財經拆局

QE2結束。 未到蓋棺定論之日，因為仲未知有無下一輪。但QE 2嘅成績，總結一個字，係「無」! 最受惠QE 2係商品，結果捱窮嘅人多左，入貴油嘅美國人更加多，奧巴馬為保連任，上星期要用石油QE解決。 聯儲局鴒派代表耶倫話，無第二印鈔經濟會好差。但經濟有好過咩? 美國最新由CBS同紐約時報做嘅調查指，六成三受訪者話，美國走錯方向，有三成九受訪者更直言，美國已經步入長期經濟向下。 諗深一層，奧巴馬好，蓋特納好，並唔好過。撇開民望，只講救經濟，美國出名商界領袖多，學術成就出色，但幾年嚟，就偏偏度唔出一條設合美國形勢嘅救經濟絕世好橋。 離雜去去唔係印鈔，就係減稅洗錢。單係經濟規劃上，就真係中國叻些。你唔好理我地增長模式有問題，起碼數字上，我地贏九條街! QE一過，希債問題平息，金融市場下一個火頭，會唔會正係美國呢? 債務上限唔過，標普話美國評級會即時降至D，市場嘅表現已經證明，標普靠嚇!! 舉債上限呢個問題，已經令奧巴馬手足無措，甚至連兩個寶貝女都要搬出來，可見真係技窮，未來一個月問題肯定會繼續將金融市場舞高弄低。但嚟緊更需要留意，係美債情況。 高息債資金近日大舉外流，以為到美國國債避險。但市場反應快如閃電，明知聯儲局快將收手，美國國債近幾個交易日，亦差唔多買家絕跡。 於是，十年債息升番上三厘一樓上，債價過去幾個交易日，係日日跌。外面估，十年債會見番四厘半。 無左伯南克做「食債機器」，摩通估，私人機構投資者，每個月要買九百四十億美金美債，先可以維持國債市場供求平衡。 呢個任務，由私人機構接管，即係息唔高，佢地唔會買。美銀講到明，以目前債息水平，投資者頂多每月食百五億美金!!缺口咁大，絕對有理由令格羅斯相信，佢嘅推斷係正確，但衰左行得太快。 市場對美債胃納減少，從好方面睇，可能資金減入債市。但唔好忘記，債息不斷升，其實會死人。美債利率有條件推高市場利率，企業融資成本，以至美國樓按利率亦會通通向上! 市場風平浪靜，大家會質疑中國，市場有恐慌，歐美又會諗起中國。無他，中國就等於IMF第二。國家錢多，係咪會填補少量聯儲局買債角度呢 !! 但答案係，唔會。 華爾街日報話，國家隊原來靜雞雞減鎊美債三千億美金，即係平均每個交易日減廿億。相反，分析估計，國家隊五年內，歐債持倉數目，會增至五千億歐元。 所以，領導人已經作出棄美、取歐決定。默克爾，同奧巴馬之間，揀左前者!!

以為中西部地區，地方債問題告急，點知，連發展迅速嘅上海，都出現危機。 繼雲南之後，有傳上海市政府轄下、一家從事地產及、公路建設嘅城市投資公司，今個月開始，唔再向銀行償還流動貸款，仲要求銀行延長還款期，以及將筆錢，改為以資產抵押嘅固定貸款。 但公司抵押嘅資產，其實係政府大樓，同公路，根本無現金流。 如果公司最後都還唔起錢，銀行更加唔可以將政府大樓，變賣充公。換言之，政府帶頭，向銀行賴帳。 唔想賴帳，地方政府主要都係靠、加快賣地套現。 但情況都幾極端：地皮唔值錢嘅地區，可能要賤賣土地；但好似北京，土地有價，估計會不斷有地王誕生。 無形中，令樓市調控變得更加複雜。 有學者就指，地方政府橫掂，都係要借錢，與其向銀行借，會增加銀行體系風險，不如真係俾佢地發債，喺債券市場集資，咁做可以迫啲地方政府，妥善管理財政，增加透明度。 其實美林講得無錯，內地債務，壞帳問題，係下半年主題，呢個主題有排玩! 銀行面對黑洞，中小企貸款，房貸仲有地方債，大量資產負債表以外貸款。 按目前環境，樣樣都係觸及要害! 街外評論員仍然話地方債無事，中央一定救。救，唔代表銀行壞帳唔會升，不良貸款會繼續低於百分之2。 壞帳一升，影響資本，派息會減少，股本回報亦會拖低。 簡單講，內銀息高，增長快，貸款質素好既賣點，暫時成為過去。 但市場似乎仲未反映緊呢的因素，原來大家覺得唔會發生既事!! 中央可能好頭痛，３萬億美金儲備，學高盛奧尼爾建議，買曬希臘債，回報遠勝美債之餘，仲做埋歐洲救世主，多個朋友，本來係雙贏。 不過，溫家寶飛機回國途中，諗起地方債三個字，怕且呢筆儲備部份要留的俾銀行沖消壞帳! 十萬億地方債的確可控，因為就算加埋中央債務，頂多係佔國內生產總值八成，中國係內債，衰極亦唔會俾評級機構指指點點。 今次，有的似九十年代公司貸款既大規模板本。唔同既係，當年金額無今次咁多，而且唔少外資銀行牽涉其中。當日執一間廣信，整一間粵投。依家係領導人既王岐山，佢最清楚遊戲規則點玩。 王副總理當日，二話不說，大搞削債，大家有印象都記得寶哥哥幾唔高興。如果今次地方債，內銀唔使削債，似乎對寶哥哥，及當年一眾外資行，有欠交待! 但正如陶冬博士所講，地方債錯綜複雜。先抽離銀行體系，再整理，年內都未必搞得掂。但佢同事陳昌華亦講過，６至９個月搞唔清問題，中國軟著陸無望。唔通，滯著陸真係會發生!!!

豬其實係最聰明既動物，但豬遇上大鱷，結局都係一樣! 雨潤管理層有無豬咁聰明，唔知。但危機處理上，雨潤由於有經驗，連隨電話會議解畫，倒算值得一讚。 雨潤同玖紙，又或者嘉漢林業洗倉唔同。玖紙似乎洗得較為理智，一日大跌，大戶發現沽錯左，又買番。 嘉漢至少有份報告，同有加拿大報章指證，去亦去得眼閉! 雨潤...跌既原因，仍然係傳聞困擾，同憂慮，背後理據，可能大部份係舊聞。 本來已經唔係一隻上等豬，連日被洗，呢隻豬，難保終有一日會疲倦致死。唔係同情或者幫佢地，但雨潤問題，喺傳聞之下非理性下跌，有需要擔心，亦應該要正視。 最簡單，上星期累積沽空，上星期五更超過四億金額，即係話，唔少沽空份子，上周末日其實係等緊尋日既出現。 遮打大廈係咪好應該查番張買賣花紙，同借貨名單??!! 查唔查到係咪有人惡意搞事一個問題，最少要發出警號，話俾人知咪當我傻!! 年初民企問題美國搞起，嘉漢累「前賺錢之神」輸錢，玩民企管治差對西方嚟講，就更有新聞價值。 嘉漢林業、東南融通，中國高速頻道、民企接連被質疑帳目出現問題。連同上周五瑞達電源同雙金生物，今年以來取牌公司數目，增加到10間。 渾水係咪岩曬，嘉漢係咪錯曬，英國金融時報LEX專欄亦話，難有答案，但事件引證，保爾森由買嘉漢，到一股不留沽清，其實引證原來大戶都只係屬於羊群效應一份子。 令民企，或中資股嚟緊更難有好日子過，係正如華爾街日報所講，渾水之外，太多獨立研究機構為對沖基金效力。 以渾水為例，雖然唔知創辨人布洛克沽空賺左幾多，但四十頁既研究報告，半個月內令嘉漢林業股價跌左八成六，市值唔見左四十億美元，即係每一頁價值一億美元! 一，佢地不受監管。二，係佢地明知客戶係想沽空，所以有更大誘因玩弄小事化大，大事放大把戲。 三，呢的獨立機構，由於幫自己同大戶贏盡多仗，認受性，影響力或破壞力，可能比投資銀行仲要大! 呢啲研究機構要喺內地攞料，對象唔再係公司，佢地會同前公安、外交人員、記者甚至係特工人員搵資料，佢地會翻查呢啲公司喺本地政府登記既文件、註冊同交易紀錄，希望搵到「珠絲馬跡」，調查開支往往超過一百萬美元。 呢的獨立機構，名符其實係獨立。佢地網頁，地址欠奉，部份好的，有聯絡電話。由唔透明機構，去指責公司唔透明，其實都幾諷刺! 中環人話，遊戲未完。大股東持貨少，集資多，又或者營運模式最容易被懷疑既民企，好易成為對象。於是，近日的確多左沽空專家，四周尋求對...

