800億美金。

加埋放寬信貸,導致有過萬億流入股市,樓市,令市場充斥嘅過剩嘅資金,數以萬億計。

任總曾經稱啲熱錢係「高能貨幣」,一旦進入資產市場,不單做成泡沬,甚至會推高通脹。

可以肯定的是,呢的入嚟搵快錢嘅熱錢,肯家會造成泡沬,一旦大規模撤出,更會令市場波動。

當然外匯儲備多,亦有好處,特別係金融海嘯後,內地儲備充裕,令國力有增無減,儲備多對抵御金融衡突有利,內地亦可以趁機會,向對外投資、買平貨。

2009年7月14日星期二

祭旗

買人民幣,大家認同係低風險。

債券,如果唔係mini版,都係中低風險。

不過當兩者結合時,人民幣債券居然成為中高風險產品,有銀行直情怕到又要播錄音、又要填form,直情好似驚東亞會倒閉一樣。

單係手續就搞最少一個鐘,東亞人債,似乎被監管機構當係迷債咁開刀!

本港金融機構人民幣零售債券,東亞打頭陣,原本以為會排長龍認購,但星期5就截止,據講到依家零售部分,認購額只有一半多的。

當日李國寶大大聲聲話多謝匯豐,依家諗番轉頭,匯豐係確有一手先真!

個幾兩個鐘做的咩,有人講笑咁話同喺老廉飲架啡差唔多。

問你一大堆問題,再解釋章程,成個鐘先再決定,俾唔俾你買。

金管局可能收到風,知道銀行界唔多開心,琴日出咗個通告俾銀行,話產品由證監會監管,但強調,喺銷售過程,可以俾銀行一啲彈性嘅。

但中環銀行界,近日心淡之餘,人債呢呢件,只令佢地帶出唔少問題。以股票計,風險理論上高過債券,但經銀行買股票,或者抽新股,好簡單,上網一CLICK就得。

如果用買人債嘅模式,咁就大件事,銀行可以摺埋所有證券部門。

另外遲下政府官債,仲大件事,政府想搞活零售債券,但銀行點評估官債風險呢?

事關政府主權評級無三個A,同東亞差唔多,咁係咪官債都要列為高風險,又要錄音又要播片,難道到時又要財爺出來賣廣告,問下各位有咩好建議比佢呢?

2009年7月13日星期一

超級星期四

中國會成為全球最早公布上半年經濟表現。

星期四中國會公布國民生產總值、到時就知,到底中央大開水喉,對刺激經濟效用有幾大?

而內地官方研究機構已事先張揚,話保八應該無問題。

問題係會唔會係表面風光? 背人又點......

有外國嘅研究話,內地整體用電量五月仲跌緊百分之三,無理由工業生產仲可以升到百分之九,要做到保八,根本唔合理。

質疑中央數據可信性,不過點都好,呢個數據對全球都好緊要,一定要解讀解讀。

用電量可能係滯後者,事關六月分聽講又變番正增長,但講番超級星期四數據,預左唔差,但最緊要都係要睇返個消費。

因為固定資產投資,大事吹谷之下,一定唔差,之前傳出六月會破記錄,出口唔在講,暫時仲未得。

所以關鍵要睇GDP組成部分之一,消費部分跟唔跟得上呢個復甦嘅超級泡沬。

而從領導人嘅講話中,似乎經濟仍然未全面回穩。

外界一個流行講法係,全球、要一個新泡沬做引擎,因為只有另一個泡沬,先可以帶我地快啲過渡經濟衰退。

30年代美國大蕭條就靠打仗,日本四十年嘅黃金時代都係靠股市樓市泡沬。

其實泡沬初步形成,已係公認嘅事實,行內人叫「雙重最」,即係最高嘅貨幣供應,同歷來最低嘅房貸利率造成。連官方報章近日再炒舊料,話上半年新增貸款中,超過十萬億流入股樓。

中央台都連日報道樓市熱炒嘅消息,一早預警之下,泡沬會唔會咁快爆?

事實上,呢個經濟泡沬,隨時好似日本同美國咁,last十年八年唔出奇,但一旦爆破結果,後果好嚴重。

所以現時喺中央細心呵護下,將大泡沬分解為一個一個細嘅,再逐一擊破,唔單止可以延長泡沬期,又可減少震蕩,符合國情。

唔怪得人行早前重啟票據發行,原來係為微調「寬鬆貨幣政策」揭開序幕。

雖然預期嚟緊政策調控,無論喺力度同頻率都會加大,但似乎又唔洗擔心咁快會加息住,起碼要等到GDP回復雙位數
增長,重回通脹時代先有可能。加上地方政府債台高築,新一輪「三角債」問題又重現,估計地方政府債務07年底已超過咗4萬億,預期到去年會增至佔GDP超過三成,點有條件先咁快加到息﹗

三足鼎立

停牌等左足足個幾月,東航同上航終於提出合併,形成國內由國航、南航、東航「三足鼎立」嘅局面。

跟據方案,東航會向上航股東發新股,每一股上航,可以換1.3股東航A股,上航股東亦可以選擇、收取每股5.5元人民幣現金代替。

交易完成後,上航會撤銷喺A股嘅上市地位,但會保留品牌,以機隊規模計算,東航會成為內地第二大航空公司。

不過兩間「水皮」航空公司合併,真的可以發揮1+1=3的效應嗎?

