財經拆局

上次寫 烈女傳 時，已料到綠壩應不能過關，只是想不到工信部會揀在最後關頭先放棄。 有內地網民試過以國旗及毛主席晝象做測試，發現綠壩全部將大面積「紅色」視為血腥、暴力而全數過濾，同樣，黃色的畫面一樣被冠以色情而不能顯示。 有網民嘗試用文字「六四鎮壓」做搜查，發現未能顯示。相反、如果只以「六四」或「鎮壓」搜尋，就可以找到相關資訊。 看 工信部 的通知，它很強調軟件沒有收集用戶資訊、以及監控網上行為的功能。這又將廣大網民當成白痴，係有上網經驗的人都知，過濾軟件核心就是需要信息回饋，沒有這個功能又何來過濾? 工信部公開解釋是，押後執行是需要更長時間比軟硬件開發商適應，仲硬說自己有公開招標及採購，因此符合WTO準則云云，只可以說是自欺欺不到人。 商業利益可能是今次事件另一考慮，美國要勞動到政府高層出面勸止，加上有二十多個地區聯名向總理要求押後，就算工信部再可以隻手遮天，相信今次也要低一低頭。 政府固然是事件輸家，但對綠壩來說，今次也是失多於得，雖然收得政府四千萬元，不過得罪了全國網民，請問誰會再用你產品? 網民有時可能反應會稍為偏激，但普遍網絡都是遵從公開及開放的原則，從近日的事例中，已很清晰起到監察社會及政府的功能。 因此工信部今次讓步，不少討論區已宣告今次代表網民又一次勝利。 不過我們不要小看政府的決心，可能綠壩一時三刻未必能夠捲土重來，但內地對網絡的監控只會有增無減。有留意今天騰訊股價的、大概也知道內地已經收緊網上遊戲虛擬貨幣的使用，禁止經開發商以外的第三者互相進行交易，甚至交換「刀劍」都被禁止。即使是經開發商平台交易，賣方要留下實名及銀行帳戶資料。 顯然內地對網絡監控只會有增無減，一旦有一天工信部的老爺們突發加想，激進到網上實名制全面實施，後果不堪設想。 還是不要開心得太早。

上海與香港就結算中心地位，香港可說是先贏一小仗。 自從四月公布上海與其他四個廣東城市成為貿易結算試點後，上海就一直未有停步，認為自己肯定可以跑出，除了不斷增加試點企業規模外，仲不時放風「唱衰」香港，認為香港所謂試點，最終只會與「港股直通車」一樣，胎死腹中。 誰不知他們千算萬算，就算漏了一個「七一」因素。 剛喺瑞士出席完國際結算銀行會議周小川、任志剛，隨即趕喺香港機場「貴賓室」簽署俾本港推出跨境人民幣貿易結算嘅補充協議。 你話唔係趕「七一」就搵鬼信。 周小川話內地有關部門，會定出合資格嘅首批試點企業名單，參與人民幣業務跨境結算，本港，就唔限企業數目。 送佛送到西，周小川仲首次公開讚揚即將退休嘅任志剛，喺本港同內地融合上，做左大量工作，亦享有好有聲譽，為邀請他出任人行顧問留了大大條尾巴。 當然，看整個貿易結算安排，要實現人民幣國際化、係好長遠目標，但係計劃暫時睇，係先可以令到本地廠商受益。 而家港商無論進口內地原料、定係出口產品番去內銷，中間涉及嘅金錢來往，都要先經結匯過程，好似係將收到嘅人民幣貨款，兌換成結算貨幣美元，再轉成港紙。 但七月開始，港商可以直接向五個內地試點城市，上海、廣州、深圳、珠海同東莞，直接以人民幣作結算。 中間可以為本地廠商減省了匯兌風險，同時行政成本亦會降低，估計大約可省回1-2%資金。 至於擔心本港唔夠錢使問題，主要係憂慮，而家流通人民幣存款唔夠6百億人民幣。 可以肯定的是，當政策推行後，本港流通人民幣肯定大增，加上貨幣互換安排，本港最多可借入二千億人民幣資金，應有能力應付、更大量人民幣結算安排。 不過說到底，更大成效其實是在本地銀行的經營範圍，著眼的是未來資本帳開放。 事實上，隨著香港成為首個境外跨境人民幣貿易結算中心，估計中央下一步「路線圖」，係內地開放部分資本帳項目比本港經營。 中央目標係部署出口商，可以用更多人民幣定價，之後就會開放資本帳、終極目標係推廣人民幣成為儲備貨幣，因此必然係開放更多資本帳項目比本港經營，包括人民幣貸款。 高盛睇得更長遠，預期人民幣喺本港流通量進一步增加後，最終港元會同人民幣掛勾，到時大家都會變左使「人仔」。 //////////////// 其實如果國家國力強勁，我估大部分市民都唔多介意唔要港紙轉使人仔。 問題係，國力強之餘，中央係咪肯接受一個「劉曉波」?

周五有一宗新聞，是大家期待已久，但出現左又唔多覺。 當然，就是我們已多次提及的退出機制。 聯儲局在議息聲明發出後一日、伯南克在電視面前被人「盤問」之際，聯儲局公布一系列延長及修訂增加市場流通性的措施，表明上是因應金融海嘯未有全面改善，而作出延長，但當中精綷其實是大家期待已久的退市機制。 其中最為人觸目，是要到 聲明 中段先見到的TAF auctions定期拍賣工具，七月中起將每兩周一次的TAF拍賣規模，由1500億美元降至1250億美元。 雖然銀碼不大，但總算走出了第一步。 至於一些從來沒有使用的機制如Money market investor funding facility(MMIFF)就會取消。部分同十四國央行簽下的貨幣互換機制就會延長三個月。 就好似聯儲局所講，金融市場已有改善，但其他領域未有正常運作，因此整分聲明都無提及「退市」等字眼，可見伯南克是小心奕奕去處理目前退市問題，避免令市場有太多「幻想」空間。 很明顯，今次只是一少步，也解釋一些主流傳媒，都不大掌握到今次退市的玄機。 那為何不選擇在議息聲明同時公布? 聯儲局的解釋是，貨幣互換協議需要先得到其他國家的同意，因此趕不及在周四的聲明中提出退市機制。 那很明顯是托辭，因為Swap Line是整個計劃，最不重要的一部分，實際上押後公布亦沒有多大非議。 因此絕對是要來分散伯南克上國會就美林「醜聞」的注意力。(如果咁睇，呢招似乎唔多收效....) 目前對伯南克的評論是有兩極化跡象，上文提到的韋爾奇，就以「國家英雄」稱呼伯南克，不過在一眾國會議員眼中，就認為伯南克是犯了大不諱，好像現在就要趕他下馬。(看CNBC直播伯南克，真係好似審犯一樣，任總應身同感受。) //////////////////////// 可以一提是周五公布的個人收入開支，其中收入大幅增加了1.4%，遠高於預期0.3%，開支就增加了0.3%，是2月以來首度上升。 不過要留意，今次其實是政府退稅支票、每人實收$250美元的月分，因此先刺激收入大幅增加，不過開支並無同步上升。 這解釋了5月美國人的儲蓄率升至百分之6.9的十五年新高，增幅更是歷來最大，有分析員估計，面對前景不明朗，儲蓄率有機會升至10%歷史新高。 這中間又印證了傳統經濟學、質疑對政府增加開支的經濟效益說法。錢，是使了出去，但幫得到經濟嗎? 市場對通脹、通縮的爭論絮絮不休，我們仍然是...

金融海嘯打到埋身，唔少被裁、或新畢業人士，唔想終日無所事事，進取些的，都讀番個MBA進修。 當然，使費都唔少，喺香港最平個間U讀、都要三、四十萬元。 有無諗過由「Neutron Jack」、前通用電氣行政總裁韋爾奇教的MBA? 實收只係16萬港元。 呢位被十年前、被財富雜誌稱為「Manager of the Century」，01年退休後，都完全無停過落嚟，多年來除左「Winning」呢本管理鉅著之外，就係到世界各地演講，傳授心法。 星期一，他決定用自己個名做賣點，成立「Jack Welch Management Institute」，開辦網上MBA課程。 呢個消息一出，即刻喺財經界同教育界有好大迴響。今年七十三歲嘅韋爾奇，都用好耐都無試過咁興奮嚟形容自己心情。 打頭陣除有MBA，仲有Master of Management兩個課程，要取得學位，總數16萬港元。 韋爾奇自己講明，課程會用到佢自己「Winning」本書內容，亦會沿用佢喺通用電氣訓練經理嘅一套方法。 韋爾奇仲有個好幫手，就係佢第三任太太Suzy，佢兩個近年都有製作電視節目，因此課程都係由兩個人親自設計! 各位，聽完有無興趣? 金融海嘯嘅教訓，係傳統智慧備受考驗，可以專收「叻人」，到底韋爾奇個一套，今時今日仲有無用? 經濟學人專欄，提議左阿Jack有幾科必教項目，第一科係韋爾奇經常掛喺口邊嘅「創造股東價值」，呢位早喺81年就提出，要保障股東、員工、顧客利益嘅經營之神，經濟學人comment係「Give me a break」! 第二科必教，就一定係裁員心得，韋爾奇提出每年要撤換表現最差百分之十嘅員工，令到通用員工由佢上任前41萬，減到23萬人，管理人而家肯定最需要呢套心得! 仲有一招必殺技，經濟學人話一要教，就係「Maximising CEO Pay」，佢曾經向一個CEO「教路」，要攞到最高薪酬，秘訣係要搵一個董事會主席，人工要高過自己。 千萬唔好搵一個大學教授或者係公職人士做主席，如果唔係要加人工，肯定「No Way」! 聽左咁多，各位覺得吸唔吸引? 我反而想問，點解佢會出嚟教書，點解會係呢個時候? 韋爾奇其實係用左1200萬美金，入股呢個Chancellor University一成二股權，其實都係做生意啫!