避險仍然係市場主題，話中國硬著陸唔會發生，歐債問題講左年幾，美國大家都知咩事。但市場依家真係好驚 ! 係驚嚟緊唔知發生咩事，由驚通脹、到怕滯脹。但近日美債表現似乎更顯示，市場驚通縮。 格羅斯大錯特錯之處係沽盡美債，事關近日，連企業債，高息債資金都出現大規模外流，流曬入美國國債。 如果睇兩年同五年期美國債息，早前已經跌穿一厘半亦即係比美國核心通脹仲要低。 毫無疑問，美國國債睇到好多野。中年期債反映驚通縮，怕衰退。極短期美國國債，正正係睇到，投資者驚之 餘，為求避險，係不惜代價。 ３個月期美債，息率見過零。即係話投資者寧願唔收錢，都肯俾錢買美債。一個月期美國國債息仲恐怖，上星 期五，一度報價係負０點００５厘。 唔收息不突止仲要俾番轉頭。即係，為求短線逃避風險，機構大戶做左一個決定，就係向蓋特納繳交保護費。 美債無回報，美債俾溫家寶同多名領導人批評唔安全，不顧投資者利益，偏偏市場都要瘋狂泊錢入美債大碼頭 。就憑咁，其實投資者點有錢、點成功都好，都會做出精神分裂既決定。 市場愈恐慌，代表機會愈快嚟。希臘滅赤方案表決在即，依家最新版本係，由於執政黨多名國會議員轉軚，過 唔過到，關鍵只剩一票。即係，就算過到，有可能係一票之差! 但轉個角度，就算過唔到，市場近日嘅表現已經price in左。 否決，理智啲諗亦未必係壞消息! 當然，市場其實已經對好多壞消息反映有餘，但上星期廿八國聯軍可以一次過向全球倒六千萬桶油，證明由供 求主導既市場已死，呢個先係最大不明朗因素。怕，係人為力量會做出破壞自然既傻事。 如果咁諗，俾錢蓋特納交保護費，係合情合理。因為，次按未爆，到資金同石油QE，美國證明佢真係大佬。所以，做細既，梗係要買佢怕啦!

金融時報Lex話，星期三有一個本應很有影響力的機構選擇沉默；到星期四一個本應認為無咩影響力的機構卻選擇發言。 結果是世界大亂! 成立三十七年，第三次釋放石油儲備，西方主流媒體解讀國際能源署做法、係發達國家另一次聯手刺激經濟措施。 今次聯合行動集合左美國、以及全球二十七個發達國家，６千萬桶石油有一半由美國提供，日本、德國、法國、西班牙同意大利提供其餘大部分。 國際能源署話，佢地有諮詢過中國，但無表態有無參與。 油組喺今個月初曾經討論過增產，不過喺伊朗反對下，最終未能達到共識。 金融時報對今次行動解讀是、美國帶頭對油組作出報復行動，佢地話，以目前油價近日一直回落既趨勢，國際能源署根本唔需要釋出石油，與他們自己說因為利比亞內亂而損害了供求關係、根本全無關係，而咁做好明顯係考慮政治因素。 佢地擔心，在出盡所有貨幣及財政政策均無效後，政客最終會因為民粹主義而不擇手段，最終變成損害整個市場。 油組成員亦不是省油的燈，包括伊朗在內成員表示、一旦見到油價再跌、將召開緊急會議，到時可能會採取對抗措施以支持油價。 聯手刺激經濟可能是出於各國的良好意願，不過對美國總統奧巴馬來講、亦係一個必須為之的政治決定。 面對油價一直高企不下，有民意調查顯示，有四成半既美國人最關注、係油價對日常生活既影響，比例甚高於食品價格 。 算一算、汽油價格每升十美仙，美國人每日開支就要增加近四千萬美元，以美國人平均汽油開支佔整體消費近12%，油價回落的確對刺激經濟有不少作用。 當然，按美國每日石油消耗量、今次釋出嘅儲備其實只係夠美國用３日多啲。係咪真能夠舒緩緊張情況？ 不過更大的潛台辭是: 通脹率已經如08年回落，那面對經濟放緩失業高企，伯南克應可以選擇不再沉默……

真係有人會幻想過伯南克會「明示暗示」有QE3咁天真? 其實大家都心知肚明、以目前經濟「半紅不黑」的狀況，夾硬要由伯南克口中聽到有QE類似物體的機會率、根本就並不存在。 所以一早已認為，觀察伯南克的身體語言，肯定比佢講既更加重要! 結果，睇佢表現、簡直係不堪入目。 作為全球金融市場最有權力既人物，伯南克承認，佢都唔能夠掌握真正令經濟下跌理由。 "We don't have a precise read on why this slower pace of growth is persisting.......some of these headwinds may be stronger and more persistent than we thought." 令人費解的是、今次伯南克記者會不像上次有備而來，答一條擺明必中的QA，都會如斯吞吞吐吐缺乏自信，只會進一步加深市場對經濟前景憂慮。(抑或他真是演技爐火純青至此? 我不信囉!) 今年內第二下調經濟增長預測，一月時仲估計今年有3.9%增長，到四月、下調到3.3%，到今次會議，進一步下調只有增長2.7%至2.9%。 聯儲局的經濟學家真的如此不濟? 下下都錯成咁? 仔細比較睇番聯儲局既聲明，同四月唔同，幾乎所有對樂觀既字眼都消失: 勞工市場逐步改善換成比預期疲弱，又形容經濟復蘇比預期慢。 對於通脹評估，就取消左基本通脤緩和既字眼、換成通脹預期穩定。 伯南克未有提到今個月第二輪量化寬鬆結束後，有無其他新政策，只係話，今年情況同舊年好唔同，特別係通脹環境。 此言其實已經暗示，QE3的門檻肯定比一年前更高。 雖然伯南克都有派定心丸，話超低利率喺未來兩三次會議都唔會變，但觀乎對經濟前景的高度不確定性，加上大大黑眼圈以及鬼祟的眼神，其實已經反映連伯南克都掌握不了目前的經濟狀況! 諾貝爾經濟學獎得主克魯明批評，聯儲局一方面承認需要更多力度刺激就業市場、但同時選擇唔採取任何行動，做法消極，令佢覺得聯儲局可恥。 英美主流傳媒、都係以「經濟前景疲弱 刺激手段技窮」作為今次會議既標題。 華爾街日報話，同全球經濟快速增長相反、美國經濟放緩係令到聯儲局陷入兩難，估計未來一段一時間局內共識都係以不變應萬變。 金融時報就相信，面對經濟轉差、QE3始終不死，問題係幾時會嚟。 反而整件事最吊詭係債王格羅斯。 格羅斯早於聯儲...

聽了施老闆及李永權有關支持重建居屋的討論，益發令我們更確信政府有需要重新審視復建「居屋」的定義。 其實像肥仔這種絕對市場主義的人士，對復建居屋的最大保留，是擔心政府會重新透過「居屋」這種資源重新分配機制，再次資助一些擁有綠表資格的公屋富戶，做成更不公平的資源錯配。 對於這種憂慮，不能說沒有道理，所以正如李永權所說，過去居屋的歷史任務已經完結，焦點不再是讓富戶將佔用的公屋單位放出。因為公屋在十多年的政府政策優先次序下，已經大大增加供應、縮短了輪候冊時間。 所以新的「居屋」不應再以過去的白表綠表作為分配基礎，而是以一個全新、公平的Level Playing Field，讓真正有置業需要的中產/ 八十後，能夠在扭曲的樓市下，仍然有機會擁有物業、以至可以有社會階層向「上流」的機會。 至於如何將新的「居屋」分配予合資格人士，施老闆有不少創意之見，特別是居屋日後「不可租、不可賣」(當然應有回購機制/ 售予合資格人士)，社會當然可以繼續討論，但說到以「價高者得」的篩選準則，恐怕又過於政治不正確吧? 對於所謂合資格人士，我們認同應設定一最低入息標準，之後再設定一最低入場費(如五至十萬元)，以杜絕貪取便宜人士，之後再以大比例折讓(如五成市價)，將物業售予日後合資格人士，而單位除自用外、亦只可以再轉售予其他合資格人士。只有如此安排，方可以減少過分補貼、同時又確保能幫助有需要的人士。 居屋肯定是未來繼續會引起熱烈討論的議題(看留言就知!)，我們相信社會應有更多討論，令真理可以愈辯愈明。