美林同花旗都認為,合併可以提升番票價同盈利,花旗更估計,合併會令上海航空業嘅減價戰結束,東航盈利即時、提升十億人民幣。

但分析唔係一面倒睇好,瑞銀就擔心,上航股東現金方案會影響到東航財政。而且兩間公司嘅管理層、喺結構改組上亦有因難。

事實上,兩間航空公司都係表現差,同樣處於虧損,股會係咪批准都成疑問,即使合併成功,協同效應好難喺短時間體現到。

中國航空業過去幾年出現左翻天覆地變化,由市場化、到行業併購,經歷沙士後復蘇,滿以為可以受惠經濟高增長帶動之際,一場金融海嘯,令過去二十年平均有百分之十五客運高增長出現變化,去年只得百分之三,航空公司業績出現巨額虧損、甚至倒閉。

我們在中國龍頭企業領袖系列中,曾經走訪過中國國航董事長孔楝,他說金融海嘯打擊,比起沙士尤甚,好像北京的首都機場,航機因為沒有生意,就像像航空展一樣,排成一排沒有任務。

國航當時已指出,航空公司運力過剩問題仍然未有解決,特別是訂購飛機通常是在經濟旺盛時進行,空中巴士及波音的訂單猶為接應不來,訂出的價格非常高,因為飛機公司有本身生產週期,很多航空公司亦想辦法推遲交付,部分耗能較高的航機如波音747,甚至有整部飛機封存沙漠的情況。

目前內地航機絲毫未有改善,部分機票價格降至低火車的軟卧坐卡,百多元就可以起飛,以成本計根本是不可能發生。

中國三大航空公司、國航、東航及南航,已經佔全國七成半以上航班服務。不過在區域上,一直各有據地。國航主力華北及國際航線,東航就以華東為基地,以上海為例,合併後的新東航,已包辦近三分二航班,南方航空根據地就在華南地區。

事實上,內地航線就好似一幅三國版圖,國航步步進迫,希望進佔上海,持續虧損的東航、為保在上海基地,先籌劃同上海航空重組,保持華東市場龍頭地位。

市場縱有一輪炒作,亦很快發現過分憧憬合併的前景,除非減價戰情況可以紓緩,否則還是勸大家少拈手為妙。

2009年7月10日星期五

砸窗


今個星期二GOOGLE向微軟下左一封戰書,Blogger 「Techcrunch」形容,呢招就好似向微軟掉左個「核子彈」一樣咁可怕!

就係直接開發電腦操作系統,直接挑戰微軟嘅視窗霸主地位!

呢個以Google 早前開發嘅瀏覽器Chrome為藍本嘅Chrome OS,最大賣點都唔使多講,係操作系統會係免費提供,最重要係係原碼亦會發放俾其它嘅軟件生產商!

呢招真係攞微軟命!

其實GOOGLE同微軟之間嘅競爭,已經係愈嚟愈貼身,大半年前,Chrome 推出已經搶左 微軟「IE」唔少市場佔有率,跟著喺微軟又推出花左五年時間研究嘅搜尋器「Bing」,想搶返Google喺搜尋器嘅龍頭地位!

似乎施密特同阿蓋茨之間,真係打到埋身!

睇今期經濟學人,索性「用Breaking Windows」做題目,即係打難「視窗」,呢個標題一流!

睇番呢個chrome os嘅操作系統,初步設計會先用喺NETBOOK。Google話,正同多間電腦生產商傾喺合作,據聞開機只係要十多秒時間。

其實施密特對微軟推出「Bing」都幾在意,口講就話對自己影響唔大,不過就講到微軟只係識得用多錢嚟做宣傳,即係「財大氣粗」,睇嚟「Bing」真係有啲威脅。

睇下市場佔有率就知,跟據網上調查機構Hitwise指,截至六月底四個星期,Google雖然仲係保持七成四龍頭地位,不過「Bing」一推出都攞到百分之五嘅佔有率,另一個調查更指「Bing」佔有率已經升到去12%,你話Google點可以唔緊張?

講左咁耐,Chrome OS幾時先有得用?

要等到2010年.....仲要係下半年!

大家又唔使呾心急,呢個似乎係官方保守講法,有網上已經流傳Chrome OS嘅晝面。

喺台灣Acer一個電腦展銷會上,大家發現左有一部laptop,已經安裝左「傳說中」嘅Chrome OS,據現場人士講,整個安裝過程,唔使十分鐘,喺晝面下邊有一條Chrome bar,功能就好似大家用開Window嘅bar一樣,而晝面中間 chrome logo,就作為一個Menu功能。

當然,大家都唔能夠肯定,到底呢個晝面係真定假,不過簡潔設計又貼合Google風格。

目前全球有九成嘅個人電腦,都係使用微軟嘅視窗系統,經濟學人話,揀呢個時候出招,GOOGLE都計算得好準確,事關Vista 被判定失敗,Window 7又要十月先面世,如果搶先出籠話唔定有意外收獲!

不過無論最後邊個係贏家,兩間龍頭互相競爭,得益除左係消費者,仲有係目前陷入困境嘅科技行業,因為創新就係代表有新錢到!