一年一度投資界 英雄宴 ，截至星期五都是得三十多萬美元， 比起去年，趙丹陽出價逾二百萬美元，可謂差天共地。 星期三趙丹陽帶同老婆同個子以及朋友，一齊同巴菲特、喺一間排房，食咗三個鐘晏。 餐前大家傾吓投資成績，趙丹陽話今年賺多47%，巴菲特即刻贊趙丹陽叻過佢，仲攞自己個銀包出嚟，要趙丹陽幫佢投資。 三個鐘飯局，巴菲特話，食得好開心，但唔肯講大家傾咗啲乜，因為人地洗咗二百幾萬美元，無理由免費話你知喎! 用到過千萬港紙食餐飯，國內投資界劣評如潮，不過趙丹陽話，物有所值。 呢餐飯，令佢終身受用，喺投資路上更有信心，唔可以用錢嚟衝量。 被譽為國內私募基金教父趙丹陽話、過去一年，巴菲特寄好多資料俾佢，令佢覺得自己進步咗好多，經過呢次嘅牛熊市，一啲問題已經搵到答案，呢餐飯，只係要向巴菲特確認一吓。 趙丹陽稱呼巴菲特做老師，話早喺十年前，佢睇咗本「巴菲特從100到160億」，從中學到佢嘅投資理念，令佢嘅基金先可以過去六年，有六倍嘅回報，今次以天價損錢食晏，可以話係感謝嘅方式。 佢仲帶埋呢本書赴宴，同巴菲特嚟個合照。 除咗呢本書，趙丹陽仲帶咗一啲公司年報，想巴菲特俾吓意見。 仲有當然係唔少得送禮，午餐前，趙丹陽送咗貴州茅台，同埋阿胶俾巴菲特。 呢間排房，最貴嘅菜係澳洲大龍蝦，都只係59美元，唔洗五百蚊港紙。 照計每人平均大約洗１６５美金，即係每分鐘，趙丹陽就捐咗1.1萬美金。 如果你明年想同巴菲特食晏，而家仲有十多個鐘。 要數三個不Bid理由，可以先舉如果要學「價值投資法」，唔使買書，百幾蚊買本「INTELLIGENT INVESTOR」就得。 雖然係五十年代首筆，但書入面提到，點評估投資價值、公司估值，股神都話終身受用。 再唔係，可以買一股巴郡，承惠八萬六千幾美元一股，比EBAY英雄宴叫價，平七成。 仲可以出年股東會，見到股神，同埋有股息收，唔似食餐飯，落左肚就咩都無! 但真正可以唔BID理由，係「價值投資法」。 金融海嘯之後，價值投資法備受質疑，巴郡股價高位回落四成有多，「Buy and Hold」成為了一眾股民最大噩夢，真係可以慳番。

在一致睇淡的情況下，伯南克終於交左一分算係合格的功課。 其實佢都真係面對唔少壓力，一邊老細不斷被人問住自己出年仲有無得撈，同時，大西洋另一邊「行家」，就不斷叫佢好收手，真係兩面不討好。 喺聯儲局議息後，利率期貨顯示，年度加息機會一度增加到五成八，但好快回落到三成三。 聯儲局一如預期、維持利率不變，市場並唔在意，打開聯儲局份會後聲明，市場最關注嘅， 唔係聯儲局主席伯南克，近日經常講嘅經濟萎縮步伐正在放緩，而係聯儲局刪除左對「通縮風險」嘅警告字眼。 聯儲局話，近期能源同其他商品價格上升，但資源充裕可以壓抑成本上升嘅壓力，預測通脹喺一段時間內，會維持喺較低水平，並預計，低利率亦會維持一段較長時間。 另一個關注點係，聯儲局維持一萬七千五百億美元，購買「按揭抵押證券」、國債同商業機構票據嘅計劃不變，但同時加入「會密切留意市場變化，作出適當調整」嘅字眼。 其實呢個唔變講法，已經係最大程度伯南克可以做的事情。 想下，如果佢話繼續擴大規模收購資產，美元肯定「旦散」，無咩人會再有興趣持有多年期國債，十年長息到時唔係四厘、見六厘都有分。 反之，如果而家學歐央行話要收手，市場肯定又會揣測短期加息，奧巴馬就有大把借口趕佢落台，比薩默斯上場。 因此，聯儲局咁講等同向市場表達，聯儲局唔會擴大購買債券嘅力度，同時亦暗示部署緊撤出策略。 大家仲記唔記得董伯伯名言:「不提及等同不存在?」 分析話，一旦九月之後發表嘅經濟數據，令聯儲局確認經濟逐步好轉，通脹風險升溫，當局會收緊番貨幣政策。 當然，屆時薩默斯亦要收番他的期望。

當伯南克預備開FOMC會議前夕，相信他自己也想不到被人當作盤口開賭。 伯南克可唔可以連任做聯儲局主席? 越嚟越難估! 美國網上賠率公司預測，伯南克連任嘅機會率，由六成半、降至只有六成。 實情係，佢地係聽總統嘅口吻嚟估，因為奧巴馬只係讚揚伯南克、處理金融危機嘅工作，但無講明想唔想佢留任。 奧巴馬喺白宮接受記者提間時，被問到想唔想伯南克繼續擔任聯儲局主席一職時，並無明確表態，只係讚揚伯南克喺處理今次金融危機嘅表現。 「I AM NOT GOING TO MAKE NEWS ABOUT BEN BERNANKE........．」 單看這句說話已是盡在不言中。 有分析指，奧巴馬咁講，等同於對「更換」聯儲局主席人選，持開放態度。 伯南克嘅任期喺出年一月屆滿，美國傳媒揣測，奧巴馬提出改革銀行業監管方案，可能會搵人接替伯南克，掌管監管架構改革後嘅聯儲局。 市場傳國家經濟顧問委員會主席「薩默斯」同三藩市聯邦儲局銀行行長「耶倫」，都可會接替伯南克，出任聯儲局主席。 係咪連任之前，伯南克要先過國會一關，包括點解唔救雷曼、但又協助美銀收購美林? 解到畫、先至講有冇得留低。 當然，倒過來說，如果年底前經濟真的有起色(這個可能性很大)，「量化寬鬆」又真係能順利撤出(這個就似乎很不容易)，薩默斯就只能嘆句時不與我。

內地又有「疑似」新措施優惠香港股民。 金管局總裁任志剛話，內地需要先確立香港，喺金融層面上嘅定位，佢同意要做到兩地資金融通，可以以粵港兩地做試點。 廣東證監局副局長程才良話，既然粵港兩地要加強金融合作。無論監管，投資產品，以及兩地金融機構，都要有更大合作。 佢提議中央爭取，透過兩地證券公司，開展「港股代理交易」，或者透過QDII機制，俾廣東省居民購買港股。 至於港居民投資內地市場，佢提議，俾港人利用手持嘅人民幣，買賣深圳掛牌嘅A股，深港兩地交易所亦可發行ETF俾兩地居民投資。 經過港股直通車事件，所有股民對直通車或類似講法都已開左很大戒心，除非有最高層的直示，否則大家都不會信以為真吧? 不過港股又因此無厘頭升了三百多點...... 大家記得，喺五月推出嘅CEPA六之中，已經有兩項「先行先試」措施，包括比香港證券行喺廣東省設立證券投資諮詢公司，以及研究引入港股組合「ETF交易所買賣基金」，但都無聽過「港股代理交易」。 其實所謂「港股代理交易」，幾年前喺內地亦都非常流行，但期後中國證監會係高調出面制止。 到底今次由證監局嘅人員又再提出，係咪官方立場有變? 有幾個問題，都係值得大家再仔細諗，到底呢個港股代理交易、係直接買股票、定透過QDII買，定係用ETF 形式買，差別相當之大。 更重要係廣東省證監局代唔代表中國證監會立場呢? 內地主流媒體今日有報道到任總的說法，但就完全無提及這個港股代理交易，實情係點，值得大家繼續跟進!

東亞今次呢單交易有些古怪，一定要拆下局。 同單一最二大股東、西班牙「CRITERIA」，簽訂嘅策略協議，表面上好似無咩實質野，實際上是「暗渡陳倉」，大大 增加東亞控制權。 呢分協議的確引起不少分析員討論，最令人想不通的是，CRITERIA一直傳是會減持東亞，為何而家反而有動機去增持? 有分析就認為，其實是李國寶不費一分一毫，就可以避免敵意收購。矛頭有話係指住第二大股東國浩集團，呢招高明。 不過一個銅板有兩面，避過收購，即係等於無左併購概念，唔排除國浩會大手沽貨。 就係一分協議，令李國寶成為大贏家。 至於年初增持東亞至超過半成股權嘅國浩集團，相反就可能成為輸家。 國浩自從高價出售道亨後，郭令燦家族一直想染指銀行業，如果佢地向西斑牙criteria買入埋近一成股權，持股量就會超過李國寶家族，里昂話，正正因為一分策略協議，國浩既無機會接貨，東亞無左併購概念，佢地手持股分，上升空間亦有限，唔排除國浩會沽貨。 李國寶之前講過，國浩增持，佢事前唔知情。 呢間家族銀行，由於大股東持股量極少，分析員話有興趣嘅絕對唔止國浩。 大家不記得中銀香港都是東亞股東? 新協議之下關鍵嘅係，列明CRITERIA若增持至百分之１２．５以上，需得到東亞同意。 相反沽貨嘅話，亦要事前知會由東亞董事會排，兼規定要配售俾多於一名機構投資者。 花旗話，李國寶變相控制多一成東亞股權，按佢地計算，李國寶家族直接持有，或間接可以影響到嘅東亞持股量，增至3成，依家安排，令東亞成功避免敵意收購。 CRITERIA其實是成為了白武士。 話過三年後退休，面對近日不少老臣子都相繼離去，李國寶接班人，如無意外係佢兩個仔，李民橋，同李民斌。 如果用一個父親角度去看，一切就變得很合理，對不?