安東尼波頓到底係英雄，定係英雄遲暮!! 無人敢講，但至少呢一刻，佢符合武合小說入面，英雄既特質，就係寂莫。 佢話失望，但仍然樂觀，一年係白廢左，安東尼仲有兩年希望。當日對中國有希望，唔止佢一個，但愈嚟愈多原本同安東尼一樣既樂觀派，已經離隊。 中國有谷大經濟能力，但玩資本主義呢個遊戲，絕對唔及歐美。你地不斷話人民幣會升，但華爾街日報報道，大戶原來已經開始變陣，沽空人民幣。 沽空原因係仍然覺得內地有爆煲可能性，透過境外沽不交收遠期人民幣合約，萬五蚊美金成本，可以沽空相等於一千萬美金既人民幣! 那豈不是等同當日沽空次按? 如果人民幣要跌三成，淡友獲利八十五萬美金，回報係五十五倍，本少利大，機會雖然未必高，對大戶嚟咪當買六合彩。 安東尼雖然話繼續樂觀，但有留意佢對每日電訊報訪問，其實暗示會沽貨。點解!?? 佢認美國上市民企令佢輸錢，第二，佢嫌旗下組合股份太多，由最初諗六十隻，搞到依家百二隻股份。承認錯左，所以會減少持股數目，希望集中的!!! 作為高手，當然祝佢好運。但佢要驚，其實唔係硬著陸，因為內地既強勁，兼臨近換屆，絕對唔會俾經濟大幅下滑。要擔心，正正係惠譽講，由銀行體系引發既潛在危機會出現。 地方債問題我地講得多，有留意廿一世紀經濟報道，原來堂堂首都，依家都可能無錢還債。 事關，零九年借落二千五百億土地儲備貸款，踏入今年係還款高峰期。單係每個月還嘅本金同利息，就要一百億，足夠買一架全新波音機! 但今年頭五個月北京賣地收入只有二百五十億，簡單講，只係夠畀兩個半月息! 土地儲備貸款，其實係提早將土地收入套現，再做其他開支。北京依家面對問題，好明顯，正係解決地方債，同調控樓市之間既矛盾縮影。 控樓市，令土地收入大減，推保障房令賣地意慾下降，地方無錢還，又點解決地方債。問題係，寬樓市，會引起社會不滿，任由銀行壞帳上升，又令金融市場震盪。 呢個炸旦點拆，好考功力。 要選內地銀行最佳分析員，非劉明康莫屬，零九年到依家，佢言論，佢行動，一早講左俾你知，內銀有問題。 當然，內銀唔會死，因為國家外匯儲備夠食曬所有壞帳，但市場依家先岩岩有的保留，遲下如果慢慢反映呢的利淡因素，咪即係未跌夠!! 似乎唯一指標係社保基金，呢個負責百姓養命錢既機構，準繩性極高，有佢地一日繼續減持內銀，大家識點做!

今天有關建行傳出兩個傳聞: 美銀減持傳聞雖然金額龐大，但沒有什麼新意。 第二個卻頗聳人駭聞。 內地資本市場傳出、六月以來建行一直都處於缺錢既狀態，特別係喺上繳準備金率既時間、建行都未有拆出資金，令中小型銀行更難過關，加上六月底銀行進入業績「考核期」，令佢地更唔願意拆出資金，導至拆借市場大幅波動。 結果七日利率升上八厘八水平，較星期一高接近一厘，甚至比年初水平仲要高，隔夜息就升穿七厘樓上。 面對大行亦缺錢，人行亦要緊急「輸血」，曾經對20間銀行，進行定向逆回購，向佢地買番手持部份票據。 這又反映了內地政策矛盾的兩面: 既要收緊銀根、但又擔心企業借不到錢會連環倒閉! 而更深層次係反映內地資金鏈開始有斷裂跡象，令舊年內地要完成供股集資，估唔到咁快，再融資年又重現。 原來，包括大型銀行在內，好多間上半年已經低調發行次級債填補資金，當中建行最多高達800億。加埋招行好可能啟動供股，集資600億，至少14間內銀股，今年又喺市場融資5千億人民幣。 不停集資，一來係貸款增長過快，兼要配合銀監會提升資本比率要求。 兩年嚟，攞左超過兩萬億人民幣，呢場內地融資遊戲，似乎未完。 點解? 因為未來有太多黑洞要填補。 地方債2-3萬億，佔GDP 總數7%，肯定大過08年美國TARP 規模，當中唔知幾多有問題，銀行又要「咩」幾多。 如果樓市跌，瑞信話，假設房貸有一成半有問題，咁大約又有九千幾億潛在壞帳。 未講完，中小企財困，現金流傳出急劇下降、情況再差，銀行又要預多筆壞帳。 講到呢度，內銀資本多，再唔係賣點。 Red Capiatalism兩位作者更提出，要留意係08年四萬億刺激經濟大計，變出近廿萬億新增貸款。 貸款多咁多，但舊年，前年，內銀不良貸款比率不升反跌，無人明?? 但大行相信到後年，內銀整體不良貸款比率會升至超過百分之二水平。 憧憬欠奉，黑洞存在。

翻查 舊Blog ，原來我們早於去年三月，已經提借需盡快恢復居屋以平衡樓市供求: 「天真以為用每年增減居屋供應來調控樓市當然不可行，但房委會可以提出一個較長遠的供應方案，列明每年提供若干單位數量居屋........最少可以紓緩部分中、低階層的置業需求。 畢竟，政府作為一個社會利益再分配的執行者，可以透過稅制、以至基建投資，彌補私人市場的不足，下下都話政府干預自由市場，似乎經歷過金融海嘯後，講法已經不合時宜。」 當時背景是剛推出的預算案，公布一系列穩定樓價措施後，但樓價升勢一直無停。 之後樓價表現如何? 2010年整體升21%，不過地產股當時只升百分之二。樓價今年頭五個月，升13%，地產股更加要跌一成二。 即係，市場的聰明錢，已經知道沒完沒了既特區會胡亂出招的破壞力。 最少三次收緊樓按，兩次加印花稅，一次再收特別印花稅。又再限制打擊炒樓政策，例如個人名義樓花唔俾摸貨。內地投資移民又唔俾買樓。 如果真係對症下藥，就唔好導致胡亂出招出現。邊個話地產霸權，政府買佢地怕? 大曾領導之下，創出光輝一頁，係亂招不斷，樓價不跌，但地產商怕怕。 曾經何時，鄭局長話，家家有層樓、資助市民唔係政府政策。但政府用行動講明，今日係政策，明日可以唔係! 感激王光亞，明讚澳門，實彈香港，居屋搞珠歷史性鏡頭，有望重演。 港官對澳門，特別敏感。有得派錢，正係澳門創出。唔好忘記，當日胡主席，向董先生講一句查找不足，最終有人要腳痛，事發地又係澳門! 今次港澳辦話係大曾房屋政策唔夠濠江好，又係喺濠江發言。 對希望榮休嘅當奴，令居屋復活，雖則由佢拍板，但手尾下屆負責，呢條又係絕世好橋，幾乎可以拍得著當年英國人留返個資產泡沫炸彈比老董、有異典同工之妙! 老實講，居屋訴求大大話話講左兩年，依家先聽到?? 居屋殺傷力，有無部份分析員講得咁大，屬見仁見智。如果一次超多，當然有。但復建係有必要，因為私人市場價格太唔符合基層因素，買唔起樓，唔係一個問題，但因為樓市，造成既社會問題，先係最大問題。 到底居屋翻生，起幾多好? 的確考功夫，太多有問題，太少又無誠意。唔好忘記，十月就算話起，以政府撥地，規劃效率，三，四年後既事。!! 用供求分析一樣有問題。因為，樓市同資產市場一樣，從來無供求平衡呢樣野，樓市複雜在因為影響民生，所以政府當日明知需求大，但視而不見，已經犯上極大錯誤。 如果政府一早做居屋，同時再增加土地供應，樓市未...