豬八之曲終人未散

八國集團、同發展中國家展開領導人對話會議,首次發表共同宣言,同意將夥伴關係延續兩年。

雖然會議無提及匯率問題,不過中國就喺會議上,首次公開提出要改革「儲備貨幣」,並獲得法國公開支持,但德國就認為提議不切實際。

八國集團同發展中國家領導人,舉行對話會議後,雙方首次發表共同宣言決定喺平等基礎上,將夥伴關係延續兩年,希望可以建立真正嘅夥伴關係。

喺全球經濟方面,各國表示,會通過合作,確保全球經濟以均衡、公平、可持續的方式恢復增長,避免各國爭相將貨幣貶值。

不過喺和諧背後,各方就儲備貨幣問題,暗自作出較量。

代表國家主席胡錦濤出席嘅國務委員「戴秉國」,就當住美國總統「奧巴馬」面前,首次明確提出,應該要促進國際儲備貨幣體系嘅多元化同合理化,要保持匯率相對穩定。

而出符意外,法國總統「薩爾科齊」,係和應中國呼籲,指應該對貨幣問題進行討論,並向多元化貨幣體系邁進。

不過中國提出嘅呢個議題,就觸動左大國神經,英國首相白高敦就警告,任何有關儲備貨幣嘅討論,應該係著眼於長期,而家作出辯論,只會做成匯市不穩定。

德國總理默克爾更批評,中國嘅提議係不切實際。

金融時報話,今次中國嘅批評係要態出政治姿態,因為美元一旦眨值,對中國持有大約二萬億美元資產,並無好處,
咁做只係希望喺談判桌上,取得更多主導權。

要分散儲備風險,唔止內地,仲有本港金管局。

任志剛話,人民幣有機會成為儲備貨幣,而外匯基金對投資喺人民幣資產,持開放態度喎。

試想下,第日外匯基金帳目有人民幣資產,諗下都覺得有趣。

2009年7月9日星期四

大熱倒灶

所講PPIP,公私營合作計劃,經過近半年撓釀,終於出台。

包括「貝萊德」等九間基金管理公司,獲選參加合營公司,負責收購金融業有毒資產。

令市場意外嘅係,一早表態支持收購毒資產計劃嘅債券大王格羅斯、旗下嘅PIMCO,居然缺席,最終決定唔參與,就最令人意外。

想當日,格羅斯大叫「三贏」方案,事實上,這個方案他也是最早的始作俑人。

PIMCO表明理由係,有關計劃嘅設計同執行,會令合營公司前景唔明朗,但明眼人都心照,銀行既然都通過左壓力測試,加埋資本市場有改善,實際上可以出讓的有毒資產肯定唔會多。

既然都無機會,就索性參與寧願自己搵食好過。

至於獲選嘅九間管理公司有最多三個月時間,分別集資最少5億美元,加埋總額上限100億美金,投放到合營公司,財政部會投入同佢地股本一樣嘅資金之餘,政府仲會向合營公司
提供高達股本一倍嘅債務融資,即係話政府喺合營公司投資高達三百億美元。

呢間公司,將會向銀行收購商業按揭抵押證券,同非官方擔保嘅MBS,總值最多四百億美元。

當然這個額比起最初說的一萬億美元,已經是天與地。

蓋特納同伯南克都心知PPIP吸引力有限,不過就講明而家啟動計劃,係為日後市況一旦轉弱,而有所預備。

講到伯南克,出年一月底任期就屆滿,華爾街日報話,佢係咪再獲連任,好視乎蓋特納向總統奧巴馬嘅建議係點。

但報道話,白宮目前唔急於咁快決定,反而傾向睇下有無更合適人選,但唔代表伯南克唔會
獲連任。

白宮留意緊嘅人選,除左之前傳過嘅聯儲局理事耶倫外,仲包括前聯儲局副主席費格遜,以及白宮經濟顧問委員會主席「羅默」。

反而之前盛傳的薩默斯,因為為人過於囂張,可能大熱落馬。

網上賠率顯示,伯南克有六成機會連任,華爾街日報調查訪問左四十六名分析員,四十三個
支持佢連任。

但一旦經濟無預期咁好,伯南克連任機會,就會大打折扣。

原來到最後,都係睇個天。

怪象

七月又有怪象。

當一眾睇淡分析員被人責駡之際,好在仲有個任總。

佢話,金融市場表現同經濟背馳,要繼續提高警覺。

每周觀點指,經濟持續收縮,但股票不斷升,佢形容呢個係怪現象,外界雖然解釋係股市行先經濟,金融危機最壞時間過去。

但任志剛話,佢唔buy呢個講法。

最重要係經濟前景仍然未明朗,而佢隱約覺得,金融市場未充分反映涉及嘅唔明朗因素。

尤其係美國經濟未改善,信貸市場仍然緊張,呢的都係面對緊嘅問題。

任志剛話,市場往往比政府官員掌握更多實況(呢點又難得佢肯認!),但羊群效應亦往往令市場失效。

佢認為市場再出現系統性風險機會唔大,但佢亦唔排除市場表現再次大幅波動,同令人失望,再次令投資者損失。

臨別贈言,任總相信隨著中港兩地金融日益緊密,期望日後本港部分股票可以用人民幣交易。

佢話滿足到內地投資者需要,亦解決AH股差價問題,本港發展人民幣亦有大幫助。

任志剛話,呢個係目前兩地議題之一,但因為內地資本帳未開放,佢唔期望短期會達成。

至於未來,佢相信港元唔會被淘汰,但唔排除人民幣,最終會成為本港主要流通貨幣,好似目前港紙喺澳門流通一樣。

至於退休問題,距離任唔夠3個月,任志剛話,仲未諗去向喎!