金融海嘯雖然令唔少公司沒頂，不過留意到個現象，係唔少長期停牌公司，可以喺呢一浪中成功爭取「復牌」，名正言順做「番生股」。 先有「海域化工」、「中信泰富」、後有「謝瑞麟」，復牌都有以倍數嘅升幅，今日一隻仲經典，就係停牌七個月嘅國美電器，復牌一度急升一倍，收市仍然可以升到近七成。 呢啲「番生股」之所以有咁大升幅，主要係有新資金或者係新股東加入，令市場有咁大憧憬，今次國美亦都成功引入私募基金「貝恩」，而國美形容、前主席黃光裕對公司、帶嚟嘅壓力亦已經過去。 包括向私募基金貝恩發行七年期可換股債券，涉及十八億港元，如果全數兌換，會佔國美已發行股本百分之十二點八， 同時、國美會供股集資每一百股供十八股，供股價六毫七仙二，較停牌折讓四成，貝恩亦承諾咗會為供股包銷。 大股東黃光裕涉嫌經濟犯罪被調查，要股東有信心供股投資落去，國美澄清公司資金無被挪用過。 其實國美股東可以慶幸的是，當日永樂被併購至加入國美，好在陳曉留任在國美，如今方可以代埋大股東黃光裕做主席，否則情況更堪如。 陳曉亦坦言，自去年十月後，已唔清楚黃光裕現況係點。 陳曉話，唔知黃光裕係咪會參與供股，只係強調公司過去七個月，已經加快左貨轉周期同資金回櫳，希望釋除到市場疑慮。 較令人感興趣的是，國美的公開信居然是先多謝北京公安局的支持，這個說法相信在其他公開信中很難找到。 其實剛才數過的幾隻股分，在復牌都有不錯表現，證明市場仍有不少逆向思維，相信企業能夠番身。 日後國美能否在競爭激烈市場中跑出，就要看貝萊的功力，不過如國美的非執行董事曼寧說，內需肯定是目前內地最具潛力的行業，實在不能少看。

美國聯儲局公開市場委員會，開會議息，而家預左又唔會加息、又唔可以擴大「量化寬鬆」規模，仲有咩好傾? 如無估錯，應該係「走人」。 聯儲局目前首要工作，係點樣撤出「量化寬鬆」貨幣政策。 但點樣將印出嚟嘅過萬億美元資金收回? 華爾街日報話，其實只有三個方法、包括直接加息、收回緊急貸款機制、以及暫停回購國債同按揭抵押證券。 事實上，聯儲局短期內，都唔會用呢三種方法 其中，加息肯定係言之過早，面對失業率有機會升上百分之十嘅高位，聯儲局官員會做最保險的事，就是維持息口喺現水平較長時間。 至於透過商業票據，批出急緊貸款機制。當局可以隨時收緊機制拆借條件，但唔會回收整個機制，以免令市場波動。 而數據顯示，金融機構透過機制拆入資金，已經由一月時嘅超過三千億美金，收窄到1320億美元。可說是初見成效。 至於暫停回購國債同按揭抵押證券，最快要到年底，至出年年初先會考慮咁做。主要係擔心依家貿然停止回購，唔單止唔會令長債息率跌，反而仲會再升。 當局認為，市場對通脹預期已經有錯配，例子係，利率期貨錯誤以為十一月有七成機會加息，將三十年按揭利率到五點五九厘，亦令新批按揭大跌一成六。 聯儲局主席伯南克曾經將長息急升責任，推比財赤問題惡化，不過前聯儲局理事「格拉姆利」話，真正做成長債急升，根本唔係經濟基本因素有變，而係市場無法理解聯儲局嘅退出機制，做成混亂，先至係最大原因。

大市無乜力，但新股就炒到興烚烚。今日兩隻每人分到一手嘅新股，表現令人有驚喜。 可以肯定的是，由於資金實在太多，不單止扭曲了經濟數據的表現，當然亦令資金亂竄，流入一些基本因素無甚的新股身上。 唔想阻你發達，分析下市場氣氛。 今日兩隻新股，興利同金屬再生資源，單睇首日表現，就知市場氣氛返晒嚟， 當中興利係今年以嚟，首日表現最好，最多升過五成四，埋單都升近四成。金屬再生資源都唔輸蝕，最多都升過三成，晉身今年升幅榜三甲。 唔怪得有中國版女股神稱號嘅西京投資劉央咁勞氣，話金屬再生過橋抽板，用完佢個名做宣傳，結果只得分到「令佢失望」嘅股數，仲話要今日沽晒佢﹗ 講真，邊個借邊個「過橋」，視乎觀點角度啦! BANKER話，中國金屬再生圍飛事件，反映部分承銷商、之前都估唔到新股嘅熱炒程度咁利害。 但重頭戲似乎始終係霸王，消息話，霸王國際配售已經錄得超額認購。據講，部分大行同客戶講，要透過placing攞貨，最好打定輸數! 孖展反應都「霸氣十足」，贏晒其他兩隻同期新股。三間證券行加埋已經錄得４５億幾認購，相當於公開招股超額２７倍。 炒味咁濃，似乎到連基本因素都忽略咗。霸王擺明賣高價，單一產品，竟然以最高18倍PE招股。 除非佢啲產品好得，真係解決到「男人最痛」，咁就真係賺大錢﹗ 不過要留意，原來佢嘅產品配方無申請專利，好易被人照抄可也。加上今年頭四個月銷售同盈利，急跌一成，有隱憂! 結論係要菲菲同大哥龍龍賣多啲廣告囉，知唔知呢次隻資三成，即係最多五億，係用來做宣傳。 咁大家知邊個係最大「贏家」! 其實睇新股不妨參考下保薦人往績。 今年以來，累積表現最好嘅都係有中資行做保薦。行內人話，係同佢地喺內地網絡好，令水源充足有關。 而表現最差反而係外資行牽頭嘅，好似係銀基，到而家都仲潛緊水。 股價未大升，已咁急減磅，散戶上車隨時中招，阻人發達似乎係佢地喎。

七十年嚟最大動作，一分八十八頁白皮書，影響到全世界嘅金融業藍圖，由銀行到證券、由保險到消費者保障，由Wall Street 到Main Street! 奧巴馬今個星期推出左三十年代大蕭條「新政」以嚟，最激進、最大規模嘅金融業改革方案，而內容亦都一如預期，無論係金融界、政界以至弱社社群都有好大迴響。 經濟學人標題以「魯莽同膽怯」去形容呢分報告，認為呢分報告並唔係好似表面睇、真係做得咁勇敢。 特別係無改善到目前「架床疊屋」嘅監管架構，雖然加強聯儲局權力，又取消左「儲蓄機構管理局」OTS，不過仍然有四個聯邦機構負責監管金融機構，係違反左奧巴馬最初只係保留兩個監管機構嘅構思，明顯係屈服於政沿壓力之下。 經濟學人最擔心，係一旦好似出現商業按揭市場崩潰情況，由於屬於「灰色地帶」，最終只係會出現監管機構互相「卸責」情況。 至於諾貝爾經濟學獎得主克魯明，就用「Too Big to Fail」註定FAIL嚟呢套方案，佢形容佢自己一直鼓吹增強監管，但奧巴馬要避免日後再有金融機構「Too Big to Fail」肯定係不切實際。 彭博都提出左一個好有趣嘅想法，就係成分方案都無法擺脫「格林斯潘的幽靈」。 喺格老主政二十幾年間，無論係聯儲局定係政府其他部門，都喺佢鼓吹下出現左一種心態，就係由私人機構自我監管，先至最完美方案，一旦政府以「有形之手」介入，最終都只係更無效率，做成資源浪費。 最慘係呢個幽靈，而家出現左喺奧巴馬兩個最得力助手身上，財長蓋特納喺零七年出任紐約聯邦儲備銀行行長時，曾經講過「金融創新」、包括CDS同CDO，都係可以令到市場更有效率，佢亦都認同格老嘅明言:「監管者唔應該阻止泡沬形成」，就係呢種心態，先至做成今日嘅滔天巨禍，你又點放心將呢個監管重任交比佢? 至於另外兩個執行者，包括白宮經濟顧問委員會主席薩默斯，同伯南克自己，都喺唔程度上認同呢種心態，再加上薩默斯又成日「喉住」聯儲局主席寶座，兩個人「鬼打鬼」，又點會一條心搞好監管? 經濟學人都認同呢個分析，認為政府係進一步將自己更家深度介入自由市場，即係放棄左過去三十年嘅自由主義，奧巴馬已經係將自己陷入困境之中。 當然，大家都唔希望呢位總統咁快就變「跛腳鴨」，希望佢有能力變「捉鬼敢死隊」，打底呢隻幽靈啦。

昨日拆局講過星爺間帝通，今天沒有理由不說智者檔的華保。 一間係名不經傳嘅仙士股，一個係大名鼎鼎嘅前策略員，本來大纜都扯唔埋。 陸東先獲得華保亞洲嘅認股權，星期一再喺場外增持。依家加加埋埋，揸著810華保亞洲、一成三股權，係大股東。 名人效應之下，華保烏龜變飛龜。今日再升兩成。自從陸東大名曝光之後，華保短短七個交易日，升左近一倍。市值有五億幾。 試下計條數，陸東以兩毫七子，買入一億七千萬股。另外華保俾佢嘅認股權，行使價一毫七。 以市值計，佢兩批貨加埋，帳面賺一千五百二十五萬。 兩星期唔夠，回報超過三成。簡直係快如閃電。 勤練基本分析，看重基本因素，係陸東一直高舉嘅投資通勝。 佢講過，公司要睇盈利，睇業績，睇派息。偏偏華保通通欠奉。呢間華保市值，加埋乘一百，都分分鐘細過佢研究開嘅公司。 華保，打正旗號做投資，年報中佢地話自己投資上市，同非上市公司。 舊年為例，佢地蝕左四千幾萬。翻開年報，佢地持倉嘅股票，全部係四，五線股。 包括文化傳信，華基光電，前身九方嘅中國生物資源，呢啲名敢打賭，連策略員都未聽過這些公司。 至於非上市投資方面，華保話，佢地主要買一的綠色生物科技項目。 華保每月都要披露每股資產值，最新數字係五仙半多的，亦係現股價有四倍七溢價。 實際上陸東之前同人講，呢單野，私人個私人，係百分百私人投資。 聽番嚟，陸東早排話搞嘅基金，同華保的確完全無關。 線人話，佢呢個fund，規模細，資產少，與其話係基金，其實只係家族資產管理公司，主要幫屋企親友打理資產。 有人猜測，陸東咁做可能性之一係，有人半賣半送，呢件華保，隻殼算係乾淨。用名人效應執下，短炒一番~ 呢個效應，其實早幾年都match過，咪等於當年瑞銀Joe Zhang入深業控股一樣。