忍了一個星期不說希臘，其實就是等待今天的一刻。 那些甚麼評論社論說希臘違約會觸發「雷曼事件」，對不起，我認為是廢話到極點、簡直是無腦之至! 雷曼之所以觸發連鎖崩潰式的效應，不是因為雷曼規模大又或者涉及銀行者眾。 真正令雷曼事件可以做成骨牌式崩塌，是因為所有交易對手對這個百年老店，從來沒有懷疑過! 結果一旦出事，整個金融系統的互信頓時灰飛煙滅，所有交易對手頓時變得不可信任，人縮我縮之際、結果就觸發了大蕭條。 到今天，你告訴我有交易對手會而家先對希臘信心盡失? 咪玩啦! 當然，不能說希臘事件對金融市場沒有影響，因為五月以來，全球金融市場蒸發了四萬億美元的市值，港股更是跌穿了二萬二，可謂元氣大傷! 不過我更信這中間只是一個中期震盪，你甚至說是大戶做手腳我也不會反對。 今天令市場氣氛有咁大改善，主要是因為德國總理默克爾、同法國總統薩爾科齊見記者時，在解決希臘債務問題上，默克爾終於說出立場同法國一致，希望獲得歐洲央行支持，以「維也納」方式解決。 所謂維也納方式，即係債權銀行自願性買入希臘新嘅債務，但唔可以要求額外風險溢價，變相以延長債務形式解決問題，雖然仍可能會被指係違約，但債權銀行似乎無需負上巨債，終令市場紓一口氣。 明顯默克爾將歐央行拖了下水，就是不想再糾纏於私人持分者到底仲有無需要負上損失，至少歐央行肯定可以作為最後貸款人的角色。 國外獲得支持，希臘總理帕潘德里歐面對國內反對勢力，亦決定孤注一擲、除左舉行信任投票外，亦加快重組內閣，將一直被認為係制定削減財赤既總設計師、原財長「帕帕康斯坦丁努」會調任環境部長。 財長嘅職位，就會由國防部長「維尼則羅斯」接替。 維尼則羅斯喺國內政壇上、有好大權力，雖然無擔當過金融事務，但佢上任將代表帕潘德里歐好大機會可以通過今次投票。 老實說，希臘目前欠的債務只有數千億美元，對於全球一個月內就唔見了的四萬億美元市值，實在不值一提，亦不見得會真正連累銀行有很大的撥備。 你可能會說，聯儲局前主席格林斯潘不是認為希臘好大機會違約? 仲指，可能會拖累美國銀行業，令美國出現衰退? 係囉係囉，我想問，今天的格林斯潘……..仲有公信力嗎?

對於今次Prada上市，主事人聰明地以大中華慨念作為賣點。 Prada說，揀香港上市，是因為毗鄰全球增長最為迅速的奢侈品市場--中國。 不過令人費解的是、Prada全中國只有十四間店鋪，還不及東京一個城市的數目。 Lex說，Prada大規模的擴張計劃，如果目標是要填補全球網絡中的空白-這個品牌最少在斯德哥爾摩、巴塞羅那、布魯塞爾以及俄羅斯或巴西的任何城市，都是沒有開店。 而且將店鋪開到中國的所有角落，其實沒什麽意義，因為中國人大部分都是在海外購買Prada，以避開高稅率。 當然，半山有全球最貴的豪宅、廣東道有世界出手最豪的買家，那Prada 選擇香港，其實就是希望這些喜愛的買家，也會購入一分喜愛品牌的股分。 不過好可惜，這個如意算盤未能打響。 原因? 賣袋、賣鞋要爭客、其實連賣股亦都一樣睇價錢。 如果質地差唔多、當然係平貨多人爭，呢個道理、投資界都認同。 結果、同期招股、FERRAGAMO贏左一仗。 要價錢吸引、PRADA臨時變陣，同新秀麗一樣，收窄招股價範圍，之後再以下限定價。 集資規模亦由26億美金，縮到21億美金 市盈率、最終都做到23倍，同香港上市嘅品牌股、平均值22倍比，拉近返。 同LVMH的18倍、Gucci 的13倍、仲係貴好多，同而家FERRAGAMO最終會以中間價、甚至下限定價，市盈率、最低可以造到16倍附近。 作為意大利最後兩個獨立品牌，當日、PRADA為左拎更高嘅估值嚟到香港，受到意大利銀行界質疑。 相反FERRAGAMO選擇留喺米蘭，集資五億歐元，但並非放棄大中華市場、反而搵左九倉吳光正做盲公竹拓展內地市場。 歐洲傳媒形容，FERRAGAMO上市空前成功，相反進取既Prada最終逃唔過減價命運。 過去十年、提過多次上市、但唔成事。 主因係PRADA話事人，唔想減價，不過、遇著全球市況不穩、Prada都要轉變策略。

核心通脹升到五年最高，工業生產只係升百分之0.1，兩個數據夾埋，正係伯南克最擔心的夢魘: 小型滯脹格局已經初步形成。 美國５月嘅消費物價指數，按年升3.6%，係08年十月最高。 更重要係扣除食品同能源價格嘅核心指數、喺汽車價格、酒店租金以及服裝開支推動下，升幅係五年最大升幅。 雖然核心指數既水平，仲係低過聯儲局通脹目標百分之二水平，加上部分推高通脹原因都係短暫性，好似係汽車供應鏈只係受日本地震短暫影響， 不過金融時報話，由舊年十月開始已經形成既通脹預期，趨勢會繼續向上，聯儲局已經唔能夠好似舊年第三季一樣、再推行量化寬鬆。 唔止主流傳媒，美國人一樣對前景無信心。跟據華爾街日報同CNBC既調查，有一半既美國人、認為經濟已經陷入新既衰退。 大摩主席羅奇喺金融時報撰文，形容美國經濟而家就似一個「喪屍」、原因係佔左經濟七成比重既消費者，仍然係勒緊荷包。 由08年開始有13個季度、消費開支增長都係少過百分之零點五，羅奇話係戰後以來從未見過。 佢認為，要令市民重新提高消費、就要先降低佢地既債務同增加儲蓄，不過喺樓市同信貸未有起色，呢個過程非要三至五年時間先可完成。 而「動物精神」作者席勒、更判斷美國經濟有重大機會衰退。更慘係，通脹數字高過預期，美國莫非真會衰到滯脹呢!! 美國可能玩違約，錢都要局泊，情況古怪。試問，如果美金，美元資產仍然係避難貨幣，唔該睇下，美國近期企業債，已經被沽到血流成河。 相對高息債唔要，要再熱捧美國國債，即係投資者預視，未來有大件事。 同埋，要留意，係市場開始對交易對手風險，提高警覺。最簡單例子，係歐元，同美金拆息，近幾星期已經陰啲陰啲升緊!! 更令人恐慌是、港元跌至三個月低位，美電今早初段已經升至７點７９５水平，歐洲時段，港元沽盤進一步增加，美電升穿七點八水平，急升近五十點子，貼近弱方兌換保證範圍，係今年三月底以來最高水平。 初步看來，市況調整，兼且避險升溫，多間金融機構先後拆入美元，沽港元。平均每宗交易三至五千萬美金，相信係因為歐債危機再次惡化、令資金平倉避險。 咁既市況，雖云「物極必返」，但現階段無謂太搏，況且輸錢唔緊要，只要今年負回報低過兩成，咁成績通通跑贏約翰保爾森，幾威!!!

人行遲遲唔願意加息，但現實係民間早已調高借貸利率，即使好似係溫州呢間富裕城市，民間利率已經飊高至四十厘，但更多中小企係願意比息都借唔到錢。 瑞信陶冬批評得好、指出呢個現象正係人行(抑或溫總、甚至更高層次?)貨幣政策失誤做成。 現實係調整貨幣政策以嚟，人行只係識加準備金，雖然收緊流動性有效，但完全干擾左銀行既借貸機制。 變成大銀行只係會向大客戶同國企貸款，令中小企進一步面臨信貸緊縮，未來十二個月應收帳可能進一步上升，最終損害經濟。 陶冬重申，不斷加準備金，令佢覺得內地經濟風險升溫，但當局唔會放慢收緊銀根，一旦有硬著陸跡象，反而會傾向用財政政策應對。 法興更加表明，人行一方面想向外界繼續發出收緊訊號，但最終都係無用到最有力既政策工具調高利率，只係證明人行根本無力控制利率升跌。 經濟內部矛盾重重、但更多關注係經濟會唔會出現硬著陸。 的確、五月固定資產投資上升左百分廿六點七，表面係解除左經濟放緩憂慮。 不過紐約大學教授魯賓尼話，呢個係假象。 佢最近由上海坐高鐵到杭州，列車有一半座位係無人坐，全新既車站有四分三地方係空置，同一時間，上海到杭州仲有高速公路同航機，佢觀察同樣係四分之三空置。 魯賓尼話，過去六十年既歷史證明，經濟硬著陸最大原因係過剩投資，而佢相信內地愈來愈大機會喺2013年會出現硬著陸。 雖然一直覺得魯賓尼是名過其實、不過今次他提出的重複投資、以及產能過剩問題的確是目前內地最令人憂慮的問題。 中央都心知肚明，不早日將目前投資佔GDP過半的現象扭象、早日擴大內需，經濟是遲出會出事! 今天大家都以為硬著陸只是一個笑話，FT 的 Martin Wolf就提醒我們: 要重溫90年代的日本故事。 日本的人均GDP，由50年代較美國只得五分一、跳升到90年代幾乎同美國看齊。 當日日本就像一個經濟奇跡，又有誰想到今天這個比例跌至76%? 中國表面風光，不過Lex已提出，缺乏年輕勞動力(中國15至24歲人口縮減速度是日本兩倍)、資源消秏嚴重(人均僅有0.089公頃耕地)、食品價格飊升做成的社會震盪(近日就經常出動防暴警察平息群眾事件)，這些危機都是迫在眉睫! 我信領導人亦明白目前困局，但又要保經濟抗通脹，又實在是Mission Possible! 所以，當下次我再聽到硬著陸三個字時、大概再不敢過分掉以輕心，會認真聽聽對方理據。