豬八之打大鱷

有留意今次八國集團峰會聲明,用的字眼其實比起幾個月似乎悲觀了。

無討論到儲備貨幣議題,原因係經濟前景仲有暗湧。

八國與會領袖發表聯合聲明,經濟有趨向穩定嘅跡象,但前景仍然唔明朗,要達致經濟穩定,仍然存在唔少風險。

各國同意採取一切必要手段恢復需求、令經濟穩步復蘇。

因此目前仲未可以削減、大規模嘅刺激經濟計劃。

美國總統奧巴馬對於係咪要再推出第二輪刺激經濟方案,係留定後路。

雖然佢話再靠借貸去刺激經濟,並唔係有效方法,不過都同意目前投入嘅資金,未必足夠推動消費。

英國首相白高敦,更講明世界經濟威脅未解取,各國應該要準備第二輪嘅刺激經濟措施。

不過唔係所有與會領袖都係一條心,德國總理「默克爾」仍然貫切一向立場,認為需要盡快制定撤出方案。

結果聲明只能夠「各取所需」。各國同意喺確定經濟復蘇後,取消挽救經濟計劃,但進度就會因應本地經濟情況同公共財政、每個國家都會有所不同。

金融時報形容,今次八國集團峰會證明係另一次嘅失敗,實際原因都唔難理解,因為據基金組織估計,到五年後發達國家嘅外債,將會佔國內生產總值嘅114%,係發展中國家嘅3倍。
///////////////////////////////
對今次G8來說,仲有一個議題是幾大爭議。

油價近日升穿70美元後,已經再次成為警號。

原因不說也明,事關而家影響經濟復蘇,係死罪,而高油價亦扭曲左市場通脹預期。

歐美愈嚟愈相信,油價商品價齊升係投機成分多,正如上星期倫敦布蘭特期油,一個鐘內踢高三美元,最後發現係有壞孩子搞事。

結果,歐美一齊搞個口述雙響炮!

白高敦,同法國薩爾科齊,居然一齊聯署文章,刊登喺華爾街日報「意見欄」!

兩位大哥話,油價升好關注,因為令大家為經濟復蘇付出嘅努力,付諸流水,唔唔係辦法! 一定要加強監管!

這還不止,還要來一招裡應內合,美國商品交易委員會亦以超高調姿態,話準備全線限制石油,同相關商品期品衍生產品持倉上限。

歐美聯手打大鱷,到底係咪成事在人,不過外界似乎初步反應都係話,得個「講」字!

依家美國期油持倉上限唔可以過三萬張,但就算爆額,通常都不了了知,如果硬性執行,又式者將上限水平降低嘅話,都算得上係上策,減低投機。

係咪成事,亦要睇著大摩,同高盛。

原來,全球期油市場零七年利潤中,呢兩間公司已經均分左一半。

有觀察家話,兩大行,都舞高弄低期油,已經到達出神入化階段。

有留意嘅話,都知特別係高盛為例,連番報告,唱好油價,情況同舊年年初,油價火速上升時,公開話油價半年內見二百美金一桶相似。

目前就係為之前累積嘅好倉,尋求更高回報。

觀察家話,兩間行,加埋小摩,操控嘅坐盤交易,完全可以左右油價升跌,截斷佢地水喉,就從此天下太平。

不過呢個做法仍然有條尾巴留底。

首先,幾大行係市場莊家,限制佢地持倉,可能影響市場運作。

結構上,全球除左美國紐約,同芝加哥外,歐洲,日本、新加坡,通通都炒得油,限制係咪跨市場執行,亦係關鍵。

2009年7月8日星期三

一放就亂

多次傳出中央下令嚴格控制貸款,但六月分內地新增貸款仍然出符意外再破萬億。

達到1萬5千3百幾億人民幣,遠高於市場估計一萬至萬二億水平,係今年第三高。

半年累積,新增貸款有7萬3千幾億,逼近全年8萬億目標。

令人不解的是,數據原本要到周五先公布。

沿何要咁急公布?

貸款流入股市同樓市,觸發資產泡沬同通脹憂慮,銀監會亦提醒銀行,警告目前信貸風險過渡集中,可能會有系統風險。

金融界指,人行亦因此,罕有咁加大資金回購力度。近日回購力度,水平係今年最多。

28日回購利率,半年嚟幾乎無郁過,但過去一個星期就升左十點子,九十一日回購利率更加上到今年二月最高。

外界關注,回購利率上升,會影響市場利率遲下亦會提高。

係咪意味貨幣政策開始改變?