大家記唔記得得港交所上市委員會改組，加入左咩人? 相信與我一樣，大部分都無咩印象，呢個一定記得，和黃的法律總監兼公司秘書「施熙德」。 因為誠哥擺明車馬反對，估計「施熙德」會為華資財團發聲，因此肯定可以預見推行季度報告會凍過水。 果然不出所料，港交所已經決定讓步，話由於要更全面檢討推行季報問題，所以將討論工作由原定今個月，押後五個月、到11月先進行。 問題是點解要五個月時間咁耐? 是否太過睇少新加入董事的適應能力? 成日口口聲聲話要做國際金融中心，而家除左歐、美、日本，連內地都要求上市公司發季報，成個亞太之中，剩底香港同孟加拉未推行季報。 單睇呢點，唔使2020年，睇怕香港已經被上海取代。 談到上海，有意見提出，港股應該提早開市，配合上海交易時段。 到底實際上有沒有需要? 單看越嚟越多A、H股同步上市，甚至曾經都發生過，有同時兩地上市嘅公司，因為「前後腳」 停牌、造成交易混亂。 聽聞呢個建議、係有人在飯局中主動向港交所高層提出構思，不過董事會內就無認真傾過呢個問題。 但上海要做大，香港要融合。同步開市有實際需要。 經紀團體就睇成交，但如果從整個長遠發展嚟睇，港股六成市值係嚟自中資股，單係呢點，已經有理據支持交易時間就算唔一樣，都要相近。 金管局研究發現，到呢一刻為止港股仍然較受美股影響，佢地計過美股每郁一點，港股受影響0.63點，相反內地市一點變動，只係對恒指影響0.43，但長遠，呢個系數會不斷提高，如果一個唔覺意匯豐，中移動落實到A股掛牌，你香港仲遲人半個鐘開市，咁就大件事! 其實正如歐洲，英，法，德三大交易所，都係一齊開市。香港同上海作為同一時區，市場基本上一樣，只係缺乏融合，將交易時間拉近，唔少機構投資者其實係舉手贊成! 香港依家股市交易時間得四個半鐘，只係多過內地半粒鐘，比新加坡少兩個鐘。 有人企圖混淆視聽，說既然跟內地開市，又是否要跟內地收市? 要搞清楚，我們要搞長時段不是為睇齊而睇齊，目標其實是搶更多生意回來。如果內地覺得做夠，我地咪做多一個小時，希望可以搶到多一點就一點。 延長交易時間，將場外交易，納入場內，早喺八年前，港交所已經好認真諗過，當日諮詢文件，是比較大咬。 當日希望將交易時間，由朝十到晚六。另加晚間時段，晚八至晚十。 當日目標係建立橫跨歐美時段。但由於，四點後銀行收工，執行T+2交收結算有困難，結果搞唔成。 局內人話，如果銀行唔配合，要將收市...

喺奧巴馬金融業改革方案中，伯南克領導嘅聯儲局擔任最核心嘅角色。 方案授權聯儲局監管「系統性風險」，大型金融機構出現財困時，聯儲局可以接管佢地。 但「有賺亦有蝕」，聯儲局亦要交出監管房產信貸、同信用卡的權力，轉移到新成立嘅「消費者金融保護機構」。 咁到底係得嘅多、定失嘅多? 前聯儲局理事克納茲納話，肯定係失嘅多。 新方案除左變相削減、監管銀行按揭同信用卡業務嘅權力，同時聯儲局需要事先得到財長書面批准，先能夠向AIG同貝爾斯登呢類問題機構緊急貸款，加上唔能夠直接監管小型銀行，聯儲局內部消息話，咁會會削弱佢地監察系統風險嘅能力。 最令聯儲局內部不滿，係報告入面，財政部對聯儲局角色嘅形容。 一方面表揚聯儲局增強左監管，但同時批評措施做得太遲、亦未有對消費者作出應有保障。 報告亦比左財政部有權檢討聯儲局架構，目前決定利率嘅公開市場委員會十二個成員中，除左紐約聯邦銀行行長外、其餘四個係由十一間地區聯邦銀行鄰選出任。 克羅茲納話，地區行長唔係政治委任，可以代表來自各州各省的聲音，一旦改變呢個結構，會令聯儲局面對政治干預，失去獨立地位。 實際上聯儲局可說是內外受敵，多名國會議員已經表明反對今次金融改革方案，他們認為聯儲局在海嘯中是後知後覺，似乎不大認同伯南克應該可以獲獎。 當然，仲有一個薩默斯，對主席一職正是虎視眈眈。 諾貝爾經濟學獎得主克魯明話，贏家仲有金融機構，佢地都會對改革方案歡呼，因為銀行一旦被認為對系統構成風險，無論係傳統銀行、定所謂「影子銀行」都會被拯救。

被形容為過去60年來最激進金融業改革方案，聯儲局到底得的多、還是失的多? 美國總統奧巴馬在方案公布前說，聯儲局喺今次金融改革中，最適合擔當更重要嘅角色，負責監管整個金融系統。 呢分85頁嘅方案，會賦予聯儲局權力，喺有需要時候可以隨時接管有問題金融機構，同時亦可以調查佢地海外分支機構帳目。 不過聯儲局日後要運用急緊向外借貸權力時候，就需要先取得財長書面同意，同時財政部亦 有權力檢討聯儲局嘅架構，包括直接提出建議增加透明度。 其他改革方案大家早有所聞，包括會成立一個新嘅聯邦機構，專責監管按揭同信用卡呢類消費相關金融產品，以及限制銀行高層薪酬同進一步監管衍生工具。 表面睇，伯南克負責的範圍的確有所擴大，但以前的獨立王國將一去不返，日後下下問責，覺唔覺幾似我們的金管局及特區政府關係? 說到伯南克，上任以嚟，佢嘅學術研究大派用場。但近日學者開始批評佢超寬鬆貨幣政策後遺症太多。 出年年初任期完結，決定佢係咪可以延任嘅奧巴馬讚揚伯南克，喺處理金融海嘯嘅表現，令佢留下深刻印象。 但當華爾街日報記者追問係咪會延長伯南克任期，奧巴馬只係話，依家唔會炒作任何相關新聞。 各位，覺唔覺留左條「尾巴」比薩默斯? /////////////////// 說到金融監管，真係要睇下呢位大鱷之言。 索羅斯喺金融時報撰文，提出美國金融業改革嘅三個步驟，包括政府要確保泡沬不致於過大、監管者要控制信貸增長，而政府喺市場失衡時候必須出手干預。 索羅斯特別點名批評前聯儲局主席格林斯潘，指佢一直拒絕承擔責任，唔願意防止泡沬進一步澎漲。 講到最尾，先至係戲肉。 索羅斯話佢對衍生工具好有意見。 佢提出自己一直唔贊成過分監管，但對於衍生工具市場、佢認為發行同交易嘅監管，應該要等同證券買賣，有相同嘅標準同透明度。 又特別針對違約交易掉期CDS，提出應該全面取締。 索羅斯以通用汽車為例，指部分債券持有人由於同時持有CDS，佢地寧願將通用破產都唔重組，因為咁樣反而有更多好處。 以比喻形容，買CDS，就好似買左另外一個人嘅保單、但同時仲有權利殺死呢個人取得利益。 佢認為呢啲「度身訂做」嘅金融產品，只係會增加銀行嘅盈利，對社會係「有破壞、無建設」。 其實索羅斯呢番表白不難理解，曾經講過喺零七年預見風暴來臨，決定出山入市，但結果只係能夠保住本金，根本賺唔到錢，難怪對CDS如此深痛惡絕。

鄧玉嬌免除處罰的新聞不單轟動全國，連華爾街日報網上報，亦在當眼處展示了這宗新聞。 新聞的來籠去脈大家必定較我清楚: 鄧玉嬌是湖北省巴東縣一間休閒娛樂場所的服務員，上個月10號，鎮招商辦主任鄧貴大、副主任黃德智同鄧中佳三個人去到光顧時，要求鄧玉嬌提供「特殊服務」被當面拒絕，雙方發生爭執。 鄧玉嬌反抗時，用刀刺傷鄧貴大喉嚨，令佢傷重不治。 我們不是港聞，想談的其實是內地網民勢力之巨大，已經演變成推動社會改革重要的一步。 鄧玉嬌案，內地主流媒體報道唔多，但一直在網絡上受到民眾關注。 甚至有人組織，專登到法院聲援。出席網民認為今次係一次輿論壓力的勝利。 看看案情變化亦知民眾壓力的影響。喺案發初期當局係以故意殺人罪，將鄧玉嬌拘捕，仲將佢送入精神病院。 不過各地網民就發動輿論聲援鄧玉嬌，又去當地表示支持。北京嘅學者同律師，亦公開促請當局追查真相。 民眾的龐大社會壓力，迅即令當局喺處理案件時，出現變化。 到5月31日，公安認為鄧玉嬌的行為屬於「防衞過當」，改控佢故意傷害罪，出庭前佢一直都被監視居住。 同一時間，之前以受害者自居嘅兩個涉案官員黃德智同鄧中佳就被撤職，受傷嘅黃德智更被開除黨籍同拘留。 最終檢察院認為鄧玉嬌喺制止官員不法侵害過程中，反抗行為明顯超過必要限度，屬於防衛過當；但佢主動投案自首 建議減輕或者免除處罰，所以免除處罰、當庭釋放，鄧玉嬌喺母親陪同下離開法院。 好明顯，今次案件過程充分顯示咗內地嘅網絡力量。 講到網絡的力量，內地官方指定出廠電腦、要安裝嘅過濾軟件「綠壩」，更是經典中的經典。 網民合理質疑綠壩是官方「過濾色情為名、希望拑制言論自由為實」，認為是推行「實名制」的第一部。 面對民間龐大的反抗勢力，官方亦「施壓愈大、反抗愈大」的道理，終於在上周末公布，綠壩一如其他電腦軟件，可以由用戶自行拆卸及反安裝，既然如此，點解仲要強制廠商裝上? 說來搞笑，用作防毒過濾的綠壩，居然被指盜用美國一間公司、研發嘅過濾軟件，真係唔知大陸搞邊科。 //////////////////////////// 近日有機會與內地軟件開發商傾偈，大家都讚嘆我國內地網民數目之龐大，以及投入之程度，全世界都難以比美。這個現象，相信是由一孩政策所做成，他們終日無所事事，就將時間全放在上網上，經常在網吧流連七、八小時，基本上形成了一個獨特的社群，既獨立又團結。 真有興趣知道，到底這股力量未來會扮演甚...