中國呢條巨龍，既複雜，亦難明。無疑佢係巨，但大，不代表富，亦睇不到強。 巨龍思想複雜，有時自相矛盾，更擔心係巨龍入面五臟六腑出現互不協調。 以為通脹見頂，經濟疑似硬著陸，諗著收緊政策鬆手，點知佢偏偏就加俾你睇! 以為放慢收緊政策，美林陸挺即時輸曬。陶冬、屈宏斌預測暫時領前，當中又以陶冬早上企硬最勇，仲大大隻字話通脹係一個「未完結故事」，頓時令人肅然起敬。 所以日後參考大行內地分析，大家知點揀!!! 眾所周知，人行加準備金率係為左對沖新增外匯佔款，至於去到21.5%，同之前人行研究員提出既22.5%上限，只有一個百分點距離，到底有無好似小川行長講既上限，大家只有繼續觀察! 但更值得研究，反而係人行點解揀喺下晝三點十八分廿五秒公布，時間之早，似乎破盡記錄。 丁世民講得岩，就係咪以為數據有反映經濟放緩跡象，我就手軟! 從另一角度睇，人行咁做亦係對市場負責。 點解? 因為內地市太多自以為聰明既傻仔博大市升，香港亦係。趁你香港仲未收市，拿拿臨加，至少對一班買政策放鬆既大小戶，盡曬道義，俾時間你沽貨好，再諗清楚亦好。 宣布加準備金既時間，亦可能顯示巨龍五臟六腑有不協調。無他，內地情況，外圍形勢，已經令不同部委再劃分成保增長、同抗通脹兩派。 為免再重演舊年放慢版，遲收緊既錯誤，領導人仍然最驚係通脹，因為物價不斷升，民忿不斷增，呢個風險依家冒唔起。 於是，為免不同聲音，有不同幻想，國務院拍板，人行提早宣布，呢個舉動，可以理解成政策上擺姿態，就係話俾所有人知唔好亂諗，唔好亂發聲，抗通脹，仍然排喺保增長之上! 單憑五月數字，判斷經濟係軟陸著、定硬陸著似乎太早! 不過令人失望係食品價格仲係升，零售銷售數據證明，擴大內需仲未行得通，增長高低，仍然要靠最原始既固定資產投資。 正如不少外國觀察家所言，固定投資增加、正係反映地方將資金亂投，既無效益亦不能造就人群幸福，呢樣正係中國經濟到今時今日既可悲。 唔少外界分析，對中國經濟的確好有信心，信中國故事不死。作為中國人，的確希望國泰民安，但當前，十三億人呢個經濟體系，其實軟實力一直欠奉，硬實力亦開始被質疑。 譬如想高增長，又想低增長，已經係基本矛盾。譬如，要控地方債，想控制信貸，又要谷保障性住房，又係矛盾。又譬如，銀監要推動番中小企貸款，同控制不良貸款比率，小川同時間、不斷增加準備金，正正同銀監目標背馳，仲要將問題谷爆。 換句話講，一兩個月既經濟...

外資巨企對大中華市場，既愛又恨心態，矛盾之極，仲令人費解。 咁係，鬼子佬一時一樣，打倒昨日的我例子太多。曾經何時，話香港空氣污柒利害，講到員工就快死，要盡快般，點知一個屈尾十，咪出現更多公司、更多西人駐港! 亦係曾經何時，話內地翻版盛行，唔尊重知識產權，大家仲記唔記得，當日有幾多間品牌，話檢討內地市場策略。今日....個個都想嚟上市。 講到底，西方人更了解資本市場核心精要，就係學識「搵笨」，鬥快搵到人笨將風險轉嫁，自己先行獲利，咁先係贏家。 你話中資民企，冒牌科網高估值，到美國上市，係一場騙局，搵人老襯，何償唔係由西方資本，利用香港市場搵番你笨。而且人地玩得更精、更高明! PRADA廿八倍市盈率，係香港先得。人地叻，明知意大利名牌市場分額唔高，香港就唔同，個倨當係寶，因為我地無品牌，更重要係無國際品牌! 結果人地嚟，我地受寵若驚，PRADA仲叻到連番抬舉，主席「繆姐」連中國人身型靚都搬出嚟講埋。 仲話Prada入面團隊就有唔少設計師係來自中國，唔少設計對佢都係有啟發性。 相比之下，歐洲既設計有的過分保守，流於八十年代風格咁話。 講咁多，其實係禮尚住來，多謝呢度咁多「水魚」，可能令佢地廿八倍市盈率願望達成! 其實Prada上市都係幾經典，先有2001，跟手又有2008，每次都代表一個經濟周期終結，今次都唔希望佢再胎死腹中...... 好橋唔怕抄，曼聯美國班主就學識。 曼聯擬似來港上市，雖然仲係喺得個講字、未落實，但已經有收宣傳之效，成為國際新聞。 但曼聯依家，已經唔係賣俾美國人之前既曼聯。事關，美國佬一早注入大量債務，令佢地只係一間還債機器。 面對下一個球季，轉播權收入會少咗兩成半，近年仲不時有賣盤傳聞。 舊年先後有卡塔爾王族、高盛資產管理主席奧尼爾聯同其他支持者組成嘅「紅武士」組織，同樣傾過、都買唔成。 格雷澤的確有料到，因為以英超兩個字，倫敦上市毫無賣點，整個有上市既英超板塊，股價不振，因為間間蝕錢，紅魔鬼要包裝成為一隻紅天使，無辦法，東來上市係不二之選。因為大家同樣會當佢係寶。 簡單講，曼聯真係香港上市，又會係搵笨事件，唔好忘記十五億英鎊左右估值，係格雷澤當年入股價近倍，英國傳媒太熟佢，已經睇穿，佢係套現離場格。 況且以曼聯既債務，同不成比例既收入，其實，同伯明翰又有咩分別? 祖國冒牌貨四出搵人笨，人地有國際品牌賣點，做檔箭牌搵番你笨，聰明既投資者，似乎要睇清國...

股市既野，無人估到，全世界預包括丁校長都預計恒指要八連跌。點知玩倒升，仲要全日高位收市，你吹咩??! 利好消息欠奉，利淡因素密集，但唔好理，太多不利因素，去到一個階段就會變成憧憬利好因素既催化劑。 內地未出CPI，先有新增貸款，數據一出，市場又有新解讀。 人行先後八次上調準備金率、四次加息，令五月銀行新增貸款比四月少左兩成半，亦遠少過市場估計既六千一百億少。 更令人觸目係貨幣供應Ｍ１Ｍ２增幅亦雙雙回落，廣義貨幣供應增幅係08年金融海嘯以來最低! 雖然居民消費價格指數到六月會「破六」，但預期下半年可望回落，市場又變成擔心調控「過籠」，「壓通脹」變成「硬著陸」。 瑞信陶冬話，數據突顯增長風險，特別係現階段唔少中小企都開始面對信貸貸緊絀，硬著陸既風險係愈來愈高。 跳過一個大海去到彼岸，無咩公信力既末日博士魯賓尼話，另一個「完美嘅金融風暴」正在形成。 依他所言，美國持續財赤、中國經濟放緩、歐債重組以及日本震後出現滯漲等因素，夾埋豈不是世界末日? 但更令人觸目係前美國白宮經濟顧問薩默斯，以佢分量，一言一行都有「微言大義」，何況是在這個風雨飄搖的日子...... 面對超過十四萬億美元既國債上限死線將近、評級機構又相繼提出警告，薩默斯仍然勇於呼籲、政府而家要做既、係增加，而唔係削減開支!!! 薩默斯喺金融時報撰文，促請政府將舊年既工資稅減稅計劃延長一年、並將薪俸稅既稅率，由目前既百分之二，進一步提高至百分之三，同時將僱主納入減稅範圍，預計涉及二千億美元，另外未來幾年亦要透過增加基建，額外投資多一千億美元。 說來又是，以14萬億美元國債，加多二、三千億美元又有甚麼問題? 更重要是Summer提出左、為免美國陷入好似日本八十年代既迷失十年，政府目前要撤出財政政策係言之過早。 咁仲唔係為下一輪措施、八月國債死線、以至年尾QE、甚至明年大選鋪路?