中金首席經濟學家「哈繼明」、就估計目前寬鬆貨幣政策,到左十一月尾、十二月初可能會面臨調整,但初期唔會係加息呢啲「硬措施」,更可能係會採取發行票據、「窗口指導調整放貸結構」等措施,加息就可能要到明年先會出現。

其實內地政策,一向都有一個弊病,就係一鬆就放、一放就亂、一亂就收、一收就死、一死又要鬆,結果周而復始,內地投資者都懂得如何與阿爺博奕。

同樣情況都係出現喺樓市。

限制第二套房按揭,成為當局令樓市降溫最新工具。

繼杭州後,北京、上海、廣州等地嘅銀行,都開始收緊二套房貸。有報道指人行,銀監已經下達要全面恢復執行第二套房按揭限制。

上海同深圳嘅房產人士指,業內盛傳人民銀行,下令要嚴格執行二套房嘅貸款標準,除左首期要俾足四成,貸款利率亦唔可以再俾折扣。

內地傳媒形容,樓市調控已經趨緊,但內地主流意見,仍然係當局只係想令樓市降溫,避免泡沬。

經過上半年高溫局面,監察全國33個城市嘅數據顯示,樓市交投係有降溫跡象,7月分到依家,樓市成交錄得上升垮市唔夠分一。

有分析指,內地樓市當前供應仍然唔夠,主要城市中,上海現時可供應貨尾單位,三個月內就可以全數消化,只有北京貨尾盤仍然較多。

因此,繼北京之後,相信地王會繼續出現。

國有奶

蒙牛被收歸國有,事件可以說是峰迴路轉。

中糧入股,蒙牛由一年前毒奶,變為國有奶,各方叫好,民族品牌國有化,成為一致唱好理由。

呢招即時刺激到大行嘅味蕾,美林同花旗立即CALL BUY,大幅調高目標價,只係淨返高盛細摩不為所動,叫大家沽貨。

大行合唱,蒙奶只係升左一日,仲要有頭威無尾陣,到第二日更要跌突7%。

似乎國有奶表現真係有的失威。

內地奶品公司,仍然設法擺脫毒奶事件陰影。

蒙牛對手伊利,就決定換LOGO,重新起步。

至於蒙牛,有傳毒奶一役,令佢地面對高達二十億人民幣資金缺口,所以決定一不做二不休,引入國企股東,有新資金之餘,亦將品質控制嘅風險,轉嫁俾國家,可以自保。

牛根生,似乎既有中國人智慧,同蒙古人嘅強悍決斷。

不過據內蒙中人透露,蒙牛實質資金一啲問題都無,問題係在於之前同大摩一分合約對賭,加上股價大跌,街貨又多,隨時被外資吞併。

話說八個月前,牛總已經知會出事,擔心無咗間公司,之後每見到有影響力嘅內地財經人,都好似細蚊仔、要買玩具咁,搵人幫手買。

傳聞牛總,有一日在一個著名企業家聚會上,遇上柳傳志、田溯寧、傅成玉等大批重量級人物,更一度淚洒「萬言書」,承諾就算將公司送俾兄弟,都唔賣俾鬼佬。

柳總亦深受感動,承諾協助蒙牛渡過難關。

說到底,就如當日萬言書所講,民族品牌已到了最危險時候,牛總要力抗大摩,就係成宗交易嘅精要。

佢見內地傳媒講得好白,話為咗對抗敵意收購,無辦法唔搵個策略股東幫手頂著。

為保民族品牌,不惜成為國有奶,中糧同蒙牛都話,交易一拍即合。

牛哥亦表明,志不在錢,交易後佢名下老牛基金套現嘅十億,會全數捐出嚟做公益。

一年唔夠,一朱、一牛、對外資態度,截然不同。

匯源對外資來者不拒,蒙奶牛就堅拒到底。

令人擔心係、祖國一方面外出四處收購,但係自已屋企就處處設防,自打保護主義招牌。

至於光明乳業,甚至伊利呢的民企,一旦被LABEL為民族品牌,要賣,似乎又係國有化收場。

2009年7月7日星期二

錯晒

上星期係人都講緊美國失業率、升至八三年以嚟新高時候,有一個人,原來都唔係好關心呢啲數據?

美國副總統拜登星期日接受ABC電視訪問時,都仲係未搞清到底失業率係9%,定係9.5%,你話死唔死!

唔怪得諾獎得主克魯明,都笑呢位副總統「到底知啲咩」?同埋「到底佢幾時先知自己唔知啲咩」?

克魯明再一次提出,要盡快推出另一套刺激經濟方案,否則到2010年,都唔會有起色。

今次佢有知音人,奧巴馬嘅經濟顧問「泰恩」首次提出,有需要推出第二輪刺激經濟方案!

奧巴馬經濟復甦顧問委員會委員泰森話,雖然首輪刺激經濟方案有正面作用,但效力唔足夠,時間亦推出得太遲,因此建議政府應該要準備第二輪刺激經濟方案。

泰森話,經濟表現係比佢地最初評估時候差,

舊年以嚟美國損失嘅職位就高達六百五十萬個,比起政府估計嘅仲要多二百五十萬個,失業率亦升至百分之九點五,
係八三年以嚟最高。副總統拜登早前都承認,係低估左經濟衰退情況,佢地原本預期第一輪刺激方案,可以令失業率控制喺百分之八以內。

說的是五個月之前的事,都唔係好耐之前.......