索羅斯，羅傑斯，同巴菲特，被譽為當今三大投資高手。 對於當年同佢一齊打江山嘅羅傑斯，索羅斯回憶，同呢位舊拍檔當年一齊好成功，又讚對方分析能力了得。 兩人更善於運用沽空，六十年代末期一齊創辦量子基金。 分道揚標，各走各道之後，幾十年來兩人似有共識，就是好少評論對方。 索羅斯今日打破沉默，佢話，舊拍檔係佢「手下」。 對於佢嘅能力，索羅斯相當讚許，話佢係非常能幹分析員，做事好有效率，甚至係工作狂。 羅傑斯曾經講過，同索羅斯喺基金發展上有唔同意見，所以離開。 索羅斯話，對方同佢投資理念相近，當日一齊合作，好成功。 但就提到，自從拆伙後羅傑斯就難復當年勇。 至於股神巴菲特，索羅斯直接了當話，對方奉行嘅價值投資法，同佢完全唔同，亦唔認同巴菲特讚賞內地處理金融海嘯係成功嘅講法。 對於呢場金融海嘯，呢位年屆79歲金融大鱷曾經說過，這是一場「範式」轉移，即是人在極端貪婪追求財富弔，引發的悲劇。他說，舊年同格林斯潘見過兩次面，對方終於認同佢嘅睇法，就係崇尚金融創新，最終係要付出重大代價。 對於十一年前索羅斯為首嘅對沖基金沽空港元，同期指。最後要迫曾陰權，任志剛用過千億入市。今天回首，大鱷讚當時嘅香港財金官員做得好，值的有一個Credit。 九十年代起，先有沽空英鎊，繼而有多個亞洲貨幣被佢連番狙擊，以哲學家自稱嘅索羅斯話，佢嘅行動係合法，所以不應以道德標準去評價佢。 至於今場金融海嘯，索羅斯話，佢喺零七年就預見風暴即將來臨，就決定出山再度入市，但結果係大鱷都垂垂老矣，賺嘅錢唔多，只係保住資本，依家佢又回復退休生活。

金磚四國領袖首次峰會，市場最關注，當然係四個新興國，係咪會減少外匯儲備中嘅美元資產。 不過，會前，俄羅斯一改口風，財長「庫德林」喺意大利出席八國會議後表示，強調美元暫時，仍然難以取代。又話俄羅斯，會買更多美國國債，喺可見嘅將來，美元嘅地位都唔會變。 俄羅斯總統「梅德韋傑夫」月初先高調提出，會減少美元資產比重，點解臨時轉馱? 說到底又是口惠而實不至，出口術話減持美元，但實際上為左遏抑貨幣升值、對出口嘅影響，中國、巴西、印度同俄羅斯，上個月就合共增持超過六百億美元資產，正係反映利益根本係一致。 俄羅斯會前，一再重申今次首腦會面，唔會傾到新國際儲備貨幣問題。不過巴西副外長就表明，會議一定會傾到應對金融危機，點樣擴大新興國家喺國務事務嘅話事權。 由於上星期政府拍賣三十年期長債，反應比預期理想，恢復市場對政府長期借貸能力嘅信心，十年期債息由四厘嘅七個月高位，降至３厘８以下。 總值110億美元三十年長債，總投標額接近295億美元，超額認購「1點68倍」，係舊年5月以嚟最高，包括外國央行在內嘅間接投標，參與率4成9，比過往平均嘅兩成六，高好多。 不過，中標利率就升到4厘72，係近兩年以嚟最高。 好在有個日本出來支撐美元，話美債無可取代，結果亦都推高返美債美元。 在下個月G8開會前夕，各國根本就是各懷鬼胎，希望可以掏空IMF這個大金礦，但要面對美元大崩潰的可能時，大家又明白利益原來是歸於一致。

今期經濟學人封面值得大家細心去看。 一個正在學爬的Baby，本來就是專心向前行，但奈何腳上鎖住一個大鐵球，就係象徵世人借貸過多、呢一代人根本還唔起錢，要下一代、未出世就要孭債。 經濟學人話，以今日十大發達國家計算，國債佔GDP比重，會由而家百分之七十八，增加至五年後百分之一百一十四，每個市民都要孭起最少五萬美金債務，實在是非常可悲! 美債息上升，正係反映投資者對通脹前景憂慮，呢個亦都成為八國財長會議嘅核心爭拗。 經過兩日會議，八國集團財長聯合聲明雖然同意、需要開始研究逐漸解除早前用嚟應對金融危機嘅措施，不過英美同歐洲之間仍然就撤出嘅時間有顯注分歧。 美國財長蓋特納重申、保持增長仍然係政策重點，而家係太早說經濟會全面復蘇，要撤出剌激經濟方案更是不可行。不過德法財長對於蓋特納說法就大不以為然，表明他們更擔心通脹惡化。 撤出的問題又何止令蓋特納苦惱，聯儲局主席伯南克亦會在月底公開市場委員會會議，討論點解決呢個「撤出的藝術」。 聯儲局內部認為，經濟已經開始回復正常。所以唔會再大規模增加回購債券，同按揭資產嘅計劃。 聯儲局較早前計劃，八月底前收購三千億美金國債，同按揭資產，依家進行左一半有多，當局係咪執行回購政策，可以視乎經濟情況，彈性處理。 而月底會議亦會討論點樣有秩序，退出量化寬鬆政策。 對於今次退出的時機，經濟學人提出日本的經歷絕對要引以為鑑，當年政府希望透過加稅，增加消費稅了及其他稅項，結果對剛復蘇的經濟又變成一池死水，最終出現了所謂迷失十年。 經濟學人提出，可以考慮透過政府公開承諾，向公眾交代削減開支的方案，一旦經濟復蘇就要撤出市場，只有持之以衡執行方案，這樣做才能贏取公眾的信任。 不過對於一個政客來說，一個這樣的政治承諾幾等同政治自殺，試問又有誰有這個膽量?

今個星期，對淡友嚟講，可以話連最後依靠都無埋。 如果用淡支聯盟大解散做標題，都不為過。一直被認為係淡友之中嘅中堅分子，無論係前聯儲局主席沃爾克、同新末日博士魯賓尼，呢個星期都開始有啲轉軚，相信經濟開始有復蘇跡象! 但講到影響力，都係數今屆諾貝爾經濟學獎得主克魯明。 一句經濟衰退最快可以喺夏天完結，就推高左環球股市、匯市以至商品市場資產。 佢影響力之大，就連今期經濟學人都有篇專文係講到佢，特別係克魯明一連三日，到左倫敦經濟學院LSE演講，三場講座都有兩個核心問題，第一係點解經濟學唔能預測到今次金融風暴，第二就係經濟幾時可以真係走出衰退。 第一條問題，克魯明話好多經濟學家、包括佢自己都好早估到樓市泡沬會爆破，只係預測唔到爆破嘅後果，會係咁嚴重。 另一個經濟學家嘅「盲點」，係「金融系統」。 就好似克魯明本書「The of Depression Economics」「蕭條經濟學」咁講，係監管機構乏視左「影子銀行」Shadow Banking帶嚟嘅系統風險，結果就係呢個乏視，成為左金融海嘯最大源頭。 克魯明話，其實影子銀行類似嘅經驗，只係重覆三十年代大蕭條時候、信託公司泡沬爆破嘅歷史，可惜經濟學家係無法準備預測到。 對於呢一點，克魯明不無感慨，佢話當貨幣政策將利率減到零嘅時候，仍然無法刺激消費，就需要由財政政策去推動。 但好可惜，過去幾十年喺經濟學上，對財政政策最權威嘅研究，只是停留在凱恩斯年代。 克魯明形容，過去三十年「宏觀經濟學」係毫無吋進，好些的，只可以說是毫無建樹，差的一些，部分嘅理論更家係累街坊! 咁未來又點，係咪好似克魯明早幾日咁講，到左夏天就真係咩事都無? 佢個日其實只係話到左夏天，衰退就會結束，但前景呢?其實佢唔係咁樂觀! 克魯明話，過去經濟嘅蕭條，特別係泡沬爆破之後，唯一嘅出路就係要出口救市。 但環觀而家全世界，就算中國都無呢個能力，因此除非搵到一個新嘅星球可以同佢做生意，否則復蘇之路只係又漫長、又痛苦! 不過我就估克魯明自己一啲都唔痛苦，你睇下佢最近一個月，先後飛去日本、北京、上海、南韓、台灣、去埋香港，最近到倫敦，有內地傳媒爆料每場Talk都要收番過百萬，保守計下，都有過千萬收入，一啲都唔痛苦!

美國雖然經歷金融海嘯，不過要挑戰佢世界霸主地位，一啲都唔容易。 不過有四小子一於無有怕! 代表新興市場嘅「金磚四國」BRIC，下星期就會雲集俄羅斯，討論儲備貨幣問題。 而作為會前「熱身」，俄羅斯同巴西都率先表態，話會減少外匯儲備中嘅美元資產，準備購買國際貨幣基金組織債券。 金磚四國一致行動，先有俄羅斯同巴西都表態，會減持外匯儲備中嘅美元資產，轉而購買由國際貨幣基金組織發行嘅債券，各自會購入嘅規模大約一百億美元。 「金磚四國」之中，除咗俄羅斯同巴西外，中國同印度，都會減少外匯儲備組合中，美元同美債嘅比重，中國將會購入大約五百億美金嘅「基金組織」債券，印度購入嘅規模，亦同中國嘅差唔多。 目前金磚四國喺基金組織嘅投票權，加埋都唔夠百分之10，好難同美國匹敵。 金磚四國今次嘅行動，有助擴大佢地喺「基金組織」呢類國際金融機構嘅發言權，制衡美國喺基金組織「一言堂」獨大嘅情況。 主席胡錦濤，下星期會出席喺俄羅斯莫斯科附近嘅凱薩琳堡，舉行嘅金磚四國首次峰會，商討美元嘅「國際儲備貨幣地位」問題。 目前金磚四國，加埋嘅外匯儲備，大約有2萬8千億美元，淨係中國就有大約兩萬億，而且主要係美元資產。 峰會嘅決定，對美元同美國債券後市，有主導作用。 高盛指，金磚四國已經減持緊美元，「沖淡」美元貶值，對本身外匯儲備所造成嘅損失，包括中國在內嘅國家，已經將持有嘅美國政府長年期債券，逐步轉為短期債券。 美國財政部最新拍賣嘅１９０億美元十年期債券，各地央行為首嘅海外認購，反應雖然踴躍，但市場要求嘅利率，就明顯高咗，反映央行對長債價格，態度審慎。 可以睇下淡友中堅分子、「末日博士」魯賓尼點睇，佢都認同美元儲備貨幣角色、無可避免受削弱，雖然唔會一夜之間出現，但長遠一定會發生。 個個都唔願意買長年期美價，債息自然係升完又升，琴日一度見過四厘嘅八個月高位，結果係扯高埋三十定息按揭利率，升到去五厘七九，比兩個星期前升左八十點子，對樓市都咪話唔傷。 華爾街日報計過，當按揭利率跌至五厘以下時，可以幫到萬幾二萬個家庭，每年透過轉按可以慳番二千五百美金，而家利率升返，當然一切就化為烏有! 其實債息上升真係對啱啱復甦嘅樓市又打一棍! 睇下斷供情況，就知未有改善。 五月分美國斷供宗數達到三十二萬一千四百幾個，按年增加左一成八，係連續三個月喺三十萬宗樓上。 即係每三百九十八個美國家庭之中，有一個就會斷供，其中重災區繼續係內華...