唔夠兩年，金管局第四度收緊按揭成數。 以陳總思路，似乎認為只靠一招就可以橫行天下，盡收天下炒家:一味收緊，就可以令銀行體系健康、樓價又再無彈升動力，但實情只係令有樓無樓一族社會分歧進一步拉闊! 所以說政府是太慢，犯太多錯，太多例子，每次對策，唔係解決問題，而係拖延問題。 梁錦松講過，商界習慣係，未有問題就要發現問題，盡快解決，但政府無咁既本錢，再怪政府樓市政策乏力，其實係唔理解從政人的核心本性。 中原指數破百，樓價破九七。政府出招控樓市，講到尾就係為數據打工。 數據升，要逆周期，數據跌，又要調轉。多次出招，到今次，成效係點，已經唔重要，但政府有能與無能，有幾點，可以傾下: ! 曾特首定調，樓市係乾升，乾升即係價升，量少。呢種陰乾式升市，用喺股市，唔會有大戶理會，亦唔會成為指標。 換一個道理，既係樓市乾升，炒風欠奉，升咪由佢升。結果，按揭一收再收、變成依家有實力，有現金，繼續可以買完再買，轉樓，但要上車，就成為代罪羔羊! 可悲! 陳德霖話，樓市風險高，連續多招，變相叫你唔好買樓。有樓既，無問題。真係要用，或者屋企多左人，要轉大屋，佢地最慘! 收緊完，又收緊，聽著，依家七百萬或以下樓價，先可以盡借七成，但貸款上限四百二十萬，即係六百萬既樓，先借得七成。 即係，由即日起，所有新盤唔需要再諗! 太古城，做唔到七成、奧運站，無得傾。鐵路沿線大面積樓盤，未必得。剩番，一家四口，住間大，你肯定要入新界，仲可能要二線新界區。 如果無估計錯，細價盤繼續有價有市，加埋發展商製造新界豪宅，雙劍合壁之下，遲下上車盤可能買少見少! 政府有幾自打咀巴，由否認豪宅推高整體樓價，到承認。原本話，土地供應無問題，到默認有。近日不斷讚自己已經對症下藥，增加供應之際，陳德霖今日，不得不讚，開場白已經踢爆，近日樓價升，係連續高地價成交造成! 唯一可讚的是終於開始明白任總提出、真正令樓價如入無人之境的理由:13億同胞! 因此如果申請人收入唔係主要嚟自本港、借錢嘅成數會減一成; 同樣而家大量內地同胞能以持有嘅資產淨值嚟申請按揭、貸款額亦即時會由５成降至４成。 其實要真正令本地用家可以受惠，88樓不應只懂收緊按揭，而是要學毛主席所講要認清「敵人」所在:除了收窄外地買家按揭成數、對於一些投資物業，亦應進一步收窄，按揭成數由目前五成應降至三成，將這批遊資迫出樓市。 同時政府亦應痛下決心、放棄97年的包袱:全面復建資...

今個星期一、喺紐約時報有一篇文章，係特別引起經濟學界一片震動。 文章標題係:「為何一個諾貝爾經濟學獎仍然唔足夠」 寫文章既人、係今屆諾貝爾得主，MIT經濟學教授Peter Diamnod。 七十一歲既戴蒙德，舊年四月獲奧巴馬提名、出任聯儲局理事，但任命一直無法喺國會獲得通過，到半年獲得諾貝爾經濟學獎，本來當時都一心諗著憑著諾獎既名聲、可以加快任命程序，點知到最後都係無法成事! 戴蒙德喺呢篇"When a Nobel Prize isn't Enough"中，指責共和黨係玩弄政治，扭曲左整個任命程序、以及反映國會內部，對貨幣政策缺乏認識。 戴蒙德喺文章入面、否認共和黨指控佢缺乏貨幣政策既經驗，認為自己作為勞工市場經濟學既權威，喺失業率高企既年代、係可以比更多中肯既意見比主席伯南克。 共和黨領袖其實都講到明、唔支持戴蒙德，更大理由係唔希望聯儲局變成推動奧巴馬增加政府開支既工具，對於呢一點。 金融時報話今次戴蒙德退出任命、其實係為美國既政界響起左喪鐘，因為以戴蒙德祟高既學術地位，亦唔涉及意識型態既爭論，所以事件係更突顯左問題既重心、唔係喺侯選人既質素，反而係兩黨之爭既荒謬同唔合理。 同樣作為諾貝爾經濟學獎得主，克魯明稱讚戴蒙德係「經濟學家中既經濟學家」，今次事件只係反映美國政壇出現既瘋狂現象，以及政治既兩極化，而戴蒙德唯一既問題就係、佢係由奧巴馬推薦，所以先有咁既下場。 其實民主黨亦唔見得喺支持戴蒙德任命上、出左好大努力，對於而家聯儲局面對咁大既經濟不明朗時，仍然有兩個長期空缺，金融時報社論既結尾，就只有呢句:"天祐美國"!

全港股民應該對李嘉誠講聲多謝。以市場氣氛，以中資股毒性，以B股表現，本應個市可能要跌最少三百點。 好彩，有李嘉誠。 賣地同股市，可以好有關係，亦可以無關係。兩塊地成交，唔係新聞，況且半山地成交價，根本唔好。 但李嘉誠肯去馬，就係市場信心保證。股市跌幅之所以收窄，就係市場對李嘉誠投信心一票! 小西灣，信和，百利保，呢的名字都同泡沬掛勾，今日全部出現。但超人力量，泡沬疑慮暫時掃空。樓市憑佢係咪可以再上一層樓，唔知。但李嘉誠今日教識我地，正正係市況變幻難料之世，有多個錢旁身，他日財富轉移時刻一到，就保證到自己係贏家。 兩幅地百二億，只係一個鐘左右股市成交。但其實對唔少大發展商嚟講，就係大數目。唔信？ 恒地，信和，新世界負債比率超過兩成。恒地就算籌定銀團，但本身過百億負債，已經佔每股資產值十五蚊。 大熱既新地，負債一成左右。如果洗多百幾億，似乎新地批股踏入倒數。 但中環人話，新地一直認為自己股價太低，無百三蚊，都唔做野。所以，市況限制左佢地活動能力。 結果，誠哥憑長實八百億多億淨現金，淨負債比率百分之三，勝出。誠哥之叻，就係今次就算全數現金俾錢，手頭仲大把錢，更絕係，佢手頭仲有多個項目，專登無喺舊年底入帳。 換言之，誠哥用不足五毫子每股資產值既現金，去提升更多每股資產值，係超值。 嚟緊司長話，經常有地賣。正當其他發展商忙於計數，籌水之際，以誠哥彈藥，絕對有條件食曬所有地。 計埋農地，..咁..全港大地主呢個身份，好快咪由下亞厘畢道，或新政府總部，轉移到長江中心?? 地多，樓多，以後更多人會住誠哥既樓。長實出品，下一句唔講!!!!但咩都唔緊要，超人由年初業績時，已經再次教曉我地一樣野，就係市況未明，儲多個錢，就多粒子彈!!!

仲有三星期總值六千億美元的QE2就到終結。 各界當然希望、可以由伯南克口中，了解是否會延續QE3? 綜合他的談話，可以總結兩點: 1. 經濟復蘇似有還無: 伯南克話，今年以嚟，美國經濟增長幅度略低過預期，就業市場近幾個星期更失去增長動力。 特別是伯南克提出，美國經濟增長遠低於潛在趨勢，仍然需要寬鬆貨幣政策支持。 2. 未有暗示是否更多刺激經濟措施: 伯南克對下半年的經濟前景仍然樂觀，相信就業市場下半年會有改善。而對於通脹問題，伯南克繼續派定心丸，佢話雖然近期通脹攀升令人憂慮，但無太多嘅跡象顯示，已演變成廣泛嘅長期趨勢，局內共識係近期通脹升溫只係暫時性。既然經濟有改善，市場解讀自然變成沒有需要QE3! 老實說，對於這種市場解讀、雖然是主流傳媒觀點，但個人倒不大認同。原因簡單，伯南克只是預測經濟未來有改善，而市場就預測佢呢個預測會準確，現實是、伯南克沒有錯過嗎? 其實目前的QE有兩個層次: 繼續QE2、以及啟動QE3。 伯南克其實已經講得很白，寬鬆措施會維持一段長時間，目前已注入的六千億美元，跟本不會收水，再rollover下來，即是低息肯定會持續。 由市場反應來看、伯南克講話亦暗示維持寬鬆時間可能會比許多投資者預計得要久。對利率政策前景最為敏感的兩年期國債收益率最低跌至0.393%﹐創去年11月初以來的最低水平。 利率期貨亦顯示，出年三月加息機會率，由一個月前三成八、降至兩成三。 既然QE2不收水，QE3又何需急於出台? 何況再看看QE最初推出的目標:改善通脹預期、提升資產價格、改善美國樓市及就業市場。 通脹雖然目前不明顯、但至少已經擺脫了通縮威脅; 至於全球股市雖然近期沒有太大方向，不過至少也未見顯注調整。 由這兩點看，QE至少達成了一半目標! 誰說QE不成功? 既然目前經濟、特別是就業市場未有再陷入水深火熱，伯南克亦犯不著此時冒新興市場指責風險，過早暗示有QE3需要! 金融時報Lex話，美國經濟再次放緩，加上國會對財政措施無共識，其實聯儲局同舊年一樣，跟本係無選擇、只有推出新一輪量化寬鬆。 但唔同既係、通脹預期以及環球股市同樣升溫、除非呢啲指標再惡化，否則QE3仍要等多幾個月時間。 Let's see!