泰森有個建議幾好,指次輪經濟刺激方案應該要學習中國,出手夠快之餘,以推動基建投資、可以更快帶動經濟復甦。

其實爭議唔止出現喺官方層面,分析員之間都有好大爭辯。

好似摩根士丹利提出,「量化寬鬆」貨幣政策維持大耐,會刺激通脹,因此聯儲局要盡快撤出。

不過高盛就話大摩根本係杞人憂天,直情係「錯晒」(All Wrong),佢地唔相信聯儲局會令到經濟「一團糟」(Totally screw up),要撤出量化寬鬆就最少有十個可行方法,而家最緊要係先救經濟。

抵打

新股熱炒,再出現一隻虎珀(90)千倍超購個案,傳出要認購350一手,先肯定獲分一手。

趁熱潮再現,我地做左個小民調,搵出最不盡責保薦人........就係美林。

話明新股熱,逄新必升。睇下霸王,旭光、忠旺,股價都比招股價高三成。

就連定價過高,要搵中間人幫手嘅秦發,累計都升過一成。

相反,361度,有業務,有概念,但第三日就要穿招股價,累計升幅百分之三........都無!

保薦人美林係咪要罵先?

每有新股上升,唔少機構大戶都睇邊個係包銷落飛,以往瑞銀最差,近日外界對美林印象亦一般。

但老行尊話,買新股同買樓一樣,經紀唔包樓價升跌,等於保薦人,唔會寫包單,新股一定升!

上市後三十日內,都會有股價穩定期,當然保薦人角色就係護價,共識當然就係希望保得著個招股價。

再者,新股往往有Greenshoe,你個價「立」,行使唔到額外配售權,下次有deal,都唔會再遇你。

保薦人除左做盡責審查外,最慘係要兼埋Underwriter角色。如果武功唔好,派唔晒出街,就啞仔食黃蓮,要真金白銀包底。

為求創造記錄,唔少保薦人,都會夾埋公關公司一齊做勢,話咩大股東係富豪,又搵咩大孖沙入股。

熟悉CORP FIN嘅人話,一般保薦人都會托下價,以免得失客人,唔係下次無交易。

361度掛牌當日,美林唔止唔出來護價,版面反而見佢掛出唔少沽盤。

當然,美林事後解釋係股價未差到要出手,總叫做高過招股價。另一個問題係唔想自己變成揸重貨,仲敢撐?

當然你會問,最初講到咁巴閉,國際配售同IPO都超額咁多倍,到底係咪保薦人造嘅假象?

綜合唔同嘅線人話,新股喺上市之前,同賣新樓一樣,配售部份有時會有「水份票」,務求造勢。

同IPO唔同,配售部分唔涉及孖展,亦唔需要真金白銀出錢,大戶甚至可以抽飛,或者臨門減少注碼。

當投資者見國際配售爆晒,自然要透過IPO入飛,結果骨牌效應,再超額,就可以用以上限定價,炒高再出貨。

說到底,如果本身隻股票不值咁高價,就唔應定價咁高,結果只係為咗營造"鑊氣",一咪唱好,到頭來自己要接貨,抽到嘅又要坐艇。

2009年7月6日星期一

又到豬8

轉瞬兩個月,又到豬8日子。

星期三喺「阿灰拉」舉行嘅八國峰會,討論全球經濟危機同復蘇、氣候、能源、糧食等議題。國家主席胡錦濤仲會同美國總統奧巴馬會面,亦會同「發展中」國家嘅領導人集體會晤、包括印度、巴西、南非、同墨西哥。

「八國集團」峰會星期三會喺意大利「阿奎拉」舉行,俄羅斯及印度早已表明,希望討論國際儲備貨幣嘅問題。

令人意外的是,就連歐洲國家都對美元作為儲備貨幣問題亦有很大意見。法國經濟部長表示,喺金融危機同新興市場喺全球經濟地位加強嘅同時,應該探討中期外匯平衡政策同儲備貨幣嘅角色。

反而令人意外的是,中國在召開豬8前,反而態度軟化,外交部預期,嚟緊好多年,美元都係主要國際儲備貨幣,有關成立超主權國際儲備貨幣、唔係中國政府嘅立場。

這可以說是再次顯露我們中國「有收有放」的大智慧。

俄羅斯總統「梅德韋傑夫」亦喺會見到訪嘅美國總統奧巴馬前夕、話雖然以美元同歐元為主嘅國際儲備貨幣,有不足之處,但由務實嘅角度嚟睇,相信暫時「無嘢」可以替代美元同歐元,喺國際儲備貨幣嘅地位。但要考慮改善機制,佢地會考慮創立地區儲備貨幣。