今日拆局講下地鐵。 說的是內地興起的地鐵熱。 近日，內地批准廿三個城市，大搞地鐵，規模過萬億元人民幣，佔左4萬億刺激方案四分之一! 當局認定，無論新建，定添加，地鐵始終可以搞活經濟，配合內需，支持到底。 就連地鐵都可以如斯快啟動，阿爺四萬億大補針肯定有效，就連摩通，定瑞信陶冬都認同，中國肯定成為全球最早復蘇 經濟體系。 但東方有東方喜悅，西人有西人嘅疑問。 就係呢場經濟復蘇速度嘅競賽。口說四萬億，但代價不止此數。 嚟自華爾街日報，以隱藏代價為題，印證四萬億背後有更大隱藏代價。 理由係，四萬億方案中，中央阿爺只係認頭四分一資金，其餘要由各省市自已出資搞掂。 問題係，唔少地方政府一係唔夠錢，更差嘅係將中央撥落嘅資金新債還舊債。於是乎，地方政府出錢刺激經濟嘅銀碼，只係得原先預算嘅四成八。 於是乎，地方政府先以國企名義借錢，同時間喺中央擔保下，大量發債。華爾街日報話，呢的擔保性質債券，唔反映喺中央財政損益表中，即係同SIV差唔幾。 但粗略估計，頭五個月金額已經過左二千億，舊年條數加埋乘二，都追唔上。 亦因為呢的收收埋埋幾千億，內地整體債務負擔，根據報道所講，佔國內生產總值三成半，遠比官方所講嘅一成六高。 還看歷史，中央發債支持經濟其實毫不手軟。零二年朱鎔基就曾經講過，中國連年財赤，但只要幫到經濟，發多點債，無問題。 到底西方人，係咪小題大做? 基建幫經濟，環顧當前中國經濟結構，亦係命中率最高一範。因為內需佔比例細，出口一定唔得，捨基建，又有誰代替呢? 因此我未來會見到一條條地鐵通車、一氣條大橋落成，但有無人使用是另一個問題。 話說回來，內地愈來愈多城市起地鐵，項目肯定需要人管理，港鐵咪即係好有景?

港股又報捷，靠嘅係一個美元弱勢。 仲有人係明顯現玩嘢! 眼見美元弱，俄羅斯中央銀行突然提出、計劃減少美債嘅投資比重。消息拖累美債價格以及美元下跌。 俄羅斯央行話，外匯儲備持有嘅美債比重，將會減少，轉為購買由國際貨幣基金組織發行嘅債券。 唔知係咪贈慶，又或者知道美國忌中國三分，俄央行話，如果人民幣日後成為新嘅儲備貸幣，將會進一步分散外匯儲備嘅投資組合。 呢的真係趁你病、攞你命。 消息觸發美元大跌之餘，唔止商品貨幣、甚至連歐元同英鎊呢啲大大隻儲備貨幣，單日都急升超過百分之一，可以說相當罕見。 利差交易令資金又由美元流入風險資產，油價升百分之二、係七個月高位。 環球股市受刺激升超過百分之一，亞太股市三日嚟首次回升，日本迫近一萬點，係八個月高位。 各地都傳出利好消息，澳洲消費信心錄得２２年最大升幅，收市升超過百分之二。 不過講信心都唔夠我地內地股市，頭五個月樓市銷售突破一萬億人民幣，樓市相關投資增加左百分之六。股市連續三日上升，上證指數，十個月以來，首次突破二千八百點。 鄧普頓基金嘅麥樸思繼續發表牛市論，「光頭佬」話，中國股市已經步入大牛市，甚至可以帶領全球股市復蘇，佢特別睇好資源股，認為現價仍然係低於內在估值。 其實唔止外圍，港股後市一樣視乎美元走勢。美元同港股嘅關連系數，係零點六三個百分點。即係話美元跌，港股表現相對會好。 因此推動港股大幅反彈７百點，升幅百分之４，差一百點已經迫近六月初高位，可以留意係五十天線同二百五十天線差距，不足四百點，即係所謂嘅「黃金交叉」，未來幾日要好好留意!

很不想用這個形容辭去說一些評級機構.... 不過真的是太離譜。 基於出口數據疲弱，惠譽將本港全年經濟增長預測，由原先嘅負百分之六點四，下調至負百分之九點一。 根據惠譽預測，香港經濟收縮程度，喺區內僅次於新加坡同台灣。 至於中國經濟，就估會增長百分之５．６，呢個預測嚟緊就有機會上調。 我哋先睇吓市場點睇香港今年經濟。 基本上，各大證券行同銀行嘅預測，都比政府估嘅、收縮百分之５點５至６點５高。 較樂觀嘅渣打同大摩，估全年經濟收縮唔夠百分之４，睇得較淡嘅摩通，都只係估收縮百分之５點５。同惠譽嘅估算有好大出入。 諷刺的是，惠譽話，區內出口最壞情況已經見咗，但嚟繄仲要面對一段低增長時期。香港出年經濟亦只會輕微增長百分之１．２。 問過啲經濟專家，佢哋都話唔明惠譽點計數，話佢哋有啲離譜喎。 事關本港經濟照計頭兩季會最差，正好惠譽自己講，下半就會好番啲。 要衰到全年負９點１，意味第二、三甚至四季，經濟增長都會差過第一季嘅負７點８，平均要跌百分之９點５先夠數．．． 又或者、單係第二季就急跌到負十五、二十嘅境地，但睇現況，定而家都到尾尾，又未見係咁差喎．．． 仲有唔好忘記，舊年第二、三到四季，本港ＧＤＰ都係一路放緩，基數一路跌，點計到今年仲會再跌咁多呢﹖ 所以有陰謀論就話，大家與其諗惠譽點計數，不如諗吓背後有咩動機。 講真，今時今日，評級機機真係好多嘢估佢唔到，舊年海嘯打到埋身，市場鬧佢哋後知後覺，無做好評級把關，而家，各方面情況似回穩啲，惠譽嚟過大唱淡，話出年至會回復輕微增長，難免令人覺得別有用心。

債市，四日以嚟終於首次回升，債息特別係短息顯注回落。 除左係克魯明效應，仲有係財政部容許十間銀行償還救市基金既名單。 氣氛叫做回穩，而利率期貨顯示，十一月聯儲局加息機會率，雖然由上星期百分二十四，升至六成二，不過比琴日七成已經係稍為回落! 有債券交易商私底下話，打死都唔信研究「大蕭條」出身嘅伯南克，會揀呢個時候加息，認為利率期貨失效先真、估計明年中之前都唔會加息。 事實上，經濟未復甦，不過一個通脹預期，就令利率期貨反映，年底有加息機會。 但彭博訪問左十六個主要債券交易商，除左一個唔覆，十五個都一致預期聯儲局今年內都唔會改動利率，法巴、大摩、瑞銀、瑞信、花旗估計最快到要明年下半年先有機會加息，滙證、美銀、高盛同巴克萊更預測要到二零一一年下半年，先會加息。 瑞銀話，期貨市場有失效情況，喺高失業率下，加息係無可能嘅事。 /////////////////////// 市場擔心通脹，其實聯儲局主席伯南克何嘗唔係。 面對聯儲局「量化寬鬆」政策，過去一年向市場提供龐大資金，令聯儲局本身資產負債表澎脹左一倍，超過二萬一千億美元。 但正係呢啲龐大嘅銀根，直接推高對通脹嘅預期。 面對呢個兩難局面，經濟學人建議，聯儲局可以繞過財政部，直接發行短期票據、吸納銀行體系過多資金。 不過伯南克已經拒絕左呢個建議，認為無需要呢個額外權力，咁做亦避免日後要面對更大政治壓力。 相反，伯南克準備向銀行存喺聯儲局嘅存款儲備支付利息，避免過多資金流入市場推高通脹。 不過有分析指，咁做等同向隔夜以上嘅短息調高利率、好可能會引致市場波動。

有無諗過一個人嘅言論可以影響全世界股市? 以前有格老、而家伯南克，甚至我國總理溫家寶都有好大影響力! 但我講緊、只係一界學者? 咁應該都係佢，今屆諾貝爾經濟學獎得主克魯明。佢一連三日喺倫敦經濟學院發表演說，首日題目係「Sum of all fears」，不過內容同題目相反、話大家唔需要再「恐懼」! 係大淡友轉軚睇好經濟先真! 佢認為衰退好快結束。相信到左九月分，官方有好大機會會公布、經濟喺今個夏季擺脫衰退。 就係呢個預測令美股由跌轉升，亦一度對港股有刺激， 其實呢部由多位金融，經濟界名家合著嘅「轉軚實錄」，精要係教曉大家，轉軚之道，在於「唔怕醜怪，最緊要快」! 真係要詳細拆解下克魯明轉軚之謎! 原本手執我是淡友篇稿，尋日決定「GOLDEN RETREAT」。 克魯明幾個月前話，美國可能成為愛爾蘭第二。早排市況好番，佢喺香港仍然話，美國經濟未得。 點知到尋日終於改口。節錄成句就係話，如果美國經濟到夏天完結衰退，佢一的都唔意外。 佢唔意外，但市場就好意外。一句說話，成為升市功臣。果真係魯明一出，誰與爭峰!! 淡友之路非單程路。U TURN亦無可厚非。 始終呢場海嘯百年難得一見，修改睇法，問題不大。 回顧一下經典轉軚實錄。 零六年起，警告美國樓市好大件事，次按有排搞嘅羅伯特，即係「非理性繁榮」一書作者，早排已經公開呼籲要買股買樓。 著名投資者方面，買債就諗起佢嘅格羅斯，轉左VIEW，唔建議再買美債。 而一直建議沽空金融股嘅羅傑斯，前幾日亦轉調子，話千其唔好沽空金融股。 咁如果之前跟咗嘅點算?!! 投資環境轉變，投資意見調整好自然。但對經濟大環境仍然睇淡，係咪買少見少? 末日博士魯賓尼，仍然話經濟復蘇係假象。但翻查佢公開言論，已經無之前咁睇淡。 而最堅持嘅仍然可以數到佢，就係前聯儲局主席沃爾克，對經濟睇法，由舊年第三季起，相當一致。 戰友相繼中途告辭。淡友大聯盟開始解體。 香港呢度，唔認係末日博士嘅羅家聰博士，有無改變佢睇法呢? KC話佢一直都係認為經濟可以短期見底，不過呢個底並非真係低位，因為今次衰退會係相當蔓長。 真係無改到View.........

新一代「iPhone 3GS」出場， 8激版終於減價， 不過美國AT&T上台價， 大減１百美金，減到９９美元。 但喺 本港 ，淨機價雖然由上月底標價5400元， 減到4288元， 但仍然貴美國一大截，好難入手.........