這個場面大既相當有趣。 伯南克與摩根大通行政總裁戴蒙Dimon出席同一論壇，伯南克是講者、Dimon坐在台下。 演說完了，到QA Session，戴蒙趁機搶了咪，擘頭一句就問:「你感唔感受到我的恐懼?」 伯南克冷不防戴蒙有此一著，即時呆在當場! 戴蒙一發不可收拾，繼續連珠炮發:知不知你們提出增加大型銀行額外資本，係會損害經濟? 你事前有無做好足夠既研究? 理解唔理解新措施對銀行、信貸、商界以至就業市場會有咩影響? 伯南克稍為定神，終於回應話，自己的確唔能夠假裝可以了解所有影響，亦承認聯儲局確實係無相關既量化工具，不過就重申希望可以定出新既條例、係唔會增加成本或者係影響借貸......... 當然，以上對話是經過我們「加鹽加醋」，現實戴蒙縱如何高傲，大概也不會如此膽敢挑戰自己的監管者。 不過這正突出了，銀行家對未來收緊監管要求的不安，特別是之前有FED理事說大型銀行要額外加7%資金本，恐怕是 嚇破了銀行家的膽。 事實是、監管要求收緊，但股市又持續無起色，銀行要維持盈利就唯有減成本。 甚至昔日華爾街嘅天之驕子，都感受到切膚之痛。 非必要嘅出差梗係要盡量少，連智能電話開支都要減，所以大摩CFO在一次策略日上、居然要將減少使用 Blackberry變成其中一個省成本賣點，想來真是難為了這些華爾街大行。 有大摩員工仲講笑話，以後要用固網先會覆電話，費事個黑莓用量太多! 企業層面，同時諗緊盡量做外判，精簡架構，同將業務搬去近郊地區。 不過呢啲雞毛蒜皮，慳得幾多？ 除非係大刀闊斧減人手。 最新有巴克萊，投資銀行部門要瘦身，目標削減最多50人，上至研究、交易員，下至前線銷售人員，全球都受影響。 數字都反映到呢個趨勢，美國嘅金融業僱員人數，已經連續四年下跌，舊年得返763萬人。 係咪一面倒睇淡？又未必。 美國六大銀行當中，只有四間喺第一季減咗人手，以富國裁得最狠、涉及二千人。 反觀戴蒙旗下摩根大通請多咗三千人，要爭存款嘅大摩，都逆市請多百幾人。 現實係，銀行業塊餅已經無得再增長，弱肉強食，大家要諗嘅係，點樣先搶到多啲生意。

作為賺錢之神、對沖基金約翰保爾森，舊年賺到既錢，破盡行業紀錄，但估唔到上月居然錄得百分之六嘅負回報，唔通「沽神」睇錯市? 睇錯就係睇錯，不過係睇錯一間公司，而且仲要比一個年紀只有三十五歲既基金經理沽空令自己蝕錢，真係有負「沽神」名聲! 原因係佢作為最大股東嘅加拿大上市公司嘉漢林業Sino Forest，上周被本港一間研究機構Muddy Waters質疑帳目，股價大跌七成，亦拖累左約翰保爾森既回報。 不過嘉漢否認跨大帳目，又話Muddy Waters出報告前先行沽空係別有用心，要求監管機構介入。 不過呢間Muddy Waters真係值得一書，主書人Carson Block曾經收過死亡恐嚇，所以喺公司網址，除咗電郵，地址、電話乜都無，佢解釋話係為安全著想。 一年前仲喺上海開迷你倉，搖身一變成為民企糾察，年紀輕輕(35歲)「卡臣仔」話「入行」經歷，其實係誤打誤撞。 南加州法律系畢業，之後去咗搬咗去上海學普通話。喺火車站排隊買飛，唔覺意聽到人話民企做數離晒譜，配合少少股票分析底，所以創辦咗MUDDY WATERS，咁殺出條血路。 連埋今次，MUDDY WATERS 一共發過五次功，對上一隻中國高速頻道，更加已經被納斯達克除牌。 其餘嘅命運都差唔多，一係停牌、一係除牌。 有人計過，五隻都事先沽空咗嘅話，賺幅原來有近六成七，可以話係逢踢必中。 講真、中環外資近日閒談中，話題都係離不開「Everything in CHINA is TOXIC」! 除左了毒食品偏佈全國，仲有毒空氣、毒水，..咩都有毒，仲有係毒股票! 股票有毒，即係公司有違規，或涉嫌違規，或者造數。 總之，就係唔可信本著呢個大前題，外資圍剿中國概念股，特別係民企，係大有理由! 以下係節錄一個基金經理既講話:依家買內地股，純造長倉，死緊。但我地咩都唔做，仲快死。既然龍蛇混集，做短倉，玩沽空，依家唯有咁，先搵到食!! 市場中人話，渾水「卡臣仔」由於戰績突出，美加市場已經殺出名堂。早於上周五，卡臣效應，其實先係港股跌市禍根。 到依家，市場已經搞到逢民企必沽! 遠至歐亞農，近至中國森林，香港人老早領教過民企既毒性。雖然未致於全部帶毒，但都會先採取、敬而遠之策略。 但鬼子佬善忘，部份亦未經歷過。卡臣一出，其實佢係賭名譽、賭身家。因為萬一、事旦一分報告證實係錯，小子以後唔使再出嚟行!! 但對西方投資者嚟講，就肯定對佢愛多於恨，...

放緊病假嘅蘋果公司行政總裁喬布斯現身，唔係介紹iPad3，又唔係iPhone5，而係「一舊雲」! 到底呢舊iCloud有咩咁巴閉? 蘋果教主現身，呢舊雲當然緊要啦，喬布斯希望可以將蘋果流動裝置嘅用戶、可以免費同步處理文件、電郵、相片同音樂等檔案，換言之電腦就唔再需要存在! 透過iCloud，用戶可以喺iPhone、iPad同iPod touch等任何嘅蘋果產品，播放音樂、存取資料、電郵同相片。 這個iCloud其實就是兩年前 MobileMe的延伸，當年要收年費99美元，STEVE JOBS亦自言 MobileMe是一個失敗的產品，今後將會結束業務並將收費退還。 今次可以說是「今是而昨非」，當然喬布斯肯「退一步」，絕對係睇得出itunes未來的海闊天空。 闊在那裹? 雲端早已不是新鮮事物，用開iPhone/ iPad用家早就應慣用如Evernote呢類雲端科技。 華爾街日報話，關鍵原來係同步推出、但無咩人留意的音樂同步服務iTunes Match。 iTunes Match顧名思義，就係用戶在繳付25美元既年費後，配對自己已Download的音樂與iTunes龐大歌曲庫。 如何令用戶乖乖繳付這25美元? 關鍵是用戶可以將一啲本身下載既非法音樂，傳送到用戶既其他蘋果裝置，而蘋果就會同音樂公司分帳。 這次亦成為首次將盜版音樂變成合法下既嘗試。 有關配對音樂可以用於任何電腦﹐但無法與非蘋果的移動產品同步﹐比如BlackBerry或Android平板電腦。 蘋果將與唱片公司分享25美元的年費﹐自己保留30%﹐另外的70%給音樂公司。 過去不少音樂公司一直無法找到一個可行的網上銷售模式，而用戶(至是好一部分)不是不願意付錢，而是付了錢又不能隨意使用自己購買的音樂，由MP3機搬過去電腦/ 電話，很多時都有很大阻礙。 如今只要付上約二百港元，這就使iTunes Match成為唱片行業從可能為盜版的數字內容獲得收入的首次嘗試之一。谷歌和亞馬遜最近都開始推出在線"雲"音樂服務﹐不過沒有與唱片公司分帳，當然有關的音樂變成不能共享。 iCloud同iTunes Match的結合，分析員反應唔錯，認同iCloud服務可以締造新嘅媒體消費模式，有助蘋果產品嘅用家，拋開對個人電腦嘅依賴，同時又可以在流動裝置的激烈競爭中勝出。 如果如意算盤打得響、咁日後唔單止可以取代微軟既視...