講到歐洲,真正的主角其實要睇實德國總理默克爾,到底可以發揮幾大影響力。

當個個都話要繼續救市嘅時候,佢堅持,要收番部分非傳統嘅救市方法。

伯老伯南克佢都批評,認為英美央行大規模購買各種資產會造成另一波金融危機,呼籲各國央行回歸「理性的政策」。

佢提倡,維持經濟穩定增長,同加強監管,尤其銀行經營開始轉好,無以前咁支持監管,係好危險。

因為等到市好,仲難管。

呢幾點,默克爾唔止一次提及,正反映佢嘅特色,就係堅持。

作為德國首個喺東德成長嘅女性總理,佢多次推動自己信念。

包括,堅持唔去北京奧運開幕典禮,試過,對住溫家寶,提到西藏問題。

做過物理學家,致力推動環保問題,喺八國集團會議,曾經提出擴大「京都議定書」規模。

立場鮮明,但係咪做到係另一回事,好似救市措施,英美經濟仲係差,邊夠膽退市。

但多間金融機構恃住有錢還,想鬆綁,咁八國峰會即將召開,又嚟睇下默克爾嘅魄力。

2009年7月4日星期六

枯草

有網友提到丁校長的見解過分偏激,反而對其他分析員模稜兩可的意見更對投資有好的幫助。

可能過去三個月的股市升浪委實驚人,很多的經濟分析很多時變成了看似不懂時勢的廢話。

不過由克魯明、魯賓尼、When Markets Collide作者艾爾阿里安、以至本港的羅家聰、丁世民、黃元山都告訴我們綠芽其實只是枯草時,大家可以置之不理嗎?

事實上,經濟數據已經被救市措施扭曲得面目全非,根本難以辨認。

消費信心好了兩個月後,最新又再回落,而周四公布的就業職位,又將上月本已憧憬的就業市場幻想打破。

美國公布嘅就業數據,特別係減嘅職位,遠多過預期,觸發擔心衰退會延長問題。

美國六月失業率,升到百分之9點5,雖然比預期略低,但就係二十六年高位,就業職位就減少左46萬7千
分,比預期嘅跌36萬分、差好多。

雖然失業率一向被視為滯後數字,企業一般都是待生意好轉,人手應付不了才聘請額外人手,不過就業數據中的每周工時,其實都有一定前瞻性,原因是企業在增聘人手前,都會用盡現有員工的生產力,即係「做到你死」。華爾街日報說,最新的員工工時,下跌至每周33個小時,創下歷史新低。

更重要是失業率表面雖然只有百分之九點五、比預期低,不過這個失業率其實只是反映過去四個星期沒有工作、可以重返工作崗位、以及正在搵工的人。相反,如果單睇一個叫「U-6」數據,失業情況就可能遠比想像惡劣。

所謂U-6 ,是指正式失業人數以外,再連同其他口頭想找工、但沒有實際行動的人,以及目前統計上已界定為就業,但實際上只返緊兼職的人。如果用U-6的標準,失業人數實際上高達百分之16!

仲有一個不利數據是源自諾貝爾經濟學獎得主克魯明的觀察。克魯明話,除左削減職位令人憂慮,佢留意到薪酬
水平指數由舊年十月大跌左八成以上,由於物價指數通常會比薪酬仲要低,佢擔心美國會陷入日本九十年代式嘅通縮。

奧巴馬話,非常關注失業率上升問題,克魯明已經提出,政府需要第二輪刺激經濟方案,聯儲局幾乎可以肯定會繼續維持低息環境。

2009年7月2日星期四

IOU

美國加州政府陷入財困。

由於財赤累積超過260億美元,加上新財政預算案、過唔到州議會,州長「阿諾舒華辛力加」宣布當地財政進入緊急狀態,被逼罕有咁、發「借條」,紓緩銀根。

加州政府啱啱喺星期三,踏入新財政年度,不過,面對累積財赤加上州議會未通過新年度財政預算,庫房僅有現金,最多捱到今個月尾。

大隻佬阿諾舒華辛力加,被逼宣布政府財政進入緊急狀態。

這等於俾議會、個半月最後通牒,通過預算案期間,政府推出紓緩措施。

下星期起,23萬公務員每個月放三日冇薪假,變相減薪百分之14。

另外,州政府17年嚟,首次再發出為期三個月「政府借條」,總值約30億美元,代替現金,支付俾政府服務承辦商、同社福機構等。

政府遊說緊銀行、金融機構接受。

金融海嘯下,加州政府過去一年,稅收減少三成。

阿諾舒華辛力加主張進一步節流、減社福開支。

不過,控制議會的民主黨擺明玩嘢,堅持加稅。

兩黨角力下,未能喺新財政年度通過預算。

加州係美國最大州分,經濟規模,相等於全球第八大經濟體,財政出問題既話,會禍延全國。

但聯邦政府表明,唔會伸手幫加州,以免成為壞先例,甚至影響全國信貸評級。

除咗加州,美國有另外最少六個州分,都係喺七月一號,踏入州政府新財政年度,而未通過財政預算案。

其中,同樣是樓市重災區的伊利諾伊州、庫房財赤120億美元,數字上瀕臨破產邊緣。

至於賓夕法尼亞州,庫房赤字雖然少啲,只有32億,但州長建議,為咗平衡預算,居民上繳州政府利得稅,由百分之三,大幅增加到百分之十九,政府會押後還債外,當地大約七萬個公務員,今個月尾、有冇糧出,都成問題。

說回今次加州政府,要發借條,暫時渡過財政難關。

政府借條、正式名稱Individual Registered Warrant,但通常簡單啲,叫IOU、即係「我爭你」!

持有人可以攞著政府IOU,到肯接受既金融機構、商戶,兌換現金。

政府喺到期日,連本帶息,支付持有人。

加州政府喺92年,試過發IOU,規模大過今次。

發IOU,雖然可以紓緩銀根但州政府, 可能被調低信貸評級,而且要比市場,支付更高利息,長遠增加財政負擔。

計我話, 大隻佬唔好發IOU,索性改名做IWB = I Will Back, 至少可以比居民一個期望。

輪流轉

市況改變一切,投行解封,荷包再漲!