今日環球股市都要急跌，原來係怕「息魔」殺到。 我地其實都討論過好幾日債市，呢個「先行指標」、美國十年國庫券息率、今日又升至三厘九嘅七個月新高，表面睇真係最壞情況已過去。 不過呢個此終係長息，但原來短息都有上升壓力啦，利率期貨顯示，十一月聯儲局加息機會率，由上星期24%，急升至七成以上，反映利率真係好大機會會調頭向上。 當然目前說加息是言之過早，不過單看市場反應，由於預期聯儲局好大機會會喺短期加息，兩年期短息急升左33個點子，係八個月最大升幅，亦進一步拉斜孳息曲線，令人更憂慮未來通脹預期可能進一步惡化。 前聯儲局主席格林斯潘，喺05年連續加息六次希望降低通脹，不過長債息率不升反跌，格老形容呢個係佢解唔開嘅「債息之謎」。 同樣嘅出謎團，而家出現喺現任主席伯南克身上。 雖然減息到貼近零，仲大印銀紙，收購總值一萬七千幾億美元嘅債券，不過長債息率就反而期節節上升。 到底係咩原因做成呢個「債息之謎」? 表面當然係經濟復蘇，非農業新增職位只係減少左三十四萬五千個，係8個月以嚟最少，佔八成以上就業人口的服務業職位更係大幅改善。 不過紐約大學教授「魯賓尼」、就睇唔到有「Green Shoots」，反而用「貧血」(anemic)去形容目前環球經濟，認為復甦只係假象。 事實上，長息上升，已經令三十年固定按揭利率，由四月時四厘八五，上升至五厘四五。 就連近日屢創新低的倫敦銀行同業拆息，亦掉頭向上。 美國「標普席勒」樓價指數未有止跌跡象，指數創辦人、耶魯大學教授席勒，話樓價根本毫無反彈跡象，預計樓價到二零一一年前，仍然係要下跌。 //////////////////////// 除左息口上升之外，好似魯賓尼咁講，Delevering「去槓杆化」嘅過程，都仲未完成。 市場風險仍然係非常之大，大家都成日聽到我地提著歐洲，最新又有標準標爾調低愛爾蘭長期主權評級，由「ＡＡ＋」降到「ＡＡ」，評級展望係負面，係三個月嘅第二次。 標普話，如果當地銀行資產質素惡化情況、比預期嚴重，唔排除會再調低評級。 反映愛爾蘭信貸風險，嘅信貸違約掉期、喺當地評級被調低後，由215點子升至222點子。

知唔知近期，無論學者，分析員好留意一樣野。 係個「電錶」，依家內地學術界，同分析師有一個辯論，就係經濟好番，但發電量竟然不升反跌。 按數據計算，發電量，又或者係用電量，對經濟表現嘅「關連繫數」係「一」，即係關係直接，瑞信更認為中國發電量 ，係環球經濟復甦最重要指標! 不過由於近大半年，發電量持續跌，外界有唔同解晝。 理所當然懷疑係經濟未真正改善。更誇係，國家電監會前副主席邵炳仁所講，有人造數!! 報大左經濟數據，不過官方解釋係，能源效益加大左，用少左電!! 用電，同工業生產兩者之間，關係相當密切。特別係零一至零三年間。但舊年第三季起，差距擴大。 五月分，內地最新發電量，仍然錄得按年跌幅百分之三點五。花旗話，數字正一日一日改善、一月一月咁進步，無問題! 不過，法巴就認為，佢一日唔見到發電量升番，都證明唔到俾自己睇，內地經濟真係復。 電廠發電後，電去左邊? 內地統計顯示，民用電力只係佔整體發電量12%，其餘八成幾，係輕工或者重工環節用。 產品結構轉型，用能源效率提高，係咪可以解釋到，用電量，同工業生產背馳問題? 產品結構轉型其實未出現，至於用電效率提升，高盛就話，仍然對理據有保留。 大陸依家仍然用煤發電為主，佔超過六成比重。五月頭十日計，煤發電量跌左半成，但水力發電量升兩成幾，咁會唔會解釋到問題所在? 分析話，影響好少。因為新能源佔比重仲係太細，無可能扭轉到。 反而里昂就計過條數，話係鋼鐵行業出事，令到用電量大跌。里昂將用電量細分，拆出嚟遂個睇。 結果發現，如果將鋼鐵用電量條數抽走，用電量頭一季其實已經回升番。 拆局之下，即係經濟無做數，用電量低係鋼鐵行業問題，有內地專家話，鋼鐵業係經濟環節中，較滯後一個，所以用電量跌，唔應該大驚小怪。

美國最新公布就業數據，由於減少職位少過預期，只係無左34萬5千個，係8個月以來最少，無論債市、匯市都出現大幅波動。 看住路透部報價，10年債息由3.75厘上到3.8厘，跟住上到3.88厘，最後沖埋上3.9厘，突破六個月高位，利率期貨更反映出年一月就會加息，好像告訴大家經濟真的復蘇了。 慢著，失業率不是上到9.4%，是83年以來最高，時薪仍然下跌，企業仲喺度裁員。 市場隨即又回歸平靜。 話說回來，仲記唔記得任總喺佢最近一次「七點半」簡報中，提過其中一個佢最擔憂地方，係聯儲局點係撤出而家量化寬鬆政策! 今期經濟學人都有批評，話其實係聯儲局主席伯南克自己一手做成! 咁咪即係「賊喊捉賊」? 伯南克星期三先講過，債息急升，原因係市場擔心財赤不斷上市。 經濟學人就批評，聯儲局推行嘅所謂「量化寬鬆」政策，根本就係印銀紙，目標係透過收購國庫券同企業債券，推低利率。 不過大量銀根，就令銀行儲備由往日平均一百億美元，增加至九千億美元，銀根過分充裕結果做成通脹預期。 經濟學人認為，通脹預期先係真正推高債券息率原因，好似係美國十年期國庫券息率，回落左兩日後又再回升，同財政部發行、抗通脹票據息差，拉闊到近兩厘，反映市場預期未來通脹率會係百分之二。 喺舊年底，呢個差距係零。 債券孳息曲線，即係所謂兩年期同十年期息差，更拉闊至兩厘七九歷史新高，反映投資者喺通脹預期下，對長年期債券、要求更高回報。 太平洋資產管理話，通脹始終會重臨，投資者買債「宜短不宜長」。 伯南克領導嘅聯儲局，曾經被稱金融海嘯「救火隊」中堅成員。經濟學人話，做消防員，進入火場，第一件要知嘅事，係逃生路徑。 好明顯，伯南克唔識咁做。 要退出市場，經濟學人建議，聯儲局可以喺目前超過二萬美元嘅資產負債表中，向借錢銀行罰息，減少備用信貸。 但要減少持有嘅證券資產，就可能引起市場震盪。佢地建議聯儲局可以繞過財政部，直接發行三十日嘅短期票據、透過回購協議，將呢啲票據轉售比投資者，減少對市場震盪。

白高敦被譽為金融海嘯嘅救市英雄，多國都 "偷佢橋" 挽救金融業，相信佢自己勢估唔到呢刻、會四面受敵、比人 "迫宮"。 英國傳媒報道，一批工黨國會議員，聯名要求佢落台，仲係盡快喺下個月初，就要選出新黨魁，預料會有足夠議員支持，迫走白高敦。 有分析翻舊帳，話白高敦一手創立嘅FSA、金融服務局，當年喺英倫銀行手上削權，攞走金融監管權力，令到金融系統變得脆弱，間接導致Northern Rocks倒閉。 所以海嘯過後，監管架構即將還原，上議院建議英倫銀行重新掌權，一旦成事，FSA 就形同虛設，亦都將白高敦嘅威信踩多一腳! 金融市場一向最敏感，英鎊一度急跌300點子，原來都係傳白高敦會走，之後否認，個鎊先企穩返。 當然，要數番轉頭，白高敦亦可說是疚由自取，怨不得人。 兩日內，四個部長級官員宣布辭職，包括兩個閣員，最新一個，係捲入濫用津貼醜聞嘅社區及地方政府大臣「貝海珊」，佢喺地方議會、同歐洲議會兩個重要選舉前夕辭職，令白高敦大為尷尬。 白高敦面對落台嘅壓力，越嚟越大，英國傳媒報道，一批工黨國會議員，聯署要求佢辭職。 信嘅內容，認同白高敦過去十二年，為國家同工黨所作嘅貢獻，不過筆鋒一轉，但就話喺目前政治形勢下，為咗工黨利益，希望白高敦辭去首相職務，由新黨魁帶領工黨，參加下屆大選。 聯署信以電郵方式傳遞，報道話，已經有五十人支持，議員有信心，最終攞到七十五到八十個議員簽名，符合工黨挑戰黨魁嘅要求，迫走白高敦。 批議員連新黨魁人選都諗定，屬意由衛生大臣「莊翰生」出任，希望下個月二號前，選出接任人。 就連一向支持工黨嘅衛報都話，白高敦時代，已經終結，白高敦嘅命運，會唔會好似前首相貝理雅一樣，就要睇工黨、兩個選舉嘅成績，同會唔會再有閣員辭職，嚟緊呢幾日、最關鍵。 當然，仲要睇埋英國地方議會選舉、同歐洲議會代表選舉結果。 民意調查顯示，工黨支持度急挫，白高敦可能會改組內閣，希望扭轉劣勢，不過而家睇都係相當勢危。 翻查紀錄，近代嘅英國首相，好多都"走唔甩" 、被逼下台! 最出名嘅、要數鐵娘子戴卓爾夫人，９０年黯然下台，就連佢欽點嘅接班人馬卓安，都倒戈相向。 喺佢之前，被譽為英國最偉大首相嘅「邱吉爾」，咪一樣比內閣成員軟硬兼施，迫佢讓位! 其實最諷刺嘅係白高敦自己，當年被指係幕後黑手、帶動工黨議員聯名寫信，迫走貝理雅，估唔到，佢自己就...