全世界，愈嚟愈多鬼子佬相信中港齊破煲呢套，硬著陸真係好似愈來愈似老外共識!! 香港十三年前，打造亞洲世界城市口號。十幾年經營，外資本著認識中國到香港既信念，令香江彈丸之地，唔止係亞洲世界城市，更係全球最貴城市。 零九年至今，外資金融機構在港加人好多，對沖基金在港開業亦好多。但兩年過後，據聞中環已經開始大執位! 執位係因為之前太大注買重中港概念，衰在股市唔升，成交唔多。據聞，幾間歐資行已經開始在香港CUT人，或者做小規模削減重組。 無疑，可能係歐洲本身問題，部份歐資行其實最早睇淡中港慨念。法興舊年秋天率先發出中國泡沬爆破論。而近期，瑞士幫之一既瑞銀，對香港資產市場睇法，亦由牛變熊! 無成交係死症。內地富豪寧買名晝，不愛股票。喜歡炒賣既，選擇過大海，而唔落腳交易所。 眾多外資之中，最白，可能係日資。野村大搞咁耐，搞成點，你睇佢地舊年業績有答案。 結果，當通行投行高層大加薪時，原來野村舊年高層平均要減薪三成八! 另一間新加入大搞既大和，據聞亦少量瘦身。有人走，已經唔再填位。大和當日大搞如意算盤係，三分一做日本機構投資者，三分一做日本散戶，其餘三分一做街客，又或者海外資金! 聽講，大和最初香港大搞，係有生意。可惜，一場日本大地震改變一切，唔係無日本客。而係地震後，多左日資香港落腳，大和唔再係獨市生意! 當然，依家投行界未去到大規模人頭落地咁惡劣地步。但佢地行得比經濟周期快，閃得亦比其他行業快。想投身金融圈朋友，或畢業生，似乎要多一份心理準備! 當今之世，最穩陣不如打政府工，人工加得多之餘，以今日政府威信，仲有勇氣加入政府，起馬贏得一份尊敬!

內地經濟正如陶冬所言，形勢愈嚟愈複雜。驚增長放慢升溫，唔少評論認為，領導人又處於轉接點，隨時出現個政策大轉移!! 只要有通脹呢個憂慮，內地似乎唔會放慢收緊步伐。但近日，突然高舉地方債危機，就令政策更加複雜。 另一個值得思考問題，係人民幣國際化。李小加講左一句可圈可點，話討論已經足夠，係時候用行動落實。 即係，小加已經講明，一年多以嚟，原來好多野係講多過做!! 華爾街日報一篇文章，題為中國領導人有否被騙。內容唔算特別精彩，但就否認左一些我地一直以為的事實:人民幣國際化係必然，以及有領導人熱衷推行! 講番文章題標，領導人有否被騙。騙的咩，係邊個夠膽騙領導人呢? 答案係周小川! 而當中涉及，就係人民幣國際化呢個議題。 原來，周小川一直好想人民幣國際化，咁唔單止令匯率更自由化，亦間接令人行擺脫發改委、商務部呢的奉行政府主導既部委控制。 華爾街日報文章話，零九年係一個關鍵日子，周小川連載三篇國際儲備貨幣地位既文章引得中央領導人回響、以及認同部份見解，於是出現依家人民幣國際化情況。 周小川點解會成功，原來次按一役，內地相當痛恨西方經濟體系。正如胡祖六所講，周小川高明之處，係用最聰明方法，將人民幣國際化呢個題目 上，加入民族主義元素。 外國學者更話，領導人錯誤接收信息，因為小川行長講左頭一部份，但無講尾個截。即係國際化既結果會係點。所以結論係，領導人被騙。而李稻 葵就幫小川護航，話小川結果咁叻，就唔會喺內地四處被圍攻!! 無疑，人民幣國際化負面影響，內地已經有聲音加馬討論，包括國際化等於要人民幣加快升值，影響出口。 國際化已經令人民幣升值，令外匯儲備帳面輸錢。 但原來，領導人當日只係拍板左一樣野，就係廣泛用人民幣貿易結算。換言之，加快貿易結算，唔等於全面國際化，亦唔等同最終會全面自由兌換。 就算加大貿易結算，樊綱亦道出部份憂慮，就係吸收大量資金，加大儲備上升壓力，亦即係違背當局控制流動性目標。 其實，有關周小川發功，推動人民幣國際化，只係一個故事。背後又再引證內地矛盾重重，增加人民幣貿易結算，但唔想升值係矛盾之一。 唔信美金，但依家政策反而不斷進一步累積美金，亦係矛盾之一。 說到底，中國人，真係太多矛盾!!

環球25個公布左PMI地區、有19個同一時間出現倒退，其中美國更錄得25年最大單月跌幅。 作為領先指標既PMI放緩、市場更關注係美國既就業問題，ADP統計既私人企業職位，比預期足足少左近14萬份。 數據一出、大行都調低，星期五發表嘅五月就業職位增長預測。 高盛同花旗，將五月就業職位增長數字，會由原先預計嘅15萬同17萬個，下調到只係增加十萬個。 對經濟前景既憂慮，勝過國會否決提高債務上限、資金湧入債市避險，美國十年期債息，今年來首次跌穿左三厘既心理關口。 面對經濟可能再次陷入「雙底衰退」，市場當前最關注、係聯儲局點樣回應? 答案可能令你失望，因為聯儲局既評估係、唔需要急於回應。 聯儲局副主席耶倫話，目前既寬鬆政策仍然恰當，因為失業率較高而通脹仍然受壓制。 有聯儲局官員亦表明，到明年下半年，QE可以提供三百萬個就業職位、同時提高三個百分點既經濟增長，暗示政策已經收到成效。 不過華爾街日報話，一旦通脹前景出現變化、唔可以排除聯儲局會重新考慮加碼。 主席伯南克喺四月時候講過、要推出新QE，需要一個非常高既門檻。 門檻雖高，但要跨過亦非沒有可能。 華爾街日報話，經濟一旦確認轉差、伯南克既想法係有機會作出變化，而關鍵係通脹預期。 利率期貨反映、市場進一步推遲加息時間，估計明年8月前都唔會有加息機會。 事實係由「抗通脹債券」TIPS反映，五年既通脹預期高達百分之二點八，但唔可以排除經濟一旦收縮、會令市場預期迅速改變，到時仍然有機會推出新一輪量化寬鬆。 FT Lex提出、今年PMI的放緩在時間進度上與去年的「疲軟期」幾乎重疊，如果標題用「去年今日」，可以說是合適不過。 這一次，市場正準備迎接QE2的終結。如果QE3按照去年的時間表出台——市場狀況目前暗示可能會出現這種情況——投資者和企業可能在秋季重拾信心。廉價資金的藥方仍有望緩解經濟不振。但在重復給藥後，這種藥可能會開始失去效力。 愈說就愈像是一場「輪迴」.....

Sell in May，原來只係大半個月! 踏入五月，先因為有歐債危機重燃、之後又擔心經濟增長乏力，全球股市大半個月持續調整，環球股市曾經蒸發過1.8萬億美元。 港股亦一度大跌，不過到五月埋單前，居然可以連升六日，今天更一度急升五百點，係半年最大升市，由低位反彈1100點，結果Sell in May只係sell到30多點! 其實硬要說月初跌市係因為歐債，只是大家心目中未見到更強力的理據，但又因為股市升幅過高，基於Sell in May的 City myth，於是在群體心理的影響下，結果出現了月初的「無理式」調整。 當然你會說，且看最新的美國數據，的確是差到不得了：消費信心因就業市場疲弱而跌至半年最低，而更嚴峻的樓市數據，不單跌至八年來最差，更是跌破上次低位，確認出現雙底衰退。 不過這不正是證實，美國根本沒有條件去收緊嗎？不論你用QE2.5或QE3也好，六千億美元的買債規模是不會收回，寬鬆的環境將會持續一段長時間。 去到中國，通脹當然令人憂心，不過面對政府換屆在即，不單中小企叫苦連天，連大銀行亦忍不住抱怨，其實利息再升空間很有限。 說句實話，當眾人都懂得警告大市「位高勢危」，顯然見到是股市成交未見瘋狂， 要說股市見頂，似乎眞是早了一點。 要說隱憂當然不是沒有，眼見超人今年咁急套現，先有和記港口、後有匯賢，連之前一直話唔急的Husky亦有趕尾班車之勢，大家不可不防此超人效應!