舊年雷曼出事,銀行隨即雙急凍。

包括凍薪、甚至減薪。以及凍結業務擴張,依家.....局部解封!

仲記得,年尾開始金融界裁員潮血流成河!

但中環界話,近月間間都搵人!據講,雙摩高層,早排向個別部門員工講明,唔使再炒人。

已經易手、的人走到家不成家嘅美林,依家仲要通街搵人!

BANKER再次水漲船高!零七年高峰期興起嘅兩年保證薪酬呢條「搶人橋」,近日德銀再搬番出嚟用!

講開投行人工,奧巴馬聽到可能吐血而死。

原來,部分華爾街大行,今年員工薪酬,可能超過前年高峰期。

先講「高」先生!前年佢地平均分到六十六萬一千美金。

今年!!不得了。高盛員工可能平均有七十萬美金!

分析員估計,大摩平均員工,今年每人袋廿六萬美金,同前年高峰期非常接近。

錢、對 I BANK嚟講,係萬能。難怪華爾街日報都話,I BANK死性不改!

講完薪酬解封!講下業務擴張解封。

銀行之前勁CUT COST,依家兩回事!

有企業,早排興DE-CENTALISATION,即係搬離中環,慳錢。依家,有首宗RE-CENTALISTAION個案。

將部分業務搬去IFC,就係渣打。

佢地租用左三萬八千平方呎IFC寫字樓,將成個GLOBAL MARKETTEAM搬過去,大大話話有四百人據講。

渣打近年愈做愈大地方唔見使!渣打GLOBAL MARKET阿頭話,見租金跌,所以搵個新地方!

但跌還跌,呎價要125蚊,比渣打零售銀行總部,即係觀塘貴一大截,睇怕consumer bank班手足,一定眼眼!!

2009年7月1日星期三

小心地雷

今天晚上聽丁校長分析,令我有更大信心對下半年轉為悲觀。

匯豐上半年年結,跌了百分之3。

高盛半年結,升左27%。

大家都會對兩間銀行的行事及投資方底心中有數,一間靠揸鑊剷,一間努力做好實務。

這代表什麼? 就是我們一直的理論,救市措施釋放的資金,只是流入資產市場,對實體經濟毫無幫助。

慢著,過去半年經濟數據有改善,Green Shoots好像隨處可見,股市半年結更是升到破晒紀錄。

有基金經理更形容,呢幾個月,為求追求回報,逼於表面睇好,骨子裡睇淡,呢種態度反而追到兩成幾回報,竟然係近年頭五大。

歸根究底,之前睇得太淡。依家沉醉復蘇,同通脹。

實情係,復蘇、通脹、美金跌資產價格沬泡係主流意見,金融圈偏偏提出三大猜想。

弱美元係主流意見,過去半年澳元,兌美元喺上半年升咗1成半。

英鎊都唔弱,升咗1成4。

新西蘭元就升到近1成3。

隨著近期數據反映美國經濟回穩,市場多咗人相信,美元喺下半年會走番強。

彭博問過包括德意志、美銀、富國同CIBC嘅大行,分析員普遍相信,美元短期會轉強,其中被認為分析得最準嘅德意志,估下半年兌歐元會升值得相當進取,更加會升值1成7。

德意志話,美國近期嘅經濟數據反映,復甦會快過歐元區。

有基金經理更加提出,你唔駛擔心炒復甦賭美元升值呢個概念,因為就算經濟保持現狀,市場都會認同美元係
安全避險嘅貨幣,有資金撐。當全球經濟轉勢復甦,美國亦一定係第一個走出谷底,所以美元點睇都係一個好
嘅投資咁話。

美金升,換言之,全球資金會重新調配!

而關鍵就係睇美債。雖然美金升,按道理係會帶旺埋美債,但美國大印銀紙,可能繼續令債息升。形成美金,債息齊升局面。

長息升,其中一個原因係通脹預期。

但金融圈第二猜想係提防假通脹。

油價由四月低位反彈四成六。正當全球商品分析員高唱商品牛市重臨,歐美著名能源策略網站就話,油價升借口太牽強。估計依家只係熊市反彈。

頭二大猜想係美金升,油價跌。

至於第三大猜想就係恒指超標完成目標。

無論依家仲係熊市,定步入牛市,基金界話,港股P/E唔算吸引。

調整日即將來臨,而按往績,第三季最高危。

而另一個變數係,過左半年結,熱錢會少量流走。

兩年前跌市前夕,大部分市場意見都睇好,包括大行,基本同依家情況一樣。

但同幾個月前唔同,大行唔再用零九年見底做睇好理由,而係將憧憬拉長,就話出年會更好,而里昂今日更揀出
十大好股,話揸到2012年,會更加好。

信唔信?
///////////////////////
講到經濟嫩芽有個統計都幾有趣,

呢個形容詞源自四個月前、由伯南克喺CBS專訪提出,過去幾個月被傳媒引用嘅次數多左七倍,Google搜尋次數更多達四百八十萬次。

有趣嘅係、無論係好友淡友都會用佢嚟解釋自己認為合理嘅現象。

有基金經理形容,Green shoots已經被濫用到令人「生厭」。