對於近日債息急升，終於有一個較官方看法。 伯南克話，經濟可望喺今年底擺脫衰退，預計出年嘅通脹率，會比舊年下降，但就關注財政赤字惡化，認為係直接推高長債息率攀升嘅主要原因。 佢雖然話，之前嘅救市措施，對經濟起到支持作用，樓市有見底跡象、多項數據亦反映經濟收縮速度開始放慢，佢相信經濟會喺今年底擺脫衰退。 伯南克話，希望喺適當時候，以合適嘅速度「吸納番」之前注入市場嘅資金，確保未來唔會有通脹風險。 佢預計，出年美國嘅通脹率，會比「零八年」相對下降。 雖然聯儲局嘅資產負債表規模仍然龐大，不過一旦有通脹升溫，聯儲局仍可以加息，如果情況更壞，佢地仲可以出售資產，但強調呢個只係「後著」，唔係聯儲局撤出市場計劃嘅主體。 事實上， 以債息目前走勢，唔到伯南克唔憂心。十年期債息喺上星期升至3厘75嘅今年新高後，同兩年期債券息差、更創下2厘76嘅紀錄高位。 債息喺半年內急升1厘75，雖然喺蓋特納訪華後呢兩日有所回落，但一到3厘65左右又再影響到經濟所有層面，按揭利率就升穿5厘3水平，影響到新增按揭急跌左一成六，可能會拖慢樓市復蘇。 但要解決財赤、講就容易，做就好困難。 高盛就估計，到九月底財赤會急升三倍，增加到三萬二千億美元嘅破紀錄新高，比政府估計一萬八千億高出幾近一倍。 瑞信就相信聯儲局寧願美元崩潰、都唔希望債息持續上升，佢地同美銀都預期，聯儲局要加碼購買國債同按揭證券，推低債券息率。 財長蓋特納雖然派定心丸，話有決心可以將財赤由而家佔GDP一成二，回復至百分之三嘅正常水平，不過債券大王格羅斯就大潑冷水。 佢話隨著消費開支減少，美國經濟增長放緩，蓋特納削減財赤嘅計劃注定失敗，佢建議持有美元嘅投資者要分散風險，仲要愈早愈好，唔好遲過一啲中央銀行同主權基金，否則就係「執輸行頭、慘過敗家」。

英鎊七個月高位、歐元突破五個月高位、澳元更衝上八個月新高。 警鐘響起，美匯指數跌到今年最低，形勢危急，美國官員都要諗計救亡。 唔止靠美國財長「蓋特納」開聲、重申強美元政策不變， 仲出動埋中國同亞洲區內多國官員和應力撐美金，外電引述、熟悉中國外匯儲備管理嘅消息話，人行將投資美債，視為同美國合作嘅途徑，印度、日本同南韓嘅官員就話，美國主權評級被調低，對美元外匯儲備政策影響都輕微，因為根本搵唔到替代貨幣。 呢種聯手出「出口術」現象，近年都未試過，至少收到一些效用，又成功令美元回穩，美債息率亦終於可以喘定。 實體經濟數據越好，資金繼續唔駛避險，但過去兩三星期商品等貨幣升得急，可能會停一停，諗吓啲錢再泊去邊。 亞洲各國肯出手撐美元，唔係無道理，因為美元跌，亞洲貨幣就變相升值，其中印度盧布升上舊年9月以嚟高位， 印尼盾今年就升值百分之8，阻礙咗佢哋努力保出口救經濟嘅步伐。 區內國家都唔係坐以代斃，印尼央行就即日減息四分一厘，泰國同印度央行就連番入市干預，但暫時睇始終不敵外來龐大嘅資金炒作。

聽講大隻佬、阿諾舒華辛力加近排好唔開心，除左加州財赤一個問題，私底下都有心事! 應該會係佢嘅至愛之一嘅Hummer會變為國產貨。 應真來說也不是國產貨，仍然係Made in USA，不過，遲下變為中國品牌。 但提起準買家「四川騰中重工」，中外傳媒、以至內地分析員，完全摸不著頭腦，話唔知咩嚟。 HUMMER出名大食，用油多。 被譽為車中之霸，喺美國，HUMMER代表愛國象徵，因為原本係軍車，喺九十年代美國喺沙漠風暴行動中，風芒盡顥。 阿諾舒華申力加因為太鐘意，所以游說生產商生產民用板，最後1999年由通用汽車奪得民用版品牌生產權。 不過油價貴，食油嘅HUMMER銷售大跌，舊年銷量大跌5成。 今年嚟，銷售進一步跌六成七，全年加埋賣得七、八萬部車，正是雞肋一條，財困嘅通用汽車決定出售。 買家四川騰中重工就話，HUMMER品牌展示勇於探索，自由奔放精神，呢種特性唔會改變。 仲話，會維持原班人馬繼續，走出一路新路，HUMMER會繼續喺美國生產。 騰中重工係民企零五年先成立，業務包括重型機械，路橋設備。 一代品牌由中資接手，至少對3千名工人，以及代理商嚟講，交易係好消息。 說到底，中國認真威!!倫敦的士，同美國巨無霸依家都納入中資旗下。 但出面就話，呢兩件貨、都係好睇唔好食!! 要食大茶飯，都係要由中投領軍。意義重大嘅係，大摩批股，佢地有分接貨。 可以理解做溝淡，但亦可視為，中央正式解凍，俾中投呢類中資機構，重新投資海外。 中投之前無論入股黑石，定大摩，都蝕大錢，舊年決定閂閘。 據統計，08年海外投資只有入股私募基金JC FLOWERS一單。成個中投舊年拉勻計就仍然有大約一百億美金投資收益。 大家會問，美金跌，內地要搵回報。中投以至央企重新啟動海外收購，目標到底係銀行呢類金融機構同資源公司。 內地要做國際金融中心，爭話事權。依家無論工行好，建行好，全球市值雖然數一數二，但始於係地頭虫。要發圍，無間有國際經驗，同網絡嘅銀行，始終爭少少。 內地有專家相信，中投嚟緊入股嘅公司，只係投資性質，因為主權基金參與管理，唔岩規舉。 反而要留意係，幾大銀行，好有可能部署出手，併購海外銀行，喺香港銀行仍然目標。

見盡呢三個幾月嚟金融市場變化，投資者對商品、股票，甚至樓嘅態度由原本等下先，變為驚死執輸，手快有手慢無。 六月怪現象亦由此而起，包括股市長升，樓市不跌之迷，更甚係外界突然高叫高通脹來臨口號! 用低息環境資金多原因，解構三大現象唔難理解。 但經濟基本因素未改善，本港貸款又連續負增長七個月，錢無流入實質經濟，由小陽春，變為大陽春，到疑似經濟復蘇，未免快左的! 當中債市最令費解。 債市過去一向被認為最能反映經濟周期變化。不過呢個傳統智慧、可能受到挑戰。 長債息率近日不斷攀升，十年期債息一度升穿三厘六，同舊年低位兩厘比較，累積升幅一厘六五，照計係反映有嚴重嘅通脹，不過當下數據仍然是以通縮為主導，何解殺出一個通脹? 更難以解釋嘅係Yield Curve「債券孳息曲線」，即係三十年、十年、同短期債券息率嘅差距。 同兩個月前比較，孳息曲線係明顯進一步傾斜，特別係十年期同兩年期債券息差，拉闊至近破紀錄嘅兩厘七。 跟據傳統經濟理論，曲線愈斜、即係反映經濟已經見底，但事實係咪咁? 雖然近日連聯儲局官員都以此形容經濟表現，不過「新末日博士」羅家聰就相信，十年長息升嘅速度有古怪，表現根本就同經濟背馳。 佢認為在各國「揼錢」下，資金已經到左泛濫地步，有部分市場資金，由債市換馬至股票及樓市等資產，令長短息差已經失去預視經濟前景的功能。 昨日我們提出，各國大量印銀錢，資金只有去到投資、投機的活動，未見令真正的生產活動有改善。 因此先出現物價(資產價格)通脹，人工通縮的怪現象。 羅家聰相信，長債息率一旦迫近四厘，將會觸發資金大轉移，到時資產價格會有大調整，屆時無論股市、匯市、樓市、商品市場都會出現崩潰式下跌。 但短線睇，喺熱錢推動下，佢認為短期內環球股市仲會有爆炸性上升，之後先有大幅回套。 時間在幾時? 沒有一個明確答案，但六月底前，美匯好機會會見底。

股市轉眼已經到萬九點，下一步又如何? 上日我們已經提出過「潘朵拉盒子」，今天聽完黃元山在華爾街速遞的說法後，更堅定了這個信念。 伯南克是研究大蕭條經濟專家，他當然明白當年經濟大蕭條時候收緊銀根會帶來何等災難性影響。 結果伯南克選擇以「量化寬鬆」的貨幣政策，不單一舉將息口推至零，同時大量增發貨幣供應，大量購買國債及企業債券，以圖推低市場利率，令實體經濟可以受惠。 可惜市場並非一個靜態的體系，面對聯儲局一方面大舉增加銀根，市場早已洞悉聯儲局的想法，因此聰明的資金大量購入資產，包括股票樓市商品，不過通脹的預期就令長期息口趨升，而債券孳息曲線就有愈來愈傾斜的跡象，結果長息趨升只有令實體經濟卻全沒有受惠。 另一個令人苦惱、難以解釋的是Libor的懸念。 倫敦銀行同業拆息，以三個月最為廣泛應用，一直被認為是最能反映資金成本的指標。 這個利率指標在金融海嘯期間，曾經升至四厘八的歷史高位，而隨著信貸市場有改善(至少市場認為是)，利率一直向下跌，甚至跌穿零點九厘的水平，理論上各行各業都可以因為低利率而受惠。 當然，現實是這個情況根本沒有出現。 可以理解的一個說法，是目前銀行不論大少，都有「國有化」背景，就算一些未有政府注資、不過只要規模夠大，「Too Big to Fail」一樣可以成立，橫豎大家都有「阿爺」支持，怎樣也不會再有銀行倒閉，為什麼不借貸? 但大家不是看到仍有好些中型銀行繼續倒閉嗎? 如果銀行真的願意借貸，那些銀行豈有不借入資金續命? 不過由VIX及 CDS反應來看，信貸市場根本沒有復蘇，通脹及資產價值卻同時加劇，結果大家就只有一窩蜂將資金放入股市樓市商品市場，只冀求自己不會是最後一個。 其實說穿了，根本連伯南克亦不能掌握到底大量執行「量化寬鬆」的後果。有些經濟指標是改善了，但大家，感受到嗎? 經濟復甦由甚麼去定義? 股票升幾個價位、層樓升值了多少個百萬，但就是代表了經濟好轉，大家分工更有保障嗎? 要真正經濟好轉，我們需要的是企業願意增加投資，同時增加就業職位，令失業人數下跌，工資方有望改善。 以今天的經濟狀況，大家都明白我們離這個狀況仍然相當遙遠。 阿松引述雙城記說，「這是最好的年代、也是最壞的年代」，其實好壞今天已變得相當模糊，唯一可以肯定的，就是一個「不確定的年代」。